وتغيرت الأقدار

الحب القديم 13

فتحت فادية باب الشقة لإبنها وحفيدتها وهى تقول: حمد الله على السلامة..

أسامة: الله يسلمك ياماما ..

قفزت منار ورفعت الميدالية وهى تقول: اخدت المركز الثانى ياتيتا.

قبلتها فادية: الف ألف مبروك ياحبيبتى...

دخل أسامة وجلس فى صمت وظلت منار تخبر جدتها عن المسابقة وماحدث فيها ثم قالت: سلمى صاحبتى اخدت المركز الأول..

صاحبتك اللى إتعرفتى عليها؟؟

أيوه ياتيتا عسل قوى وبأحبها جدا جدا ومامتها ست حلوة قوى ..مش كده يابابا... بابا ..

آه طبعا ..

فادية: ادخلى بقى خدى حمام وغيرى على ما أحط الغداء..

إبتعدت منار وهى تغنى وإقتربت فادية من أسامة وجلست أمامه وهى تقول: البنت طايرة من الفرحة مع انها حققت المركز التانى بس... ومين صاحبتها اللى إتعلقت بيها دى؟؟؟ من ساعة ماعرفتها مبطلتش كلام عنها... أسامة.. اسامة... سرحان فى إيه يابنى؟؟

إنت عارفة قابلت مين النهادة ياماما؟؟

مين؟

ليلى...

ليلى مين؟؟

ليلى ياماما الى كانت بتشتغل معايا فى الجامعة..

اللى كنت عايز تتجوزها ورفضتك؟؟

أيوه هى.. من ساعة ماشفتها وانا قلبى مش بيبطل دق..

تلاقيها إتجوزت.

لأ متجوزتش... بنفس جمالها ورقتها ...بالعكس بقت أحلى..

إنت هاترجع تفكر فيها تانى؟

هو انا كنت نسيتها ياماما؟؟ انا كنت باعمل نفسى ناسى بس النهاردة إتأكدت إنى لسه مشغول بيها.

يابنى متتعبش نفسك دى سبق ورفضتك..

مش يمكن اكون قابلتها تانى علشان تكون من نصيبى..

مش عايزاك تتعلق بالحكاية دى مرة تانية.. انا فاكرة إنت كنت زعلان قد إيه وبسببها سافرت برة وسبتنى..أنا هاقوم احط الأكل...

إبتعدت فادية وتنهد أسامة وإبتسم ..

إستيقظت ليلى مبكرا اليوم تدريب لمازن وقالت لها زهرة: ماتخلى السواق يوديه يادكتورة..

لأ أنا باحب ابقى معاهم فى التدريبات..

بس ده مجهود.. بتروحى الشغل وتوديهم التدريبات وتستنى لما يخلصو.

مش ده برضه واجب الأم...

ربنا يقدرك .. اعمل لكم سندويتشات تآخدوها معاكم..