#حصاد-ألمواسم
👇
#فراقد
👇
#ألحلقة((٦))
÷÷÷÷÷÷÷÷÷÷÷÷÷÷÷÷÷÷
هديل // مرت أيام الاسبوع الباقية نفس النظام
التمشي عليه نور ألحبابه
بالنهار ننزل جوة وهي تنظف البيت وتطبخ الغده
والعشه،
واذا اكو باقي البنات هن هم يطبخن
ويساعدنها بالتنظيف
اني أراقب الكل ....
واحفظ كل الحجي والحركات
هن صارن اليه أمهات وأخوات
هوايه حبابات ويحبني وما يضوجن من عندي
وكله يكولن عليه الحلوه لو اللعابه
ولا وحده بيهن ضربتني لو طردتني
لو كالتلي المريضة لو المسلوله
لحد مايوم الصبح ونور كالت لاقبال //
اليوم ثلاثاء أروح أجيب الجرايد ،
واشوف خبر اعلان عن هدولة
خطية بلكت الله أهلها يشوفون الخبر
ويندلون عنوانه ويجون ياخذونها
طلعت نور مااعرف وين راحت
واني رغم ماصغيرة بس خلال هاي الايام المرت
عرفت نور تحبني وهوايه دارتني
وتخاف عليه نفس أمي شهلاء
يعني بيبي عشتار ... وعمة راغوث ....وأديل
من أمي شهلاء أخذها عموها كامل ...وأبويه بالصندوك
ما أهتمن بيه هيج خلال الفتره البقيت يمهن...
نفس هسه ما مهتمه بيه نور الحبابه
نور الحبابه غريبه عليه ومااعرفها
وهوايه تحبني ... هي والبنات ... وأقبال وأبتهال
صح جنت صغيرة بس أعرف الفرق بالمعاملة
من خلال الأهتمام... والحنية... والعطف ...والمدارات
من طلعت نور كمت أبجي ...
وكعدت على القنفة وحدي
مااريد اروح لبيت أبوية شامل
وهم ترجع تصيح عليه عمة راغوث وتضربني
شافتني أقبال أبجي جانت بالمطبخ تسوي جاي
أجتي وشالتني بحظنها وكفت وية طولها
واني واكفه على القنفه وحظنتي ،
كالتلي // ليش الحلوه تبجي منو ضوجج
كتلها // عمة كولي لنور ألحبابة تبقيني يمها
مااريد اروح لبيت أبوية شامل عمة راغوث
تضربني
هي ضحكت وكالت// من عابتلها أنوب علينه
البرغوث ،لا تبجين ومن تجي نور أحجي وياها
باوعت بوجهي وكالت // شدكولين لو هسه
اطببج للحمام واَجلفج جلفة حلوه
صارلج يومين من غسلتلج نور
حركت راسي يعني اي
وهي ضحكت بوجهي ومسحت دموعي
صعدت فوك جابتلي ملابس ونزلت
دخلتني للحمام ألجوة ،
وشكد حلوه سبحتني بمي دافي
وتغنيلي أغاني حلوه مال جهال
وتجلفني على كيفها ....
نشفتني ولبستني ملابسي
وطلعتني كعدتني بالمطبخ وريكتني وياها
اجتي أبتهال هم أتريكت
أقبال كالتلها // عود من تخلصين ريوكج مشطي لهدوله
سويلها ضفاير حلوه
هي أبتهال من خلصت اكلها وغسلت ايدها
اخذتني وكعدتني بالهول ومشطت شعري سوتلي ظفاير ،
وشاورتني // اخليج حمره حتى تصيرين حلوه
حركت راسي يعني اي
هي كامت جابت مكياج وأجتي مكيجتني
وهي تمكيج بيه دخلت نور
وجان تكول // يمة بسم الله الرحمن الرحيم
هاي أنس لو جن ،
أرجوج أبتهال ممنوع تعلمين الطفلة على هاي سوالف
إذا تردين خليلها بس حمره خفيفه
بس لا تمكيجين وجهه
هي أبتهال ردت عليها وتخط بعيوني بقلم أسود //
صدقة لله شوفيها شلون صارت حلوه
المصيوبه بيضة وشهبه يلوكلها المكياج
هسه ما كتيلي شخبار الجرايد ؟؟
جاوبتها نور وهي تشمر جاكيتها وجنطتها الصغيره
على القنفه
وكعدت تقلب بااوراق جبيره بيدها //
النقيب صدق بوعدة وهاي الاعلانات
بثلاث جرايد رئيسيه بغداد
كالتلها // إقبال وهي جاية من المطبخ
وين رحتي شو أتاخرتي ،
ياجرايد هاي التجيبيها ؟؟
جاوبتها نور // مريت على أم هيثم أنطيتها المقسوم وأجيت ،خطية تشهك وتندعي
لامي ولابوية بالرحمة
ردت إقبال وهي تكعد على القنفة وتاخذ الورق من ايدها // الله يرحمهم ويغفر الهم كل ذنب
وبدت تباوع بيهن ،
كالت // والله خوش اعلان هديل خاتون مسويلج النقيب
من كملتني أبتهال مكياج ...
