#حصاد-ألمواسم
👇
#فراقد
👇
#ألحلقة((٤٦))
××××××××××××××××××××
الثـگل مـو بـالشكل💭💕 الـثگل ثگـل الطبع
الـريشه خفيفة 💓 وزن
بس لــو تــرد ع ال فعل.... بيها النسر يرتفع💘
———————————————-
وبهاي ألهوسة ... ودخلنه هنا بسنة ال ٩٧
وصار عمري هنا ١٧ سنة ...
بس شنو كارهه حياتي ... وطالعة ألدنيا من عيني
يعني مخلصة يومي بس بجي..وقهر..وحبسة بالبيت وخوف من ألمصروع ...كلساع وكاب عليه
وهل علينة رمضان بدأية ألسنة ... يمكن بنص شهر ألواحد ...ألوكت بارد ...وألصيام بالبرد يخبل
ما أحس لا بجوع ولا عطش .
يخلص يومي بالمطبخ...أبدي أحضر ألفطور من ألظهر.
وهم ألمصروع الله هداه برمضان ...شوية خفت جنيتة من يمي .
أني هنا تابعت مسلسل مصرية جديدة
تطلع وكت ألعصر ...وماعندي شغل هوايه
أكضي الساعة وياها ....
أسمها (لن أعيش في جلباب أبي )
ألمسلسل كلش حلوة...قصتها تبين للواحد
شلون يكدر يصعد من حياة الفگر...لحياة ألقمة بالشغل ألنظيف وألصبر .
يمثلها (نور ألشريف ) ...بدور عبد الغفور ألبرعي
يمثل شلون يبدي حياة ألشغل بوكالة ألحجي إبراهيم سردينه ...بوكالة ألبلح ....بس ألاحقريين مرسي ومحفوظ أبن ألحجي يسولة مشاكل.
بس مرته فاطمة ألتبيع ألكشري خوش مرأه
توكف وياه ... وتساعدة على ضيم ألدنيا .
وتجيبلة ولد واحد ... عبد ألوهاب
وأربع بنات //سنية، وبهيرة، ونفيسة، ونظيرة.
وفد كرهت أبنه...واحد هتلي ومطوطي
متعب أبوه...يوميه يتفستق براسة ومطلعلة شغلة
وبناته حظهن فگر ...وتصير عدهن مشاكل
بسبب طمع ألناس بيهن ...علمود ثروة أبوهن
ألبحسابة تصير مصدر سعادة أله وألجهاله
بس صارت عليهم نقمة ...
كلش حبيت قصة ألمسلسل ... ألعصرية كلها
ابقى افكر با أحداث باجر...وشراح يصير وياهم
أني بالنهار جان مونسني حمودي حبيبي .
هسه صلوات سجل بالأول إبتدائي .
يشبع بجي ألصبح...ميقبل يروح...يخاف من ألمدرسة
شكد ماوكح ويعض بجهال ألشارع ....
بس بالمدرسة جبان ...ويبقى يبجي يخاف
كمت أخلص ألنهار وحدي ...
بس أني وكميلة بالبيت وحدة تباوع بوجهه الثانية
وعلاوي بقى يداوم بكليتة بغداد ما غيرها...
ويكول//أخاف الله ما يوفقني لأن أبويه يزعل علية
بس ما نعرف شوكت ينجح ...وشوكت يسقط
ما يجيب بيدة شهادة .
وباقر بعد رويحتي ...أشكد قرة وتعب
وأمتحن (بكه لوري) ...
وأنسل من ألقلق والتفكير...لحد ما طلعت ألشهايد
وبيوم أستلمها ...خطية شبع بجي ..
كام يدك ويلطم يكول//ظالميني هذا مو أستحقاقي
خطية جاب مجموع نهائي ب الثمانينات
ومن ركض بالمعاملة ...مال تقديم ألكليات
طلعلة ألمعهد ألطبي مال ألموصل/ ومقبول بقسم ألصيدلية .
