ألحلقة ألسادسة عشر ///من أحداث قصتي///
بعنوان /////حصاد ألمواسم
خطت بقلم ///فراقد حسن علي ///
----//////----//////----/////-
أني ما محتاج
بس ألله
وأبوي
وشيلت أمي ألدافية......
----//////----//////----/////-
هديل //مرت الأيام على عركتنه أني وألبنات
وكله بسبب أزهيران ألحقيرة...هي ألشعلت فتيلة هاي ألعركة...وأنوب طلعت زعلانه من بيت أبوية....
وأجت أمها هدت علينه...وسمت روحي بحجيها ألوسخ
والله دعيت من كل كلبي على كل واحد يأذيني.
ومشيت ألايام عادي...وحياتي ويه ألكل،،يوم حلو
ويوم مر...على كولت كميلة بعد هاي سفينة ألدنيا كل يوم يمر عليها شكل...ماكو يوم يشبه أليوم ألثاني.
وبيوم صبحت نهلة تتلوى...وتفوج بالكاع من ألوجع.
ووجهه غادي ليمونه ...
سألتها كميلة //شبيج هيج ممروده...؟؟
كالتلها// يمكن راح تجيني ألحبابة.
أني صح ما أحجي وياها...بس أستخطيتها
ما كتلها على شغلة تسويها...
أني كرفت ألبيت كله ونظفته
وعجنت .. وخبزت
وسويت غدة...وحتى من تغدينه ،، هي ما أكلت
بس تتلوى .. وتجطل هنا وهناك
ألجو بارد...بداية شهر ألثالث ...
وأحنة كلنه متعودين...شته وصيف نغفه شويه ألظهر
ما نعرف أذا ما ناخذ كسرة...يعني عدنه تعويد بس نتغدة ونشرب جاي نغفه شوية ألظهر .
هستوني غافية...وأسمع صوت كميلة أدك باب غرفتنه
تريد محمد تكول//يمه محمد ألبسلك شي مرتب وتعال وياي...نأخذ نهله للمستشفى ما أعرف شبيها .
طفرت وره محمد لغرفة نهلة..
وألكاها تفوج بالكاع من ألوجع وتصيح//خاله ألحكي عليه راح أموت بطني تكطعت .
شلناها أني ومحمد من ألكاع ...وجطلناها على ألقريوله..
محمد كالي//بسرعة بدلليلها بين ما أجيب سيارة جاسم
وأنتي هم بدلي تروحين وياها.
أني وكميلة بسرعه بدلنالها...لبسناها دشداشة زينه ولبسناها ربطة...
وكميله كالت//عوفي عبايتها لا تلبسيها ألها...ناخذ ويانه شمريها بالسيارة.
أني ركضت ولبست دشداشة مرتبة...ولبست ربطتي ولبست عباتي...ومحمد ما عندة بس جم فلس
أخذتهن وضميتهن بالصندقجة...ما عندي جيب
خاف نحتاج شي بالمستشفى.
أجى جاسم ويه محمد..وأخذنا نهلة لمستشفى ألحلة العام التعليمي...بسرعة جلوا عليها الأطباء...
وأنوب حولوها على الردهه النسائية...
شافتها ألدكتوره كالت//سونار فوري...
شافوها بالسونار...شو كالت ألدكتورة //عمليه فوراً
عدها جيس طأك بطنها وملوث ألمبيض الأيسر .
وهي فد خافت...لأن سمعت بيها عملية
وألوجع دمرها...
وأنوب تخاف لأن لا أهلها يمها...ولا علاوي موجود ،
محمد ... وجاسم هم ألكملوا كلشي
وسولها طبلة دخول للمستشفى.
وكميلة كامت تبجي عليها تكول//خاف يشلون رحمها
لأن تلوث من هذا ألجيس...وبعد ما تخلف
وأنوب بعدها صغيرة...سودة عليه يا يمة ياعلاوي
هم ما عندك حظ .
