#حصاد-ألمواسم
👇
#فراقد
👇
#ألحلقة((٣٦))
×××××××××××××××××
ألصبح كعدت مطنكره ...
وما لكيت لا كميلة ولا طوعة ولا أنتصار
رايحات يودن ريوك لنور ...
جلبت بالبنات ... يكربن ويايه ألبيت ويعدلنه
مابيه حيل أنظف وحدي ...
لان نهلة كالت // ألعصر نروح لبيتنه
وصدك أجى العصر بسرعة ....
وراحت طوعة وبناتها ...
وانتصار وبناتها ...
وفرغ علينه ألبيت ... وصارت ضوجة تخنك
وكميلة ... كعدت بالهول وبقت تبجي
وأني أستاحشت وحدي ...حسيت البيت يريد ياكلني
أني فكيت عيني على نور ...هي أمي ...وصديقتي وأختي ...أختنكت ومن هسه أشتاقيتلها ...
شلون راح أتحمل فراكها .
كعدت يم كميلة ...وحظنتها ...وكمت أبجي وياها
وهنا دخل ألسيد علينه...وعاط بينه لأن نبجي
كال //فال موش زين ... عليش تفاولن على البت بالنويح وألبجي ...أدعن الله يسعدها ..
ويهدي سرها ويه راعيها ..
عافنه وراح لغرفتة يبدل ...يمكن يريد يروح للمرقد
كميلة كامت ..ولفت رداناتها وكالت //أكوم أخبز .
توكفين يمي ...لو أخبز وحدي
كلتلها // أي أوكف يمج وأساعدج .
كمت للمطبخ وشنكت ألعجين ...بين ما هي سجرت ألتنور .
وعون بقى لازك يمنة...بيده نجانه بيها الفروجة
جانت مالها خلك ...ومحمد ألمصروع ذبحها اله ،
ونهله من ألبارحة سمطتها ...ونكعتها بخل وملح
يريد نشويها إله .
أباوع كميلة بس وأكفه يمي...وأني ألخبزت وخلصت ألعجين ...وهي بس وأكفة وتراقبني ...كلشي ماسوت
عليش وأكفة يمي ما أدري ..؟؟!!
شو بسرعة صارت ألدنيا مغرب ...
بس سفطت ألخبز ...وخليت فروجة عون بالتنور
ركضت للمطبخ وبلشت بالعشاء ...
بين ماكملت ...أجى ألسيد من المرقد ...
عشيتهم ...وسويتلهم جاي ...وبعدين نظفت ألمطبخ
من صدك تعبت ...
الله يعينج نور ...جنتي يوميه شايلة هذا ألضيم وألحمل كله وحدج .
ويوم على يوم ... ألبيت يتبركس براسي
وكلشي صار بركبتي...من تنظيف ألبيت...وألعجين وألخبز ...وألطبخ
كميلة تساعدني بس بشغلات بسيطة
لو تسفط ملابس ألولد
لو تروح للسوك
لو تسوي ألريوك قبلي للسيد وألولد
تساعدني ...بس بشي بسيط ...كل حمل ألبيت صار علية
ما أعرف شلون جرعت ألاسبوع ..
ومرت علية هاي الأيام...بس بجي...وقهر
هوايه أشتاقيت لنور ..
وأنوب أخاف انام وحدي بليل بغرفتنه ...كمت أنوم عون وحمودي يمي
وماصدكت صار يوم ألسبعة مال زواج نور
وقبل يوم ألعصر أجتي بس أنتصار ...ماجابت وياها البنات ... ومن ألصبح كميلة حضرت غراض ،،
وفراشات،،ومواعين فرفوري بعدهن جديدات ،
وقطع قماش ،،والهدايا ألجابنهن نسوان ألجيران لكميلة
فضل عرس نور ،، راح تاخذهن ألها .
وأنتصار خطية عاكدة بطرف شيلتها ...محبس ناعم ،
وتراجي جرس هم ناعمات ...شلون ألضامتهن متريد وأحد يشوفهن ..تكول//هذني ألذهبات يفدنها أحسن من ألغراض .
