#حصاد-ألمواسم
👇
#فراقد
👇
#ألحلقة(( ٢٩))
×××××××××××××××××
نور كالتله// أبو جاسم عود أعزم خطارك على العشا..
هديل خوش طابخة عشا ...أداري الخلفة من هسه علمود خوش يبني البيت .
هذا بقى صافن بوجهه نور ...وبقى ساكت
هي شلون الخافت كالتله // إذا متقبلون بكيفكم
هو كاللها// لا ليش مانقبل ....خلى وطلع.
نور ضحكت... وكامت تفرك بيدها
وكالت// والله إلا أدق العوبة أزهيران
أني هنا أستغليت الموقف ...من شفتها هي هم ضايجه منها ... كتلها // نور راح أكلج سر ... وأنتي بروح عطأ
لا تكولين لأحد ... خاف تصير مشكلة
هي بدت تحمس بالشعرية ... تريد تسويها حلاوة
كالتلي // كولي ألعندج أسمعج
سولفتلها الموقف العصر الشفتة ....بين محمد وأزهيران
هي ضحكت وكالت // شوف هاي
ولج هاي وحدة خفيفة ... ومرخصة نفسها فرد نوب
حتى كميله منتبه على تصرفاتها .
بعدين باوعت علية ...
وشكلها أنكلب من الضحكة للتخنزر وكالت // شوفي هديل ...ممنوع تخلين محمد يقشمر عليج ويلزمج
ولا أي واحد من ولد كميلة ... ديري بالج
والله أذا لكفت شي عليج ... والقران أذبحج بيدي
كتلها// لا والله أبد ما أخلي أحد يلزمني
أني مو وسخة نفس أزهيران
هي كالت// أي عفية ببنيتي
ورجعت تكمل حلاوة الشعرية...
انوب طبكت التمن وكالت// هسة أنتي بس راقبي الأكل
وبعد ترتيباتج ... من الزلاطة ... واللبن ... والخضرة
كتلها // ترى أزهيران عاجنة شوفي العجين فاح بالكاع.
كالت // طبها مرض هسة أخليها تجي تخبزه
أحنة عدنه خبز شكو عجنت.
هي صاحت بصوت ناصي وأكفة وره الباب
// علاوي ... خالة علاوي شو تعالي شوية .
أحنه نسمع صوتة موجود بالحوش
أجى علاوي ودخل للمطبخ ...كاللها // ها خالة .
كالتله // أريد أطلع
كاللها // لا تطلعين هسة...ترى عمي محمد يلعب فلك..
الزلمة بعده بالحوش ...يشوف المسافة علمود العگد
عاد بقت نور يمي بالمطبخ ...تقريباً كملت كل العشا .
بعدين صفنت وكالت//حرامات العجين فاح بالزايد من الحر ...كامت وأخذت صينية ولواث (شويه طحين) وكعدت تشنك .
محمد المصروع ...دخل للمطبخ بقى وأكف بالباب
كال // نور بعد أخوج جهزيلي دولكة مي ...
وسويلي جاي ...عود جلبت بالزلمة على العشا ...
بس نصلي المغرب ...خلي عشاج مايكدر يتاخر على بيته...أمه ماتكدر على أبنه المعوق...خطية مراه جبيره
نور كالتله//تدلل أبو جاسم نص ساعة وكلشي يجهز
وأنوب كالتلي// هدوله سوي مي بارد ...
طلعي ثلج من الفريز وخلي بالسراحية الكزاز
وأنطي العمج .
هو محمد المصروع ... تقدم بسرعة على الثلاجة
وطلع دولكة الثلج ...وبسرعة موعها جوة البوري
وكسرها ...أني طلعت الدولكة الكزاز ... وغسلتها
وأنطيته أله ...هو خلى بيها الثلج والمي
وأخذ كلاص وطلع يركض من المطبخ ...
