#حصاد-ألمواسم
👇
#فراقد
👇
#ألحلقة((٣٥))
×××××××××××××××××
هنا سمعنه ألرياجيل صلوا على ألنبي بصوت عالي ..
وسمعنا دوي صوتهم ألخشن ... ببركات الصلاة على محمد وآل محمد ⚘💐🌷
وبدت مراسيم كطع ألمهر ...وكل النسوان خنسن
يسمعن صوت الرياجيل
ألسيد مهدي كال// يتفضلون يكعدون بصفي
ألعريس ...ووكيل ألعروس
بشهادة مختارنا ألعزيز أبو جبار ...والوجوة الخيره
لقعد قرآن أخونا حسين ...على كريمة ألسيد فاضل
أنوب كال للسيد// سولي درب أسمع موافقة ألبت
بشهادة مختارنا ألعزيز ...وعم أخونا ألعريس أبو جاسم
وألوجوه ألخيره
بسرعة ...ركضت خمائل ... وأم سهاد
وطلعن من العلاكة ...قماش ستن أبيض ...كلش جبير
كاتبات علية بالقلم ألجاف أيات قرأنيه
وغطن بي شعر نور ....ونزله على جسمها
وأم سهاد كالت الكميلة// تعاي أوكفي بصف أختج
وهي أم سهاد هم ظلت وأكفة بصفها
وحدة وكفت منا ....وحدة وكفت منا
وأم سهاد شايلة بيدها منكاسة شكر .
وخمائل وكفت ورة نور ... وبيدها قفل ومفتاح
وبقت تفتح بالقفل ... وتقفل ....
وظلت تسوي هيج ...
ألى ان أجى ألسيد مهدي ... ومن وره ألباب
يحاجى نور ...يأخذ من لسانها موافقتها
وسألها عن قبض قيمة ألمهر المقدم
وهي قابلة بحسيون ...زوج ألها بدون غصب أو أجبار
وتوكل ألسيد عنها ....وعاد عليها الكلآم ثلاث مرات
يلا نور كالت// بلي موافقة ...وألسيد فاضل أبو عطأ وكيلي.
هنا أم حسيون كامت تهلهل ...هي وعماته حسيون وخالاته .
وخمائل طول هاي الدقايق ... هي تفتح وتقفل بالقفل
الحد ما كالت نور // بلي موافقة على الزواج
عاد بقت ألقفل مفتوح ... وأنطتة ألكميلة
كالتلها //هذا أمانه عندج ليوم ليلة الدخله أريدة منج
ومن تم دخلة أختج أقفلة ... ويشمرة حسيون بالشط
حتى يكون زواجهم أبدي ...وما يفرقهم كيد ألنسى
ومحد يحصل (القفل)....
وطول ما ألسيد يحاجي نور ...أباوع عليها
هي تخض بشيشة الزئبق .
وكميلة ...وأم سهاد ...بعتبارهن نسوان مرتاحات
على كولتهن من النسوان المسعدات ...
بقن واكفات بصف نور ...وينثرن على راسها شكر
وهو مغطى ...لحد ما أنطت موافقتها للسيد
وبعدين أم سهاد ...جمعة الشكر من حظن نور
وظمنه بنفس المنگاسة ...وشدنه بالعلاكة
خمائل كالت الكميلة // هذا هم أمانة ضمي
بمصباح العرس سوي بي حلاوه للعرسان .
وبعدين خمائل فتحت جكليته
وكالت لنور // خليها بحلكج بس لا تاكليها
بين ما يجي أبو زيد
رجعنه سمعنه صوت ألرياجيل من جديد
صلوا على ألنبي ...
