#حصاد-ألمواسم
👇
#فراقد
👇
#ألحلقة((٤٧))
××××××××××××××××××
بهذاك أليوم...وبعد ألهوسة ألصارت ...
كل ألموجودين بقوا ساكتين وصافنين
يعني أحوال ألبيت كلها أنكلبت ...
محمد ألمصروع هج من ألبيت
حتى بليل ما أجى...بات يم مرته ألثانية عصامكو.
وألسيد ألعصر مراح للمرقد...وصاح علية
وكعدنه بس أني...وياة...وكميلة بغرفته
وهم راد يفتهم مني ...
وأني حجتله كل ألمقتل
من أول مره حسيت بشعور حلو تجاه محمد
إلى هاي أللحظة ...
هو كالي //سولفيلي كلشي ولا تضمين
وأني كلشي حجيت...وأبدددد ما ضميت شي ،
وهو كلساع يصفگ أيد بأيد ...ويكول// أستغفر الله
أنوب كام يلوم بگميلة..ويكلها // شلون كل هاي ألمدة ألمضت...ما أنتبهتي على بنتج
ما عاينتيها شلون تغيرت....وشنو صار بحالها
وهي عاشگة ...وأنتي تصيحين متبوعة .
كميلة تكله //قابل شامه كفى أيدي...شمعرفني عاشكه...وحتى ما مخليه سالفه ألعشك أعلى بالي...أكولن يعني مكابلتني وكاعدة...
وللشارع ما تطلع ..وشمعرفني بطيحتها من وره ألعشك ...وأصبحت مسودنه بحب محمد ...
وألاحقرين باقر ... وعلاوي نصبوا علية
بس شافوا ألسيد طلع من ألبيت ...
وكل واحد منهم لزم طرف من ألهول .
عودين باقر ...هو غسق (تمارة محمود )
وعلاوي ...سجاد (حكيم جاسم )
أبطال ألمسلسل ألعراقي قبل كم يوم خلصت أسمها
(هستريا)...وشلون أبو غسق وأخوانها...كتلوا حبيبها سجاد ...وهي تنعدم صحتها وحالها من بعد موته .
وعلاوي هنا...علساس هو سجاد...ويمثل بدور محمد ألمصروع
وباقر هنا ...علساس هو غسق ...ويمثل دوري
وأحد يركض على ألثاني...ويتحاظنون ويبجون بالجذب
وباقر يصيح...ويقلد عليه...يسوي صوته صوت بنات
من كلت للمصروع أنت ...أعشكك أنت .
ويضرب بعلاوي على كيفة ... ويبجي بالجذب
وعلاوي عودين يمسح بدموعة ويصيح//عمري فدوة ألج حبيبة ....
كميلة أنشگت بطنها من الضحك
وأني من قهري...كمت عليهم شبعتهم كتل أثنيناتهم
بس أني وين أكدرلهم...جتفوني وشبعوني كتل
مو يعني ضرب يوجعني...بس ألاحقريين تولوني وخلوني بنصهم.
ومرت باقي الأيام ...
وحياتي صارت مخربطة ومتوتره...أحس حتى راحتي فقدتها .
محمد ألمصروع...كام ما يلفي للبيت بالنهار
وكام أبد ما يحجي وياية...ولا حتى يسلم علية
وحتى على وكت ألوجبة ما نكعد سوية...
لأن ألصراحة...كمت أستحي من عندة
حسيت روحي صغرت بعيونه...من حجيت وكتله
أني عاشگتك.
حتى كميلة صارت مو مثل قبل ...
بقت تراقبني...وأسمعها دوم تسأل ألولد عني
لو تجي تشوفني وين أني موجودة ...
مثلا...من أطول بشغلي بالمطبخ ...
لو من أطول بغسل ألملابس بالحمام ...
ألظهر ...مرتين ثلاثة تفوت عليه للغرفة...
وحتى بليل...تكلي//أقفلي ألباب عليج من جوة
يعني قبل ...مالها شغلة بيه أبد...ولا تراقبني
خو ألمراح...والكاع نسيت شكلهن
ممنوع أوصل ألباب ألشارع ...
ومنعتني كميلة...وألسيد من روحتي على سهاد
يكلولي//هي فطيرة ... وأنتي بعد أفطر منها
وتكعدن تلغن...وتهجمن بيوت بهاي لغوتجن وفطارتجن
وما تعرفن ألعواقب ألتجي وراها شنو...
من صدگ طكت روحي...
أنحبست وأنحصرت بالبيت حصرة ألچلب بالجامع
لا أطلع ...ولا أروح ...ولا أجي .