أني من يمي خفت...وكمت أبجي...كلش أنقهرت عليها
من أخذوها ودخلوها للعميلة...وهي تبجي وتوصي
تريد أمها وأبوها يجون عليها.
محمد...وجاسم يتسابقون على شرب ألجگاير ...
وكميلة...تدعي وتنخي برحمة الله وكرم ألنبي...
وبقت تلوب تروح وترجع بالممر مال مستشفى .
يمكن ساعة وربع أكثر ...يلا طلعوها من غرفة ألعملية
مخليها على قريولة ألمستشفى...وترجف وصاكة على سنونها...وهم ألولد كالوا//غطوها تنفض من ألبنج ،
وأخذوها لغاوش ألنسوان ..
وهي بقت تخرط...شكثر حجت وسولفت
حتى كامت تبجي...طلع علاوي هاجرها
وهو ينام بالكاع...وهي تنام على ألقريولة
تبجي وتكول//والله بعد ما اعاندك وأسمع ألكلآم
وبعد ما أتفق ويه فاطمة على خالتي كميلة وهديل
والله بعد مالي دخل بوحدة بيهم...بس لا تزعل عليه
مو تعرفني أحبنك شبيك هيج مجافيني.
كميلة تبجي على حالها...
والله حتى أني مقهوره عليها .
أجتي ألدكتوره ألسوتلها ألعميلة...ولعبت فلك بكميلة ومحمد...وجاسم ،،،كالتلهم//ليش هيج هاملينها
وما مراجعين بيها...لكيت على المبيض الايمن كيس جلدي...وعلى المبيض الايسر كيس مائي طاك وملوث المبيض أضريطت أشيل نصه.
وكميلة لطشت بالدكتورة تكلها//من تصير زينه...
هم تحبل وتخلف...لو بعد ما يصير عدها خلفة .
ألدكتوره لو ماشوية يمكن تلزم كميلة وتكتلها
تكلها//تلحك على شلعان ألكلب...خليها تحصل على صحتها بالأول...ربج سترها ونقذنه رحمها.
هي خطية تون وتبجي متوجعة...مخليلها صوندة للأدرار ...وصوندات للخراج مال ألعملية
ألليل كلة ما نام...بس تبجي وتلوب من ألوجع
وأنوب صخنت غدت جمرة...
وبقينه أربعة إيام بالمستشفى
أني أبد ماعفتها...لأن أكدر أحركها وأساعدها...أمي كميلة ماتكدرلها..وأجتني أمها أنتصار ساعدتني
وال هاشم...كلساع تجي روجه للمستشفى يشوفوها.
خامس يوم ورخصتها ألدكتوره من ألمستشفى
بعد ما اطمئنت على صحتها
وشالتلها صونده الأدرار...وصوندة ألجهه أليمنه
بقتلها بس صوندة ألجهه اليسرة .
ماصدكت طلعنه للبيت...بوجهي للحمام فرحت الليفة
جلفت جلفة مال مطي وشامرينة بالخيسة
طلعت أبرج من ألنظافة .
انتصار جابت بتها سعده بدالها...وهي راحت للبيت
محيسن ألاغبر متعلم عليها ما يفاركها أبو ألكلك .
وهنا أبتليت على عمري من خدمة ألخطاطير
شكد تعبت...بس كلت ميخالف في سبيل الله
وهذا تعبي بثواب أمي شهلاء...وأبويه شامل
خطية دوم أذكرهم وأقرالهم ألفاتحة .
وبيوم أجتي سهاد...وأمها...وأختها سعاد
بعد عمري شكثر مشتاقتلها...وحدة حظنت ألثانية
وكمنه نبجي...أحنه خوات مو صديقات
وأبشرجن هم رزلتني//كالت خايبة شحالج...عليش هيج هاملة روحج...زين منه ألمصروع يعاين على جهرتج ألخايسة.
