شـقّ الـغَـمـام

(٤٦)

..(٤٦)..
اللهم صل وسلم على نبينا محمد..
استغفر الله العظيم من كل ذنب عظيم..
لااله الا الله وحده لاشريك له..
-
............................................................
      يوم جديد
............................................................
<<بيت مبروكة>>
العاملة بصراخ/ماما مافيه ادخل مافيه
يقين خرجت من الصالة من عند ابوها باستغراب من صوت العاملة العالي
العاملة لحقتها ومسكتها من يدها تمنعها من الدخول
يقين وقفت تناظرها/كبيها
العاملة تركتها بملامح غيظ/انا في قول حق ماما مبروكة هي شوف اش انتا يسوي/مشت بخطوات سريعة لغرفتها/
يقين/حياك الله ياعمة
منيرة دخلت بحطوات سريعة وقفت قبالها وضربتها كف
يقين ماتوقعت هالكف بلحظة ابد ناظرتها
منيرة بقهر اتضح برجفة صوتها/يومك ناويته من مبطي علامك رديتي عنه جماعتك
يقين ماردت
منيرة/من الاول كبيتيهم يذبحونه ازين من سواتك الشينة ياالردية
يقين/انا
منيرة قاطعتها/انتي وش،انتي حفيدة مبروكة وين تروحين عنها
يقين شدت على قبضتها بصمت
منيرة/مير درس له ولنا كل ابونا منين ماراحت بنا الدنيا بني سمار مايتغيرون ابد خسيسين دنيين ونفوسهم ماتعرف للطيب مسلك
يقين اخذ نفس وبجمود/طلبت حقي ماقلت شي غريب
منيرة/يامال الحقاق اي والله عسى مالك حق وسط العربان ولايوليك عليهم مير كان سامح وحلل روحي ماانتي بمسموحة ولا محللة جعلني اشوفها فيك يايقين/مشت وخرجت/
يقين ناظرت قفاها المبتعد جرت خطواتها للغرفة وانحنت تمسج ابوها ناظرته بابتسامة تتجاهل ماحصل/يبه شد حيلك ودنا نشوفك تمشي/نزلت نظرها على يديها تمسجه تساقطت دموعها بدون شعور رفعت يديها وضحكت من حست دموعها وبابتسامة وسط انسياب دموعها اللي تمسحها باطراف اصابعها ولا وقفت/مدري علامي
منصور ناظرها بضيق على حالها/وانا ابوك لاتغصبين نفسك عالردى ولاتكتمين بقلبك الوجع طلعيه يابنيتي طلعيه
يقين دفنت وجهها بطرف السرير وانهارت تبكي بوجع على اللي الحال اللي وصلت له
...........................................................
.
بارود واقف بالسيارة عند باب البيت
مبروكة خرجت من الحوش ركبت السيارة وجلست ورا/هاه يابارود وش صار مع سهم
بارود/لحقته مير ضيعته وسط المزارع
مبروكة ابتسمت/هينة ذي ماحنا بضايعين ابد لا وصلنا المزارع
بارود/البيت؟
مبروكة بابتسامة انتصار/لا يم المزارع يابارود يمها
............................................................
<<غرفة التحقيق>>
شاهر ماذاق النوم جالس على الكرسي خلف الطاولة بملامح قلق مرتسمة على وجهه
عساف الواقف بلبسه العسكري برا باب غرفة التحقيق يناظر الاوراق بين يديه التفت/محمد/سكت من استوعب عدم تواجده ولازال بمهمته تنهد/هاه كيفه البارح عبدالمحسن
عبدالمحسن/اموره تمام متماسك باقي ماانهار
عساف ابتسم وعينه بالورق/ماهو بمنهار وهو مبطي بهالشغلة/مد له الاوراق فتح الباب ودخل ثم قفل الباب وراه/حي الله شاهر
شاهر بغيظ/انا مظلوم ورطوني ومالي ذنب
عساف بابتسامة/المظلوم تعاملنا معه اربع مرات
شاهر انخطف وجهه
عساف/وبكل مرة يجيب الكمية اللي نطلبها بالراحة بدون يتاخر حتى
شاهر/كذب انا مالي شغل بشي
عساف سند ظهره عالكرسي براحة/ترا الانكار مايفيد لابستك القضية لابستك
شاهر ضم يديه ببعض بتوتر
عساف/ممكن ٢٠ ٢٥ سنة عالاقل مع هالنوع اللي تشتغل به
شاهر اتسعت عيونه بذهول
عساف/لكن تقدر تنقص هالسنين للنص ويمكن اقل اذا تعاونت معنا
شاهر عقد حواجبه بتفكير
عساف اعتدل بجلسته وثبت يديه عالطاولة/هات الاسماء وابشر العقوبة خفيفة
............................................................
.
