شـقّ الـغَـمـام

(٣٩)

..(٣٩)..
سبحان الله عدد كل شي وملء كل شي..
الحمدلله عدد ماخلق وملء ماخلق..
لاله الا الله عددمافي السماوات والارض وملء مافي السموات والارض..
-
<<بيت شاهر>>
سهم جالس يعزل البضاعة حسب الموزعين
شاهر جالس قباله يتاكد بعده من الكميات وبين كل فترة والثانية يسرق نظرات لسهم
سهم وقف شغله نزل الكمامة عن وجهه ناظره/خير وش وراك؟
شاهر/انا اقول يعني بس قول ديوان طلعه من الحسبة
سهم عقد حواجبه
شاهر/اكيد بتقول ليش
سهم تكتف
شاهر/يشكك كثير ويطلب اشياء كثير وقبل كل ذا ماني بمرتاح له ابد
سهم/انت تدري انك تتكلم عن ولد عمي اللي اعرفه ومشاركه قبل اعرفك
شاهر/مير مافادتك الشراكة معه انا شريكك اللي شفت معه الخير
سهم تنهد/اشوف
شاهر/لاتبطي هالشوف اعجل علي
سهم قطب جبينه بشك/علامك طاير
شاهر/هالديوان ينقد على كل كبيرة وصغيرة
سهم/من حرصه على امورنا
شاهر/اسمعني مااقوله من غل مير انا راعي الخبرة وديوان وراه بلا افطن له ياسهم وعلمني
............................................................
<<بيت عايض>>
عايض دخل بيته/السلام عليكم
خلود الجالسة مع اخوانها بالصالة/وعليكم السلام والرحمة/وقفت وسلمت عليه ومشت/
عايض/خلود
خلود التفتت له/سم يبه
غالية خرجت من المطبخ ووقفت قباله بينه وبين خلود/وش تبي فيها
عايض بوسع عيونه/بنتي مااكلمها يعني
غالية/التخصص اللي تبيه تدخله ياعايض
عايض/وهذا اللي ابي اقوله مير ماتكبين الواحد يهرج براحته!!
غالية ناظرته بشك
خلود انعكس فرح قلبها وارتسم على ملامحها جرت لابوها واحتضنته وبطيف دموع/مشكور يبه مشكور الله يخليك لي ولايحرمني منك
عايض بادلها الحضن وقبل راسها بابتسامة/قدمي عاللي تبين وين ماقبلوك مشينا يمهم
خلود تركته/وخالد؟
عايض/مثلك مثله خالد وين مايبي يقدم ويصير خير ان شاء الله
خلود جرت بوناسة للغرفة/بروح اتصل عليه يجي واعلمه
عايض مافارقت عيونه بنته وفرحتها توسطت قلبه كان فاقد شي وظن سببه غالية لكن استوعب انه فقد نفسه طيبة قلبه حنانه الفايض لعياله استوعب بهاللحظة من فرحة خلود ورضاها فرق تعامله معهم قبل المشكلة وبعدها زعل وعصب وكبر راسه على غلط مثل ماقالت امه تنهد براحة وحمد الله بينه وبين نفسه تدارك الوضع قبل يكبر ويدمر عياله التقت عينه بعينها
غالية تناظره بشكها/عايض ماتعشم البنية وتكسرها
عايض بلوم/افا ياغالية ماهو بأنا اللي اكسر بنيتي
غالية تعوذت من الشيطان بينها وبين نفسها مشت
عايض/غالية
غالية وقفت والتفتت له/نعم
عايض/تعودين ياغالية
غالية عقدت حواجبها/كيف؟
عايض/عودتي لبيتي مير لذالحين ماعودتي يمي
غالية ناظرته بصمت وسط تفكيرها من لحظة رجعتها للبيت لمحت بعيونه التغيير رجعت فعلا لبيتها لخاطر عيالها لكن فعليا مارجعت لعايض
عايض/هذاني عودت طارد ابليس عودت لبيتي وابي بيتي بكل مافيه ابيه براعيته
غالية ناظرته ووصلها احساسه الصادق ببرجعتهم مثل قبل ابتسم/مير راعية البيت عودت من مبطي ياعايض
عايض ابتسم بسرور
غالية/حياك عالقهوة ياعايض حياك
............................................................
    الـلـيـل
............................................................
