شـقّ الـغَـمـام

(٤٢)

..(٤٢)..
سيحان الله والحمدلله والله أكبر ولاحول ولاقوة إلا بالله ولاإله الا الله ..
-
<<بيت منور>>
//الاخوات مجتمعات بالحوش عالقهوة بصمت الكبار ماعدا اصوات الصغار مغطية المكان عكس العادة اصوات ضحكهم وسوالفهم تسمع من خارج البيت//
وداد دخلت للبيت نزلت نقابها وطرحتها/السلام عليكم
نوار وقفت تناظرها بحدة/لا عليك سلام ولا تنزل عليه رحمة لا هلا ولا مرحبا وش جايبك هاه وش
وداد الواقفة تناظرها بغيظ
نورة بحدة/نوار علامك
نوار/علامي!!تشتتنا من ورا العلة رجلها وباقي على ذمته لذالحين لاهي اللي سنعتنا معه ولا هي اللي فكتنا من شره
هاجر/مير حتى هي معنا علامك شايشة عليها
نوار بغبنة/ايه ماعليكن كل وحدة لاقضت قهوتها طست يم بيتها مير انا احمد حالف يمين علي ماادخل بيته الا اذا قضت هالسالفة بدون محكمة وظاهر العلة مابنيته خير/ناظرت وداد/هذا هو مارحمها
الام/خلاص اسكتن جايات عندي نتونس ولا ننغث فوق المغثة
نورة تنهدت
نوار وقفت وناظرت وداد بقهر/قعدتك معه ماتعني الا انك راضية بسواياه فينا
وداد/نوار
نوار قاطعتها/وانا مالي قعدة بمكان انتي به دام رضيتي تقعدين مع هالخبيث/مشت/
هاجر/نوار بنت نوار
نوار دخلت للبيت بدون تدر عليها
نورة ناظرت وداد/اعذريها وانا اختك حياك عالقهوة حياك
نوير الملتزمة الصمت من البداية/الله يلوم من يلومها
هاجر التفتت لها/خلاص نوير
نوير/ماجانا من ورا عنادك الا الشر لو انك رضيتي بطلاقك منه وسكتني ماجريتينا معك للبلاوي ذي كل ابوها
وداد احتدت نظرتها
نوير/اجل تحسبين نورة المهلية وهاجر الساكتة وحتى انا مرتاحين الا كلنا مثل نوار مير الفرق رجلها نزلها عند امي وحنا ماكلين السم من رجالنا وساكتين عشان عيالنا وكل ذا من تحت راسك ياوداد
وداد بنرفزة منهم/وش سويت لكن انا!!ازعلن من ارواحكن بدل تنصحن تشيشني عليه وزعلانات بعد والبلا من روسكن عجيب والله!!
نوير وقفت وبغيظ/محد شرع بيبانه وتشكى غيرك ويوم حنا نطيب خاطرك نطلع الغلطانات!!صدقتي عجيب اي والله عجيب!!/مشت للبيت وتركتها بدون انتظار لردها/
هاجر/من دق الباب لقى الجواب كنت الومهن من شوي على كلامهن لك مير بعد قولك الشرهة علي انا ماهي بعليك/مشت/
نورة مشت بصمت
//كلهم وقفوا ومشوا لداخل البيت//
وداد جلست جنب امها وصبت لها فنجال وشربته وهو حار فوق حرقة قلبها من اللي يصير زادوها خواتها غرقت عيونها دموع من كثر القهر
الام/يعني ياوداد مابه ببناتي احد افلح كثر ماقدرتي تجيبين رجلك بالحيلة وتسلمين
وداد التفتت لامها/ماعاد ينفع به شي يمه ماعاد
الام/لا ما بالدنيا مثل الحريم تغسل الرجل وتخليه يخون حتى ديرته
وداد تناظرها بصمت
الام/خذيه بالحيلة عسى قلبه يلين ونرتاح وانا امك 
وداد ناظرت فنجالها بصمت وسط تفكيرها بهالكلام
...........................................................
.