نور أخذتني من أيدي على المغسلة الموجودة بالمربع وغسلت وجهي .....
وأني كمت أبجي مااريد أغسل ...
هي فتحت عيونها عيلة تخوفني
إقبال صاحت عليها // ولج ليش خليتي عقلج
ويه الطفلة دعوفيها مكيفة بالمكياج
جاوبتها نور وهي تمسح وجهي بالخاولي //
لا مااريدها تتعلم على هاي السوالف
هاي أمانه عندي لازم أصونها واحافظ عليها
ومشى اليوم نفس كل يوم
والمغرب ناخذ عشانة ويانه فوك للغرفة
ونور أدخلني للحمام يلا تقفل الباب
وكامت تخلي وره الباب سطلة صغيرة ودولكة مي
خاف أحتاجها بليل
ومر الوقت ،وتعدت الايام ،
ونور اخذتني وراحت لبيت الشرطة على سيادة النقيب ،
وكالتله // أمانه الله هاي الطفلة كدامك
واسألها مهتمة بيها ومداريتها ،
ولحد هسة محد سأل عليها من أهلها
هو جاوبها // عفية عفية بنور محمد بنت أبو سعدي
اعرفج بنت ابوج وخوش تصونين الامانة
واعرف سمعتكم ذهب ،،،
بس العوز والجوع ظالم موو ؟؟؟
لو أني غلطان !!!!
هي دنكت راسها وبجت
كالتله // سيدي والله اني كاعدة خدامة بهذا البيت
ماعندي غير مكان اروحلة
هو كاللها// بدون بجي
وخليها بالج شوكت مايعجبني أطلع عليج لجنة كشف تشوف احوال الطفلة
مااكدر اخذها منج وأدزها الدور الايتام
لان ألعقيد همام موصي عليج شخصياً !!!!
هي شالت راسها وباوعت بوجه سيادة النقيب
وكالتله// سيدي فدوة أروحلك منو سيادة العقيد همام
هو ضحك وكاللها // رجل معجب بالمقاومة النسوية الشريفة.....المتواجدة بوسط بيئة منحطة وقذرة ،
اتفضلي اخذي راحتج وشرفي هنا
نهاية الشهر القادم
هي كادتني من أيدي وتشكرت من عندة
وطلعنه من بيت الشرطة ،....
ورجعنة لبيت نور الحبابة .
ومرت الوقت وراحت الايام وأجى الحر ،
وماكو وأحد من بيت أبوية شامل سأل عليه
أني ونور بالنهار ننزل جوة
هي نفس شغلها تنظف وتسوي اكل ،
واني اباوع على البنات
واتعلم الحجي والحركات من عدهن
وهن كلهن يحبني وهوايه حبابات
وبليل نور بعد ماأدخلني للتواليت
وبعدين تسبحنى لان هوايه حاره
وندخل للغرفة نقفل الباب ونرجع وراها الثلاجة
ونتعشى ،،
وبعدها نكعد الليل كلة لحد ما أنعس
أتعلمني أكتب وأقره ،،قراءة وحساب
ومشت حياتي بيت نور الحبابة ،،
وبيوم بغداد كبت بيها أخبار عجيبة ،
وناس فرحانه
ويطلع الريس بالتلفزيون ويلقي خطاب
صادف ٨/٨/١٩٨٨ يوم ألنصر العظيم
توقف الحرب العراقية ألايرانية
الناس فرحانين ومكيفين .... ونور تبجي
أسالها شبيج ؟؟
تكلي // أبجي على الشباب الشهداء
الراحوا ضحية هاي الحرب
ومن ٨ سنوات بدت ألحرب سحكت شباب العراق سحك ،
علمود يحمون النسوان والجهال من الذل والاهانه
الله يرحمهم ويسكنهم فسيح جناته
،ويشفى الجرحى
وبقت حفلة العيد ميلاد بيت أقبال أكثر من أسبوع
جانت حفلة مختلفة عن كل يوم....
لان نسمع صوت هوايه رياجيل وضحك نسوان
وصوت اغاني وطنية ...وتصفيك وصفير ....
