اللقيط

الحلقه 10

#اللقيط
#اللقيط_10
#جزء_حلقه_سابقه
(ظهرو احمد وكارمن فى المطعم بيتغدو)
احمد: هتفتحى نت النهارده
كارمن: بأذن الله علشان متعملهاش موضوع زى النهارده
احمد:(بصوت عالى شويه) انا معملتهاش موضوع وبطلى  كلامك المستفز ده
كارمن:(وقف بعصبيه) على فكره احنا فى مطعم وسط ناس وانت متنفعش تزعقلى كده (ولسه بتلف علشان تمشى لقيت محمد شاهين فى وشها ومعاه مينا (كملت كلامها بخوف) محمد
احمد:( بص لمينا ومحمد وكارمن) انتو تعرفو بعض
محمد شاهين:( بصله) اختى (وبص لكارمن) يلا نمشى (واخد كارمن ومشى  مينا بص لمحمد بزعل وبص لاحمد)
مينا:(بص لاحمد) اتفضل يا استاذ قدامى
#بدايه_الحلقه_الجديده
عند محمدشاهين ظهروا هو وكارمن فـي أوضته ومحمد بيبص عليها وساكت وهيا بتلعب في إيديها بتوتر وباين عليها الخوف)
محمدشاهين:(بجدية) مش ناوية تتكلمي!!!
كارمن:(بصتله بخوف وقلق وسكتت ما إتكلمتش)
محمدشاهين:(بجدية) مش عاوز سكوتك ياكارمن عاوزك تتكلمي وتفهميني إيه اللي شوفته ده؟!
كارمن:(بعياط وخوف) والله يامحمد مش زي ماأنت فاهم..
محمدشاهين:(قاطعها بجدية) إتكلمي من غير عياط يللاا قولي بقي اللي عندك وفهميني أنا ساكت خالص أهو ..
كارمن:(حاولت تهدي وبصتله) والله يامحمد ماعملت حاجة وأحمد كمان والله إحنا بنحب بعض مش بيلعب بيا زي ماأنت فاهم..
محمدشاهين:(بجدية) واللي بيحب حد بيخرج معاه من ورا أهله وتشتغلي إنتي وهو شغل حرامية إنطقي ولا علشان أهلك خلاص واثقين فيكِ ومش بيدوروا وراكِ ومعطينك الأمان تقولي بس الفرصة قدامي ألعب بديلي بقي ماهما كده كده واثقين فيا إنطقي ياكارمن ماتعصبنيش..
كارمن:(بحزن) والله هو بيحبني يامحمد والله وكمان مش بنتقابل أصلاً ولا نتكلم غير فين وفين كل سنة مرة زي مابيقولوا ولما بنتقابل بيكون ف كافتيريا بتاع الكلية وبيطمن عليا وبس ..
محمدشاهين:(بتريقة) واللي شوفته النهاردة كان الكلية برضو ولا الكلية إتحولت وأنا مش واخد بالي..
كارمن:(بدموع) والله هو كان بقالنا فترة ما إتكلمناش ولا إتقابلنا وزعقنا مع بعض فحب يصالحني فقالي نخرج نأكل في مطعم سوا بس والله كانت أول مرة..
محمدشاهين:(بتنهيدة وبصلها) طيب ياكارمن إمسحي دموعك دي يللا وروحي أوضتك وأنا هتصرف مع أحمد..
كارمن:(بخوف) هتعمل إيه!!
محمدشاهين:(بهدوء) ماتشغليش بالك إنتِ هتصرف معاه الواضح إنه ماكانش يعرف إنك أختي أصلاً بس ده مايمنعش إنـه محتاج قرصة ودن يلاا روحي أوضتك..
كارمن:(بإستفسار وخوف) ط طيب يعني هتعمل معاه إيه!!
محمدشاهين:(بجدية) هتكلم معاه ياكارمن ماتقلقيش مش هعمل حاجة أحمد أصلاً صاحبي وكمان أخو مينا وإنت عارفة مكانة مينا عندي بس زي ماقولتلك ده مايمنعش إنـي محتاج قرصة ودن ومحتاج أتكلم معاه كمان..
كارمن:(بدموع) أنا أسفة يامحمد حقك عليا..
محمدشاهين:(بصلهم بزعل) قومي ياكارمن يللا روحي أوضتك..
كارمن:(بدموع) مش هخرج قبل ماتسامحني أنا أسفة حقك عليا والله مش قصدي وماأقدرش أخون ثقتكم فيا ..
محمدشاهين:(بزعل) ماتقدريش بس قدرتي ياكارمن للأسف أنا لولا عارف أخلاقك وأخلاق أحمد ماكانش ده هيكون رد فعلي الصراحة بس ده مايمنعش إن اللي عملتوه ده غلط وغلط كبير كمان..
كارمن:(بدموع) طيب خلاص والله أنا أسفة حقك عليا بقي..
محمدشاهين:(بصلها بتنهيدة وأخدها في حضنه) خلاص ياستي مش زعلان ماأقدرش أزعل منك أصلاً بس بقولك أهو ماعوتوش تتكلموا ولا تتقابلوا سامعة..
كارمن:(بحزن ودموع) حاضر يامحمد المهم ماتزعلش مني..
محمدشاهين:(بصلها بإبتسامة) مش زعلان ياحبيبتي خلاص يلا بقي قومي إغسلي وشك وروحي أوضتك إرتاحي شوية علشان بابا وماما مايأخدوش بالهم من حاجة..