ابو مظفر وقف بسيارته وخلفه سيارة حارسه قبال حوش سراي بغيظ محتويه نزل من السيارة جار خطواته باتجاه الحوش متجاهل بيت الشعر اللي معتاد تستضيفه مبروكة فيه وضرب عالباب بكل قوته بغضبه
سهم النايم بغرفة المراقبة صحى من قوة صوت دق الباب ناظر الشاشات بنوم اتسعت عيونه وطار كل النوم عن عينه من ناظره سحب ثوبه المرمي عالطاولة جنب الشاشات يلبسه وهو متجه للباب/طيب طيب
ابو مظفر التفت لحارسه واشر له عالحوش
الحارس تسلق الجدار ووقف عليه
سهم فتح الباب وخرج له/حي الله الشيخ ياحي ابو مظفر ياحيه
الحارس نزل من عالجدار واتجه لسهم ومسكه
سهم يدفه عنه بصراخ/خير علامك مهبول
الحارس ثبت سهم وشد عليه مجبره ينحني
ابو مظفر بحدة/لاهلا ولا مرحبا ماهو انا اللي ينضحك علي واسكت كان ماحاسبتك معزبتك انا احاسبك
سهم يقاوم اللي ماسكه/وش ضحكه وش تقول انت
ابو مظفر بحدة/وين البضاعة؟ومن موزعك انطق
سهم بحدة/البضاعة تخبرها وموزع مابه موزع
ابو مظفر ناظر الحارس
الحارس ضغط على كتفه حتى خلعه من مكانه
سهم صرخ للحظة ثم كتم صرخته
الحارس تركه
سهم انحنى شبه ساجد من ألمه
ابو مظفر تقدم له وانحنى شبه راكع/خابر انك تلعب من ورا العميا مبروكة وخابر ان ولد عمك معك
سهم ناظره بملامح متألمة
ابو مظفر/وايه خابر شاهر
سهم احتدت ملامحه
ابو مظفر/مير عوني موزعك الجديد من هو
سهم/كل هاللي تقوله كذب مامنه شي صحيح
ابو مظفر ضحك واعتدل بوقفته/اسامح واعفي عن كل احد الا السروق والخوان ماادانيهم ابد ترثع بي حرقة ماتطيب الا بتلة ارقابهم
سهم بلع ريقه
ابو مظفر مشى/مردي اعرفه وتاليتها رقابكم تزين مجلسي/ركب سيارته ومشى ووراه خارسه/
سهم ناظره بحقد وهو يبتعد جر خطواته للسيارة بكتفه المايل خرج  جواله من جيبه ورماه عالطبلون ركب السيارة بهدوء وسط وجعه اخذ نفس يحاول يهدي غيظه من وصله رنين جواله سحبه ورد بحدة/انا ماقلت لك لاتتصل على رقمي ذا ابد
ظافر الواقف بمحطة يعبي سيارته متلثم/سهم تكفى افزع لي تكفى
سهم عقد حواجبه/علامك
ظافر/حول لي مبلغ بسرعة محتاجه ضروري
سهم/توك ماخذ دفعة ماهي بهينة
ظافر/بالبيت مااقدر ارجع له/تنهد/سهم حق الايام الخوالي تكفى ياسهم بس هالمرة تكفى
سهم بوجع/اصبر علي يبي لي كم ساعة واحولك
ظافر/عساني ماانحرم ياشيخ بس
سهم/ظافر امسك ارضك وفكنا من مشاكلك لاتخليني اندم اني استوثقت بك
ظافر كتم سواياه بقلبه/ابد انت كل اللي تبيه اوزع البضاعة وماقصرت لاتشيل همها ابد
سهم تنهد/لاعاد تتصل على رقمي مرة ثانية/قفل وشغل السيارة باتجاه المستشفى/
............................................................
