#حصاد-ألمواسم
👇
#فراقد
👇
#ألحلقة((٤٤))
×××××××××××××××××
ارسم حجي💭 يطلع بجي💧والدمعة تنزل طايحة😭
ارسم فرح💞يطلع جرح💔 والفرحة كلش رايحة😞
ارسم عرس👏 تطلع شمس☀ وبصفها تطلع فاتحة😔
×
××××××××××××××××××××××××××××××××
شكد ما جنت فرحانه خلال الأيام ألمرت بشكلي ألجديد
رجعت ضجت وتكأبت...ورجعت أبجي وعزلت روحي
من هذاك أليوم ألجابو بيها غرفة محمد .
وألبجي وألقهر صارن أصدقائي...
ودوم عازلة نفسي بغرفتي .
أجتني كميلة ألصبح ...
بعد ما راحوا ألولد للمدرسة ...
خطية مريضة...ومالها خلك...طايحة بالنشلة
كالتلي// يمه كومي أغسلي هدوم خيوانج مال مدرسة
صارلهن يومين بالحمام ماعدهم بلوزات بيضة للمدرسة.
كتلها //مالي دخل بيهن ...وما أغسل ولا قطعة
روحي جيبي أنعام تغسلهن ألج .
هي هزت أيدها وكالت// الله يهديج
عافتني وراحت .
شوية ورحت للتواليت...شفتها شعلت برميز ألنفط
ودخلته للحمام...وبدت تغسل بالملابس بالطشت
تضوج من ألغساله تكول//ما تنظفهن زين...نفس جلف الأيد .
رجعت ألغرفتي أنجطلت...
ويمكن عدت ساعتين أكثر...أجى عون من ألمدرسة خطية فات يبوس بيه...ويتوسلني أخليله غده
كمت أصبلة لأن قهرني...خطية جاهل ويجوع بسرعة
من طلعت باوعت باب ألحمام مسدود ...
ألظاهر كميلة...بعدها ما مخلصة غسل ألملابس .
صبيت غدة ألية و ألعون ...ورجعت للهول
لكيته مبدل ملابسة ...عاد تغدينه سوية
شوية وأجى ألسيد من ألمرقد ..
بعد ما كال// ألسلام عليكم
وراح طب ألغرفته بدل ملابسة
كالي// بوية وين أمج ...؟؟
كتله//تغسل ملابس ألولد صارلها ساعة بالحمام .
سمعتة يدك باب ألحمام ...ويصيح بصوت ناصي
// كميلة ... يا كميلة بيج شي
ليش ما تردين عليه ...؟؟؟
شويه ودكته على الباب قوت ... وصوته عله
ويصيح // كميلة يمعووده بيج شي
وكام يدك على ألباب بقوة أكثر .
ركضت للحوش ...وأشوف ألسيد أنخبص
وكام يدك على ألباب بقوة...وصوته صار كلش عالي
حمودي كام يبجي...لان جان نايم بالهول وفز
على صوت ألدك .
عون من خوفة ...وشاف ألسيد مخبوص
طلع من ألبيت ركض ... ما أعرف وين راح
أني من خوفي ...ونفس كل مره أنصكيت بنص ألحوش ما أعرف شصار بيه .
ألسيد جاب شيش مال بناء ...وخلاة جوه ألباب
يريد يشلعها ...بس ما أنشلعت
خطية خايف ويصيح // ياربي سترك
يارب عفوك ورضاك .
طب للبيت باقر ...وسجاد يركضون بخوف
وأحدهم صاير أمسودن من كثر خوفة
وعون ...طب يركض وراهم يبجي .
بسرعة باقر جاب كرك من يم ألتنور .
وسجاد أخذ ألشيش من ألسيد...وخلوهن جوة ألباب
شلعوها وشمروها على ألحايط .
ألسيد بسرعة وفات وعاط بصوت عالي// يا بووووويه ولج كميلة لا تكسرين كلبي .
