#حصاد-ألمواسم
👇
#فراقد
👇
#ألحلقة((٥٠))
××××××××××××××××××
بالكوه قنعته وبوسه كال انطيك
بس كلي حبيبي تبوسني براحه
كبل ماصدكيت وطحت عالخد بوس
ويصيح كمت مااسمع صياحه
عضيته وصرخ ثاريني ماحسيت !!
خده من الحلاه حسبالي تفاحه .......
×××××××××××××××××××××××
بقينه كاعدين نتعلل ...والليل كله
ألولد يشاقون...ويسولفون...ويضحكون .
من راحوا بيت باسم ...وعصامكو
هنا علاوي غمزلي...وأشرلي بحواجبة أروح ألغرفتي.
أفتهمت شنو قصدة...يريدني أروح أفوت جوة
وأخذ ألبنات ويايه...علمود أقريلهن ألرسايل
وأني نفذت الأتفاق .
من فتت وأخذت ألبنات وياية للغرفة ...
رجع علاوي صاحلي...وهو بغرفته
رحت عليه...أنطاني رساله هو وباقر
ويأكدون عليه أقراهن للبنات وأسمع منهن ألجواب
من رجعت للغرفة ...وتجي تدخل يمنه نور
يالله بسرعة كشفت الأتفاق ...
عاد بيني وبينها ...سولفتلها شنو سالفة ،
أخذت ألرسايل مني...وهي قرتهن للبنات
يمه وحدتهن غده وجهه دم من ألخجل ...
لأن نور حجت وياهن ...
علاوي يريد نهله .
وباقر يريد فاطمة .
عاد نور كالت//من ضحكتجن وخجلن أعرف بيجن موافقات...وكامت تهلهل بصوت ناصي
وهن يسدن بحلكها يستحن.
صدك وثاني ألصبح على ألريوك ...
كميله وألسيد...حجوا ويه طوعة...وأنتصار
يعني هيج...فتحوا ألموضوع وياهن بس حجي
مو طلب خطوبه رسمي .
والله أشوف ألكل مكيف بالموضوع
وأنتصار تكول//خيعوني من نهله تصير بتكم.
وطوعة تكول//من غديت فدوة للدختور أبويقر
من هسه أكبع فطيمة وأدخلها ألغرفته .
يالله ألنسوان ولا يستحن...خلان طفار البنات بفلس
خطية حتى ما تريكن .
وصدك يمكن عدت يومين...
وكميلة راحت لبيت أنتصار
وياهن ألسيد...ومحمد ألمصروع...وعلاوي
طاير بيهم محيسن...وجدة نهله
صلوات بسرعة وأفقوا على ألخطوبة...
بهذاك أليوم أجى علاوي بعد عمري وجهه متفح من ألفرحة .
ثاني يوم ...وراحوا لبيت طوعة
أبو صادق...يصير أبو فاطمةً...رجل طوعة
يتخبل من محمد ألمصروع...ومحمد هم مايحبة
ألصدك ألرجال غثيث...وشايف نفسة شوفة
والله صاير ألمختار مال منطقتهم ...
وهو أصلا رفيق جبير بالحزب ...
ما وافق على ألخطوبة...وأسلوبة مو حلو
شبه ألطارد بيت ألسيد .
يابوية أجى باقر يرعد من الأعصاب
ويصيح بعلو صوته//وألعباس أنهبها وأنگس عگل عشيرتها.
ومحمد ألمصروع أيده يكله//وطبرة ألهامة أذا زفها أبوها ألجايف ألغيرگ..أكتله..و أكتل ألبنية..وأكتل ألعريس..وأشد لحيه بلحية..وأنعل شيب أبو ألخلف أبوها .
ويمكن بثلاث مرات ...راجعوا لبيت طوعة
وأبو صادق يطردهم ...
حتى عمهم ساجت...وعزام راحوا ويه ألسيد
وألمصروع ...وباقر
حتى عمهم ساجت سأل أبو صادق//عليش ما راضي تنطي مراه لأبو عطأ ...؟؟
يكلهم//يكفي عم ألولد..يقصد على محمد...