وأبو طلبة ملكوف مو صاحي
نور أخذت صينية العجين ...وطلعت تخبز
علاوي جابلها الحطب ... خبزت بسرعة هي وسهى
أزهيران بقت خاتلة بغرفة كميلة...ما طلعت مسويه نفسها تسمع كلام محمد .
أذان المغرب خلص ...
وراه أجى ألسيد من المرقد ...
أني حضرت كل المواعين
وكملت كلشي ... ماعندي شي ناقص
أجتي كميلة خلت الأكل بالصينيه الجبيره
واني أعدل جوة أيدها ...وهي على كلشي تشجعني
كلساع وكالت// عفيه ببنيتي
عفية يبعد جبد أمج وأهلها
عفية بالنادره
وأني أنفش بريشاتي بالزايد ... واركض كدامها
نور دخلت تركض للمطبخ ... وبيدها سفطة خبز
بعدها ما مكملة كل العجين ...خلت الخبز بالطبك
وطلعت تكمل الباقي .
كميلة ...صاحت على علاوي وباقر ...أجمي شالوا الصينية ...كميلة كالتلهم//تعشوا ويه أبوكم وعمكم
بس عون وحمودي جيبوهم علية
مر الوقت ... وبعد مراح الرجال
وأحنة ألنسوان تعشينة بالمطبخ ...
كعدنة كلنة بالهول .... وكميلة هلكد مدحتني
كدام ألسيد وتكلة// هي سوت العشا ...
وحضرت كلشي ...وتنكز كدامي مثل الغزال
ياريت ربي رزقني بعشرة بنات نفسها نادرات ونظيفات
أني هنا شنو ... من صدك نفخت ريشاتي
وشلت خشمي ... وكمت ما أتحاجة
هوااايه شفت نفسي ...وبالذات ألسيد من كال //عفية بغزالة بيتي ... أريدج تصيرين شاطرة مثل أمج كميلة
اني بس مكشرة حلكي وأضحك من مدحهم
وأتخيل حلكي ...صار نفس حلك شعيوط من يمعي
بين قوسين ضحكة صخل ...وأحرك براسي يعني أي
الحجي الصار ...وأفتهمتة من محمد المصروع
الرجال حسيون كايلة// لان المطبخ والهول
غرفة بصف غرفة ..وكدامهن غرفة كميلة
وغرفتنه اني ونور الجانت غرفة محمد
الرجال يعكد هاي المسافة بيناتهن ويصير هول وسيع
بس يشيل الحمام والتواليت...يصير مكانهن بالجهى الثانية .
شو السيد كال لمحمد // أحنة بالشين بالشين
المطبخ هم نبني من هذيج الجهه ...حتى مكانه يصير غرفة للولد ...وأنت ألهول الكاعدين بي ..يصير غرفتك
وتبقى غرفتي ... وغرفة البنات على حالهن
والهول يجمع كل الغرف .
وصدك على رأي ألسيد مشوا ...
ثاني يوم يجي الرجال حسيون ...
وياة ولد عم السيد ...وجماعة علاوي وباقر
وحتى جعيوي وياهم ...وبدوا يشتغلون بالبيت
كميلة ضاجت كالت //صارلي يومين أعزل وأرتب بغراض البيت ...هسة صار هوسة يريما...
لابية...ولا بشغلي.
محمد المصروع ...راح هو وعصام ...أخذوا سيارة بشاره ... ونزلوا للولاية ...جابوا عواميد مال خشب كلش طويله ...وياهن كووومة حصران (باريه )
مال خوص ...ما أدري مال كصب
ولورة جبيرة مال نايلون ثخين .
بين مارجع محمد المصروع من الولاية
الولد الباقين سولهم حوطة جبيرة (دائرة ) مال طين وتبن ...وكاموا يعجنون بيها برجليهم
وباقي الولد فلشوا الحمام ... والتواليت
سلام وألسيد ...راحوا جابوا بلوگ ..وجص
وقلابية رمل ... وجياسة أشبنتوا (أسمنت)
وحسيون صدك شاغول ...