كارمن:(مسحت دموعها وبصتله) حاضر
(خرجت كارمن راحت أوضتها وسط حزنها انها هتبعد عن أحمد ومحمدشاهين قاعد في أوضته محتار وبيفكر هيبدأ الكلام مع أحمد إزاي)
..........................................................................................
(فـي البيت عند سعد ظهر مينا فـي الأوضة ومعاه أحمد اللي ساكت ومش بيتكلم قفل الباب وبصله)
مينا:(شده من إيده قعده على السرير قصاده) ممكن بقي أفهم إيه اللي شوفته ده!!
أحمد:(بهدوء) شوفت إيه يعني يامينا ..
مينا:(بعصبية بسيطة) أحمد مش عاوز برود سامع وقولي يللاا إيه اللي شوفته ده!!
أحمد:(بهدوء) شوفت إيه يعني عادي..
مينا:(بجدية) لا مش عادي ياأستاذ سامع مش عادي مش أمتي وإحنا بنلعب ببات الناس كده..
أحمد:(قاطعه بتبرير لموقفه) مينا إنت فاهم غلط أنا مش بلعب بحد وإنت عارف ده كويس وبعدين أنا وكارمن بنحب بعض..
مينا:(بجدية) وهو ده الحُب بالنسبة لك؟! إنك تكلمها من ورا أهلها وتخرج معاها من ورا أهلها هو ده الحُب بالنسبة لك..
أحمد:(بصله بتنهيدة وبص فـي الأرض وسكت)
مينا:(بجدية) رد عليا وكلمني زي مابكلمك هو ده الحب بالنسبة لك إنت ناسي إخواتك وناسي أن داين تدان طيب لو كنت شوفت هايدي ورنا مع حد في مطعم كده كنت هتتعصب وتبهدل الدنيا ولالا مع إنه ممكن يكون بيحبها زيه زيك..
أحمد:(بحزن) أنا عارف يامينا إنـي غلطان بس أنا مش بلعب بيها والله وبحبها وكمان مش بنتكلم كتير ومش بنخرج خالص دي كانت أول مرة والله وأي حاجة بينا ف حدود الإحترام..
مينا:(بهدوء) أحمد ياحبيبي مافيش حاجة إسمها فـي حدود الإحترام إحنا مش معصومين من الخطأ وبعدين اللي بيحب حد يحافط عليه حتي من نفسه لحد ماتكونوا لبعض فـي الحلال..
أحمد:(بحزن) بس لسا بدري على الكلام ده ومافيش حد هيوافق بحاجة زي دي!!
مينا:(بعقلانية) يبقي تصبر وتحافظ عليها منك ومن الناس لحد ماتكونوا لبعض ف الحلال صح ولاغلط؟!
أحمد:(بصله بتنهيدة) صح بس أنا بحبها يامينا مش هقدر أستحمل الفترة دي كلها..
مينا:(بهدوء) هتستحمل علشان إنت بتحبها بحد واللي بيحب من بيغدر ولابيأذي وبعدين حط ف دماغك إنك قبل ماتحميها من نفسك فـ إحميها من كلام الناس اللي مش بترحم وهيا بنت وكمان مش أي حد دي أخت شاهين ياأحمد حط تحت أخت شاهين مليون خط سامعني..
أحمد:(بتنهيدة حزن) ماكونتيش أعرف إنها أخته والله ..
مينا:(بجدية) وأديك عرفت فحاول بقي تفوق لنفسك كده وتشغل نفسك بدراستك وسيب الكلام ف الموضوع ده فـي وقته إتفقنا؟!
أحمد:(بتنهيدة وبص لمينا) حاضر يامينا
مينا:(بإبتسامة) ولما شاهين يكلمك ويعاتبك إستحمل عتابه مهما كان دي أخته الوحيدة(وكمل كلامه بهزار) وآه أبقي إضرب منه كمان وإنت ساكت من حقه يفرمك الصراحة..
أحمد:(بصله بضحكة) ربنا يطمنك يا أخويا مش عارف من غيرك كنت هطمن إزاي ..
مينا:(بضحكة وهزار) عد الجمايل دي بقي أي خدمة!!
أحمد:(بصله بضيق مُصتنع وقام وقف) أنا قايم أغير هدومي وأنام شوية أبورخامتك ياشيخ..
مينا:(بضحكة) آه الوقتي أبورخامتي بعد ما أخدت مني النصيحة والإستشارة العظيمة دي خيراً تعمل شراً تلقي صحيح..
أحمد:(بضحكة ورخامة) بالظبط..
(راح أحمد أخد هدومه ودخل الحمام يغير ومينا قاعد على السرير بيفكر ف ردة فعل محمدشاهين وموقفه علي اللي حصل)
........................................................................................................
(فـي نفس اليوم عند سعد ويحيي الى كانو قاعدين عند يحيي وبيتكلموا)
سعد:(بتنهيدة) هيتحجج بأى حجة ومش هيروح أنا عارف..
يحيي:(بجدية) مينفعش خده من هنا ميطلعش فوق لإن لازم يعمل التحليل ضروري..
سعد:(بتنهيدة) ماشي خلاص دلوقتي هو على وصول أهو (قاموا خرجوا هما الإتنين وفجأة سمعو صوت علي السلم بصوا الاتنين لمصدر الصوت لقوه محمد سعد كمل كلامه ونادي عليه) محمد محمد!!!