وألسيد مهدي ...قرة شوية أيات من القرآن
وبداء بمراسيم ألمهر ...بوجود ألعريس حسيون
وكيل العروسة ألسيد أبو عطأ
وبشهادة المختار ...وعم حسيون
وكال// نبدأ بسم الله الرحمن الرحيم
وببركة الصلاة على محمد وال محمد
بعقد قرآن أخونا الطيب حسين أبو زيد
على كريمة أخونا الطيب فاضل أبو عطا
على الأتفاق الحاصل بينهم على مقدار ألمهر
المقدم ( ٥ ألاف ) وألمهر المؤجل (٥ الاف )
حسيون وألسيد رددوا باقي كلام وره ألسيد مهدي
والحمد لله صار كطع ألمهر
هنا هم رجعوا كل ألرياجيل ...صلوا على النبي بصوت عالي
وسيد مهدي كتب القعد ...وبيت ألسيد يسمونه ( زنامة ) يعني الورقه ..ألبيها موافقة نور
على الزواج من حسين
بالمهر المقدم (٥) والمهر المؤجل (٥)
وبيها توقيعة ...وتوقيع المختار ...وعم حسيون
وألسيد ،،وتوقيع حسيون ....
هاي الزنامة تصير ضمان لنور بالمستقبل
ألسيد دك علينه الباب ... وجاب بيده الزنامة
وأنطاها الكميلة حتى تنطيها النور
وتعالوا وسمعوا الهلاهل والهوسات شعلت الجو ..
خمائل هوست// صلوا على نبينا والعين ما تجينا
وكابلتها عمتها كالت //
حسيون يا حلغومة حامض حلو بلعومة
ونويرة يا جكليته حامض حلو باكيته
وأم سهاد هوست بصوت عالي//ركبتها شيشة لا تطيح وتنكسر ... وبقت تهلهل وتهوس
أم حسيون خطية مراه عجوز ...
بس تصفك ... بالكوه وتشمر بيدها وتهلهل ،،
فتحت طرف شيلتها ...وطلعت محبس ناعم
ولبستة النور وباوستها ...كالتلها// هاي وكعة مهرج
وعسنج بيضة وجه ... حشى عيونج
وأريدن تسعدين وليدي ... وكامت تبجي
نور وكفت على طولها ...وباوست العجوز
ومسحت دموعها .
وخواتها هن خالات حسيون ..يريدن يركصنها
وهي تكلهن // وعلي جماميزي موش الي
خلني راكده .
ألنسوان بقن يهوسن ويصفكن ...وأني بقيت واكفه
يم نور ومكيفة ...وكلش فرحانه بالحفلة .
بس كميلة ...لبست عبايتها وطلعت من الغرفة
راحت على ندى زوجة ألمرحوم ناهض بالمطبخ
حتى تحضر ألشربت وألكيك للناس ...
وصدك علاوي ... وباقر فروا صواني ألشربت والكيك
على ألرياجيل .
والكل قدموا التهاني ...والتبريكات ...
هاي سمعتهن من علاوي حافظهن من المدرسة
لحسيون ... وللسيد علمود حفلة كطع ألمهر
ألرياجيل يباركون للسيد يكلوله//بالخير أن شاء الله يوم زواج الولد ... وتشوف ولد ولدهم
ويكلون لحسيون //شايف ألف خير أبو زيد
جعلها زواجة العمر .
وناس يكلوله // مبروك تستاهل كل خير أبو زيد
بعدها كل ألرياجيل طلعوا من بيت ألسيد
بعد ما علاوي ... وباقر قدمولهم جكليت على صم صم
أخذوا وياهم لجهالهم .
ألسيد دخل علينة ...بعد ما دك ألباب ...وبارك لنور
وكاللها// بوية راعيج يريد يلبسج نيشانج
حضري روحج .
نور كامت ... وكفت وره باب الكنتور
وظللتلها سهى بالعباية ...وبدلت لبست كوستم
كلش حلو ...قميصه قماشه وردي... وبي ورده ناعمة حمره ...وتنوره عدله سوده ...وبسرعة عدلت شعرها
وطوخت حمرتها
أم حسيون وعماته ...جابن حسيون من ألهول
يالله خجلان ألرجال ... يدفعن بي وهو يضحك
يكلهن // والله أعرف أمشي
فات باب ألغرفة وكال // صلوات على محمد
يمة هسة دعوتج الله سمعها ... وبقى يضحك
وكل ألنسوان كامن يضحكن على كلامة
هنا دخلوا عمام نور ... باركولها وطلعوا
ودخلوا وراهم ولد ألسيد ...باقر وعلاوي وسجاد
،بس ألسيد ...ومحمد ... وولد عم ألسيد
بقوا بره بالهول كاعدين.