<<بيت مضاوي>>
رازي ببنطلون وتيشيرت خارج من الغرفة وقف يناظرهم بابتسامة
غيمة ماسكة يدين غيمة الصغيرة تدور فيها وبنفس الوقت ترفعها وتنزلها بابتسامة/هاه اوقف المروحة؟
غيمة الصغيرة اللي تعتلي بين فترة وفترة صرخة او ضحكة حماس منها/لااااا لاااااا خليهت مروحة طويلة
مضاوي الجالسة تناظرهم بابتسامة/غيمة نزلي البنت داخت ذالحين ينقلب راسها نزليها
غيمة وقفت ونزلتها عالارض ولازالت ماسكتها بانفاسها السريعة/ستوب
غيمة الصغيرة المتمايلة بعدم اتزان بزعل/لاااا مرة ثانية مرة ثانية
رازي وقف عندهم بابتسامة/ابشري مرة ثانية ياعيني ماطلبتي شي/رجع يساره من وراها وشالها ورجع يمينه ورا خصر غيمة/
غيمة اتسعت عيونها وحاولت تهرب قبل فعلته المتوقعة
رازي ثبتها ورفعها ودار فيها بسرعة قبل تهرب وبصوته العالي/مروحة
غيمة الصغيرة اعتلى صوت ضحكتها بوناسة
غيمة حاوطت رقبته بيديها/رازي خلاااااص
غيمة الصغيرة/لا بابا اسرع اسرع
مضاوي/ولد نزلهن وارحم عمرك لاتنكسر علينا مانقدر عليك كل ابونا اناثي يالله نشيل اعمارنا
رازي وقف ونزل غيمة ثم انحنى حتى ينزل غيمة الصغيرة ونزلها ارتفع حتى يعتدل بوققته وتغير وجهه وثبت
غيمة عقدت حواجبها/علامك
رازي سكت
مضاوي بانفعال/اني قايلته غير تحيب لعمرك البلا يوم يالمهبول هاه وش عينت عقب سواتك علمني
غيمة مدت يدها ليده تسنده/كيف اساعدك وش نسوي انادي اخواني
رازي جر خطواته للغرفة بنفس وضعه المنحني وبوجع ويده بيد غيمة/لا لاتنادين احد بروح الغرفة كان مافك كلميهم
غيمة الصغيرة تمشي جنبه بملامح قلق وخوف مرتسمة على وجهها
رازي دخل لغرفته وتمدد عالسرير على جنبه/غيمتي
غيمة تناظره بقلق
غيمة وغيمة الصغيرة ودوا بنفس الوقت/نعم
رازي ابتسم/غيومتي الحلوة جيبي لبابا موية
غيمة الصغيرة خرجت من الغرفة تجري
رازي اعتدل وتمدد على ظهره ومد يده لغيمة سحبها له
غيمة تحركت من سحبته وثبتت مكانها بمقاومة لسحبته وناظرته بوسع عيونها
رازي/تعالي جنبي همزي ظهري
غيمة سحبت يدها منه وتكتفت بغيظ/يعني كل ذا كذب ماتكب هالحركات
رازي/غيمتي ترا صدق ظهري يوجعني/مد يده لها/غيمة
غيمة تنهدت ومدت كفها لكفه
رازي مسك كفها وسحبها لها
غيمة تقدمت معه بابتسامة وجلست عالسرير جنبه/طيب اعتدل عشان اهمزك
رازي سحبها لحضنه
غيمة سايرت حركاته بابتسامة
رازي تراجع عالسرير تارك لها مكان وتمدد على جنبه
غيمة تمددت جنبه وتوسطت حضنه
رازي حاوطها بيديه تنهد/خلاص راح الوجع كل ابوه
غيمة رفعت نفسها مبتعدة عنه
رازي اتسعت عيونه وشد عليها/مسرع
غيمة/تقول راح الوجع
رازي برجى/غيمة
غيمة ابتسمت وبادلته الحضن
رازي تفجرت داخله مشاعر الفرح والسرور من حس بيديها تحاوطه واخيرا انهدم جدار الصد المنيع بوجهه اخيرا لاحت له بدايات القبول منها دفن وجهه برقبتها/اليوم قلبي غطاه الربيع ياغيمة غطاه
غيمة ابتسمت
رازي رفع وجهه بابتسامة والتقت عينه بعين الواققة عالباب مد يده للحاف يسحبه يغطي غيمة
غيمة عقدت حواجبها باستغراب من حركته
غيمة الصغيرة واقفة بملامح محتدة وبيدها كوب الموية تناظره بغيظ/بابا ياقليل الادب
غيمة اجتاحتها حرارة من الاحراج ودفنت نفسها برازي همست/صرفها رازي صرفها
غيمة التفتت تناظر مضاوي الفاصل بينهم خطوات/جدة بابا وغيمة قليلين ادب
مضاوي اتسعت عيونها/تعالي تعالي يمي،رازي وعمى صك الباب يامال الصكاك صكه
غيمة ابعدت عنه من وصلها صوت مضاوي وتكورت تحت اللحاف لحالها
رازي ناظر غيمة بابتسامة رفع صوته/غيومتي مافيه شي تعالي عندي تعالي
