#حصاد-ألمواسم
👇
#فراقد
👇
#ألحلقة((١٢))
÷÷÷÷÷÷÷÷÷÷÷÷÷÷÷÷÷÷
دخلنه الغرفة العجوز وكعدت نور تمشطلي
ومانسمع بس صوت مراه تعيط وتصيح//
بيت هلاااال أريد وليدي منكم
يا هنددددديه من عساج محروكة كلب
ومشعوله بنار وبانزين ...
حياة طفرت من مكانها وطلعت على المراة
والعجوز كالت// لا هلا ولا مرحبا بهل صوت
صوت دلاله ...شلون عزام رابطهه عنده مااعرف
طبت المراه سمينه ... ولابسه دشداشه وعبايه
وجهه مدور ابيض ... ومن الحر صاير أحمر
وبيدها محبس جبير أزرك
كامت بوجهه نور وسلمت عليها
وتكلها // شلونج عمه !!!!
العجوز كعدت على حيلها وسلمت عليها
وتكلها // عذريني خية ماكمت بوجهج
تسمعين العافيه مالي خلك
وهي ترد عليها // أوووف ياهنديه من يوم يومج
ومن شفتج وشفتيني مالج خلك
وسلمت على العجوز
وأجت كعدت بنص الغرفة وأنتجت على الحايط
والعجوز ردت عليها تكلها // هذا حظي المايل
شسوي ... قابل بيدي ومثل باقي النسوان
...وحدتهن حصان وتصهل ...وتصول وتجول براحتها...وأنا من الأسهال...على وجهجن مي ورد ..
هل طحت وتكومت
دخلت كميله .... وأجتي تمشي بالكوه من السمن
ودنكت سلمت على المراه
وحياة دخلت وبيدها مي وأنطت الها
وتكلها // شلونج يمه ،
المراه شربت المي وتكلها // شلوني وهل ناهض اخوج
مااعرف دربه وين
أنوب باوعت على العجوز وكالتلها //
اكلج هنديه ...لشوكت أبنج الملكوف حميدان
يبطل سوادينه ويعوفنه بحالنه .....
مو هل سبانه واخذ البت بالكوه ( تقصد بتها حياة )
وأنوب كل هذا ماكفاه ...
بليل رد يحشم بناهض ....يمشي وياه يغسل عار بنات عواطف .... من عساها أشتعلت بنار جهنم
كميله ردت عليها // عمه أمي نايمه بكبرها
عليش شعليتها بنار جهنم .... هسه بيها عليها حصلتها شعله من عندج
شو هاي المراه كعدت ركبه ونص نفس الرياجيل
وتأشر بيدها وتكلها //كميلة خاتون ...
أبني لو صار عليه شي ربحي بيمن بخواتج العارات
ولج مرته ... وجهاله يتباجون عليه
وهو أنثول ... بس حشمة حميدان أفندي
لف جراويته كريعاوي وطار وراه
ردت عليها المراه العجوز أم سيد فاضل
وكالتلها // لهنا وألزمي السانج ...
محمد أبني أخو خيته ومايقبل بالعوجة
وصاحب غيره ... ونخوه
شبسرعة نسيتي سالفة بنيتج ...
موش هي تحبه ودازتله رسالة حب ...
وتزوجها .... لان مايريد جلمة صغيرة تنكال عليها
موش محمد أليسكت عن العوجة ... يا صبريه
وتعرفينه من يوم يومه دمه حامي
ومايرضى بالميله.
والمفروض تفتخرين بوليدج ... عبنه سبع
وينشد بي الظهر ... وصاحب غيره
وأنتفض ويه أخوه حتى يغسلون عارهم
موش بقى ساكت وضم راسه
فكري زين ... وعايني للسالفة زين
راح تشوفيها رفعة راس لوليدج
المراه السمينه أخرست وبعد ماحجت شي
خلت وكامت .... لفت عبايتها وطلعت
وحياة ركضت وراها
بس شنو نور ... وكميله طكن من البجي
والعجوز بقت تصبر بيهن
رجعت حياة هم تبجي وتمددت بالكاع
العجوز سألتها // خايبه هوي أنتي حبله
لو شنو سالفتج ؟؟
جاوبتها حياة //لا منين حبلة ...