<<بيت سطام>>
ام سطام واقفة على باب الغرفة بجلابية باللون الفضي تزينها فصوص كرستالية لافة طرحتها حول راسها وبيدها عبايتها وشنطتها ناظرتها
ريوف متمددة ومتغطية كلها بزعلها اللي ماهدا من امس
ام سطام تنهدت/يعني ماانتي رايحة
ريوف ماردت
ام سطام/تراه عشا لاختك
ريوف تحت اللحاف/على اساس هامتكم وحاسبتني من عيالك!!
ام سطام بنرفزة/تدرين عاد ازعلي انا تعبت منك/مشت وقفلت الباب وراها بقوة/
ريوف بدموعها/ليت ابوي فيه كان مالكم كلمة علي/عقدت حواجبها من سمعت صوت ارتطام بالارض فزت بخوف على امها خرجت من الغرفة وانتصفت حوش البيت الخالي من اي احد غيرها دخل قلبها الخوف للحظة لفت حتى ترجع طريقها قشعر جسمها برعب من ناظرته واقف قبالها/
عزيز المتسلل للبيت والصوت اللي وصلها ماكان الا صوت دخوله للبيت بعد ماتاكد خلوه من اهله كان متلثم بشماغه واول مالمحها فك هاللثمة ناظر ملامحها واعتلت ملامحه الابتسامة/لا لا افا عليك يابنت العم افا بس ظني بي كل شي ترا ظنونك صحيحة
ريوف بصوت اختنق من خوفها دخوله نظراته اسلوبه كل شي فيه مايطمن وبلعثمة/عزيز
عزيز احتدت ملامحه/اجل انا تهينيني عشان اخوك
ريوف هزت راسها بلا وسط انهمار دموعها/عزيز والله اني
عزيز قاطعها/والله لاذوقكم العلقم حتى عيونكم ماترفعونها بين العرب وانا ولد زايد
ريوف جرت برعبها لاقرب مكان وكان الصالة قفلت الباب
عزيز لحقها ومسك الباب قبل تقفله دفه ودخل وقفله وراه
ريوف بانهيار/تكفى عزيز تكفى عزيز
عزيز/ذوقي غدرتك يابنت العم ذوقيها
.
............................................................
<<بيت طاهر>>
يقين دخلت للبيت من الباب الرئيسي نزلت نقابها واحتفظت به بكفها ونزلت طرحتها على اكتافها ووقفت مصدومة من اللي تشوفه سجادة باللون الاحمر مشكلة ممر يتوسط باقي السجاد صوت الديجيه المغطي المكان كنبة كلاسيكية اطرافها مذهبة بنهاية هالسجاد الاحمر
غصنة بفستان باللون الاحمر وقفت قبالها مدت يدها/حياك الله/سلمت عليها وبهمس/عرس الليلة عرس مو بعشا
يقين همست وهي تسلم عليها/علامك لابسة احمر مثلي
غصنة/ماهو بلحالي
يقين مررت نظرها عالبنات كلهم باللون الاحمر مثلها
غصنة/اوامر عليا
يقين ابتسمت ويدها بيد غصنة/الله يعين ذي البداية
غصنة تركت يد يقين واحتضنت ذراعها مشت معها بابتسامة/لا جا بداية معاناتنا
يقين ضحكت/حلال عليه ورع اختي
غصنة ناظرتها برفعة حاجب/تراه ورع اخوي ماني بحاسدة
يقين ضربت كتفها بكتف غصنة/ادري مير نور غير ياغصنة
غصنة/عاد تبين تروحين يم العروس
يقين عقدت حواجبها/وش عروسه!!
غصنة ضحكت/اصبري ماشفتي شي خذي العلم من صاحبة الشان
يقين/بسألك غصيّن شفتي امي؟
غصنة/ايه عند العروس
يقين وقفت قبال باب بيت نور وناظرت غصنة بعتب/وبعدين!!