سجاد شغل بالمسجل بكرة ...كلها أغاني بزخ وردح
ركصت أني وياه ...على أغنية سعاد عبد الله
أنا المسجينه 👇👇
كل ألنسوان كامت تصفك ألنه أني وسجاد
أني أعرف أركص ...من جنت يم أبتهال وأقبال تعلمت منهن الركص ... ذبيت لحم
ركصت من خاطري ... لان فرحانه لعمود نور
هي سعاد عبد الله مو تكول //شايب وأنا بنيه ...وأنطوني فصلية...
أروح أوصل بالدبجة يم حسيون ...وأكلة // أنت الشايب
ونور ألبنيه ... وهو خرب من ألضحك
أني أدبج وأركص ... وأشوف خمائل أشرت ألنور
تطلع الجكليته من حلكها ...
هي نور طلعتها ... باقي شويه من عدها
وأنطتها لحسيون ...شو بسرعة اكلها ...!
فد لعبت روحي ...وكبر حتى كبر هذا شبي مشايف جكليت .. وعمه البزازين شكد جوعي
كميلة راحت جابت ألطاسة الفافون ...هاي نسوي بيها بس بخور ... وأجت بخرت بيها حسيون ونور
تخاف عليهم لا ينحسدون
خمائل طلعت من جنطتها لابستها بجتفها ...
أبد ما نزعتها ... علبة ألذهب
حسيون قبل لا يلبس نور ذهبها ...كام باسها على راسها ورجع كعد بصفها ...بس هو مو باسها حلكة شكبره شفط راسها ...وعمه هذا شبي بس يباوع عليها ...؟؟
يعني لو ما أخاف من نور ترزلني ...أروح أطرده
شكد عيونه وسخة ... بس يباوع عليها
لبسها حلقة ... ومحبس ناعم ... وكلاده
وهي لبسته ...حلقة مال فضة ...وساعة
شوية بقوا كاعدين ... وألنسوان تصفك وتهوس
عاد قبل المغرب بشوية راحوا
أني بس طلعوا ...
رحت على نور ...بقت بالغرفة تبدل
كتلها// ترى حسيون ميستحي ...بقى يباوع عليج
وشبي جوعي ياكل من حلكج ألجكليته
كميلة موجوده بالغرفة كالت// بوية محمد
راح تعدم الزلمة ...ولج نويره هاي شلون بيج باجر
من تعرسين ... وعلي تذبح ألزلمة من غيرتها عليج
نور كالتلها // كميلة ترى الكدامج قماش أبيض
ما تفهم شنو السالفة ... وأني هوايه مخوفتها
وضابتها عن هذني السوالف ...متشوفيها هيج محتركة
باوعت علية ... وهي تلبس كلبيتها فوك ألتنوره
وبعدين نزعتها للتنوره ...ودنكت على الكاع
شالتها وسفطتها ...وبقت تعدل بكلبيتها ،،
// هدوله حسيون صار رجلي
يعني يصير يباوع عليه ...ويصير يلزمني
ويصير يكعد يمي ...شلون هسه أبو عطأ مرته كميله
حسيون نفس الحالة ...صار رجلي وأني مرته
يباوع عليه ... لو يلزمني عادي يصير .
بس غير رجال لا ميصير .
اني ما الله هداني وسكتت ....
كتلها // يعني أني من أكبر وأتزوج عادي أنطي الرجلي
جكليته من حلكي .
كميلة ضحكت بصوت عالي ...وكالت // ياااا فلك الفلكج ...على هاي سالفة الغمة.
ونور هم ضحكت... بس حجت بجديه
كالت //أي يصير ..أتذكري بس رجلج
غير رجلج ...يلزمج ...لو تخلي يباوع عليج ...أذبحج
اني هنا من صدك غبية ...صفنت وتخيلت
أكل الجكلته ... وأنطيها لمحمد
بس ااااخ من هذا عقلي ألسكط ... وكلبي ألغبي
وين وصلني ...شمرني بنار جهنم
يمكن مر أسبوع ...