حتى ألسيد ...ومحمد المصروع كالوله //كل عقلك ينطوك أستحقاقك ...وتريد تروح كلية طب
وعندك مسجون (يقصدون ألمصروع)
ومعدومين أولاد عمك ...بتهمة ألسعي بخراب نظام ألدولة ...احمد الله وأشكرة ...طلعلك معهد طبي بالموصل ...عود أطلع من الأوائل وكمل كلية صيدليه.
خطية حتى من راح داوم ... بقى مكسور ألخاطر
بس يكول// راضي بنصيبي الحمد لله
وهم كميلة ...شبعت بجي وراة .
وهم تخلية أكل...وتصرله شغلات نفس ما تصر لعلاوي.
وسجاد تفرعن بالزايد...من صار بصف ألثالث متوسط
كلساع وكارض جلده محمد ألمصروع
لان كام ما يحشم وأحد...وينتر بالصغير وألجبير
ويعيط على كميلة ...ويتأمر علية
ويكفخ بعون وبحمودي ...
عاد ألمصروع كاعدله بالمرصاد يكرض جلده
كل ما يستخف شوية .
عون حبيبي ...راح صف ثالث إبتدائي
هذا ذيب أجرب ...ما ينخاف علية
صلوات شاطر ...يعلس ألكتابة وألقراية علس
مرات أكو كلمات مو هلكد أعرف أقرأها
أبقى اتهجئ بيها ... هو يقرالياها .
وأنوب ألتلفزيون...لعب روحي من ورة الأخبار
أنخبصوا علمود ألتفاوض وية أمريكا
علمود برنامج ألنفط مقابل ألغذاء
وكالوا//أكو خير بهذا ألبرنامج..وأن شاء الله
أكو تحسن با أوضاع ألعراق بالأيام ألجاية.
وكالوا // بشهر ألثالث بهاي ألسنه...راح تجي أمدادات ألغذاء والدواء للجهال...والعراق ينطي لأمريكا نفط ،
والله احنة ألعراقيين حبابيين وفقرة...وموافقين ننطي ألنفط ...بس خلي ينطوة دواء للجهال ألمرضى.
أنوب خلال ألنهار ...أشبع بجي
وين ما أكلب ألتلفزيون تطلع أغنية كاظم ألساهر
( تذكر ) ...تشبعني قهر وضيم ...
مصورين وياها...لقطات شلون ألجهال يموتون...
وشلون يشيعون جنايزهم .
و لقطات من ضحايا ملجأ العامرية
ومدرسة بلاط ألشهداء
ولقطات من بهذلة جهال ألشهداء ألراحو بحرب إيران...
وحرب الكويت ...وشلون ألوضع تعبان...
وماكو لا أكل ...ولا دواء
أبجي على ألاغنية من خاطري .
وبقيت بس أدعي ألروحي بالصبر
وأقنع بروحي...وأكول ألنفسي // أني بنية قوية مثل وطني ألعراق ... أتمرض بس ما أموت ...
الله يصبرني على ضيم ألمصروع ...
ويصبر ألعراقيين ألمفجوعيين..وألدايخين بضيم هاي ألدنيا ألزفره..وضكة ألحصار..وبس نكول // الله كريم
نور وفرقتها ألضالة ...تروح وترجع علينة
وأبقى أضحك عليها ...من يبجون فروخها
ويردون ينامون...ترضع أبراهيم،،،ومحمد سوية
لان يخبصوها...أكلها//هسة صرتي نفس هجع ألصخلة
أم شعيوط ومشيعل...من جنت أشوفها ترضع جهالها
أثنيناتهم سوية.
هي تبقى تضحك...وتهز بيدها وتكلي//بلا هسة أني شريد أجاوبج ... بس أكلج أشكرك ...وتبقى تضحك
وبتها نبأ ألخايسة...برعة ،،،وكوية ،،،وصلفة
أكلها // هاي بنتج مو خوش أدمية
ومن هسة مبينة برعة..ضبيها شوية لا تفلت وبعد ما تكدريلها.
