#حصاد-ألمواسم
👇
#فراقد
👇
#ألحلقة(( ١٨ ))
÷÷÷÷÷÷÷÷÷÷÷÷÷÷÷÷÷
نخفِي حُزناً ووَجعاً وَدُموعاً أحيَاناً..
خَلفَ عبارة (أنَا بخَير) ..
تباً لعزة النفس ..
وسحقاً لواقع لا يوجد به احتواء صادق
××××××××××××××××××××××××××
وبيوم كاعدين أني ونور تقريني بفي الشجرة
ويدخل علاوي طاير من بره وصاح // يمهههههه
الحكي بيت عمي عزام أنهجم ...
كميله طلعت من الحمام تركض ... جانت تغسل ملابس
والعجوز طلعت من الغرفة ...
وكلهن على فد صوت كالن// شبيهم بيت عزام ...؟؟
علاوي كاللهن // أجاهم جندي مرسال
وجايبلهم ورقة مكتوب بيها ناهض ميت ....
ويردون منهم فلوس الطلقات ....
وممنوع يسون فاتحة ....
والوادم أنكلبت عليهم .
خطية العجوز تخربطت وكعت بالكاع
ركضت عليها نور .... وكميلة
وكامن يصيحن عليه // أركضي جيبي مي
رحت ركض للمطبخ ....
وجبت مي من البوري...بنجانه صغيره فافون
كميله تجمع بيها أستكاين الجاي.
وأنطيتها الكميلة رشت المي على وجه العجوز
وتفرك بكلبها..
خطية العجوز ... كلساع واكعه ومتخربطة
تخاف يجبون خبر موت محمد .
وكميلة صاحت على علاوي // ولك الأغم شبيك جمدت ... اركض صيح ابوك جديتك موش زينه
كميلة ... ونور نهضن العجوز من الكاع
واني وياهن لزمت أيدها ...
وديناها للقريوله ومددناها .....
وكميلة رفعت رجليها ...وخلت جواهن مخاد
وكالت لنور // بعد أخيتج خبطيلي كلاص لبن مالح
بسرعة
والعجوز بس تبجي ....وخطية صوتها أنبح ... وترجف
كامت تنعي وتكول // يمه محمد كالو ما تجي
وكالو عليك بعيد ...
ودرب كلش طويل البينك وبيني
شح مني الدمع كد ما بجيت أعليك
وأعاتب بالكمر هلبت يواسيني
كميلة بجن تكلها // عمه كولي يالله
لا تفاولين على الولد ... ان شاء الله يرد سالم
وتتتكحل عيونج بشوفتة
وهي كالتلها// كعديني يمه أختنكت ...
كعدتها كميله على حيلها ...
وهي شمرت شيلتها على وجهه ...وكامت تنعي تكول//
تعال يمه محمد ... لخاطر الله وخليني ارتاح
من زمان ما شافتك عيني ...
ولك يمه محمد ... هم تشتاقلي بالغربه مرات
لو ناسي الذي بينك وبيني ...
يمه لو تدري الدمع ما فارگ العين
ولا كلبي بغيابك مل ونيني
مشتاقتلگ يمههههه محمد ...
وعلي مشتاقتلگ هم تحس بيه وتسمع ونيني ...
كميلة ردت عليها تنعي وتكلها //
ولك يمه عطأ قلبي محتام على البجي
وهاي الأرض ما توسع حنيني
يا همي وعذابي وحركت الروح
كضيت ويا الحزن أجمل سنيني
هم عود إني أشوفك وأكعد وياك
وك أبوس تراب جدمك منتجيني
نور أجتي وبيدها دولكة لبن
وكالت لكميلة// اقري الفاتحة للمرحوم
وكومي غسلي وجهج ...حتى نمشي لبيت عمي عزام
وانتي عمه كولي يالله ...
ولا تنعين وتفاولين على محمد .... مو زين
ادعيلة يرجع بسلامةً .