وبيوم صادف ألذكرى الأربعينية لوفاة الفنان رياض أحمد...خطية توفى بيوم ١/٣
يكًولون بي نوبة قلبية ...
يمكن صادف يوم ألجمعة ...من كالوا خبر وفاتة
بتلفزيون ألشباب من دار ألسلام...وقناة ألعراق ألعامة
شبعت بجي علية...
ومن طلع ألبرنامج بليل..وشلون أستذكروا قصة حياته كمت أشهك ...وأبجي على أغنيتة
//من تزعل .... توحشني ألدنيا .....
حتى كميلة كامت تحجي علية
لأن بعد عرفت على شنو أكوم أبجي .
يعني الأيام...كامت تمر عندي بصعوبه...وقهر...وخنگة
خلف الله ...على عون وحمودي،،،بليل ومرات العصر
ألعب وياهم صگلة...لو حية ودرج...لو محيبس
وهم يميلون أكثر شي للعب بالشارع ...
كله يلعبون مطرار .... لو طوبة
لو يلعبون حي الله على ألجميع (ختيلان)
ومرات خلف الله ....على نور تجي علينه
هي وفرقتها الضالة...أكضي ألوكت وياهم
بيوم ألأجت علينه نور...وسمعت بسالفة ألصارت
كامت تلوم بكميلة...وتحجي عليها
أكثر من ما حجت عليه ...
كالتلها//صوجج...هاي بنتج شلون ما حسيتي بيها
وهي مكابلتج أربعة وعشيرين ساعة ...
وأنتي هاملتها ماتدرين بيها.
أنوب...بيني وبينها...بدون ما تسمع كميلة
من كعدنه وحدنه بغرفتنه ....
حذرتني هوووايه من ألمصروع
وكالتلي//ديري بالج يوصل يمج ...لو يطخج
و يقشمر عليج والله أحبج ....
لو والله أني صرت معجب بيج ...
ديري بالج وأياج...والله لو أسمع كلمة طالعة عليج
بالعباس أدفجن بصف أقبال ...وأبتهال .
أني طالعة ألدنيا من عيني...من وره ألخنگة
ونور تزودها عليه...بس أكيف من تجينه
ألعب شوية ويه جهالها..وأتونس على سوالف هذوله ألهتليه أبراهيم ...ومحمد سوالفهم تخبل .
وهاي ألخايسة نبأ...من صدك برعة...وبنيه عاق
ومن تحجي تكسر بالحجي ...
وتطلع ألكلمة من حلكها...شلون بحساب تفشر
مثلا تكول//(أكسة للسانج )يعني (أكصة للسانج)
وأني أخرب من ألضحك ...لأن هي تكولها بطريقة تضحك .
علاوي...وباقر وحتى سجاد...فد يكيفون من تجي
يكعدوها بحظنهم...ويكلوللها كولي فلان كلمة
وهي تحجيها حجي مكسر...وتطلع من حلكها
شلون ألكلمة ألفشار ...نموت عليها من ألضحك .
وفد يوم كلنه كاعدين نتغدة ...
ألولد كلهم موجودين...وحتى ألمصروع كاعد ويانه وألسيد...وكميلة جلبت بنور على ألغدة
بقت يمنه هي...وفرقتها الضالة ..
لأن جان مالها خلك...ما إعرف شبيها
وأنوب ألجو نار أستغفر الله...يسمط من ألحر .
علاوي كال للبرعة//نبأ أكلج خالي شلون تساعدين أمج بالبيت...؟؟
هي تحجي بگل ثقة ...وتأشر بيدها عودين تثرم
تكله // عواوي أنا چاعدت ماما بالچرم
أكسه أللحم ... وأزبه ألعدم
(((علاوي أني ساعدت ماما بالثرم
أكص اللحم ...وأذب ألعظم ))
((ترى عدلت الكتابة 😁لان بالحقيقة فشله والله 😅😅😁))
أني شنو...فد وحدة نادره...وبنيه حديثة ومعدله
بيدي دولكة أللبن كاعد أشرب...وسمعتها كالت هيج
وحجيها فشار على حالة...هي شربه للبن..وهي ضحكة
بعد ما سيطرت...رشيت أللبن بوجهه عون ...
خطية غسلت وجهه .
يا بوية...كلهم ماتوا من ألضحك...
أنشكت بطونهم ...هلكد مضحكوا...على كلام نبأ
وعلى ضحكتي ...وغسلت وجهه عون
بس عون سودة علية ...زعل وكام من ألغدة .
ومحمد ألمصروع...عودين هم ضحك...هم أهتز
أبددد ...ناصب جادر وفاتحة بقلاقيل وجهه.
