ذكريات ومقتطفات ///من أحداث قصتي///
بعنوان /////حصاد ألمواسم
خطت بقلم ///فراقد حسن علي
×××××××××××××××××××××××××
مساء الخيرات...وألعافية ❤🌷💐🍬🍫🍿🧁
قلبي ما ينطيني أتأخر عليكم ☺
××××××××××××××××××××××××××××××
عشت عصا بلايه موسى..و كلشي گدامي بحر
وچني صوغة بلا زياره..يضيع طعمي بلا سفر 💔🥀
محمد //جنت صافن...
وأعاين من جامة ألسيارة على ألطريق...
لسعتني جمرة ألجكارة...طاحت على فخذي ...
نكتت قماش بنطروني بسرعة...حتى أخلص منها
بس وين يفيد أنلسعت بيها .
خررررررب بالحظ ألفكر ....أنزرف ألبنطرون ،
هو شلون حظ عندي ....فگر ،،،، بفگر
خلصت عمري،،،مكافش من ألروس أنا وزماني
أكظة من علباه...أيعضني من أذاني .
حجيت بصوت عالي...وسألت سايق ألجمسي
// صديقي وين وصلنه بعد أخيك ...؟؟
جاوبني ألسايق//عمي دخلنه لمدينة ألبو كمال
((مدينه سورية في محافظة دير ألزور))
هي ألمعبر بين ألعراق وسوريا...
ومن جهه ألعراق موقعها على منطقة ألقائم ....
كلت// يالله ،،، بصوت مسموع
ورجعت عاينت من جامة ألسيارة...ألطريق كلش طويل ومتعب ،،، تكسرت تكسر
صافن وأفكر بالعفتهم ورايه .... !!!
ألشارع ... وسرعة ألسيارة ... وخط ألطريق
رجع شريط ألذكريات بيه...ليوم أمس من ودعتهم
وأني أعاين لهذيج ألعيون شلون تهمل بساعة وداعي
لو ما عيب من ألوادم...هسه إلا أصرخ بعلو حسي وأبجي...وكون أبجي بعيون أم،،،وجابولها وحيدها مكتول غدر ،،،وما يعرفون جتاله .
أحياناً يكون حزن ألرجل ظاهراً...
وأحياناً يكون مخفياً..وتكشفه ألعيون من خلال ألكلمات
خط ألشارع...وألطريق...رجع هواية ذكريات براسي
أتصور أكو هوايه أوادم مثلي...
من يتذكرون شغلة حلوه..يبتسمون وبنفس ألوكت ينقهرون..ومتأكد أكو قسم بيهم تدمع عيونهم على هاي ألذكريات .
زمن مشى بسرعة...وأخذ من عدنة ألشباب وألحيل نجذب أذا نكول مشى بدون ما نحس بي
بس أنقنع نفسنه ونكول //بعد هاي سنة ألحياة.
أحنه جيل ألسبعينيات...هوايه حياتنه وجيلنه أحسن
من جيل ألثمانينيات...خوب جيل ألتسعينيات خطية
أنقهر عليهم .
هسه أولاد جيلنه...بينه من دخل بعمر ألثلاثينيات
يعني صار عمره ثلاثين وفوك
وبينه بعده ماداخله .
ورغم كبر رقم ألعمر ...
بس أحس هناك روح فرخ صغير يعيش بداخلي .
يمكن لأن أحنه جيل ألسبعينيات أكثر جيل عاشوا بفرح وتميزوا بطفولتهم..!!
عشنه بمتعة ألطفولة...وضحكنة ومرحنه من خاطرنه
هاي ألمتعه ما حظى بها أولاد الأجيال ألورانه.
وأتوقع لان عيشتنه بين جيلين،،ألقديم وألحديث
يعني جيل ألستينيات وجيل ألتسعينيات
ومرت علينه أيام المراهقة بعراقي ألعظيم
بأوقات ألحروب..ألقادسية،،وألكويت،،وأيام ألكيمياوي
وضيم ألحصار ،،وصابون ألحصة ،،وسيارات ألتاته
وخبز ألنخاله ألمخبوط وياه نجارة ألخشب ،،
وملابس ألباله .
