حصاد-ألمواسم
👇
#فراقد
👇
#ألحلقة(( ٤ ))
÷÷÷÷÷÷÷÷÷÷÷÷÷÷÷÷÷÷
كعدت شبعانه نوم .....
بس صدري شويه مخنوك
وجسمي يوجعني .... وهوايه متحاصرة
ونور عايفة التلفزيون مشعول
مابي صوره بس نمش ابيض وصوت وشه
كمت من القريولة رحت على التلفزيون
طفيته من الدكمة بصف الشاشه
رجعت أكعد بنور متكعد نايمة ...
// حبابه نووووورر كومي أريد أروح للتواليت
نوووررر أكعدي أريد أبول ،،
حبابه نووور أحركها من جتفها ما تكعد
بقيت أفتر بالغرفة ولازمة بطني وأبجي
هوايه متحاصرة هسه غير تكعد ،،
رجعت عليها وعضيتها بقوه من أيدها
وهي كعدت تصيح // يماااااااا
وتنفض بيدها مخروعة
شافتني أبجي أنتبهت عليه .....
تباوع بوجهي خايفة عليه
سألتني وعين تباوع بوجهي وعين تباوع على أيدها
كالتلي // شبيج تبجين ؟؟
وهاي ليش عضتيني ؟؟
ولج حسبالي كرصتني عكرب ....
كتلها وأني مخبوصة راح أسويها على نفسي
// دكومي حبابه أريد اروح للتواليت متحاصره
هي بقت تباوع بوجهي ....
وردت شالت راسها وباوعت للساعة ....
كالت // هسه لو تبولين بحظني ماافتح الباب .
كامت راحت على الثلاجة فتحتها
وطلعت من السيبايه الجوة دولكة فافون مشيفة بشكل دائري ..... شمرت المي مالتها من الشباك
وكالتلي // تعالي تبولي هنا
كمت أبجي أريدها تفتح الباب
مو مال أتبول بالدولكة // نور حبابه أفتحي الباب
اريد اروح للتواليت حبابه الله يخليج
هي تخوصرت بيد وحدة ....
وايدها الثانيه شايله بيها الدولكة
وكالت // أمري لله أمشي ألهذا الحمام ماكو نزله جوة
دفعت الثلاجة ... وفتحت الباب على كيفها
ومدت راسها وبقت تباوع بره ....
وأشرتلي تعالي .......
ركضنه للحمام دخلنه وطبكت الباب وراها
شالت قبق المجرى مال الحمام
وكالت // يلا بسرعة خلصي
هي راحت وكفت وره الباب
اني بس كعدت واحد فتح الباب ودفعها
هي رجعت دفعتها عليه
هو صاح بصوت خشن // منووو جوه ؟؟
ماجاوبته ولا ردت عليه .... وقفلت الباب بسرعة
اشرتلي خلصي بسرعة ....
واني ماافهم شنو السالفة ....ساعة يلا خلصت
وغسلت ايديه بالمغسلة بالصابون
كتلها // خلصت يلا نطلع
هي فتحت الباب على كيفها
باوعت لبره واندارت عليه كالت // يلا تعالي
نرجع للغرفة ركض ...
طلعنه بسرعة من الحمام حتى نروح للغرفة
فتحة الدرج تصير بصف الحمام
يعني بين غرفة نور والحمام ،
بس طلعنه ورجال صار بوجهنه ....
هوايه طويل ... وضخم .... وشكلة أسمر
ولابس ملابس عادية ،مشيت من يمة بسرعة
ونور دنكت راسها من عنده وهم مشت بسرعة
هو صاح عليها ،// هيييي أكفي أنتي منو ؟؟
وهاي المن الطفلة ؟؟؟
نور ما جاوبته ....ركضت للغرفة
اني دخلت قبلها
هي بس دخلت ..... واندارت تقفل الباب
الرجال دفعها عليها ...
وهي تدفع بالباب .....وهو يدفع بالباب ،
وخلا رجله بين الحايط والباب
لابس بوت أسود ،،دفعها بقوه عليها ودخل للغرفة ....
وهي كامت تبجي .... وخلت ايدها كدامها تدفعه عنها
لزكها بالحايط وره الباب وتقرب عليها
وهي تبجي وتكلة // العفو منك سيدي خفت منك
أني خادمة عدهم وهاي بنتي
هو تقربت عليها ..... ولزك جسمه بجسمها
وعصر حلكها بيده .... وكاللها // يولي شكالولج علينه ناكل بشر حت هلشكل تخافين من عنده
وتركضين وتركينه وراج ما مالين عينج
وهي ردت عليه بالكوة تطلع الكلمة لان عاصر حلكها
// ألعفو منك سيدي ....
فدوة اروحلك بنتي خطية طفلة شوفها خايفه
هو باوع علية ... ورجع باوع بوجه نور وكاللها //
هاي بنتج نغله موو !!