باقر بس باوع بداخل ألحمام ...بسرعة ركض للهول
تقدمت وباوعت ... كميلة وأكعة بداخل ألحمام
لابسة بس ألاتك...وكصتها مشكوكة شوية طالع منها دم
وريحة ألغاز مال بريمز طافي ...و تخنك بالحمام
عطت بكل صوتي //وووووولج يمه كميلة اااااأكعددددي
تقدمت عليها ...وكمت أبجي بقهر وحركة
روحي لامتني...لان ما كمت أني وغسلت ألملابس
وهي مريضة مالها خلك .
ألسيد كالي //جيبي دشداشتها من وره ألباب
سجاد قبلي لكفها ... وأني وألسيد وسجاد
بالكوة لبسناها ...لان فاقدة ماتدري بروحها
باقر رجع وبيدة بطانية ...وخرنة ولفاها
خطية يريد يشيل أمة ما يكدر ...
كام يبجي ويصيح// يمه فدوة أغديلج لا تموتين
ألسيد يصيح// يارب سترك
وألخوف...ألقلق ...خلن جسمة كله يرجف
أباوع جفوف أيده يرجفن .
سجاد وباقر وألسيد...شالوا كميلة وطلعوها من ألحمام
عون...هو ألنقذنة من شفانه طلعنه كميلة للحوش
راكض ومفزع جيرانه ألرجال بشارة
مرته طبت تركض علينه...بين ماهو جاب سيارتة
أخذوا كميلة للمستشفى .
بقيت أني..وسجاد ..وعون..وحمودي بالبيت
وراهم شبعت بجي ... ولطمت على وجهي
لحد ما حسيت روحي أنسحنت.
هنا أجى محمد ألمصروع...ألظاهر جان بيت وأحد من عمامة ...مو بالكاع ...من شافنه مخبوصين
وسأل// شبيكم وشصاير .
سجاد كالة //أمي وكعت بالحمام وراسها مفجوج
ويمكن خانكها غاز ألبريمز .
هو ألمصروع كال// شنو واكعة بالحمام ...
هي مو مريضة ..ليش تسبح والمي بارد ..
و ألسخان هيتره عاطل كلت ألعصر أبدلة .
أني كتله//راحت تغسل ملابس ألولد مال مدرسة
هو كالي//وأنتى شبيج مكسره..ما غسلتيهن بمكان أمج
مو تشوفيها مريضة .
ما الله هداني وسكتت ...
كتله //روح جيب أنعام خلي تغسلهن ألكم
أني هم مريضة .
هو كالي//من عساج لا طبتي...مو بنية غضب أسود
بيج رس مال أعناد ومداهر .
يمكن للعصر وجابوا كميلة من ألمستشفى
هابط ضغطها وسكرها ...واكعة على ألحايط
مشكوكة كصتها شوية ...واديخة بالزايد
والحمد لله ما خنكها ألغاز ...ألظاهر جانت هستوها
واكعة ما أدري فاقده .
بس طبت للبيت..وألسيد دخلها ألغرفتها أنجطلت على قريولتها...رحت شبكتها...وشبعت بجي بحظنها
وهي تكلي // بسج يمه والله مابيه شي .
أباوع على ألسيد...وألولد شكد خايفين عليها
يحومون داير مدايرها .
حتى محمد ألمصروع...دنك عليها وباسها على رأسها
هو يعتبرها امه ... وهي تعتبره أبنها
تكول//من هو وصغير...ويشرب ملاهي أني ربيته
وأنومه بحظني ...ماله دخل بعمتي دوم يمي .
للعصر ...وأجت نور وفرقتها الضالة
وحسيون وأمة يسلمون على كميلة
عفية قرية ... مابيج خبر ينضم
كل حلگ بيج أذاعة مونتكارلو .
كمت أسويلهم جاي..
وألسيد...ومحمد جانوا بالمطبخ
سوده عليه ألسيد ..كتله الجوع ،
بالبداية كال// مالي نفس أكل
وره شوية من كال//صبيلي غدة ...