شوية ودخل السيد .. يرجف وخايف على العجوز
ومن باب الهول يكلها // يمه تراني أباوع الرحمة الله وعيونج ...لا تقهرين بروحج ... وتذبحيني وياج
وحك علي ابو الحسن .... ماادري شلون أجيت امشي من اجاني عليوي وكالي جديتي تخربطت
هي رجعت تبجي وتكلة // يمة فاضل كلبي ماكلني
على أخيك .... وين أنطي وجهي وين أروح
وصاحت // ولكم يالعرب مابيكم رحمة ومحنه
اريد وليدي .... طك كلبي على شوفته
مابيكم واحد خير يجبلي خبر عنه
ويكلي عدل ويشم الهوى ويسلني
لو يكلي تراه مات واكطعي الظنه من جيته ويواسيني
ولك يمة فاضل ...نار الفراك تاكل بروحي على أخيك
ولك يمة شلون بيه دبرني انشلش حالي
السيد دمعت عيونه وكاللها // يمة الله اليحسن التدبير
كولي يالله ...وان شاء الله يرد محمد للبيت سالم
مثل مارد يوسف لحظن يعقوب
نور جابت مي للسيد ... شرب الدولكة وهو واكف
وكال لكميلة والنور // لبسجن عبيجن
خل نمشي لبيت عمي عزام
خبر ناهض كسر ظهري قبل لا يكسر ظهر عمي
انوب باوع على العجوز وكاللها // يمة بيج حيل تمشين ويانه ... لو تبقين بالبيت ... وتبقى وحدة من البنات يمج .
العجوز ردت علية // لا يمة امشي وياكم لبيت عمك
عزاهم عزاية ... ومصابهم مصابي
هو السيد جاوبها // يمة أعاينج مالج خلك ...
خليها باجر أوديج ..
ردت علية العجوز وهي تعدل لفة شيلتها //
لا يمة أمشي وياكم .. عيب ما أحضر يمهم وأواسيهم تريد الوادم تاكل وجهي
بعدين فتحت شيلتها وكالت// والله ثال راسي
يمة كميلة ناوشيني عصابتي ... وشيلتي الزينه
وطلعيلي عباتي الجديده وياج
كميلة تحوس شلون المصرع ،
حضرت ملابس العجوز ...
انوب بدلت لحمودي ... وأنوب بدلت العون
وهي ركضت بدلت ملابسها ...
وجابت بيدها دشداشه للسيد .
نور مابدلت ... هي أصلا لابسة دشداشة سوده
ويه العجوز ... وكميلة
من يوم توفى عطأ لبسن عليه أسود
لبست بس عبايتها ... وشالت حمودي
اني لابسة دشداشة .. واتك بطولها
أنذبح من الحر ..بس كميلة متقبل إلا ألبس
تكلي // عيب ثوبج يلالي ...
ونور كالتلي// أمشى لبسي ربطتج ..
رحت طلعت الربطة من خانة البوفية ...وخليتها على راسي ... ولفيتها على ركبتي وشديتها من وره ..
تقدمت عليه نور ... وهي شايلة حمودي
عدلتها اليه من الجوانب
السيد ... وكميلة كايدين العجوز ويتجولها
ويمشون وياها .... حتى مابيها حيل تمشي
بس تكول // عيب لازم أروح
طلعنه من البيت والسيد كال لعلاوي//
عينك على البيت لا تروح بعيد
طلعنه مشي نروح لبيت عمهم عزام
مسافة مو هوايه بعيده ... تقريبا أربع شوارع
والكاع كلها تراب ....
والبيوت مبنيه بطين ... وصغار ... وقديمة
واغليبة بوب البيوت طلاگة وحدة
تقربنه على بيت عمهم عزام ...
واشوف الرياجيل تارسين الشارع
كلهم لابسين دشاديش وعكل
وناس تشرب جگاير ....وناس لا شايلين سبح ويسبحون
وباسم ... وجاسم صياحهم يهز حيطان البيوت
باسم يصيح// ياخويه ياناهض الجايب علمك جذبانه
وجاسم يصيح// هسه أنكسر أظهري يا خوية يا ناهض
الرياجيل من شافوا السيد وكميلة ...ساندين العجوز وجاين على بيت عزام
كاموا يصيحون // سوا طريق للحجية ...سوا طريق شباب وخروا عن الباب خل ألحجية تفوت
السيد عاف العجوز بالباب ...
