شـقّ الـغَـمـام

..(٤٣)..

..(٤٣)..
اللهم صل وسلم على نبينا محمد..
-
............................................................
.
سطام خرج من بيته بعد صوت ضرب الباب القوي اللي افزع من بالبيت وقف يناظره وكتم تنهيدته بوسط قلبه
حامد واقف قباله وبحدة/طاع بنتي خلها تطلع اعجل علي
سطام عقد حواجبه/عسى ماخلاف ياعم
حامد/لايكثر هرجك وخلها تطلع/تقدم بيدخل للبيت/
سطام منعه من الدخول/محارمي ياعم
حامد/عمى الا عمى لك ولهم تستقوون عليها تظنون ماوراها احد!!/صرخ/سلام بنت سلام اطلعي
سطام فتح الباب وصرخ من قهره من حامد/يااهل البيت
حامد فز من صرخته
سطام/طريق/دخل وتاكد من خلو المكان/حياك ياعم
حامد دخل للبيت بملامح الغضب/وينها سلام
سطام وقف على باب المجلس/حياك ياعم ونتفاهم
حامد الواقف بالحوش/الله لايحييك ولا يسلمك ماجيت اتفاهم جيت اخذ بنتي/صرخ/سلام يابنت
زينة فاتحة باب الغرفة تناظر وجوده بعدم تصديق حامد اللطيف الهادي يعرف كيف يعصب ويصرخ كيف صار بهالشكل بعد كل هالسنين سمحت لنفسها تتامله تاملت ملامحه وتفاصيله هالمرة مااهتزت مشاعرها مثل كل مرة مانبض قلبها بجنون كل مالمحت زوله عقدت حواجبها باستغراب من وضعها معقول تناقص حبه بقلبها يمكن بعد تجاهله لها بموقفها الاخير من شوفته طاح من قلبها معقولة اثر عليها لهالدرجة والحب اللي عاشت على ذكراه وهدمت بيتها لعيونه كيف راح بهالسهولة ناظرته من حديد ناكد لنفسها صدق احساسها فعلا لازال نفسه حامد اللي تتمناه لكن شي بداخلها تغير من ناحيته قفلت الباب بهدوء وسط استغراب من نفسها
سلام خرجت من الغرفة بخطوات عجولة وقفت قباله تكبح غضبها لاول مرة يدخل بيتها ودخل عكس ماتمنت وحبت يكون دخل بصراخ مثل المجنون وماغاب السبب عنها وهي اللي هربت منه البارح وعاندت رايه تقدمت له وقبلت جبينها
حامد رفع يده وابعدها عنه
سطام عقد حواجبه بغيظ
حامد بحدة/امشي البسي عباتك والحقيني
سطام/استهدي بالله ياعم
حامد/مالك كلمة اوص/ناظر سلام وبعصبية/امشي وش تحترين
سلام/مااطلع من بيتي يبه
سطام ناظرها بطيف ابتسامة ظهرت للحظة واختفت
حامد/ماهو بعلى كيفك بيت تنهانين به ماتجلسين فيه امشي
سلام/علمتك يبه سطام شيخ قومه والشيخ مايترك احد من قومه ينظلم
سطام اوجعه كلامها تمنى تحتمي فيه لذاته لكونه سطام،سطام الزوج والسند والشريك اللي تمشي معه بدرب الحياة لكن هي تعتبره شيخ حتى الان ماوصل عندها للمقام اللي يتمناه تاكد من نفورها بهاللحظة منه لكن ليه قبلت فيه وهي كارهته ليه راضية تتوسط بيته وترفض ابوها لهالدرجة ناظرها بحيرة من فعلها
حامد/وانتي وش تبين بشيخ!!انا مازوجتك شيخ انا ابي ازوجك لرجال يصونك كلك واوله قلبك مايرضى عليك المهانة
سطام/ياعم انت فاهم غلط
حامد بحدة/اسكت محد كلمك انت
سلام/يبه ماتسكت رجلي وتسمع لنا مثل مانسمع لك