بسرعة خله الولد يحفرون ...ودك الأساس من الجهه اليسرة من البيت ...وخطط المطبخ
وبصفة الحمام ...والتواليت سوهن مفصولات
كل واحد وحد .
وبقت مسافة صغيرة يعني طرمة أو حوش
بتسمية بيت ألسيد ... بقى بيها التنور الطين وأهم شي فئ ألتوثة .
وعلى هاي الجهه أليمنى ...بقت الغرف
والهول راح يصير بالوسط ...مسافتة كلش وسيعة
كميلة من صدك بزعت ...وطكت روحها
لان الولد خبصونة ...وثبرونه ثبيره
جنهم مخابيل ... بس يصيحون ويتراكضون...جنهم ثيران برية .
عاد هي حشمت أزهيران ...وسهى...ونور ...واني
جمعنة كل غراض البيت بغرفتنه ...وبغرفتها
وقفلت عليهن الباب ...بقى بس المطبخ بي غراض
والهول صار فارغ من ألغراض ..حتى الفراش شالته
يكعدون الولد بالكاع يتغدون ... ويتريكون
وكلنه تحزمنة ... وكمنه نركض ركض
نسوي أكل للعمال ... ونعجن ونخبز
وكلساع ... صاحوا على جاي
حسيون للظهر... كعد أساس المطبخ والصحيات
وحشم الولد حفروا برا ألبيت (سبتتنك)خزان للمي الوسخ مال مطبخ والحمام والتواليت ...
كربهم كرب ... ما نطاهم مجال يتنفسون
للمغرب هم كملوا الحفر ... وتأسيس المجاري
عاد كل الولد تعبوا ويشاقون وية حسيون
يكلوله// راح ندفنك بحوطة الطين هلكتنه من التعب
على باجر نبلش ...وهم تختمر حوطة الطين
هو كايل للسيد // أريد بعد أشبنتوا ورمل
البخ بيهن المطبخ ...والصحيات حتى لا ياخذن رطوبة
ألسيد ماجان محسب هلكد مصاريف
مثل مايكولون//طلعت البطانة أغلى من الوجهه
وأنوب أتورط لان بلش بالشغل ...ماعندة فلوس وشل أجى على كميلة ... ورة ما مشوا العمال بليل
كاللها // دبريلي كم فلس من أم سعد (أم سهاد )
وشلت وبعدني با أولها ...ما محسب أحساب لكل هاي المصاريف ...ومواد البناء غالية ...غلبتني
وبعد بلشت ...مو مال أكعد وأبند
كميلة من رادت تروح لأم سعد ... نور ما خلتها
وأنطتها فلوس ألغراض ... بس هي ماقبلت تاخذهن
عاد نور كالتلها// أعتبريهن دين ..ورجعيهن الية
شوكت ما يصير عدكم .
وعاد صدك ثاني يوم ... بس إذن ألفجر
ومحمد المصروع راح جاب رمل...وجياسة أشبنتوا
وجايب وياة لورات مال نايلون ملونه
ألسيد كام يحجي علية كالة// شسوي بيهن وهاي مصاريف زايده.
كاله // أغلف بيهن السطوح من جوة أحسن ما تنحت تراب .
وبلشوا بالشغل ...
أول شي كعدوا بناء ألمطبخ والصحيات
لان تبهذلنه نروح للتواليت بيت الجيران ..
ترى والله عيب ... رحنة عليهم بليل أني وكميله ونور هم سبحنة ... وهم غسلنه ملابس ،
حسيون ربي يحمي شاطر وشاغول ...
يصيح على الولد خبصهم خبص
ناس تناوشة بلوك..وناس تناوشة خبطة الرمل والشبنتوا
بس هو شراب أكشر مال جاي
حتى كلت لنور // ودي الكتلي يمهم أحسن
ما كلساع وصاحوا على جاي .