يعني اني ونور منكدر أنام من الصوت العالي
ومشت الايام ... ومرت ألاشهر ....وألسنين
ومرت على تواجدي بيت نور الحبابة ثلاث سنوات
من سنة (٨٧) الضعت بيها بداية شتاها
وسنة (٨٨) سنة أفرح لان توقفت الحرب
وسنة (٨٩) سنة هدنه وأستقرار بحياة العراقيين
بس بيوم ٤/٥/٨٩صادف يمكن يوم خميس
العراق كله ،
الناس ... والجيش ... وكل الحكومة عامة
وعائلة بيت (ألطلفاح ) خاصة
أنفجعوا بموت عدنان خير الله طلفاح وزير الدفاع
وكعت بي الطيارة بالجبال وأنتقل الى جوار الرب
والناس والدوائر الحكومية لزموا علية حداد
واتذكر ينقلون بالتلفزيون شلون الناس بالشارع يبجون علية .
نور تكول علية // الله يرحمه رجال خير أحسن من ألباقين
وبقيت بيت نور ألحبابة لحد بداية سنة (٩٠)
والصار بهاي السنة ماانسى
وتبقى ذكرياته ويايه للگبر ......
ولحد بداية هاي السنه محد سأل علية من أهلي
ولا احد مر عليه .... ولا احد اجى وشافني
وهنا صار عمري عشرة سنوات ....
رغم ما جانت نور الحبابة كل شهر تاخذني
لمركز الشرطة ،وصار سيادة النقيب ،
سيادة الرائد .....
وكال النور // بعد لا تجين للمركز
الظاهر اهلها ميردوها ....
لان على مدار السنوات المضت
نعيد بنشر فقدانها بالجرايد وماكو فايدة .
خلال هاي الثلاث سنوات
نور علمتني القراية والكتابة بالبيت
كمت أعرف اقرة قراءة وحساب
وتعلمت من البنات كلشي يخص البنات
شغلات بعمري وشغلات أكبر من عمري
بس نور جانت وياية وياية ....
يعني نور خلال هاي الثلاث سنوات
ربتني على المبادئ والاخلاق
وهذا عيب ،،وهذا ميصير ،وهذا لائق ،وهذا مو حلو
يعني ماربتني على الدين والحلال والحرام
وابد ماطرقت لاختلاف دينها ... عن ديني ابد
جانت تكلي دائما // اخلاق الأنسان الزينه
هي التحدد مصيرة وتعرفة تعاليم دينه
النبي محمد أول ماعرف الاخلاق الزينه ....يلا عرف الدين ....
وسلسلة الاخلاق الحلوة ...جزء متصل بتعاليم الدين
صرت بتعليم نور وتدريسها الية من مبادئ الاخلاق
والقراية ... والكتابة ،مثل ظلها....
وين متروح تاخذني وياها متعوفني وحدي بالبيت
وبسوالف البنات الحبابات
ودلعهن ....ومياعة البنات
وترافتهن ،،
صرت أعرف سوالف يمكن أكبر من عمري بخمس سنوات
يعني أعرف شغلات .... البنات البعمري يجوز ميعرفنها ،
بس ابد ماطلعت عن شور نور
ومطيعة الها وصرت بتها
لحد مايوم كاعدين نتغدة .....
وأقبال كالت //ولج نور خطية هاي البنية تايه وماعدها اوراق ثبوتية بالدولة
ليش منسجلها بااسم أبوية ونظيفها على سجلنة ؟؟
نور كالتلها // والله خوش فكرة ،
بس صعبة وماتصير ،
والله أتمنى اليوم قبل باجر أسجلها بالمدرسة
خطية جماعتها هسه لو بالرابع لو بالخامس
ضحكت إقبال وكالتلها // المقدم أحمد مستعد
يسجل كل الدولة بااسمج بس لو تنطينة وجهه
لو العميد همام من يجي لحد ما يطلع
عيونة شابحة فوك على الدرج يتمنى يلمح
خيالج
نور ضاجت من كلامها وكالتلها // أووو رجعنه
لنفس الموضوع الخايس ....