وأحلى شي عندي باأيام ألمراهقة ابراهيم تاتليس
وأفلام كارتون كابتن ماجد ...
بالثمانينات رغم حرب ألقادسية بس جان ألعراق بخير
بس وراها...من صارت ألحرب مال كويت
أنفگرنة ...وأنفرض علينه ألحصار ألنفسي
قبل لا يكون حصار أقتصادي .
جان بطل ألببسي بربع دينار
وألي يشرب بطل ألببسي هذا أبو ملك
خوب إلي ياكل نستله أصليه هذا أمه ألملكة ديانا
لأن ألنساتل صارت كلها أم ألتمر
وألببسي من هذا ألغاز...ويخبطون ويا مدري شنو
ويصير ببسي ههههه.
أيام وذكريات حلوة مرت علينه
من أيام ألمدرسة وقالب ألطباشير الأبيض
وجان نوعيتين...لو قالب طباشير ألجص..لو ألزيتي
وألسبورة ألسودة ألخشنة ماكو غيرها .
وألدفاتر وأحد تطلع أوراقة زيتيه...
وأحد تطلع أوراقة خشنة.
وألقلم أنقطة من ألجهتين بموس ألمقطاطة
بعد منخربها ،،،ونفتح برغيها ...
ونحمي ألموس على ألطباخ وأنثبته بقلم ألجاف
حتى نسوي مشرط .
جنت أكعد ساعه ٦ و نص ألصبح
و أطلع ب ال ٧ ونص ...و أروح مشي للمدرسة
چنت أنتظر كميلة و هيه تحطلي أللفه بالجنطه
تدعيلي وتبوسني يلا تخليني أطلع من ألبيت .
چانت ألمدرسة بيها ٦ دروس و تعب
بس ما چنا نحس بشي...من ألفرحة والأمان
و أذا غاب الأستاذ أكبر فرحه تصيرلنه بهذاك أليوم .
وچان حايط ألصف ... نكتب عليه أسامينا
و نحوط ألاسم بقلب ألحب .
چان ألخوف من حل ألواجبات...أكبر خوف بحياتنه.
لأن الأستاذ چان عنده رهبه چبيره .
چانت ألفرصه أكبر فرحه عدنا
چنا نركض...ونطلع من باب ألصف حسبالك طالعين إفراج من ألسجن .
چنت أحط أيدي على چتف عصام صاحبي
و نروح سوية للمدرسة
چانت ظحكتنا هي رأس مالنا
و ماكو مكان للهموم جوانا.
چان وأحدنه يرجع تعبان للبيت ...
و يشمر ألجنطه بالباب و يصيح يمههه شمسويه أكل
چنت أنتظر أصير بصف ألخامس حتى أكتب بالقلم ألجاف.
ومن يسألني فاضل على ألساعه شكد...عودين يعلمني
أكله//ألچبير على الأربعه...وألزغير على ألسته
جنت أحس بإنجاز...وفرح...وشي عظيم
إذا طلعت ألشمس وأنا بعدني ما نايم
وأنتظر الإمتحانات...علمود ما أخذ جنطه
و أنتظر ألنتائج...علمود أكشخ من أروح أستلمها.
من چنت زغير...شكد رسمت ألشمس بزاويه ألورقه
لو أكتب أول حرف..من أسم أمي..بنهاية ورقة ألدفتر
وما أنسى قمة ألفخامة أيام الإبتدائية
من ينطيني الأستاذ طباشير ...لو أوراق
ويگلي//وصلهن للأستاذ فلان بالصف ألثاني ألي يمنا
أفوت عالصف گدام ألطلاب وأفيگ
أحس روحي بوقتها...مبعوث من الأمم المتحدة .