محمدسعد:(بصلهم بإستغراب وريبة) أيوة يابابا (ونزلهم تاني)
يحيي:(بجدية وتساؤل) هيا رجلك بتوجعك منين يامحمد؟!
محمدسعد:(شاور علي المكان اللي بيوجعه) هنا ..
يحيي:(بقلق) زى ما قولتلك يا سعد إنه لازم يعمل التحليل علشان اللي قولتلك عليه..
محمدسعد:(بقلق) تحليل إيه؟!
يحيي:(بص لمحمد بإبتسامة يطمنه) متقلقيش تحليل دم عادي إنزل مع بابا وإعمله ومتخافش من حاجة يللا عاوزين نطمن عليك بس..
سعد:(بص لمحمد بإبتسامة) يلا ياحبيبي متخفش
محمدسعد:(بخوف) ط طيب هطلع الكُتب وأنزل تانــي
يحيي:(أخد منه الكتب وبإبتسامة) هاتهم عندى ولم ترجع بالسلامة إبقي عدى خدهم
(يحيي أخد منهم الكتب وسعد أخد محمد ومشي وسط خوف محمد وقلقه)
........................................................................................
(تـاني يوم عند محمدسعد اللي رجع من درسه فتح الباب ودخل لقي الكل موجود وقاعدين في الصالة بصلهم بريبة وخوف ودخل)
محمدسعد:(بص للكل بقلق) سلام عليكم
سعد:(وقف وقرب منه) وعليكم السلام ورحمه الله وبركاته
محمدسعد:(بقلق وخوف) خير يابابا في إيه!!
نيرة:(قربت منهم وبحنية) مافيش حاجه ياحبيبي إنت كويس!!
محمد سعد:(بصلها بأستغراب) آه الحمدالله كويس ياماما فيه إيه خير !!
نيرة:(بقلق وخوف علي إبنها) رجلك لسا بتوجعك؟!
محمدسعد:(بصلهم بخوف) يعني شوية وشوية ليه فيه حاجة ولاإيه؟!
سعد:(بجدية) طب يامحمد تعال معايا يللاا ..
محمدسعد:(بقلق) هنروح فين!
سعد:(بتنهيدة حزن) نتيجة التحاليل ظهرت وطلعت نسبة الروماتيزم عندك عالية وعمك يحيى كتبلك علي حقن طوال المفعول هتاخدها كل 15يوم وهتأخد أول واحدة النهاردة..
محمدسعد:(بعد عنهم بسرعة وخوف) لا مش عاوز
سعد:(بنرفرة) مافيش حاجة إسمها لا لو مأخدتش علاجك الروماتيزم هيوصل للقلب والقلب هيدمر وهتدخل في متاهات تانية إنت في غني عنها يللا بقي..
محمدسعد:(بخوف) هستحمل يا بابا بس مش هستحمل الحقنه دى والله العظيم ..
سعد:(بنفاذ صبر) إنت هتفضل تعاند وفي الاخر هتنزل معايا وهتاخدها فأنزل معايا يللا وإخلص..
محمدسعد:(بدموع وخوف) إنت مكنتش بتشوف وجع إبن عمى اللي بيقعد بالكام يوم أو ممكن بالإسبوع لما يأخدها ..
نيرة:(قربت منه بهدوء) علشان متتعبش ياحبيبي إنزل مع أبوك دى هيا واحدة كل 15يوم يعني مش كل يوم ولا حاجة..
هايدى:(بإبتسامة تطمنه) ولو إنتظمت عليها هتبقي كل شهر وشوية وهتوقفها بإذن الله بس إنزل مع بابا دلوقتي ..
سعد:(بهدوء) يلا يابني بقي عمك يحيي ببستناك أصلاً من ساعة م نتيجة التحليل ظهرت..
محمدسعد:(بخوف ودموع) يابابا علشان خاطرى بالله عليك مش عاوز أخد حقن..
أحمد:(قرب منهم وحط إيده علي كتف محمد) وبعدين الحقنة معاها بنج يعني بإذن الله مش هتحس غير بشكة الإبرة بس.. (محمدسعد بصلهم بخوف ودموع وكلهم قعدوا بسايسوا فيه بالكلام ويطمنوه سعد مسك إيد محمد وأخده ونزل)
رنا:(بخوف ودموع) ماما هيا الحقنة دى بتوجع يعني محمد هيتوجع منها؟!
نيرة:(بحزن وتنهيدة) ربنا يعينه عليها وميعندش بعد الحقنة دى..
هايدى:(بهدوء) طالما فيها بنج بيقي مش هيحس بإذن الله..
أحمد:(بتنهيدة حزن) ولا ليه أي لازمة البنج ده أنا قولتله كده علشان يطمن شوية بس وينزل مع بابا لكن البنج بيخفف شكة الإبرة نفسها بس مادة الحقنة أصلاً تقيلة وصعبة وهيحس بيها (وبتنهيدة وحزن) ربنا معاه بقي ( وسكتوا كلهم وسط حزنهم وخوفهم وبيستنو محمد يأخد الحقنة ويخلص ويطلع)
....................................................................................
في بيت يحيي ظهر جرس الباب بيضرب شوية وفتح محمدسراج لقي سعد ومحمد اللي باين عليه الخوف والتوتر والدموع محبوسة في عينه)
محمدسراج:(بص لسعد بإبتسامة) تعال ياعمو إتفضل
سعد:(بإبتسامة) عامل إيه ياسراج إنت هنا يعني فكرتك لسا ف المعهد..