طب حسيون وفرقته ألضالة
ألظاهر أجى للمطبخ ياكله لكمة بسرعة يسد بيها جوعتة
قبل لا أفوت للمطبخ ...
سمعت ألسيد يكول لمحمد//هاي هية قرارك نهائي
لو تتراجع بكلمتك ... وتفشلني ويه الأوادم
حتى أخذ كميلة من تشد حيلها باجر لو عكبة
ونمشي لبيت ألبت نحدد موعد ألدخلة .
ألمصروع يجاوبة يكله//أبو عطأ مو تدري بضيمي شنو
ومن ورة ضيم ألتعذيب وألحبس رجولتي سكطت..
يوم عادي ... وسنه مسكط
وشكد راجعت أنا وعصام ...هنا ... وبغداد
يكلولي الأطباء // مالك جاره
ألسيد يكله // هم شمعرفهم بهاي سوالف
هسة من تعرس ... وتعاين حرمتك يمك
يصير بيك كل ألحيل...وتصعد ألنخل...وتكطف ألبرحي بعد ...لا تخلي كلام ألدكاتره يأثر عليك
هاي السالفة بالذات...ألتفكير وألقلق يعدمها
بس من كونك مرتاح ...كلشي يشتغل وياك .
محمد ألمصروع كال// جأ انا شرايد
أريدن كلشي يشتغل ويايه صح وما أتفشل .
بلغ بيت عمتي فليحة بنهاية ألشهر ألزفة
ماعندي شي ... أم عطأ كلشي مجهزتلي
جنت أسنط على كلامهم من باب ألمطبخ
بس نص كلامهم ما فهمته شنو يعني....!!
بس من سمعت ألمصروع حدد موعد ألعرس براس ألشهر ...أختنكت وبسرعة دموعي طاحت على وجهي ،
رحت بسرعة للحمام ...أخذت شيله كميلة
بعدها وسخة من كومه ألملابس...وخليتها على راسي
ورحت للمراح يم شعيوط أسولف وياه أحسلي .
أنوب بقى كلام ألمصروع يدك براسي
شنو يعني رجولتي سكطت .... ؟؟!!
قررت باجر أروح على سهاد وأسالها ........
شنو يعني كلام ألمصروع ...
لان ألصدك ما عرفت شنو قصدة .
باوعت للوكت...شفت ألشمس بنص ألسمه صارت
وكت ألعصر صار ...طفرت من مكاني
وشمرت بوسة لشعيوط ... وبوسة لمشيعل
والله على محبتهم تابعت كارتون مغامرات بسيط
شكد أحب مزرعتة...وأتمنيت أسوي نفسها ألهم
ويعيشون نفس هذا ألثور ( بسيط ) بيها
خطية شكد عندة أفكار ذكية...
وشكد يتعب بتربية ألحواوين الاليفة..وحواوين ألغابة
ويساعده جلبة (فصيح ) ..
وألركة (سريعة ) ..
بس خطية منحوس...دوم يطيح بمواقف صعبة
ومرات تضحكني.
ركضت للبيت...نور وحسيون والحجية أم حسيون
بعدهم موجودين .
بهاي ألايام أني..وكميلة متابعات مسلسل مصري
تطلع ألمغرب...نتعارك وية ألولد على تلفزيون ألهول
وثاني يوم...يعيدوها ألظهر...وهم نرجع نشوفها
هلكد ما حلوة ...هي أنعرضت برمضان
بس ما جان إلى خلك أشوفها وأتابعها ...
همزين هسه عادوها من جديد .
ألمسلسل أسمها ( ألوتد ) ...فد حلوة
أموت على عايلة ألحجة فاطمة تعلبة.
وأبنائها ألجبير ألحاج درويش.
قصة ألمسلسل كلش حلوة...تبين شلون تعيش ألعوايل ألمصرية.