وذكريات أللعب بالشارع من ختيلان
وشرطة حرامية ،،والدعابل ،،وحي الله على ألجميع
وسبع سيفونات ،،
وألطوبه ألجوبلس جانت ألها شنه ورنه
چانت ألطوبه مال جهال المنطقه نايلون
وبس ألطاگ عنده طوبه جوبلس
والگول طابوكتين...و وأكف وراه وأحد يصغر و يكبر بي بكل هجمه...وألملعب ينصب بنص ألشارع
و ألسمين يوگف گولچي.
وألبنات يلعبن توكي نعمان ويكمزن
لو يلعبن حبل ،،لو جلگة ،،،لو صكله
لو يخيطن هدوم للعابات ...
وألفرحة تطاير من عيونهن.
لو كل ما نشوف طياره نسلم عليها ونصيح مع ألسلامه
چنت أراقب ألمرحوم عطأ...وهو يسد باب ألثلاجه شويه شويه...علمود يعرف شوكت يطفى ظواها.
لو يحاول يوازن دكمة ألكهرباء بالنص ويخليها لاهي طافية ... ولا هي مشعولة.
ومرت علينه ذكريات حلوه وأحنه نتفرج أفلام كارتون
توم وجيري
وبومبو
وسالي
وساندي بيل
وأفتح ياسمسم
وعدنان ولينا
وساسوكي
وسينما الأطفال
وبسيط
وألسندباد
ونيلز
وكرندايزر
ولحگنا على مازنجر
وجنت من أشد المتابعين لبرنامج ألمناهل ،،،
وأفتح ياسمسم ...
وأستعراض ألدمى .
ومن كل عقلي جنت أتصور شخصية نعمان أبرنامج أفتح يا سمسم هو دب،،،بالصدفة أكتشفت هو جمل
بس بعديش بعد ما خلص ألموسم ألثاني.
ومن كل عقلي تابعت مسلسل رأفت ألهجان ،،
وألراية ألبيضة .
وشبعت مصاريني وروحي،،أبسكت شمائل وأطبك وياه حلقوم ...
و ألهي روحي بالشامية ألحمرة ...
لو حب عين ألشمس ...
علمود أخفف من ضيم ألجگاير .
خوب قمر ألدين من يلطش ألجيس عليه
من ضوجتي أعلسه هو وألجيس
ومن يذوب بحلكي أنفث ألجيس
حتى ما أحس بطعمه زين من وره ألجيس ألاكشر.
ومرات أشتري جيس ضروك ألفار
أحب طعم حبه ألحلوه ألبداخلة .
ونستله توتو،،شكثر نگلت منها للجهال
جانوا يموتون عليها،،ياكلون بيهن وما يشبعون.
رغم ألفگر بوكت ألحصار وألعشا خفيف...
ومرات ماكو طبخ،،أنسد ألجوعة بركية لو بطيخه وخبزه ،،بس ألبال مرتاح
يكعدون جهال فاضل بعد ألعشا ينتظروني ،،،
حتى أقريهم وأردلهم إملاء .
الله يا هذيج ألذكريات ...
ويامحلى ذيج أيامنه ألماترد
طلعت جكاره جديده ورثتها ...
طعم ألجكارة،،وألتدخين ويه ألصفنة وألذكريات ألقديمة يصير طعمها يخبل...من صدك أنتعش بيها.
رجعت أعاين من شباگ ألسيارة ...
ورجع عقلي يعيد شريط ألذكريات ألقديمة
ًوأيام فيگاتنه ...
باأيام ألبنطرون ألبلو ،، وألقمصله ألرئاسي
وألحذاء ألكيكرز ،،
أكحط على نفسي...وجمعت فلوسي فلس ،، فلس وأشتريتهن...ومن لبستهن أحس روحي ملك
وبعدين يلا نزل ألبنطرون ألجكر .
وأتذكر ألي يلبس حلو ،، وفارك شعرة من ألنص
يصيحون إله ..كيكي ..
أنعرفت هاي ألكلمه من ألمسلسل ألمكسيكي ألمدبلج
عروس ألبحر.