حامد بقهره صرخ/سلام
سلام/يبه
حامد قاطعها/هالمرة وقفت على تمزيع شعر وخمش رقبة بكرة يمزعون رقبتك بكبرها وش بيفيدك شيخ قومه بوقتها/مد يده لها وسحبها/امشي والله ان تمشين ورجلك فوق راسك
سلام انسحبت معه وبمحاولات منها توقفه/يبه ماابي ماابي اطلع من بيتي يبه/التفتت وراها من حست بيده/
سطام مشى وراها مسك يدها وسحبها له بكل قوة
حامد وقف من حس بنفسه ينسحب
سلام ناظرت سطام بعقدة حواجبها ثم مررت نظرها بينهم
حامد ناظره بحدة/كب يدها
سطام شد على يدها/ابشر ياعم
سلام ناظرته بالم واستغراب لفعله الغير متوافق مع كلامه
سطام/مير بالاول اسمع رايها وثم يصير ماتبي كان رايها على هواك
حامد بكره/ماهو بكيفك تمشي رايك علينا
سطام/انا عاهدتها ماتظلم دام هي ببيتي وهي لذالحين ببيتي وتحت يميني
سلام ناظرته بشعور يتكرر للمرة الثانية ذات الشعور يوم وقف بوجه امه واخته مدافع عنها ماقدرت تحدد نوع هالشعور بالنسبة لقلبها هل هو بداية قبولها له معقولة تكون رضت عن فعلته وتجاوزتها بهالبساطة
سطام ناظرها/ودك بالطلاق مثل مايبي ابوك كان ودك/ترك يدها/الله يستر عليك
سلام احتواها الزعل كيف ترك يدها بهالسرعة ليه مادافع عنهم بوجه ابوها كيف استسلم بهالسهولة
حامد سحبها له بحدة/اكيد ودها بالطلاق من يقعد بييت ينظلم فيه وزيادة هالبيت مخيم عليه سحب من دعاوي المظلومين
سلام احتدت نظرتها من تدخل ابوها والتفتت له/لا ماودي بالطلاق
حامد بحدة/سلام
سلام سحبت يدها من يده بالقوة ووقفت جنب سطام واحتضنت كفه بكفها
سطام التفت يناظرها بذهول
حامد عض شفته السفلية بقهر
سلام/المشاكل تصير بكل بيت يبه ولو لمحت طرف احساس اني بيوم بكون مظلومة بهالبيت ماقعدت دقيقة
حامد بغبنة/كل ذا عناد بي بس صحيح ياسلام
سطام اتسعت عيونه من فهم السبب اخيرا
سلام شدت على كفه وسط رجفة احتوتها بنظرات حادة لابوها
سطام التفت يناظرها من حس بضغط كفها على كفه وتجاوزت حدود كفه وحس بها تضغط على قلبه من كثر الوجع والخيبة
سلام/ماهو بعناد ذا اختياري وقراري يبه بس انت عجزت تفهمني
حامد بقهره/تدرين عاد الشرهة علي اللي احاول بكل مرة امنعك عن مايضرك وانتي تروحين له برجولك
سلام ناظرته بغيظ
حامد/بكرة لا ندمتي لاتفكرين تدقين بابي ياسلام ابد/خرج بخطوات سريعة/
سلام احتقن وجهها باللون الاحمر وكبحت دموعها اللي غرقت عيونها ماكان ودها توصل معه لهالدرجة صحيح بالبداية كان عناد لكن الحين تغير شي بداخلها من عاشت معه كانت فاقدة وجود رجل بحياتها وظهر هو واحتل هالمكانة رغم كرهها له وكان على قدر من الاحترام واللطف وبادر بالمحبة وحاول معها رغم صدها له ماغلط بيوم بحقها التفتت من حست بكفه تنسحب من كفها والتفتت تناظره
سطام بوجه مكتسي سواد من اللي فهمه
سلام ناظرته باستغراب
سطام/تبين شي
سلام باستغرابها/بتطلع؟!!