خريج سجون ...ومايحب ألحزب .
عاد عمهم عزام كاله//خوش حجي
صايح على طوعة...وكايللها//كومي ألبسي عباتج
ماتظلين عد زلمة ما يحشم أهلج .
ألحلو هنا...ولد طوعة صادق وأخوانه...
وكفوا ويه أمهم...وهم موافقين على باقر
وفاطمة باقية بس تبجي .
وعمهم عزام...وساجت جابوا طوعة من بيت رجلها
وأجت زعلانه بيت ألسيد .
يمكن مر أسبوع ...وأجى صادق أخذها ...
وبلغ ألسيد...وباقر...أبوهم موافق على ألخطوبة ...
بس ألحقير طلب ألمهر كلش عالي ،.
وكميلة كالت//لعيون باقر...وحمسة كلبة
أبيع عباتي...وأجيب مهر فطومة .
و ألحمد لله...تم كلشي بخير وستر وسلامة
صادف بدأية الأسبوع رحنة مشية رياجيل ونسوان
خطبة نهله ال علاوي ...خطوبة وكعدة بسيطة
ألرياجيل قروا ألفاتحة ...
وألسيد مهدي صديق ألسيد..هو ألكطع مهر ألهم.
بس أبوها محيسن...كدام كل ألرياجيل كال//
بدون زعل...ألزلمة ما يجي لبيتي...ألا بيوم ألعرس
موش أطردة...لكن ما أكدر أتقبل ألموضوع
ألزلمة يكعد يم بنتي...وبيتي قبل عرسهم.
كل ألموجودين كالوله// من حقك
مايوصل علاوي لبيتك إلا بيوم ألزفة .
وبنهاية الأسبوع ...هم رحنة مشية رياجيل ونسوان
لبيت طوعة...نخطب فاطمة لباقر
يابوية أبوها فت كلبنه بالحجي وألتمنطق
بعدين يلا قروا ألرياجيل ألفاتحة...
هنا أبوها كال//أنطوني مقدم ألبت بيدي يلا تكطعون ألمهر .
ألسيد..ومحمد ألمصروع..وحتى باقر
عرفوا راح يسوي هيج..من راحوا أخذوا مقدم ألمهر وياهم...وكدام كل ألرياجيل حرجوا...من خلوا ألفلوس على ألطبلة كدامة...هو تفاجئ بيهم...أنلطم على حلكة وأخرس .
وألسيد مهدي ...هم هو ألكطع مهر ألباقر .
ألحمد لله من خلصت خطوبة علاوي...وباقر
بفرح وسلامة...صلوات ألولد وجهم ورد من ألفرحة.
بيت ألسيد شدوا أحزامهم..صلوات يردون يزفون ألولد سوية على هاي ألعطلة.
هم ألولد سكنوا ورشة ألنجارة...وية محمد ألمصروع
يجهزولهم غرفهم أخشاب.
أني وكميلة...دخنة بزمانه شلون نرتب ألبيت.
عاد كميلة حاجتني كالت//يمه ناخذ غرفتج لباقر
وغرفة ألولد...نفرغها لعلاوي ...
وغراضج خليهن يمي بغرفتي....
وألولد،،سجاد..وعون..وحمودي ينامون بعد بالهول
وغراضهم نرتبهن ويانه بغرفتي.
كتلها//هاي هيه موافقه...أهم شي عندي ألولد فرحانين ورح يجن ألبنات ويايه ونس بالبيت .
هلكد بقينة نركض...ونشتغل..ونعزل ونصفي بالبيت
حتى عدنه غراض زادت مألهن مكان ...