بـيّـن وقف بالسيارة عند حوش وادي سرّاي التفت يناظرها/تعالي مكاني اي شي يصير ادعسي وامشي لاتحتريني
يقين مدت يدها ليده وبرفض/رجلي على رجلك كيف تبيني اكبك هينا
بـيّـن سحب يده منها/ماهو بوقت عنادك اسمعي الكلام يايقين/نزل من السيارة/
منصور الجالس ورا/اسمعي لرجلك يابنت هو ادرى منك
بـيّـن وقف قبال باب الحوش بثبات بدون تخفي يعلن لاصحابه انا جيت هالمرة جيت بأكشف اللي يصير لكل الخلق وبأقصى احلامكم تمنعوني رفع يده وطرق الباب
ديوان فتح الباب بابتسامة/ياهلا ومرحبا يابيّن ياهلا ومرحبا 
بـيّـن ناظره/من موجود داخل غيرك
ديوان/محد غيري موجود/تنهد/كم لي احتري هالزيارة يابـيّـن وياطول صبري ويازين تاليه
بـيّـن ابتسم مجدد لحبال الوصل بينهم/لذالحين شوفة هالوجه سمحة تمسح على صدري وتشرحه
ديوان تقدم له واحتضنه بدون ينطق حرف كان هالحضن بمثابة اعتذار عن سوء افعاله وخياناته بعين بـيّـن والحقيقة كانت كل هالافعال حتى يساعده كان ولازال في صميمه صديق بـيّـن وبـيّـن الصديق والمنقذ له من الوحدة
بـيّـن اكتفى بابتسامة قبول لهالحضن بدون لوم وعتاب
ديوان تركه/حياكم حياك
بـيّـن التفت للسيارة يناظرها
يقين نزلت من السيارة وفتحت الباب الخلفي
بـيّـن اتجه لهم ونزل الكرسي المتحرك من السيارة/ادخلي للسيارة
يقين التزمت بامره بدون اعتراض
ديوان اتجه للسيارة وساعد بـيّـن وجلسوا منصور عليه ثم شالوا الكرسي وثبتوه على بلاط الحوش التفت يناظر بـيّـن/انا بغرفة المراقبة اجمع الاغراض كان بغيت شي نادني/مشى/
يقين نزلت من السيارة بسرعة ومسكت يدين الكرسي المتحرك ودفعته
منصور عينه عالباب من دخل لهالحوش نبضات قلبه المتسارعة وتوتره اتضح على يديه الراجفة اخيرا وصل لهالمكان اخيرا بعد طريق طالت مدته وصل بعد خمس سنين وصل للوجهة المنشودة وصل حتى يحرره من الظلم والوحدة بهالمكان
بـيّـن تقدمهم وخرج المفتاح فتح القفل ثم فتح رمز الشاشة وانفتح الباب
يقين دفعت منصور
منصور مد يديه لعجلات الكرسي وحركها باندفاع سريع باتجاه ذاك المقيد بالسلاسل بوسط هالغرفة
حبيس الغرفة/ديوان علامك كسرت كلامها ناوي الشر لعمرك
منصور رجف صوته وامتلت عيونه دموع/عسى الشر والشرير ينزل بي على ذا البطى يااخوي عساه
،
،
~~قبل خمس سنوات~~
منصور جالس عند البركة يناظر ابو فالح وبحضنه شنطة داخلها اوراق ومبلغ مالي كبير من منظره مافكر حتى يعده ناظر الورق ومافهم كله كلام يخص الزراعة واغلب الاوراق بلغة انجليزية
ابو فالح واقف قباله بملامح مرعوبة/انا انتخيت بك يامنصور لاتكبني لعيد تكفى يامنصور
منصور اللي وصل اخيرا للشي اللي شاك فيه وتعب وهو يدور عليه بدون فايدة تنهد/يعني امي تتاجر وشريكها ابو مظفر اللي يقال له عيد
ابو فالح/هالرجل ماهو مضبوط عجزت وانا افطن مبروكة
منصور ناظره بحدة
ابو فالح/سمعته وهو يتفق مع ربعه يتتبعون امك ويعرفون كيف الزراعة وطريقتها ويوم علمت امك طردتني ودرا عيد مير ماني بخسيس ابيع جماعتي تكفى يامنصور فكني منه تكفى
منصور تنهد بضيق/ابشر ياابو فالح عليك الامان ابشر/ناظر جواله اللي اعتلى باسمها وتجاهله دخل يده بجيبه ومد له مفتاح سيارته/هاك وروح يم مجلسي مابيقدرون عليك
ابو فالح/وانت؟
منصور/ابعود بسيارتك
ابو فالح انحنى وقبل راسه/سلمت ياشيخ سلمت/مشى/
منصور يجمع الاوراق بداخل الشنطة مايفهم شي عن هالامور كل اللي يعرفه ان شباب الديرة هالسنين يتزايد عدد المتعاطين فيهم كل سنة عن اللي قبلها واللي زرع الشك بقلبه اكثر ان بعض شبابهم يختفي ويلقونه متوفي واسباب وفاته طبيعية وكل الامور المحصورة بتفكيره تنتهي عند امه تنهد بحيرة هل يبلغ او يصارحها لعلها تلين وتعترف برضاها وتخف عقوبتها ويرتاح باله رفع عينه من سمع نداه
ابو فالح وقف/ياشيخ به علمٍ ثاني
منصور باستغراب/ماورا هالعلم
ابو فالح/الا به علم وصعيب بالحيل
...
مبروكة ردت على جوالها/ياهلا
ابو مظفر/ياام زايد العين تقول خويك عند شيه قبيلته
مبروكة انخطف وجهها
ابو مظفر/شورك نفس ماهو نخلص عليه وعلى من معه
مبروكة بحدة/لا
ابو مظفر/هاه
مبروكة/الخاين يذبح والشيخ انا اتصرف معه
ابو مظفر بسخرية/مير الشيوخ مايرضون على انفسهم مثقال ذرة تخبرين 
مبروكة/وش عليك بشيخنا انا طلبتك اتوصى بالخاين والباقي ارفع يديك عنه ياعيد/قفلت بوجهه وبمعرفة عميقة لابو فالح وتوقعها الصحيح للي بلغ فيه منصور واتصلت/
عزيز(٢٣سنة)بابتسامة/هلا ياسحابة قلبي وبركة حياتي
مبروكة/عزيز
عزيز عقد حواجبه من صوتها/جدة عسى ماشر
مبروكة/اسمع ياعزيز عمك يم سبيل ابو محمد رح وحاول ترده عن وادي سراي/
عزيز تغير وجهه
مبروكة/يسد ابوك ماودي افقد عمك
عزيز/وكان عيا يسمعني ياجدة
مبروكة/حدّه يتوذى شوي بالمستشفى ويطلع ازين من انه يموت ياعزيز
..