محمدسراج:(بإبتسامة وهزار ) لا خلصت كانت أخر مجموعة بتاع محمد وخلاص كده كفارة الواحد جاب أخره..
سعد:(بإبتسامة) الله يعينك ياحبيبي..
محمدسراج:(بإبتسامة) تسلم ياعمو ربنا يخليك (وبص لمحمدسعد بضحكة) إنت مالك يابني النهاردة حد ضاربك..
محمدسعد:(بصلهم بدموع مكتومة وسكت ماإتكلمش)
محمدسراج:(بص لسعد بإستفسار) ماله محمد ياعمو !!
سعد:(بتنهيدة وبصله) تعال تعال ندخل وهتعرف ..
(دخل سعد ومحمد أوضة محمدسراج وشوية ويحيي دخلهم وسراج بييص عليهم بإستغراب)
محمدسراج:(بإستغراب) هو فيه إيه!! ومحمد ماله؟!
يحيي:(بتنهيدة) مافيش كان بيشتكي من رجله وطلبت منه تحليل سرعة ترسيب وروماتيزم وطلعت النسبة عالية وهيأخد حقنة طوال المفعول..
محمدسراج:(بحزن على محمد) أوووف !! طيب مافيش لحالته دي غير الحقن يابابا ؟!
يحيي:(بتنهيدة وبص لمحمدسعد اللي الدموع في عينه) للأسف لاا ..
محمدسعد:(بخوف ودموع) بالله عليك ياعمو مش عاوز حقن علشان خاطري إنت عارف إني بخاف من الحقن ومش بحبها فمابالك بقي بالحقنة دي أنا عارف إنها صعبة..
يحيي:(بيحاول يطمنه) ماتقلقش أنا لسا هعملك إختبار الأول والله أعلم ممكن جسمك مايتقبلش الحقنة وماتأخدهاش..
محمدسعد:(بفرحة) بجججد!! يعني ممكن ماأخدش حقن!!
يحيي:(بإبتسامة يطمنه) جايز (وطلع الحقنة وبدأ يجهزها وبصله) يلا بس تعال أقعد هنا جمبي وهات إيدك وماتخافش..
محمدسعد:(بصله بخوف وراح قعد جنبه) حاضر ..
(خلص يحيي تجهيز الحقنة ومسك إيد محمد وبدأ يدخل شوية من مادة الحقنة ومحمد إتوجع منها وضغط على إيده جامد)
يحيي:(بيحاول يهديه وشال السن) هشش إهدا خلاص خلصت نستني بقي عشر دقايق كده ونشوف ..
محمدسراج:(بصله وبهزار يخفف عنه الخوف) إنت يابني إتمرمطت ولسا في تانية ثانوي أومال في ثالثة ثانوي هيحصلك إيه!!!
محمدسعد:(بصله بتوهان وبص لمكان الحقنة ورجع بص لمحمدسراج تاني) ها بتقول حاجة يامستر!!
محمدسراج:(بضحكة) مستر مين بقي إنت مش معانا خالص ماتقلقش ياعم بإذن الله ماتخدهاش..
يحيي:(بص لمحمدسعد) محمد لو ماحصلش حاجة والحقنة نفعت إنك تأخدها مش عاوزك تزعل إتفقنا؟!
محمدسعد:(بدموع) مش عاوز حقن ياعمو
يحيي:(بحزن) علشان تبقي كويس ياحبيبي ماتقلقش هتعدي بإذن الله..
(عدي على كده عشر دقايق ومحمدسعد قاعد خايف وسراج ويحيي وسعد باصين عليه بتنهيدة حُزن)
يحيي:(مسك إيد محمد) ها حاسس بأي حاجة غريبة ف إيدك بتهرش أو بتحرق أو أي حاجة من دي!!
محمدسعد:(بخوف) هيا مكانها بيوجعني بس مافيش هرش ولاحرقان..
يحيي:(بصله بتنهيدة) محمد إحنا إتفقنا صح!!
محمدسعد:(بخوف لما فهم قصده وبعياط) مش عاوز ياعمو مش هأخد حقن بالله عليك..
سعد:(ببحاول يهديه) ماتقلقش يامحمد شكة وهتخلص بإذن الله أحسن م تفضل حياتك كلها تعبان..
محمدسعد:(بعياط وخوف) لا مش عاوز حاجة مش هأخد حاجة مش عاوز ..
سعد:(قام وقف وبيحاول يمسكه) تعال بس وإهدا كده أنا معاك أهو يللاا ..
محمدسعد:(بصلهم بخوف وبعد عن باباه وبعياط) لا مش هأخد حقن مش هأخد حاجة..
يحيي:(بتجاهل لعياطه وبصله بجدية) محمد الحقنة لو إتعبت مش عاوزة حركة لازم تتأخد علطول سامعني!!
محمدسعد:(بصله بعياط وخوف) عمو بالله عليك شوفلي علاج تاني مش لازم حقن بالله عليك..
(يحيي بصله بحزن وراح جاب الحقنة وبدأ يجهزها وغمز لسراج بمعني يهديه ويحاول يمسكه كويس لأن مش هيرضي يسكت مع سعد)
سراج:(بص لمحمد بضحكة وهزار) طيب إهدا طيب فيه راجل في ثانية ثانوي يعيط كده إخص الله يرحمك يارجولة..