كلنه ألنور أخذيهن حرامات نشمرهن
عاد صفينة غرفة ألولد...لعلاوي
وغرفتي صارت...ألباقر
وأني نقلت ملابسي...وملابس ألولد بكنتور كميلة
ونضدة ألفراش..كميلة سكمت من عدها لعلاوي وألباقر وألباقي رهمنة ألبوفية بغرفتها..ونضدناه عليها
بيوم ألجابوا غرفة الأخشاب مال علاوي..وشدوها ونصبوها ألولد بالغرفة...كميلة هلكد ناحت وبجت
من باب فرحانه لعرس علاوي ...
ومن باب أتذكرت ألمرحوم عطأ ...
غرفتي ظلت فارغة...بعدهم ما مكملين غرفة باقر
أنام بيها ألظهر..وبليل..لحد ما تكمل غرفة الأخشاب.
يا بوية بهذاك أليوم ...
هلكد ما تعبنه من ألشغل أني وكميلة
هي شدت راسها ونامت بالهول...جنها ثلاجة عاطلة
وكله تحشم بيه ...وأني أنجطلت يم رأسها .
ألمغرب أنتهيت من ألتعب ...
كمت أسحل بروحي سحل ...
كميلة أخر تحشيمةً طلعت وياها//يمه كومي أحلبي ألهوايش...والله راسي ثايل مابيه أنهض روحي.
سلمت أمري لله...كمت بالكوه
لبست ربطتني...وعباتي وأخذت سطل ألحليب
ورحت للمراح...فتحت ألسيم...وفتت جوه
بعد ما نزعت حجابي..كعدت أحلب بالهوايش
وما أحس بس محمد ألمصروع وأكف فوك راسي أرتبكت من وجودة يمي .
وكف فوك راسي..
وبيدة ألجگاره يسحب دخناها بقوة...ويباوع علية
يعني أني كاعدة مكنبصة أحلب بالهوايش
وهو وأكف فوك راسي .
من شلت راسي باوعت علية...أشرلي بحواجبة
بس ما أفتهمت شنو قصدة ... !!!!
كتله//عمي محتاج شي ...؟؟
هز راسة يعني لا...وكال// تؤوو ،،،كملي شغلج
حتى أقفل ألباب .
والله حتى ما أعرف شلون كملت حلب ألهوايش
كلش أرتبكت...وتخربطت من وجودة يمي.
ما أعرف خفت من عنده
لأن بس أحنه موجودين وحدنه بالمراح...
ما أعرف أرتبكت...من شفت أرتباكة أكثر مني
وما أدري شلون يباوع علية ...!!!
رحت أجيب عباتي وربطتي من نهاية ألمراح
شامرتهن على ألحبل...حسيته يمشي ورايه
ما أعرف شبي...لو شنو ألصار
ثواني تقرب عليه...وجرني من أيدي بقوة ولزكني على قاطع ألبراميل ألحديد...مال مخزن ألعلف مال حلال
صار وجهي ...مقابيل وجهه
شكد ما أني خفت..وأرتبگت من قربة بصفي وكمت أرجف...هو كام يرجف أكثر مني
هو رفع أيده...يريد يدكم دكمة فتحتة دشداشتي
من فوك مفتوحة وما أدري بيها.
بسرعة لزمت أيده..أريد أوخرهن من يم صدري
هو جلب بجفوف أيدي بقوة .
وكام يحجي شعر بصوت يرجف...شلون أليهمس
ويباوع بعيوني كال //
((يالكلك ترف وشصار هالطغيان
ربك فوك كل جبار يتجبر
ياتين ألعجم ياطعم خمرة دير
تسكيني أبكرم وتلومني من أسكر
من تدلع غنج عندك عذر مقبول
رمانك لحك وألزيج ماينزر ))
ركز بعيوني وكال//يالترفة بعيونج غريب ألخوف.
يمة كمت أرجف...حسيت نفسي راح أوكع
كلش قريب علية...ويتنفس بوجهي
كالي//شبيج مصكوكة خايفة مني ... !!!!!
ما أعرف شرد عليه...لو شلون أتصرف
أتخردلت أحوالي...بس أشرت براسي يعني لا.
وكتله بصوت خايف//عفية عمي وخر خلي أروح للبيت
يا ااالله شو يحجي ويايه بصوت يرجف
ويهمس همس...كالي// شكثر تحبيني !!