أني لحكت أشوف محمد....راح يضيع من ايدي
عليه الشهريه ومالي خلك متكسره
....وتعبانه ...ونعسانه ....ومن وره ضيم محمد
العجوز كالتلها //ناميلج شويه وللغدة أندهج
كميلة كامت وكالت // أكوم أنظف الدجاجات
دازهن فاضل بيد حسيون يريدهن مشويات للغدة
نور خلصت شعري تمشيط ...وظفرتلي
وكامت وره كميله للمطبخ .
العجوز صاحت عليه وكالت // تعاي أخليلج ريحه طيبه
رحت عليها وكالتلي // دنجي جوه الجربايه
تلكين بطل صغير جيبي
.....دنكت ...واخذته... وانطيته الها.
فتحته ... وخلت شويه بيدها ...مي سائل لونه ابيض
ومسحت بي ملابسي .. وشويه على شعري
ومن يم ركبتي
هو ريحته طيبه بس اني لعبت روحي
كتلها// بيبي عووع شنو هذا العطر ..؟؟
هي ضحكت وكالت // ولج بت بغداد
هذا مسج ...وعنبر ...داكتهن ومنكعتهن بمي ورد
وتكولين عليهن عوع ...دمشي عن وجهي
وكعدي يم نوره لا تطلعين بره .
طلعت بوجهي للمطبخ
كميله مخليه طباخ صغير بالكاع...وعليه بس جدر مي
ويمها ثلاث دجاجات مذبوحات ....تريد تنظفهن
وهي كاعده بالكاع ... ونور كاعده كدامها
كعدت بصفهن ......
وهن كل وحده أخذت دجاجة وغطنها بالجدر ،
وطلعنها وكامن ينتفن بالريش
نور التفت عليه وكالت// منو خلالج هذا العطر ؟؟
كميله كالتلها// هذا عطر عمتي ريحته طيبه
ترد الروح
بقيت كاعده يمهن ....وهن خلصن تنظيف الدجاج
وكامت نور غسلتهن على المغسلة ...
واجتي شعوطتهن على النار
كميله هي كاعده أدليها على الغراض
كالتلها // جيبلي دبة الخل هناك ....وياج الملح
والبطنج بصفهن ...وعودين يابسه فلفل حار ...والكركم خل أنكعهن الحد مااكمل خبز ....حتى أشويهن
راقبتها وهي شكت بط الدجاج وطلعت احشائهن
وعزلت الكبده على جهه تكول// بعد رويحتي
هذني الباقر يموت عليهن
ونور رجعت غسلت بطنهن ...وانوب نكعن الدجاج
بالخل وباقي الغراض
كامن وراها نظفن المطبخ ....
ونور هي التشتغل متقبل تكول الكميله //شو أنتي بالكوه تتحركين ....
اني ماعندي شي .... خليني أشتغل وأنسى ضيمي
وانوب طلعت نور من المطبخ....
وراحت نظفت غرفة العجوز ....كنستها ومسحتها
وانوب دخلت على غرفة كميله هم كنستها ومسحتها
بس الطرمة كميلة كنستها بالسفعه هي واكفه ..
ورجعت رشتها بمي رشه خفيفه
اباوع على كميلة....
راحت على التنور وشالت الصينيه
وكرفت من بطنه تراب ... وتخلي بتنكه فارغة
سألتها //هاي ليش تضمين التراب ؟؟
جاوبتني // هذا رماد الحطب..انظف التنور من عنده
خبزت بي البارحة العصر ....
واخلي بالتنكة ....ياخذوا الولد للمراح مال حلال
حتى الدجاج يمرغل روحة بي علمود لا يكمل
اجتي نور وجايبه بيدها نجانة العجين
ورجعت جابت شويه طحين... وكعدت تكطع بالعجين
كتلها// نور أنتي تعرفين تخبزين بهذا التنور
شو هناك بغداد تشترين من المريه ....؟؟
كالت //لا مااعرف اخبز ...