منصور يسوق السيارة بسرعة جنونية برجفة يديه الواضحة وعدم قدرته على تهدية نفسه ثبتها عالدريكسون يحاول يوقف هالرجفة لكن كل اللي صار انه خفف منها شوي بس بملامح كلها صدمة من اللي سمعه يتوقع كل شي من امه الا   هالشي المرعب منها ماتوقعه ولا طرا عليه ولا مرته لحظة شك بانه ممكن يصير وفوق كل هذا من ام هلت دموعه بحسرة ووجع قلب لهالسبب رفضت تتركه يغسله ويكفنه ولهالسبب كانت الجثة متفحمة(رحمةٍبك)عذر سخيف اجبرته يرضى فيه ويتبعه بكى بوجعه على اخوه طول هالسنين محبوس ينتظر الفرج ولا لاح بارقه ابد/ويل قلبي يازايد ويله وش هالمصايب اللي وقعنا به يااخوي وش/التفت يناظر السيارة جنبه/
عزيز يسوق جنبه بنفس سرعته يضرب عالبوري/عم منصور ياعم
منصور رق قلبه رحمة بهالولد لو يدري وش حصل بابوه يمكن يقتل جدته اسرع متجاوزه يبي يضيعه
عزيز اسرع وراه وحدّه مجبره ينزل عن الطريق الاسفلتي
منصور مع سرعته ماقدر يسيطر عالسيارة وتقلبت فيه وسط هالخلا
،
،
زايد المقيد بالسلاسل كل مافيه زاد طوله عن الحد المعقول من قلة النظافة والطول كل شي فيه طويل(شعره لحيته اظفاره)الوحيد اللي بمقاسه هو ثوبه اللي غيره قبل اربع ايام رجف قلبه من عرف صاحب الصوت وصدرت منه شهقة/منصور
منصور بدموعه انحنى من الكرسي وطاح عالارض يفك اقفال السلاسل بوسط شهقاته ودموعه/ويل حالي حالك يازايد يابعد عيني يازايد
زايد فاضت دموعه برجفة صوت/يامال الجنة يامنصور ياحي ذا الصوت وراعيه ياحيه
منصور سحب نفسه عالارض ومد يده لراس زايد وقربه منه وقبله ثم قبل كفه واحتضنه وسط دموعه/واشيب عيني عنك يااخوي واشيباه
زايد بادله الحضن بدموعي/محسن(ابو فالح)بشرني منصور بيلفيك واليوم كمالة الخمس سنين واربعة اشهر وانا لاعينت محسن ولاعينتك
منصور بكى/سامحني يااخوي سامحني ماابطيت من رايي سامحني
يقين تناظر ابوها و عمها بأسى وسط انهيار دموعها السبب اللي تخلت عن بـيّـن لاجله كان سلامة ابوها وعمها التفتت تناظره وهو على مسافة كم خطوة منها ومدت يدها ليده واحتضنت كفه
بـيّـن سحب كفه من كفها بصد وبدون يناظرها
يقين تناظره بدموعها امتلت وجع فوق وجع هالمنظر اللي قدامهم ضمت كفوفها ببعض بحسرة وندم توقعت يلين قلبه ويحن لافهم وشاف هالمنظر لكن لازال نفس ماهو ماغير رايه ولا اثر فيه اللي شافه شالت نظرها عنه وانهارت بينها وبين نفسها على نفسها ضيعت من يديها الشي الوحيد اللي تحبه من كل قلبها خرجت الدفتر من شنطتها وثبتته بين كفها وكفه محتضنته
.
<<مجلس الديرة>>
//زينت العقود كل بيوت الديرة واضوتها الليلة ماهي باي ليلة،ليلة ترقص فرح بسلامة الشيخ السابق منصور اللي للحين شيخ بعيونهم،القدور فوق النيران والدلال وسط الشبة المتوسطة المجلس ريح العود يلف المكان سوالف الرجال وضحكهم منظر البهجة باختصار مغطي المجلس،،وبصدر المجلس جالس الشيخ منصور//
سطام جالس عن يمين ابوه بابتسامة مستقبل ضيوفه
طاهر جالس وعن يمينه ويساره احفاده ماعدا بـيّـن بين يديه الاسورة ينتظر الفرصة حتى يواجههم
ابو عايد همس له/المعذرة ياشيخ  مير وش صار عالاي علمتك
سطام وقف/ياعرب يابني جلوي
//لف الصمت المكان//
سطام/مانسيت موضوعكم ابد يشهد الله مير يوم جيت احاجج عنكم عيت سحاب
//لف الاستغراب المتواجدين//
سطام/سحاب منعت عنكم معونة الخيرية ويوم علمتها قالت ابيها على عيون القوم/التفت للباب بثقة من تواجدها وراه/ها ياسحاب وش قولك باللي قلته؟
سحاب بابتسامة/اي بالله صحيح
ابو عايد/ليه طيب ليه رضينا يوم منعتي الرواتب تقطعين المعونة ليه!!