سطام مشى/كان تبين شي ارسلي لي/خرج/
سلام ناظرته بعدم فهم
سطام خرج من البيت يحس بضيق نفسه وكانه يتنفس من فتحة ابرة ركب الوايت واتجه للمكان وللشخص اللي بيعدل نفسيته وينظم انفاسه بعد هالصدمة الكبيرة بعينه
سلام عقدت حواجبها بتفكير اتسعت عيونها بذهول من انتبهت للي قاله ابوها تسارعت نبضاتها بقلق اتجهت للغرفة وسحبت جوالها من فوق السرير تتصل عليه وانتهت المكالمة من طرفه بعدم الرد عضت طرف شفتها بتوتر كررتها للمرة الثانية  وتكرر عدم رده قفلت جوالها بضيق وتفكير كيف تواجهه الليلة
............................................................
<<المستشفى>>
ولاء جالسة على يمين السرير محتضنة كف محارب بين كفوفها
غيمة واقفة عن يساره تناظره بابتسامة/الحمدلله عالسلامة يامحارب ياكم ارتعت يوم دريت
محارب بتعب/الله يسلمك
رازي بابتسامة/الحمدلله عالسلامة يالنسيب
محارب ناظر رازي/الله يسلمك
رازي/انبسط ياعم من قدك وردة بين الورود/ضحك بخفة/
ولاء ناظرته بحدة
غيمة تناظره بجمود وكل مافيها ينطق بلوم
رازي قشعر جسمه ونفض نفسه/اووه،على ذا النظرات وحش بين الوحوش
محارب ابتسم من قوله/ماهو بحاصلك مكاني ارتاح
غيمة بفزع/عوذا من يبي هالمكان الله يقومك بالسلامة بس
رازي تكتف بابتسامة
ولاء ناظرت رازي/غيمة تراه يتمنى
رازي ناظرها بوسع عيونه
ولاء حركت حواجبها بابتسامة
غيمة ناظرته بحدة/الله يكفينا الشر وش هالامنية الشينة اعوذ بالله
رازي/مابغيت مكانه ابي الدلع بس
غيمة ناظرته بغيظ
رازي/هونت حتى الدلع ماابيه
ولاء ضحكت بخفة والتفتت تناظره تنهدت براحة
محارب/عسى ماقلتوا لامي والباقين
رازي/لا ماقلت لاحد اصلا احتريك تطلع بالسلامة
محارب/لا لاحد يدري الى مااروح بنفسي واعلمهم
رازي/بيزعلون عليك
محارب/ماعليه بيرضون
رازي تنهد/على راحتك
محارب/مسكوه؟
رازي سكت
محارب/ظافر انمسك؟
رازي/لا لذالحين يدورونه
محارب تنهد/رازي انتبه لولاء
ولاء تركت كفه وناظرته/ماني متحركة من جنبك
محارب/ولاء
ولاء/لاتحاول ماني بطالعة الا معك/وقفت ومشت/
محارب/ولاء
رازي/بنت ولاء 
ولاء خرجت
غيمة مشت وراها
رازي/محارب لاتحط راسك براسها خصوصي وانت كذا
محارب/ابي لها الراحة
رازي/حاولت قلبك وماقدرت يامحارب
محارب سكت
رازي/تدري ان راحتها بقربك لاتجبرها يامحارب لاتجبرها
............................................................
