ألحلقة ألثانية عشر ///من أحداث قصتي///
بعنوان /////حصاد ألمواسم
خطت بقلم ///فراقد حسن علي ///
----//////----//////----/////------------
أنهيار محمد ... على أحوال زوجتة هديل 👇👇
مختصر الحلقة
أجى واحد عليّا وكالي شبيك....؟
أحسّ حملك ثكيل ودمعة بعيونك....
وأحسّ داخل كليبك نار تشعل نار .....
وأحسّ ظهرك حنيتة وهدّلن متونك.....
كتلة القصة هيج وهيج بيّا الصّار .....
صـــــاح: الله أكبر، عمّي خيعونك.....
----------------------------------------
محمد //عفت هديل مربوطة بشباك ألأمام
وتردم وية روحها... كميله حايرة بيها ...
أخذتلي ركن...بضريح ألأمام علي أبن الحسين
سبع ألمحاويل....وغفيت ،،،
أجتني أمي بالطيف...
أنا بنفس حالي...ومجطول بنفس مكاني بالضريح
هي وكفت على راسي أبتسمت بوجهي ...
وكالتلي//يمة لا تعوف ألامانة...تراه ربك موصي بيها !!
وطلعت دولكة فافون من جوة عبايتها...وصبتها علية...
شنو ألمي ألبيها...بارررررد ثلج جسمي.
وموش بحساب دولكة...لا حسيتها تانكي مي وغطتني بي...وأنا شهكت ألمي من صبته على وجهي ...
حسيت بحالي أختنكت...لأن بشهكتي دخل ألمي
بحلكي وبخشمي...فزيت مخنوك...حسيت روحي أنا وألغركان بنفس ألخانه ماكو هوى...وكمت أرجف أحس ببرودة ألمي صكت عظمي وبعدها بجسمي .
من وعيت على نفسي...
بعدني على جطلتي...وبمكاني بالضريح...
عاينت ألوادم تروش بالمرقد....
وكميلة...ماخذتلها ركن وهم مجطولة...ما أدري غافية
وسجاد...ماكو ما أدري بي وين رايح.
انتبهت للشاله حالي .... ومبهذلة أحوالي
اااااخ ... كصت من گلبي تاووووه ((طاوه))
وخبزت علية عيش ... وعجنت حلاوه
بعدها على ربطتها بالشباك ...
أعاينلها...ساكته ما تردم بصوت عالي
بس تنفض بجفوف أيديها ... وتهز براسها
أنتبهت هاي تسولف ويه روحها بصوت ناصي..
كمت عليها ... وكعدت كدامها
عودين حاجيتها كتلها//هديل ما جعتي...ما عطشتي
أجيبلج شوية مي تشربين...
هنا زركتني بتفلة غسلت وجهي..
صحت بصوت عالي// لا أله ألا ألله
يارررب محمد أرررزقني ألصبررر .
سمعت صوت مراه ورايه صاحت عليه//أكلك خالة يالوليد...شمالها حرمتك...أستغفر الله...لو رضيعتك.
ألتفت وراية...مراه تطلع بحل كميلة
مشيلة...وبحنجها دكة خضرة بشكل ورده
كاعد تسبح بركن ألمرقد...وبصفها جاهل موش صغير يطلع خامس ،، سادس أبتدائي .
جاوبتها بلسان وكلب عاجز//خالة هاي مرتي ...
والله يجفيج ألشر ملبوسة..
وصارلها سنة من راكبها ألجن ألعاشق...بشهادة ألسادة وألشيوخ .
عاطت عليه// ياااااااع...خايب خالة وساكت عنها ،
ولك يمفولك خطيه...ما تعاينها مسودنه.
كتلها //خاله والله ما خليت مكان وما زتيتها آله
ياسيد...يا شيخ ... أسمع بي أركض عليه
وماكو فايدة ...
كالتلي //أكلك جأ ما أخذتها ألكاكا حمه
ألساكن يم مرقد ألسيد فرج الله محمد ألعابد
هو شغلته يطلع ألجنون من ألوادم .