وذكرياتي كلش حلوه ويه عصام ...
من نتعارك لو نتلاغة...وأحنه نلعب ألاتاري لو ألسيكا.
وجان عصام بي حالة نكسة
أذا وأحد من أهلة طلب منة يجيبله مي يشرب
هو يشرب شويه قبل مايدخل للهول،،و يمسح حلكة
علمود محد يعرف بي هو شرب كبلة .
وذكرياتنه ألحلوة ركضت ركض ويه أعمارنه
من صار ألعمر ،، وألذكريات بحالة سباق .
أكيد أنتم سويتوا شي من هاي ألذكريات،،أو تقريبا كلها
وأكيد أنتم هسه كاعد تبتسمون على هاي الأيام ألحلوة
و رجع بيكم شريط ألذكريات ليوره..وصارت حسره بداخلكم عليها،،لأن چنا على نياتنا،،و گلوبنا صافيه
خاليه من ألحقد وألمصالح.
وبسرعة شب بينه ألعمر...وسرع بينه قطار ألوكت
وألروح كامت أدور سوالف ألشباب،،،من حب وغزل ومواعيد.
وألمرحومة حياة ... هي بت عمي عزام
و أصغر من عندي بالعمر ....
وبعدنا بداية طيش ألمراهقة..
صارت بيناتنه نظرات أعجاب...
جانت صغيرة...وهستوها شبت...
فاجأتني بيوم ،،، أنطتني رساله
وكاتبتلي بيها عن حبها ومشاعرها تجاهي.
مافشلتها ورديتها ...
لأن ألصراحة روحي هم جانت هاويتها
وأنتم بعد تعرفون ألشاب ألمراهق،،مايصدك يسمع كلمه أحبك من بنيه،،بسرعة يذوب،،ويعيش بحاله خبالات ألحب ،،وضيم ألحب .
ماطولت علاقتنه ،، ونظراتنه يمكن شهرين
وتقدمت ألخطبتها ،،
وعمي عزام تسودن ،،،
والله ما أنطيها ألك بعدها صغيرة ...
يا بوية يا صغيره هي تحبني وتريدني
وأنا هاويها ،، ومعجب بيها .
وهو كل مره يطلعلي بعذر جديد..
يا ألبنيه صغيرة ...
يا بعدك طالب بالاعدادية ...
يا ماعندك شغل شلون تعيشون ...
وأنا من عرفت هذن ألسوالف عذر،،
لأن أمها تريدها لأبن خالتها...
وهي ألمرحومه حياة بلغتني
هنا قفلت...صارت سالفة عناد كلت//أحركها هي وبيت عمي...وما أخليها تروح ألغيري .
وثلاث سنوات ،،مشاكل وطلايب وعرك .
وكفت ألبيت عمي عظم بالزردوم ...
حتى رسبت بالسادس من وره هاي ألطلايب
يلا أخذتها .
صدك من كال// أنهجم بيت ألحب ودواليبه .
بعدني عريس،،وما أتهنيت بعرس مثل باقي ألشباب
بيوم لأكتشفت سالفة بنات ألمرحوم أبو سعدي
هنا أنهجمت حياتي .
مو أنا ألاسكت عن ألغلط...وأضم راسي
غسلت عار آل هاشم...وأنشمرت بالسجن
وراها تصخمت حياتي ...
لا حصلت على صحتي وعافيتي
ولا حصلت على مرتي حياة
ولا حصلت على أبني
ولا حصلت على دراستي
ألحمد لله على كل حال ،،له حكمة بكل شي.
من عاشت يمنه نور ... وياها هديل
ابد،،وأمانة الله،،ما عاينت بنظره وسخة
لا على نور،،لأن أكبر من عمري،،وأعتبرها أختي.
ولا على هديل،،لأن اعاينلها طفلة،،وأنوب فاضل أتبناها
أعاينلها هي بنت أخوية.
