شـقّ الـغَـمـام

..(٦)..

..(٦)..
اللهم صل وسلم على نبينا محمد عدد ماذكره الذاكرون وعدد ماغفل عن ذكره الذاكرون
........................................
_
<<مجلس القرية>>
ديوان يناظر الشنطة المتوسطة حضن بارود تنهد ميل نفسه متراجع بظهره للجدار وراه وبنفس الوقت رفع يمينه يسحب طرف شماغه نزله على وجهه بملل تكتف وغمض عيونه
سهم ميل نفسه وهمس/اعتدل
ديوان بصوت كله نوم/مانمت زين البارح
سهم من بين اسنانه/اقولك اعتدل واستح!!
ديوان زفر واعتدل بجلسته وفتح شماغه يضبطه بملامح واضح عليها الغيظ
سهم التفت من سمع اسمه
عزيز/سهم
سهم ناظره بابتسامة/سم ياشيخ
عزيز بيده اوراق رافعها/ابو عايد يقول سلمها لسحاب
ابو عايد ناظر سهم بابتسامة/حنا خطبنا له واهل البنت وافقوا تكفى ياسهم توسط لنا خل عايد يكمل دراسته تخبر عايد شاطر
بارود/ياعم تخبر سحاب ماتطلع الشباب الا وهم متأهلين
ابو عايد/داري داري الله يجزاها خير خيرها مغطينا كل ابونا من هالخسيس اللي يجحده!!مير انه تخبرون عايد وطيشه اخاف يسوي شي وودي تعذرونه توه صغير ماعرف الدنيا
سهم مد يده متجاوز بارود المتوسط بينه وبين عزيز واخذ الاوراق/ابشر ابشر ياعم مايصير خاطرك الا طيب
عزيز مد ظرف لابو عايد/هاه ياعم ذا راتب هالشهر وكان عايد تزوج على خير سجّل اسمه عند ديوان حتى نحسبه بالراتب كل شهر
ابو عايد/كثر الله خيركم وجاد عليكم
ديوان وقف
سهم ناظره بحدة
ديوان/انا عندي شغل سلام/مشى/
سهم زفر بطفش من عناده
بارود ناظر المتواجدين همس/على ذا ماحنا مخلصين الا على العصر
عزيز عدل جلسته بتعب من جرحه/اعجل خلنا نخلص بس
........................
<<بـيـت الـشـيـخ>>
,,غرفة يـقـيـن,,
يقين جالسة على سريرها تناظرها بحدة
مبروكة واقفة قبالها مستندة على عكازها وبحدة/اسمعي يابنت
يقين ارتفعت حواجبها من تغير الاسلوب كليا بعد ماكانت المحبوبة ماينرفع صوت عليها اصبحت اليوم غير مهمة تماما
مبروكة/لولا خاطره وحلفه ماسوي لك شي كان انتي الحين بالشرطة وتعرفين تهمتك يابنت منصور
يـقـيـن زفرت بضحكة خفيفة وسط صمتها المجبرة عليه ماكان اختيار ابد
مبروكة/تضحكين!!انتي بعد اللي صار مع هالراعي انهبلتي
يـقـيـن احتدت نظرتها
مبروكة/عاد اسمعي العلم كل ماسمعتيه داريتن به
يـقـيـن شحب وجهها
مبروكة/سالفة نور وسالفة ابوك كلها كل شي بهالديرة ادري به مايمر عن عيني شي يايقين
يـقـيـن تناظرها بصدمتها
مبروكة/سالفة نور الشيطان شاطر وتاب
يقين احتدت نظرته وعضت شفتها
مبروكة/وسالفة ابوك ماله ذنب كل شي صار بدون قصد
يـقـيـن شدت على يديها بقهر
مبروكة/مامضى تبنا عنه وان شاء الله تاب الله علينا وانتي توبي واطردي الشر من راسك
يقين شدت على قبضتها الراجفة من كثر القهر
مبروكة لفت للباب بتخرج/كان ماطردتيه والله ان تشوفين سحاب هالقرية تخيّم فوقك يايقين
...............................