جاوبتها//لا والله خالة ما أخذتها...وهاي أول مرة أسمع بي...وحتى ألمرقد ما أندل مكانه وين صاير
ردت جاوبتني بعيطه //ياااااااع خايب يالمسودن
غير مجانه باللطيفية هاي هي شمرت عصأ ،
شو كوم وياي...أنا أخذك ألدرب كاكا حمه
بس لا تكله أنا ألدليتك عليه تراه يتسودن.
صفنت هاي المرأه صاحية...لو مسودنه حالها حال هديل
وأنا غركان...وأريد أجلب بكشاية
وحتى لو هاي ألكشاية جذبة هم راضي بيها.
كمت ورحت ندهت كميلة...
الله يساعد حالها...أنمردت على بتها
//أم عطا ... أم عطا
شو كعدي يبعد نسوان ال هاشم كلهن .
فزت ألمسكينة خايفه حاجتني بخوف//هااا...أحميد يمة شبيك...هديل جرالها شي.
كتلها //أم عطا ما تعاينيلي هاي المرأه
شو تكلي تعرف زلمة باللطيفية...هو يعرف يطلع ألجن من هديل.
شالت أيدها للسمه وكالت//يااااااااالله ....
داخله دخيلة دم ... أبخت ألزهره ألبتول
كونها تعاين ألحال أبنيتي...وتخلصها من ألبيها .
كامت كميلة وراحت على ألمرأه...
وتقربت عليهن أسمع حجيهن...وكميلة تحلف بيها وترجع ليوره...وكون هذا ألزلمة مجربي ويعرفونه صادق بمعاملتة ويه ألوادم.
هي ألمراه أصرت تمشي ويانه...وتدلينه عليه
تكول//كلشي مارايدة منكم...وهاي روحتي وياكم لوجه الله...بس كون تدعون لوليدي ما يأذونه ألأمن
ماخذينه بسالفة تهريب عبر ألحدود ...
وعلى كلامها...هو برئ ومشتبة بي.
كميلة تكلها// أحنة ألعلينا ندعليه بكلب صافي
ومثل ما أحنة كلبنه محروك على بنيتنه...
أكيد أنتي كلبج محروك على وليدج....
كون الله يفگ كربتة ... ويرده ألج سالم
وتگر عيونج بشوفته ... وتفرحين بدشته عليج
وكون الله لا يفجع كلب كل وألداه بولدها
بجاه هو ألسميع ألعليم ..
كامت ألمراه...وكادت أبنها ألصغير...ومشت كدامنه
وكالت // أتناكم باب ألضريح
رحت دورت على سجاد بالصحن...
لكيته كاعد ويه عايلة ... ويتغدة وياهم
وأنوب أمهم جلبت بيه...ألا تجي تتغدة ويانه
وهذا ألغدة بثواب ألأمام ....
ما خلصت روحي منها ألا بالشافعات
وصدك ما أشتهي ألشهد ... روحي خلصانه
أريد كون هسه أطير ... وأوصل ألهذا ألزلمة .
رجعنه على هديل...وفكيتها...وسحلناها أنا...وسجاد
وكميلة...تمشي وتفزع بالوادم ألغربة...
وتنخاهم يدعولها دعوة غريب ألغريب...
وكون الله يفكها من ألبيها .
أخذتهم من جديد...
وتوجهت لمرقد ألسيد فرج الله ألعابد...
ويانه ألمرأه ألغريبه أدلينة على ألطريق...
بس يمكن بألف مرة قليل...أكدت عليه ما أبلغ ألزلمة
منو دلانه عليه...
ألعرفته منها...ألزلمة كردي...وبيته قريب على ألمرقد
بس مايستقبل كل وأحد ... يخاف من ألأمن
وبعد أنا وشطارتي...شلون أقنعة يستقبلنة .
والله أنا ما واصل كبل لهنا ...
وأنوب كلها كياعين زراعية...ما أندل بيها زين
و وصلنه ألبيت الزلمة بوكت ألعصر ...