وأجى حسيون أخذ نور وكميلة
وهم بقن ألجهال يمي ...
وهم راحوا للولاية ... يشترون غرفة أخشاب ألنور
بس ما لكوا غرفة سعرها مناسب ...
عاد أم سهاد ... حصلتلهم غرفة مستعملة
وأخذوها لورشة النجارة مال بيت ألسيد
عدلوها ...وصبغوها ...طلعت جديده
يمكن أقل ألشهر وأجتي أم سهاد ...وخمائل
أخذن نور ...وكميلة وهم بقن ألجهال يمي
راحن لبيت حسيون ...كميلة تسمي يوم ألفرشة
لان أخذن غراض نور ...وملابسها وياهن ،
وهم ويفرشن ألكاع مال غرفة نور ،
ويفرشن ألفرشة ألبيضة على قريولة العرسان.
ومسفطات كل ملابس نور ...ومعدلات غراضها ومكياجاتها ...وتغدن بيت حسيون ...وأجن العصر
هو حسيون جابهن.
واني أكلت طين من ألتعب أركض وره فروخ كميلة
من أجن العصر محد أكو بالبيت
ألسيد طالع للمرقد...
ومحمد بيت عمه ساجت يم عصام صديقة
والولد دايحين بره ...بس حمودي يمي
كميلة جلبت بحسبون ألا يبقى
تريد تنطي القفل تكلة/حرت وين أضمة من الفروخ
لا يقفلونه ..
هو حسيون طب وكعد بالهول .
وكميله كالت // تعاي وياي للمطبخ
رحت وراها ..
هي خدرت جاي وبقت وأكفة بالمطبخ
وكلساع وكالت// أبقي هنا عيب ترحين للهول
ألزلمه كاعد
أني ما الله هداني وبقيت كاعدة بالمطبخ...
لا كمت أحوس ... أريد أعرف ليش كميلة متخليني أروح للهول ...؟؟!!
طلعت بسرعة من المطبخ ... ودخلت بالهول
شو لكيت بس حسيون كاعد وحده ...
ونور ماكو .
رحت دخلت ألغرفتنه ...لكيتها كاعدة تبدل ملابسها
لبست كلبيه ... وطلعت كعدت يم حسيون
أني أجيت وكعدت يمهم .
كميلة أجت بيدها ألجاي ...تنحنحت يلا فاتت
قدمت ألجاي لحسيون ... وأنطتة ألقفل
هو كاعد على أعصابة ...
بسرعة شرب الجاي ...وطلع يركض
يكلها// فشلة من أبو عطأ هو موش موجود
واني أخش لداره .
أقل الأسبوع ... وحددوا موعد ألعرس
شو الأيام تركض ...ركض
شبسرعة صار ألعرس ...نور ما صارلها أشهر من أنخطبت .
وقبل يومين من يوم ألحنة ...
هم أجت أنتصار وبناتها ...وطوعة وبناتها
الحمد لله هلمره لحكن على كراب كميلة
وشالن ويانه من ألشغل .
بيوم ألحنه ندى ...وأزهيران هن ألساعدن كميله
وطبخن غدة ...وعشا للخطار ...وعجنن وخبزن
نور ما قبلت تروح للصالون ..
كالت// أني أعرف أرتب نفسي ميحتاج أروح للصالون
هم حسيون ما عنده وشل ..وهم الصالونات هنا تعبانه
هي من قبل يوم ألحنه ...
بلشت بروحها شيرت جسمها ..وشمرت حواجبها ،،
ونهلة حفت وجهه ...وأنوب نظفت وجهه بملح ونخاله وكهوة ...طلعت فد بيضة تخبل
وغسلت شعرها ولفته بالورات ...لفات ناعمة
وكبسته بالربطة من الليل ...
وألصبح من كعدت عافته ملفوف
كعدت صبغت أظافر أيدها ...ورجليها
وأنوب كعدت ألظهرية ...كلها تعدل بشعرها
دزت على بطل كراش ...وكامت تغمس ألمشط بي
وتيبس ألشعر بالفير ... ورتب شعرها بالماشات
سوت تسريحة بسيطة وحلوه .