وأجتي أم ناهض ...وندى زوجة ألمرحوم ناهض
ومرت وباسم ...ومرت جاسم
هم جايبات وياهن شغلات بسيطة مال بيت .
وأجتي أم جمال ..وجابت وياها أزهيران وسهى،،
هي أطلع بس بناتها وياها من تطلع ...ما تطلع ألجناين وياها بالمناسبات ...يعني مرت كمال ...ومرت عصام
ومرت سلام ...يطلعن وحدهن ...يجبوهن رجولتهن مرات على بيت ألسيد
أجمعنه كلنه ... ورحنه على بيت حسيون
ماصدكت ألدرب يخلص ...وأوصل وأشوف نور.
من وصلنه تلكتنه أم حسيون ... ونور
هلكد بوستها...وحظنتها بقوة...وكمت أبجي بحظنها
وهي هم كامت تبجي ...تمسح بدموعي وتبجي
حتى ألنسوان كامن يبجن علينه .
بس خمائل حماتها ما جايه ...رجلها مريض
ونور هي ألقامت بواجبنه ...وظيفت كل ألنسوان
أباوع بيت حسيون نظيف ... وأبنه زيد نظيف
وحتى هي نور نظيفة وتلج من ألنظافة
وعمتها فد مراه حبابة ... وسوالفها فد حلوه
كله تسولف عن أيام قبل ...
كلساع وكالت //بسنه الغرگة صار فلان شي
وتذكرلها حادث ...
كميلة راحت وكفت يم نور بالمطبخ
وأني رحت وكفت يمهن ...
لان نور رادت تسوي غدة ...وكميلة ما خلتها
كالتلها// أخذ ألنسوان وإمشي ...لا تكلفين نفسج
عاد نور ما قبلت ...كالتلها // عيب على الأقل
أقدملهن كاستر ومدكوكة ...عيب يطلعن بدون شي
أباوع على نور ...وأصفن على كل حركة تسويها
كلش مشتاقتلها ...بقيت وأكفة يمها وأساعدها
وكميلة رجعت كعدت يم ألنسوان .
نور من خلصت شغلها ...وراحت قدمت للنسوان
دخلت ألغرفتها تبدل ... رحت وياها
دخلت وبقيت أباوع على غرفتها ...شكد نظيفة
ومرتبة ...وعطرها يخبل مخبوط بين بخور ألعرب ...وقلونيه ألمروج
وأني ألغبية صفنت ...وتخيلتها غرفتي وغرفة محمد
وهم هيج أنظفها وأرتبها .
نور طلعت كلبية جديده ...وبدلت كدامي
هي متعوده من قبل ...من أني وصغيرة تبدل كدامي.
باوعت عليها يالله هاي شبيها ...!!!
من بقت بس بالاتك شفت متونها ...وبداية صدرها
وحتى جتفها ...بي طمغات زركة
وأكو بيهن طمغات لونها بنفسجي ما أدري أخضر
فد خفت عليها ...سألتها// نور شبي جسمج
هي تفاجات من سؤالي ...
جاوبتني وهي تلبس بكلبيتها الجديده //كبت عندي ألحساسية ...من وره ألبك ...هنا هواية عدهم حرمس وبك
فد أنقهرت عليها ...كتلها //شعندج باقية هنا
أمشي روحي ويانه...بين ما حسيون يجيب مبيد للبك وبعدين أرجعي .
جاوبتني ...وهي تشيل بشعرها بقراصة أستيل
بس هي مسويتلها قرتيلة ناعمة من أسفنج...
وقماش أسود أبو اللمع ولازكتها عليه ...
كالت //لا وين أروح خطية حسين منو أله ...
أليوم يلا راح للمرقد...وزيد منا ...خطية خالتي مراه جبيره ما تكدرلة ...وخاف ألعصر تجي خمائل ...
فد حبابة ...وخوش مراه ...بمرور الأيام أعرفج عليها
بعدين تمكيجت ... يعني طوخت مكياجها ...وتعطرت
وطلعنه كعدنه يم النسوان .