كتلها//والله أبد ما طالعة ...
ونور ماعدها مجال تأخذني للصالون .
تفلت عليه وكالت//دكومي ويايه ألغرفتج
خلي أكسب بيج أجر وأعدلج شوية
حسبت حسابج...وجايبتلج شغلات تفيدج
أعرفنج غمة وما تهتمين بروحج .
صدك لزمتني حفتلي وجهي...وعدلت حواجبي
وسوتلي شيرة...وجايبه وياها عصارتين صبغ أسود
أول شي كصت شعري دلص...صح ألكصه مو هلكد عدلة
بس زينة طلعت حلوة على وجهي لأن ألكذلة تلوكلي
وصبغت شعري وحواجبي ورموشي لون أسود.
ومن راحت بالكوة لزكت عليها فلوس
كالت//ميخالف راح أخذهن منج...بس أعتبرهن مسواك ألج على شوفتنه مرة ألثانية...أتسوكلج بيهن ألج شغلات تفيدج .
صدك من راحت...أخذت حمودي ويايه للحمام
وشديت عيونه بالربطة...ودرت وجهه على الحايط.
وبقيت أسولف وياه...خطية هو يضوج لأن اشد عيونه
بس ميخالف ألمهم يبقى يسولف وياية بين ماأخلص.
بسرعة غسلت شعري ،وليفت ليفة معدلة .
بدلت دشداشة قديفة نيلي تلمع...
ومكيجت شي خفيف...يعني كحله وحمره خفيفة
وجففت شعري بالفير والله طلعت كصتة حلوة
ولبست ذهبي ،
كميلة خافت علية كالت//ممنوع تطلعين من غرفتج
اذا أجت وحدة من ألحياية...وعلي يصكرنج بعين
وينعلن سلفى سلفاج .
محمد تسودن علية...كلساع ولاحكني للمطبخ
ويكلي//خفي ايدج...لو خلي سعدة تكمل ألعشا
خلصيني أريدج روحي هامت عليج ،
وأني أسويله حركات أحمس بي حمس.
بعد ما أنسدت علينه باب غرفتنه...وبعد جولة ألمصارعة
من تقربلي ماعندة رجولة...هو هنا دك روحة بالكاع
فد ضاج وأنقهر ...خلقته أنكلبت .
كال//أعرف نفسي عندي خلل...
أكيد رجعلي ألتهاب البروستات...
الطبيب كالي//اذا صار عندك وجع بالحوض...
لو صعوبة بالتبول لو خلاله...راجعني
وأنا هملت روحي...من كبل فترة وجاي عندي خيط دم بالبول...ويصير عندي وجع من أتقربلج أكيد الالتهاب صار قوي .
عودين صرت متحجيه...وأريدن أواسي كتله //عيوني مصروع كلبي...وجني روحي لا تزعل ولا تضوج
روح راجع ألطبيب لا تبقى كاعد...أخاف عليك
خاف يصير شي مو زين اسم الله.
كالي //بأجر ان شاء الله اخذ عصام وأروحلة
ولو هو مطي ومطفي...بس خلي يكتبلي علاج
يشغل ألشسمة مو أدمرت نفسيتي من وراه.
صدك ثاني يوم ألظهر أخذ عصام ونزل للولاية
هناك يراجع الطبيب ألمطفي.
أجى كلش ضايج...وطلع كلامة صحيح
راجعلة ألتهاب البروستات...
وصاير عدنة تضخم بيها من الالتهابات...
وألدكتور منطي كوم علاجات وأبر .
يمكن وره يومين وينزل باقر من دوامة
وكميلة ما قصرت سولفتله كلشي علمود فاطمة .
هو كال//خليها يم أهلها ما أريدها تجي خليها تتأدب
بس خلي عمي محمد يروح يجيبلي نسمة كلبي طاك عليها.