بس اعرف أشنك .....جنت أساعد امي الله يرحمها
من تخبز .
انوب كالتلي// روحي هناك تمددي بالفي
باوعت بطرف الطرمة بالنهايه ..... من جهه التنور
شجره مال تكي بره البيت ...بس ظلها صاير على الطرمة من جوه .
فارشين بصف الحايط حصيرة مال خوص....
ومنادر أثنين ...وصاير المكان شكد حلو ...كله فئ
وبي فتحات مال شمس تدخل من خلال اوراكها
رحت وتمددت على المندر وأباوع على كل البيت
كميله طلعت من باب الشارع ....
ورجعت بيدها كوم مال حطب محزمته بحبل
وكامت تخلي بالتنور ....وخلت وياه ورگ يابس مال تكي ....وشمرت عليه شويه نفط وشعلته
يايابه النار صارت عاليه ....
أني خفت حسبت التنور أحترك ...
بس هي ماخافت وبقت واكفه بعيد...
لحد مانزلت النار ...وبدت تحرك بالحطب بطن التنور شويه وبدت تخبز ،
اني عجبني المكان .... شكد حلو كله فئ
بس الشمش تجي عليه من فتحات الورگ
والضوه يصير على اشكال مختلفه
مره أعمض هاي عيني ... ومره أغمض عيني الثانيه
وريحة الكاع ...لان رشتها كميله ...
صارت ريحتها هوايه طيبه ،
حبيت المكان وتمددت على ظهري ....وبقيت أتخيل على الشجره اكو فراشات ....وطيور ....واكو ورد جواها مزروع ... والوانه حلوه ...عيوني ثقلت وغفيت
كعدتني نور بالكوه ....
وتجر بقميصي تنزله على بطني والرب هو جبير عليه ،،
أباوع كلهم كاعدين هنا ....ومخلين الغدة
شكد خجلت السيد كاعد .... والولد كلهم ...وكميله وحتى العجوز ....واني نايمة لزك ويه الحايط
فزت... وكمت وكفت على طولي ....
ورحت اركض للحمام ...
غسلت ورجعت .... كعدت أكل وياهم ،
طابخة كميله تمن أصفر ... وشاويه الدجاج، وطماطه
وخبز حار طعمة كلش طيب مال تنور طين ،
ولبن ....
العجوز كالت //يمه كميله اعزلي غده لخيتج حياة
خطيه مالها خلك ...وبس تبجي ....
نامت وشهكتها بصدرها.
كميله كالت// باقر كوم جيبلي ماعون جبير من الكاونتر
.... طفر باقر وراح يركض
السيد قسم فخذ من الدجاجة .... وخلاه كدام نور
وقدم عليه ماعون التمن ....لان شويه بعيد عليه
اخبط لبن وتمن ... وأكل شويه دجاج من ماعون نور
من خلصنه غده ...
كميله طلعت قوري الجاي من التنور وصبت للكل ،
طعم الجاي ماادري ليش هيج طيب
ويختلف عن الجاي الاشربه يوميه...
من خلصنه العجوز كالت // يمه فاضل اريد احجي وياك
...وانت تعرف الواحد لازم يحافظ على بيته
....ومن يضبط بيته ...وأولاده... ويسيطر على عايلته
اموره بالدنيا كلها تمشي صح
هو رد عليها وكلها // اي يمه سولفي العندج
شصاير ...؟؟
كالتله // يمه الامانه ثگيله ...
وربك عرضها على جبال وماقبلتها
الا البشر لان عينه كويه... وصلفه تحمل الأمانه
وهذا وليدك عليوي ... تراه مو خوش صبي
ويجسر على أمه ....
وأيده أنمدت على الفرخة وتحرش بيها.
هو علاوي نط من مكانه وصاح // جددده والله هي جذابه
نور كالتلي// كومي طبي جوه
بس كمت السيد كالي// ابقي كاعده وسولفيلي شصار...؟؟
باوعت على نور ... ماحجت هي شي وبقت ساكته.