ما ألله هداني وسكتت ....
كلت الكميلة // يمة نور كآبه عدها ألحساسية
خلي علاوي يجبلهم مبيد مال بك ...
خطية عالسها علس ومطكع جسمها ...
أمسوي جلدها أزرك وأحمر .
أباوع على نور أنصدمت ما أدري تفاجأت بكلامي
لان كل ألنسوان كامن يضحكن ...ونصبن على نور
يكللها // خوش ملدغج بك حسيون
أباوعها فد أستحت ...وظلت مخنزره علية
وكميلة تكلي // من دهر فر لسانج
ولج أنتي شنو ... شريط سينما ويسجل كلشي
كتلها// يمه والله أني شفت جسمها عالسها ألبك
أزهيران ألحقيرة تكلي//أنتي تغشمين نفسج لو تتعايرين بروسنه ...مو تدريها عروس ورجلها يتمناها
نور حجت بصوت عالي وكالتلها//أرجوج أزهار
ترى هديل فطيره وفقيره ...متعرف بهل سوالف
لا تفتحين عيونها على شغلات أكبر من عمرها .
عاد أم جمال ردت على نور وكالتلها //على كفيج نويره
لو مجانت عايشة بنص هل ألسوالف
أصلا تلكيها تعرف كلشي بس تغشم نفسها .
كميلة ...طكت عيونها على أم جمال
وكالتلها //عمة عيب هذا ألحجي أحنة جاين نبارك ونهني...ونمشي لبيوتنه...عليش أدورين دفاتر عتيكة
أم ناهض كالت //أكلجن مو أكلتن وشربتن
وظيفتجن رأعيت ألبيت أم حسين ...وبتها نويره وباركتن ...كومن يلا كل وحدة على بيتها...وحدتجن وراها كووم شغل .
أنتصار هي أول وحدة طفرت ...وباوست الجحية أم حسين ...وكالتلها// عمة فدوه أغديلج عينج على نويره
تراها يتيمة ...ومكسور جنح
ألحجية جاوبتها// يا بعد عمتج وحبايبها ...وصيها هي عينها عليه....وأشهد بالله من ثاني يوم عرسها ...
وهي تكفلت بخدمة ألفرخ ...وأبيه .
ومامقصره ويايه..تغسل هديماتي من تغسل هديماتها..
وتخلي لكمتي...قبل لا تخلي لراعيها
وألحجي بيناتنه ...حتى أبو زيد متسودن عليها
يكلي// يمة ألبغدادية أخذت عكلي ...
يايمة متحسف چيف ماعرفتها من كبل .
كل ألنسوان كامن يدعن للحجية...بالصحة والعافية
ويدعن ألنور ...براحة ألبال وسعاده وية حسيون
رجعنه لبيت ألسيد قبل وكت ألغدة ...
أنتصار هي واكفة تتوضى على ألمغسلة
حاجت كميلة ...تريد تفوت للمطبخ
وأني جريت ألصونده أريد أغسل الحوش
كالت //كميلة كلبي ناغزني من أم جمال
بس لا تسوي مشكلة لنويره..وتفتحلها دفاتر عتيچة
كميلة ردت عليها // لا تخافين منها
تراها بس صوت عالي ...ما تسوي شي
عمي ساجت حاكرها حگر .
وصدك عدت الأيام...وبلشنه نمشي بأيام سنة ال ٩٤....
ويوم على يوم..أحس بروحي أتعب من شغل ألبيت.
وفراگ نور كلش أذاني ...هوايه أشتاقلها
وأظل أبجي عليها .
وعون ...وحمودي ...صاروا أصدقائي
وينامون يمي بليل ...اخاف أنام وحدي بغرفتي.
ومن صار عمري ١٤ سنة...شو جسمي صار مربرب
يعني جسمي مو يلعب ألنفس ...لا حلو مليان
بس أليشوفني ينطيني عمر أكبر من عمري
ما أعرف ليش هيج سمنت ..؟؟؟؟
صح أني أحب كل الأكل...وكلشي عندي نعمة الله
وأشرب يومية كلاص حليب مال هوش ...وياه بيضة .