بس بيوم ألكفتها داكة أسمي على متونها
وكضيت بيها توبة...يلا أعترفتلي بحبها ...
هنا فرت عقلي .
هديل فقيره .. وفطيره .. ومن أهل الله
وبنفس ألوكت ثكيله ورزنه،،ما عدها خفة ألبنات ألبعمرها...وشاطره،،ونادره،،وتربات نور وكميلة بعد .
وألصراحة هم حلوة.
كل صفاتها هذن خلاهن براسي عصام .
ما جنت مخلي بالي يمها .
وألصدك من يوم ألكشفتها...وهي أعترفت بحبها ألية وحجت كدام كل أهل بيتي..وبدون لا تخجل أو تخاف وألكل يعرفها على نياتها،،وما عدها خبث،،وحقد،،ودغش
دخلتها براسي بعد تقنيعات عصام
عاينتها تناسبني ... شو تربات أيدينا
وبتنه ... ومن ثوبنه ،
ومن صدك هي هاويتني وعاشكتني
أنسلت من ألقهر علمودي،،من خطبت أنعام وما حجت
ولا بينت .
ألحمد لله ما طولت خطوبته...وعرسنه.
ما أعرف الله سهلنا كلشي علمودها،،لأن فقيرة ويتيمة
وجبر بخاطرها...ما أعرف علمودي،،وجبر بخاطري
وعوضني بيها .
هديل صدك مراة...وكلشي بيها يحلالي.
وألصراحة ... من صدك حبيتها
وبمرور ألوكت عشكتها.
هوايه علمتها ،، وفهمتها ،، ودرستها ،
قبل تربت كدام عيني...وبعد زواجنه ربيتها على أيدي
هديل...اااااخ يا هديل...ألهسة غصة لوعتج
تاكل بروحي وشكثر متندم ...
أسير أنا في هذه ألحياة،،،،،
فالحزن يرافقني،،،،،
وألفرح يهجرني،،،،
وألعباد ترمقني بنظرات تتعبني.....
//صديقي..صديقي لا تحركك ألجكارة مره ثانية.
فزيت من صفنتي،،،على صوت ألزلمة ألكاعد بصفي
عاينت،،،جكارتي مايله من بين أصابيعي ومنكوسه جمرتها على فخذي.
جاوبته // مشكور يالطيب .
عدلتها بين أصابيعي ... ونفضت رمادها
سحبت أخر نفس منها...ورفعت راسي ليفوك نفخت دخلنها ...أنوب شمرتها جوة رجليه وسحكتها.
ورجعت أعاين على شباك ألسيارة ...
ورجعت صفنت على ألطريق...ورجع ويايه شريط ألذكريات...وعقلي طفر على خانه ذكريات حلوة،،،ومحزنه بنفس ألوكت.
وأتذكرت من طرح تلفزيون شباب سؤال //
ماهو ألبكبك الأصفر ...؟؟
لو يطلع ألاعلان ويكول// أحذروا ألبكبك الأصفر .
خله وأحدنه يحير شلون يفكر،،وشنو يكول ،،
وشنو يجاوب ،،خله كل ألشعب يفكر
وأحدنه صار نابغة،،،وعلساس يعرف ألجواب
وبالأخير طلع جوأب ألبكبك الأصفر //هو جبن
هنا وأحدنه..كام يغلط على نفسة،،هلكد ما فيك على روحة ،،وعلى ألوادم وصار مفتي بروسهم.
لو من يطلع ألاعلان ألثاني...ويبقى يصيح ألممثل
//ترقبوا ألبشك من مطعم ألبحر ألابيض.
لو يعيط//أجاگ ألبشك من مطعم ألبحر ألابيض
حل أللغز ...وألجائزه سيارة بيجو للفائز .
وكل وأحد بينه صار أستاذ ،، وأكتشف علم ألذرة
علمود بس يعرف ألحل.