سحاب/انا مااداني من يرد الطيب برداه
سطام عقد حواجبه
سحاب/كم لي وانا اعطي وابذل ومااتهاون عشانكم وعند اول مشكلة كبيتوني وجحدتوني
ابو عايد/وش هالهرج
سحاب/مير ماني بردية ابد المعونة باتوسط لكم واردها والراتب بأرده بعد
سطام سكت بشك
سحاب/على شرط تعزلون سطام عن الشيخة وتردون عزيز شيخ
//اعتلت اصوات الاعتراض والرفض لعزيز ولرايها//
ابو عايد بحدة/خابر السحاب لاهلّ يهل بكل مكان مايتخير على هواه
سحاب/العلم وسمعتوه وكان باقي على رايكم تعشوا والله يستر عليكم
منصور/مير  المعونة هينة
سطام ابتسم من صدح صوت ابوه بالمجلس اجتاحته مشاعر شوق وحنين لهالصوت بهالمكان استرجع ذكريات طفولته ومراهقته الجميلة تحت ظل ابوه ووقوفه بوجه سحاب وهذا نهجه مثل ابوه
سحاب رجف قلبها من صاحب الصوت كم اشتاقت له واشتاقت تسمعه فرحت اقصى الفرح مثل اي ام  يوم درت بسلامته رغم خوفها لكن الرعب بهاللحظة داهمها منصور يعرف كثير وكثير جدا وهو صاحب المبادئ مايهمه احد شدت على كفوفه بتوتر وخوف لاول مرة صمته هالفترة وتمثيله المتقن مايبشر بخير تاكدت رجوعه هالمرة بداية نهايتها على يدينه زغرطت بفرح من قلبها بسلامة ولدها وسط انهمار دموعها بكون هالمرحلة نهاية ولدها بعد
سطام عقد حواجبها
سحاب/الحمدلله عالسلامة يامنصور الحمدلله
منصور/ الله يسلمك ياسحاب مثل ماقلت المعونة هينة نطارد وراها مير الرواتب صادقين تبونه؟!!
ابو عايد/زيادة الخير خيرين
منصور/حتى لو ان الخير ذا مال حرام!!
//عم الهمسات المكان بحيرة//
طاهر ابتسم ودخل الاسورة بجيبه بقناعة ورضا
سحاب تتعرق بغزارة/وش هالكلام يامنصور
بـيّـن دخل لبيت الشعر و وراه رجل متلثم على عكازه/وهذا الصحيح ياسحاب
سحاب بحدة/باقي الراعي يصول ويجول وسطنا صدقت روحك شيخ يوم ناسبت الشيوخ
بـيّـن ابتسم/مير الرعي مابه عيب ولا حرام مثل خيرك والعيب اللي يدري باللي يسويه خطأ ومكمل دربه به
سحاب عضت شفتها بغبنة منه
بـيّـن/وحكمك علي بالرعي كل ابوه من اوله جور وظليمة
سحاب بحدة/معصي وتكذب مايلحق المخطي الا جزاه
منصور/لا بالله صادق ظلمتيه سنين وبنين لانه شاف وعرف الحقيقة ياسحاب
سحاب شدت على قبضتها بقهر
منصور/مامات الحلال الا من العلف اللي سلمتيه لبـيّـن وانتي قاصدة تورطينه
سحاب/تظلم امك يامنصور لاجل راعي!!
منصور/الحق مابه ام ولا ابو
سحاب/تعقب
/والذي ذبح حلال الديرة هاك السنة هي نفس العشبة مخلوطة بالعلف وراح بـيّـن و خلف ضحيتها
بـيّـن بقهر/كل ذا عشاني شفتها هي وربعها يدسون بلا بفم مبارك وعقبها لفى هالمجلس ميت
سحاب/وينه دليلك ماترمي تهايمك بهاللون
منصور/دليلي موجود وهذا هو ورا بـيّـن
زايد فتح اللثام عن وجهه/مسيتوا بالخير ياالوجيه الطيبة
سحاب جثت عالارض بفزع من وصلها صوته
//اعتلى المجلس اصوات تسمي وتتعوذ من ابليس واصوات فزع//
بـيّـن رفع صوته/ادمي ماهو بغيره هذا الشيخ زايد وكل ابوكم تعرفونه
زايد بلا تردد/سحاب حبستني سنين لاجل اني عرفت الحقيقة مثل ماعرفها بـيّـن  كم واحد دخل وادي سراي وتوفى ظنكم صدق جن لا بالله كل من يدخل ويشوف حقيقته ويعرفها يموت كل ابوهم شافوا العشبة الممنوعة وهي ماقصرت منعت الخير لايطلع بطريقتها
سحاب برعب ولعثمة/كذب يابني سمار كل ابوه كذب وشلون اضر قومي
زايد بحدة/ضريتي ولدك ماانتي بعجزانة عن عيال الناس ذنب كل واحد دخل للوادي وتوفى برقبتك
منصور/ياجماعة على كثر مايوجعني اللي باقوله مير اني مسؤول ومحاسب عن كل حرف انطقه ولا اخفيه امي تتاجر بعشبة مخدرة والفلوس اللي تاخذونها منها
//انصعقوا القوم باللي يسمعونه فلوس حرام،عيالهم انقتلوا،وبعضهم يتعاطى وكانت هي السبب متلبسه قناع الخير على الديرة//
//هجموا اهل الشباب المتوفين عالباب الفاصل يكسرونه بغضب وغدر واحساس الغفلة والخيانة//
منصور يناظره بدموع تهل يدري امه بتفلت منها لكن يوجعه قلبه من هالمنظر وهالحقد المنتشر بالمكان عليها
زايد ناظرهم بهدوء ولوم لامه ماندم ابد وهو اللي حذرها لو يطلع من هالحوش بيقول كل شي ويفضحها
بـيّـن يناظرهم بنبضات قلبه المتسارعة برجفة احتوت جسمه وعينه عليهم كم ناظر هالباب وتمنى يكسره ويدخل عليها ويقتص منها كم بكى دم من ظلمها وعاشت ورا هالباب منيعة متجبرة متسلطة عليه وعلى اهله بكل لحظة كم تمنى يشتت هالغمام واخيرا وصل هاليوم امتلت عيونه دموع بغصة اخيرا جا اليوم اللي شقّ فيه الغمام ناظر الرجال وهم يتدافعون لداخل البيت من الباب اللي كسروه جر خطواته لبرا المجلس وناظر السما صافية زفر بعبرة احتلت صدره/بكرة تشرق الشمس صحيح على بني طاهر بعد عنا بكرة بتشرق وينجلي الغمام ويتشتت كل ابوه يابعدك يابكرة بعداه
طاهر وقف جنبه بابتسامة/لا ماهو ببعيد كل ابوه كم ساعة ويتبدد هالظلام وانا جدك
سحاب جرت خطواتها بسرعة مبتعدة برعب وهي تسمع اصوات الضرب عالابواب بيدها جوالها تتصل على بارود
بارود بانفاسه السريعة/ياعمة انا بالسيارة مير القوم انهبلوا يلاحقوني ملاحق تقل ذبحت لهم احد
مبروكة/انا احتريك من يم البيت غرب
بارود/مير مابه باب وشلون تطلعين يمي
مبروكة/اعجل يابارود وكب النشدة اعجل
//بعد اربع ساعات من الهروب//
بارود واقف بوسط المزراع بضيق/والدبرة ذالحين ياعمة
مبروكة برجفتها/بسيطة ماعليك احلها/خرجت جوالها من جيبها حتى تتصل ووصلها الاتصال صرت على اسنانه بكره وهي مجبرة تسايره/ياهلا توني باتصل عليك/سكتت وهي تسمعه وشحب وجهها/
............................................................