باوع عليه...وركز بعيوني وكال بصوت صح ناصي
بس يخوف // ماكو فايدة وياج ... !!!!!
من خوفي ... سويت نفسي كمت أراضي عون
وإني جذب ... أنهزمت من عنده
هو بدون كلشي متحمل عليه...وما طايقني بعيشة ألدنيا
أفلت بجلدي أحسلي .
عدت الأيام ....ودخلنه بشهر ألخامس
عم ألسيد ساجت...أجى أستشار وأخذ موافقة ألسيد ومحمد ألمصروع...خاف ألهم نفس با أزهيران وسهى لوأحد من ولد ألسيد...لو لمحمد ألمصروع نفسة
علمود جايتهن خوش قسمة .
أزهيران متقدملها قايد أبن ألمختار ...
هن يكولون عليه // حلو ... وهيبه ... ومريش .
وأني أشوفة زووووعة ... منيله حلاة
عودين عيونه خضره ....وأذا عيونه ملونه
شعيوط عيونه أحلى ... والله عيونه شهله تذبح
من باجر أكظيلة نثية حلوه ومعدلة .
وسهى متقدملها ... أبراهيم ...أبن أبو أبراهيم
هذا أبو كرش ألحبلة...ألراد يخطبني وما رضيت بي...
أبراهيم يصير أبنه ألجبير ألمتقدم لسهى
وأهم شي يكولن عليه // مريش
أهم شي عد أزهيران وأمها ...
كون ألواحد حلو ... وكشخة ... وهيبه
وكون أهم من هذن كلهن ...كونه مريش
وينسن الأخلاق...وألتمنطق...وألرومانسية...وألتضحية
و(( ألتگ تييت )) من يطلع ...لو من يكعد بديوان
ويعاملها على كونها هي زوجته ... وبت حديثة
وعدها أحساس..ومشاعر..ونبضات القلوب تجاهه...
عاد ألسيد...ومحمد ألمصروع ...ما عارضوا على قسمتهن...وباركوا لأبو جمال على قسمتهن وسترهن.
بيوم شرب ألشربت ... مال سهى ويه أبراهيم
مارحنه لا أني ...ولا كميلة
وحتى بيوم خطوبة أزهيران من قايد...هم مارحنة
بس ألسيد...ومحمد ألمصروع...وألولد راحو
بس بيوم سوون حفلة كطع ألمهر مال ألسيد
وهم تلبيس ألذهب ...مال حفلة أزهيران
لأن صارت قبل حفلة سهى ...
هنا توسلت بكميلة ... أروح وياها للحفلة
هي وأفقت أروح وياها...لأن شافتني من صدك ضايجة وطكت روحي .
بعدين صفنت على روحي ...
شلون أروح باجر ألعصر ...بهذا شكلي ألمبهذل
توسلت بكميلة ...أروح على سهاد ما رضت .
عاد دزيت عون على نور كتلة//كوللها بنتج تكول أريد اروح لخطوبة أزهار ...وحالي مبهذل...تعاي ساعديني
صدك ثاني يوم ...وتجيني نور من ألصبح
وأكيد وياها فرقتها الضالة ...
بعد كليبي نوره...دازة حسيون للولاية ألبارحة ألعصر
رايح جايبلي صبغ مال شعر أسود
لان شعري صاير لونين
من فوگ أبيض ... ومن جوة أسود
شمرنه ألفروخ على كميلة ... وكعدنه بغرفتي
أول شي عدلت شعري...وكصت أطرافة شوية من جوة
فرد نوب صايره بي كرطيفة ...
وصبغته الي كله بالون الأسود .
بين ما أخذ لون ...خلته يمكن ساعة براسي
صبغت حواجبي...بس ما قبلت أحفهن لو أعدل بيهن
وعلى كيفها هم صبغتلي رموشي ...
وحفتلي شواربي ...
وجايبتلي من عدها كوستم...
قميصه قماشة ناعم حرير..أتذكر لونه بصلي..وبي ورگة سودة ناعمة...وكتافياته عالية ...وياه تنوره سودة .
وحذاء كعب ناصي ...لأن ألصدك ما أعرف ألبس حذاء كعب عالي وامشي بي ...أنجبح وأنشمر هناك
ألبس كعب ناصي ... أسترلي وأحسن .
وجابتلي وياها كلادتها ذهب ... ومحبس
كالت// لبسيهن كدام ألبنات...عيب تبقين مخلعة بدون ذهب.
