بنت القلب "سلسلة عالم المافيا"

اقتباس

طرق «رماح» باب مكتبه بعجالة شديدة فسمح له بالدخول ، دلف إلى الداخل وردد بلهفة :
- حددنا مكان رفع الفيديو يا باشا ومعانا احداثيات المكان بالظبط
نهض اللواء «ايمن» من مكانه والتف حول المكتب وهو يقول :
- حلو أوي اجهز انت وفاطمة وانا هتواصل مع الوزارة وفي خلال دقايق القوة هتبقى جاهزة للتحرك

على الجهة الأخرى فتح «طيف» عينه على صوت حوله فوجد «غارم» يقف أمامه وكلتا يديه مشتبكتان خلف ظهره وما إن وجده قد استيقظ حتى قال :
- انا جاهز لأي سؤال والمرة دي هجاوبك بكل دقة مش غموض زي آخر مرة سألتني فيها
نظر حوله بحثًا عن «زين» فلم يجده مما دفعه لأن ينظر إليه ويقول متسائلًا :
- فين زين ؟ راح فين ؟
إبتسم نصف إبتسامة واجابه :
- متقلقش هو في الزنزانة اللي جنب دي وبياخد كل الاجابات اللي عايزها زيك وبمجرد ما ننتهي هيرجع هنا تاني ، يلا أسأل واستغل الفرصة ولا أنت رجعت في كلامك
هز رأسه بالنفي والتقط أنفاسه قبل أن يسأل سؤاله المعتاد :
- أنت مين ؟ انتوا مين ؟
إبتسم وهز رأسه بحركة خفيفة قبل أن يجيبه :
- أولا السؤال غلط علشان مفيش حاجة اسمها انتوا مين ولا انا مين لأننا بشر زينا زيكم بس لينا تفكير ومعتقدات غيركم شوية بس هجاوبك بكل وضوح زي ما وعدتك ، إحنا بشر ولينا معتقدات غيركم زي ما قولت ، لينا تفكير خاص بينا .. عبادة خاصة بينا ، إحنا كنا قلة في البداية بس إنضم لينا كتير وانتشرنا في العالم كله ومنهم مصر في اخر فترة ، هدفنا ؟ هدفنا ننشر عبادتنا ومعتقداتنا عند أكبر عدد في كل الدول ونبقى جماعة كبيرة جدا لا يستهان بها ومش قصدنا أي شر لأي حد بس اللي بيحاول يقف قصادنا بنتصدى ليه بس على طريقتنا وطريقتنا دي متطورة عنكم شوية .. بنستخدم عقلنا وعلمنا مش سلاحنا وعضلاتنا ، لية حصل معاك كدا ؟ علشان حاولت تقف قصادي وافتكرت إنك ممكن تهزمني أو تهزمنا ، أنا ناسي أية ؟ ما تسأل ولا أنت مستمع بس
هز رأسه بالنفي واجابه بثقة :
- لا مش مستمع بس ، أنت قولت إنكم ليكم عبادتكم ومعتقداتكم .. اية هي عبادتكم ومعتقداتكم دي ؟
أغلق عينيه ثم فتحها مرة أخرى ليجيبه بثقة :
- كنت واثق إنك هتسأل السؤال ده ، عبادتنا هي عبادة لوسيفر ومعتقداتنا هي إن لوسيفر هو المحرر وهو حامي العهود الأعظم ومحدد الأقدار
شعر «طيف» بالصدمة مما سمعه واتسعت حدقتيه وهو يقول بعدم تصديق :
- لوسيفر !! قصدك إبليس !؟ الشيطان !

إلى اللقاء في حلقة النهاردة من "كن ملاكي" وكشف كل الأسرار والإجابة على كل الأسئلة اللي بتدور في دماغكم 🔥

عبدالرحمن أحمد
الرداد