غصنة/باقي ماانتي مصدقتني
يقين/محشومة محشومة غصنة
غصنة/مردك تشوفين بعينك
اعتدال بفستان احمر ناعم وشعرها مسدول واقفة على باب المطبخ/غصنة
غصنة/يالله نتقابل شوي سلام/اسرعت بخطواتها/جاية جاية
يقين دقت عالباب
غيمة فتحت الباب وبيديها ترامس سلمت على يقين/حياك حياك/مشت بخطوات سريعة/
يقين دخلت للبيت وقفت عند الصالة/السـ/وقفت للحظة وهي تناظر الاغراض اللي عبارة عن سلال خيش داخلها ورد منثور ومباخر باللون الذهبي/ـلام عليكم
نور الجالسة على الكنبة بفستان ابيض ناعم وطوق ورد باللون الاحمر مثبت على راسها وشعرها الويفي وبمكياج ناعم التفتت لها ووقفت/وعليكم السلام والرحمة
يقين ضحكت متجهة لها/صدقوا يوم قالوا عروس
نور سلمت عليها وباحراج/تكفين اسكتي لاتزيديني هم
ام سطام خرجت من دورة المياه/علامك ابطيتي
يقين سلمت على امها/ماابطيت يمه وبعدين تخبرين البيت شوي عنكم وينها ريوف
ام سطام/تعبانة بالبيت
يقين تجاهلت هالكذبة الواضحة/عسى جدتك تبينا نزفك بهالخمبقة؟
ام سطام/اي بالله تنزف وغصب هاذي نور مو بأي احد
//نور ويقين ناظروا بعض باستغراب//
ام سطام/وليه ان شاء الله ماتزفين اختك وش وراك
يقين/سلامتك يمه ماوراي شي مير علامك ماانتي جالسة مع الحريم وجدتي بتجي؟
ام سطام بنفور من طاري مبروكة بعد اللي سوته فيها/مالي علم بجدتك وابطلع شوي الا كان بتطردني
نور/افا يمه ماعاش من يطردك البيت بيتك
يقين بسخرية/بالله نور جدتك لاتدري عن تحديد الجنس وتبلشنا بعدين/ضحكت/
نور/والله ادعي يارب ماتدري عن هالسوالف تدرين عاد توقعت جدي المستانس لحاله مادريت ان جدتي اكثر منه
يقين بضحكة/تخيلي نور تحتفل بالجنس تجيب لك بهم بلونين واللي يسبق هو جنسه/ضحكت/
نور بضحكة/والله حليوة الفكرة
يقين ناظرتها/اقول عاد نور تكفين بس
ام سطام/كان مسكتي العلم لبعد الثالث علامك خريتي القربة
حمدة داخلة للبيت ووصلها كلامها/وشو له لبعد الثالث ذا حفيد عياش زين ماقلبناه عرس الاولين
يقين ناظرتها والتزمت الصمت
حمدة ناظرت يقين/انتي علامك ماتسلمين
يقين ناظرتها بغيظ وسط صمتها للحظات بتفكير وبنفسها/غريبة تبي الصلح/نطقت وهي تتكتف/لي اسم
حمدة/تعالي سلمي يابنية
يقين تقدمت وسلمت عليها وسط تردد
حمدة ناظرتها/مايزين الاحَمر الا على بنياتي
يقين ارتفع حاجبها/وعساني منهم!!
حمدة ناظرتها/وانتي وش قولك
يقين/والله الى ذالحين وانا ظني ماني منهم مير عقب السلام تحيرت
حمدة ابتسمت/خذي الورد ووزعيه على خوياتك
يقين بنفسها/تكابر هالعجيز/طيب ماعلمتيني الاحَمر زين علي ولّا
حمدة/ماشاء الله الف من ذكره عيالنا ماياخذون الا بنات طويلين الاشناب
يقين ابتسمت من تحوير الموضوع
ام سطام ميلت فمها بعدم رضا
حمدة ناظرتها/اللي دروبهم ماتعرف الردى ولا تدله
ام سطام صدت تتجاهلها متجنبة للمشاكل
حمدة ناظرت يقين/مير الحمدلله ماطلعتي على قصيرات الاعيان مضيعات العقول وبكل وغدي يهيمون
نور اتسعت عيونها
يقين ميلت فمها بانزعاج
ام سطام بانفعال/وش اللي اهيم به هاه!!ماعرفت الوسع والراحة الا بهد ماهجيت من ضيقكم يابني طاهر
حمدة ضحكت/ويلي بلاك ماتدرين مااضوت الشمس ولا رف جناح الطير الا يوم طلعت شياطين الانس من بيننا
ام سطام ناظرتها بحدة/غصب تطلع شياطين الانس من بينكم وانتم أباليس
حمدة ضحكت/مير مقيولة كلن يرى الناس بعين طبعه
يقين شدت على قبضتها/يا
نور قاطعتهم بصرخة وجع/اه يمه جدة بطني بطني
يقين فزت للحظة بفزع
ام سطام مشت لها بوجه مخطوف وجلست جنبها/علامك
حمدة بفزع/بسم الله عليك بسم الله/جلست جنبها/وش صابك مسحت على راسها/قل اعوذ برب الفلق من شر ماخلق ومن حاسد اذا حسد بسم الله عليك بسم الله
يقين ارتفع حاجبها الايمن وتكتفت تناظرها بشك
ام سطام/علامك وش يوجعك
نور/مدري مدري بطني توجعني
حمدة/وين علميني من وين
نور ناظرت يقين بورطة
يقين/متى اكلتي؟
//حمدة وام سطام ناظروها//
يقين مشت للمطبخ/حركات جوعك اللي قبل تكبينها عنك
حمدة ناظرتها وبخصام/عاد ذا الكلام مايصلح انا بفطرك واغديك واعشيك دام ذي علومك يابنت عياش
.