أكول ألكميلة //يمه هاي أنتي بدال أمهم فاطمة تعلبة
تربين ولدج باأسلوبج الحلو ... وتردين تزوجيهم
وتسوين عايلة جبيرة وقوية...
يعني بيها هواية جناين ... وجهال
ومن هسه تسويلهم مستقبل ...هم تشجيعهم على ألدراسة ...وهم تجمعين فلوس وتشتريلهم كياعين زراعية ...حتى يصير عدهم أملاك
هي تضحك وتكول//ولج يمه والله عليج سوالف
وهم عودين نتخيل ألحاج درويش جبير ألعايلة
هو علاوي ...ونعرسلة على نهلة بت محيسن
(بت أنتصار أختها) يعني بت خالته
حتى يصبح من وجهاء ألمسيب...وكلمته مسموعه يم ألكل.
ضحكت وكتلها // عووووووع ...أنوب علينه محيسن ألمنتف ... يمه دشوفيلج نسيب مريش حتى علاوي ياخذ خوش ورث من حصة مرته .
هي كميلة ... تضحك من خاطرها على سوالفي
لان صدك أندمج بأحداث ألمسلسل
وأتخيلها هي حياة بيت ألسيد ...
وشلون كميلة تسيطر على ألعايلة...وهي تختار عرايس ولدها...حتى بدون ما تأخذ رأيهم تزوجهم
وتتحكم بالجناين ...وبولدها وتلزم كل ألبيت
وكميلة ضحكت من خاطرها...وعيونها كامت تدمع
بيوم ألكتلها // يمه أني من أتزوج أتعامل ويه رجلي نفس ما تتعامل مريم ويه ألحاج درويش ...
وأذا حبيت رجلي ...أكله // يا بعلي
وأذا كرهته // أسمي ... يا بغلي
ترى بس كدامج أكول أخاف من عنده...عودين أشكيلج منه .
هي نطت من ألضحك بوكتها..وكالتلي// كومي جيبلي دولكة ألمي ...شركت بالهوى من وره سوالفج
أجيت أركض وطبيت بوجهي للمطبخ أسوي ألعشا
عيب لأزم أجلب بنور ..وفرقتها ألضالة على ألعشا
وهم ألحك أخلص من وكت...حتى أشوف شوية من ألمسلسل...وأذا ما لحكت أشوفها باجر ألظهر .
بعد ألهوسة ...وركضة تحضير ألعشا
ولحد ما تعشوا ألكل بالعافية
وجيب ألجاي ... و ودي المي ،
صارت يمكن ساعة ب ٨ .
عون ... وحمودي خطية راحوا نامون بفراشهم
ينامون يمي بالغرفة .
نور ...وكفت ويايه على ألسنك تساعدني بغسل ألمواعين وجان تفاجأني بسؤالها من سألتني
// هدوله أنتي من شوكت عاشگة محمد ؟؟؟؟
شهكت بصوت مسموع ... لان نور كشفتني
وباوعت عليها بصدمة...فكيت عيوني على وسعهن
خايفة منها لا تضربني ...
ومن غبائي بسرعة جاوبتها // ترى جذب لا تصدكين ندى ....!!!!
هي هنا تفاجأت أكثر مني
وكالت // ندى شجابها بالطاري !!
مدت أيدها وسدت لولة ألمي ...وباوعت علية .
بس شكلها مو ضايجة ... ولا مخنزرة
كالت//شوفي هدوله لا عبالج أني تزوجت ...
وصار عندي جهال ...وكمت ما أهتم بيج
لو بطلت ما أحبج ...لو ما أنتبه ألتصرفاتج
ولج أنتي بنتي ألجبيره ...وأول فرحة بحياتي
ولج أنتي صديقتي ... وأختي ألصغيرة
مو عبالج تزوجت وتركتج ... لا اموت وما أتركج
تدرين...أني سنين وسنين،،عايشة بنص خيسة هذاك ألبيت...ومافكرت أسويلي حل...