وصدك راح محمد...وكميلة جابوا نسمة وأجمي
وهي فاطمة طاكة وراهم من ألبجي على ألبنية .
نسمه ويا نسمة...داريناها أني وكميلة ...
فد حلوة...وجلدها ترف أموت عليها ،
اشبعها عض بالجذب...أموووت عليها من تكركر وتضحك.
عدت الأيام...ومرت أسبوعين يمكن...وباقر أصلا صعد ألدوامة...أجت طوعة تتوسل بأبوية...ومحمد
ينطوها نسمة ترجعها الفاطمة ممروده عليها ...
أبوية مارضى ينطيها .
هنا علاوي نزل من كليتة مجاز ...
ونهلة جانت هنا طايبة وصايرة زينة ...
من طب للبيت...وهي شافته كامت تبجي..عافت جايها وريوكها راحت ألغرفتها تبجي....جانت تقريبا ساعة
ب ١١ كاعدين نتريك أني وياها ريوگ ثاني.
كمت بوجه...وسلمت عليه وبوستة
وهو يكلي//ولج شو محلوة ومربربة...هو شهر عفتج وهيج صرتي حلوة.
كتله//جا أكل ألتمر والدهن الحر وية ألتمن وين يروح
ورجعت أشرب حليب واطك بي بيض...
هو ضحك وكالي// بالعافية .
دنك وبوس حمودي...وشال نسمة من ألكاع
كال//وين أمها شو مالها صوت .
كتله//أبويه لزمها ألباب أستفحلت علينه...
وركبت حتى باقر .
ضحك وكال//هي من يومها ركبت باقر..من داست على رجلة بيوم دخلتهم .
سألته //عود ليش داست على رجلة ما أفتهمت.
كالي //ولج اسألي أمي وهي تكلج شنو يعني.
كعدت على ألصينية ياكلة لكمة...
أني بسرعة كتلة//أكلك علاوي بروح عطأ
ورة ما تشرب جايك...روح راضي نهله ...
وعلي طلعت من حلك الموت وراك
سوينالها عملية...وشكثر بجت عليك بالبنج
وأبوية متحلفلك جيفين هاجرها.
هو عاف كلاص ألجاي بالصينية...وباعولي طابك حواجبة كالي //شبيها نهلة
كتله //دكوم روحلها...يالله شكثر بارد وكلبك قاسي
دكوم أشعل بليسك...كومته من مكانه ودفعته
طردته الغرفتة .
كمت لملمت ألكاع...وأخذت نسمة ويايه ألغرفتي
هنا لعب الحنان براسي...وحسيت بشعور حلو ،
رغم ماهي نسمة تشرب ممية...وننطيها حليب هوش ،
بس ردت أجرب شعور الأم شنو ...
طلعت صدري وكعدت أرضعها...يمة جسمي كش
فد شعور كلش حلو...كلت//ياربي أرزقني بجاهل حلو نفس نسمة.
وعدت الأيام..والاسابيع..والاشهر..ومرت خمس أشهر ونسمة عندي...أني ونهلة وكميلة أنداريها.
لحد ما بيوم طوعة..وأبنها صادق ألجبير أبو ليال
بنتة ليال أكبر من فاطمة...هم ألجابوا فاطمة ،
واجمي يتعذروا عن تصرفاتها ألقبيحة.
محمد كاللهم//وعلي بس تزل ويه مرتي...
لو ويه وأحد من أهل هذا ألبيت أكص لسانها...
لا تشوف روحها فد نعال لاستيك ومعاد ...
وترى محد يكللها عفية من تصير برعة...والسانها متبري من لشتها .
والله وراها بالأيام ألاجت فاطمة شوية أنكسرت شوكتها
وكعدت وأستجنت...بدون ما تسوي مشاكل.