............................................................
<<بيت ظاهر>>
وداد جالس بالغرفة بهم تحس بنفسها مقيدة بسلاسل من ظلم ظاهر الجاير بحقها والادهى والامر مجبورة تتحمله تحت سقف بيته قلبها يفيض مع كل ضربة بالدف وصلت مسامعها بهالعزيمة غم وقهر وحزن هم لهم الفرح وهي مكتوب عليها تعيش النكد والضيق اعتلى رنة جوالها المكان فتحت الخط بملامح منزعجة
نوار بقلق/هاه وداد بشري وش صار
وداد بانفعال/وش صار صار اللي صار خلاص فكوني يكفي اتصالات ونشدة اذا صار شي اتصلت وعلمتكم
نوار/وداد علامك تدرين بنا
وداد قاطعتها/وداد ماتت الله ياخذني صدق وانفك من هالظاهر ومنكم كل ابوكم/قفلت الخط وقفلت جهازها غطت اذنيها بيديها وبصراخ/خلاص خلاص/انفجرت تبكي غطت وجهها بيديها/الله لايهنيكم الله يحرق قلوبكم
............................................................
<<مجلس الشعر>>
//بعد العشا الشباب مجتمعين بالمجلس يسولفون//
ضاري دخل للمجلس وبيده صينية حلا
غيمة الصغيرة وراه بيدها ترمس شاهي اعشاب
رازي بابتسامة/ياهلا ومرحبا بالشيوخ يالله حيهم
ضاري نزل الحلا بينهم
غيمة وقفت عند طاهر/جدو طاهر جدة حمدة تقول اشرب عشان بطنك مايعورك شوي
عساف ابتسم
طاهر ضحك وجلسها بحضنه قبل جبينها واحتضن وجهها بكفوفه/يابنية العلم ينصب باذني ماهو باذان الجميع
ديوان بغيرة/حظك ياجد بس 
طاهر غمز له/اعزم بس انت
نواف/ايه ياجد ياماشاء الله متى اتزوج ويجبون الترامس لي بالمجلس
طاهر/انت انجح بالثانوية وعرسك علي
نواف بوسع عيونه/احلف ياجد ترا المجلس كل ابوه به شهود
سلمان/ماقاله الا عارف انك خيبان يامال الخيبة
بـيّـن ابتسم/عليّ اجمع بني سمّار لك كل ابوهم
نواف باشمئزاز/ويلاه لا بالله ماابي احد منهم ابي استفتح حياتي بخير/انتبه لسطام/المعذرة يالنسيب
حامد ناظره بكره
طاهر ماغاب عن عينه نظرة حتمد
سطام انتبه لنظرات حامد وتجاهله ضحك بخفة/عساني بس معزوم
نواف/مير انت منا ماانت من بني سمار
سلمان/الله والعقل مير هو شيخهم لا جا كل ابوهم معه
نواف سكت بحيرة
بـيّـن ضحك/ولد وين وصلت مابه عرس اول خلص المدرسة وبعدها توظف
ظاهر قاطعه/ثم بعدها يصير خير ان شاء الله