هي تكلي//ولج والله حسين مطلع عينها
مو تعرفين طبعي أني أدلل وأربي بنفس ألوكت
بس حسين مفضلها على ألولد..ومن هسة طلعت عينها
عاد خلت فروخها يمي...وراحت هي و كميلة
تسلم على بيت عمامها ... ما تلحك تطلع
فروخها مو خوش أوادم ... خابصينها خبص
من رجعن يضحكن ويتغامزن بيناتهن
كتلهن//شكو شبيجن ؟؟
نور كالتلي//أزهيران راح تعرس...صلوات جايتها خوش قسمة .
فكيت حلكي كتلها // هي مو تريد محمد جنية
وعاشگته ... ولا زكة روحها علية .
كميلة كالتلي // هذني محد تعرفهن بكدري
أمهات دروب ...ومصالح
يكللج محمد بعد ما يضني...
وسالفته هو وأنعام صارلها أشهر أمعلكة ...
ومحمد يدور بس الطلايب والمشاكل ...
وهي أذا تبقى تمشي وره كلبها وعشگها مراح تاكل خبز
توافق على قسمتها من قايد أحسن ألها .
كتلها // قايد منو هذا ألنوب ؟؟
نور كالتلي// شبيج أبن ألمختار ثالث واحد
صلوات عندة تريله يشتغل بيها على طريق منفذ طريبيل ألحدودي بين ألعراق والأردن ...
كتلها// عوووووع هذا الأسمر اليلعب ألروح
أشافت من عنده وافقت علية ....
جنة أحمد زكي بمسرحية مدرسة ألمشاغبين
كميلة ضحكت وكالت// من دهر فر ألسانج...ولج ماكو وأحد خلص من هذا اللسان ...
وشبي قايد...شو أسمر وعيونه تجدح من ألخضار
ولج شاب معدل...أدعي لله يرزقج بقسمة زينه
كون نفس أخلاقة...وفلوسة...وهيبته.
جاوبتها بكل ثقة //أبد لا تدعين هيج دعوة خايسة
أني أذا أدعي كون الله يرزقني بالقسمة من ألسيد قصي أبن ألريس ... أموعن من أشوفنه يطلع بالتلفزيون
هيج هيبة ...وكشخة ...أكرطنه كرط
نور سوت//حمممم ،، حممم أي ما عرفناج مدام قصي ،
هسة يسمعج أبو جاسم ويجيج ...خوش يكرط جلدج بالتوثية .
وراها عدت الأيام ...مابيها شي جديد
ألولد ...علاوي،،،وباقر كل نهاية شهر ينزلون للبيت
بيوم ألخميس ألعصر ...ويبقون ألجمعة
ويردون لسكنهم بغداد وألموصل بيوم ألسبت
سجاد ...وعون ...وحمودي ...بالمدارس
مخلصين يومهم بين ألدراسة والكتابة ..وألقراية
ولعب بلشارع.
وألسيد مانشوفة ...لان دومه ساكن بالمرقد .
وألمصروع يخلص يومة بين أهتمامه بالكاع
وبين ورشة ألنجارة ...
وبين يخلص ألوكت يم مرتة ألثانية عصامكو .
وسالفة انعام...بقت سكتة لأن ألمصروع هددهم
يسحبها ألبيت ألطاعة..لأن كاطع عليها مهر مال سيد
ومال محكمة...وتعتبر مرته بالشرع بالقانون.
وبنهاية ألشهر ألثالث...وألجو بدة يصير حار
مو مال ألبس دشداشة قديفة ...
يادوب ألبس دشداشة خفيفة وجواها أتك وداخليات
سويت حملة على ألبيت ...
وشلت ألفراش شمرته بالحوش حتى أغسلة.
وغسلت ألبيت ونظفتة...وفرشته حصاير
وكميلة دزت على سهى ... وأزهيران
أجن كربن وياية ألزوالي ... وألفجج ...وألمنادر
غسلناهن غسلة معدلة ... وكومناهن كلهن بالحوش
من ينشفن يلا أشيلهن وأشرهن برة بمراح ألحلال.