<<بيت الشعر>>
محارب متمدد وعينه على جواله
نواف ارتمى عن يمينه بابتسامة/محبحب بالله قلي وش تحس
محارب بدون لايناظره/ماطفشت من كثر ماتسألني هالسؤال
سلمان معطيهم قفاه يرتب مفارشهم بزواية البيت/اكيد متوتر اكيد
مُحارب قفل جواله وجلس يناظره/ماشاء الله وشلون عرفت
نواف اتسعت عيونه وبحماس/صدق صدق مُحارب
سلمان وقف ترتيب والتفت لهم وبتفكير/لا مااتوقع متوتر بالعكس احسك هالمرة مرتاح يمكن عشانك انطردت خمس مرات
محارب امتلى وجهه غيظ
سلمان/احسك خلاص تعودت الطردة ماعادها تفرق معك
مُحارب وقف/بالله!!ماشاء الله ذا احساسي بالضبط صدقت ماكذبت بكلمة
سلمان بلع ريقه/تعوذ من ابليس محارب
محارب وقف قباله/ذالحين علمني وش احس به ياملك التوقعات والاحاسيس
سلمان بابتسامة/ترحم ولد عمك الضعيف اليتيم
مُحارب ناظر للحظة ولف عنه تاركه
نواف بتفكير/الصدق انه عنده وجهة نظر زينة
مُحارب ناظر نواف
نواف ابتسم/مير هالمرة غير قلبي يقول كل شي بهالمرة غير صح
مُحارب مد يده ومسكه من اذنه
نواف وقف/اه اه اه
محارب/انقلع ذاكر ترا بـيّـن متحلف فيك لو تنزل درجاتك
سلمان/لاتجيني انا متورط بعمري
بـيّـن وقف عندهم/متورطين ولا لا بتتورطون معي بالاخير علمتكم
نواف بتكشيرة/كل شوي تهدد
بـيّـن/ماأهدد الا على مصلحتكم يالله رح على كتابك/ناظر مُحارب بابتسامة/هاه كيف الامور ياعريس
محارب تنهد/نقول يالله تمم على خير
بـيّـن/بيتم ان شاء الله بيتم بس علمني وش ناقصك
محارب/ابد سلامتك
بـيّـن ناظر سلمان ونواف/خلوكم رجال علمناكم العلم لايطلع ابد
سلمان/افا ذا الهقوة يابـيّـن!!
نواف/اي والله افا
بـيّـن/رح رح انت وياه وذاكروا روحوا بس
...............................
<<بيت الجد طاهر >>
غصنة واقفة وبين يديها فستان باللون الازرق الفاتح ملامسته على جسمه من فوق ملابسها/هاه كيف
منيرة بابتسامة/كل شي عليك يازينه
غصنة/يمه البسي فستانك الاخضر ذاك وجدة البسي الاحمر/غمزت/اللي يبرق من ثلاث كثر هذاك الاحمر الحلو
سلام/صح جدة البسيه حلو مرة
حمدة رغم فرحتها الا انها تخفيها/وليش نلبس وحنا بوجيه بعضنا كل يوم/ناظرت غصنة/شافوك بقميصك والكشة طايرة وشو له تلبسين
غصنة/جدة ذي المرة غير ذي المرة
//منيرة وحمدة سكتوها بنفس الوقت//
حمدة همست/انا قايلته وجه فضايح اوص اسكتي
غصنة زمت شفايفها
منيرة/محد بيفضحنا غيرك
سلام ناظرت منيرة/ماقالت شي وحريصة كثير ياعمة
منيرة تنهدت/هالمرة محارب موصي
غيمة دخلت للبيت بدون ترفع الطرحة عن وجهها بخطوات سريعة تكبح فيها انهيارها بوسط حوش البيت مرت من عندهم بدون اي كلمة
حمدة/عوذا حتى الجن يسلمون
غصنة كشرت بوجهها وقفت ومشت وراها
منيرة/غصنة تعالي
حمدة/خليهم خوات ويتصافون خليهم
غيمة دخلت لبيتهم واتجهت للغرفة
غصنة دخلت وراها
غيمة نزلت طرحتها ورجعت الباب وراها بكل قوتها
غصنة مسكت الباب ودخلت تكتفت تناظر قفاها/يعني حتى اليوم لازم تفصلين علينا ياغيمة حسي شوي!!