نواف تكلم وهو يتمدد/ايه ارقد ازين
بـيّـن/احلم به اسرع لك
ظاهر ضحك
نواف جلس بزعل/جد شوفهم يتطنزون علي
طاهر رفع يديه/علي بعرسك مالي شغل بالباقي
نواف تكتف بزعل
ظاهر ناظر رازي/قم جيب كاس لجدك
رازي مشى باتجاه الكاسات بطرف بيت الشعر
حامد ناظر ضاري/ضاري
ضاري وقف والتفت له/سم ياعم
حامد/باقي به ضيفان؟
ضاري رفع يده يعد/جداتي كل ابوهم و نور ظاهر
ظاهر اتسعت عيونه
ضاري/ولاء محارب
محارب يشرب الشاهي شرق من سمع اسمها
رازي كتم ضحكته
ضاري/غيمة رازي
رازي ابتسم بلامبالاة
ضاري/وسلام سطام
بـيّـن فز وجرى له
ضاري/و
بـيّـن وقف عنده غطى فمه
غيمة الجالسة بحضن طاهر/ويقين بـيّـن
طاهر ضحك
بـيّـن تجهم وجهه يناظرها
غيمة ناظرت طاهر/كذا تقول غصنة
طاهر بابتسامة/ازين ماتقول وذا الصحيح/ضحك/
بـيّـن مسح على راس ضاري بغيظ رغم ابتسامته/رح للعرب  قل ينتبهون لجوالاتهم
ضاري يناظره باستغراب
غيمة نطت من حضن طاهر مشت لهم ووقفت جنب بـيّـن ومدت يديها تبعده عن ضاري تكتفت تناظره/ليش تمسك راسه بقوة كذا؟
بـيّـن/تراها مسكة راس وين القوة وتراه ولد اخوي
غيمة ناظرته بغيظ
بـيّـن يغيظها باستمتاع/وانا اللي مسميه
غيمة بقهر منه/العرب يقين صح
بـيّـن حافظ على ملامحه رغم انزعاجه وضيق عيونه/ياكثر العرب وش دراك انها مرتي
غيمة بعناد/عادي قل يقين ترا مو عيب
بـيّـن/ماقلت عيب
غيمة/قل طيب قل يقـ
بـيّـن بنفاذ صبر مد يده لفمها يغطيه/خلاص خلاص انتي صح بس اوص
غيمة دفعت يدها
طاهر ضحك/وش لك وللبزران كبهم عنك
غيمة رفعت يدها وابعدت يده عنها تناظره بغيظ
بـيّـن يناظرها باستغراب من نظراتها له
غيمة مدت يدها ومسكت يد ضاري ومشت/امش نقول للعرب حقينه يشوفون جوالهم/وقفت على مدخل بيت الشعر والتفتت تناظره/عادي قل يقين وش العرب ذي
بـيّـن ناظرها بوسع عيونه وجرى لها
غيمة صرخت تركت يد ضاري وجرت
رازي انفجر يضحك بعد ماكان كاتم ضحكته
ظاهر يناظره
رازي تنحنح يحاول ييوقف ضحكه
ظاهر/عزالله اللي يشوف مناقرها يعرف انها بنتك
طاهر بابتسامة/الحق ورعتك
رازي بابتسامته/ماطاحت بيد غريب عند عمها مامن خلاف
............................................................
.