إلا بيوم ربج رحم بحالي ودزاج رحمة الية...
ومن شفتج تأذيتي...أنتفضت على روحي ...
وشردت بيج أريد أنقذج...ومافكرت بروحي أنكتل لو أتبهذل...بوكتها ألليل كلة بقيت كاعدة وأفكر بيج
والقرآن ما فكرت بحالي .
هدولة ...أنتي بنيتي ألجبيرة ... وصديقتي
وأدري بيج تغارين من جهالي
وعادي والله أني عاذرتج ...
اني هم جنت أغار على أمي من خواتي ،
بس مو معناها بسبب غيرتج...تتصرفين تصرف مال زعاطيط لأزم تكبرين ... وتوعين على تصرفاتج
وأدري بيج تضوجين من حسين ...
بحسابج أخذني منج ....
هديل أنتي لازم تكبرين عقلج ...وتكبرين شويه ،
وتكولين...نور تزوجت رجال خير .
وباجر أنتي هم تزوجين ...وتحبين رجلج
نفس ما أني أحب حسين .وهاي سنه الحياة
هدوله ...غيري نظرتج على حسين ...
والله هو رجال شهم...وغيور...ويحبني ومدللني
وهو هوايه يحبج ...وشايل همج والله شاهد على كلامي .
هديل...أنتي صايره تصرفاتج فرد نوب مو حلوه
تعاندين كميلة وما تشتغليلها...وهي أمج وتشوفيها مريضة ...وكل ما تحشمج تكلليها // جيبي أنعام
حتى لو تجي أنعام ...وتصبح جنة بهذا ألبيت
عليها بنفسها ...ورجلها وبس.
أنتي بنت هذا ألبيت...مسؤوليتج أكثر وأكبر منها
أدارين أمج...وأبوج...وأخوانج.
و ما مجبورة بنت ألناس ...تخدمهم لو أداريهم
أكعدي وية نفسج...وفكري بفضل أبو عطأ عليج
وشوفي أهل هذا ألبيت...شلون كاعدين يعاملوج
من أبو عطأ...لكميلة...لحد أصغر وأحد وهو حمودي.
مو يعاملوج معاملة بتهم...وأختهم ...ومن يوم طبتج لهذا ألبيت ...أبد ما حسبوج غريبة...ولا حسسوج هم مو اهلج ...
هديل خليها بالج ألينكر تعب غيرة ... الله ما يوفقة لا بدنيا ....ولا باأخره .
وندى ...لا شايفتها ...ولا شايفتني
بس أنتي صايره فرد نوب...ما تحشمين روحج من تصفنين على محمد ...تنسين روحج
عوزج بس شوية وتكمزين علية وتاكلينه
لا مره...ولا مرتين...من أنتبهت عليج شلون تباوعين علية .
محمد أبن عمي ... وأعرفه كلش زين
رجال غيور ... وصاحب مبدأ ...وأخلاقة عالية
أبد ما يباوعلج بنظره وسخة .
وخليها بالج ... هو يشوفج بنت أخوة وبس
أبد ما يفكر بيج للزواج .
هنا بجيت وكتلها// والله مو بيدي
نوره والقرآن الكريم...شكد حجيت ويه كلبي وعقلي
وهن ما سمعن كلامي...غصباً عني حبيت محمد ،
والله شكد أريد أنساة وما أكدر .
زين هو ليش ما يحبني ...ويباوعلي ...؟؟؟
يعني لأن أني برشة وبيضة ...ما يحبني ..؟؟
والله أني هم بنية حديثة ...وأشوف نفسي حلوة
مو أبو أبراهيم ذبح نفسة علية...ليش هو يشوفني بنية حلوه ...ومحمد ما يباوعلي ...؟؟!!
تقربت علية...ومسحت دموعي...بطرف أصابعها
وكالت//ولج والله حاسة بيج ...
وأفتهمج شتقصدين ..