للعصر يلا خلصنه ...وكعدت شوية أرتاح
وسجاد راح وصل سهى ... وأزهيران ألبيتهم .
طبيت سبحت ...وحظي ألحلو
أني أبدل وكع أتكي بالكاع ... وأتنكع بالمي
ما أدري أني ثولة ... لو هم باقي ألبنات يصير وياهن
نفس ألموقف من يبدلن ... توكع قطعة من ملابسهن بالمي.
لبست بس ألدشداشة لونها أصفر فاتح وبيها نقاط سود ناعمة...وجواها الداخليات وطلعت من ألحمام كلت أبدل بغرفتي.
شفت كميلة تنكل بالفراشات وتوديهن للمراح
أنقهرت عليها لأن صدك ثكال .
لبست ربطتي...وأخذت عباية كميلة ألتعبانه من باب ألمطبخ ...وكمت أنكل وياها بالفراش واودي للمراح
كومنة كل الفراشات ألمغسولة بالمراح
وبدينة نشرهن ....بوين ماكو مكان فارغ.
محمد ألمصروع ...
شايف باب ألمراح مفتوح ...وجفت علينة
هم ساعدنة وكام يشرلنه بألفراشات ألخفيفة
وألثگيله أحنة نساعدة بيهن ...ما يكدر يشيل
لو يرفع شي ثگيل ...لأن جتافة مخلعة ماعندة قوة.
من خلصنة كميلة كالت //أكلج يمة دظلي هنا بين ما أجيبلج ...سطلة ألحليب حلبي ألهوايش وياج فرد نوب
عليش رايحة راجعة .
أستحيت منها أكلها بردت...أريد أرجع للبيت ألبس
بعد ملابس ...كتلها// يلا منتظرتج
هي طلعت بسرعة راحت للبيت .
أشوف ألمصروع وكف باب ألمراح...ووجهه للشارع
وكام يدخن جكاير ...وأبد ما يباوع بداخل ألمراح.
كميلة رجعت علية...وبيدها ألسطلة أنطتنياها وراحت تركض ...أكيد شافتلها مرأه بالشارع ...وراحت تسمع منها أعلوم .
كعدت أحلب بالهوايش...يمكن ربع ساعة أقل شوية
لأن صلوات هن أربعة...جمعت حليبهن بنفس ألسطلة
وألمصروع بعده وأكفلي بالباب .
من خلصت كمت لبست ربطتي...أريد أوصل ألباب ألمراح...وألبس عبايتي ...هو أندار علية شافني خلصت
كالي//ألبسي عابتج وأنتي بمكانج ...لا توصلين يم ألباب...؟؟!!
كتله// أي أعرف ما أطلع بدون عباية
هسه ألبسها ...
مشيت خطوتين وأجى علية دخل للمراح
وكال//أنتي ليش تعاندين...ألبسي عبايتج وأنتي بمكانج
لا توصلين يم ألباب .
كتله // وشصار يعني هسة ألبسها ..!!
خليت سطل ألحليب بالكاع ...
ويه عدلت ظهري ...هو وكف كلش قريب علية
وأكف بصفي ...أطول من عندي بهوايه
ماحسيت غير مد أيدة وجر الستي... من وره من ظهري بقوة ...وعافها ترجع علية ...كمزتني لذعتها ،
كالي هو صاك على سنونه ...ويحجي بصوت ناصي
// هذا ألصار ...هذني ألسود ألابستهن جوة...مفضوحات ويصيحن لأمهن وأبوهن..أحشمي نفسج ...لو أكسر أضلوعج .
شتردوني ...فد خجلت ...وصرت بكد ألنملة
وما أعرف شسوي ...حالي أنكلب
أرتبكت ...على خجلت ...على أستحيت
ما أدري شصار بية ....
لبست عبايتي بسرعة ...لفيتها علية ...وطلعت أركض من سرعتي ألحليب كام يتلطلط بالسطله .
ويمكن أسبوع وأني وين ما أشوف ألمصروع
أشرد من عندة من ألخجل وألمستحة .
