عشق

عشق37

عشق37
سيدرا💫💜
.
.
حضنك موطني ومكانيِ المفضَل ❤️.

في حضنه ننسي نفسي وننسي روحي
فتحت عيوني علي شمس الصبح ابتسمت وانا نذكر في مهاب امس
نبي نصبي حسيت بيه مقيدني لافني وضامني بقوة وكأني حانضيع بين ايديه
تمللت بين ايديه وحولت خشيت للحمام لفيت رجلي بكيس نايلون
دوشت وطلعت
جهزت روحي للجامعه وجهزت الفطور
وهكي تمر ايامي وقرب رمضان
وانا حاسه بروحي حامل لان رجعن نفس الاعراض عليا
ماحبيتش نقول لحد الا وانا متأكدة
مر يومي اعتيادي
روحت من الجامعه هالكه تعب وااووف عندي غداء لازم نديرا
مش كل يوم مطعم لازم نتعود علي النظام
حكيت عيوني بملل وغيرت ملابسي
مشيت لميت الشقة ونظفتها نظفت المطبخ الحمامات كل شي
بخرت
وبديت في الغداء
درت سباغيتي بالمفروم وحطيت مشروب غازي
اتصلت علي مهاب قال تو يجي
جهزت غداء ومهاب تأخر
كليت انا ونظفت طبقي
وجهزت لمهاب طيقه وحطيته فس المكرويف
وطول للسرير
اليوم كان صعب عليا ورجلي اخري والجبس والتنظيف كل شي رد علي ظهري
رقدت نومة اهل الكهف
كانت نومه مريحة مازلت نذكرها لحد توا
واني في عز نومي حسيت بشي علي خشمي يدغدغ
نقلب وجي للجهة الثانية اخري نحس بنفس الشي
تأففت وفتحت عيوني لقيت مهاب
رديت رقدت اخري
انا: مهاب تعبانة وعندي قراية نبي نتريح
مهاب: وين توا مغرب من بكري وانتي راقدة
انا: تعبانة مهاب خليني بليييززز
مهاب: باهي حتي اني بنرقد را
انا: تعال حبيبي ارقد معاي
تمدد جنبي وفتح ايديه رقدت علي صدره

ورا ساعتين نضت
قعدت نقرا والنعس ملازمني هنا تأكدت اني حامل....
.
.
بعد مرور فترة ليست بقصيرة
سيدرا💫💜
بطني قدامي وتوا حامل بثمان شهور
الفرحة ماليا حياتي ...نعيش ايام حلوة وهادية مع مهاب...وعائلته

نجحت من سنة ثانية في الطب الاسنان
يادوب صفيت الحمدالله وحملت معاي مادة
وقفت قيدي عشان الحمل
الباب طق فتحته
لقيت مهاب دغري جيت عليه وحضنته
قعدت هذي عادتي كل مايجي نحضنه
جاب غداء من برا حوت جهزته علي الطاولة
وانا منتبهه لروحي كل شوي نلهث لان بطني كبرت
انا: مهاب نبي نبدا نشري دبش لبيبي
مهاب: حاضر اليوم فاضي تو نطلعوا
انا: امم قولي كيف كان يومك
مهاب: وبدا يحكيلي علي يومه ...وانتي
انا: حرقان قتلني بكل و و نزلت لوطة لعميمة وجاني عمرالفترة هذي رايح واجد يجيني وعلاقتنه كويسه بكل
مهاب: فرحانه
انا: اها علي الاقل نحس ان في حد من هلي معاي
مهاب: اممم
انا: نحس بيك تحبش نتقرب من عمر
مهاب: لا بالعكس هدا خوك وسندك
انا: حبيبي كنك قولي متضايق نحس بيك
مهاب: خايف عليك
انا: ليش
مهاب: الولادة نفكر فيها من توا
انا: حتي انا خايفة بس كل ما نفكر ان تو يجي بيبي صغيرون ينورلي دنيتي نفرح
مهاب: واني مش منور دنيتك
انا: هههههههه انت منور حياتي بس ومحمد منورلي دنيتي
مهاب : من قالك نبيه محمد
انا: براحتك مهابي بس جا في خاطري محمد علي بابا
مهاب: سمي للي تبيه انتي للي حملتي وانتي للي تعبتي
انا: الحمدالله كملت
جيت بنصبي حسيت بحركة ببطني رديت جلست
انا: مهاب مهاب شوف يتحرك
قرب مني وحط يدا علي بطني وجلس علي ركبه ونص
انا: يتحرك حبيبي واجد الايام هذني
حط مهاب راسه علي بطني خدا ووذنه
ويدا من الجانب الاخر
مهاب: محمد وليدي تسمع فيا نحبك انت وامك هلبة
انا: هههه كنك مستحيل يسمعك يفهمش
مهاب بحت فيا وهمس: اششش
سكتت وقعدت نبحت فيه ونسمع ومع كل كلمه نفرح اكثر ونحمدربي ان عندي هكي عائلة حلوة
مهاب: نبيك تطلع بسرعة من بطن امك نبيك راجل زي بوك...تعبش امك هلبة باهي واطلعلي بسرعة حبيبي خليك سند لامك ومؤدب ومش امتاع مشاكل وديما اعرف اني حانكون معاك خطوة بخطوة نعلمك القرأن
انا: نبيه يقعد من حافظي كتاب الله باهي
مهاب: اي نخلوه يحفظ القرأن كله نبي للي مادرتاش في شبابي يديره هو
انا: ربي يخليكم ليا انتوا الاثنين
قرب مني وباسني من خدي وبعدها عضه
انا: مهاب مكملها تعض فيا كنك😳
مهاب: لانك بطة قعدتي الخدود دم زي التفاحة
انا: قصدك انا دبة
مهاب: لالا بطة
انا: مهاب زعلت خلاص اصلا صارلي هكي من ولدك طماع شن ندير
مهاب: انتي حتي لو سمنتي ياعشقي يلوق عليك حبيبي
وعض خذي الاخر
انا فنصت فيه شوي باسه زي للي يطبطب
❤