أنوب مكيجت مكياج شوية طوخ ...وخلت حمره حمرة بلون بدلتها .
ترى هي بدلة ندى ...بس جابتها نور وعدتلها
طلعت كلش حلوه بيها .
بس بدلة ألعرس أشترتها ألها أم سهاد من جنة بيت ألمختار ...ونور كعدت هي وأم سهاد
ظافت ألها أردانات ...وخصرتها شويه عريضة عليها
من كدرتها طلعت كلش حلوه عليها
من لبست بدلتها ألحمرة ...وية تسريحة شعرها ومكياجها ...ولبست ذهبها طلعت كلش حلوه .
نور تعرف بسوالف ألمكياج واللبس من جانت بغداد
جانت تسوي شعر أقبال وأبتهال ...
ودورات تمكيجهن ...لو تمكيج ألبنات
فلهذا أيدها ماخذة كلشي تعرف.
ومن ألعصر بدت حفلة ألحنة مال نور
بتاريخ ٢٥/١١/١٩٩٣ يوم الخميس
ألسيد ...ومحمد ...وألولد
من ألظهر جهولوهم .... بيت عماهم
حتى ألنسوان ياخذن راحتهن .
ومن بدت ألحفلة
ركصت أني وبنات أنتصار ...وبنات طوعة
على أغنية جديده كلش حلوه ...جانت هستوها طاكة أسمها عبود خطبولة مره ...
ذبينه لحم عليها 👇👇
وكميلة سوت صينية ...
وخلت بيها الشموع ...والحنة ... والورد،
وحلويات من جكليت ... وحلقوم ...ومن السما
ومنكاسات صغار بيهن شكر ...وملح ...وتمن
ومزهرية مال ورد وياس
وبنهاية ألحفلة مرت المختار ...
عودين هي مراه مسعدة ..ومرتاحة ..وميسورة الحال
خلت ألحنة ... على أيدين نور وباركتلها
وألبنات كامن يضحكن ويصفكن ويغنن //
كوزي تكوز عليه .......وأنا لسه ألحنه بيديه
ونور تركص بنصهن ...وشايله جفوف أيدها ليفوك
متروسات حنه .
مرت ألمختار ...أفترت على ألبنات ...وحنت ايدهن
وحتى أني خلتلي حنة ...
شكد حبيت لونها من صارت حمره بيدي
شو بليل ...
كعدت نور ..وتكابلت هي وكميلة...وياهن أنتصار
وكامن يبجن ... نور تمسح أدموعها ويرجعن ينزلن
طوعة كامت تحجي عليهن تكلهن// فال موش زين
وهنا صار ألصخام ألصخم حياتي ....
ألسيد أجى بليل ...وسولف ويه نور كدام الكل
كاللها // عايني بويه عليه ...هديل بنتي
وأتبنيتها جدام الله ورسوله ...من يوم الزتتيها
بيد ألزلمة رسول ...
خليها بالج ...هديل ما تمشي وياج لبيت راعيج
تبقى هنا..هذا بيت أبوها...مثل ما هو بيت أبوج
شوكت ما عجبج ...دفعي ألباب ودشي
لا تتحرجين ...ولا تكولين أني تزوجت ...وطلعت من هذا ألبيت ...لا بويه هذا بيتج ...كبل لا يكون بيتي
وأعذريني من ألتقصير...
وسامحيني ...وبريني الذمة يا بويه ،
خطية ألسيد ...نزلت دموعة على وجهه
تقدم على نور باسها على راسها ...
وهي ضمت وجهه بيدها ...وبقت تشهك وتبجي
وحتى ألنسوان كامن يبجن
عاد أم جمال طلعت ألسيد من الهول ...
ودفعت نور كالتلها// امشي أغسلي وجهج
أنتي عروس ما يصلح تبجين .