<<بيت طاهر>>
بـيّـن المخطوف وجهه ومرتسم عليه اثار صدمته حتى الان عجز يستوعب كلمتها اللي نزلت عليه كالصاعقة بدون اي مقدمات لبداية نهايتهم اتصل فيها الى ماتعب بالبداية كانت تتجاهل مكالمته ثم اصبح جهازها مقفول داهمه الشك بانها حظرت رقمه وبنفس الوقت مايبي المشكلة بينهم تتسرب خارج حدودهم يبي يحلها بينهم بهدوء رفع عينه عالباب ينتظرها
غصنة خرجت من البيت بهدوء مثل طلبه وركبت السيارة/السلام عليكم
بـيّـن/وعليكم السلام
غصنة باستغراب وهي تقفل باب السيارة/علامك مانزلت ما/التفتت له عقدت حواجبها من ناظرت وجهه/
بـيّـن قاطعها ماد يده/جوالك
غصنة مدت جوالها له باستغراب/هاك علامك يابـيّـن
بـيّـن اخذ جوالها وناظرها/انزلني واحتريني قريب وارجعه لك
غصنة بظن انه يفتش وراها وبنرفزة/ليه ان شاء الله وش تبي ترا ماعندي
بـيّـن قاطعها بعصبية/غصنة انزلي واللي يعافيك تراها واصلة اقصاها
غصنة نزلت من السيارة قفت الباب بقوة وتكتفت واقفة عند باب الراكب ماتحركت
بـيّـن خاطره يهاوشها ويكرهها نفسها بس تمالك اعصابه وفتح جوالها واتصل عليها
يقين بقسم التنويم بعد مانقلوا ابوها له واقفة جنب السرير تمسج رجول ابوها بابتسامة/يوه يبه ماتدري القبيلة اختاروا سطام شيخ كل ابوهم محد غصبهم اختاروه شيخ على/سكتت/المهم كل ابوهم يحبونه
منصور بانفه لي الاكسجين ابتسم وهو يسمعها
يقين طاحت عينها على المتصل عقدت حواجبها باستغراب وتجاهلتها ابتسمت وناظرته/ونور يبه نور تزوجت ظاهر ولد عمها
منصور همس بفرحة/ماشاء الله ماشاء الله 
يقين/اصبر اصصبر الاحلى جاي/بوناسة/ بيجينا حفيد يبه
منصور ضحك بخفة
يقين/بتصير جد يبه ياحظك ياجد منصور من قدك  
منصور ابتسم
يقين ناظرت الجوال وتنهدت سحبته وردت محتفظة بابتسامتها لخاطر ابوها ثبتت الجوال بين كتفها واذنها وهي مستمرة تمسج ابوها/هلا
بـيّـن بحدة/وش هاللي ارسلتيه!!
يقين تسارعت نبضات قلبها بجنون من وصلها صوتها ووقفت معها مساجها ناظرت ابوها واحتفظت بملامحها حتى تبعد الشكوك عن ابوها كملت مساجه بابتسامة/اللي ارسلته
بـيّـن صرخ/يقين
غصنة وصلها صوته وفزت من صرخته وابتعدت عنه لعند باب بيت طاهر/يمه يمه علامه شايش
يقين/اسمعك
بـيّـن/فهميني وش هاللي مرسلته صاحية انتي
يقين/حقي ومثل ماارسلت لك لاترد هالحق
بـيّـن عقد حواجبه/انتي تقولينه صادقة!!يابنت من جدك تقولينه لي
يقين/ولا ابي غيره سلام/قفلت بوجهه وحظرت رقم غصنة ولفت على ارقام اهله تحظرهم جميع/
بـيّـن رجع اتصل واستقبله نفس الرد بجواله كل مايتصل فيها صرخ وهو يضرب عالدريكسون بيديه بكل قوته بقهر منها
غصنة تناظره بخوف/وش اللي صاير
بـيّـن شغل السيارة وحرك بسرعة
غصنة اتسعت عيونها وناظرته يمر من قدامها مكمل طريقه جرت وراه/جوالي بـيّـن جوالي
بـيّـن وقف بالسيارة  ورجع لورا بسرعة
غصنة هدت بخطواتها بعد ماكانت تجري مكملة طريقها له
بـيّـن وقف وانحنى ماد يده ينزل قزاز السيارة
غصنة وقفت عنده بانفاسها السريعة
بـيّـن اعتدل ورمى الجوال عليها وحرك بسرعة
غصنة مسكت الجوال بعد رميته بعدم اتزان وحاولت تمسكه لكن طاح منها عالارض صرخت/لااااا/انحنت له بسرعة تتفحصه تنهدت براحة من سلم جوالها رفعت يدها بغيظ ودها تضربه/بـيّـن يا/سكتت بتفكير من اللي يصير/ماهي بهينة يقين قلبته فوق تحت يمه من الحريم/حست برعشة سرت بجسمها/الحمدلله اني منهم
............................................................