وأحنه كلنه دخلنه لبيت عزام أهل ناهض نعزيهم
والعجوز وكميلة ونور من الباب عاطن// يبوووو
صخام وعزه ... يبوووووو
كميلة هي دخلت تلاجي مرت ناهض ... وأمه
لان العجوز مابيها حيل تعيط
وهي كالت (( رأس المشد )) وهوست
((سبع أدول على ناهض مگدرين ))
كامت بوجها أخوات ناهض ومرته
يعني( أمهات العزه) ...لان هي التلاجي وتهوس
وتلطم على صدرها .... وزنودها ..
وهن نسوان العزه هم يلطمن وياها
نور نزلت حمودي بالكاع ... وأني شلته
وتلاجت وياه النسوان وهوست //
((حطوو بالنجف دلال .. طب راعي العزوبية )))
أخت ناهض جاوبت نور ... وكميلة
وهن سون دائره ... وكلهن يلطمن على زنودهن
(( ناهض ليش ؟ مودينة للكبور ))
وكامن يعيطن // يبوووو ...بصوت عالي
ويصيحن // عززززه .... ويلطمن بقوه
أم ناهض هي كاعده وتلطم على صدرها
وصامة جف ايدها ... وادك على صدرها بقوة
وشاگة ثوبها وتصيح // يالشالع طبكة من ضلوعي
العجوز مابيها حيل توكف...
كعدت كدامها وهم كامت تلطم وتكلها
(( يا خيه أبنج شالع عيني ))
أكو مرأه ضخمة وبيضة ... كاعدة بصف أم ناهض
وبحنجها دكه خضره ....
وعلى جف ايدها هم مسويه زخرفه خضره
بدت تنعي ...وصوتها حلو من تنعي ....
من سمعنها البنات كعدن كدام ام ناهض بشكل دائره
ويلطمن ويبجن على نعيها
تكول بالنعي وتبجي ومخلية الشيلة على حلكها //
ييمه شلـــــون رحت ووين ضـــــليت
ربعــــــك كلها ردت ونته مــــــــــا جيت
أتانيــــــــــك بغيابك كارهـــــا البيت
وبسمك حيل اصيح بصــــــــــوت مجنون
كميلة ردت عليها وتبجي بصوت عالي
ييمه ارجـــــــــــوج فدوه وكافي الدموع
ولا تبجين يمـــــــــه بصــــــــــــوت مسموع
يمـــــــه اعله الكبر شعليلي اشمـــــــوع
ولا تهلين يمه دمــــــــــوع العيــــــــــــون
جاوبتها العجوز وتصيح // يمة محمد
ربيتك ييمه وصــــــارلـــــــــــــــي سنين
اتاني بيــــــــوم اشــــــــــوفك تملي العين
وحــــــــني بيوم جيتك كل الايدين
جبتلك حنه يمه تعـــــــــــــــــوفني شلون
جاوبتها أم ناهض وتصيح// يمة ناهض من عمت عيني عليك ...