بس والله أتحرك ...وهواية أتعب بشغل ألبيت .
وألولد ألاحقريين ...فد وسخين ...بس ألكط وراهم
هسة ملابسكم ألوسخة...ليش ما تشمروها بالحمام
أبقى ألكط وراهم ...أنوب ألكاها كلها بالكاع ومكلوبه
ابقى أشتم بيها ...ياهي الوسخة ...وياهي النظيفة
والله راح يصير بيه نكاف من وراهم ...
وأنوب يكلبون ألغرفه من يبدلون ويرحون للمدرسة
ساعه يلا أرجع اعدلها وارتبها
يعني علاوي زلمة شطولة ...وشعرض أجتافة ،
وأنوب لحيته طش ...هنا شويه وهناك شوية ،
وخابصنه بشواربه نسل فرخ ألبط
يسفط بيهن ويرجع ليوره ...
وملابسة ألكط بيهن من ألكاع
هو نجح ...وراح ألصف ألخامس أدبي
والله أني أنقهر عليه ...
خطية عندة سقوط بس سنة وحدة
من توفى أخوة عطأ ...سقط بصف الثالث متوسط .
خطية جان صار وية جماعتة ...بالصف ألسادس أدبي
وامحتن ((بكه لوري)) وبعدين يروح للكلِيه
ألسيد وكميلة...شادين على ولدهم حزام علمود ألدراسة علمود مستقبلهم...بلكت يصير براسهم حظ وخير
ومايطلع وأحدهم مطوطي ...ولازم ألشوارع ...
ودايح بالدرابين...ويكعد بدون شغل وعمل...ويكصع گمل من فگرة.
وباقر هم نجح ... راح الصف الرابع عام
أبد ماعندة سقوط بالمدرسة
وصوته صاير يخبل ...من يغني أغنية ...لو يسمعنه موال
ودوم نايم بخوانيك محمد ألمصروع
حتى يكتبله أبيوت شعر ...يسميهن ((بوذي يات))
علمود يلحنهن ويغنيهن ...صوته كلش حلو يصير
ويه ألشعر أليكتبه اله محمد ألمصروع .
وأكيد ...أني هم تعبانه على صوت باقر
دوم أسويله ألصبح كلاص حليب حار ..وبي بييضة
وأني أشرب وياه على ألواهس .
وبليل أسويلة كلاص مي دافي ...وخاشوكة عسل
و هذا المعسل دوم نشربة .
بيت ألسيد يجبون شيشة عسل...وياها شمع ألنحل أموت عليه ...أبقى أعلج بي
يجبونه من بيت عمتهم أسمها فليحة...عدهم خليات مال نحل .
وألافندي سجاد ...نجح للصف ألسادس أبتدائي
والله شايل روحة ...مو كسول ولا شاطر
أني سجاد يبزعني ...هوايه ينگ ...ويلح ...وعكره
خررب ببليسة خشمة يابس .
وعون بعدة ما مسجل ...
ما قبلوه بالمدرسة...على ألسنه ألتجي يلا يقبلوه
يعني هو صار عمره سته سنوات ...بس ما قبلوه بالمدرسة من وداه علاوي يسجلة ...يكول//لان ما جاي بشهر الواحد ...بس هو يحب يلاكف سجاد وباقر
على الكتب والدفاتر والاقلام ...حتى علمة علاوي يكتب أسمه ..وأسم أبوه ..وأسم أخوانه
وحمودي هذا وأحد هتلي ...وجلب مسعور
ألناس صايحة ألغوث من عنده
يعني بعد كم شهر ...ويصير عمره أربع سنوات
بس وكح ... وياهو ألي يلزمة يلكفه بعضة .