<<بيت الشعر الخاص بابو مظفر>>
مبروكة دخلت للخيمة مستندة يدها بيد بارود بخطواتها السريعة ونبضات قلبها الاسرع بخوف وقلق وبيدها الثانية الشنطة صرخت/يااو مظفر جيت جيت وجبت اللي تبيه كبّ عزيز كبّه/مشت حتى وصلت عنده ومدتها له/خذ وكب عزيز كبه
ابو مظفر جالس بصدر خيمته على كرسيه المذهب بغروره المعتاد ناظر حارسه واشر له ياخذها منه
الحارس انحنى مسك الشنطة
مبروكة شدت عليها وهي تشد على اخر امل لها بسلامة عزيز
ابو مظفر ارتفع حاجبه من حركتها وقف وصرخ بحدة/ارموه للكلاب
مبروكة بفزع/هاك هاك خلاص
الحارس سحبها من يده
بارود احتدت نظرته بغبنة منه
ابو مظفر ناظر الكمية رغم كونها مجزية واكثر من طلبه الا ان قلبه ممتلي على مبروكة ومماطلتها وتسيبها بنظره نطق بغيظ/لاااا مايسد ابد مايسد
مبروكة بحدة/كل ذا ومايسد هذا زيادة عن البضاعة اللي دايم ثلاث مرات
بارود ناظرهم بعدم فهم وش اللي مايسد وش هالبضاعة ناظر اللي داخل الشنطة كانت العشبة اللي جمعها كان يظنها مجرد علف للحلال عقد حواجبه بحيرة
ابو مظفر/ابي اشوف المزرعة وتعلميني طريقة الزراعة
مبروكة بحدة/عزيز بالاول تجيبه لي
ابو مظفر ناظر حارسه
الحارس فهمه وتحرك يجيب عزيز
//بعد دقايق//
بارود رجف قلبه ووصلت رجفته ليده من ناظر عزيز
مبروكة حست برجفة يد بارود وبخوف احتلها/علامك ياولد
بارود يناظر عزيز اللي بدون حركة يتحرك على هوى الحارس بدون ارادته
مبروكة ضربته/بارود وش شفت علمني
الحارس رمى عزيز عندها
مبروكة قشعر جسمها بمعرفة اللي ارتطم بالارض جنبها اكيد عزيز وبرجفة صوت وسط دموع ملت محاجر عيونها/بارود
بارود يناظر عزيز الشاحب وجهه المرتسمة على وجهه معاناته بسحب انفاسه الهادية وكل مافيه على حافة الانهيار وتوديع الحياة التمعت عيونه باسى على حال صديق الطفولة والمراهقة
مبروكة سحبت عزيز لحضنها بصعوبة كل ماارتفع منها يطيح بدون ارادته بشلال دموعها/لا ياعيني لا عزيز ياعزيز لا تروعني
عزيز همس بوجع/جدة
بارود فز واقف وصرخ بقهر/يا****
ابو مظفر سحب سلاحه واطلق على  باورد
بارود ارتمى عالارض بصراخ من الرصاصة اللي توسطت فخذه
ابو مظفر برجله/كان صمل هالليلة ومرت على خير فالحياة قدامه طويلة
مبروكة بدموعها/يالخسيس ياللي مابك مروة
ابو مظفر بحدة/وكان ماعطيتيني اللي ابيه عاد
مبروكة قاطعته بقهر/تخسى وتعقب تعمل بولدي هاللون واعطيك ماتريد معصي الا معصي والله ماتشوف المزرعة ولا تشك ريحتها
//اعتلى صوت الرصاص خارج بيت الشعر المختلط باصوات الدوريات واصوات ضباط الشرطة اللي تطالبهم بتسليم انفسهم//
ابو مظفر ناظرها بغيظه/غدرتي بي يامبروكة تغدرين بي انا/اطلق على عزيز ثلاث رصاصات متتالية انحنى للشنطة اخذها ثم خرج من بيت الشعر ومعه حارسه/
بارود صرخ بفجعة/عزيز
مبروكة فزت من حست بحركته الغير طبيعية بين يديها وعرفت مغزاها حست بروحها تخرج من ثقل الموقف وكبره عليها انهارت بدموع دم من قلبها على عزيز اللي ماكان مجرد حفيد الا كان ثالث عيالها واحبهم لقلبها ضمته لحضنها بين يديها الممتزجة بدمه السايل عليها دفنت وجهها بانهيار على كتفه وسط رعشة احتلتها من كبر مصيبتها همست/ويلي ياعزيز ويلي ياسواد دنياك يامبروكة الليلة ياسوادها
الحارس سابق ابو مظفر يأمن له الطريق دخل للبيت واسرع بخطواته للباب الخلفي 
عساف خارج بيت ابو مظفر واقف قبال بابه الخلفي بلبسه العسكري وواقي الرصاص معتلي صدره مصوب بمسدسه بحماس على الباب بانتظاره وسط ابتسامة معتلية محياه
الحارس خرج ورفع مسدسه بسرعة اول مالمح عساف