وهي ألمرأه بس وصلنه أخذت أبنها وسلمت علينه
ومشت بحال سبيلها...حتى كبل لا ننزل من السيارة
دكيت ألباب على بيت ألزلمة...وين يلا أجاني صوت زلمة كال//منو بالباب...؟؟أنتبهت كلامه بي لگة
مبين موش عربي.
فتحلي ألباب زلمة بداية الأربعين من عمرة
شعره بي شيب قليل ... ولابس سروال كردي
كالي // أتفضل أخي
سلمت علية//ألسلام عليكم ،حضرتك ألكاكا حمه
جاوبني //أي نعم أني كاكا حمه
بيش أخدمك
بعدني ما نطقت ... وحجيت ويه ألزلمة
وكميلة جفتت علية ... ودخلت على عتبة بابه
وهاي ألدموع كامت تهمل على ألوجه...
تكله //يبعد أخيتك...وبعد أهلها
أحلفنك بكل شخص عزيز ،، وغالي على كلبك...
دلتني عليك رحمة الله...وألوادم ألخيرة
وداخلة يمك دخيل دم...وما أطلع من بيتك
ألا تعاينلي بنتي شنو سالفتها...راكبها ألجن ألعاشگ صارلها بالسنه .
هو شنو ألزلمة تبلهت ... وحسيته خاف...
بقى صافن بوجوهنه مايعرف شيسوي ...
وكميلة طاحتله دخيل دم ... وتتوسل بي وتبجي.
سمعت صوت مراه من جوه بيته...حجت وياه بالكردي
هو هم جاوبها ... وبقى يرطن وياها كردي .
عاين عليه وكال//كاكا أمانة الله منو دلاك عليه
وأنت خو ما مبعوث من لجماعة.
جاوبته بلسان عاجز وينتظر بس رحمة الله //
أمانة الله ورسوله...مرتي ملبوسة صارلها سنه
وما خليت وأحد يعتب علية...لا سيد ولا شيخ ما دكيت بابه...وألصبح جنت رابطها بمرقد علي أبن ألحسين
سبع المحاويل ... ومراه خيرة دلتني عليك
وبعد أنت وكرمك ويانة...وأعتبرها صدقة جارية عن عزيز كلبك.
كالي //تفضل كاكا ،،تفضل ...أجتك توصية من ألحجية
كسر كلبها صوت بجي أمك .
نزلت هديل من ألسيارة أنا وسجاد
وهو ألزلمة ما قصر...أستقبلنة بيته وفتحلنه باب أستقبالهم...وألحمد لله هنا هديل خنست يمكن تعبت وتريد تنام .
بس كعدنا...دخلت علينه مراه جبيرة بالعمر
خطية كاعدة على كرسي متحرك...وسلمت علينه
بس تحجي عربي مكسر...مبينه لگة ألكردي طوخ بلسانها .
شوية وأجى يمنه ولد شاب...بحل باقر أذا موش أصغر
ويسولف ويانه طبيعي...هم عنده لكة بلسانه بس عربيته قوية .
المرأه سألتنا// متغدين لو بعدكم ؟؟
سجاد جاوبها //خاله متريك من أوذان ألفجر
وأكلت لكمة ويه ألوادم مسوين ثواب...
وعمي محمد مشلوش على مرته...ماخلاني أكمل غداية.
والله بيت كاكا حمه ما قصروا ... سولنه غدة
وكعدنا تغدينه هيج بدون نفس أستغفر الله
كد سد ألجوعة ... وتقوية ألروح.
أكو مراه مادخلت علينه...من ألباب ناوشت فراش للشاب أسمة رامان ... فرشناه لهديل نامت بي.
بعد ما كعدنه نشرب جاي...كل إحنه
أنا...وكميلة...وسجاد...وكاكا حمه...وأمه ألخيرة
وأخوة كاكا رامان...وألحمد لله هديل طفت ونامت.