عادت كالتلي//كومي بسرعة أسبحي...وغسلي شعرج زين ...وتعاي أفيره ألج ...وأسويلج تسريحة بسيطة
وصدك ركضت سبحت...وغسلت شعري زين
وأستخدمت خبطة سهاد ألسحرية ((الشب والمي ورد))
بالصيف دوم أستخدمها ... وفرشت أسناني
وبدلت ... وطلعت ركض من ألحمام .
باوعت بالمراية ألمنغمشة ألموجودة بره على ألمغسلة
يا الله ...طلعت حلوة ...صبغ لون الأسود ألشعري
يكوم يضوي على وجهي ...ويه حواجبي ورموشي
فرد نوب يتغير شگلي .
رجعت نور أستلمتني...سرحت شعري بالمشط
وأنوب فيرته...ولفلفته كله إليه بمي وشكر
وأوراق أخذتها من دفاتر ألولد ...
سوتها على شكل لورات ناعمة...
وتعكدها بشرايط نايلون مزقتها ألها من ألعلاكة
وتيبسها بالفير .
بين مايبس شعري ...وياخذ لفه بالورق وألنايلون
كالتلي//كومي بدلي بسرعة ...
دفعتها بره ألغرفة ...أستحي أبدل كدامها
هي تضحك.....وتكلي// ولج مخبلة قابل ما شايفتج دبلي وفضيني ...ما ضلنه وكت .
بس أني ما قبلت...أستحي منها طلعتها بره ألغرفة
وبدلت بسرعة...لبست ألملابس ألداخلية ألجديدة
ألنطتهن إليه سهاد...وأتگ طويل ... وألكوستم .
فتحتلها ألباب ...فاتت عدلت شعري
فتحت أللفات ...ونزلتهن إليه على طول شعري
وشالت كم لفة ...ثبتتها بالماشات إليه ليورة
وعدلت گذلتي ...سوتها أليه برچم ...
ولمت كل شعري من كدام ... بطوگ أسود
ما قبلت تخليلي مكياج ... بس كحلت عيوني
وأني هم صرت لوتيه ...
أخذت سمكاك نكعدته وبقيته على شفايفي
حتى يصير لونهن أحمر ... بدل ألحمره .
لبست ألحذاء ...شويه طولت مو هواية
ورشيت عطر بروت الرجالي...
ترى أني بگت ألشيشة من ألمصروع بدون ما يدري
باقي بيها شويه ... وضامتها بهدومي
من أشتاقله...أطلع ألشيشه أشتم ألعطر...وأرجع أضمها
وأليوم ... أريد عطره يحضر ويايه بالحفلة .
لبست الكلادة الذهب ...وألمحبس
من خلصت ...وباوعت بالمرابة
طلعت مو أني ....غير شگل ...صرت كلش حلوه .
كميلة من شافتني طلعت من ألغرفة ...
كامت تصلي على ألنبي ...
تكول// وعلي أليوم يخطبنج ألنسوان
أذا ما أجتج قسمة أليوم ... فلا أتسمى أم عطأ ...
نور أخذت فروخها وراحت ...أجى عليها حسيون
لأن أمه باقيه بالبيت وحدها .
من ردنه نطلع ...سجاد أبو خشم اليابس
صاح //وين طالعة بهذا شكلج...وأنتي تارسة وجهج زواگة .
كتله// ما مخليه شي لا تعرضلي .
هو كالي//بسيطة هسة أصيحلج صگارج ....
وصدك ألجلب ...كوم وروح صيح ألمصروع
وكايله // هديل مخليه طن أزواگة .
هو ألمصروع أجى من ورشة ألنجارة متخبل
من شافني متحضره...جنت لأبسة بس ألربطة
بعدني ملابسة ألعباية...وأكفة بالحوش أنتظر كميلة
كالي // شنو هذا ألمكياج ألبوجهج ...؟؟؟
كتله// والله نوره خلتلي بس كحلة
وصبغت شعري...وحواجبي هيج تغير وجهي .
كالي//ما تطلعين أذا متغسلين وجهج
لو تتغشين...
كتله//هسه ألف ألعباية على وجهي وأسويها مثل ألنكاب
كالي// هذا حجي يفيدج ...ماكو تلفيلي ألعباية
غطي وجهج كله ...مو تطلعيلي عيونج.
أجت كميلة ... وبيدها شيلتها سوده
يمكن سمعت صوته من يحجي وياية...وداير خلقته ألحلوه على باب ألهول ... يمكن حتى يسمعها ألحجي.
كالتله// لا تعصب أبو جاسم
حسبت حساب طلعتها ... وحضرتلها ألشيلة
تغطي وجهة بيها .