عساف رماه وثبتوه عالارض اثنين من الافراد يمين ويسار الباب تنهد/اخلص ياعيد ورانا شغل اخلص علينا
ابو مظفر داخل البيت احتدت ملامحه بقلة حيلة وغبنة من وصل لمسامعه خطوات رجال الشرطة واصواتهم داخل البيت يبلغون بعضهم بخلو المكان
عساف/ياعيد كم سنة وانت متنعم بالراحة الحين جا دورنا نعيد حنا والمسلمين بعد اذيتك
ابو مظفر خرج من البيت رافع يديه بملامح غيظه/انا مالي شغل بشي انا موزع المسؤولة مبروكة
عساف مصوب بسلاحه بابتسامة/يازين الشنطة زيناه نزلها اشوف
ابو مظفر عض شفته السفلية بغبنة من نفسه نسى يتخلص منها بطريقه من كثر ربكته بوصولهم هالمرة لبيته نزل الشنطة
احد الافراد هجم عليه وكتفه
عساف انحنى للشنطة وفتحها اتسعت ابتسامته براحة واخيرا انحلت قضيته الصعبة من سنين رفع راسه يناظره/ياعيد انتهت اعيادك عسى الله لايكثرها قل امين
.
............................................................
.
سهم بعد ماوقف سيارته بعيد عن المكان المتجه له بما يقارب الكيلو بانفاس سريعة من جريه وتعثره بين لحظة والثانية توسط مزارع التمور اللي تبعد عن الديرة مايقارب ٣٠٠كيلو دخل لاحداها وكانت مثلها مثل اي مزرعة تمور كبيرة بيده جركل البنزين وبيده الثانية كيس باللون الاسود وقف وسط هالمزرعة اللي ينتصفها مربع كبير من اعشاب
غريبة يلفها ويغطيها النخل ترك الكيس الاسود من يده وطاح عالارض فتح جركل البنزين وبدا يمشي وسط هالزرع موزع البنزين عالاماكن اللي يقدر يوصلها رجع طريقه لكيسه الاسود جلس جنبه وخرج عود ملفوف نهايته بقماش وغرقه بباقي البنزين ثم ولع االنار بقطعة القماش وقف يتأمل تعبه بنظرة اخيرة احتوى قلبه الحزن على كل جهده المبذول بلا اي فايدة تذكر همس لنفسه بتصبير/راجع راجع لو يطول الدهر راجع/رفع يمينه بيرمي هالعود/
ديوان رفع يده ومسك العود بقوة حتى مايرميه
سهم ناظره بذهول
ديوان ناظره بابتسامة
سهم احتدت ملامحه ورفع يساره بيلكمه
بـيّـن وقف عن يسار سهم منع لكمته وسدد لكمة لسهم بكل قوته
سهم ارتمى عالارض من قوة اللكمة
بـيّـن نفض يده بوجع
ديوان ماسك العود بيده بعد ماسحبه من يد سهم
سهم لمس انفه النازف بيده/كيف دريتوا عن مكان المزرعة
بـيّـن ابتسم وخرج الدفتر من جيبه وبابتسامة/ الله يكثر خير من تجمل
سهم ضحك
ديوان عقد حواجبه بشك
سهم/وبعدين؟وش بتسوون!!ولااا شي
بـيّـن ارتفع حاجبه
سهم بابتسامة/بتبلغون؟ماهو بمشكلة بوضعي ذا انا اللي كشفتكم وببلغ عنكم ويوم دريتوا بي ضربتوني وحاولتوز تذبحوني بعد
ديوان تنهد بضيق من استمراره/سهم لا
بـيّـن انحنى وسدد له لكمات متتالية
سهم استقبلها بسرور بدون اي مقاومة
ديوان انحنى وابعد بـيّـن وبعصبية/بـيّـن!!
بـيّـن ابتعد عنه وبانفاسه السريعة/ذا حق غدرتك فينا من سنين
سهم مرتمي عالارض بابتسامة/الغدرة الصحيح شوي اصبر بس
ديوان ناظر بـيّـن بلوم/ليه يابين ذالحين وش يفكنا من طلايب عساف
سهم عقد حواجبه وهو يسمعهم وباستغراب همس/عساف؟
بـيّـن/بسيطة دفاع عن النفس
محمد ومعه كم فرد من الشرطة وقف عندهم بانفاسه السريعة وبحدة/مافيكم صبر ليه تتجاهلون الاوامر
ديوان ناظر محمد/كان بيحرق المزرعة وتصرفنا ماقدرنا نحتريكم اكثر
بـيّـن انحنى شبه جالس/ عساف الراعي اللي تخبره/حك جبهته بطرف اصبعه/مير الصحيح ماهو براعي الصحيح مقدم في مكافحة المخدارت
سهم انخطف وجهه
بـيّـن ابتسم من ناظر ملامحه/هاه بشر كيف الغدرة ذالحين
.
............................................................
       بعد اسبوعين
............................................................
