أكاذيب الحياة

الفصل الخامس

(حبايبي الحلوين 💕 ممكن تصوتوا 😘)

في الإدارة مقمعزة سهام فوق الطاولة و مقابلتها واقفة مرام. كانوا يستنوا في إشارة إسراء.
مرام كانت متوثرة و ما كانتش راضية على اللي تبي اديره. لكن إصرار سهام خلاها تخضع و تنفد اللي تبيه.

أول ما سمعت سهام صوت خطوات حدا الباب و قفت و استعدت باش تدوي.

سهام بتمثيل: "تصدقي اللي شفته في ملف مريم الصراحة خلعني."

مرام بتوثر: "و شن شفتي في ملفها."

سهام: "تصدقي أن مريم بنت غير شرعية!"

مرام : "تكذبي، أحلفي!"

سهام : "و الله الله. هكي مكتوب قي ملفها أنها بدون أب و إن عائلة أمها متبرين منها هي و أمها. تصدقي سخفتني لما سمعت قصتها. تعرفي هي ديما ملتزمة و بعدين تطلع حقيقتها أنها بنت غير شرعية.

مرام :" ايه والله تسخف أكيد حتكون صدمة لها لو عرفت."

في الجها الثانية خلف الباب كانت تسمع في كل كلمة يقولوا فيها عليها. كانت صدمة لها معرفتش شن أدير غير أن جسمها بدأ يرعش.

تحس روحها أنها معش تقدر تفكر من الصدمة. ما قدرتش حتى تكذب الكلام اللي سمعته بدت تمشي بخطوات ثقيلة حتى إسراء اللي تنادي فيها ما سمعتهاش. و صلت للدار و عزقت روحها على سريرها معش قدرت تمسك روحها و بدت تبكي و الدموع ينزلوا و الألم اللي تحس فيه وسط قلبها لا يوصف.

فتح الباب و خشت هند اللي كانت ماسكة دبدوبها الأبيض. أول ما شافت مريم و هي تبكي جتها تجري: "مريوم كنك. كنك تبكي مريوم😢"

مريم ما ردتش عليها و زادا شهقاتها معش عرفت كيف تهدي روحها. أول ما شافت هند طول خدت ضمتها بقوة و كأنها دواء لجرحها.

~😭~

في الجنان الخاص بالدار كانت وحده من المشرفات تكلم بالتلفون.

المشرفة: "ايوه البنت ما شاء الله عليها. اسمها هند (.....) و عمرها سبع سنين."

الشخص: "........"

المشرفة: " ايه زي ما قلت البنت هلها معروفين و البنت بصحتها ما عندهش أي مرض مزمن."

الشخص: "........"

المشرفة: "أكيد تقدر تشوفها هذا من حقك. تو نديرو يوم تجي تشوفها و تتعرف عليها."

الشخص: "........ "

المشرفة:" اي ما فيش مشكلة و شكرا لك للتعامل معانا."

كملت المشرفة اتصالها و هي فرحانة بالاتصال. طلعت مفتاح سيارتها و طلعت من الدار.

اللي ماتعرفاش هو أن عيون أريام كانت تراقب فيها و تسمع في كل كلمة قالتها. كانت مصدومة من اللي سمعاته هي ما فهمتش كل شي لكن أنهم يتكلموا عن هند كان كافي باش تفهم شن يقصدوا.