وباقر بعد رويحتي كاسر خاطري
ما أدري ليش أحسة متندم على زواجة من فاطمة
بس أبد لا يضربها...ولا آله شغلة بيها
حتى لأبسها...ولاحظتة ما يحجي وياها هاملها
بس يموت على بنته نسمة.
وهنا دخلنة بسنة ال ٢٠٠٠
وصار عمري ٢٠ سنة ...
ومصروع كلبي ٢٨ سنة ...
بس صلوات على ألنبي صرت كلش زينة
ورجعت مثل قبل...ومحافظة على صلاتي
وذكر الله ... وقراءة ألقرأن .
وألبسملة ما تطيح من لساني
بس بعدني أدعي لرب ألعالمين يرزقني بجاهل...
وتصير كل حياتي حلوة .
وهنا باقر صلوات خلص من دوامة
بالمعهد ألطبي مال الموصل...وطالع من ألأوائل
صلوات بسرعة حصل تعيين هناك يمهم
أشتغل بواحد من المستوصفات الصحية مال ألموصل.
محمد ... وعلاوي مشجعينه ...
يقدم هناك ويكمل كلية ألصيدليه....
وهم علمود شغلة حتى ما يعوفة...يعني يشتغل بالمستوصف...ويدرس بنفس ألوكت
وهم مايلبس عسكريه ويخلص من ضيم ألجيش.
وهو سمع بنصيحتهم...وكاعد يركض علمود يقدم على كلية صيدلية...وان شاء الله من يخلص كليته
يجي نقل لهنا...بهذاك ألوكت هو هم مخلص كليتة
وهم يفتحلة صيدلية خاصة بي...فد كيفت للفكره
يارب هيج ويصير أخوية باقر أبو نسمة أبو صيدلية
والحمد لله حصل على تعيين وشغل بالدولة وصار عندة راتب .
وألحمد لله علاوي خلص من كليتة
وكايل لمحمد //نجحت من ألصف الرابع ...
بس أستغربت شو بعده يروح ويجي لبغداد
من سألت محمد أفتهمت من عندة هو لابس عسكري ست أشهر لو شويه أكثر ألمهم أقل ألسنه
ومايريد كميله تعرف...كايللها راسب بالصف...
وبعده يدرس.
وصلوات صديقة مواعدة بشغل...
لأن أبوة يشتغل هنا بمديرية زراعة والرأي بمحافظة بابل...وصلوات يكول الموظفين بهاي المديرية
رواتبهم زينه...لإن المديرية هي ألمسؤولية وتشرف
على كل الأنشطة الزراعية ،،
وهو مكيف يكول // راح أصير موظف أداري بيها .
وهو هاي ألفترة من يجي من بغداد مجاز
يسكن ورشة ألنجارة...يطكطك بيها
والله محمد يكول علية//أسطأ معدل خوش يصمم ويشتغل...صلاوات هو من ألبداية يحب صنعة ألنجارة.
وحمودي حبيبي هسه صلوات نجح من ألصف ألثالث ابتدائي...وراح للصف ألرابع...وصاير أحسن ما يخاف من ألمدرسة .
عون حبيبي راح لصف السادس أبتدائي...
وصدك كل مايكبر...ينطي شبة للمرحوم عطأ
كلش حباب وكلبة طيب و فقير.
وسجاد صلوات نجح من ألصف ألخامس علمي
راح للسادس علمي...وخشمة بعده يابس
ويريد يصير مهندس أبو نغفه
بس صاير شوية أحسن...مايسوي مشاكل
أبوية ومحمد صاكرينه...وبلكت الله يعقل شوية
بعتباره كبر وصار أطول من أبوية.
وأني كمت أعشق أغنية أصالة نصري
يامجنون مش أنا ليلي...ولا بنسمة هواك مايله
عايزني أقول بحبك ليه...بحبك بس مش قايله
وأبقى أركص عليها كدام محمد
وأكله //ترى أني ما أحبك .