<<مصلى المستشفى>>
غيمة دخلت للمصلى وراها/ولاء ولاء
ولاء/ابصلي بتصلين معي
غيمة تنهدت وناظرتها/صلي واحتريك/خرجت/
رؤيا الجالسة ببداية المصلى بوجهها الشاحب الواضح عليه اثار حزنها قشعر جسمها من سمعت صوتها التفتت وراها تتاكد
ولاء كبرت وبدت تصلي
رؤيا لفت طرحتها ولبست نقابها
ولاء خلصت صلاتها وخرجت من المصلى
غيمة الواقفة على باب المصلى تنتظرها/نروح ناخذ قهوة تروقين
ولاء ناظرتها بتنهيدة
غيمة احتضنت ذراعها/يالله مشينا
رؤيا عينها عليها تنتظرها لحقتها من خرجت ووقفت وراها/ولاء
ولاء عقدت حواجبها وقفت والتفتت لها بشك احتدت نظرتها من عرفتها ومشت/غيمة لاتوقفين لها امشي
رؤيا مشت وراها/ولاء انتظري شوي ولاء
ولاء ماتحملت صوتها وقفت والتفتت لها ضربتها كف
غيمة اتسعت عيونها بذهول
رؤيا ناظرتها/اضربي زي ماتبين راضية
ولاء بحقد/ولا يكفيك اصلا
رؤيا برجفة صوتها/امي تعبانة ياولاء بين الحياة والموت
ولاء/الله يشفيها لكن انا وش عليك منك ومن اللي يصير لك
رؤيا بدموعها/احس اللي صار لامي ذنبك تكفين ولاء سامحيني امها مالها شغل سامحي تكفين
ولاء بقهر/كل اللي يصير لنا من وراك وتقولين سامحيني!!لا والله الله لايسامحك ولا يحللك جعلك تذوقينها بالدنيا قبل الاخرة
رؤيا سحبت يديها تقبلها ببكى/سامحيني ولاء سامحيني
ولاء تسحب يديها منها وتبعدها صرخت/ماني مسامحتك اتركيني
رؤيا ناظرتها بدموعها/ ولاء تكفين
ولاء/كل همك تهربين من اخوك وابتليتنا فيه حتى يوم جيتي تطلبين السماح طلبيته خوف على امك ماهو بتكفير عن ذنبك ابد بالنهاية كله لمصلحتك
رؤيا بدموعها/تكفين ولاء ادعي علي لاتاخذين امي مني مالها ذنب ولاء تكفين سامحيني
ولاء بقهر/احرقتي قلبي بظلمك ساعدتك وقابلتيني بشرك بعدك انا حتى المحتاج صدق صرت اخاف اساعده روحي الله لايبيحك ولا يحللك دميا واخرة
رؤيا انهارت عالارض تبكي بصوت/لااا الله يخليك امي ياولاء امي
ولاء مشت بخطوات سريعة وسط قبضتها الراجفة
غيمة تنتظر رؤيا بانكسار صم جرت خطواتها السريعة تمشي ورا ولاء
............................................................
.
بـيّـن يسوق سيارته بسرعة جنونية ود على جواله اللي ازعجه/خير
عساف بنرفزة/وين اعرف الخير وانا اعرفك وينك عشان اعطيك الفلوس
بـيّـن/خلها لارجع رازي
عساف صرخ/على كيفك هو العملية تخطيط وتنسيق ماهو بتاجيل على مزاج سموك
بـيّـن اخذ نفس/رازي ماعلمك اجل
عساف/وش يعلمني هالمتسيب بعد
بـيّـن بكذب/شاهر شاك وكنسل البضاعة
عساف/وشو
بـيّـن/اخلص اموري واجي اعلمك/قفل/
عساف بقهر/انا الغلطان اللي اعتمد على هالاشكال/قفل واتصل/فيصل شف لي اي احد متعامل مع موزعين بسرعة
.
............................................................
<<المستشفى>>
عزيز متمدد يناظر بارود
بارود جالس عالكرسي متغطي بشماغه المفتوح ونايم
عزيز عبس بوجهه/جاي عندي عشان ينام هيه بارود هيه/جلس/
بارود صحى والتفت له/همم
عزيز/قوم وانت وجودك على قلته قم
بارود جلس/وش تبي بعد
عزيز/رح شف الدكتور متى بيطلعني
بارود وقف ورمى شماغه بكل قوته على كرسيه
عزيز اتسعت عيونه من فعله ناظره الى ماخرج من عنده/هين هين اصبر بس اطلع
//بعد نص ساعة//
عزيز بعبوسه/علامه ذا/خرج من الغرفة ومشى بالممر باتجاه الاستقبال وقف من ناظر اثنين من الشرطة يكلمون بارود وبارود يجاوبهم بملامح مخطوفة احتدت نظرته وسط افكاره عض على شفته بقهر لف عنهم راجع طريقه للغرفة وبنفسه/سطام سواها وبارود الخواف هلّ السبحة/دخل للغرفة/فتح شماغه ورمى داخله ثيابه وخنجره واسرع من الغرفة خارج بملابس المستشفى/
.
