عشق

عشق33

عشق 33
سيدرا💫💜

وَأُخفِي عَنكَ شيئاً ليسَ يُحكَى
فأصمتُ ثُمَّ تَفضَحُنِي عُيُونِي
,
ألَا يَا عينُ كنتِ الأمسَ أوفَى
فَمَن عَلَّمَكِ سِرَّاً أن تَخُونِي ❤️
.
.
نسمة...بعد كليت الشكولاطة قعدت نهترس من المرض
جسمي كله يوجع فيا ومش قادرة نوقف ولا نحكي..
اني نوعيتي وين نمرض نرقد ودموعي ينزلوا بروحهم ومانتحركش من مكاني بكل
.
خشت عليا بسمة لقتني نحكي في كلام مش مفهوم
قربت حاولت نتوضني نتضتش
قالت لماما والليل كله دارولي كمادات بس الحرارة زادت زيادة لدرجة قعدت نرجف
.
نسمة: باابا امممم بابا
بسمة: نسمة تسمعي فيا وخيتي
نسمة: نبي نبي بابا صقعانه غطيني

زاردولي غطاء واني حالتي زي ماهي راسي نحس بيه سطل ثقيل

امها: لالا لازم تطلع المستشفي معش فيها
بسمة: تو نمشي نوقف تاكسي
امها: فلوس في
بسمة: اي في الخمسين للي مبكري
.
طلعت بسمة تدور في تاكسي وكان انس برا يدخن
وبسمة لابسة وشاح اسود حاطته حط وملامحها قريبة من نسمة بس عيونها عسلية وعندها غمازة

انس: تفضلي اختي ايش تبي
بسمة: معلش ياخوي نبي تاكسي ضروري
انس: تو مافيش تاكسي انتوا ليش تبوه ضروري الموضوع
بسمة ماسكة دموعها بالغصب لان لافي اب لا في اخ لا عم لاخال يسأل عليهن ويشوف حالهن ومحتالهن: اي اختي مريضة هلبة "وقعدت تبكي"
انس: لاباس عليها هيا خمس دقايق ونجيب سيارة صاحبي
بسمة: لااا بارك الله فيك مافي داعي بس نبي تاكسي
انس: عيب عليك نحن جيران والجار للجار دقايق ونجي
.
ابتسمت من بين دموعها وهزت راسها بايجاب

خشت داخل قالت لامها.. لبست سروال جينز ازرق علي بلوزة نيلية ووشاح وردي وكويشها الاسود
ولبست بسمة الوشاح حطيته حط عليها

وحوشهم ميزته نظيف بكل برغم بساطته بس البنات الستة انظاف بطريقة عجيبة
.
.
انس... كنت طالع ندخن برا ليا فترة مسيب السكير
والحمدالله شكلي تبت، من بعد اصحاب السوء للي عرفتهم هما للي خربوني..جلست قدام الحوش علي العتبة وكل مرة سبسي مطلع
نفكر نهاجر عمري 27 سنة ومش داير فايدة في حياتي
شهادة ثانوية بس
بلكي نمشي لايطاليا عن طريق البحر ...ونكون نفسي غادي افضل
.
سمعت صوت التفت لقيت بنية حلوة قمحية وعيونها صغار وعسلية قصيرة ورقيقة...انتبهت لها بس هيا انتبهتش
حاطه الوشاح حط فوق شعرها البني...
جيت نبي نحكي معاها ونشوفها خيرها خليني نساعد بلكي نكسب اجر ...وندير فائدة في عالحياة للي مش عارف وين موديتني
.
من اول ماناديتها شفت عيونها .. حسيت بشي غريب من الصعب نوصفه
دمعتها للي علي طرف عينها نظرة الخوف والكسرة
اني نعرف نقرا العيون عندي الموهبة هادي
نعرف الانسان اذا كان كويس او عاطل من عيونه
عرفت ان اختها
ومشيت قتلها نجيب سيارة صاحبي واني مش عارف من اي صاحب ناخد السيارة
لقاني معاذ حايس ونتصل كل مرة برقم
معاذ: شن في
انس: جيرانا بنتهم مريضة لقيتهم يبوا تاكسي قتلهم تو نجيب سيارة صاحبي
معاذ: ايه بنات الحاج عمران قصدك
انس: اي
معاذ: تو اني نجيب سيارة انت خليك
انس: لا عطيت للبنت كلمه نمشوا اني وانت بسرعة هيا