فد يوم ..خطية أجتنه أم تبارك ..جيران بيت ألسيد
وبتها صغرة وياها...تريد تجرش بالجاروشة
شوية حنطة وشعير ...وكاعدة يمها كميلة ،
وأني كاعدة أنظف بالبيت الجوة...وما أسمع بس المرأه تعيط//كميله على بختج ألحكيلي..وحگ علي شال أللحمة...طلعت أركض ..وأشوف حمودي عاض
البنيه ألصغيرة من كصتها بين حواجبها..ونايم فوكاها
وأمها...وكميله يفكنها من عنده...وهو صاك بسنونه
على كصتها...ما فكينة البنية...الا كميله صلخته بالنعال على ظهره .
يكول // والله شنو ما تنطيني عرنوصة
ولك مو يومية ...لو أني ...لو كميلة
نسلكلكم جدر عرانيص ...وحتى نخلي وياه دهن وملح
طعمها يطلع كلش طيب .
وهذا أصبح نظام يومي ... وهاي حياتي
بين شغل ألبيت ... وخدمة ألولد .
وأشتياقي لنور يذبحني...ومايقبلون أروح عليها
هي مرات تجي شويه ألعصر ...يجيبها حسيون ...
وتجيب وياها زيد ...وترجع قبل ألمغرب ...
لو هو رجلها يرجع ياخذها...لو يوديها وأحد من ألولد
وفوك كل هذا ألتعب ... أنوب ضيم قلبي
ما أكدر أحجي لواحد عن حبي لمحمد
بس سهاد تعرف بهذا ألسر ...
ومن تزوجت نور ...كمت كلش قليل أروح عليها
وأني أدفن بكلبي ...ضيم تجاهل محمد إليه
وهو أبد مايحس بيه ...
ولا حتى يشوفني ...وأني أشوفه كل دنيتي .
والله أراقب كل حركاته ...وأحفظ كل ألسوالف أليحبها وأليكرهه ...وحتى كمت أخدمة...وأتعب علمود راحتة
وهو فد وأحد ولا يشوفني ...ويعاملني معاملة ولد كميلة وفاضل ... فد يقهرني هذا ألشي
أنوب طلعت بالتلفزيون أغنية جديدة ...
لهيثم يوسف أسمها يا ناس ارحمو بحالي
أني أسمعها ...وأبقى أحرك بروحي من ألبجي
هم أشتاق النور ...
وهم أموت من ألقهر ...بسبب تجاهل محمد الية
وصارت هاي الأغنية..وكلماتها سلوتي بين الصحو والنوم ...حتى كلماتها حفظتها على كلبي
ومن يسألوني// شبيج تبجين
أكلهم //أشتاق النور 👇👇👇👇
وفد يوم ألعصر...كلش أختنكت..وضاكت بية الواسعة
توسلت بسجاد ...أخذني على سهاد
رحت يمها ... وشبعت بجي على نور
هي غرفة الأمان الية...هي أمي..وصديقتي..وأختي
أحس روحي أختنكت وأريد أشوفها
عاد هي سهاد كامت تحجي عليه وكالت// ترى أنتي مكبره ألموضوع ...مو مرات تروحين عليها
وهي تجي عليكم ...بعد عليش هذا ألبجي والنويح ،
ولج خطية أدعيلها الله يسعدها
أنوب كامت جابت جاي ..وأجت كعدت يمي
بس شربت ألجاي تفلته 💦عليها ... مر مابي شكر
كالت// وجع شبيج ملكوفة
خليله من هذا ألدبس مخلصين شكر
أنوب باوعت عليه وكالت// أكلج هديله ألنسوان يكولن طالعة قناة جديده أسمها((ألشباب من دار السلام))
كلش حلوه ...وعارضين عليها مسلسل مكسيكي
أسمها عروس البحر ....يكولن تخبل ...
وكلها حب وغزل ورمانسيات ...تفيد للعاشقين ألنفس أحوالج ...تتعلمين منهم ألحب وألغرام
هنا ضحكت من ضيم كلبي ...