ومن شوگت أنتي عاشگتني ...؟؟؟
يمه بسرعة نزلت راسي...وفكيت أيدي من أيده
ردت أوخر ما خلاني...كالي//أوكفي بس أفتهم منج
شكثر تحبيني .. ؟؟
من خوفي أنثولت...ما أعرف شسوي
بس كتله//عفيه وخر هسة تجي نور وتضربني ...
لأن تشوفك وأكف يمي .
كالي// شبيج بس جاوبيني شكثر تحبيني
ومن شوكت أنتي عاشگتني ...؟؟
هسه غير هنا...والله يهديني وأسكت...لا حلكي متبري من راسي .
كتله// أحبنك أكثر من روحك ...
وعشكت من يوم شفتك بالحلم تبوسني من ركبتي
بيوم الأمن أخذو ألمرحومه حياة قبل ست سنوات
الله زرع حبك بكلبي .
شو هو بسرعة دنك عليه...خلة شفته على شفتي
وبسرعة لف أيده على خصري...وسحبني عليه.
هنا أجى براسى نفس ألمشهد من جنت صغيرة
وألرجال راد يبوس نور...من جنه بالغرفة وهي ماقبلت
هلكد خفت...ورجفة ألخوف خلتني أتصرف بدون وعي
دفعته من صدرة بكل قوة...
وبجف أيدي كمت أمسح بحلكي...
وأصيح بصوت عالي // وخرررر عني
حرررررررام...الله يجويني بالنارررر
وكمت أبجي بهستريا وخوف .
هو بقى يتلفت داير مدايرة ...
ويكلي//صوتج ...ولج أسكتي فضحتيني
ولج أنتي مو تحبيني...غير تخليني أبوسج نفس ما تابعين بالمسلسلات ألتشوفيهن .
كمت أبجي وأدفع بي بكل قوتي...وخرت من عنده أخذت عبايتي...وطلعت أركض من ألمراح
حتى ما لبست عبايتي...طبيت للبيت ركض ،
وين أروح...خفت يكشفوني ألولد ويكتلوني
طبيت بوجهي للحمام...وقفلت ألباب وبقيت خاتله وراها.
ماطلعت...ألا لمن سمعت ألسيد أجى للبيت
غسلت وجهي بلولة الأسأله وطلعت ...
بس أكيد مبين وجهي مكلوب ...وباجية
رحت بوجهي على علاوي كتله//وديني لبيت نور هسة
ألكل أنصدم من خوفي...وصوتي ألعالي
وكمت أبجي وأصيح //علاوي ألا هسة توديني
لبيت نور .
كميلة شكد حجت وسولفت ويايه...ولا سمعت منها
وألسيد يصيح//بوية شمالج حامسة روحج...منو وياج...؟؟؟؟
ولا جاوبت وأحد...لبست عبايتي وطلعت لباب ألشارع
وأسمع صوت ألمصروع يصيح ورايه// أوووووكفي
مو نحجي وياج .
أنداريت عليه...باوعلته بنظره خوف ما أدري أستصغار
يمكن بوكتها أحتقرته...وكرهته.
ماسمعت كلامة...طلعت للشارع...أمشي بسرعة
وهو ألمصروع...وعلاوي لحكوني يمشون ورايه
ويصيحون// ولج ألوادم منا أوكفي.
لحد ما وصلوا يمي...علاوي لزمني من أيدي
بس كالي//شبيج ....؟؟؟
بجيت بصوت عالي...وكتله// أنتم ألرياجيل كلكم أحقريييييين ....نفظت أيدي من أيده
وركضت بالشارع ...وهم يصيحون وراية .
خلصت ألشارع أمشي بسرعة...وهم يمشون وياية
ماكدرون يصيحون عليه...لو يسولي شي
لأن بشارع وينفضحون .