أني شبعت بجي ...وكمت أحجي على نور
وكتلها // مو حلفتي بروح أبوج تاخذيني وياج
ليش تردين تعوفيني ...؟؟؟
هي ما حجت شي ...دنكت راسها ورجعت تبجي
وأني مكابلتها وأبجي ...
ألنسوان كامن يحجن علينه ... حتى نبطل ألبجي
أني زاعلتها ..لان عافتني ...ورحت نمت بغرفة الولد
للفجر ...وأفز عليها ..
أجتي ...وتمدد بصفي ونومتني بحظنها
شبكتها وكمت أبجي ...وهي عيونها مورمة من كثر ألبجي ... حاجتني بصوت ناصي
كالت// ولج والله ما أعوفج...بس خلي أعرف أطباع
بيت حسيون وأخذج يمي ...ولج أنتي بنيتي شلون أعوفج...أدعيلي ...وخليني أروح مرتاحة ...لا تشلعين كلبي ...أني بس حركت راسي يعني أي ...وبقيت أبجي بحظنها.
وأجى يوم الزفة ...
من ألصبح نور قلقه ... ومخبوصة
حتى ما تريكت زين ... أكلت لكمة وكامت
أباوع على كميلة ... دمعتها بعينها
وكلساع تشيل عينها ...وتباوع على نور
وهم نفس البارحة ... نور هي ألحضرت نفسها
لان صدك هنا صالوناتهم تعبانه..يطلعن الوحدة خرعه
لو بزونه مكتوله ..وأنوب شامريها بالخيسة ....
لان أجتي جنة ألمختار ألجبيره ...عودين رايحة للصالون ...من شفتها خفت ...أملغطاتها تملغط بالمكياج .
ونور شكدة حلوة طلعت
بعد ساعتين وما أدري أكثر ...هي عدلت بنفسها
وسوت شعرها تسريحة بسيطة تكول//حتى ميعذبني بالتمشيط ...ومكيجت مكياج يختلف عن ألبارحة وعدها علبة مال مكياج..بيها لمع فضي ..خلت على جسمها ...على وجهه ...يعني بعد ما خلصت المكياج
ولبست بدلتها ألبيضة ..وساعدتها ندى وسهى وأزهيران ثبتن ألها البركع بالتسريحة ...
يا بويه غير طلعت تمعط ألقلب من ألجمال
هلكد طلعت حلوه ...
كميلة ... هم بخرتها تخاف عليها من الحسد
ماقبلت تتغده ... ولا أكلت شي
كالت // ما أشتهي ...وروحي تگلب
ألبنات المامتزوجات ...يجن يوكفن يمها
هي أدوسين على رجليهن ... لو تدفرهن
حتى يزوجن وراها .
أنوب خطية باردة صكت من ألبرد
عاد نهلة شعلت ألصوبة ...وجابتها يمها
وأنوب وكفنه حراسة يم ألصوبة أنخاف على ألجهال
لا يحتركون .
أجى ألسيد ... ومحمد للبيت ... بدلوا وكشخوا
ونسوان كامن يهوسن لمحمد// يوم ألك حمودي
وطوعة مجلبه بي...تريدة يدبج وياها..وهو يستحي
بقى وأكف بمكانه ويضحك .
وأني ... يمن يلزم روحي ويربطها
خبلت روحي ... وهي روحي خبلتني
بس أباوع عليه ... وأتصفن على طوله
واحفظ حركاته ...وأضحك على ضحكته من كل خاطري .
سمعنه ألجاهل صاحوا // أااااجتي الزفة
خطية نور ...كامت توصي بالسيد ...وكميلة علية
وتكلهم//هاي أمانة أبو سعدي..لا تحسبوها أمانه نور وكامت تبجي .
وكل ألنسوان كامن يحجن عليها // أسكتي
ومصير تبجين ...وفال مو زين ...ومكياجج لا يخرب
طبن يدبجن ويهوسن عمات حسيون وخالاته
ويكولن // جنها ورد والعباس
وبعدين دخل حسيون ... لابس قاط أسود
وهو طويل ...وأسمر ...من صدك طالع كشخة
يعني من صدك هو أليوم عريس
وأختة خمائل تهوس كدامه
// جنبالك ورده أشتم بيها ..بس كون الورده أداريها
هو شكلة كلش مستحي ومرتبك ...