كتلها//يمه ألجو يسمط من ألحر ...شنو أغطي وجهي
هسه اتخربط ... وأوكع بالشارع من ألحر .
هو كالي// ألبسيها خاتون ...وغطي خلقتج
أبد ما توكعين بالشارع ... ألستر حلو .
كميلة تغمزلي // يالله راح تخبلني هاي المرأة
ما أدري ليش تخاف من عنده ...!!!
كتلها // يمة عليش تغمزيلي ما ألبسها ...🤦♀️
هو أنلدغ من يمة...وكال// لعد ماكو طلعة
أكعدي وستجني...ماعندي مرأه تعرض روحها على أوادم ألديرة .
فد ضجت ... وأحد خبل والله مو صاحي .
هو بدون كلشي مصروع...وأنوب أتعذب بالسجن
وناتلي بالكهرباء...أنصرع بالزايد...طكن فيوزاته كلها
سلمت امري لله ...وأخذت ألشيله وشمرتها على وجهي ولبست عليها ألعباية ...ألمهم أروح للحفلة .
بالسبع حرمات...لو أدري هيج ألحفلة خايسة
وكلها ملاقة ...وعيارة ... فلا أروح .
أزهيران...كامت تجرش شلب...وتنكت من عيارتها
وهلكد تموعت كدام قايد .
وهو تخبل..لو ماعيب من عدنه..يمكن يبوسها كدامنه
وبس يباوع عليها ...
وكلساع مدنك عليها ومشاورها ...
لو بس أعرف..شنو يكللها ويشاورها...جان أرتاحيت
بس هي ألصدك طالعة حلوه ...
هي بيضة...ولابسة بدلة لونها أحمر...طالعة تضوي ورايحة للصالون طالعة مرتبه .
لليل..وأجتي ندى كالت //محمد وسجاد يصحون عليجن...يمكن يردون ياخذوجن للبيت حظرن نفسجن
أني لبست ربطتي...وشلت عبايتي بيدي
وطلعت أمشي ويه كميلة...تمشي وتسلم وتبوس .
لأكانة عصام باب ألهول ... يريد يفوت جوة
يصيح على مرته ...تسويله درب
خاف ألبنات مفرعات بدون حجاب .
باوعلي بنظرة ...
يمكن أخذلي بيها أشعة لعظام جسمي كله .
وأنوب باوع للمصروع...كاله//ماالله يهيدك..وغمزلة
ألمصروع هز راسة يعنى لا ...وكاله // تؤ ..تحلم
رجعنة ألمصروع للبيت...هسه ألدنيا ليل منو يشوفني
وهو هم طنگر ...ألا ألبس ألشيلة على وجهي
عدت كم يوم ...
وصلوات سهى ما طولت خطوبتها ...
بسرعة عرست...وصار عرسها قبل أزهيران
كميلة هوايه تمدح با أبراهيم وتكول//شاب صاحب أخلاق عالية...هو بكبر علاوي هم يدرس بالكلية
هاي أول سنه أله.
هنا ودخلنه بشهر ألسادس ...
وألجو يسمط من ألحر....
ويادوب يلحك علينه ألمي ألبارد ...
لأن ألاحقرييين أهل ألكهرباء شلوا حالي..كلساع ومطفينها...حتى ما تلحك ألدولكات ألفافون تجمد
خلف الله...على الحِب...أغسلة وأنظفة
وأملي مي من لوله الأساله...وأخلي بي جم دولكة ثلج هل جامدات ...علمود يبقى بارد لليل .
والله ألنكاط مالته...هم يفيدني...لأن مخلينه بالفي
جوه ظل ألتوثة...وبصف ألتنور...يعني مكانه بارد
أبرد جواة ألركي...شوف شكم وحدة يجبون من ألزرع
أجمعين جواه...وبوكت ألوجبه...أفشگلي وحدة...أثنين
وليوم ألولد صلوات موجودين...نازلين من دوامهم
سويتلهم قالب كيكة...وشويتلهم صينيتين وحده كليجة
وحدة خفيفي .
لأن الأوضاع بهاي ألسنة..صلوات بعد برنامج ألغذاء مقابل ألنفط...صارت ألوجبة كلش زينه
كاموا يوزعون بيها طحين...وباقي ألمواد ألغذائية
هم موجودة...عاد شويه تشيل من حمل العيشة.
علاوي بعد رويحتي كالي// فدوة بعد أخيج
بس أكويلي قمصاني ألبيض أثنينهن ...
وبنطرون قماش ... بس وأحد لونه أسود ...
يريد يروح بيهن للبغداد عنده أمتحانات .