هذا الأسبوع ...توسلت بسجاد أبو خشم أليابس
وألمصروع وياه ... بس خلولي ألمبردة على شباك غرفتي ...ما كو ما جنهم يسمعون
يكولون// بعد وكت على تنصيب ألمبردات
أني من هسة أبتليت ...
وبعدة مجاي حر ألصيف ألحقيقي..أملي بدولكات ألمي وأعبي بالثلاجات..وأحدهم مثل الحولي...يورد روحة
ويعوف ألدولكة فارغة مايرجع يمليها
واني أمليلها وراهم ... وأسويلهم مي بارد
هااا نسيت أكول ...أني أحب فقرة أضم ألملابس ألشتوية وأطلع ألصيفية...لو بالعكس أضم ألصيفي وأطلع ألشتوي...لأن أعزل كنتور كميلة...و أكمرك من عدها كم قطعة .
وحتى ألولد أكمرك من عدهم...بجايم لو بلوزات لو فانيلات ...ألبسهن من أنام .
كمركت من كميلة بهاي ألتعزيلة ... قطعة قماش
وأتكات أثنين أردانهن أعراض على عرض ألجتف
وأحد لونه نيلي طوخ ...وأحد يمكن مال عرسها
لونه بصلي...ألمهم كمركتهن ألبسهن جوة دشاديشي
ألولد موجودين نازلين من دوامهم
علاوي موجود...وباقر...أطير بيهم من ألفرحة
كلش أشتاقلهم...أحير بيهم وبا أكلهم...وبملابسهم
خطية أخدمهم من خاطري بالأيام ألينزلون بيها.
ألظهر بعد ما غديتهم ...وخوش سويتلهم غدة
وشربتهم جاي بالعافية ...وغسلت مواعين ألغدة
ألكل راح أنجطل بغرفتة .
أخذت ملابسي ...ورحت سبحت بسرعة
ورجعت بغرفتي...طبكت ألباب ونزعت دشداشتي
وبقيت بالاتك ألكمركتة من كميلة .
مشطت شعري وعفته مفتوح
صاير لونين من بداية راسي أبيض...ومن جوة أسود
أريد ينفك علية حصار محمد جنية...وأروح يم سهاد
أرجع أصبغة .
أخذت مخدتي ... وأنجطلت بالكاع جوة ألبنكة
صاير ألجو حار ما ينحمل ...
أريد أغفى شوية ... لأن كلش تعبانة
وما أحس بس صوت محمد ألمصروع بالباب
يعني بنفس أللحظة دفع الباب ...وفات
وهو يكول // كميلة شوكت ألگي مي بارد بالثلاجة
أنصدمت من طبتة علية...هو أبددد ما يوصل ألغرفتي
أرتبكت ما أعرف شسوي ...كمزت وكفت على طولي
وهو أنصك بالباب .
وعاط بصوت عالي // شنووو هذا ألاسم ألداكته على متنج .....؟؟!!!!
هسه حظي ألحلو ...أنت عفت كلشي بية
لا شفت شعري ألمفتوح ...
لا شفت ألاتك ألنيلي ألضاوي على متوني...
لا أنصدمت من شوفتي بهذا ألشكل ...
شفت بس ألاسم ألموجود على متني ...
وألعباس أشك بي عندة خيط خبال .
أني من أرتباكي ما أعرف شسوي ...
ركضت بسرعة وسحبت دشداشتي
حتى من ثولي ما لبستها ...بس شمرتها ولفيتها على متوني .
بس شفته تقدم علية ... وصاك على سنونه
عطت بكل صوتي // يمه ه ه ه ه ه ه الحگيلي
هو بعد مصروع ... وألخبال صعد براسة
تقدم علية بسرعة وجرني من شعري
ويصيح // شنو هذا الاسم الداكتة على متنج
منو هذا ألعاشگتة وداكة أسمة على جلدج .
كمت اعيط // ولج يمه ألحگيلي ...
ولك علاوووي ألحكلي ...