هاي أبوها ...... موو؟؟
شكلها تشبة هم هو أبرش على حمار وأبيض ؟؟
هي جاوبته .... ولازمة جف أيده لان عاصر حلكها بقوه / لا والله سيدي بذرة حلال
ويتيمة..ابوها شهيد أستشهد قبل سنتين بالمحمرة
وأني هنا اخدم علمود اللكمة .
هو دنك عليها ... ما أدري شيريد يسويلها
وهي كامت تبجي بصوت عالي ودفع بي
ودفعته من صدره
وتحرك براسها يمنى ويسرى بسرعة
اني خفت لان شفتها تبجي وادفع بالرجال
ركضت عليه واوخره من عدها
وكمت أصيح // عوف نوووووور
وهو دفعني من وجهي بتك أيد شمرني بالكاع
اتذكرت أمي شهلاء تكلي // من تخافين صيحي
ياأمنه ياعذراء هي تنقذج
كمت بسرعة ورجعت عليه أجره من رجليه
وهو بعده مدك على نور وهي توخر بي عنها
وصحت بصوت عالي //
يا عذذذذذذذرررررراااااااء ......
واجرة من بنطرونه
هو عاف نور وتفل عليها
وكاللها // صايره شريفة براسي
بنت السكط ،
ودفرني بقوة أجتي رجله بصدري وبطني شمرني بعيد عطت بصوت عالي //
يمااااااااااا .... وبقيت أتولى بالكاع من الوجع
وهي نور وخرت من عندة بسرعة
وأجتي تركض عليه شالتني من الكاع
بحظنها وكفت على طولها
وتكله // سيدي فدوة أروحلك والله أني خادمة بهذا البيت ....ومجبورة على العيشة هنا علمود اللكمة
مالكيت غير مكان اشتغل بي
هو رجع تفل عليها ويكلها //النسوان ظاله خايسة
وباقية بكد الزبالة يتمنن أشاره من عندي
بس أنتي تستشرفين براسي ...
طيح الله حظج وحظ اللفاج هنا
هو بس طلع ..... نور نزلتني بالكاع بسرعة
وراحت تركض وقفلت الباب وجرت وراها الثلاجة
رجعت عليه تبجي
واني اتمددت بالكاع ...أبجي من قوة الضربة
كعدت بالكاع وخلتني بحضنها ...
وشالت بلوزي تباوع على بطني وتمسحها بيدها
كامت تبجي بصوت عالي ورفعت راسها للسماء
وكالت // يا ربي ياسيدي يا مولاي
عاجبتك هيج شلت حالي ....
عاجبك هذا حالي .....
عاجبك هذا خوفي
بالدنيا عشت مظلومة وشبعت قهر وضيم
واذا أمشي بدرب خواتي أدخل جهنم
ياربي خلصني من هذا الامتحان الصعب
مااكدر اتحمله بعد خلصت طاقتي
مااكدر أتحمل كل هذا العذاب ،،
أمشي عليك حب جدي رسول الله ومكانتة عندك ....
بقت تمسح ابطني وتبجي ،
اني شويه وسكتت ...
انوب رجعت ابجي ....
كالتلي // هااا شو رجعتي تبجين بعدها بطنج توجعج ؟؟؟
كتلها // لا ما توجعني راحت
بس من ورايه عورج الرجال مو ؟؟؟
لو اني مارايحة للحمام جان ما فتحتي الباب
وأجى هذا الرجال عليج ....
هي ضربتني على وجهي خفيف وضحكت وهي تبجي
وكالتلي // ولج عندج لسان بحلاة العسل
وصلوات هوايه ذكية ونبهه
لا مو من وراج
واني متعودة على هذا الضيم
ادعيلي ربي يفكج وترجعين لأهلج
ويفك شدة أمتحاني
اني كعدت من حظنها وصليت صلاة المسيح
بشكل الصليب ((بأسم الآب و الأبن و الروح القدس إله واحد أمين))
هي هم رفعت أيدها ودعت للرب يخلصها
من هذا الامتحان الصعب التكول عليه
بقينه كاعدين ولا كدرنه نرجع انام
هي طلعت من الثلاجة علبة مال حلويات وانطتني
اكلت شويه ما حبيتها،
كتلها // مااحب الحلويات الحلوه
رحت تمددت على القريوله ....
