قراءة ممتعة💜
و صلت للنهاية شارع حوش ياسمين. مزال لازم تمشي للنهاية الشارع هذا و بعدها تاخد إفيكو(حافلة) باش يوصللها حدا المول اللي بيقضوا فيه اليوم.
تنهدت بتعب و كيف جت بتلف إلا و عيونها يتسعوا من اللي تشوف فيه قدامها!
فمها مفتوح من الصدمة و هي تشوف في الشاب اللي ممدود على الرصيف و الدم اللي يسيل من جبهته.بدت ترعش من اللي تشوف فيه. فاقت من صدمتها و قربت بسرعة من الشاب: "يا أخ... يا أستاذ.. يا أستاد....بالله عليك رد! "
ما فيش أي استجابة. طلعت منديل من شنطتها و يدها كان
مكان الجرح. لكن المنديل غرق بدم الشاب.ناضت مريم من حداه و بدت تلتفت زي المهبولة تدور على حد. لكن الشارع كان فاضي حتى السيارات ما فيش.
ما قدرتش تشوف للشاب لأنها تخاف من الدم و هذا خلا جسمها يرعش."حي عليا...شن بندير.... حي..... "
تذكرت بعدها ياسمين: "ايه صح ياسمين...!"
سيبت الشاب الممدود في مكانه و مشت تجري للحوش ياسمين و هي تنادي باسمها.
و صلت قدام باب الجنان و بدت تخبط بالحيل بيديها الثنين: "ياسمين..! ياسمين..!"انفتح الباب و طلع منه سليمان و هو مفجوع من صوتها: "خير! شن في!"
بدت مريم ترعش و تأشر على نهاية شارعهم و بكلام مش مفهوم: "ف.. ف... في.... حد... غ.."
حاول سليمان يهديها: "غير بشوية أهدي و احكيلي."
خدت مريم نفس و تكلمت دفعة وحدة: "في واحد ملوح في نهاية الشارع و راسه ينزف!"
توسعوا عيون سليمان من الكلام اللي سمعه و طول طلع من الحوش: "خلاص أنتي توا خشي أهدي جوا."
و مشي يجري للمكان اللي دلاته عليه مريم و زي ما قالت كان شاب طايح ممدود على الرصيف و راسه ينزف. مش معروف حي و لا ميت.
بعد لحظات جو الجيران و رفعه سليمان هو والجيران و اتجهوا به للمستشفى.
أما مريم كانت مصدومة و ترعش من الدم اللي شافاته. جابتلها ياسمين طاسة ميه، شربتها دفعة وحدة.
مسحت ياسمين على ظهرها: "خلاص مريوم أهدي شوية. بإذن الله ما يصير إلا الخير."
لما تذكرت مريم الشاب رعشت مره تانيه: "كان الدم ينزل منه! أني نخاف من الدم!"
ياسمين بصدمة: "معقولة تخافي من الدم. نحسابك شجاعة. و هذا كله أختك تقرا في الطب."
مريم: "شن دخلني بيها في الطب و لا في البط. الدم اللي شفته ما كانش شوية!...زعما يعيش.. "
ياسمين بخوف: "لا... ان شاء الله يعيش."
حست ياسمين إن مريم مفجوعة: "مريم خليني نوصلك أني للمول، مش حتقدري تمشي بروحك."
أنت تقرأ
أكاذيب الحياة
Romanceهذه الحياة لا تدوم على حالها، فلا تيأس وثق بالله دائماً 🌸🍂 إحذر أن تأذي روح لا تستطيع الدفاع عن نفسها. لا تعش في الدنيا و كأنها دائمة فالحياة الدنيا زائلة و لن تدوم لك و لتنخدع بأكاذيبها. . . . أذكروا الله دائما وصلوا على الحبيب ﷺ💜 . . . روايتي...