أعيط بصوت عالي..لأن ألصدك محمد من يتعصب
يفقد...ويكسر ألكدامة ومايدري بروحة.
فات سجاد يركض...وكميلة مخروعين من صوتي العالي
وكميلة كامت تصيح // شبيك محمد ويه ألبنيه
ليش تملش بشعرها ...؟؟
هو شنو أدروش علية ...مجلب بشعري بكل قوته
تشربك شعري بيدة ...وبين أصابعة
وكام يهمش بالدشداشة ويوخرها من متني حتى يشوف شنو ألاسم ...هو مو قصدة يتكشف علية
لو يوخر عني ألملابس...بس من كد أعصابة فقد
كام ما يعرف شلون يتصرف .
أني جلبت بالدشداشة...أستحي أوخرها ويطلع جسمي
وهو تخبل علية يصيح// منو هذا ألعاشگتة
وداكة أسمه على جلدج ...؟؟
فات علاوي يركض...خطية ألظاهر هستوة غافي
وبعدين فات وراه ألسيد يصيح //ياساتر ياساتر شكووو
سجاد..وعلاوي..وألسيد..كلهم يلا كدروا يفكون شعري
من أيده..وهو غده جمره وتنفث شرار نار من كد أعصابة
ألسيد يصيح // بس فهمني شكو...شبيك أنكلبت طنطل على ألبت ..!!!
هو يصيح بعلو صوته...يكلهم//الله يريد يكشفها وسلطني عليها...ما لكيت مي بارد بثلاجات ألمطبخ
وهل سألت كميلة ...وهي شاهده .
كتلها// ماكو مي بارد بالثلاجة
وجاوبتني// أخذ دولكة من ثلاجة هديل
كتلها//تعاي جيبيلي أريدن أسويلي كلاص شربت
كالت//أنت فوت وأخذ هديل بالحمام...غرفتها فارغة
ومن دخلت...لكيت ألخاتون نايمة...ولكفت على متنها
داكة أسم معشوگ ألكلب .
أني ما الله هداني وسكتت...لا حلكي ما يعرف يسكت
كتله//والله هاي سهاد هي ألدكتلي أسم ألنبي
لأن هوايه أحبه .
وهو عاط بكل صوته//ولج علينه مو حتى ثلج گلينه
أليوم أخلي ألنبي يتبرة منج
ولج هاي ألدروب مو علية...تراني مفتح بالتيزاب
هنا دخل باقر يركض...وعيونه منفوخة من ألنوم
ويصيح// شكوو شصاير ..؟؟
ألتف علية ألمصروع ويكله// تعال يل حيد
أختك نايمة براسك ... وتتمعشگ من وراك
وأنوب صاح//لكم شبيكم ساكتين ...ما تسألوها شصخمت وشلطمت ...وتتمعشگ بروسكم
وبگواة عينها ... داكة أسمة على متونها.
علاوي يريد يتأكد مني ...كالي//ولج هديل صدك أنتي هيج تسوين ...وتنزلين روسنة بالطين ...
وتفضحينة بين ألناس ...بيش قصرنه وياج ...؟؟؟
ألسيد باوع بوجهي..وكالي// بوية فهميني شنو سالفة وألج الأمان.
شبعت بجي ...أني هنا خاتله ورة كميلة وسجاد
أخاف من ألمصروع...لان حاد سنونه علية يريد ياكلني من كثر أعصابة.
كتلة // بوية والله سهاد هي ألدكتلي ألاسم
ولان كلش أحب ألنبي دكتلي أسمة.
وألمصروع عاط من يمة يصيح //ولج ليش تخليني هسة أكسر أضلوعج...مو كلنه تسودنه بحب ألنبي شو ما دكينة أسمه على جلودنه.
ولج يالصفيرة...كوليلي هذا ياهو ألعاشگتة
وأنتي نايمة بروسنه...وراح تنغط سمعتنه بالطين من وراج .
كتله // والله هاي سهاد دكتلي ألاسم
أني هنا شنو ...خاتله وره كميلة وسجاد
ولازكة روحي مثل ألوزغة على ألحايط .
