وتغيرت الأقدار

ظهور الأم 23

بعد كلمة ناجى ساد الصمت بينهم وتبادلو النظرات المتوترة وامسكت ليلى يد مازن وضغطت عليها بقوة ونظر لها بإرتباك وتلعثم: انا.. كنت .. .لسه بأفكر والله ياعمو وم ..

ضحك ناجى لدهشتهم وضحكت نادية وسمعو ناجى يقول : ياولد ياخلبوص ... أنا كنت مستنى تتجرأ وتتكلم. سناء بنتى قالت لى على كل حاجة وأنا عارف إن فيه بينكم مشاعر جميلة من زمان .....

سناء حكت لحضرتك

ايوه بنتى مبتخبيش عنى حاجة

نادية :شوف البنت... قول رأيك بقى نشفت دمهم

ناجى: موافق طبعا.....إنت شاب محترم وناجح .....كفاية إنك تربية دكتورة ليلى وإنت عارف إنى باحبك بامازن ويسعدنى إنك تطلب بنتى... إن شاء الله أول ماأنزل أجازتى نتفق على التفاصيل وعندى هنا ليك شغل فى الإمارات معايا فى الشركة...

ضحكت ليلى وضمها أسامة وأضاءت الضحكة وجه مازن: مش عارف اقول لك إيه ياعمو أنا متشكر قوى....

ياللا أشوفكم على خير..

وقف مازن وضم ليلى وهو يضحك: أنا مش مصدق.. حبيبتى ياماما ..... مكنتش أعرف إنك كلمتى خالتو...

كلمتها وكنا فى إنتظار رأيى ناجى ...

أغلقت نادية الهاتف وقالت ليلى: كده يانادية توقعى قلبى...

أنا قلت أشتغلكم شوية...

أسامة : الله يسامحك ..

مازن: ده أنا قلبى وقع فى رجليا وقلت أكيد هايهزأنى...

نادية: بالعكس ناجى فرح جدا ...

نزل الأولاد وقالت سلمى : فيه إيه؟؟

ليلى: مازن هايخطب سناء...

هلل أخوات مازن من الفرحة وقالت ليلى: مش هانسالك المقلب ده أبدا.. أنا كان هايجرى لى حاجة..

نادية: سلامتك ياحبيبتى...منظركم كان يهلك من الضحك .... إنت عارفة إن ناجى بيحب الأولاد وطبيعى يوافق...أما أروح بقى علشان أقول لسناء زمانها مستنية على نار..

مازن : إسمحى لى ياخالتو هاقول لها أنا..

وماله ياحبيبى فرحها ..

قبل مازن نادية وأمسك هاتفه وإبتعد بسرعة وجلسو يتكلمو قليلا .

ودعت ليلى اختها على الباب وهى تضحك وقالت: نادية فكرتنى بشقاوتها زمان..

هى كانت بتاعة مقالب؟

يووه يامام عملت فينا كلنا مقالب حتى بابا وماما ...

انا رتحت من ناحية مازن لسه سلمى..

لسه بدرى عليها .... مينفعش الكلام دلوقتى.. نستنى على الأقل لما تبقى فى سنة تالتة ..