غيمة طاحت عالارض من ثقل رجولها ماعاد تشيلها رفعت يديها الراجفة ولامست صدرها بوجع
غصنة اتسعت عيونها بصدمة وتحركت لعندها وانحنت قبالها شبه جالسة وانصدمت اكثر من شافت ملامح وجهها
غيمة بأنفاسها الثقيلة على قلبها همست/غصنة
غصنة بفزع/وش فيك وش صاير
غيمة هلت دموعها/قلبي يوجعني ياغصنة احسه تفتت ياغصنة تفتت والله
غصنة بفجعتها مدت يديها تمسح دموعها/بسم الله عليك وعلى قلبك وش فيك
غيمة/عنده بنت عنده بنت ياغصنة عنده بنت
غصنة ضمتها من فهمت اصل الموضوع
غيمة انهارت بحضنها بصوت/قلبي احسه بيطلع ياغصنة ااه
غصنة ضمتها بكل مافيها ودها تدخلها داخل اضلاعها بلعت ريقها تصد عبرتها كيف تجادلها بهالوضع كيف تصارحها(بأنه مابني على باطل فهو باطل)كيف تصارحها بأنها عارفة الموضوع من كم سنة وساكتة كيف تصارحها بأنها تلومها بكل مرة تشوف نعناعها اللي تحبه كيف صارت تكرهه مثلها من كرهها له لكن زرعته حتى تزرع بقلبها شوية أمل يرجّع لهم غيمة اللي مثل اسمها غيمة تمر عليهم بخفة تريحهم وتداري خواطرهم ونجمعهم كلهم وتروح بخفة مثل ماحلّت تاركة وراها الكل ملتم على بعض ومبسوط
غيمة شدت على حضن غيمة بدموعها
غصنة مسحت على راسها وبصوت يرجف/بسم الله عليك بسم الله اذكري الله قولي لاإله إلا الله
غيمة بشهقاتها/يارب انزعه من قلبي مثل مانزعني يااارب
،،بالحوش،،
بـيّـن دق الباب/ياولد
سلام فزت وبيدها فنجالها ودخلت بيت جدها الاقرب لها كالعادة
حمدة فزت واقفة واسرعت بخطواتها للمطبخ
منيرة/حياك حياك مابه احد
بـيّـن دخل بابتسامته/السلام عليكم
منيرة/ياهلا وعليكم السلام والرحمة
بـيّـن جرى/والله ماتقومين والله
منيرة رفعت نفسها شوي عن الارض بتوقف/استغفر الله ياكثر حلوفك استغفر بس
بـيّـن مسكها وجلسها وقبّل راسها
منيرة/كيف حالك اليوم يمه
بـيّـن/بخير من الله اللهم لك الحمد/التفت/وينها جدتي/
منيرة سكتت
بـيّـن ابتسم ورجع بخطواته لورا قريب من المطبخ
حمدة خرجت من المطبخ وبيدها الطشت وكبته
بـيّـن تراجع بخطواته مبتعد عنها
حمدة اتسعت عيونها/اعقب ياليهودي!!
بـيّـن/اليهودي وراه عرس الليلة ياجدة
حمدة/تعقب تحضره!!
بـيّـن/مير اني من اهل العروس ياجدة
حمدة/مالت عليك وعلى خويك اعقب من خوي كانه فزع فيك بكرة تعمل به مثل ماعملت بأهلك
بـيّـن/ابد ماعملت الا كل خير
حمدة بغبنة/تعقب وتخسى ياكبر سواتك ويامااشينها
بـيّـن زفر بصمت دون يجادلها وهالشي بعينه من حقها وحتى لو تمادت مايلومها ابد
منيرة وقفت وبحدة/عمة تحسبينه على شي صار وقضى من سنين
حمدة بحدة/انتي اخر وحدة تنطقين حرف
طاهر/هي اول وحدة يحق لها تتكلم ياحمدة
حمدة ناظرته بغيظ
طاهر/من جهة ولدها ومن جهة زوجها بين نارين واهونهم يحرقها
حمدة بغبنة/وتظلي ساكتة!!سكوتها زاد
طاهر قاطعها/خلاص ياحمدة
حمدة/انت حيلتك مغير علي
طاهر بحدة/حمدة
حمدة/بس تسكتني ولا سمعت لك صوت طول هالسنين ابد
طاهر/مابعد هالسنين الا الفرج ياحمدة مير مابك صبر من اول وتالي
حمدة/من حر مابي وتلومني بعد!!