هو يضحك ويكول//هذني ألكلمات فاشلات
ويكوم يغني ويطك أصبع يكول//
يبنية عايني عليه...وبذاك الصوب بتكم يساده...
وين الصلاة والصوم وين العبادة...
أحسه يذبلي بسماير لأن أني ألحبيته وذبحت روحي عليه.
أي ومن دخلنة بسنة ال ٢٠٠٠
وتعالوا أسمعوا الإشاعات...أشكال وألوان صار ألحجي
ناس كلش خايفين...والله شنو راح تصير يوم القيامة
وراح ينتهي العالم...وشكو شي كهربائي يوكف
يبووو شكد سمعنه هيج سوالف
علساس بهاي سنه هي نهاية العالم
بس كلشي جذب...كلشي بيد الله .
هنا وبداية هاي سنة...وتصير عدنة أحلى وأغرب مفاجاة بالعايلة.
كميلة عدها ألحبابة كامت تخربط...
تروح وتغب عليها ثلاث أشهر وأكثر يلا تجيها
كايلاتلها ألنسوان //والله كبرتي وراح تكطعج
و بعد ما تخلفين .
هي مرتاحة للسالفة...صح تبوخ...ومرات تبرد...
وجسمها مخربط...بس مكيفة علمود تصوم براحتها
وما تفطر برمضان...
وعلمود ما تكعد بوكت ألتجيها بالايام العادية وتعوف ألصلاة...تبقى تستحي من ألولد .
وليش ما يبوم وكميلة من ألصبح كالت// أمشي بدلي
نروح للمستوصف ألصحي.
كتلها //ليش شكو ؟؟
هي ألحمد لله لا مريضة...ولا بيها شي
كالت//أمشي بدلي وأمشي وياي .
والله حتى ما كلت لمحمد...رحنه أني وياها وحمودي
من وصلنه أكو دكتور موجود كاعد ...
من دخلنه علية هي كالتله//بنتي مالها خلك وغابة
عدها العادة صارلها خمس أشهر...وتهجس روحها حبلة
أريد أسويلها تحليل حمل .... !!!!!!!
أني بقيت فاكة حلكي...هاي شبيها كميلة تسودنت
وهي تعرف بيه ما صارلي أسبوع من غسلت من عدها
ولحد هسة عندي مخربطة...بكيفية تروح وبكيفها تجي
أبد ما أنتضمت عندي من يوم ألطرحت.
رحنة لأبو ألمختبر أنطانة شيشة صغيرة كال//خلوه بيها أدرار ...شو كميلة أخذتها ودخلت للحمام .... !!!!
هنا يلا طخت عندي كميلة شاكة بروحها حبلة.
والله أنتظرنة ألتحليل يطلع ...
وابو المختبر يضحك بوجهي وكالي//مبروك أختي حامل ...تكومين بسلامة .
أني هنا تفل ألشيطان بحلكي...هلكد ضحكت على كميلة
والله ألولد الا يدكولها طبل ويشهروها .
وهي تسودنت..ومن كل عقلها كامت تبجي
تستحي من ألولد ومن ألناس.
تكول//هسة ألوادم يكًولون//تغار من ألجناين وحبلت وياهن .
حلفتني مية يمين ما أكول لواحد...
اني هم سكتت...وما حجت أبد...حتى لمحمد ما كلت
خطية كسرت خاطري...وشفتها سالفة صعبة عليها
عدت يمكن عشرة أيام على ألسالفة ...
وكميلة ما حجت...بس أشوفها تشرب بهل كلاصات الدارسين وترجع ليوره...وتاكل فلفل حار بالاكل ،
وكلساع وصاحت على نهلة...لأن شوية رفيعة
تكلها//تعاي دوسي على ظهري يوجعني
وحتى عون...وحمودي تخليهم يصعدون على ظهرها
يدسوها .