كتلها //ولج هو محمد غير لو يشوفني
ولج حتى مستصغرني...وشايفني أصغر من عمري
حتى مرات من يشتري للجهال يجيبلي وياهم
لو علج بوبي ...لو علوجة ...لو لفة حب
هي ضحكت وكالت// أني من قبل كتلج محمد
مو متهم بيج...ولا يشوفج...وأصلا فكره مو يمج
وأنتي ألحالج شاغلة روحج بي .
شلت بخاشوكة ألجاي شويه دبس ...وخليته بالأستكان حتى أحلي ألجاي ...كتلها// ولج سهاد مو بيدي
ولج من يوم ألحلم الأكشر...وكلبي تعلق بي
هي ضحكت من خاطرها ...
وهي تضحك كالت// أي حب من أول شخة ...
همزين الله ستر عليج ...ونور غطت على فعلتج ألجايفة وبقت تضحك
خليت وكمت ... أرجع للبيت أحسن ألي
سهاد هاي طبيعتها ...تضحك وتشاقة ...
ما تاخذ الأمور بجدية .
أني ما الله هداني وأنتظرت وأحد من ألولد يجي ياخذني ...لو أخوها سعد يوصلني ،
لا لبست عبايتي ...ورجعت للبيت
براس دربونة بيت سهاد ...
ولاكاني نفس ألرجال ألشفته بعرس نور ..
ألبقى يباوع علية...وأني غميته وتفلت عليه
تعديته ومشيت ...وهو عيونه وسخة ...بقى يباوع عليه ...نظراته كلش وسخة
قبل ما أوصل للبيت ...
وأشوف أثنين جهال متعاركين..رحت عليهم وفازعتهم
وأحد منهم كال للثاني كلمة ((فشار ))
بقيت فاكه حلكي..أول مره أسمعها..أبد مسامعة هاي الكلمة من قبل .
رجعت للبيت...بعد ما تأكدت كل وأحد من ألجهال
راح لبيتهم...وبعد ما يرجعون يتعاركون
أجى ألمغرب بسرعة ...وبلشت بالعشا
وأحنة كاعدين نتعشى ...حاجيت علاوي
على هاي القناة الجديدة
كالي // أي سمعت بيها من ألولد باجر أسوي ألشبكة
ونشوفها
كتلة //يعني هي غير قناة تلفزيون العراق (ألقناة العامة)
وقناة بغداد (الفضائية العراقية)
يعني غير چنل ٩ ... وچنل ٧
كالي// أي هاي قناة جديدة أسمها ((تلفزيون الشباب من دار ألسلام )) ...ويكولون الولد //حلوه وبيها طگطگة وونسة ..باجر أسوي الشبكة ونشوفها
من خلصنة العشا ...وغسلت ألمواعين
ألحمد لله ألمي دافي ...ولا جان تكسرت أصابعي من ألمي ألبارد ...تذبح ألدنيا من ألبرودة
وانوب خدرت الجاي
هنا سمعت ألباب دكت ...وباقر طلع عليها
وأسمع صوت حسيون ... ونور يسلمون
فد فرحت بجيتهم ...ركضت عليهم
وسلمت على نور ..حظنتها وباوستها
وهي صارت بيها سؤله ...كل ما تجي علينه
تكلي //ولج سمنانه أكلي قليل وحافظي على وزنج
واني اكلها //أي بس ما أسمع كلامها
أحب الأكل مو بيدي ... أموت على نعمة الله
وحسيون ... أسلم علية من ورة خشمي
فد أكرهه..لان أخذ نور من عندي..وتيتمت من وراه.
ألصدك مو أكرهه ...بس أموت من عنده
وشكد أسبة بكلبي ...وأغلط عليه
وكل ما يجون ويرحون ...أبقى أبجي وره نور
وزيد يجبونه وياهم...يحبونه ألجهال يبقون يلعبون وياه .
بس أم حسيون ما تجي ...
خطية مرأه جبيره ماتكدر تمشي
لو تبقى بيتهم تنام ..
لو تجي يمها بتها خمائل ...
لو تروح بيت وأحد من ولدها ...
حسيون عنده أربعة أخوان ...وأثنين خوات
كلهم متزوجين وقريبين عليهم ...