طاهر التفت/ولد يابـيّـن/سكت والتفت حوله/
منيرة تنهدت/مشى
حمدة قاطعتها/حقه يمشي له وجه يقعد هاليهودي وهي شبت بيننا بسبته
طاهر/حمـ
حمدة قاطعته/وانا بعد ماشية تريح لاتتعب/مشت لبيتها/
طاهر هز راسه بيأس منها
.........................................
<<بيت مضاوي>>
،،غرفة ولاء،،
ولاء تناظره بحدة
رازي متربع عالارض وغيمة بحضنه يلعب معها وبدون لايناظرها/تراك احرقتيني بعيونك
ولاء بزعل/الحمدلله عالاقل تحس
رازي/وش تبيني اسوي يعني
ولاء بوسع عيونها/نعم!!
رازي بضيق اعتلى ملامح وجهه/تزوجت والله يستر عليها
ولاء باستغراب/كيف!!لحظة لحظة لحظة مين اللي تزوج!!
رازي ناظرها بشك شد على يد غيمة
غيمة المشغولة بألعابها رفعت نظرها له تناظره
رازي وسط تسارع نبضات قلبه وبرجفة يحسها تسوي بعظامه/غيمة تزوجت انتي قايلته/وبنفسه/وهي بعد
ولاء ناظرته بصمت للحظات كانت على رازي اصعب لحظات تمر بحياته
رازي بتوتره ارتفع صوته/ولاء تكلمي
ولاء تنهدت/رازي صدك هالسنين تظن غيمة تزوجت
رازي شد على قبضته بتوتر بلع ريقه برعب من فداحة موقفه كان اللي يفكر فيه هو اللي صار يتمنى هالمرة تخيب ظنونه يتمنى رازي الفطين يخيب ولايصيبها ابد لا من قريب ولا من بعيد
ولاء/رازي غيمة ماتزوجت ابد
رازي ارتخى جسمه وارتسمت الخيبة على ملامحه وبوسط افكاره المشتتة للحظة بلعثمة/بس انتي قلـ
ولاء قاطعته بتوقع لمقصده من ذيك الليلة اللي انقلب بعدها حال الاثنين بوضوح/تقصد ذيك الليلة
،
،
~~قبل ٤ سنوات~~
ولاء(١٨سنة)واقفة قبالها متكتفة بملامح كلها غيظ طرحتها على اكتافها بخصلات شعرها المفتوح بعضها والملفوف بعضها
غيمة(٢٠سنة)قرصت خدودها/ياروحي الزعلان
ولاء دفت يدها عنها/انتي مستوعبة كمية القلق اللي مسببه لي رد
غيمة غطت فم ولاء بيديها وسط اتساع عيونها وبهمس/تكفين ولاء تكفين
ولاء دفت يدين غيمة عنها وهمست لها/ردي عليه وفكيني /اشرت على نفسها/شوفي كيف مطلعني مو واضح لك معاناتي يعني
غيمة بزعل/خليه يعرف كيف يزعلني مرة ثانية
ولاء ميلت فمها  بعدم رضا
غيمة/خلاص روحي البيت وكملي شعرك روحي
ولاء تنهدت وهي تعرف وش ينتظرها من ازعاج
منيرة وقفت تناظرها/ولاء عسى ماخلاف
ولاء ابتسمت/الا والله ياخالة
غيمة شدت على يدها/ولاء حبيبتي يالله روحي
ولاء سحبت يدها
غيمة/خلاص روحي قولي لها بأكلمها هناك روحي
ولاء/أكيد
غيمة/اكيد والله والله
ولاء ناظرت منيرة/خالة بس صديقتي متصلة علي اتاكد من شغلة وتعرفين غيمة مامعها جوال
غيمة دفتها لبرا بضحكة/الله ييسر امورك الله يسرها/مسكت يد امها/يمه تعالي اضبطك بذاك المكياج كل حريم الديرة بيسألنك عنه
منيرة بابتسامة/بقعد بعبايتي تراها ملكة
غيمة بحماس/ايه يمه لو انه عشا عادي كم لنا ماحضرنا مناسبة اخيرا جدتي سمحت/سحبتها/مضبطتك مضبطتك مافيه لا
ولاء خرجت  متجهة لبيتهم كتمت بداخلها صرخة من حست به يهتز/نعم
رازي بعصبية/وينها ليه ماترد؟
ولاء ابعدت الجوال عن اذنها شوي/لااله الا الله الحين طلعت من عندها بترد عليك
رازي/ان ماردت مسكت الخط وجيتك ياولاء وعلمتك كيف الكذب/قفل بوجهها/