محمدسعد:(بصله بدموع وخوف وتوتر وسكت ما إتكلمش)
محمدسراج:(بيحاول يهديه ويقومه) طيب إهدا ماتخافش قوم تعال أقعد جنبي هنا يللاا (محمد بصله بخوف كمل سراج كلامه بهدوء مزيف) ماتخافش وإهدا ماشي
(محمدسعد قام وقف علشان يقعد جنب سراج مجرد ما وقف سراج شده براحة ومسكه كويس وإتحكم منه وسط خوف محمد وعياطه ومعافرته)
محمدسعد:(بخوف) مش عاوز حقن سيبني يامستر مش عاوز حاجة..
محمدسراج:(بحزن) إهدا إهدا شكة وتخلص..
(في الوقت ده كان خلص يحيي تجهيز الحقنة وقرب منهم وسط معافرة وحركة محمد بس سراج مسكه كويس بدأ يحيي يعطيه الحقنة وسط توجعاته وعياطه)
محمدسعد:(بتوجع وعياط وحضن سراج جامد) آآآآآآآآآآآه آآآآآآآآآه كفااااية ياعمو آآآه
محمدسراج:(شّده لحضنه أكتر وبيحاول يهديه) هشش خلاص هتخلص أهي إهدا ..
محمدسعد:(بعياط) آآآآآآه شيلها بقي ياعمو آآآآه
يحيي:(خلص الحقنة ودلك مكانها شوية) خلاص خلاص خلصت بالشفا يارب..
(محمدسعد بصلهم بدموع ومش قادر يقف علي رجله كمل يحيي كلامه) معلهش يامحمد أنا عارف إنها صعبة بس حرك رجلك وبإذن الله هتبقي كويس..
محمدسعد:(بعياط وتوجع) رجلي واقفة مش عارف أحركها ..
يحيي:(بحزن) معلهش حاول هيا صعبة أنا عارف بس شوية ورجلك هتفك وتبقي كويس..
(محمدسعد بصلهم بعياط ووجع وهما باصين عليه بحزن على تعبه ووجعه سراج مسك إيده وساعده يمشي رجله شوية وبعدين قعده علي السرير وقعد جنبه وقعدا يتكلموا مع محمد علشان يلهوه عن وجعه)
....................................................................................
(في بيت سعد ظهر جرس الباب بيضرب رنا راحت تفتح بلهفة على أساس إنه محمد لقته مينا فتحتله الباب ودخل لقاهم كلهم قاعدين وباين إن فيه حاجة)
مينا:(بصلهم بقلق) فيه إيه ياجماعة قاعدين كده ليه!!
نيرة:(بحنية) تعال ياحبيبي إتأخرت النهاردة ف الكلية ليه كده؟
مينا:(بهدوء) كان عندي محاضرات كتيرة النهاردة ياماما وكمان أخدنا محاضرة إضافية..
نيرة:(بإبتسامة هادية) ربنا يوفقك ياحبيبي..
مينا:(بإبتسامة وقلق) يارب ياماما بس مالكم فيه إيه خير وقاعدين كده ليه !!
أحمد:(بتنهيدة) ماتقلقش مافيش حاجة بنستي محمد بس..
مينا:(بإستفسار) بتستنوه منين مش هو عنده درس وفين بابا (وبتذكير) آها صحيح هيا نتيجة التحليل ظهرت ولاإيه؟!
أحمد:(بحزن) أها ظهرت وجيبتها وأنا جاي من الكلية وطلع نسبة الروماتيزم عالية جداً وهيأخد حقنة طوال المفعول كل 15يوم ..
مينا:(بحزن) ياربـي!! طيب وهو فين الوقتي؟!
نيرة:(بحزن) نزل مع باباك لعمك يحيي تحت نزل بالعافية ربنا يستر بقي ومايتعبهومش تحت..
مينا:(بحزن علي محمد) ربنا يشفيه..
(شوية وجرس الباب ضرب تاني راح مينا بفتح لقي باباه ومحمد اللي بيعرج من الحقنة وباين عليه إنه معيط بصله بحزن ومسك إيده ودخله وقعده وقعد جنبه وكلهم قعدوا معاهم علشان يطمنوا على محمد)
مينا:(بحنية وبيمسح علي شعره) ألف سلامة عليك يامحمد عامل إيه الوقتي؟!
محمدسعد:(بدموع وتعب) الحمدالله ..
نيرة:(بإستفسار وحزن علي إبنها) عملتوا إيه ياسعد تحت والدكتور يحيي قالك إيه؟!
سعد:(بتنهيدة حزينة) مافيش عمله إختبار حساسية الأول علشان يشوف هينفع يأخدها ولالا فطلع ينفع يأخدها وأخدها بعد عذاب وعياط..
نيرة:(بحزن) عامل إيه الوقتي ياحبيب ماما لسا بتوجعك؟
محمدسعد:(بدموع) صعبة والله ياماما رجلي واقفة عليا والله ماعونتيش عاوز أخدها علشان خاطري..
أحمد:(بحزن) معلهش ياحبيبي علشان تبقي كويس ياحمادة والنسبة دي تخف لإنها عالية وممكن تأذيك..
مينا:(بص لباباه بتساؤل) هيا هتفضل بتوجعه كده يابابا ولا عمو يحيي قالك إيه؟!