من خلصت شرب ألجاي...وأكلت وياهم كيكة ..
كمت على غرفة ألولد ..
وأخذت قمصان علاوي وبنطرونه حتى أكويهن .
باوعت هيج بالصدفة على ألحايط ...
شفت شغلات غربية مرسومة على الحايط ...
تقربت عليها...حكيت طرفها با أظفري كام يطلع منها نمل أبيض...عفت ألرسم...خطية ألنمل شعلية بي.
كملت كوي...وعلكت ألملابس بالتعلاكة بمكانهن
ورجعت كعدت بالهول ...
هيج بالصدفة كلت //خطية ألنمل من ألحر باني عشوشة على ألحايط بغرفة ألولد ...
كميلة باوعت علية...جانت تخيط بشلتات ألمخاد
ألبارحة...هي نزعت كل شلتات ألمخاد ألنام بيهن...
وأني غسلتهن...وهي وأجبها تكعد تخيط لأن أني
مو هلكد أحب ألخياط ...
كالت// يمه يا نمل هذا ألتحجين علية ..؟؟
كتلها//يمه هسة شفت عشوش مال نمل أبيض
خطية من ألحر...بانيات على ألحايط بغرفة ألولد
من هذيج ألجهه يم ألبوفية .
شو هي باوعت على باقر ..وكالت// ولك يمه كوم عايلي شنو سالفة...بس لا هاي ألعثة بلشت بينه ...
ودهرت ألغراض .
باقر كام من مكانه...وكاللها//هسه أشوفها هاي بنتج ثوله ما تعرف ألعثة ... من ألنمل .
صدك راح باقر ...ورجع ..
ويكول// راحن غراضج يكميلة
ألعثة ماكاله ألبوفية ...وهذاك ألظلع ،
ويخوفج يكميلة...بس لا بالشه بالسكف ومنخورته.
شو هو كال هيج ... وكلهم أنخبصوا
وكلهم كاموا على ألغرفة يشفوها ...
كميلة خبصتهم //هسة تصيحولي فاضل...ومحمد
بيتي أكلته ألعثة .
وصدك عون وحمودي...وأحدهم صار شسرعته من ألركض...مثل باباي من يشرب قوطية ألسبانخ
وأطك عضلاته ...ويصير كلش قوي وسريع
صاروا مثله...وراحوا صاحوا ألسيد من ألمرقد
وألمصروع من ألورشة...أكيد لأفي يم مرته عصامكو.
أنخبص ألبيت ...
ألسيد بدل ملابسة وطلع للمراح ،
وألولد كاموا يشلون بالفراش...ويشمرونه بغرفتي
وطلعوا ألبوفية بره بالحوش .
وباقر راح جاب من ألمضمد جم أسرنجة ...
وجايب بدربة تيزاب من بشاره ...
أنوب كشروا حايط ألغرفة..و وخروا بيت ألنمل وحركوا
وألصبغ حكوا بالسجاجين طلعوا ألجص ...
وكاموا يحقنون زروف عيون ألنمل بالتيزاب
يسحبون بالسرنجات ... ويحقنون ألعيون .
ألسيد جاب سطلة جبيرة...خابط دوة مال عثة بيها
لونه أبيض...وريحته تموت...تخنگ كلش قوية
من خلصوا ألولد ألحايط ...وخروا نايلون ألسگف
ألحمد لله ما كو بالسكف ...خافوا لان خشب خاف هم ناخرته ...بس هي ألخبيثة بالاشة بس بالحايط
وظهر ألبوفية .
ألسيد رش ألغرفة كلها..من ألسكف للحياطين للكاع
طلعنة كلنه منها ...وفرغناها من ألغراض
ومن خلصها رش ...قفلنه بابها وعفناها .
ألمصروع شكال//هاي أكيد ألعثة جاية من ظهر ألحايط
كوم وأخبطلك بعد سطلة...وأندار على ظهر ألبيت
ورش كل حياطين ألبيت من وره...حتى ألكاع راشها.
أني تنك صدري...كمت ألكف الهوه بالكوة
عاد باقر بعد رويحتي...راح جابلي علاج من ألمضد
وكمامة بيضة كالي//لبسيها تخف عليج ألريحة
وصدك ثاني يوم ...
ونبلش أني ...وكميلة... ودزينه على نور ...
وسوينه حمله على كل ألبيت ...
نبشنه ألفراش ...ألحمد لله كله نظيف
وغرفة ألمصروع هم نظيفة ...
وباقي ألبيت كلة نظيف...
بس غرفة ألولد ظلع وأحد بيها ناخرته ألعثة شوية من عندة ... مو هواية .