مو سدينه عليه الباب ....شكو يومية وفاتحات
هذا الباب الاكشر
وانوب التفت على أقبال وكالتلها // اذا صدك
تردين تسجيل هديل بااسم أبويه
وتسويلها أوراق ثبوتية احسبي هاي فزعتج ثواب
على روح الربوج وتعبوا عليج
يمكن اقل الاسبوع واقبال كالت النور //
ما ترهم سالفة صعبة ،لان امي وأبوية متوفين
لو عايشين جان بيها مجال يضفوها بنهاية
السجل
كالتلها نور // عادي نضيفها على محيسن وأنتصار ؟؟
أقبال كالتلها // خلي أشوف شلون ترهم
ولو محيسن حقنة شيقنعة
هم كم يوم وكالتلها // مايصير الا بموافقة محيسن وأنتصار .....وهم اكيد مايرضون
لان بالمستقبل تاكل ويه جهالهم بالورث
عاد نور كالتلها // سجليها بااسم أبتهال ورجلها
مو عدها عقد شيخ ؟؟ وخل تصدقة بالمحكمة
وتسجل هديل بااسمها علساس بتها من رجلها...
اقبال وأبتهال بقت وحدة تباوع بوجة الثانية
كالن // خل نصفنلها ونشوف ،
أنوب أقبال كالت // ترى الربع يعرفون
إبتهال جانت زوجة الشهيد الرفيق صالح
وكلهم يعرفون بسالفة هديل
وانوب يسولنه مشاكل ولد صالح وبناتة وشيخلصنه
يمعوده اني من هسه أكلج صعبة ومترهم
نور كالتلهن // رهمنها من يمجن
دورلها سالفة وخلن ربعجن يسولها اوراق ثبوتيه
تثبت وجودها بالدولة
يمكن شهر واجت أقبال تبشر بنور
كالتلها // المقدم أحمد رهملج السالفة
بس رادلها مراجعة وركضة
بس ماتعبين لان يكتبلج توصية من عندة
وتمشي معاملتج
لكه بسجلات النفوس ناس كبار بالعمر
واحدهم رجلة والگبر ....من أهالي زعفرانيه
هم مسيح ..... ومتزوجن من عهد الفراعنه
ولحد هسه ماعدهم جهال ،،
وماعدهم هذيج الاملاك فقط البيت الكاعدين بي بالزعفرانيه
وتقاعد الرجال جان مدرس رياضيات
وطالع تقاعد بسبب كبر عمرة
راح يسجلها باأسمهم ...
وبموافقتهم بعد
لكن شرطهم ..البيت يكون وقف للعبادة بعد مماتهم
شكد فرحت نور بالخبر وكامن البنات ايدكن ويركصن
واني أركص وياهن علمني على خطوات بسيطة للركص
من باب اللعب والوونسة
بس نور كالتلها // معقولة أحمد يسوي كل هذا التعب الوجه الله ... مااصدك
أعرفة نفسة دنيه ،شنو يريد بالمقابل ؟؟
جاوبتها أقبال // وحدة من عدنة اني لو أبتهال
نطلع وياة لبيته حفلة خاصة !!!
نور ماقبلت وكالتلها // ليش قبلتي
من شوكت تطلعن للبيوت وحفلات خاصة
الله وأعلم شيصير ميصير ...
جاوبتها أقبال // يمعودة كلشي ميصير
بس خلي يسجل البنية خطية
عود بدل الوحدة ادزلة أثنين بنات
وثاني يوم جابت أقبال توصية مكتوبة بورقة لنور
من قبل سيادة المقدم أحمد لتسهيل المعاملة
بدت تركض نور بالمعاملة ،
اخذتني أول شي كصتلي صور ،
وانوب راحنه للزعفرانيه البيت الناس هواية كبار بالعمر ،
وراحوا ويانه للنفوس وبموافقتهم
وبصموهم موظفين الدائرة
على اوراق ثبوتية حتى يضفوني على سجلهم
وانوب رجعوا نور على المستشفى تسويلي
بيان ولادة جديد ولازم بتاريخ سابق من سنة الثمانين
وجانت وين متوكف المعاملة ...
نور تبلغ إقبال وهي تتصل على المقدم أحمد
وهو بتلفون واحد من عندة تمشي باقي
الاجراءات ،
لحد ما ضافوني بسجل الرجل الخير أسمة
(مرقس ،،وزوجتة أسمها حناء)
وصار أسمي الجديد بالأوراق الثبوتيه
هديل مرقس ......بدل هديل شامل ،،
وأمي أسمها حناء ......بدل شهلاء
سولي هويه جديده بااسم هديل مرقس
وانوب ركضت نور وسوتلي شهادة الجنسية
وأخيراً ضافوني بسجلات الدولة وصرت مواطنه عراقية
وعندي أوراق ثبوتية
وهاي المعاملة والركضة طولت يمكن ثلاث أشهر
تعبت وياية نور الحبابة الرب يعوضها بكل خير
وعلى وعد أقبال لسيادة المقدم أحمد من تكمل معاملتي ...وتصير عندي اوراق ثبوتية
تروح وحدة من عدهن
وياه لبيته حفلة عيد ميلاد خاصه
وهو العصر أجى ...