للظهر ... كعد حيطان البناء بس ما سكف
كال // على باجر يلا أسكف المطبخ والصحيات
علمود ينشف البناء
بس أتغدوا وشربوا جاي ...كعدوا يرتاحون
سلام..وعصام..وكمال..وجاسم..وباسم..أولاد عم ألسيد
ومحمد..وألسيد ..وعلاوي وجماعتة ثلاثة
وباقر ..وجماعتة أثنين ... وجعيوي ...
وحسيون..ومهدي جماعة ألسيد يشتغلون وياه بالمرقد
يعني تقريبا ١٦ لو ١٨ رجال يشتلغون بيت ألسيد
من صدك فزعة .
كميلة ونور ... يطبخن على كولتهن// بجدر الحسين
والعجين تتكابل علية ... نور . وكميلة . وأزهيران
يروحن يخبزن بيت الجيران .
من خلصوا الغدة
وسمعنه واحد كام يغني بس غناء حزين
كميلة كاعدة توكل بحمودي ...
بعدنه أحنه النسوان نتغدة ...كالت // أي هذا صوت محمد ...من يطرب يرج الكاع ...صارلي هواي ما سامعتة يطرب .
وبلش محمد يغني موال .....
غنه // إضحك دغش للوكت لو ثكل بيك اللوم
وإهذي بسوالف جذب وادمنه أخذها النوم
بيع الضمير إبفلس لو حل عليك السوم
وإكتل نثايه الشرف خاف إتحمل فد يوم
دنياك خرزة نذل طاف ابسماها البوم
خل تنشد أهل الصدكـَ وين الحميّه إشلون
غمض إعيون العرف لو كـَالوا إشيكـَلون
شاعر.......... طفل......... مجنون...!!!
ومانسمع بس صوت أقوى وأحلى من صوت محمد
كميلة كالت // بعد عمري يا يمة هذا باقر
وغنه //
إبوجه الأوادم ندم يلدنيه شنهو الصار
تدري بكـَـلوب التبن طافت بثر تيار
عمرك حلم مرتخي... غركـَـان وسط العار
رحمه المشي إبلا كـَـلب نسـّاني اخذ الثار
لو وّج مضيف السلف شعليّه غاد النار
دخان عمرك صعد مذبوح ما يدرون
غمض إعيون العِرف لو كـَـالوا إشيكـَلون
شاعر..............طفل............مجنون ..!!
الولد كاموا يشجعون باقر ويصيحون// كمل
ويطكون أصبع ...ويصفكون ويصوفرولة
هو تشجع بالزايد وكمل غنه //
أحجي إبسوالف عطش وشفافي صارن بيض
والريه تيبس غفل ماعيك لغاد إيفيض
كـَـلبك سفينة غضب تِدوي إبحور الغيض
بسكوت مات الشته والكـَـيظ شايل كـَيظ
تجري بحروف الشرف نهران دم الحيض
إنكـَـل سوالف صلف وإمشي إبدرب مسكون
غمض إعيون العِرف لو كـَـالوا اشيكـَـلون
شاعر............. طفل............ مجنون
ونسمع محمد كمل وراه بصوت مخنوك
وكام يبجي هو يغني //
ماتت إوجوه الخجل صوت النثايه إيصيح
مكتوب معنى الشرف برمال اخذها الريح
بالكـَـصه ما ظل عركـَ والغيره نكـَـطه إتسيح
العار لف النَفِس ماتسوه خلها إتطيح
جذب السوالف طفح ما ظل مجان إنزيح
صافح إجفوف النذل للدينه ظل ممنون
غمض إعيون العِرف لو كـَـالوا إشيكلون
شاعر......... طفل............ مجنون
كميلة ونور ...شبعن بجي على صوت محمد وباقر
لان الموال حزين ... وكلماته تذبح الروح .