سعد:(بحزن) أها هتتعبه شوية النهاردة وبكرة وعلشان كده مش هيروح المدرسة بكرة هيروح على دروسه علي طول بإذن الله تكون رجله خفت شوية ..
هايدي:(بدموع) وهيقدر ينزل الدروس يابابا؟!
سعد:(بهدوء) بإذن الله علشان مايضيعش عليه شرح ودروس كتيرة ربنا يسهلها بكرة باذن الله ماتقلقوش..
نيرة:(بتنهيدة وبصت لمينا وأحمد) طيب خدوا أخوكم الأوضة يلا علشان يرتاح علي أما أعمله حاجة يأكلها ..
محمدسعد:(بدموع وتعب) مش عاوز أكل ياماما ماليش نفس..
نيرة:(بتجاهل لكلامه) قوم يللا يامحمد مع إخواتك علشان ماتتعبش ياحبيبي..
(مينا مسك إيده وقومه معاه وأحمد كان معاهم ودخلوه الأوضة ونيموه على السرير وسط تعبه وتوجعه من الحقنة شوية ومامته عملتله أكل ودخلتهوله وكلهم دخلوا معاها وقعدوا يتكلموا معاه ويلهوه عن وجعه من الحقنة)
................................................................................
(فـي المعهد ظهر ليث واقف قدام الأوضة بتاع الدرس بتاعه وكان واقف معاه محمدعباس بيسأله على حاجة فـي المنهج)
ليث:(بجدية) ها كده فهمتها؟!
محمدعباس:(بهدوء) أها فهمتها يامستر الحمدالله..
ليث:(بجدية أكتر) متأكد ولا وقت الجد هتيجي تقولـي لامش فاهمها !!
محمدعباس:(بهدوء) لا والله فهمتها ماتقلقش..
ليث:(بإبتسامة) طيب كويس أومال فين محمدسعد مختفي النهاردة ف المدرسة والوقتي..
محمدعباس:(بقلق علي صاحبه) مش عارف يامستر والله ماجاليش قبل الدرس ولقيته إتأخر فجيت وكنت ناوي أروحله بعد الدرس لو ماجاش..
(وهما بيتكلموا لمحوا محمدسعد داخل من الباب وباين عليه التعب فـي نفس الوقت اللي سراج خرج من الأوضة بتاعته لمح محمدسعد واقف مع ليث وعباس فراحلهم)
محمدسراج:(بتساؤل وبص لمحمدسعد) جيت ليه مش بابا قالك إرتاح النهاردة..
محمدسعد:(بتعب)عادي يامستر علشان مايفوتنيش حاجة كفاية المدرسة..
محمدسراج:(بإستفسار) طيب إنت عامل إيه لسا تعبان؟!
محمدسعد:(بتعب) يعني شوية الحمدالله..
ليث:(بصلهم الإتنين بإستغراب) هو فيه إيه محمد ماله!!
محمدعباس:(بخوف ومسك إيد محمدسعد) مالك يامحمد إنت كويس؟!! أنا رنيت عليك كتير وماردتيش عليا وماجيتش علشان نروح الدرس سوا فجيت وكنت هجيلك أطمن عليك بعده إنت كويس!!
محمدسعد:(بتعب) أنا كويس يابيسو ماتقلقش..
ليث:(بص لسراج بإستغراب) هو محمد ماله ياسراج أنا مش فاهم أي حاجة؟!
محمدسراج:(بص لمحمدسعد بتنهيدة وبص لليث) مافيش كان باين بقاله فترة بيشتكي من رجله وبابا لما عرف طلب منه تحليل وحلل وطلع نسبة الروماتيزم عنده عالية وبابا كتبله علي حقنة طوال المفعول كل 15يوم وكانت أول حقنة إمبارح وإنت عارف الحقن دي تقيلة فكان تعبان إمبارح لما أخدها وبابا قاله ماتنزلش النهاردة وإرتاح بس هو كالعادة دماغه ناشفة ونزل..
ليث:(بصله بحزن) ألف سلامة يامحمد طيب نزلت ليه ماكُنت تيجي البيت وهشرحلك الحصة عادي..
محمدسعد:(بتعب) عادي يامستر مافيش حاجة أنا كويس..
محمدعباس:(بزعل على صاحبه) ألف سلامة عليك يامحمد إنت كويس؟!
محمدسعد:(بإبتسامة يطمنه) أها كويس والله الحمدلله..
محمدسراج:(بضحكة وهزار) اللي يشوفك بالهدوء ده الوقتي مايشوفكش إمبارح خرمتلي ودنـي وصدعتني بعياطك..
محمدسعد:(بزعل) ماهيا الحقنة والله صعبة أنا مش حاسس برجلي أصلاً..
ليث:(بإبتسامة) والله يامحمد إنت فكرتني بمثل كده بيقولك اللي بيخاف من العفريت بيطلعله وإنت ماشاء الله بتخاف من الحقن وإتهريت..
محمدسراج:(بضحكة) المنحوس منحوس ..
محمدسعد:(بصله بضيق مُصتنع وبتعب) أنا أصلاً ماعوتيش هأخد الحقن دي لما ال15 يوم يعدوا يكونوا نسوا بقي..
محمدسراج:(بضحكة)هما ينسوا أنا أفتكر عادي يعني آل مش هتأخدها تاني آل علشان تتعب بقي وندخل ف متاهات تانية..