وجسمي كله كام يوجعني ،
بس غفيت كعدت مااكدر أتنفس
اريد أتنفس الغرفة خلص بيها الهوى
باوعت باب الغرفة مفتوح كمت أمشي
صارت الخطوات طويلة ،
وكفت على الدرج شفت نور وبنيه ينظفن بالهول ،
كلت // نور تعالي
بصوت مخنوك وكعدت على باية الدرج الفوك
هي والبنيه صعدن يركض عليه
تكلي // شنو بلعتي وهيج مخنوكة
البنية لزمتني من وجهي كالتلها //
ولج عزه العزاج نور هاي غادية جمره من الصخونه
نور دنكت عليه وشالتني
وكالت // اكيد من ضربة الفجر
أبن الاستغفر الله سوه بيها شي
صعدتني للغرفة والبنيه تمشي ورانه
نور بسرعة بدلت وكالت للبنيه //
يلا راويه بدلي خلي ناخذها
للمستوصف الصحي مااكدر اشيلها وحدي
البنيه راويه هم بدلت ... لبست ملابس من نور
واني مره أتمدد على القريوله ،مره أكعد
ماكو هوى مخنوكة
شالتني نور ونزلت ركض ،
وراويه تمشي ورانه ،
خطيه نور تمشي بسرعة بالشارع
وراويه لازمة ايديه ،
نص الطريق وشالتني راويه
دخلوني للمركز الصحي ...
ودوني على مريه دكتوره....شافتني
خلت سماعه على صدري كالت// هاي الطفلة صدرها متنك شنو عدها ربو ؟؟
جاوبتها نور كالتلها// لا بس اتنگ بين فتره وفتره
جاوبتها الدكتوره وهي تخلي السماعه على ظهري //
عدها صعوبة بالتنفس... ،ودقات قلبها متسارعة
اخذيها لغرفة التضميد بيها البخاخ ،
وانتي يحبابه جيبيلي هذا العلاج من الصيدليه
اخذتني نور من القريوله الطبيه
وطلعت تركض من الغرفة ،
ودتني للغرفة أم البخاخ ...
والرجال بس قرة الورقة بيد نور
خلالي قناع مال هواء على خشمي وحلكي
شويه وكمت أتنفس أحسن
أجتي راويه وهي شايله بيدها دوه
وكالت// ها نور بشريني شلون صارت
جاوبتها نور وهي تمسح على شعري //
سوده عليه هل تشوفيها مخنوكة مقبط صدرها
الرجال كال لراويه// أنطيني الابره البيدج
خل أضربها حتى يتحسن تنفسها
واني كمت ابجي بصوت عالي
واكلها // نور مااريد أبره حبابه توجعني
لزمتني هي وراويه والرجال ضربني ابره
وكالي // ميخالف باباتي حتى تتنفسين زين
وطلع من جيبه مزقوله بيضه وانطانياها
أخذتها من ايده
ولزمت القناع بيدي الثانيه زين
لان هذا صديقي متعوده عليه الا هو يلا أتنفس
شويه ورجعنه للبيت ...
ولكينه كم بنيه مبدلات يردن يروحن لدربهن هيج نور تكول عليهن ... يطلعن حتى نتهوى ،
خلتني على القنفة وكالتلي // أبقى نايمة
اروح أسويلج مي دافي وعسل يفتح صدرج
راويه كالتلها // نور أني هم أروح
جهالي يومين صارلي مشايفتهم
هسه تلكيهم خبلوا أمي
جاوبتها نور وهي رايحة للمطبخ //
اخذي راحتج داده الله يسهل دربج
وينور طريقج ...ويخلصج من هذا الطريق الاعوج
الانكتب عليج كوه ....
راويه رفعت ايدها للسماء وكالت // امين
هو بعد بكيفة ابو خيمة الزركة يباوع الحالي
الخاطر جهالي.....مع السلامة جميعاً
وطلعت من الهول
اجت عليه ساجدة ولزمت وجهي
صاحت بصوت شوية عالي تسمع نور //
اكلج نور هاي البنيه مصخنة تعالي شوفيها
وأني أنظف المطبخ
أجتي نور ...وبيدها كلاص مي يبخر ...
ومخليه جواه ماعون مال جاي
وكالتلها // اي سوده عليه مقبط صدرها
ومصخنه
ماادري من الضربة
ماادري لان لبستها الملابس شوية رطبه واخذت برد
اجتي كعدت بصفي ...وكعدتني على حيلي
وبدت تصب شويه مي دافي بالماعون
وتبردلي حتى اشرب
وساجدة راحت للمطبخ وهي تمشي رفعت
دشداشتها وخلتها بملابسها الجوه
دكت الباب ،نور صاحت على ساجده
// تعالي ساجده شوفي الباب منو بيها ؟؟
مااكدر اكوم اشرب هدوله معسل
بلكت يفتح صدرها
اجتي ساجدة بسرعة وتمسح بيدها بثوبها
من جهة رجليها ونزلت ثوبها ،صاحت// منو بالباب
جاوبتها صوت مريه
فتحتها وشويه ورجعت ساجده
بقت واكفة بالباب وكالت // نور يردوج بره ........
إلى اللقاء في الحلقة القادمة
××××××××××××××××××××××