من وصلت لبيت نور كسرت ألباب عليهم
بس فتحها حسيون وكال// خير بويه شبيج ...؟؟
عطت بوجه// أنت هم خبيث...أخذت أمي وعفتني
بدون ملجأ امان...وشهكة بصوت عالي
وكمت أمسح بدموعي بهوسه بظهر أيدي
شفت نور طلعت تركض من جوة ...
أني ركضت عليها وشمرت نفسي بحظنها
وكتلها// الرياجيل كلهم أحقررررررين
يمه والله كلهم أحقرررررين .
هي تكلي// اشششش ...شبيج صوتج عالي
منو وياج ؟؟؟
علاوي يكلها/ خاله والله ما ندري شبيها تسودنت
وتصيح أحقريين...وأحقريين ودكت رجل ألا تجي عليج
نور كالتله//خاله عوفوها يمي...ألصبح أني أرجعها للبيت
صحت بصوت عالي//والله ما أرجع لو تكطعيني
حسيون كال//بوية دشوا جوة ألوادم تتفرج علينه.
ألمصروع أصلا مافات ألبيت نور .
وعلاوي كاللها//خاله أني راجع للبيت أمي مالها خلك
من فتنه جوة ...ونور أخذتني بغرفتها
بسرعة كالتلي// منو متحرش بيج من ألولد !!!!
سولفتلها كل ألصار ...ولا ضميت عليها شي.
شو هي سلكتني براشدي فرت راسي ...
تصيح // شوكت تعرفين تصرفين
شلون تكليله بستني بالحلم...وأحبك...وأعشكك
ولج هو ألشيطان راكب راسه...وأنتي تكليله أحبك وأعشكك...مو زين ماعرس عليج...ومحد يدري بيكم موجودين وحدكم...ويفكج منه ،،لشوكت تبقين ثوله وغبيه...شلون بيج ولج...أحركج وأحرك روحي حتى أخلص من غبائج وفهاوتج.
كمت أبجي بالزايد...كلش أنقهرت
يمكن كلامها صدك...ألمفروض ما أكله هيج حجي
بس والله هو حلكي مايسمع كلامي
ما أعرف أضم سالفة ...ولا أعرف أجذب ألبكلبي على ألساني .
بهذيج ألليله لا تعشيت بيت نور..ولا هي تعشت
شبعت بجي...ونمت يم ألحجية أم حسيون.
ثاني يوم من ألصبح...رجعتني نور لبيت ألسيد
وكالت// كولي جنت ضايجة...وطاكة روحي
وردت أروح على نور أسولف وياها.
وديري بالج من محمد جنية...ترى هذا خلاج براسة
الله وأعلم شنو يريد من عندج .
وخليها بالج...مال يتزوجج شي جذب...
ومن سابع المستحيلات...لأن كام يشوفج رخيصة يعني بنية وسخة...لأن كتيله للمره ألثانية أحبك وأعشكك.
وصدك رجعت لبيت ألسيد...مكسورة نفس
وكلش خايفة من ألمصروع ...
بس مجبوره أرجع لهنا...ما أكدر أبقى بيت نور
خاف لا تكبر سالفة...وتطلع عليه سمعة مو حلوه
وكميلة تكول ألنور //وروح أمي وأبوية
هذا عذرجن ما يمشي علية...
حتى فاضل لزم ألولد بليل ...وحقق وياهم
خافن وأحد منهم متعرضلها...لو متحارش بيها
وهم تسودنوا...وأحدهم حلف مية يمين ماعدهم نفس وسخة تجاه أختهم .
وصدك عدت الأيام عندي بخوف وقلق
أني أشوف ألمصروع هنا...أطفر هناك
وأحس روحي كمت ما أحبة .
ودوم أتذكر كلام نور من تكول//كام يشوفج بنية وسخة وخلاج براسة...هاي ألكلمات تزيد من خوفي ...
وحتى حسيت روحي كمت أكرهه..ما أدري أضوج منه
بس هو كلش تغيرت معاملتة وياي
دوم يحاجيني بهدوء ...
وكل ماتصير عيني بعينه يضحك بوجهي ...