~~بجهة اخرى بنفس المستشفى~~
سطام يناظر ابوه بابتسامة/تو مازانت الدنيا يبه والله
منصور مارد
سطام/ها يبه كيف اصبحت اليوم
منصور هز راسه بصمت
سطام بابتسامة/الحمدلله/غمز له/ها يبيه مشتهي شي اهربه لك
منصور رفع يده بمعنى لا وسط صمته 
سطام التفت ليقين باستغراب/علامه ابوي
يقين تنهدت/بعدين اقولك وينها امي
سطام تنهد/ماعلمتها لذالحين
يقين/ليه
سطام/تخبرين ليه
يقين تنهدت بضيق
//التفتوا يناظرون من اللي فتح الستارة//
الممرضة بابتسامة/عم منصور فيه فيه وحدة جاية عشانك
سطام تجمهت ملامحه
يقين تناظرها بغيظ
مبروكة بانفاسها السريعة وقفت قباله برجفة صوتها/وينه
الممرضة تناظر يقين وسطام بانتظارهم يساعدونها تحركت من لاحظت ملامحهم ومسكت يد مبروكة/من هينا ياخالة
مبروكة تحركت مع الممرضة بنبضات قلبها السريعة بمشاعر مختلطة مابين فرح وشوق وخوف وتوتر بنفس الوقت مشتاقة له كثير وفرحانة اكثر بسلامته لكن لازال ذاك الشعور الموجع يداهمها
الممرضة ثبتت يدها على كتف منصور/هذا هو ياخالة
مبروكة جلست على طرف السرير مررت يديها على منصور تتحسسه بدموع فاضت من محاجرها برجفة صوتها/منصور يامنصور/انحنت ضامته لحضنها/
منصور فاضت دموعه من حس بدموعها بللت كتفه
//بعد لحظات اللقى//
مبروكة/ليه ماعلمتوني اول ماقام هاه ماني بأمه
يقين/هذا انتي دريتي
مبروكة تجاهلتها/ولد علامه ابوك اهرجه مايرد علي
يقين احتدت نظرتها والتفتت لسطام بنظرات تمنعه عن الرد/قالها الدكتور وقت الحادث ممكن ياثر عليه الحادث حتى لو صحى
مبروكة/ووش علي باول علينا بذالحين
يقين/قد سووا كل ورحت يمهم ونشدت امر الله الحمدلله على كل حال 
مبروكة بضيق/لااله الا الله
يقين/لذالحين ماندري عن تأثير الحادث كل ابوه
مبروكة ارتخت ملامحها براحة للحظة
سطام عقد حواجبه مافاته الشعور الغريب
مبروكة/متى بيطلعونه
سطام/لذالحين نشوف كيف اموره ويعدها يصير خير
مبروكة/يطلع مايجلس في ذا
يقين ميلت فمها بابتسامة
سطام/كيف يعني
مبروكة/كل اموره الناقصة بالبيت انشد عنها وعلمني
سطام/ليه
مبروكة/وشو اللي ليه اكيد بيجي عندي واقوم فيه يسدهم سنين امرضوه وهو عندهم
يقين ارتفع حاجبها من اللي تسمعه/لا مايطلع
مبروكة/مابقى الا هي تمنعوني عن ولدي
سطام/محد منعك عنه ياجدة مير ماتاخذينه وهو بعده مابرا
مبروكة/ابنشد الدكتور بنفسي وكان قال طيب يطلع عندي
سطام/ياجدة محد بيقوم به غيرنا
مبروكة/تعقبون ياعيال منصور محد احق مني بولدي
يقين احتضنت كف منصور
منصور شد على كفها
مبروكة/مهبولة انا اطشه على تباعين بني طاهر
سطام/جدة وش هالكلام تراه ابوي
مبروكة/وامحق عيال مارحمتوا عزيز اللي من لحمكم ودمكم
سطام بانفعال/يخسى ويعقب لا دمه النجس يشابه دمنا ولا فعوله تشابهنا هالخسيس الا يحمد ربه ماذبحته ماردني عنه الا اني ادري بينهان شر اهانة وسط الجماعة وحقي اخذه اخذه منه والشاهد الله
مبروكة ناظرت منصور/هاه اسمع وش يقولون/ناظرتهم/وتبوني اطش منصور عليكم لا والله حتى شوفته ماتشوفونه بدون رايي
يقين/وينهم بني طاهر
مبروكة زفرت بابتسامة بسخرية
يقين/كل ابونا من بني سمّار
مبروكة/تعقبين انتي واخوك من بني طاهر اللي سلمت ريوف ماغيرها
يقين/مرت سطام وراه والمرة تتبع رجلها
مبروكة بابتسامة/وانتي
يقين عقدت حواجبها/ومن قال اني على ذمته!!