باس نور على راسها ... وكعد بصفها على ألقنفة
والولد اقربائهم بقوا وأكفين بره ...يهوسون ويدكون ويركصون ... يعني نسمع صوت هوستهم
أختة خمائل كامت تهوس وتضحك ...
وحتى ألنسوان ألباقيات كامن يضحكن على هوستها
تكول // شارعنه ضيك ....لا تفوت بسوبرك
وهي ترد على ألنسوان بضحك وفرحة
// قابل أني مجذبه
عاد دخل عم حسيون ألجبير ...وكوم نور وحسيون
وياه ألسيد ... باس نور على راسها ...
وخلى أيدها بيد حسيون
وهو ماقبل نور تطلع هيج ...أم سهاد شمرت عليها
ألجرجف ألستن الأبيض ... ألكطعت بي مهر
غطتها كلشي ما طلع منها ،
كامن يهوسن ألنسوان //
نشكر من كال أخذوها ... نشكر من عمها وبوها
كميله هنا كامت تبجي كالت// هو وينه أبو سعدي
ويحضر زفة بنته .
طلعوا العرسان هم أثنين من بيت ألسيد
بس اليهوسون كدامهم ...والوراهم ألفين
وكلهم مخبايل ...مو صاحين
جايبين سيارة ريم وحدة...كل ألنسوان صعدت بيها
وسياره نور برازيلي...بعدها جديده ..ومزروقيها
وسيارتين كراون صغار ... بس مليانات بشر
ألنسوان كامن يهوسن//بعد شتريد زفوها برازيلي
أفترت سيارات الزفة ...شوية بالقريه
وبعدين بس سياره نور راحت للولاية يكصون صور
باقي ألناس ...كلهم راحوا لبيت حسيون
أني أول مره ...أشوف بيت حسيون
شوية بعيد عن بيت ألسيد
هم بيتهم واسع ونفهه...وتقريبا يشبه بيت ألسيد
بس هم عدهم غرفتين ...وهول ...ومطبخ
وألصحيات بره .
غرفة نور بقت مقفولة ...لحد ما أجتي من المصور
وخلال هاي ألساعات أخوان حسيون ...وعمامة
عشوا ألناس ألموجودين ...رياجيل ونسوان
كلهم تعشوا .
نور بس أجتي من ألمصور
دخلتها كميله ...وخمائل ...وأم سهاد لغرفتها
أني هم دخلت وياهن أباوع ...
فد حلوه غرفة نور ...أخشابها جديده وتلمع
والفرشة بيضة ...والكاع مفروشة زولية كلش حلوه
وأم حسيون ...طاشة فلوس .. ورك ياس ...وجكليت على الفرشة ..ومخلين لعابة على شكل جاهل على تاج القريوله ...ومخلين بعد تحفيات صغار ...
ومزهريات مال ورد .
تمنيت من أكبر ...وأزوج محمد ...
هم هيج تكون غرفتي حلوه ...
بقيت وأكفة وأباوع على تفاصيل ألغرفة .
كميلة ... دنكت على نور وشاورتها
وهي نور بقت مدنكة راسها ..وكاعدة على قريولتها
وتسمع كلام كميله .
وخمائل شعلت ألصوبة ...لان ألغرفة بارده
ورشت من قلونية نور بالغرفة
صاحوا علينه // أطلعن نريد نزف ألعريس
كميلة كالت لنور // عود كولي بسم الله الرحمن الرحيم
وأذكري ألزهره أم الحسن ...ولا تخافين
ألرياجيل جابوا حسيون لغرفة نور ...
و ولد عمة يدفعون بي...
وهو يصيح عليهم يكلهم//وعلي أليطخني أكسر ايده
...وكلهم يضحكون .
من طلعنه من غرفة نور ....