اني ونور جنه كاعدين بالهول
ومن دخل للبيت أنهزمنه فوك وقفلنه الغرفة
ونسمعة يصيح بصوت عالي وتعارك وية أقبال
ويكلها // مو أنتي التلعبين عليه ،،
مو هذا أتفاقنه !!!
وهي تهدي بي وتكله // سيدي والله أعوضك
وشتريد يجرالك ،،
هو يصيح بصوت عالي ويكلها // تعرفين شريد
وتعرفين كلش زين قلبي وين يدك وشيريد
مو هذا أتفاقنه لو أني متوهم
وهي تكله // بس لا تضوج وتتعصب يجرالك
بس أنطيني مهله واني ارتبلك كلشي
كاعد أقنعهم وأبشرك دماغهم لآن وقلبهم شويه حن
وهو يكلها // أقبال لا تخبليني وتقشمرين علية
اعرفج جذابة ،،
ولج اعرفهم ما يطخون راس
عدهم ألموت أهون من شوفت وجهي
وهي تكله // شلون هسه تبقى تقهر بروحك على ناس
مو شكول نعمة ورافسين نعمتهم برجليهم
بس انت شويه أصبر مصيرهم يطخون
وهو كاللها // يلا نشوف وين توصل وياج
فضيني وناديلي أبتهال
أنتي لا تجين مالي خلك لبشير يسويلنه هوسة
ويطنطن على راسي
شوية وسمعنة أقبال صاحت على نور حتى ننزل جوة ،
ومن نزلنة أقبال ونور تعاركن بالكلام
وحدة تصيح على الثانيه ،
ونور كامت تبجي تكلها // ليش تردين تبعيني
ليش تردين تضيعيني وياجن بالدرب الاعوج
ترى الموت عندي أهون من بيعة شرفي
وأقبال صاحت عليها بصوت عالي //
أنجبي عاد صايرتلي راهبة براسي
ولج أنتي منو يگلبج بعد ،
ترى معروف عنج ،،وعن بنات هذا البيت
حنطة فاسدة وخايسة ماتصلح لا للزراعة ولا للعلف
ولا للفايدة البشرية
نور جاوبتها وهي تبجي //
الله ما ينساني واكيد ضاملي الزين
وراح يعوضني خير على هذا صبري وخوفي من زلة الشيطان
ولا تنسين حتى الحنطايه الفاسدة الها نصيب بهاي الدنيا
أقبال كامت من الهول وراحت للمطبخ
وهي تصيح على نور وتكلها //
ما تنجبين عاد ،
وأبقي بهذا راسج اليابس
وشوفي عنادج وين راح يوصلج
اخذتني نور وصعدنه فوك ،
وكالت // جيبي دفترج وتعالي اقريج
وبدت تردلي أملاء وتبجي ،
اني كاعده يمها وأكتب الكلمات التردهن الية ،
وأباوع عليها تشهك وتبجي وتمسح بدموعها ،
وتكلي //باوعي بدفتر وكتبي
صار ألصبح ونزلنه نفس كل يوم
وأنشوف أقبال تفتر بالهول روحة رجعة
أني كتلها // صباح الخير عمه ،
هي ردت عليه //صباح الخير
وتفتر وتفرك بيدها ،
ونور ما سلمت عليها طلعت بوجها للمطبخ ،
سوت ريوك وبعد ما كملنه اكل
كامت تنظف ،بس ما تحجي ويه أقبال
وهي أقبال حتى ما تريكت
ونور صاحت علية بالمطبخ وشاورتني
كالت // روحي سألي أقبال شبيج تفترتين بالبيت
وقلقة ما مرتاحة
رحت عليها هي شالت سماعة تلفون تخابر
محد رد عليها ورجعت السماعه على التلفون
كتلها //عمه شبيج ضايجة وقلقة ما مرتاحة
جاوبتني وهي عينها على باب الشارع //
عمتج أبتهال لحد هسه مارجعت للبيت
واتصلت على عمج أحمد مايرد ،
وظال بالي عليها
رحت على نور ونقلتلها كلام أقبال
وهي كامت تلطم على وجهه ،
وطلعت على اقبال
وبقت تحجي وياها وتفتهم من عدها
احمد كايللها // لليل وأرجع أبتهال لان حفلتهم العصر
ولحد هسة ما رجعت خاف صار عليها شي .....
والقادم مؤلم .......
الى اللقاء في الحلقة القادمة
-------------------------------------