ولج ألحب وألمشاعر هديه من الله ماتصير بالغصب.
هسة منو أقرب لمحمد ...أني لو أنتي ...؟؟؟
مو أني بت عمة ...وتعرفين أنتي بكل ضيمي
وما قبل يتزوجني ... ويستر على حالي
لأن هو شكاك...ويتخبل من سالفة مس ألشرف
ويتخبل من سالفة أرتباطة بمراه تعرف رجال غيرة
يريد وحدة خام..وصافية روح..وجسد..وكلب
ويحويها بس هو .
يجوز ...أنتي ما يباوعلج وما يشوفج
مو لان برشة أو بيضة مثل ما تكولين...
لا...يجوز يفكر أنتي جنتي عايشة وياية بهذاك ألبيت
وعندج مخلفات من هذاك ألبيت ويشوفج وسخة .
أو يجوز ...أصلا ما يفكر بيج ...وما يشوفج بهذا ألتفكير الأسود ...ويشوفج بنية صغيرة
وبت أخو ...لا أكثر ولا أقل .
هدوله حبيبتي ...كل الأريدة منج
اطلعين محمد من عقلج وكلبج...ما بقالة أقل ألشهر ويتزوج ...وربي يسعدة ويهني ويه مرتة .
وأريدج ترجعين هذيج هدوله ألحبابة ألتسمع ألكلآم
وأبد ما ترادد ...ولا تلاسن وأحد ...وألكل يحبها
وترجعين بنت كميلة ...وحبيبت أبو عطأ
ألمفضليج على ولدهم...ويخافون عليج أكثر من ضناهم
هي تحجي ...وأني شبعت بجي
قهرتني بالزايد من كالت//زواج ألمصروع بعد شهر
أريد بس تنطيني حل ...حتى لو شي بالجذب
لو يذبحني هذا ألحل ...لو يشمرني بالنار
ميخالف قابلة بي.
والله نار ألحب ... وألعشگ تحرك ألروح أكثر من نار ألدنيا .
ما بقى عندي شي أكولة...بس شي أخير فكرت بي
كلت بروحي ...بلكت يلكيلي هذا ألحل
كتلها//نوره يجوز محمد ما يحبني لان أني بنية مسيحية..كولي لأبوية...يصير عادي أصير بنية مسلمة
بلكت يحبني محمد .
هي هنا شبكتني بقوة وكالت //بسج ولج مو مردتي كلبي ...ولج والله هسة لو تنزل بيج آية
محمد ما يباوعلج ... أبن عمي وأعرفة
كافي تعذبين بروحج ...وغادية هيكل من ألقهر
باوعت بوجهي وكالت// أخذج ويايه
شوية تغيرين جو يمي ...وهم على واهس ألجهال
وهم خالتي تكيف ...والله شكد تحبج
دوم تكلي// ما تجيبين ألفرخة وياج
أحبنها...وأحب سوالفها...عبنها طيبة وماعدها دغش .
كتلها// لا ما أروح أمي مريضة ... ومالها خلك
وهسة ألنسوان يكومن يجن عليها .
وأبويه ... وألولد محد ألهم .
هي هنا بوستني ...وكالت//أي عفية ببنيتي ألحلوة
أريدج ترجعين هدوله ألحبابه..وألطيوبة ألتسمع ألكلآم
لا تقصرين بحق أمج وأبوج وأخوانج وشوفي الله شلون يوفقج.
ومحمد جنية...طلعلي من عقلج وكلبج لان يتعبج.
وضحكت بوجهي
بهذاك الليل ...شكد فكرت بكلام نور
حسيته شلون ألراشدي ألية ...
بس بطريقة ألتريبة ألحلوة ...
وصحوة من غفلة ...
وتنبية على تصرفات غلط بغلط .