هو صاح//ولج سهاد شنهي معرسة عليج
وبهشگل تخافين منها...وتحجيلها الأول وألتالي
وادگلج أسم حبيب ألگلب على جلدج .
ما الله هداني وسكتت ....
كتله //لا والله أني ما متزوجة سهاد بالسر
نفس زواج الأفلام والمسلسلات
بس هي دكتلي ألاسم لأن أحبه.
هو عاط //ووووولج يالصفيره تستلوتين براسي
أليوم أعرفنج بالحمامة ألحمت كهف ألنبي
وأطير روحج ليمها .
طفر علية...وهمش شعري من بين باقر ...وعلاوي
وسجاد...وكميله...يعني من أعصابة دفعهم بحيل صدر
ومد أيدة وملش شعري .
ألسيد أتخبل علية...لأن ملشني من شعري
كفخة بقوة على علباه...صوت ألكفخه رن باأذان ألكل ويصيح // هاي جم مره تجاوز عليها بحضوري
وحذرتك من گبل ... لا تمد إيدك عليها
وعيوني مفتشة بضوة ألدنيا .
هو ألمصروع...ما فك شعري الأ تفاجئ بضربة ألسيد.
بحيث من عاف شعري...دفع رأسي برحراة أيدة
من طرف كصتي بقوة...ودك راسي من وره بالحايط
أني بدون كلشي خايفة منه ... ومن ألولد
وأجتني ألضربة قوية ...عطت// يمه رأسي
لزمت مكان ألضربة من وره بيدية أثنينهن ...
وكعدت بالكاع .
وكميله عاطت// يبووووو تفلش راس ألبنيه.
هو كام يصيح //من عساها بالموت ألكرفها وخلصنه من عارها..تربات وساس أقبال..شتردوها تطلع مريم ألبتول
من سمعتة كال هيج ...كلش أنقهرت
لان أفتهمت هو كاعد يشبهني بالمرحومة أقبال
لأن جانت الله يرحمها طالعة عن ألطريق
كلش أنقهرت من كلامه.
وأني بحظن كميلة...حاظنتها وأشهك وأبجي
وألولد كلهم وأكفين حواجيز بالنص
كتلها // يمة كميلة وألعباس هذا أسمه ...
وألعباس مو أسم رجال غريب ...
ما عاشگت من وراگم ...
ولا سويت شي مو زين نفس ألمرحومه أقبال ...
بس هذا كلبي ...ما يسمع كلامي وعشگة .
وبس سهاد تدري بية ... وهي ألدكتلي الأسم
وكالتلي...لو سألوج ...كولي أسم ألنبي .
شايفين ألكل من يمر بهوسة وعرگة وخبصة
وبعدين يصير هدوء ...لأن ألكل سكت فجأة ...
هيج صارت هاي أللحظات.
وهو ألمصروع ...من كثر أعصابة
وصرعة ألخبال ألصاعدة براسة
يصيح // ولج بس كليلي...هو ياهو هذا ألعاشگتة...؟؟
عطت بصوت عالي...وأني بحظن كميلة
// أااااااااانت عاشگت أااااانت
تريد تگتلني نفس أقبال ... تعال أكتلني
والله هو كلبي ماقبل يسمع كلامي .
كملية بسرعة لطمت على وجهه وعاطت//يبوووو
عزه ألعزاج يكميلة ... هسه أنهجم بيتج
ولج أنتي مسودنه وتعشگين عمج ...!!!!
من قهري ...بسرعة كتلها// لا هو مو عمي
بس يصير أخو أبوية ألسيد ألرباني
هو شلون ألواحد وأنتل...هيج ضل مصكوك بمگانة
لا يأخذ ...ولا ينطي وبقى صافن بوجهي .
شافين نار ألتنور ...من تگب ويصير لهبها عالي
وفجأة ينزل عليها مي قوي...وبسرعة تخمد وتطفى
بهذيج أللحظة ... هيج صار بالمصروع
من رجال يرعد أعصابة نار وتسعر ...