هو كالي//سولفلي من ألبداية مرتك شبيها...؟؟
أنا كلبي موجر من ألقهر...ما صدكت ألكالي كشه أجلب بيها...حجيتله سالفت هديل كلها...من يوم ألشنقت نفسها...وركضتي بيها بين ألسادة وألشيوخ ...
وألحد جيتي إلهنا .
هو صفن وكالي//مستحيل هاي سالفتها مال سنة
أبو ألسنه رقية سورة ألبقرة علية أربعين يوم
تشفي .
وأخذها مني كلمة موثوقة ورأس مال...
ألجن ما يركب أو يلبس الأنسان...فقط يمسه أو يلمسة ،
أو ينفخ عليه ويدخل بجسمة من ريحة ألخبيث
وألانسان قوي ألأيمان ما يوصل بصوبة أبد .
وسالفة مرتك ... على تعليمي بطريقتي
مو مال سنه ... أكثر من سنه ،
بس ما أعرف شنو سبب مسها ألا أرقيها
وهسه ما أكدر لأن غوربت ألشمس
وكت صلاة ألمغرب .
ولازم أحضر ألطريقة ... حتى أفتهم سالفتها ...!!
عاينت عليه وكتله// أنت درويش ...!
ضحك وكالي// شبيك أخترعت
أني أفتخر بحالي أني معلم للطريقة ألعلية ألقادرية ألكسنزانية .
كتله //يعني كاكا بس فهمني...أنت من جماعة ألدراويش
جماعة ألطريقة...وأتباع شيخ عبد ألقادر ألكيلاني.
جاوبني //أي كاكا أني درويش وأبن درويش
ومن أتباع ألطريقة ألعلية ألقادرية ألكسنزانية
وأفتخر بحالي...وبحال أبائي وأجدادي
أحنه من أتباع ألمعلم محمد أبن عبد ألكريم ألكسنزاني ألحسيني .
كتله // يعني هذا جدك ... لو مرجعكم
تعذرني ماعندي علم...ودراية كافيه بهذا ألموضوع.
كالي //كاكا باوع علية...ألمعلم محمد أبن عبد ألكريم ألحسيني...هو متصوف عراقي...وشيخ طريقة ألصوفية
أسمها ألطريقة ألعلية ألقادرية ألكسنزانية
ويختصروها بالطريقة ألكسنزانية .
وألمقر ألرئيسي مالتنة بالسليمانية .
وألشيخ محمد ألكسنزان ... دعى ألناس جميعهم
إلى توحيد الله .. وعبادته وألرجوع أليه...من خلال محاضراته أليومية...ومن خلال مرشدي ألطريقة ألكسنزانية...ألمنتشرين بكل ألعالم
سألته //كاكا حمه شنو يعني كلمة كسنزان؟؟
جاوبني//كاكا أسم ألكسنزان لقب عائلة ألشيخ محمد
ولقب جدهم عبد ألكريم ألأول...وكسنزان هي كلمة كردية...يعني لا يعلم عنه أحد .
رجعت سألته//وليش سموه بهذا أللقب...؟؟
جاوبني//لأن ألشيخ محمد أنقطع مدة أربع سنوات عن ألناس علمود ألخلوه
رجعت سألته...وألصراحة شدني ألفضول أعرف أكثر
عن طبيعة أمرهم كتله //يعني أختفى لو شنو هذا أنقطاعة...مافهمت شنو سبب خلوته؟؟
جاوبني//شوف كاكا عدنه من أركان ألطريقة ألكسنزانية
هي ألاختلاء ،، وألانقطاع عن ألناس...
وألعبد ألفقير ألكاعد كدامك...أختلى بجبال قرداغ (ألجبل ألأسود) ألموجود بضواحي مدينة ألسليمانية
وأنقطعت ست أشهر عن ألناس .
وبسبب مدة خلوة ألشيخ محمد...ألدامت أربع سنوات
ومن يسألون ألناس عن ألشيخ...يكولون أهلة (كسنزان)
يعني محد يعرف عنه شي..ومن رجع من ألجبل مشى عليه هذا أللقب
رجعت سألته//كاكا ألعفواً عن ألسوال...