ودوم يتعمد يسخرني...بس شلون يطلب مني ألشي بتوسل...ونبره صوته ناصية
ومرات هو بغرفتة يصيح عليه..لو يريد أوديله مي
لو يريد جاي ... لو غير شغلة ،
حتى من أفوت ...والله أبقى خايفة
وهو يضحك بوجهي...ومرات يغمزلي
يخليني أطلع شاردة
ما أدري ليش عندي أحساس...كميلة تدري محمد متغير بتعاملة وياي .
لأن دوم تكلي//نظفي غرفة حبيب الگلب ،
شوفي هدومة نظيفة لو وسخة ...
روحي أكوي دشداشته عنده طلعة...
كومي سويله لكمة ياكلها...هسه تلكينه جوعان
لو كومي سويله جاي ...
من ألاخير أحس ...كميلة وألمصروع متفقه على شي بس شنو ما أعرف .
بيوم كاعدة ألضحى جوه فئ ألتوثه ...
مخلصة شغلي وكاعدة بالفي...
وكميلة نايمة على رجلية أفلي براسها...
هو شعرها نظيف بس هي تحب أفليها...
تكلي//بس حركي شعري تخدر فروة راسي أغفالي دقايق .
وألولد ...طاشين كل وأحد بجهه
شو أجى ألمصروع من برة...
طب بوجهه للحمام سبح وطلع...لابس بس ألبجامة وشعرة وجسمة ينكطن مي...ركض فات جوة
طلع مبدل كاشخ...لابس بنطرون وقميص
وعطرة ألبروت يعط وراه ...
طلع يركض للشارع .
كميلة ضحكت وكالت// وين الله ويصير ألبالي
ألا أصوم ثلاث أيام لوجه الله .
شو رجع ألمصروع من برة...ويصيح//بطلت ما أروح
خليها على غير مره...وفات بوجه جوة للهول
عصامكو دگ الباب بقوة وفات...مو بحسابة أحنه موجودات وكاعدات بالحوش...أني مالابسة حجاب وكميلة مفرعة ونايمة على رجلية ...
هو تفاجئ بينة صاح//ألعفو يابه ورجع طلع للشارع.
كميله كعدت ولفت شيلتها ...
وأني طفرت جوة لغرفة كميلة...أجيبلي ربطة
من طلعت من لغرفة ...
ألمصروع طلع من غرفتة مبدل ملابسة
باوع بوجهي ضحك ...وغمزلي
كالي//ممكن أستكانين جاي من أيدج ألترفة
أني أنصكيت بمكاني...أنحرجت ما أدري تفشلت
ما أعرف شصار بيه ...
هو طلع من ألهول چنه كلشي ما مسوي...
وصاح بصوت عالي//عصااااام وينك يمعود
خليت ربطتي على راسي...وطلعت بوجهي للمطبخ
سويت جاي...لعصامكو...وللمصروع...ولكميلة
كعدوا بالفئ جوة ظل ألتوثة .
كملت صب ألجاي وأجيت كعدت يمهم ...
سلمت على عصامكو كتله//شلونك حميد منصور
جابوني//بخير ست هديل مرقص ما أدري شامل
بس هذا عمج راح يجلطني...لو يسولي ذبحة قلبية
ويأشر على ألمصروع...
كتله//ليش شبي...؟؟؟ والله عمي محمد حباب
كالي// بس يمج حباب
يمي يكوم يخرمش...ويزاكط...ويدفر
محمد ألمصروع...ضرب عصامكو بوكسي على متنه
يشاقة وياه ويكله//شبيك أنحولت وعدالك مرتك هبه
أخرمشك وأزكطك .