ويطلع جواب أللغز هي// بيتزا ،،وشاورما ،،وكباب
ألكبر لهيج ألاعلان سكط...ألوادم كاتلها ألجوع وحسره عليها أللكمة...ويتغدون محروك أصبعة،،وما يتعشون
وكل ألاعلان ألتعرضه ألقناة هو الأكل،،وألمشويات وألحلويات،،ولا وأحد يفگر بنفوس ألوادم ألذابحها ألجوع...والله أعرف أوادم باعوا أبواب وشبابيك دورهم
علمود يشترون كيلوا طحين لعيالهم.
وأتذكر أكثر سؤال شغل إهتمام ألشعب
وتشوق ألجميع لمعرفة جوابه // ماهو البمبش...؟؟
والإعلان يكول //حصل أاااي ...ألبمبش وصل
ولحد معلنوا عن ألجواب ألا طلعت أرواحنه
وألجواب طلع//علساس أسماء مجموعة مال سيارات هي :-
بي أم
ميتسوبيشي
بروتون
شبح
بس هذا ألسؤال أنطرح قبل سقوط بغداد بشهر
بعد جوأبة مباشراً صار ألسقوط..وأحتلال أمريكا للعراق
وألعراقيين عرفوا من خلال الأحرف الأولى لكلمة ((ألبمبش ))يعني((بغداد مقصوفة بعد شهر ))
وفعلا تم قصف بغداد،،،وتخلصنا من ألنظام وزمرته
بشق الأنفس ،، وبتضحيات ألغالي وألنفيس.
بس شنو ألفايدة لحد هاي أللحظات
فريق للسلطة ألجديدة ماكو ...
بعد ما متشكلة حكومة جديدة ...
الأوضاع صارت تعبانه ...وكلشي متفلش .
وأحساسي يكول//هاي الأوضاع راح تجرنا المأساة جديدة...تشبه ذيج الأيام ألسوده لو أكثر سواد
هاي المأساة...كاعدة تهدر ألشعب على نار هادية
وتستخدام أساليب قذرة،،و تثير مشاعر ألنزعة ألطائفية
بين أولاد ألشعب .
تقريباً مرة سنه على سقوط ألنظام...والأجواء غامضة بعراقي ألعظيم...وكلها تصب بمصالح ألمحتل
وألمواطن ألفقير ما محصل بس ألكفخات ....
لا إعمار،،ولا بناء،،ولا خدمات،،ولا كهرباء،،ولا صحة
ولا كرامة ،، ولا إحترام .
خوب ألاعتقالات صايرة بفلس ،،
وألعلاسة صايرة حديث ألساعة...
ألأخ كام يعلس أخوة...علمود ألدولار ويتملق للمحتل
وألامن وألامان بعد ماكو أنعدمن .
ألوادم خايفة،،من ألتشويه وأختلاق ألنزعة ألطائفية
باأسم ألدين وألمذهب .
والله عجيبه ،، أحنه كل أولاد جيلنه
أتعلمنه على تعاليم ألدين ألصحيحة وألبسيطة
مو دين ألقدماء ألمتشدد...
ولا دين هذا ألوكت ألتكفيري ...
بس منو أليسمع ،، ومنو أليشوف
هسه وين ما أروح أسمع،،أنت شيعي...وأنا سني
اااخ والله حياتنا گبل جانت حلوة
وتربينه تربية الأجيال ألسابقة ...
وعشنة عيشة الأجيال ألأحقة .
وراح تبقى تربيتنه،،وذكرياتنه،،دائما مميزه بهذيج ألذكريات ألجميلة ،، وألخالدة بكلوبنا
ومراح يفهمها،،وما يقدرها ألا أحنه أولاد هذا ألجيل
أياااام زمااان ..... يااااا دنياااااا شسويتي بينه
فريتينه مثل دولاب ألهوى .
لقد قضى ألحزن وطره مني...لكننى لن أحبل باليأس..
هذه ذكرياتي ألجميلة حبيت أشاركها معكم.....
أنتظرورا بالأحداث القادمة ..
××××××××××××××××××××