مضاوي مدت يدها لغيمة الصغيرة/امشي نطلع من هالبيت وانا جدتك امشي ويالله عسى راعيه يستحي على وجهه وينتخي يالله
غيمة خرجت من تحت لحافها  من سمعت كلام الجدة
رازي مسك يدها ضحك من سمع دعوة جدته/امين امين مير ياجدة ماسويت حرام ولا عيب
غيمة غطت فمه بوسع عيونه
رازي حرك حواجبه بضحكة
غيمة/خلاص رازي خلاص
رازي رفع يمينه وضغط على كفها وقبله
غيمة سحبت كفها بسرعة
رازي ناظرها بضحكة
غيمة/وبعدين يعني وبعدين يارازي
رازي رجع يده تحت راسه يسنده تنهد وظل يتأملها بعدم انتباه لخصامها
غيمة/تاليتها بنطلع من البيت صدق وبعدين لاتنسى عندنا غيوم لازم تراعي عمرها يارازي وتراعي كل كلمة تقولها/قطعها صوت رنين جواله/
رازي عبس بوجهه بانزعاج سحب جواله مجبر يناظر الرقم تنهد من ناظر اسمها/ياحبك للخراب 
غيمة ناظرته بتهديد
ولاء بصوت راجف مبحوح من كثر بكاها/رازي
رازي فز جالس عالسرير بملامح انخطفت من صوتها/انتي طيبة فيك شي 
ولاء انهارت من سؤاله/الحق علينا يارازي الحقنا يااخوي
............................................................
<<المستشفى>>
يقين بنبضات قلبها السريعة اللي تفوقت على خطواتها بالسرعة بانفاسها السريعة بمشاعر اختلطت بين فرح وتوتر وخوف وحتى قلق على وضعه الحالي تمشي ورا سطام وقفت من التفت لها 
سطام/بأدخل قبلك اشوف الامور وثم تدخلين لاناديتك
يقين/لا ندخل سوا
سطام ناظرها برفض
يقين فهمت نظراته/لاتحاول رجلي على رجلك والله ماتدخل لحالك وكل شي يقولونه اسمعه قبلك ياسطام
سطام تنهد بقلة حيلة من عنادها دخل للعناية بعد مااخذ التصريح
يقين مشت وراه
سطام وقف جنب سرير ابوه يعيون امتلت دموع
يقين رجف قلبها من ناظرت ابوها المتمدد عالسرير كم تكره المستشفى والعناية وهالسرير انسابت دموعها بلوم لنفسها اهملت ابوها باخر فترة طال شعره وحتى لحيته طالت وقفت جنبه قبلت جبينه ومدت يسارها ملامسة ليده انحنت وهي تمسح على راسه بيمينها همست/يبه
منصور عرف هالصوت وصاحبته فتح عيونه ناظرها بتعب
يقين هلت دموعها بغزارة
سطام انحنى مقبل جبينه وسط دموع هلت فرح من رجوع ابوه لهالحياك بعد طول انتظار
يقين انحنت شبه جالسة وضمت يده بين كفوفها الراجفة/الحمدلله الحمدلله
سطام همس يناظره وسط دموع تساقطت مبللة لخد ابوه ويمسحها عن وجه ابوه بسرعة/يشهد الله تو رجع الامان لقلوبنا يبه توه
منصور يناظرهم بتعب وسط صمته
............................................................
<<المستشفى>>
عزيز متمدد عالسرير بوجهه الواضح عليه اثار معركة عنيفة يقلب بجواله ناظر بارود/هيه رفعت البلاغ
بارود/جدتك عيّت
عزيز فز جالس/وشو!!
بارود/تقول بتحل المشكلة بطريقتها
عزيز/رح وارفعه لاتحتريها بكرة بيمسك علي ممسك لازم اوقفه عند حده 
بارود/عزيز طاوع جدتك هالمرة
عزيز ناظره بحدة
بارود/سواتك ماهي بهينة
عزيز احتدت نظرته وفز من سريره ساحب بارود من ياقته/سواتي!!ليه وش سويت علمني يافهيم وحكيم هالديرة علمني
بارود دفه عنه بقوة
عزيز احتدت نظرته بذهول من فعله
بارود بطفش من طيش عزيز خصوصا بعد علمه بفعلته كرهه وكثير يتحمل كل شي واي شي ممكن يسويه لكن يعتدي عالحريم بهالشكل هالشي غير مقبول عنده ابد حتى لو كانوا حريم عدوه/تراني مراعيك لان جدتك موصيتني وذا حق العشرة
عزيز ارتفع حاجبه/وش قصدك
بارود تكتف/واضح اللي أقوله وكان ودك بالبلاغ سوه بنفسك انا مالي شغل/ابتعد عنه وجلس عالكرسي تلثم بشماغه ونام تاركه/
عزيز ضحك بغبنة/كل يوم اتعلم شي جديد لا اهل ولا اخويا ولا عزوة صدق الدنيا مالها امان
.