<<بيت بـيّـن>>
بـيّـن بملامح باردة كالعادة متجاهل تواجدها بالكامل  ببنطلونه الازرق الرياضي وتيشيرت باللون الابيض وبراسه الاصلع جالس عالسرير وجنبه شنطة الظهر الموجودة داخلها احتياجاته المعدودة
يقين تناظره بتمعن كلها لحظات وتودعه هالاسبوعين كانت من اصعب ايام حياتها بذلت المستحيل حتى تقنعه ويقابلها صدوده وبعد كل محاولاتها وصده صارت تراقبه بصمت مثل صمته لاحظت ببعدها عنه يكون كله حياة وسوالف وضحك واول ماتتواجد بقربه تختفي كل مظاهر الحياة منه ومن محيطه مثله بهاللحظة وجه خالي من اي تعبير
بـيّـن منحني لرجله يلبس جزمته اللي باللون الاسود
يقين انحنت عند رجوله ومدت يديها مبعدة يديه ومسكت حبال جزمته تربطها/نويت الصد؟
بـيّـن مارد
يقين تربط حبال جزمته الثانية/مابتلقى مثل حبي مثيل بهالدنيا ولابيقبل قلبك بغيري بديل يابـيّـن
بـيّـن وقف يحب شنطته معه وتخطاها
يقين مشت وراه ومدت يديها له محاوطته من ورا من وسطه وبهمس وسط دموعها/لاتذبح قلوبنا يابـيّـن والنوايا واضحة تكفى يابـيّـن
بـيّـن ابعد يديها عنه والتفت لها بوجع مابرد قلبه عجز يتخطى ذيك اللحظة الموجعة لقلبه/والطعنة ذيك كيف ابنساها؟
يقين/بأطببها واداويها بكل مافيني بكلامي بلمساتي بنظراتي وحتى روحي لك دوا
بـيّـن رفع يده ملامس صدره يمسح عليه/ورجفة قلبي المفجوع من سواتك وشلـ
يقين مدت يديها له واحتضنته مقاطعه كلامه/يهدا بين يديني
بـيّـن مابادلها الحضن بغصة توسطت حلقه يكبحها من ضمته لحضنها
يقين بهمس/بأسمي واقرا عليه وادعي له واحصنه بارجع له الامان اللي تخيل انه ضاع منه وهو متربع بوسطه لذالحين
بـيّـن بعتاب ولوم/ااخذتي مني الحياة بعد ماذوقتيني لذتها كيف ابرجع اعطيك قلبي بعد هالسواة كيف
يقين/مااخذتها منك برضاي يشهد الله علي،رفعتها عن اللوث اللي بيصيب يدينا ودسيتها ثم نرجع لها ونعيشها سوا بطهارة يدينا وقلوبنا
بـيّـن ابعد يديها عنه
يقين شدت عليه بكل قوتها/لاتقسى علي يابـيّـن وانت تدري قساوتك ماتزيدك الا وجع
بـيّـن نزل راسه بحيرة وضيق وتردد
يقين/بأغرقك حنان وحب ودلع واهتمام بارجع لذة الحياة وحلاوتها لنا بأشيل هالوجع كله من قاعه يابـيّـن مير لاتتخلى تكفى
بـيّـن سكت بتفكيروهو يبعد يديها عنه
يقين ناظرته/انتهت مبروكة وظلمها لاتخلي بواقي اثارها يخيم علينا
بـيّـن التفت لها/بازعل كثير
يقين/راضية
بـيّـن/بارميك بالتهايم ولا ارحمك
يقين/استاهل
بـيّـن/بانكد عليك كل ماشفتك تضحكين وابكيك
يقين بلعت غصتها/ونرجع مثل قبل؟
بـيّـن بضيق/كيف ترضين وانتي تدرين اللي يحب مايسوي هالسواة بحبيبه
يقين/لانك بـيّـن البـيّـن ماترضى الظلم كيف عاد تسويها بنصك الثاني
بـيّـن سكت
يقين احتضنته بين يديها
بـيّـن مابدالها الحضن حتى هاللحظة
يقين/بأنسيك مرارة هالشعور وعد مير انت لاتصد طلبتك تكفى لاتصد يابـيّـن
بـيّـن التزم الصمت للحين مافارقه مرارة ذاك الشعور
............................................................
<<القسم>>
مبروكة بجسم اختفى من كثر الهزل بيدين احتوتها الرعشة اللارادية شادة  على عكازها عسى تخفف رعشتها المفضوحة جالسة بمكتب الضابط بصمت
منصور خارج المكتب مستند على عكازه ناظر زايد/يااخوي ارحم حالها وروف بها عطها كم كلمة بلكن تسمعك وتعترف باللي عليها ماتشيل التهايم كل ابوها لحالها
زايد بوجهه المتجهم مارد
منصور تنهد بيأس من صمته الطويل اللي ماتعود عليه فتح باب الضابط وطاحت عينه على امه المرتعشة وامتلى قلبه حزن ودخل/السلام عليكم
مبروكة فز قلبها من سمعت صوته وحست بوجود شخص ثاني نطقت/وعليكم السلام والرحمة
منصور قبل راسها بلمعة عيونه وبلع غصته
زايد ظل واقف يناظرها من بعيد
مبروكة/يامنصور علم زايد السلام وانصح اخوك عسى الله يهديه
زايد بزعله/الله مهديني وحافني برحمته يوم انه نجاني من يديك مير/ارتجف صوته/وليدي وش سويتي به حتى كان هذا جزاه
مبروكة هلت دموعها فقد عزيز حسرة ووجع احتل قلبها واوجعها وجع اكبر من اي وجع مر بحياتها اكب حتى من فقد عيونها هو املها والمنز اللي طلعت فيه بهالدنيا بعد عصيان عيالها فقده كسر مستحيل تجبره وتعوضه الدنيا بمافيها برجفة صوتها/كان هو وليدك فانا قطعة من قليبي يازايد لاتزيدني هم فوق همومي لاتزيدني
زايد/الا بالله ماجيت الا ناوي ازيدك مسامح بكل شي سويتيه فيني مير موتة عزيز ماني بعافي عنها  ابد/خرج/
مبروكة رفعت يدها المرتعشة تكفكف دموعها بطرف طرحتها
منصور/اعذريه يمه مابرا قليبه لذالحين
مبروكة التزمت الصمت
منصور جلس عندها يواسيها
.