بس ألشيخ محمد ألكسنزاني
منين...أقصد من ألمذهب ألجعفري...لو ألمذهب ألحنبلي
كالي//شوف كاكا...أصل ألعشيرة مال ألشيخ محمد ألكسنزان...هي عشيرة ألسادة ألبرزنجية
وألأبو مال ألعشيرة هو ألشيخ عيسى ألبرزنجي
أول من سكن ببرزنجة بشمال
كتله//يعني كاكا هسه أنت هم سيد وجدك رسول الله
جاوبني//باوع علية...أجدادي من تلامذة ألشيخ عبد ألكريم ألأول...أبو ألشيخ محمد...ألتبنى ألطريقة ألعلية ألقادرية ألكسنزانية..ومشى على نهجه من بعدة أبناؤه ،،وأحفاده
أني من قبيلة ألجبارية...عشيرة ألبانكولية
اصل أهلي من قرية كربجنة ألتابعة لناحية سنكاو بكركوك .
صح أصلي من ألسادة ألعلويين...لكني من أتباع ألشيخ عبد ألقادري ألكيلاني .
ضحكت وكتله//كاكا والله ضحكتني...هو ألشيخ عبد ألقادري ألكيلاني...هم يرجع نسبة للأمام علي ...
وأصله هاشمي .
جاوبني//أي كاكا أعرف هذا ألشيء ...
بس لا تنسى باز الله ألأشهب
أو تاج ألعارفين أبو محمد...ألشيخ عبد ألقادري ألكيلاني
هو إمام ألمتصوفين...وفقيه حنبلي...وأحنه نمشي وراه
يعني تكدر تكول ألكسنزانية...تلجم أكبر حلك
وتدوخ أكبر عقل...ما تعرف منين أفروعها
من ألمذهب ألجعفري...لو ألمذهب ألحنبلي
أنتم أتباع ألمذهب ألجعفري...تعترفون بالأئمة ألمعروفين عدكم هم أل ١٢ أمام ... وتسمون بالأثني عشرية
أحنة أهل ألطريقة ألعلية ألقادرية ألكسنزانية
نوكف بالاعتراف بالأمامة...عند ألإمام ألثامن علي ألرضا
سلام الله عليه.
وحتى لا تدوخ...يعني مرجع ألكسنزانية ألقادرية
ألأول هو ألأمام علي بن أبي طالب....
ويجي من بعدة أبناؤه ،،، وأحفاده...
لحد ما نوصل للأمام علي ألرضا....
ولهذا ألسبب سموها بالعليه...
وبالقادرية...نسبة للشيخ عبد ألقادري ألكيلاني.
من ألاخير ... وبدون مستحة أحنه مخبوطين
لا أحنه شيعة ... ولا أحنه سنة
وعنده أهم ركن...هو توحيد الله،،وعلينه بحق عبادته
وألرجوع أليه بكل وقت .
ولا تتعجب من كلامي...
لأن ألعراق هو منجم الأديان...وألمذاهب...وألأقوام
وهو ألماء وألتربة ألخصبة بهاي ألدنيا ...
وربك خلاه بالموقع ألمثالي وسط ألكون ...
وهو ملاذ ألأمان للخايف وألجوعان وألعطشان
ويكرم كل ألعالم من خيراتة ....
وينطيهم بدون مقابل من سهولة وجبالة وصحارية
وهنا نرفع أصواتنه بالصلاة وﭐلسلام ﭐلأتمان ﭐلأكملان
على حبيبه...ومصطفاه ﭐلوصف وﭐلوحي وﭐلرسالةِ وﭐلحكمة...وعلى وآله وصحبه وسلم تسليماً .
كل ألحاضرين...صلوا على ألنبي محمد وآل بيته وأصحابة أجمعين....