بس أختة الجبيره يكولون//متزوجة بمنطقة أسمها ألعزيزية
من تجي نور أطير من ألفرح ...كلشي عدنه أجيب وأحط كدامها...بس حسيون أكرهه كلشي ما أنطي
وهي نور ...تجيب وتخلي كدامه من حصتها
ليش تحبه ما أدري ...!!!!
وهو فد مليق ...كله يكول // ألعلوية ... وألعلوية
من يحجي كدام بيت ألسيد ..أبد ما يصيحها بسمها
وحتى نور ...من تسولف ويه كميلة
تكلها//حسين يحبني ...ومرتاحة وياه .
وخالتي خوش مرأه ...من أهل الله ...
ومالها دخل بحاجة ...لو بشغلة ...كل ألبيت بيدي
وحتى هي وحسين...يصحولي// نوارة ...لو ألحضريه
..لو البغداية...ويتفاخرون بيه كدام كرابتهم لو أجمي عليهم .
كميلة من كل عقلها ...تفرح بكلام نور
وتبقى تدعيلها...الله يسعدها...ويهدي حسيون عليها
كمت وجبت حلاوة دبسية ...دزتها إليه سهاد بيد أخوها سعد ...عودين باب صلح ... بحسابها زعلانه منها
جنت مخليتها بالثلاجة مال مطبخ ...
جبتها ورجعت طبيت للهول ...
عون راد شوية .
وحمودي هم راد .
ولازم أنطي الزيد .
وسجاد ألخايس هم راد .
كتله //روح جيب ألجاكوج وتعال أنكسرها
ألحقير يريد من الحلاوة ...وميقبل يكوم يجيب ألجاكوج أنكسرها .
كمت من مكاني أدردم ...وأني باب ألهول
ما الله هداني وسكتت ...
لا غلطت على سجاد ...كتله//(أسوي باأمك )
نفس ألكلمة ألسمعتها من ألولد .
وألكلمة من كلتها...صارت بوجهي محمد ألمصروع
يريد يفوت للهول ...جان بره بالشارع يدخن
لان يستحي من ألسيد ...ما يدخن كدامة .
وما أحس غير بس راشدي ...صلخ خدي
وحسيته كسر سنوني بحلكي ...
والله من قوة الراشدي ...ولان ما منتبه أنضرب راسي بالباب ....وحسيت حلكي أنشك من جوة
أني شنو هنا ...أنصدمت ولزمت خدي
وبقيت أباوع بوجه محمد ألمصروع
وهو صاك على سنونه...وأسمع صوت جزتهن بذاني
وصام جف أيده ويكلي//عيدي هذا ألكلآم ألجايف
مره ثانية ألا أصلخ جلدج .
حسيت شي حار صار بحلكي...ولعب روحي
بسرعة دنكت راسي بالكاع ...وتفلت دم
ومن دنكت راسي نزلت دموعي جمر على خدي
ألموقف الأني بي خنكني..طلعت أركض
بوجهي للمطبخ ...هنا كمت أبجي بصوت عالي
وساده حلكي بيدي وأبجي .
لحكتني نور ... وأشوف عيونها مغوركة
شمرت روحي بحظنها ...وكمت أبجي بصوت أعلى
وهي مخنوكة تكلي//شلون تفشرين هيج كدام ألناس
ولج مو عيب...من كميلة وأبو عطأ ...
هاي سوايه تسويها.
أني أبجي كتلها //ومرقد أولاد مسلم ما غلطت
وهاي ألكلمة سمعتها من ألولد ألعصر كالها لولد ثاني
وعادي بالشارع كالها
كالت//ولج هاي ألكلمة عيب وفشار
كتلها//والله ما أدري بيها عيب..وهاي أول مره أسمعها
وخرتني عنها...وبقت تباوع على وجهي
كالت//شدعيلك محمد...من عسنك بمراه تشلع كلبك
ليش هيج صبغت خدها.