منصور عقد حواجبه باهتمام
مبروكة ناظرتها باستغراب
يقين/هذاني طامحة واحتري ورقتي
سطام التفت لها بذهول
مبروكة ضحكت بسخرية/عفتي ولد عمك لخاطره وش اللي صار حتى تعوفينه
يقين/ماني ناكرة للجميل وامشي وسط العربان افضح الرجال اللي اكرمني يوم اني على ذمته
مبروكة ضحكت بشك من كلامها/ماهي بغريبة على بني سمار صحيح مير بني طاهر ظنك بيسكتون
يقين/وش علي منهم الزم ماعلي روحي عساهم بحريقة
بـيّـن الواقف ورا الستارة بعد معاناته مع الممرضين وواسطاته وحب خشوم حتى يقدر يدخل رجف قلبه من وصله كلامها معقولة فعلا تخلت هل هو بهاللحظة اصبح من بني طاهر بنظرها وهي من بني سمار رجع طريقه وقف ع باب الغرفة/يقين
يقين رجف قلبها من وصلها صوته تركت كف ابوها ونزلت يديها  تشد على قبضتها الواجفة
سطام عقد حواجبه والتفت يناظرها/صوت بـيّـن!!/وقف/
يقين مدت يدها ليده توقفته/خلك مع ابوي انا بروح/خرجت/
مبروكة/ولد ياسطام
سطام/نعم
مبروكة/صحيح طمحت عن الراعي خلاص
سطام سكت
مبروكة/علامك سكت
سطام/بينها وبين رجلها
مبروكة/يعني كذب لذالحين على ذمته لو به شي انت اول من يدري
سطام ناظرها بغيظ/وان كان بينهم شي هي ادرى بعمرها وباسعى ترجع له لانه يستاهل
مبروكة/دريت انه قول بس عشان تاخذون ابوكم مير والله تعقبون ماتسوونها وانا بنت ابوي
بـيّـن واقف برا الغرفة ينتظرها التفت يناظرها من سمع صوت الباب
يقين تقدمت له بخطوات ثابتة ونظرات تماثلها وبهدوء/نعم
بـيّـن ناظرها بانتظار جوابها
يقين فهمت نظراته وتجاهلت سؤاله/ماعندك شي يعني/لفت عنه/
بـيّـن مد يده ماسك يدها يوقفها
يقين التفتت له وسحبت يدها منه
بـيّـن عقد حواجبه من حركتها
يقين بحدة/لاتلمسني تقدر تكلمني تراني اسمع وافهم
بـيّـن تجاهل نبرتها الجديدة عليه اخذ نفس/وش اللي ارسلتيه
يقين/باقي تنشد!!