شوية والولد كاموا على الشغل ...
وكاموا يسكفون بالمسافة بين الغرف بالعواميد ويثبتوهن بطابوك وجص ...لان هي الغرف هم مبنيه ببلوك ...بس سكفهن هم عواميد خشب وباريه خوص السعف ما أدري الكصب ...لليل يلا خلوص بس ثثبيت العواميد
ثاني يوم وهم نفس الحالة....أجمي العمال من الغبشة
حسيون سكف المطبخ والصحيات ...
والولد ماخلوا عد كميلة ...جدر جبير ...ولا نجانه
يشلون بيهن طين ...ويصعدون بيهن فوك سطح المطبخ والصحيات ...لان من ثبتوا العواميد والباريات
وبعدين خلوا عليهن النايلون الثخين ...كاموا يصعدون طين ... وبهذا اليوم خلصوا بس ألمطبخ والصحيات
وبقوا هيج يشتغلون ...لحد ما أجى بدابة الأسبوع الجديد ..وهم بعدهم ما مكملين الهول الوسيع
لان بنوله حايط ... وخلوا اله باب وشباك بالواجهيه
وبعدهم ما مصعدين الطين ...
هنا أتوقفوا عن الشغل ....لان محمد المصروع
أخذ كميلة ... ونور ... ودزوا على أنتصار تروح وياهم لبغداد ... يفتحون بيان ملكية للرجال فوزي.
وراحوا .... يومين يلا رجعوا .
وهمزين أنتصار جابت بناتها وياها ... نهلة وسعدة
بقن يمي على الواهس
وأجى وياها ولدها ...هادي ... وطالب ،،
يعني البنات ... وهادي بقوا بيت ألسيد
بس طالب راح وياهم لبغداد ...
ومن رجعوا دايخين بزمانهم ....
وسالفة بيع لبيت متعرقلة ...
لان لازم يحضر سعدي ... وأقبال ... وأبتهال
وهم كلهم ماعدهم أوراق ثبوتية تثبت وفاتهم
ألسيد كاللهم// بس خلي أكضي سالفة البناء
وان شاء الله نلكي حل للموضوع ...
أنتصار الله هداها ...ظلت بيت ألسيد يومين بعد
تساعد كميلة ...ونور ... علمود خدمة العمال
والولد طالب ...وهادي هم يشتغلون ويه خوالهم
ومرت اليومين ...
شغل ... وعمال ... وبناء ...وهوسة
وهم بعد الغداء ...ونسمع باقر يغني
بس هلمره أغنية حلوه ... ومحمد يغني وياه
وعلاوي ....مطرب وياهم ...يطك أصبعتين ويصفك
ويحلفهم يعيدون الاغنية
وانــآام الليل وافز والگاني محبوبك 💜
بعد ميفيد ... ليش اذكرلک الزينــات
اذا گمت اعشگ عيوبك
اڪَول محولل وموهوب مِــ̯͡ـوٌ بس هــﺂاي
يمكن بــاآچر من نموت
اشيّل ذنوبي واذنوبڪ ......
والولد يصفكون ... ويطكون أصبع ويه الأغنيه
وما إعرف منو كام يهلهل ..
وجان يحصل رزالة من ألسيد
عيب بعتبار بعدهم بيت ألسيد حزانه على العجوز وحياة .
وماخلص البناء ...
الحسبوا حسابهم وخططوا اله أسبوع كافي
الا متعدي الشهر ... وفوكاه كم يوم
بس شنو غدينه جنايز من التعب ...والركضة
وخدمة العمال ... بين الريوك ...والغدة ...والعجين والخبز .
وألسيد...ومحمد...خوش أنحصروا حصرة من هاي المعدلة ..حصرة الجلب بالجامع ....
هيج علاوي يكول ....وشلوا ...ولا فلس عدهم
اداينوا مرتين من عمامهم .