ييمه الحنــــــــــــــه ثــــــــــوبيها لشبابي
وعـــــذريني يمه ارجــــــوج مجبور بغيابي
اعــــــــــــوفــــج يمه ما جان بحسابي
بس الـــــــــــــــــزمن قاسي وبجه الجفون
ردت عليها المراه السمينه ألبيضة ام الدك تكلها//
ييمه انته حياتي وعمري وعضــــــاي
عفتني شلـــــــــــــــــون بيه تشمت اعداي
اون عليك اضلن طــــــــــول دنياي
وخــــــــــــــلي عيوني من النوح يدمون
العجوز ترد عليها وتكول // يمة محمد اعرفنك حنين
وتكلي دمعاتج ييمه افديها بالــــــــــــــــروح
تركتج كلبي يمه اعليج مجــــــــــــــــــروح
وحس عيوني تبجي ودمعتي تنــوح
وغضب دمعاتي يمه تفيض الكــــــــــون
وام ناهض تجاوبها // خية هندية الله يعين كلبج وگلبي
وعاطت // يمة ناهض
كلبي بغيبتك يمه نشـــــــــــــــــدني
ياهو الغسلك يوليــــــــــــــــــــدي يبني
غم الموت يمه الخـــــــــــــــــذك مني
وودعك يمه كمت ويه اليـــــــودعون
كميلة ترد عليهن تكلهن // ما سمعتن عطأ من كالي
الله وياج يمه مسافر ابعيـــــــــد
ولا تنسيني يمه لــــــــــــــــــو يجي العيد
تعاليلي ارد اشوفج ضايج وحيد
وباوع عالــــــــــــــــدرب بلكت تمرون
وأم ناهض عاطت// عمت عيني ولك يمه ناهض
تباوع عالــدرب بلكت نمر ليش
انه بليـــــــــــــــــاك يمه بعد ما عيش
هجرك عاصفه وروحي صفت ريش
وشفت روحك تعزي ويه اليعزون
والنسوان الباقيات كامن يصيحن على المراه السمينه
// كافي بسج ...يبستي قلوبهن
الله يعينهن على مصابهن .
نور بوست أم ناهض ... وزوجته ... وخواته
وكامت ويه البنات بالمطبخ ،
أني كل هاي الاحداث الصارت ...
بقيت واكفه باب الهول ... وبصفي واكف عون
طك من البجي خايف ... وشايله حمودي
شمرته نور وراحت تلطم وياهن
من نور راحت للمطبخ ... رحت امشي وراها
بس بالبداية خليت حمودي بحظن كميلة
وهي جاوبتني وصوتها مبحوح من اللطم والبجي
// اخذي عون وياج وخلي يم نور
رحت للمطبخ ... بي بنات بكصت نور
وشويه أكبر من نور ...وأصغر منها
هي سلمت عليهن كلهن
واني هم أمشي ... واسلم عليهن وره نور
اكو بيهن عرفني ... لان شايفاتني قبل
واكو بيهن لا ماعرفني
وهن النسوان نص بنات عم السيد وعماته
ونص خوات مرت ناهض ... وبنات الجيران
الرياجيل ... فرغوا الهول والطرمة
مبلغهم المراسل الجندي ... ممنوع يسون فاتحة
ميكدرون ينصبون جادر بالشارع ...
عاد كعدوا الرياجيل جوة
والنسوان الغريبات صارت كعدتهن بالغرفة الجوة والحَولي .... والقريبات كعدن بالمطبخ
راح عمهم ساجت واولادة ..يجبون ناهض من المعتقل
بس هم من خوفهم...أخذوا السيد وياهم...وأبوه عزام
وماخذينه من المعتقل ...وطالعين بوجهم لمنطقة النجف دافنينه ...ولا جابوه للبيت ...
ورجعوا بليل
السيد أجى طاك من البجي ...
وأسمعة يحجي ويه كميلة
شافته باب الهول تسلم عليه ..وتكلة // عمتي ظل بالها يمك ... الا سألنه عليك ..كالوا راح جناز ويه المرحوم
هو يكلها // كميلة بالظنه يرجع محمد ...
ناهض رامينه تسع طلقات ...
وعادمين وياه هواية شباب من اهل كربلة والبصره والنجف
هي بقت تتلفت وتكله // أستر علينه الله يستر عليك
لا تسمع عمتي وطيح علينه .. كلشي لا تسولفلها
تراها أمدده ونايمة ...ومالها خلك تشيل ثوبها الساترها
أندارت عليه وتفاجأت بيه...وأكفه بصفها وشايلة حمودي ... كالت // هديل ممنوع تسولفين شي لعمتي
عن السمعتي ...ترى والله تموت وخطيتها بركبتج
كتلها// هو اني كلشي مافتهمت
هو محمد وينه ؟؟
السيد كال // بويه فوتي جوة لا توكفين بالباب
الشباب منا لا تجيج سالفة
دخلت جوة ورحت كعدت يم نور
كلهن البنات كاعدات بالمطبخ ،
اكو بنات كل أثنين .. ثلاثه كاعدات سويه ويبشبشن
ويستحن ... بس يبتسمن وحده تكرص الثانيه
ويكولن // عيب أحشمن حرمة المرحوم واهلة
بقينه نروح ... ونرجع ثلاث ايام ...