............................................................
     الـعـصـر
............................................................
.
بـيّـن بثوبه الكحلي يجر خطواته بالممر رايح راجع قبال العناية ينتظرها بيده كوب حليب وكيس شفاف داخله سندويشات
يقين خرجت من العناية واسرعت بخطواتها بابتسامة من ناظرته
بـيّـن اسرع لها بابتسامة من ناظر زولها وقف قباله وانحنى يسلم عليها
يقين بادلته السلام خد بخد
بـيّـن احتضنها بابتسامة/الحمدلله على سلامة عمي قرت عيونكم الحمدلله على سلامته يايقين
يقين فاضت دموع الفرح من جديد بعد كلامه مشاعر اليوم مختلفة عن اي شعور عاشته قلبها يرفرف من كثر الفرح اللي محتويه تحس بنفسها اليوم غير اليوم دمعتها تهل بلا سبب لو احد يشمت عاطس جنبها فاضت 
بـيّـن تركها وناظرها بابتسامة مد يمينه لعيونها ماسح دموعها بخفة/ليه البكى المفروض تقلبينها عرس عندهم
يقين ضحكت/تبيهم يطردوني هم صابرين علي عشان يعلموني عالجهاز لو يحتاجه بالبيت
بـيّـن بابتسامة/الله لايحوجه له ان شاء الله/مد لها اكلها/هاك اكيد ميتة جوع
يقين اخذته منه/الله يكثر خيرك يارب
بـيّـن سحبها لحضنه ورجع يده ورا رقبتها يمشي معها بابتسامة/ماعليك كل شي بحقه
يقين عقدت حواجبها رفعت راسها تناظره/وش تبي بعد
بـيّـن جلس على اقرب كراسي لهم/كل شي بوقته وقتها ان شاء الله بوقته
يقين الواقفة قباله ماجلست شهقت وعينها عليه
بـيّـن وقف يناظرها بفزع/علامك
يقين تناظره وسط شلال انهمر/وين الشيب؟
بـيّـن عقد حواجبه باستغراب
يقين نزلت اكلها عالكرسي اعتدلت بوقفتها تناظره بدموعها وسط شهقاتها/وينه وين وراح وين
بـيّـن تلفت حوله وانحرج من نظرات الناس/استهدي بالله حصل خير بيرجع والله يرجع لاتخافين محد يعرفه كثري ملازمني من عشر سنين لاتخافين
يقين بانهيار/كيف سويتها كيف قدرت وسويت كذا فيني كيف
بـيّـن/يابنت بغيت اتزين لاعادت من زينة دام ذا تاليها لاعادت
يقين بشهقات/انا شكيت لك وقلت مااعجبني؟
بـيّـن يهز راسه بلا
يقين/ولا قلت يوم انك شايب؟طيب والله حتى تلميح مالمحت ليه سويت كذا علمني ليه
بـيّـن سحبها لحضنه يهديها كاتم ضحكته من انهيارها بسبب شيبه/بكرة تصحصحين وتندمين على ذا الصياح
يقين انفجرت تبكي موقنة بصحة كلامه/بـيّـن
بـيّـن انفجر يضحك/ياعيونه نعم
.
.......................................
      الـلـيـل
.......................................