ولاء أسرعت بخطواتها/ياربي هذا وماتزوجها وش بيسوي اذا تزوجها يمه منه
،،بالليل،،
غيمة بفستان بنك ناعم طويل بشعرها المسدول بمكياج ناعم بسيط واسورة ذهبية بيمينها وساعتها الذهبية بيسارها وحلق باللون الذهبي مختفي تحت خصلات شعرها ناظرت نفسها بمراية الدولاب الصغيرة نطت حتى تشوف كشختها زين لكن حجم المراية مايسمح لها مهما حاولت قطبت جبينها من سمعت الاهتزاز اتسعت عيونها راح عن بالها ونسته كليا من حماسها لحضور المناسبة سحبته وتنحنحت بخجل وكأنه يناظرها/نعم
رازي بغبنة/نعم نعم هدا اللي قويتي تقولينه
غيمة ابتسمت من سمعت صوته الغاضب وصلت للي تبيه عذبته بسحبتها عليه هذا درس حتى ماياخذ قرار يخصهم لحاله
رازي بعصبية/كل ذا عشان اخترت منطقة التعيين بدون مااشاورك
غيمة تنهدت/رازي
رازي قاطعها مستمر باندفاعه/ويعني اذا اخترتها انا اللي بأشتغل وانحرف مو بأنتي
غيمة عضت شفتها تكبح عصبيتها
رازي/كل اللي عليك تجلسين بالبيت وانا اللي اشتغل وشو له ذا الزعل كله هاه وشو له تدرين عاد مو بلازم رايك ولايهمني واعلى مابراسك سويه
غيمة بقهر منه/لو سمحت لاتتصل فيني مرة ثانية الليلة ليلتي وأبي أعيشها بدون ماضي/قفلت بوجهه ثم قفلت جوالها/الحين تتأدب زين/أخذت عبايتها وطرحتها بيدها واسرعت بخطواتها/يمه انتظروني لاتمشون
رازي وقف بصدمة ماقدر يستوعب كلامها حس الدنيا هدت حوله للحظة اخذ نفس يحاول يجمع افكاره/ليلتها كيف يعني ليلتها/رفع جواله بيدينه الراجفة وبضياع غاب عن عينه اسم ولاء انحنى شبه جلس وقرب الجوال من عيونه واتصل على ولاء بعد ضياع يقارب لدقيقة وبالنسبة له مرّ دهر بهالدقيقة
ولاء وسط ازعاج حولها من اصوات اطفال وزغاريط وحريم يغنون وصوت السماعة اللي واصلهم رغم بعدها عنه رفعت صوتها وهي مغطية اذنها اليسار بيدها يتهيأ لها بيفرق معها بوضوح صوته رفعت صوتها اول مافتحت الخط/نعم
رازي برجفة صوته/وينك ياولاء
ولاء/بالملكة
رازي اختنق بعبرته/ومتى الزواج
ولاء قطبت جبينها باستغراب/اكيد مثل دايم بعد اسبوع
رازي فتح ازارير ثوبه واكتسى وجهه السواد/انتي عندها؟
ولاء ناظرت غيمة اللي تضحك جنبها/ايه جنبي
رازي/قولي لها الله يستر عليك ويوفقك ويبحيك
ولاء ناظرت غيمة باستغراب/هاه
غيمة قربت منها بوناستها/وش فيك
ولاء/رازي يقول الله يستر عليك ويوفقك ويبحيك
غيمة اختفت كل سعادتها وسحب وجهها سحب الجوال من يد ولاء/رازي
رازي قفل الجوال مشى بخطوات يجرها ضايع بوسط صدمته وخيبته وأوجاع قلبه ثلاث سنين حب مابين نظرات رسايل ورقية ونهايتها بصوت يصبر قلبه ليوم اللقى اللي ينتظرونه الاثنين وبنوا عليه كثير أحلام كل ذا تبدد بلحظة وببساطة ياخذها غيره بدون اي مقاومة هو بعيد وبعيد بالحيل حتى لو ركب سيارته الحين وحرك يوصل بعد ماتنسوا ويروا الضيوف بيوصل ويقعد بخيبته وقهره يناظر مكان فرح غيره اللي المفروض يكون مكانه  لف الحارة اللي هو ساكن فيها ثلاث مرات ماقدر يوصل بيته من ضياعه بمشاعره وقف عند الفلة اللي اقرب للقصر من كونها فلة دقق النظر/اااه بيت عم حسن/جلس من حس بدوخة داهمته رفع راسه ناظر السما الممتلية غيوم غرقت عيونه دموع ولامس بكفه صدره زفر بوجع/ليه طيب ليه الحين كيف انساك وانتي قبالي كل يوم،ليه ياغيمة أرخصتيني ليه/غطى وجهه وانهار لاول مرة بحياته بعد وفاة ابوه/