لكينه أكثر ألنسوان رايحات ..باقيات بس ألجيران
جم وحدة...واقربائهم مو هواية
حتى ألنسوان أقرباء بيت ألسيد رايحات
بقت بس أنتصار ... وطوعة ... وكميلة
وأني بقيت كاعده يم كميلة
جابتلنه خمائل عشا...ماعون مال تشريب وتمن
وكعدنه نتعشى أني ..وياها ...وكميلة
ألحمد لله عبيت ألكرش وشبعت
من خلصت طلعت للحوش غسلت ...
ومناك رحت للتواليت هواية متحاصره ...
همزين لحكت وما بلت على روحي...
من طلعت ...صار بوجهي رجال
مو هواية جبير بالعمر شوية أكبر من حسيون
بقى يباوع بوجهي ...
أني أستحيت من عنده ...شلون يباوع علية
عيونه وسخة ...وأنوب أني ملابسة ربطة وشعري مفتوح ... وعيوني بيها كحلة ...عفتة ومشيت ....
ومن صرت بظهره ...وهو دخل للتواليت ...
غميته بثنين أيدية..وتلفت عليه .ورحت فتت للهول
شوية وطلع حسيون من غرفتهم ...
لابس دشاشه بيضة ...وجهه كله لمع ...
صاح // خمائل تعاي على نور ...
وبيده مسدس طلع للحوش
طفرت كميلة ...وطوعة ...وخمائل ... وأنتصار
ولحكتهن أم حسيون ...أني هم ركضت وراهن
من فتت شفت نور لابسة كلبيه بيضة ...وتبجي
وهن ألنسوان يهلهلن ....وهي كامت تحجي على كميلة وخمائل ..تكلهن//خرررب بصفحتجن قشمرتن عليه
ورجعت تبجي .
طوعة تكلها//لا تبجين هسة تصيرين مثل ألقندرة
من تعرض بالمشي ....وكلهن كامن يضحكن
هنا وسمعت صوت ألطلقات كلش قريب ...
فزيت ..وركضت على نور ..جيتت عليها
وهي صاحت// ولج اااخ كسرتيني أكثر من ما أني مكسره ..
كتلها //شنو متسمعين صوت ألطلقات خوفتني
عاد طوعة كالت//أمشن أطلعن خاف ألزلمة يرد ألغرفته
طلعنه من الغرفة ...
بعد ماكل ألنسوان باوسن نور ...وأنطنها فلوس ،
وهو حسيون رجع لغرفتة
وأمه ... وأختة خمائل كامن يبوسن بي ويباركله
بليل رجعنه أخو حسيون لبيت ألسيد
وكميله بس طبينه كامت تبجي ..
وطوعة تحجي عليها تكليها // عليش تبجين ...
أفرحي للبت..ألحمد لله من نستر حالها...أدعيلها الله يسعدها...ويهدي سرها ويه ألزلمة
أني رحت بدلت ... ورحت بوجهي للمطبخ
وسويت صينية عشا من جديد ..أليه وللبنات
من خليتها ...شو كلهم أجمي وكعدوا ..
بس طوعة كلفت نفسها وراحت خدرت جاي
ألبنات ...نامن يمي بغرفتنه...
وطوعة وأنتصار نامن بالهول ...
والولد بغرفتهم ...
ومحمد المصروع ...بس تعشى طلع داح
ما أعرف وين يخور ...بس يمكن يم عصام
والله هذا عصام ...مو خوش أدمي
عايف مرته وأبنه...ومكابل محمد وكاعد ،
اني بس أتزوج محمد ...فلا أخلي يطلع ويبقى هلكد دايح بره .
ألصبح كعدت ...
ما لكيت لا كميلة ولا طوعة ولا أنتصار
رايحات يودن صينيه ريوك لنور
صفنت...شنو بيت حسيون ماعدهم ريوك لو شنو..؟؟!!
-
-
-
الى هنا ...نترك نور وحسيون ... بفرح وسعاده
هوايه سولفنه بيهم
وبحضوركم يتم ألفرح وألسرور 💐😍🥰
((ترى حسيون حلو ...جعلته عمي
بس ما عاجب هديل بس تعيب عليه من الغيررررره😜🤪))
الى اللقاء في الحلقة القادمة
×××××××××××××××××××××