محمدسعد:(بخوف وتعب) ماهيا صعبة يامستر والله وبتوجع جداً مش هستحملها تـاني ..
ليث:(بإبتسامة يطمنه) ماتشغلش بالك بقي باللي جاي ده لسا 15يوم يعني إنساها خالص وبإذن الله كله هيعدي يللا بقي علشان الكلام أخدنا والدرس معاده جه..
(مشي محمدسراح راح أوضته وليث أخد محمدسعد ومحمدعباس ودخل وبدأ يعطيهم الدرس هما وزمايلهم وسط تركيزهم)
..............................................................................
(في بيت سعد ظهر جرس الباب بيضرب راح مينا يفتح لقى محمدشاهين بصوا لبعض شوية من غير كلام)
محمدشاهين:(بإبتسامة) مش هتدخلني ولاإيه!!
مينا:(بإنتباه) ها معلهش يامحمد ما أخدتش بالي تعال إتفضل..
(دخل محمدشاهين ومينا قفل الباب وراه وبصوا لبعض)
محمدشاهين:(بعتاب) لقيتك ماسألتش قولت أسأل أنا..
مينا:(بحزن) والله كنت هكلمك إمبارح لما جيت من الكلية وأشوف ماجاتش ليه بس محمد كان تعبان وإتلبخت معاه والنهاردة زي ماأنا عارف ماعندناش محاضرات وكمان كنت سايبة تهدي مع نفسك كده لإني مش هستحمل يحصل حاجة فـي صحوبيتنا بإنفعال منك فـي وقت غضب..
محمدشاهين:(بعصبية بسيطة) بطل غباء يامينا لإن إنت عارف إن اللي بينا مايقدر يهده حاجة وبعدين زي ماأحمد غلطان فكارمن غلطانة وبعدين صحوبيتنا أقوى من كده يامينا ..
مينا:(بصله بإبتسامة وحضنه) ربنا يديمك في حياتي يامحمد والله ماتعرفش كنت شايل هم إزاي وأنا مفكرك زعلان مني..
محمدشاهين:(بضحكة) م أنت علشانك غبي آل زعلان منك آل صبرني يارب المهم محمد ماله إنت بتقول تعبان؟!
مينا:(بتنهيدة حزن) مافيش ياسيدي ده نسبة الروماتيزم عنده عالية وأخد حقنة طوال المفعول إمبارح..
محمدشاهين:(بحزن) ياربـي!! ده الحقنة دي صعبة ربنا يعينه عليها ويشفيه يارب..
مينا:(بحزن) أها والله أخدها إمبارح وكان لسا تعبان حتى وهو نازل الدرس النهاردة ربنا يشفيه..
محمدشاهين:(بهدوء) يارب أحمد هنا؟!
مينا:(بهدوء وضحكة) أها جوا في الأوضة بيذاكر تعال ندخل أصلاً الكلام أخدنا ونسيت إننا واقفين على الباب لسا..
(دخلوا الأوضة ظهر أحمد قاعد بيذاكر بص على اللي داخل لقاه مينا ومعاه محمدشاهين بصلهم بتوتر وقام وقف)
محمدشاهين:(بصله بتنهيدة ورجع بص لمينا اللي بيبص عليهم بتوتر ورجع بص لأحمد تاني) إزيك ياأحمد عامل إيه؟!
أحمد:(بتوتر) الحمدلله..
محمدشاهين:(بجدية) تعال أقعد عاوز أتكلم معاك شوية
(أحمد بصله بتوتر وراح قعد جنب مينا على السرير ومحمدشاهين قدامهم على السرير التاني)
محمدشاهين:(بجدية) ها ياأحمد سامعك إحكي..
أحمد:(بتوتر) أقول إيه!!
محمدشاهين:(بجدية) قول كل اللي إنت عاوز تقوله ياأحمد أنا سامعك..
أحمد:(بص لمينا ورجع بص لأحمد) أنا بحب كارمن يامحمد والله صدقني مش بلعب بيها صدقني..
محمدشاهين:(بجدية) أنا ماقولتيش إنك بتلعب ياأحمد بس برضو اللي بيحب حد مش بكلمها من ورا أهلها ولا بيخرج معاها من ورا أهلها..
أحمد:(بسرعة) والله كانت أول مرة نخرج والكلام مش بنتكلم غير فين وفين وف الكلية بطمن عليها بس وخلاص (محمدشاهين فضل باصص عليه وساكت كمل أحمد كلامه بقلق وحزن) محمد إنت مش مصدقني؟!!
محمدشاهين:(بتنهيدة) مصدقك ياأحمد وأنا واثق فيك وواثق إنك بتحب كارمن بجد بس هطلب منك طلب..
أحمد:(بلع ريقه وبتوتر) إتفضل..
محمدشاهين:(بجدية) إبعد عن كارمن ووقت ماتخلصوا كليتكم أنا أول واحد هيقف جنبك لحد ماتكونوا لبعض في الحلال..
أحمد:(بصله بحزن وبص لمينا ورجع بص لمحمدشاهين وسكت)
محمدشاهين:(عارف إنه قرار صعب عليه لإنه باين بيحب كارمن بس لابُد منه وبصله بجدية) ها ياأحمد إتفقنا؟!
أحمد:(بصله بتنهيدة وهز رأسه بحزن) ماشي يامحمد بإذن الله هعمل زي م أنت عاوز ..