لبيت أهل المرحوم ناهض ... وهو بيت عمهم عزام
والله شوفة عمهم تكسر الخاطر
وخوانه ملثمين ... وهم الكاعدين بداية الهول
ويه السيد ... وعمهم ساجت .
والعجوز يوم عن يوم صحتها بالنازل
وصارت عدها صخونه ... وأسهال ... وبس تزوع
السيد وكميلة اخذوها للطبيب كاللهم // هاي اعراض مال كوليرا ... لان الجو حار ... والمي ملوث
لازم تعقمونه ... تفورون المي وتخلون بي حبايه أسبرين
وتعزلون مواعين ألعجوز التاكل بيهن ...عن مواعين العايلة ... حتى لا تعدي باقي افراد الأسره
كميلة كامت تملي جدر جبير مال فافون مي
وتفوره وتبردة ... وتخلي بي حباية أسبرين
والسيد كاللها // ألثلج من تفرغين الدولكة
شديها بجيس نايلون .... بس تبرد المي
وهي الثلجاية من تموع بطن الجيس
طلعيها .
وعزلت مواعين للعجوز .. كلاص واستكان وصحن
وخاشوكة اكل وخاشوكة جاي وماعونين للاكل
وهي العجوز تخبلت وبقت تبجي تكلهم //
هااا تتنكسون مني .... وعزلتوا مواعيني
وهو السيد يكلها// يمة مو سمعتي بااذانج
الطبيب كال لا المرض يعدي باقي افراد العايلة
اذا انتي تقبلين الفروخ يتمرضون الا اوكلهم بنفس
خاشوكتج
هي كامت تشهك وتبجي تكله// اي يمه اعرف عظم بني ادم ثگيل ... وحملي ثگل عليك من مشى أخيك
وهو السيد صاح // باطل ياعلي
كميلة أشعل أصفاح أبن ملجم هسه ...
الا تجبين اكل للحجية وأني وياها ناكل بنفس الخاشوكة .
وصدك كميلة صبت غدة للعجوز
هو السيد ... وكميلة اكلوا وياها
وهي تكلهم // يمة من عسنكم مرتاحين الگلب والبال خاب ظني وماتركتوني
السيد جر أيدها وباسها... وباس راسها
والله اني هم جوعانه ... رحت جبت خاشوكة
وكرصت خبز .. وكعدت أكل وياهم
عدت فترة تقريباً شهر وأكثر على وفاة ناهض
بعدها ما طلعت الأربعين ،
وداخلين بشهر التاسع وجان الوكت مغرب ..
والسيد هستوه جاي من المرقد ....ودكت الباب
هو السيد طلع عليها ونسمعه يصيح // لا اله الا الله
طلعت كميلة تركض .... ولحكها علاوي
ونور ... وإني وراهم ... وانوب باقي الولد
وأشوف الجنود ...دخلوا البيت السيد ....
صندوك مال خشب خلوا بالطرمة ...
وانطوا ورقة بيد السيد ... وطلعوا
والسيد يصيح // لا إله إلا الله ... لا إله إلا الله
وكميلة كامت تلطم على متونها بكل حيلها
ونور وخرت باقر.. وسجاد.. وعون ... وحمودي
عن الصندوك وحبستهم بغرفة السيد
خطية خافوا من الصندوك
ردات تحبسني وياهم كتلها// أني أبقى ما اخاف
اباوع نفس ما علاوي يباوع
العجوز طلعت من الهول وشافت الصندوك
بنص الطرمة وعاطت // يمهههههه محمد ....
الى اللقاء في الحلقة القادمةً
———————————-