كميلة كالتلهم//وين جنتوا عازمين...بس لا وراكم مصيبه...؟؟
عصامكو كاللها// أم عطأ جنه ناوين ألعزم
نريد نشتريلنه حيوانه ...لهل حيوان
تفيدكم للبيت...أحسن ما على كلشي وراكضين على حسيون...لو على بشارة...سيارة ضروريه بالبيت
كميلة كالت// أي والله من عسنها نيه سهله
خوش سالفة...وأني أشيل وياك نص فلوسها
هم تفيد ألولد ...وتفيدنه للبيت
چا ليش ما تيسرتوا ؟؟
محمد ألمصروع جاوبها//عرضلي سالم ألكصاب
عوذه منه...ومن عرضته...عرضت الأرنب
من نط بوجهي بطلت ما أتعنى وأشلع كلبي ...
خليها على باجر .
هسه غير الله يهديني وأسكت ...
والله أني مو قصدي شي مو زين...
كتله//حباب عمي محمد روح أشتري ألسيارة
والله ضايجة ...حتى أتطلعني بيها
شو عصامكو باوع للمصروع ويگلة//شبيگ ما تحس بالبنية ضايجة...طلعها ونسها...شگو حابسها بالبيت.
هو ضحك ويكول//أنا ألحابسها لو فاضل
يخاف عليها من عيون ألوادم لا تأكلها...
كميلة دغته على متنه وتكله//على كيفك ويانه
حسين فهمي .
عصامكو يكلها//أم عطأ...
وليرحم أمج وأبوج ...قنعيلي فاضل...
ترى كلبي تزوهر بينه وبين هذا ألحيوان ألكاعد بصفج.
كميلة تباوعله...وهي تصغر بعيونها
وتكله//يمه يالعيار ...هذااااك فاضل وأمشي ألعنده
عليش مخليني أني بوجه ألمدفع .
عصامكو يكلها//أم عطأ...وربج قافل...عقلة قافل
عوزني بعد بس أكضيله مراه حتى يوافق .
كميلة عاطت// يااااااع ولك حميد منصور
تريد تعرس لفاضل...وتجيبلة مرأه عوبه عليه
غير أحطن جيلة براسك...وأخلص هبة من ضيمك.
يابويةً أني هنا خربت من ألضحك
لأن كميلة كالت العصامكو // حميد منصور
شو ألمصروع من حاله كال//هديل ألعصر حضري روحج أوديج للمرقد تغيرين جو ...
فد فرحت...لأن راح أطلع ...
أني أصلا مارايحة للمرقد..من يوم ما جابني ألرجال رسول من جنت طفلة .
عصامكو نط من يمه وكال// هسه عدا ألشقه
هديل عليمن تنعد على ألدين ألمسيحي
لو على دين الإسلام ...؟؟
شو تصوم ويانه ...
وتقره قران ويه عون...وحمودي
وتلبس حجاب وعباية من ألكل...وحاشمة نفسها
وماخذة طبعنة بالحجي...والاطباع...والتصرفات.
وحتى أسمها عربي ...هديل شامل
وهذا ألزلمة مرقص...ملزوك بس بجنسيتها ،
وأمها أسمها شهلاء
و ألوادم جيرانهم شكثر مدحوا بااخلاقها... !!!!!!
كميلة كالتله//شمعرفگ با أسم أمها
وألجيران تمدح بيها ... ؟؟؟
هو كاللها// هيج سالفة مرت على ألسلاطين
هسه جابوني هديل عليمن تنعد....؟؟
أني بسرعة كتله//حميد منصور
ترى أني صرت مسلمة...من يوم ما لدغتني ألعگربه.
شو كلهم ضلوا صافنين بوجهي ...!!!
كتلهم شبيكم ...؟؟
كميلة كالت//يمه شلون صرتي مسلمة....؟؟
ومنو علمج تصيرين مسلمة ...؟؟
كتلها //هااا...أوكفي دقيقة...شو نسيت أسولفلكم
بس هاي سالفة يرادلها كلاص جاي...
كمت ركضت للمطبخ...صبيتلي كلاص جاي
وأجيت كعدت يمهم...أنوب فزيت من مكاني
كمت جبت مي من ألحب وخليته فوك كلاص ألجاي
وكمت أشرب .