كميله كالت // سولفي ولا تخافين ولا تستحين
اني هم حجيت كل السالفه
وهو علاوي// يصيح بويه والله جذابه
السيد لزمة كفخ راشديات وكاله /يالمطي هاي البت أمانه بيتك ...ليش ماعندك غيره عليها
ولك هسه هي بحساب أختك ...
أكو واحد يمد ايده على أخته....؟؟؟؟؟؟
وهو من كثر الكفخات يبجي ويكول//
بويه والله بعد مااعيدها ....توبه ...غلطت سامحني
السيد عافه ....وهو أنهزم طلع بره البيت
العجوز كالتله// يمه الولد ترباتهم صعبه
لا تغفل عنهم لا يسولك طلابه.
السيد كاللها // يمه مو هل تشوفيني وياهم .. وياهم
وأمهم مامقصره وياهم هل تربي ... وهم أدلل
بس هذا عليوي ...رفجانه رفجان سوء...
اعوذ بالله من شرهم.
كام السيد وراح لغرفته ... دخل بدل ملابسه
وطلع للمرقد ،
الولد كل واحد راح بجهه
كميله ... والعجوز ...كل وحدة تمددت على جهه بالفئ
واني ونور دخلنه جوه... بقت تسولف ويايه
وتحذرني من الولد ... وممنوع واحد منهم يلزمني
وميصير ... و حرام .. وعيب ... واصغر بعين الناس
مشى الوقت بثگل ... وضوجة مااعرف ليش
هنا حياتهم تختلف عن هناك بغداد .
صار العصر ... وعطأ جاب رجال ...أجى صلح الكهرباء
كل البيت صار بي كهرباء .
وره للمغرب أجى السيد من المرقد ....دخل سبح وبدل ملابسه .... وكعدوا كلهم بالهول او غرفة العجوز
التلفزيون اكثر شي يتابعه باقر ... وسجاد
واني هم أتابع وياهم .
السيد سأل على علاوي ...
كميله كالتله // موجود ... ماشفته كاعد جوه التوثه زعلان .
راح عليه السيد ... وجابه للغرفة ويراضي بي
وهو مسوي نفسه زعلان ويكله// بويه والله بعد مااعيدها توبه .
والسيد يجاوبه يكله // عفيه اوليدي
تراها أختك صارت... لازم تحاميها ... وعينك عليها
حياة اجتي وكعدت ...
والسيد كاللها// شلونج بويه...؟؟ الحجيه تكول مالج خلك ...
جاوبته // والله خويه بالي يم محمد هوايه تأخر ..
كاللها // محمد ذيب لا تخافين عليه .
باوعت للساعة ب ٧ المغرب ....كميله خلت العشاء.
حاجيت نور بصوت ناصي كتلها // ليش ياكلون من وكت...؟؟
كالتلي// هنا الناس عرب ...ياكلون من وكت
وينامون من وكت ....ويكعدون من وكت ،
من خلص عشاهم ... أجى عليهم عمهم عزام
والمراه السمينه صبريه ....أهل حياة ،
وبقوا كاعدين ويسولفون.
والرب أم حياة فد مراه وكحه ... ومتخاف
تحجي ويه الرياجيل بصوت عالي .
تقريبا للساعة ب ٩ ... ودخل محمد
أشعت ....وسخ ...ودشداشته وسخة
وايديه ورجليه كلهن اثار مال طين
وعيونه غاديه حمره دم ...ومورمه ...
ومبين هوايه باجي
كام بوجه السيد ... وعمه عزام
هو غطى وجهه وعيونه بالحجاب المخلي على رگبته وبجى بشهكة عاليه .
كمليه صاحت //بووويه محمد شوكت تفز غيرتك على بناتك.... وتشك اللحد وتشوف حالهن
بالمبااارك يمه عواطف ... هسه نظف شرفج
ورجعت سمعتج الطيبة
نور ضمت وجهه بيدها وصاحت// بووووويه محمد
مبرررري الذمة على الصار بينه من بعد غيابك
العجوز صاحت// عفيه بوليدي السبع
عفيه بالذيب
عفية ياتعب عمري وصبر سنيني
رفعت راسي يبعد رفعة راسي وراس عشيرتي .