،
،
ولاء/يعني حكمت مباشرة بدون ماتسمع رغم محاولاتي معك قطعتني مرة وحدة مهما حاولت معك افتح الموضوع تعاقبني بالقطيعة شهور ماتترك لي مجال ابدا حتى الواتس مبلكني فيه حتى ماتقرأ وش ارسلك صح
رازي يناظرها بصدمته
ولاء/وحتى يوم اقولك تراك غلطان تسفهني ولاتكلف نفسك تسأل وأحطها بذمتي ان كان ماحاولت غيمة توصل لك كثير واكيد انت تصد بكل مرة بقناعتك انك كالمعتاد مدرك الوضع كله!!
رازي مرت بباله منظرها قبال بنته رجفتها انفاسها المتسارعة من مرت من جنبه وتجاهله المقصود لها اتسعت عيونه ورجف قلبه من استرجع الوجع اللي عاشه هي تعيشه مرتين مرة يوم صدها والحين بشوفتها لبنته نزل بنته بسرعة وجرى
ولاء جرت وراه ومسكته من يده/رازي
رازي برجفة يده الواضحة/اتركيني لازم افهمها لازم
ولاء/مجنون والله ان يذبحونك اخوانها ويذبحونها معك
رازي دف يدها وجرى خارج
........................
<<بيت الشيخ>>
نور واقفة بتردد قبال غرفة أمها بتردد اخذت نفس رفعت يدها بتدق الباب
ريوف وقفت جنبها وفتحت الباب/ماما
ام سطام جالسة على سريرها تقلب بالاوراق الرسمية قبالها/هلا يمه
ريوف جلست عندها
نور واقفة عالباب/يمه
ام سطام احتدت نظرتها/لاتدخلين
نور بمكانها/يمه سطام من امس مااكل شي حتى دوا السكر مااخذه
ام سطام/روحي لجدتك انا مالي بينهم كلمة
نور/يمه جيتك عشان تكلمين جدتي سطام يروح فيها يمه فوت دواه مرتين
ام سطام/اللي يناطح الكبار يتحمل مايجيه
نور/يمه
ام سطام/ووجع انقلعي عن وجهي ماني بفاضية لكم
نور/ويقين طيب
ام سطام/يـقـيـن مافيها الا العافية
نور/الى متى بتقفلون الباب عليها الى متى
ام سطام/مالك شغل انشغلي بنفسك الله يشغلك عني
نور اسرعت بخطواتها متجهة لغرفة جدتها وقفت من سمعتها
مبروكة/ايه بعد يومين بنفس المكان ونفس الاغراض
نور قطبت جبينها/بعد يومين حدادها كل سنة
مبروكة ضحكت بخفة/هالمرة بيخدمونك الشباب..على ماتحب على ماتحب نفس موعدنا ان شاء الله نفسه/قفلت كشرت بوجهها من حست بأحد حولها وبحدة/اطلع ياللي ورا الباب
نور بهدوءها/جدة
مبروكة بحدة/وانتي ماتكبين عوايدك
نور/ليه ياجدة عسى ماشر ذالحين وقفت عند الباب يوم سألني
مبروكة تنحنحت وبتكذيب/ماغاب عن عيني مايغيب عن بصيرتي يانور
نور تنهدت/جدة سطام
مبروكة قاطعتها بحدة/مالك فيه
نور/ياجدة تكفين بس ياخذ دواه لاتصيرين انتي وامي عليه
مبروكة ناظرتها بحدة/انا ماني على احد من احفادي يانور
نور ناظرتها بعيون تنطق باللي بخاطرها
مبروكة/مير حتى تتريحين من اصبحنا ماهو بهالغرفة هالهيس سواها وهج وانا ناويتن اطلعه مير الحصني حصني هج سويد الوجه
نور ناظرتها بتكذيب ماتحركت
مبروكة تنهدت/يشهد الله ماكذبت بكلمة يابنت زينة
نور صدقتها بعد شاهدها/ويقين طيب
مبروكة بحدة/عاد الى هنا وحدك امشي عني يانور امشي
............................