............................................................
<<مجلس الشعر>>
طاهر جالس يتقهوى عند شبة النار مرر نظره عالمتواجدين بشعور غريب وجديد عليه انزاح عن صدره هم شايله سنين ظهرت الحقيقة بعد الظلم المستمر وانقلبت الامور عالظالم اخذ حقه بطريقة مرضية العدل كيان ساري ومحتوم بهالدنيا الفانية انسابت دمعة من خده غلبت قمعه المستمر طول هالسنين من استرجع ذكرياته موت سارة اتهامه الباطل بعمى مبروكة اخذ الشيخة من قومه اخذ بيته وبيت اجداده منه بدون وجه حق موت عياله عياش وخلف من القهر ظلم حفيده بـيّـن رفع الفنجال يشرب القهوة اللي اختلطت بغصته وبلعها بالقوة
حامد المتواجد بعد سماعه للاخبار المفرحة يتقهوى اتسعت عيونه لاول مرة يشوف ابوه بهالمنظر وبرجفة قلبه/يبه عسى ماشر
//التفتوا المتواجدين(نواف وسلمان وسطام وديوان) يناظرونه باستغراب//
طاهر بصوت اهتز للحظة/شرٍ طرا لي صابنا سنين لحق الاولين والتالين وتفرقوا القوم عقب ماكانت مجالسهم عامرة جا الفرج راح الشر وراحوا الاولين معه وسلموا التالين مير ماعاد به مجالس تطريهم وتطري سواياهم الزينة
بـيّـن بنفس اللبس الرياضي وكاب ابيض يغطي راسه دخل لبيت الشعر سمع كلام جده/مير التالين مابيقصرون ياجد بيسوون مايقدرون عليه،السلام عليكم
ظاهر احتدت نظرته للبس رجف قلبه بشك من افكاره السودا طرد الافكار للشينة من باله والتزم الصمت
بـيّـن مافاتته نظرات ظاهر تجاهلها
نواف وقف وصب ومد له فنجال
طاهر التفت لظاهر/ولد ياظاهر
ظاهر/سم ياجد
طاهر/كانه زان لك المقعاد
ظاهر سكت
طاهر/الاسبوع الحاي تعود دوامك
ظاهر احتدت نظرته/مير اني مفصول وقاضي من مبطي
طاهر ابتسم/لاتكذب علي ريسك مكلمني معلقينك ومغطين عنك ويازين فرحته يوم علمته بتعود
ظاهر بعصبية/جد!!
طاهر/مال مقعاد ومعلف في بيتي ولا مرة عندي
ظاهر اتسعت عيونه
طاهر/طس يم دوامك وعقبها تعال دور مرتك
ظاهر/ياجد
طاهر قاطعه/لاتصدع براسي هذا العلم غيره ماعندي
بـيّـن وقف ونزل كابه عن رآسه بيساره فبّل راس جده الجالس سحب يد جده مقبلها وهو يتكلم/يالله استودعتك الله ياجد
طاهر/خلاص مروح
ظاهر تاكد من صحة ظنونه صر على اسنانه بغيظ
بـيّـن/ان شاء الله دعواتك
//وقفوا المتواجدين يسلمون عليه يودعونه//
نواف بابتسامة/ترجع بالسلامة ياعسكري
ظاهر فتح ازارير ثوبه بيمينه من ضاقت انفاسه وشد على قبضة يساره الراجفة برعب
بـيّـن ابتسم/انتبه لااسمع عنك شي لارجعت
نواف/ايه يصير خير وقتها
بـيّـن صافح سلمان
ظاهر وقف وسحب بـيّـن من يدين سلمان اللي يسلم عليه وشده من تيشيرته بانفعال/ماهو بكيفك ماتروح يعني ماتروح
بـيّـن سحب نفسه من يدين ظاهر/ماني بقاعد بهالديرة احتري الصدقة من الناس انا رايح ادور رزقتي
ظاهر/رزقتك في غير ذي يابـيّـن تسمع
بـيّـن/ظاهر
ظاهر/كان عالمصاريف انا باعطيك ولا العسكرية
بين تنهد بيأس منه/ انا رايح ماابي اتاخر
ظاهر لكمه على وجهه/علمتك ماتروح
بـيّـن ناظره بشفته النازفة
ظاهر بجبينه اللامع من كثر العرق بصراخه/وان كملت معاند كسرت رجولك وظهرك خليتك ماتحرك روحه مافيه يعني مافيه
طاهر مرر نظره عالمتواجدين بمعنى فهموه زين ناظروا بعضهم بتردد وقف وبحدة/ظاهر ماانت براده عن رزقه وقضينا
ظاهر بصراخ/قلت مافيه روحه يعني مافيه
نواف فز واحتضن ظاهر من ورا مغمض عيونه/تكفى ياظاهر تكفى لاتوجعني
سلمان احتضن ظاهر من قدام وتعلق فيه بكل قوته/ظاهر اسمع كلام جدي
//ديوان وسطام استسلموا للوضع ووقفوا ومسكوه معهم//
ظاهر صرخ وهو يتحرك بين يديهم
بـيّـن ناظره بوجع/تمنيت اسلم عليك قبل امشي مير استودعتك الله يااخوي/مشى/
بظاهر صرخ وتحرك بجنون بين يديهم/بـيّـن لاتروح تكفى لاتروح يابـيّـن
.
#شقّ_الغَمام
**مستعدين للنهاية؟؟