عصامكو كال//من كل عقلج راح تشربين ألجاي بارد..؟؟
كتله//أي أني ما أشرب ألجاي حار...يحرك حلكي
لو أعوفة يبرد ...لو أخليله مي
ما أحبه حار .
شو هو دغ ألمصروع على أيده...وغمزله
شنو قصدة ما عرفت .
وأنوب باوع عليه كال// أي ست هديل شامل
سولفينه شلون صرتي مسلمة .
سولفتلهم من أنلدغت...وشلون صارت عندي ظلمة وأختنكت...وشلون شفت أمي شهلاء أجتي عليه
وشلون شفت نور...وكالت بذاني ألشهادة
وشلون باستني وشاورتني...وكالت//سلميلي على كميلة
وكليلها أني ما ناسيتج .
عصامكو...وألمصروع كاموا يصيحون //
اللهم صل على محمد وال محمد
وكميله...شو كامت تشهك وتبجي
كتلهم//هااا شبيكم...يعني حلمي زين لو مو زين...؟؟
كميلة//تكلي ولج يمة شلون مو زين
ولج يمه تدرين أنتي توفيتي...وطلعت روحج
والله يحبج رجعج للدنيا...بس رجعج مسلمة وعلى دين محمد.
ويمكن هاي المرأه هي فاطمة ألبتول ألنطقتج الشهادة
لو تعرفين...شكثر باقر ضل يصرخ باأذانج...
ويلقنج ألشهادة ...وأنتي أنصكيتي...وكلبج وكف وكطعتي ألنفس .
ولج يمه...أنتي شكثر بخيته...والله يحبج
وهيج شفتي منام....نور ...بنور .
هنا أني شوية نفشت ريشاتي ...
وسويت // أحممممم أحمممم
أكيد يمه أني بخيته...لأن يتيمة وماعندي أحد
والله هو سندي..وأكيد يحبني..لأن يشوفني حبابه
مو مثل ألناس ألمو زينين...اليأذون باقي ألناس
ويشوفهم أحقريين .
ألمصروع كالي //بس سؤال أنتي ليش تكولين أحقريين....؟؟؟؟
كتله//مو هم هوايه ناس مو زينين
غير أكول عليهم أحقريين .
عصامكو كال// بروح أبوج بس كليلي شنو جمع أسم صخلة 👈بسرعة جاوبته// تصير صخلات
ضحك وكالي ///زين وألصخل
كتله//👈 تصير صخول
أنوب كالي// زين شنو جمع ألجدي
كتله//👈تصير أجديين ...يعني هوايه جدي
أنوب صفن كال// وألطلي
كتله // 👈أعرفها تصير طليان
كال//وألنعجة نثيه ألطلي
كتله//👈 جمعهن طليات
صفن كالي//بس بروح أبوج شنو جمع مي
كتله//👈 والله أعرف ألكلمة تصير مايات
شو ألمصروع نط من يمة وكالي//شنو جمع باب
كتله//👈 ترى أعرف تصير بوب
كالي //وألخبيث شلون تجمعين ألكلمة
كتله//👈 ترى سهلة تصير أخبثين .
عصامكو كالي //أجمعيلي ألجبان
كتله// 👈يبووووو ترى دوختوني وبس تضحكون عليه
ألولد يصيرون أجبنين
وألبنات يصيرن أجبنات .
كميلة تضحك وتكلي// هديل بروح عطأ
جكليت شلون تكولي...أذا كميه هواي
كتلها//👈 يعني هوايه جياسة جكليتات .
عصامكو مات من ألضحك...وضل يأشرر بيده
وكال //بس هاي ...شلون تجمعين كلمة أكل
كتله //👈وألعباس أعرف هاي ألكلمة
تصير طعام أعرفها من ألتلفزيون .
يابوية ألمصروع...وعصامكو عيونهم كامت أدمع
من كثر ألضحك .
بعد ما أذن ألظهر...وأحنه بعدنه على كعدنه وسوالفنه
وهم ألاحقرين يضحكون عليه ..........
الى اللقاء في الحلقة القادمة
—————————————