هنا محمد أخذني للمحكمة رحنة سوينه
علمود معاملة ألعقد...وأنوب حولنه للمركز ألصحي سحبوا من عدنه دم وكالوا//عشرة أيام وراجعوا للمحكمة .
ليش ما هنا...و فاطمة تبشرنه هي حبلة ...
وعلى حسابها هستوها داخلة بشهر ألثاني .
هنا نهلة طكت من ألبجي ...
لكيتها بالحمام...تجلف بالملابس بالطش وتبجي
أني بالصدفة رحت للحمام أخذ شوية تايت
أريد أغسل بساط مادته بالحوش
ولكيتها تشهك وتبجي ... والله كسرت كلبي
أذا هي سمعت بفاطمة حبلت وتسودنت
لو تسمع بكميلة هم حبلة شتسوي ... !!
كتلها //نهلة لا تبجين...والله أني أنقهر من أشوفج تبجين...أنتي أختي والله أحبج على محبة أمي نور وأمي كميلة...شوفي توضي ألظهر وتعاي لغرفتي
أقرة سورة مريم على بطنج...سمعتها من سهى بت عمي ساجت معلمتها عمتها تكلها //أذا المراة تريد تحبل
تقرة سورة مريم على بطنها...وحتى تجيب ولد
شو هي كامت تشهك وتبجي بالزايد
تكلي//ليش انتي هيج ما تحقدين على ألوادم
ولج أني شكثر أذيتج .
كتلها //ولج يالعوبة لا تنسين دمي وعرجي مسيحي
وأبوية كالي//ألمسيحيين حبابين ومن طبعهم يسامحون...وأذا وأحد ضربهم راشدي يمدون خدهم ألثاني ويكلوله اضربنه راشدي لآخ.
ويالعوبة لا تنسين ربتني أمي نور...وأمي كميلة
وأبوية سيد فاضل أبو عطأ...وأخواني ألولد
كل ألمسيب تحلف بروسهم لأن حباببين وخوش أوادم
أني ما أحقد على بشر ...بس عندي أحساس ترف
مثل ما يكولون...وبسرعة أنقهر وبساعتها أكب
وبعدين أنجب وأسكت.
وجان أعيط بيها//ولج خلصي خفي أيدج
المي ألحار خلص...لو أعرف ليش ما تبطلين هذا ألتعويد وتغسلين ألملابس بالغسالة.
وصدك ورة ما خلصنة شغل ألبيت...
وصلينة ألظهر والعصر...وكملنه غدانة
طردت محمد من ألغرفة كتله//أريد أسوي شيره لنهلة
ونريد أنحف.
هو هم ما كال شي...خلى وطلع راح نام بالهول
ولجن شحده مايسمع كلامي غير أفقصة فقص
جذب والله بس أهوبز يمجن...يكفخني بس كفختين يسكطني .
هي نهله خطية ما تعرف تقرة وتكتب...وكلش مقهوره
أنجطلت كدامي وهي تبجي...
وأني لزمت بطنها وقريت عليها قران.
اني أستغفر ألله مو هلكد قوية بقراءة ألقرأن
أبقى شكد أعيد واصقل بالكلمة...ومرات اسأل محمد
لو واحد من ألولد لأن ما أعرف أقره الكلمة صح
كتلها//ابقي نايمة...من خلصت قراية السورة
كمت أدور بالجررات...وطلعت قلم جاف محمد يكتب بي مرات بليل أشعار...من يصفن وياخذلة دالغة ويبقى يدخن.
جبته وكتب على بطنها //بسم الله الرحمن الرحيم
الله هو خير ألرازقين.
وألحمد لله من هذا أليوم ونهلة تغيرت وياية
وصارت أختي وصديقتي...
ما أعرف جربتني صدك أني أحبها من وكفتلها بعمليتها
وهسة شافت نيتي ألصافية وياها...ألف ألحمد لله
من رب العالمين رزقني با اخت مثل نهلة ...
يتبع ......