محمدشاهين:(بهدوء) أنا عارف إن القرار صعب عليك بس صدقني أنا بعمل كده لمصلحتك إنت وكارمن ياريت متزعلش مني..
أحمد:(بحزن) لالا مش زعلان وكفاية إنك مش زعلان مني..
محمدشاهين:(بإبتسامة) إنت أخويا يالا ومافيش أخ بيزعل من أخوه (وبضحكةوهزار) وهتبقى جوز أختي مستقبلاً إن شاء الله..
(قطع كلامهم مع بعض دخول محمد الأوضة اللي كان باين عليه التعب دخل وسلم على محمدشاهين وقعد على السرير)
محمدشاهين:(بضحكة وهزار) أهلا بالناس بتوع الثانوية ألف سلامة عليك ياكبير إنت الثانوية خلصت عليك وهيا لسا ماخلصتش..
محمدسعد:(بإبتسامة)ولا شكلها هتخلص باين كدهه..
محمدشاهين:(بإبتسامة) هتخلص ياحبيبي كله بيخلص ألف سلامة عليك يارب..
محمدسعد:(بإبتسامة مُتعبة) الله يسلمك يامحمد..
مينا:(بص لمحمد بإبتسامة) إتأخرت ليه يامحمد إنت إستنيت ليث وسراج وجيت معاهم ولاإيه؟
محمدسعد:(بهدوء) لاا جاي مع عباس بس رجلي كانت تعباني وكنت ماشي براحة ف إتأخرت..
أحمد:(بتساؤل) طيب وعامل إيه الوقتي رجلك لسا بتوجعك؟!
محمدسعد:(بصله وقام وقف) يعني شوية وشوية يلا هقوم أغير هدومي وجاي..
(راح محمدسعد أخد هدومه وراح الحمام يغير هدومه وهما باصين عليه بحزن على تعبه شوية وخرج محمد وقعد معاهم شوية يتكلموا ويهزروا وإستأذن محمدشاهين ومحمدسعد راح ينام شوية وأحمد ومينا كل واحد قعد يذاكر على سريره)
...............................................................................
( في المدرسة ظهروا محمدسعد ومحمدعباس قاعدين في البريك وبيتكلموا مع بعض)
محمدعباس:(بقلق) طب إنت كويس ورجلك بقيت كويسة؟!
محمدسعد:(بتعب) آه الحمدلله بقيت كويس عن الأول بس لسه طبعا مكانها بيوجعني جداً بس الحمدلله ..
محمدعباس:(بحزن على تعب صاحبه) الحمدلله ياحبيبي ربنا يشفيك يارب.. (قرب منهم يوسف بصوله بإستغراب)
يوسف:(بإبتسامة) ازيكم يا شباب عاملين إيه!!
محمدسعد:(بصله بتفكير) مش إنت اللي كنت هربت من علي سور المدرسة..
يوسف:(بسرعه وخوف) ياعم إسكت هتفضحنا
محمدعباس: عايز ايه مننا يعني!!
يوسف:(بهدوء) مافيس سمعت إن محمد تعبان جيت بس أطمن عليه..
محمدسعد:(بإبتسامة) شكراً لسؤالك..
يوسف:(بإبتسامة) مش إتفقنا إننا هنبقي إصحاب  أنا عايز رقم موبايلك علشان أطمن عليك بقي..
محمدسعد:(بصله بهدوء وإعطاه الرقم) إتفضل ده رقمي..
يوسف:(بهدوء) تمام هكلمك واتس بقي (ومشي وسابهم)
محمدعباس:(بقلق) محمد أنا مش مرتاح للواد ده وقلقان منه وإنت رايح تعطيه الرقم بتاعك كمان..
محمدسعد:(بإستغراب) قلقان ليه بس؟!
محمدعباس:(بقلق) مش عارف بس مش مرتاح وخلاص..
محمدسعد:(بإبتسامة يطمن صاحبه) بطل قلق بقي يلا نقوم نشوف ورانا إيه..
محمدعباس:(بقلق وقام وقف) ربنا يستر
(محمدعباس ومحمدسعد قاموا وطلعوا الفصل يستنوا البريك يخلص وسط قلق محمدعباس ومحمدسعد اللي بيطمنه
..........................................................................
(عند مينا اللي قاعد في الكلية بيتكلم مع محمد شاهين)
محمدشاهين:(بتساؤل) محمد عامل إيه صحيح؟!
مينا:(بهدوء) الحمدلله بيعد الأيام والله إمبارح بيقولي باقي 11يوم
محمدشاهين:(بحزن) الحقنه صعبة جداً أنا أخدتها وأنا في الإعدادى فترة كنت بفرج عليهم أمه لا اله الا الله
مينا:(بضحكة) مانعتبش ونلوم علي محمد بقا لم بيبهدلنا وصوت عياطه بيبان وهو بياخدها ..
محمدشاهين:(بضحكة) لا ماتعتبوش عليه أبداً ربنا يعينه عليها..
مينا:(بحزن) يارب..
(فجأه جيه لمينا رساله علي التليفون فتتحها وبصلها بصدمه محمد شاهين كمل كلامه بقلق) في إيه يامينا (مينا بصله بصدمه ورجع بص للفون وقام اخد حاجته وخرج بسرعه من الكليه ومحمدشاهين أخد حاجته وخرج وراه)
. .................................................. .
ياترى في ايه وايه الي حصل لوحابين تعرفو استنونا الحلقه الي جايه
#hadeer
#hager
#rody