بس والله بالأخير .... ألبيت صاير يخبل ...طلع جديد بالباكيت ...
خلي اوصفة الكم ...
باب الشارع صارت بوسط حايط الشارع ...
يعني شالوها من مكانها القديم وثبتوها هنا ،،
الواحد أول مايفوت للبيت ... على أيده اليسره
المطبخ كلش مرتب ... ومكانه واسع ...
وبصفة الحمام والتواليت ...
وكدامهن الحوش...أهم شي صبوا الكاع ...يعني بعد ماكو تراب ...وبيوم الصبوا الكاع رحنة بتنه بليل بيت عمهم ساجت ...لان بعد ما نكدر نتحرك
علاوي كال//ألبسن عبيجن حتى أخذجن ألبيت
عمي ساجت..حتى لا تنحصرن حصرة الجلب بالجامع بليل ..وثاني يوم الضحى يلا رجعنه للبيت
والتنور بقى بمكانه ... واهم شي فئ التوثة موجود
وعلى أليمنى بالواجهيه باب الهول الجديد
والشباك الواسع ...تقريباً صار على كد الحايط
علمود الضوة ...
والغرف صارن أكثر ....
الهول القديم ... صار غرفة لمحمد المصروع
والمطبخ القديم ... صار غرفة للولد
والغرفة مالتنه أني ونور ... بقت على حالتها
وغرفة كميله ... هم بقت على حالها ...
بس كل الغرف سولهن شبابيك على البره
يعني من الظهر الغرف علمود الضوة...لان جان شببابيكهن داخل الحوش ... وهسة صار هول
وهنا بدة التعزيل والترتيب ...وهذاك التعب اليغبش ...
وأكيد الصخلة البرية ...أزهيران ...أم الكمل ...الوسخة
متحزمة وتكرف.
غرفة كميله ... نصبنه بيها غرفة الأخشاب
الجانت موجوده بيت نور مال أقبال وأبتهال
وغرفة محمد...خلينه بيها القريولة والمحمل الخشب
وميز التلفزيون مال غرفة نور .
وغرفة الولد ... خلينه بيها قريولتين
وحده ... جانت مال عجوز الله يرحمها ...
وحدة ...جابوها لمحمد من تمرض وبقت ..بيت عمهم ماأخذوها ...وبوفية الفراش
والهول ...خلينه بي القنفات مال بيت نور
والمعرض الخشب الجبير ...والطبلات
وتلفزيون بيت نور ...
وغرفتنه ...خلينه بيها ثلاجة غرفة نور
والكنتور مالتها ... وكومدي خشب جبير
وعلية تلفزيون القديم مال بيت ألسيد
وغراض المطبخ مال بيت نور ...خلوهن كلهن بالمطبخ الجديد ...وغراض كميلة تعبانات ...باعتهن للدوار
هن سنك ...وطباخ بقت بس الكاونتر مالتهم
ويه كاونتر بيت نور .
والحمام ...همزين الله صاح براسهم وشويه أتثقفوا
خلوا دوش ...وحنفيات حار وبارد
بعد ماكو سبح بالطشت الخايس
وخلوا بي الغسالة مال أهل نور بعدها جديدة
والسخانات ... خلوا واحد للمطبخ
والثاني ..للحمام والتواليت
وشدوا بيناتهن يعني بهاي المسافة
مغسلة ....وتعلاكة للخاوليات ...
بس بقوا المرايه المنغمشه ما غيروها
ومحمد المصروع ...غلف كل سكف ألبيت من جوة
بنايلون ملون...صار شكلة كلش حلو ومرتب
وبعد ما ينحت علينه تراب .
وكل البيت...فرشنه كاعة فراش عربي صاير يخبل..
وكميله كابلت أم سهاد وكعدت يمها
سوتلها ديوان مال عرب خلته بالهول
يعني نص جهه ترتب بي قنفات
ونص جهه ديوان ...