<<بيت عساف>>
عساف يسمع بهدوء
محمد/الليلة اخر ليلة اقدر امركم بها بهالطريقة
بـيّـن/مبروكة تظن اني انا الموزع حق سهم وابو مظفر يدري ان شاهر موزع لسهم ويبي الموزع الرئيسي اللي كلهم الاثنين يبونه 
عساف اطلق تنهيدة وهو يدخل يده بجيبه وخرج ورقة مالية
محمد ابتسم/وصلت
بـيّـن ناظرهم باستغراب
عساف/كنت اظن مربط الفرس شاهر وننهي العملية بكرة
بـيّـن تكتف/وهو صدق مربط الفرس
عساف ناظره عاقد حواجبه
بـيّـن/مو بلازم نمسك ابو مظفر ولا مبروكة بروسهم
عساف/يعني
بـيّـن ابتسم/دام العلاقة بينهم مهتزة الوقوع من اسهل مايكون
عسّاف/قل وش وراك يابـيّـن اخلص
بـيّـن/بشرط
عساف دخل الورقة بجيبه/فيها شروط اجل هونت
بـيّـن بعدم اهتمام لكلامه/اللي كان رازي بيسويه انا اسويه مكانه انا اللي استلم بداله
.
............................................................
        يوم جديد
............................................................
<<المستشفى>>
رازي دخل للغرفة يناظرها
ولاء جالسة عالكرسي الملاصق لسرير محارب منحنية بجسمها عالسرير وكفها بكفه ونايمة
محارب النايم على سريره بيده المغذي ودعامة تلف رقبته بغرزتين اسفل عينه غطاه الضماد الصغير ورجله اليسرى الملتفة بجبيرة
رازي وقف عندها وانحنى يهمس لها/ولاء
ولاء فزت من نومتها/اش فيه
رازي/بسم الله عليك بسم الله
ولاء اعتدلت ومددت رقبتها
رازي/روحي نامي بانتظار النساء اذا صحى ناديتك
ولاء تجاوزت كلامه/وش سويت
رازي/سلمت الداش كام وخلاص انرفع البلاغ بالسيارة وبيجيبونه ان شاء الله وبعدها يصير خير ان شاء الله
ولاء ناظرت محارب وشدت على يده/كان يبي دمارنا يارازي ماهو بواحد زعول نفس علينا ومشى
رازي تنهد/الحمدلله على سلامتكم طلعتوا من الشر وانا اخوك
ولاء ناظرت محارب بطيف دموعها/لذالحين ماصحى يارازي
رازي/ماعليه الحمدلله طيب زين جت على ارتجاج بسيط وكسر برجله هين كم شهر وتجبر ماعليه احمدي الله مابه نزيف وذا المصايب الحمدلله
ولاء/الحمدلله على كل حال/احتدت نظرتها/هم بس يلقونه هين والله لاخليها محاولة قتل ووربي ان مايطلع منها والله مايطلع
.
............................................................
<<عند يـقـيـن>>
يقين منحنية شبه جالسة عالارض ساندة راسها على طرف السرير جنبها بملامح مذهولة وهي تستوعب بكاها المستمر على أتفه الاسباب اليوم وقدام كل احد عبست بوجهها من كثر الاحراج من ذكرت بكاها على صبغة بـيّـن
وغطت وجهها بيديها وبنفسها/وخيبة يايقين وخيبة وش اللي سويتيه وش والله ان يمسكها عليك طول عمرك ذالحين والله/وقفت متجاهلة هالشعور وابتسمت من ناظرت ابوها الصاحي انحنت مقبلة جبينه وناظرته بابتسامة/ياصباح الدنيا ياكل دنياي
منصور اشر لها بعيونه
يقين عقدت حواجبها باستغراب وانحنت/سم يبه
منصور همس باذنها
يقين شحب وجهها بذهول واجتاحتها قشعريرة سرت بجسمها من اللي سمعته
............................................................
.
بـيّـن بثوبه الكحلي ثاني اطرافه ورابطه حول وسطه بغترته البيضا المعصوبة حول راسه واقف وسط زريبة الغنم يحط لها الشعير بابتسامة حماس تعتلي وجهه كل ماذكر وش بيصير اليوم  فتح الشبك للغنم حتى تاكل علفها خرج من الزريبة واتجه للسيارة ركب وشغلها حتى يتجه للزريبة الثانية سحب جواله من عالطبلون عاقد حواجبه من وصلت رسالة  ابتسم من قرا اسمها وفتح الرسالة بابتسامة اختفت ابتسامته وتضببت رؤيته بعدم تصديق من اللي قرأه سحب علبة الموية ميل نفسه خارج السيارة وهو لازال جالس داخلها غسل وجهه بالموية وفرك عيونه زين مسح وجهه وقرأ رسالتها(لخاطر الايام الحلوة بيننا طـلـقـني)
.
#شقّ_الغَمام