بـيّـن يمشي ويدها بيده
يقين تناظره بغيظ سحبت يدها
بـيّـن شد على يدها بيده بابتسامة بدون يناظرها/اعوذ بالله يابه حرارة واصلتني تدفيت معها بذا البرد
يقين بغيظها/يعني يوم زانت الجلسة تقول يالله
بـيّـن/راحوا الخلق رقدوا ماعاد به احد
يقين/وانت وش دراك
بـيّـن ضم يدها لصدره/يابنت اخاف اسري وتروحين لحالك وانا اخاف عليك لا روحتي لحالك
يقين ميلت فمها بعدم اقتناع من اجابته/ترا بيت سطام قريب/رفعت شنطتها/وتراه معي
بـيّـن اتسعت عيونه وقف يناظرها/تقولينه صادقة
يقين وقفت وهزت راسها بايه/اي والله
بـيّـن/ماانتي بصاحية لو انسرق لو جتنا مصيبة من وراه
يقين/لاتخاف نسيت اني ذيبة
بـيّـن/وكان غفلت الذيبة
يقين/ماتغفل الذيابة هذا هي تنام بعين وحدة
بـيّـن/ماكل شجاعة زينة
يقين خرجت المسدس من الشنطة تمرره بين يديها بلعب وبزعل/كان ودي اخلي غصنة تشوفه بتستانس معي
بـيّـن/الحمدلله اللي طلعتك قبل تشوفه
يقين رجعته لداخل شنطتها/ادري كان صدق بنستانس سوا
بـيّـن مسك يدها ومشى/الا بتجيبن اجل احد بغشامتكن
يقين بغرور/هه الا حنا نعلمك الرماية واصولها
بـيّـن/لا تعلمني وتعلمن بعيد عني
يقين هزت راسها بيأس منه/ماادري انا متى ترفع سقف الثقة بس
بـيّـن قبّل يدها/يشهد الله انها فوق،فوق السما خلي عنك السقف عاد
يقين/الا بذا الامور
بـيّـن ضحك/يازين اللي خابرني وخابر علومي
يقين تنهدت بصوت/ايه بس الشكوى لله
بـيّـن التفت يناظرها بوسع عيونه/عسى ماشر يابنت منصور
يقين/هو به احد خابرك غير بنت منصور
بـيّـن ضحك/افا لذا الحد مفضوح
يـقـيـن/لعيوني؟
بـيّـن ناظرها بابتسامة هز راسه بايه
يـقـيـن/بالحيل والله
بـيّـن وقف على مسافة بسيطة من باب بيت سطام ويدها بيده بابتسامة/اجل دام مفضوح تراني رايح
يقين تركت يده واحتضنته بين يديها بصمت من حيرتها بهالموقف هل تحذره وكيف تحذره ومن مين رغم تجاهلها للموضوع من مدة طويلة لكن ياكثر الوجع بهالحيرة
بـيّـن مسح على ظهرها بابتسامة/ماودك تقولين شي
يقين/انتبه على نفسك بـيّـن
بـيّـن/ابشري
يقين اوجعها قلبها وهي توصيه/اوعدني تنتبه على نفسك
بـيّـن ضحك وتركها/افا هالشوارب وتخافين علي ذيب ماعليك
يقين مشت لبيت سطام وقفت عند الباب تفتحه بمفتاحها/
ايه الذيب خابرة علومه
بـيّـن/وشو
يـقـيـن فتحت الباب
بـيّـن جرى لها
يقين دخلت البيت بسرعة وقفلت الباب بقوة
بـيّـن ابتسم/لا قضيت رسلت لك تصبحين على خير/مشى/
يقين فتحت الباب بشويش تناظر قفاه وهو يبتعد بشي من الضيقة
............................................................
.
ولاء مر هالاسبوع عليها بثقل وهي اللي اعتبرته هدية وحلفت تنبسط فيه بدون اي اعتبار لكونه عقوبة بحقها ماكان بالخفة والفرح اللي مخططة له والسبب هو رغم عدم تصريحه الا انه واضح شايل بخاطره وساكت عنها اتصلت عليه ووصلها الخط مشغول تنهدت وارسلت(محارب ابي اروح البيت مصدعة مرة يعني اروح لحالي)دقايق وضوت شاشة جوالها معلنة اتصاله ابتسمت وردت/نعم
محارب/ماتروحين لحالك
ولاء/طيب لاتبطي علي ترا ذبحني الوجع
محارب/يالله دقايق وجايك
ولاء جرت باتجاه بيت منيرة مرت من جنب غصنة بطريقها
غصنة/وين تونا
ولاء مكملة طريقها/اخوك يعني ماتعرفينه
غصنة/انا اكلمه
ولاء وقفت والتفتت لها/تكفين غصنة لاتقولين له شي بكرة ان شاء الله وانا عندك