ألمصروع...شلع خشب ظهر ألبوفية وشجره بالتنور
وتأكد منها ..يعني باقي ألخشب مابي عثة
ورشها بالدوة أليخنك ... وعافها بالشمس
كال// بعدين أسويلها ظهر .
من كثر ألشغل صدك تعبت ...
وريحة الدوة ...هي ألتعبتني تنكت صدري .
عفت نور ... وكميلة يشرن بالفراش بالمراح
ورحت سبحت ... أريد أرتاح ...وشوية أغفى
ألبارحة ما نمت ... لأن صدري متنگ .
ومن طلعت من ألحمام...
بالحوش لكيت عصامكو ...يم ألمصروع
يشوف ألبوفية ...
ويريد يصعد يشوف سطح غرفة ألمصروع
ويتأكد من سطح باقي ألبيت ..
أني طبيت ألغرفتي...عندي دشداشة ربع أردان
ما ألبسها بالبيت أستحي من ألولد...ألبسها بس بغرفتي
ومن أطلع ألبس عليها دشداشة أردان
وصدرها هم شوية مدلع...هي دشداشة كميله وكمركتها
أرتاح بيها بالنوم خفيفة .
لبست ألدشداشة...وسحبت ألمخدة من كومدي فراشي
وأنجطلت ....
يادوب بديت أغفى ...
وما أحس بس شي لدغني براسي .....
جوة أذني أليمنه .......
بالبداية حسيتها جوية جكاره...يعني جويه صغيرة
من خوفي ...بسرعة شلت راسي عن ألمخدة
ماكو شي عليها ... !!!!!
بس مو شعري مفتوح ... ونزل على صفحة
عيوني ... وألجح بي عكربه مشربكة بي
يمكن بكبر جف أيدي...وسوده طوخ...بسواد شعري
يمكن تريد تصعد فوك على راسي...
من خوفي ...كمت أنكت بشعري بخبال
وأعيط بصوت عالي// يمه ه ه ه ألحكيلي
من خوفي...ونكتت شعري بقوه ...شفتها وكعت على ألمخدة ...بس ما أعرف بعد وين صارت .
يعني كمت...وكفت على طولي...وملشت شعري
وما أدري بروحي من ألخوف ...
وعياطي رج حياطين ألبيت ....
شو ثواني كلش قليلة ...
مكان أللدغة كام يوجعني بالزايد ...
لزمته بيدي...أحس ألمكان جوه أذاني صار كلش حار.
طبت علية نور تركض//وتصيح شبيج
كتلها//عكربه لدغتني براسي بس ما أعرف وين راحت
والله ألموقف ثواني ....أحجي ويه نور
حسيت حلكي صار بي طعم زنجار ...
شلون ألواحد من يخلي بسمار مزنجر بحلكة
حسيت حلكي صار بي نفس الطعم .
وعيوني كمت أشوف بيها ألنظر مغوش ...
وراسي صار شثكله..كمت أحس بروحي ما أكدر أشيله على جتافي وأسيطر عليه...يعني أحس ركبتي صارت خيط ورخت...ما أكدر أحس بيها تتحرك بطريقة طبيعيّة .
ودكات كلبي ... كامت أدك طبول
حسيت قوة ألدكات راح تشمره بره صدري .
كمت أبجي بصوت عالي كلش خايفة ...
وألوجع بمكان أللدغة ملخني...كمت أفرك بي بقوة
يعني ما أعرف شلون أتصرف بهاي ألطريقة
ألخوف...وألرعب سيطرن علية .
نور كلش خافت ... كامت تشيل بشعري
وتوخر بيدي ...تشوف مكان أللدغة وين
يعني أنخبصت أكثر مني .
هنا وكعت بين أيديها ... وأنجطلت بالكاع
ساحت روحي ...وحسيت كل عضلات جسمي صارت رخية ... وعندي رعشه صارت بكل جسمي .
من وكعت بالكاع ... كمت ما أشوف
بس أسمع بتك أذني أليسرة ...
وهذا طعم ألزنجار موتني ...ترس حلكي ترس
أسمع هنا صوت علاوي جفت علينه ويصيح// هاي شبيها ...؟؟
ونور تصيح خاله// ألحكلي بنتي راح تموت
لدغتها عكربه براسها.
تقرب علية يشيلني ويصيح// ولك بااااااقررررررر وينك
كميله هنا خبصت ألدنيا عليه ...وخوفتني بالزاد
وخوفت ألولد ...أكثر من عندي
من سالت// شبيها هديل تعيط ..؟؟
نور كالتلها// لدغتها عكربه براسها
وهي عاطت // يبوووووو ولكم راح تموت .