حسيت ألزلمة صادق بكلامة وياي
وماعندة دغش...وجذب علمود بس ياخذ مني فلوس
كالي بالصراحة// أذا ما بيها زعل...ممكن تروح تزور ألمسكينة لمرقد ألسيد فرج الله ألعابد...وترجعلي بعد صلاة ألمغرب...يعني لأزم أحضر نفسي...وأحصن بيتي وأهلي أخاف عليهم...ومايكون خاطرك ألا طيب.
أنا هم ما حبيت أثقل على ألزلمة...خلف الله عليه
وجزاه الله خير ألجزاء ...فتحلي بيته ،، وأستقبلني وعدني بمنزله أخوة .
أخذت هديل...وكميلة...وسجاد...ومشيت لزيارة
ألسيد فرج الله ألعابد...وهاي أول مرة أزوره
ألمرقد بناء كلش بسيط...ومكان فقير من كلشي
بس بي هدوء وألفة وسكينة عجيبة .
هنا ربطت هديل من جديد بشباك ألسيد فرج الله ألعابد
ورحت توضيت...وأجيت أصلي بالمرقد .
وأنا أصلي...سمعت هديل صاحت بصوتها ألطبيعي
وخايفه...//محمد وينك ليش ما أشوفك ....!!!!
كميلة...تصلي على جهة ،
وسجاد...وأكف بصفي يصلي
ألوادم كلش قليلين بالمرقد...
بس خلصت صلاة ألمغرب...وسلمت من صلاتي
طفرت عليها...//هاااا هدوله شبيج عيوني.
عاينت علية...وركزت بعيوني...وبجت
أنوب دنكت راسها...ورجعت عاينت علية زارت بوجهي تريد تاكلني...رشتني بتفله غسلت وجهي.
الله بهذيج ألساعة...ذب علية شي أسمة صبر
مسحت وجهي...ورحت توضيت من جديد
لأن أعرفها موش هي...أحس روحي أتنجست
ورجعت صليت ،
بالكوة كملت صلاة ألعشا...بس سلمت من صلاتي
وبعدها سجدت لرب ألسموات...وبجيت من خاطري ،
نسيت ألمكان...وألوادم...وألدنيا كلها
فقدت...وكمت أصرخ بصوت عالي//رررررربي
أمشي عليك محبة ألنبي محمد يمك
خلصني وخلص مرتي أليتيمة من ألبيها ...
رررررربي موش وصيت ألبشر بحال أليتيم
أنا هنا من هذا ألمرقد ألطاهر ...
ومن هاي سجدتي لعزتك وجلالك....
ومن هاي حركة كلبي ....
أودع هديل أمانة يمك....
أودعها أمانة تدخل باب رحمتك
أللهي...وسيدي...ومنقذي...ومخلصي
من كل كرب ... وبلاء
ومن كل شدة ... وداء
أرحم بحالي ... وبحال أليتيمة وخلصها من ألبيها
بحق عرشك...وجبروتك...وغضبك...ورحمتك
يا ألهي أشكيلك ضعف حالي...وقلة حيلتي
يا ألهي وسيدي...ومولاي...أفتحلي باب من أبواب رحمتك....بجاة كل حرف وكل كلمة نزلت على صدر نبيك محمد نبي ألهدى و ألرحمة .
رفعت راسي من ألسجود ...
وأحس كلبي بعده موجر قهر ،،وضيم ،، وحزن
وروحي مخنوكة من ألهم ألكسح عمري
صحت بصوت عالي...تملخت حنجرتي من ألصريخ//
اااااالهي تسمعني ...
أاااالهي محتاج رحمتك وعفووك ورضاك ...
أاااالهي عاين على حالي...وخلصني وخلص هديل من ألبيها...يامن خلصت موسى من ألغرق
وعيسى من ألصلب ...
ويونس من بطن ألحوت ...
ويوسف من ألسجن ...
وأيوب من ألمرض ....
خلصني بجاة حبيبك محمد خلصني...بعد ما عندي لا صبر ولا طاقة...وأخاف أجرم بحال أليتيمة وأحمل خطاها دنيا وأخرة...ربي الأمانة ثكيلة وكسرت ظهري
خلصني يااااااااااالله .......
يتبع .......😭😭😭😭