غصنة/محارب صدق انه محارب يحاربنا حتى بالقعدة
ولاء بتحذير/غصنة لاتدعين هاه
غصنة/عساه مايتحارب بس
ولاء دخلت لبيت منيرة وخرجت وهي لابسة عبايتها/يالله سلام
غصنة تنهدت/ولو ان ذالحين سهرتنا بتبدا بس يالله ماعليه
ولاء مررت نظرها عالبنات/يالله سلام/خرجت من بيت ظاهر ناظرت قفاه واقف ينتظرها ابتسمت/
محارب التفت وراه من سمع خطوات عرفها ومشى
ولاء عبست بوججها بزعل/محارب احترني علامك
محارب وقف
ولاء وقفت جنبه/شوي شوي ماتشوفني لابسة كعب
محارب مد يمينه ومسك كفها وبنفس الوقت دخل يساره بجيبه خرج جواله وفتح المشاف ينور طريقها 
ولاء زفرت نفس بخفة براحة احتضنت ذراعه مستندة عليه
محارب/كعب وسط وادي الغريب كان ماصكك صداع والله
ولاء/لازم محارب عشان الكشخة
محارب يجر خطواته بهدوء بانتباه عليها تنهد بطفش/عزالله كان بتمشين كذا بتشرق الشمس مابعد وصلنا نزلي كعبك
ولاء ناظرته بتفكير مافيه حل لوضعها/والله ماامشي حافية
محارب ترك يدها وعطاها ظهره
ولاء ناظرته بذهول
محارب/خلصينا
ولاء حاوطت يديها حول رقبته
محارب شالها على ظهره
ولاء زمت شفايفها بخجل
محارب اعتدل بوقفته رفع يساره ومد لها جواله/ضوي لي الطريق
ولاء اخذته منه/ابشر
محارب رفعها شوي ينزل كعبها وكل يد فيها فردة كعب وثبت يديه تحتها كمل طريقه يمشي باتجاه بيت مضاوي
ولاء بيدها الجوال منورة الطريق/محارب
محارب/نعم
ولاء/باقي للحين زعلان
محارب سكت
ولاء/اسفة محارب
محارب/على؟
ولاء/اسفة لخاطرك اللي خاب فيني بس مو اسفة عاللي سويته لانه قليل بحقها
محارب تنهد/ادري تستاهل بس مو كل شي ينحل كذا
ولاء/قلت يامحارب تقهر بالحيل والله
محارب/كنتي توجهيني واستانست قلت خبالتي اللي يهاوشوني عليها دايم بتخف على يديها شوي
ولاء ببابتسامة/عديتني
محارب/عاد المرة الجاية عدي الى خمس وتعوذي بعدها سوي اللي تبين
ولاء/يعني الخاطر طيب
محارب/وهو له حق يزعل عليك!!
ولاء ضمته بقوة
محارب كح وبصوت مخنوق/بنت بنت
ولاء تركته بسرعة/اسفة اسفة نسيت
محارب ابتسم/اثاريك كل هالقد مهمومة حتى كذب وكذبتي
ولاء بخجل من كشفه لها/ايه خاطرك عندي بالدنيا كلها
محارب رفعها وجرى بابتسامة
ولاء تمسكت فيه بقوة/محارب شوي شوي لانطيح محارب
............................................................
<<بيت مبروكة>>
بـيّـن جالس قبالها وبينهم سفرة الضيافة يناظرها بحواجبه المعقودة باستغراب من طلبها حضوره
مبروكة/تقهوى انت ذالحين من اهل البيت
بـيّـن ضحك بذهول/انا!!من اهل البيت!!
مبروكة/تخبرني عجوزٍ يالله اقوم بروحي
بـيّـن/تريحي قهوتك مشروبة ياسحاب
مبروكة احتدت نظرتها
بـيّـن ناظر المبخرة المتصاعد منها البخور مد يساره لها مقربها منه ودخل يمينه بجيبه/مير دام الجمر حي شريت عود ودي تعطيني رايك به
مبروكة عبست بوجهها بشك من كلامه
بـيّـن خرج العشبة اللي اخذها من رازي وثبتها فوق الجمر/تبخري ياام زايد
مبروكة تجهم وجهها من سمعت اسم ولدها منه
بـيّـن قرب المبخرة لها/تبخري
مبروكة فتحت علبة الموية وكبت الموية فوق الجمر بابتسامة/ياوليد لاتحداني ماعود تحديك عليك بفود
بـيّـن بتحدي/هذاك اول ذالحين لفيت يمك ووراي جيوش منى عينها تشقّ غمامك
مبروكة ضحكت بسخرية/ويل حالي ماتعلمت لذالحين هذاني قدامك من سنين تحذف يمي حصا ولا لحقتني
بـيّـن بابتسامة وثقة/هالمرة بيديني اشقك
#شقّ_الغَمام