أنوب كالت // شو فتحي حلكج
باوعت بحلكي...وكالت//روحي تمضمي بمي بارد
وتعاي أخليلج دوة ازرگ مال تعقيم ألحلك
ومن هذاك أليوم...نور زعلت...وبعد ما أجتي على بيت ألسيد
وأني كمت ما أباوع بوجه محمد ألمصروع
ما أعرف كمت أكرهه ...لو أضوج من عنده
ما أدري بس كلبي مقهور من عنده
وكميلة ...وألسيد ما رضوله لان ضربني
وكميله كايلتله //أحلف بدل عنها...ما تعرف شنو
معنى كلامها...تلكاها سمعت ألكلمة شو منين
وشمرتها علينه .
وصدك علاوي سوالنه ألشبكة...والقناة الجديدة حلوه
وكلها طگطگة...وبرامجها حلوه
وأبقى أسهر للساعة بالعشره بليل بغرفتي
أنوم ألجهال عون وحمودي ...
وأشعل صوبة علاء الدين..بس بليل أشعلها
هم أدفي رجلي عليها ... وهم أدفي ألغرفة ..
وأضملي لفة حب...من ألعصر أدز عون يشتريلي وحده
ومرات أضملي مصفي شامية..وأبقى أنتظر ألمسلسل
أتفرج عليها وآكل ...ألمضموم عندي
وقصة المسلسل كلش حلوه ...
أحب ألبطلة أسمها ماريا إيلينا ...
كلش حلوه وحبابه
وأخوها كيكي ... يضحكني بسوالفة
وأختها أسمها ...مرسيدس يصحولها (الميش)
وأخوها (يولي)
هم يعشون بشقة صغيرة ...
وهي تشتغل موظفة بالإعلانات يم رجال
هو بطل المسلسل فد حلو ...أسمة لويس
بس أكره مرته ...أسمها كلوديا
هو ما يحبها ... و تزوجها علمود فلوسها
يعني هوايه عرفت شغلات من هاي ألمسلسل
ويه كل شغلة جديده عليه ..من أشوفها وأعرفها
أتخيل روحي أني بدال ماري أيلينا..ومحمد هو لويس
عشت قصة حب جديده ويه ألمسلسل
وفد أستحي من يطلع مشهد مال غزل ...
وتقارب بين ألحبيبين ...أحس روحي بدالهم
حتى ألولد ...كاموا يتابعون ألمسلسل بليل
بس يتابعوها وحدهم بالهول
وألسيد من يشوف جم مشهد بالمسلسل مو هلكد أخلاقي ...يبقى يحجي على ألولد
وهم متقوين بمحمد ألمصروع ...لان يتابع وياهم
والمسلسل هواية طولت ..بقت فوك ألثلاث أشهر
من يعرضوها ...وحرامات مالحكت عليها من ألبداية
يمكن عارضيها من نهاية سنه ال ٩٣
حتى طلعوا بالتلفزيون توقعات ألفنانين ألعراقيين
بهجت الجبوري ... وسليمة خضير
وأسيا كمال ...وسامي قفطان
يبوو شكد بعد فنانيين ...وعرضوا توقعاتهم علمود
ألحلقة الأخيرة...وأكو بيهم من يكولون تنتحر ألبطلة
اني من يمي أموت من ألقهر .
صدك مسلسل حلوه ...
وتخيلتها قصة حبي ..أني ومحمد
يارب أزوج محمد ...والله أحبة وأموت علية
-
-
-
اني وانته احلامنه زغيرونه حيل
ولد فقره ومايلوكنه الدلال
فارغات جيوبنه بس احنه ناس
تارسين ارواحنه اخلاق وجمال
من اعاين طولك استغفرلي عام
حتى تطلع نظرتي مالت حلال
انته صوتك والجرح معتبره خير
اني واكف جيب رزق الله وتعال
ليش خوافين والموعد بسيط
احنه مانحتاج بس جرئه احتمال
انته بارد بالعشك ....بالفركه حار
مستحين شبينه غير الحب حلال
الى اللقاء في الحلقة القادمة
==================