ألبيت بعد البناء والتعب ...صار كلش مرتب
وأحلى ...وأحدث ...وهمزين الله هداهم ولبخوا...وصبغوا الحياطين من جديد
صار يفتح النفس على الشغل بي والتنظيف
والتعزيل والترتيب .
أنوب ألسيد حار بسالفة بيع بيت نور
راح هو بنفسة البغداد ... وأخذ نور وياه
علمود يسولفون ويه الرجال فوزي
ويشوفون شلون يدبرون سالفة البيع
وأستمرت سالفة بيع بيت نور ...يمكن بالأربعة أشهر
وألسيد أنشلع كلبه هو ونور ...
ويركض وياهم عمهم ساجت ...وعصام ،
ماقبلوا محمد يروح بعد البغداد
وبالذات السالفة صار بيها شهود من ألجيران
يثبتون أختفاء سعدي من مدة طويلة
وشهادة مختار المنطقة ...
وتأكيد من مراكز الشرطة عن أختفاءه
وبعدين سالفة قتل أقبال ... وأبتهال
والركض بين مراكز الشرطة ... واعترافات الولد بقتلهن
وسالفة قتلهن غسل عار ...
يلا طلعولهن شهادة وفاة من خلال تواريخ تسجيل بيانات مركز الشرطة .
وإلا طلعوا لأقبال وأبتهال .. شهادات وفاة
وسعدي سجلوا بسجلات الدولة ...من المفقودين
وتاكدوا من صحة صدور شهادات وفاة أبو سعدي
وأمهم عواطف...يلا فتحوا بيان ملكية للرجال فوزي
و ودي البيان ... وأفتح سجل الملكية ...
وجيب القسام الشرعي ...وجيب الشهود ...
يلا أتنازلن نور ...وكميله ... وأنتصار ...عن البيت
للرجال فوزي وسلمهم فلوس البيع ...بعد ما دفع كل طرف ... رسم البيع والشراء والضريبة .
أنتصار ما قبلت تاخذ ورث ...
كالت//محيسن الطرد أختي بيوم أسود
وخلاها حايره بزمانها...يحرم عليه يلزم بفلس واحد من تعب أبويه وچده ويتهنى بي ...
عاد تنازلت بحصتها النور
كالتلها // خليها الفلوس ألج سند ...خاف ما تزوجين وتبقين كاعده بيت ألسيد ...سويلج بيهن مشروع يفيدج للزمن .
بس كميله أخذت حصتها من ورث أبوها
كالت// اني رجلي زين وياي...وبركبة كوم لحم
والعيشة صعبة...هو يركض من الصبح لليل
على عيشتهم...أشتريله سياره...لو أفتحله بيهن مشروع ...أساعدنه على هذا الزمن الأغبر
بحيث من تقسمت فلوس الورث بيت ألسيد
كل عمامهم ... وأولادهم حضروا
وبشهادتهم ... إنتصار أتنازلت عن حصتها النور
وأنطوا حصة كميلة ...
وكميله ...وهم بعدهم على كعدتهم
رجعت فلوس دين نور ...
ودين عمام ألسيد ...من فلوس ورثها
والباقي كامت ضمته بغرفتها .
ألسيد كدام الكل دنك وباس راسها
وكال // أصلية وبت خير ...هاي تربات أبو سعدي
بنهاية السنة ...الجو باررررد ...وناس تنام من وكت
شوو علاوي ...وباقر ...وسجاد ...هو يصير الليل
وهم يطلعون من ألبيت ...ما يرجعون للساعة ب ١٠ أكثر ....
يومين...ثلاثة...ومحمد المصروع أدروش عليهم
طبكلهم صوندة ...وحصرهم المغرب بغرفتهم ...
كاللهم// هسة تكولولي وين ترحون بليل ..وترجعون متأخرين ...
الى اللقاء في الحلقة القادمة
××××××××××××××××××