علاوي كل مره يشيلني...من يتنگ صدري يوديني للمشتشفى...هلمره حظي ألحلو ما أعرف شصار بي أتبلهت...وبعد مابي قوة حتى يشيلني من ألكاع.
أني هنا أنصكيت...وحسيت نفسي بديت أفقد ألوعي
أسمع بس ما أشوف ...
وحلكي مزنجر ....
وجسمي كله كام يرعش ...
وراسي صار طوبه منفوخة ....
أسمع صوت باقر ...وألمصروع جفتوا علينه للغرفة
وباقر بدون ما يفتهم شنو ألموضوع ...
تقدم عليه يريد يشيلني ويه علاوي ..
هو أجى مخبوص من بره...وأنوب شاف حالتي أنخبص بالزايد...شلوني أثنينهم علاوي من جتافي ...وباقر من رجليه ...وطلعوا بيه للهول .
وألمصروع يصيح//الله اكبر عليكم ستروها
مو هيج تشيلوها .....
وكام يصيح // ولج نوررر جيبلها جرجف ألفها بي.
نور ...يمكن راحت تجيبلي جرجف يلفوني بي
وكميله...هنا تجر بثوبي تنزله على رجليه
لأن ألولد شلحوني ...
ونور عاطت // محمددددددد هاي العكربه
سمعت سجاد صاح // هاي شفتها
وسمعت صوت طب نعالات على ألكاع .
يمكن باب ألهول ...وصلوني ألولد
وأسمع صوت ألمصروع بصفي..يصيح على ألولد //وخروا عنها خل أسترها..فضحتوها الله لا يرضى على بليسكم..حسيته بده يلفني بالجرجف بخبصة وهوسه
كل ما يحركوني...أحس ألحرارة أطش براسي أكثر
ويثكل راسي بالزايد .
هنا غديت خركة ...
جسمي كله أنتهى كمت ما أسيطر عليه ...
وعيوني غمضن من وحدهن..صار ألجفن ثقيل ما أكدر أفتحهن ...
شكد ما أني متنكة...صدري قبط بالزايد
وصارت عندي صعوبة بالتنفّس كلش قوية...
وحسيت حلكي كام يتفل من وحده...يطلع رغوة
بس بعدني أسمع...بس ألصوت كمت أسمعة ناصي
ودماغي بعد مو فرد نوب طافي ..
لأن أحس بالزمتهم على جسمي.....
هو ألمصروع يلف بيه بالجرجف
وكميلة عاطت // يبوووووووووووو ألبت ماتتتتتتتتتتتتتتتتتتتت .
هو بسرعة شالني ...ويمكن مشى جم خطوة
وصاح//لللللللللگ عصااااااااااام شيلها شبيك تباوع عليه خررررررب حياتي جتافي سكطتني ما أكدر أوصلها للباب .
هنا حسيت أيدين ... شكد صلبه وقوية
أخذتني من أيدين ألمصروع ...وحظنتي بقوة
من جوة أجتافي من فوك...ومن يم ركبي من جوه
وحراره ألنفس بصف وجهي ...يمكن يباوع عليه
وصوته لعصامكو صاح// محمد العكربه العربية السودة ألجبيرة موووش.
سجاد صاح // أي عمي جبيرة سودة ...وكتلتها
طشرت سمها بالكاع .
رجعت حرارة ألنفس على وجهي
وحجه بصوت خايف //كميلة أدعي ألبتج ترجع للبيت سالمة
هو يحجي ...ويمشي بسرعة طلع للشارع
لأن سمعت علاوي يصيح//شبيك جعيوي أنصكيت
وخر خل أفتح باب ألسياره أختي ماتت
هنا حسيت جمسي ...كام يضخ مي وعركت
يمكن رطوبة ألعرك رطبت ألجرجف ...
أحس صارت خنكة كلش قوية بلعومي ...
وفقدت ألسيطره على كل جسمي كام كلشي بيه
يشتغل وحدة ...وبلعومي صارت بي شحطة
وطلع رغوه قوية من حلكي ...
أخير شي سمعته كميلة عاطت//يبوووو يالعرررررب
بنتي راحت من أيدي
وألولد يعيطون ويصيحون بصوت عالي//لا اله الا الله
هنا فقدت...يعني شايفين ألواحد شلون يمشي
ويطفي دكم ألكهرباء ...وألبيت شوية شويه يصير أظلم
بهاي أللحظة صارت ظلمة .....................
الى اللقاء في الحلقة القادمة
×××××××××××××××××××××