يعني مرات ألبشر ...من كثر تعلقة ...وتفكيرة بسالفة وحدة ...عقلة يقفل ...وبعد ميكدر يفكر زين
وهاي ألقفلة بلحظة وحدة ...تفتحها كلمة
لو موقف ...لو ضربة راشدي ...وتصحي على زمانة
وكلام نور وياية بهذيج الليلة
جان هو ألمفتاح ... لهاي قفلة عقلي
شكد بجيت ... وبقيت أعاتب بروحي...وألوم بنفسي
اني ليش أذيت بيت ألسيد ...!!؟؟
والله هم ناس حبابيبن وميستاهلون هاي ألمعاملة مني
خلف الله عليهم ...لفوني ...وربوني ويه ولدهم
لو ما هم ...الله وأعلم وين صفت بية ألدنيا
وأذا على محمد ألمصروع هو مو قسمتي
والله ما كاتبة الية ...لأزم أنساة ... وأعيش حياتي
وعلى كولت نور ألحب والمشاعر مو بالغصب
لازم هوايه أدعي لرب ألعالمين يساعدني حتى أنساة
وقررت ... من هاي ألليلة أرجع مثل قبل
هديل ألحبابة ...وأسمع كلام أمي وأبوية
وأحاول أنسى عشگ محمد...أعرف شي صعب علية
بس لأزم أعيش حياتي صح ..لخاطر نور
ولخاطر أهلي بيت ألسيد .
ثاني يوم ...
كعدت من ألفجر ...ورجعت على نظامي ألقديم
شديت حزامي بالنهار...لخدمة أبوية وأمي وأخواني.
وبليل ...أشد حزام حيلي...وكلبي حتى أنسى عشگ محمد .
ألعصر كلت لكميلة// يمة بس أروح على سهاد
ضايجة ... أروح بسرعة وأرجع ما أطول
عاد والله قبلت ...وباقر وصلني
ما أحجي شكد بجيت يمها ...والله شبعت بجي ،
مو سهله ...على ألواحد ينسى أليحبة
وكلش صعبة..أذا هذا ألشخص يعيش وياه
ومكابلة ليل ونهار..وحافظ شخصيته..وكل تفاصيل حياتة..وصاير بي مرض ألتعلق ألهذا ألشخص ،،
لحد يجذب عليكم...ويكلكم سهلة وتكدرون تنسون
سهاد ...بقت تشجعني على هاي ألخطوه
وتواسيني...لان هي ألوحيدة ألتعرف شلون عشگ
محمد معشعش بداخلي...وأدري راح أحترك وما أكدر أنساة .
الهايشة ضحكتني...عودين راحت تجيبلي جاي
تكلي//بسج عاد ...كلبج أنشحط على يا مال
علمود ألسيد ... ياريت يستاهل دموعج هل ألمشخوط دخيل بخته ،
برجعتها للغرفة فاتت بسرعة
أيد شايلة كلاص جاي ...وأيد لافة بيها علاكة
بسرعة شمرتها بحظني ...وتضحك...تتلفت وراها
تكلي// يالصخلة ضميها...ولج مال ألخسيس فطيس
أني بسرعة لكفت ألعلاكة ... وضميتها جوة حظني
لان كاعدة متربعة ...كتلها // شنو هاي ..؟؟
جاوبتي بصوت ناصي ... وهي تضحك
//هذن أثنين ستي... وبتاعات داخلية...بعدهن بالجيس
كمركتهن من سعاد ... سودنتني تجيب وتشتري وما تنطيني ...ألبوك بيها حلال
كتلها // ولج خاف ما يصير .. لوتزعل هاي ألعوبة .
أشرتلي بيدها وكالت// دخلي أطير هاي ألهايشة
بيها مرض مال هدوم...تجمع وتشتري بس ما تلبس
أني أكلج أعتبريهن هذني بوگة حلال .
بديت أشرب بالجاي ...
وسألتها// سهيدان أريد أسالج ...
شنو يعني من رجال يكول رجولتي أسكطت ....؟؟
الى اللقاء في الحلقة القادمة
×××××××××××××××××××××××