ألشخص جامد ومصدوم ...وبس يباوع بالوجوه .
بهذيج أللحظات...بس صوت نفس الأشخاص ألينسمع بالغرفة ... وألعيون هي ألتحجي .
ألسيد ...صفگ أيد بأيد وكال/ لا أله الا الله
وطلع من الغرفة .
وهو ألمصروع...باوعلي بنظرة...يمكن لو عيونه تعدم...
جان رماني بفد شاجور ... وهم يمكن ما يرتاح
ماعرفت ليش هيج باوعلي .... !!!
طلع بخبصة من ألغرفة ...
ويصيح// ربي بعد ضاملي أمتحان...لو خلص دفتر صبري يمگ .......
كميلة كالت للولد//أطلعو بره أريد أفتهم ألطركاعة
ألطاحت على راسي...وأشوفن شنهي ألبلوة ألحلت علينا.
طلعوا ألولد كلهم ...وكميلة كابلتني وكعدت تربعت
جرت دشداشتي من متوني ... وشافت ألاسم
بعدين عدلتها ألي ...وبدت تلبسلياها
عاد أني أخذتها من أيدها ولبستها .
وهي سألتني// أي يمة...أذا تكولين كميلة صدك أمي
سولفيلي شعندج ... وشخازنه بصدرج
وصدك طلعت أنا ألمطفية ...ألما أعرفت من شوكت
أنتي عاشگة .
كعدت كدامها وسولفتلها ...
من أول ألمشاعر ألحلوة ألية تجاه ألمصروع
من شفته بالحلم باسني من ركبتي ...وخجلت منه
وشلون بس سهاد أختي وصديقتي...كتلها على سري
وشلون دكتلي أسمة...وتمرضت بوكتها...وشلون عالجت ألجرح.
وشلون كشفت حالي ندى ...من راح بيوم ألمشية
وشلون تعذبت ،،وتمرضت ،،وشفيت ألويل ،،وألمر
من يوم ألخطب .
وكل ألضيم ألمر علية خلال هاي ألفترة ...
وهي (كميلة) بحسابها أني مريضة بالتابعة
وما درت من حمسة ألقهر...وضيم ألعشگ أللفت روحي
وخلاني ألقهر بدون حيل...وكمت من أمشي وأتوچى على ألحيطان .
هي تسمع مني وتبجي...وأدك بهدوء بجفوف أيدها على رجليها...وتباوعلي بنظرات أم مقهوره...وخايفة على بتها
وأني ويه كل كلمة أكولها...أذا أعرف معناها لو لا
أشهگ...وأبجي...وأحجي بقهر على ألمر بيه.
ما سمعت بس صوت ألمصروع وأكف بالباب
يمكن جان يسنط علينه كال //منو غير سهاد...وندى
بعد يعرفن بسالفتجً ...؟؟؟؟
كمزت من مكاني ... ونطيت بحظن كميلة
وصحت // يمه أجى ألمصروع راح يذبحني .
هو صاح بصوت عالي//بددددددون عياره ألنسوان
منو غير ندى ...وسهاد يعرفن بسالفتج
من ألخوف...كميلة هي حجت//ولك يمه أطلع بره
خل أفتهم دربي .
هو ألظاهر ...كام يدخن لأن شفت دخان الجگارة
ترس الغرفة ..
أنقهرت علية ...
ما أدري أنقهرت على روحي ...
كتله //نوره هم عرفت بيه هذاك أليوم...هي عرفتني من وحدها...وكالتلي// عوفي محمد لان يشوفج بنظرة سودة...لو يشوفج بنت أخوة ...
وأني قررت أنسأگ ....
هو صاح // ياااااالله ألصبرررررر ...
وركع باب ألغرفة بقوة
بهذاك أليوم كل ألموجودين بقوا ساكتين وصافنين
يعني أحوال ألبيت كلها أنكلبت .....
وألقادم 🥺🥺🥺🥺
الى اللقاء في الحلقة القادمة
——————————-