بـيّـن ناظرها بعيون تنطق بمشاعره مشاعر ممزوجة مابين عدم تصديق وتردد وتوتر وخوف من جوابها وبذرة أمل بتغيير كلامها لاوقف قدامها شد على قبضته /ابي اسمعها منك قوليها
يقين ناظرت عيونه لاول مرة تلمح هالنظرات بعيونه اخذت نفس وبنفس ثباتها/ابي الطلاق
بـيّـن رجف قلبه للمرة الثانية هاليوم الواقفة قدامه هي يقين يقينه البين وحياته الجديدة وجه الخير بعمره الجديد ناظر عيونها مو مصدق للحين كرر سؤاله يبي يتأكد هي فعلا تخلت/وشو ماسمعت
يقين/ابي الطلاق يابـيّـن
بـيّـن ناظر ثباتها وجمودها ماتزعزعت ولاتحركت حتى ذرة واثقة من كلامها كثر ثقته بانها هي الواقفة قدامه/يقين انتي
يقين قاطعته/ماودي نعدِم احلى ذكرياتنا بنهايات شينة ماتمثلك ولا تمثلني
بـيّـن عقد حواجبه
يقين باصرار/عشان كذا ترجيتك لخاطر هالايام خلنا نتطلق بدون مشاكل
بـيّـن مد يديه ليديها وشد على كفوفها بين كفوفه وكله رجى/وليه تنتهي ايامنا قدامنا العمر كله ان شاء الله
يقين/من الاول زواجنا كله غلط عشنا على امل حبنا الصغير القديم يمكن يعدّل وضعنا
بـيّـن يناظرها بذهول كل كلمة تخرج من فمها تدمر لحظاتهم السعيدة وتحطمها ارتباطهم بعينها خطأ واللي عاشوه بعينها مجرد وضع مؤقت وانتهى
يقين سحبت كفوفها من كفوفه واحتضنت كفوفه ناظرته برجى/واقولها لك من جديد خلنا نتطلق يابـيّـن انا وانت مانصلح لبعض ابد
بـيّـن يناظرها بصمت يستوعب كلامها المدمر بحقه وبحق زواجهم وبحق وعدهم سوا تخلت بسرعة وكله مبني على وجهة نظرها فقط سحب يديه من يديها وبعصبيته/اللي تقولينه كله غلط وحكمك كل ابوه غلط
‏يقين احتدت نظرتها بحدة/محد يعرفني كثرك انا لاحطيت الشي براسي اسويه وذالحين اخر شي اسويه بعمري اني ارجع لك قضينا يابـيّـن قضينا/مشت وتركته/
بـيّـن ناظرها تبتعد مشى وراها/يقين
يقين قفلت الباب بوجهه
بـيّـن وقف قبال الباب بهدوء قفلته بوجهه بدون اهتمام صدت فعلا هي صدت وألغت وجوده من حياتها بلحظة هان بعينها كل شي عكسه اللي كل شي بعينه كبير لف عن الباب بصدمته منها وسط افكاره كيف تخلت بهالسرعة ولاسباب كانت موجودة من البداية وتجاوزها سوا معقولة كل شي عندها فعلا انتهى جر خطواته بضياع مابين يصدقها او يصدق نفسه واحساسه
عزيز المراقب لهم من فترة كان نازل الدرج بخطوات سريعة من الدور المتواجد فيه غرفته ثم دخل للدور اللي تحته مشى وهو يتلفت حوله وقف من ناظرهم قباله ناظر قفا بـيّـن كيف كفوفه محتضنه كفوفها ناظرها كيف رافعة راسها تناظره وتسمع له بانصات وهدوء عض شفته السفلية بحقد كانت اول امنياته واكبرها ماطلب شي بهالحياة غيرها حتى الشيخة اللي ينازع ويحاول ياخذها ماكانت من اهتماماته كانت لاجل تمتلي عينها وماتشوف غيره كيف رضت باصغر القوم وادناهم لو اختارت غيره كان بيحاول يتقبل الموضوع وممكن يتجاوزه لكن اختارته وقبلته برضاها اختارت الراعي وفضلته عليه وكسرت باختيارها كل كبريائه وغروره وبعثرته ومحاولات الشيخة من بعدها ماكان الا يبي يندّمها على قرارها لكن هاذي هي قدام عينه تعيش حياتها برضا وسعادة بدون اي اهتمام لوجوده ماتحمل يناظر لمساتها ونظراتها له ناظر بـيّـن بحقد ولف عنهم راجع طريقه للدرج وخرج من المستشفى قبل يحضر اخر لحظات نقاشهم الحاسمة
............................................................
#شقّ_الغَمام