السيد صاح // حياااة كومي حضري الحمام الرجلج
متعاينين ذابحة التعب
كامت حياة ركض طلعت من الغرفة
سألته كميله // خويه بس كلي وين دفنتهن....؟؟
هو مسح وجهه وكال // كميله قلبي ما انطاني
أكتلهن ...وهن يتوسلن بينه نعوفهن بحالهن
..... خافن من الموت
بس جمال أبن عمي ساجت گلبه كوي هو الرماهن
اقبال ظلت ترافس ...الطلقه طاحت بلعومها من جهه
وذبحتها ...
بس أبتهال .... أشاهدت على روحها
وصوبها جمال براسها....بسرعة طاحت
تكولين سلمت أمانتها لله قبل لا أطخها الچيله ...
نور عاطت وطلعت تركض برة الغرفة
والسيد يصيح // لا اله الا الله
ربي عفوك وراضاك
الطف بحال الكل ربي
كميله ظلت تبجي بصوت عالي ...وتلطم على رجليها
والسيد كعد كدامها ... ولزم ايدها
يكلها // كولي يالله ...هسه يصعد ضغطج ويكتلج ويكتل الفرخ .
كميله تحاجي محمد تكله // محمد خويه هن نثايه ومالهن والي ... ومن ضيم الوكت ... والعوز
باعن روحهن .....لو عمامهن لاميهن ...
وگافين عليهن .....وراعيهن ...مجان وصلن لهاي الحاله
محمد خويه بوكت العيشة ... كلها طلعت ايدها
من الروازين....
وبوكت غسل العار .... كلها تشلحت على ذبحتهن
بس كلي وريح كلبي .... شمرتهن بزباله لو دفنتهن..؟؟
هو رجع بجى وكالها //وروح أبويه هلال
أخذتهن بيكم بشاره ...
وخليتهم بالبدي وغطيتهن ...وطلعت بيهن للنجف ...
دفنتهن بصف امج وأبوج
الخاطر روح أبوج ... وسمعته الطيبة...
والخاطر شباب سعدي ....
بس خلها بالج ... مااسويلهن رمز ظاهر .. بس دفنتهن بصف اهلج ...
كميله بقت تبجي .... والسيد يهدي بيها
وحياة صاحت على محمد حتى يروح يسبح
والعجوز بقت تبجي بهدوء وتسبح وتكول// استغفر الله
المراه السمينه صبربة كالت // كوم عزام ...
امشي اشوف أوليدي ....هسه الكاه هلكان من كد التعب
الحمد لله من غسلنه عار عواطف وبناتها .
هي كالت هيج ... ورجلها عزام صاح بيها صيحه
خرعها وخرعنه وياها .....
كالها // ألسااااانج لو أكصه الج ..
أنوب دفعها من جتفها .....وكالها // أمشي جدامي
.... من لا بارك الله بيج وبلسانج.
اني طلعت ادور على نور ....
لكيتها كاعدة جوه التكيه ....بصف الحايط
وتبجي بصوت عالي ....وتباوع للسماء
انوب بقيت اروح وارجع ...مره على نور
ومره على كميله .....يبجن بقهر
والعجوز تبجي وياهن...
والسيد يصبر بكميله ....
بس نور محد يمها ....اني رحت وكعدت يمها ،
طلع محمد من الحمام ...
أستغربت شو هاي حياة متستحي ....!!! داخله وياه وللحمام ....
كلت النور // حياة مو خوش بنيه ...؟؟
جانت ويه محمد بالحمام ... وهو طب يسبح .
صاحت بيه// عيبب شكو تراقبين الناس
وبعدين هو يصير رجلها ....
مثل مااني جنت اسبحج ....هي تسبح رجلها
عادي يصير المراه تسبح رجلها ....
بس رجلها افتهمتي لو لا ....؟؟؟
خفت منها ... تبجي .... وتحجي
وصاحت عليه ...وفاتحه عيونها عليه خوفتني
حركت راسي بمعنى اي
الكل نام بهذيج الليله بس هوايه مقهورين
و نور نامت وشخطة البجي والشهكة بصدرها ...
الى اللقاء في الحلقة القادمة
-----------------------------------