رازي يدور حول البيت بقلة حيلة بينجن من كثر تفكيره فيها وشلون يبرر لها وش بيقول ووش بيخلي سوء فهم بينهم معقولة بتصدقه وبتصدق هالسبب السخيف اللي انهى حبهم بدون اي وجه حق وشلون يوصلها وشلون يشرح لها وهالسور البسيط اللي يقدر ينطق بلحظة مثل الجبل قدامه وهم مايحلّون لبعض رمش من تذكر رقمها اللي مستمر يدفع فاتورته للحين وهالعادة اصبحت جزء لايتجزأ منه رغم انفصالهم لدرجة نسى هالفعل واسبابه خرج جواله وضغط الارقام رقم رقم رغم انه مسحه من جواله بلحظة زعله وانفصاله عنها الا انه مامحاه من عقله والاهم قلبه حظ الجوال على اذنه وسط رجفة احتوت جسمه غمض عيونه بأمل فتح عيونه وسط اتساع ابتسامته وزاد الامل من سمعه يرن/ردي الله يخليك تكفين ردي يارب عساه ترد يارب ارد بس هالمرة يارب ترد/ارتسمت الخيبة على وجهه من انقفل بوجهه الخط كرر اتصاله واستقبله الرفض من جديد جر خطواته راجع للبيت بخيبة وبنفسه/اتركها ترتاح اليوم وبكرة اشرح لها يارازي يكفيها صدمات/وقف من ناظره يمشي قدامه بنفس اتجاهه/خير وش موديك لبيتنا
بـيّـن وقف والتفت وراه/ليه وادي ابوك
رازي ابتسم مجبر ونزل راسه
بـيّـن/وثم من متى بيتك خبري طردتك صاحبته
رازي وقف قباله/جاي تتشمت
بـيّـن بابتسامة/استغفر الله يكفيني شماتتي بنفسي
رازي/وش جايبك
بـيّـن/قايلة انا مابك كرم الله يعز اهلك عنك لو هي مضاوي قلطتني على ذاك الصحن اللي يفتح النفس
رازي/امش تعال معي انا خايف اني محروم من الغدا الصدق
بـيّـن ضحك/عاد والله اني امزح انا جاي لك
رازي باهتمام/امرني
بـيّـن دقق النظر بوجهه اكثر/بالاول علامك وجهك مايطمن
رازي ابتسم/مابي شي
بـيّـن رفع نفسه وحرك راسه يتأمله/عسى مضاوي استلمتك بعصاتها
رازي ضحك بخفة/تقوله بس ماتقوى تسويها
بـيّـن/اصدقني بك شي
رازي وش يقول وكيف يقول والاصعب من ذا كله هي من تكون بالنسبة له تنهد بضيق رجع نفس الشعور السيء بالسنين اللي فاتت كان يضحك ويمزح مع بـيّـن ويحس باحساس المذنب بحقه صاحب الوجهين
بـيّـن بقلق/ولد يارازي علامك
رازي/خلها على ربك
بـيّـن/ونعم بالله ونعم بالله مير اني ماني بأي أحد والسلام يارازي ولى؟
رازي ابتسم/الله بأعالي سماه يعلم غلاتك بقلبي انت اخوي اللي ماجابته أمي لكن خلها لوقتها واحسن انا بنفسي وأعلمك
بـيّـن تنهد/زين زين يالله فمان الله اجل/مشى/
رازي/على وين!!وش اللي انت جاي عشانه بالاول
بـيّـن وقف والتفت له/على بيتي وجاي عشان اقولك الليلة عشا سلامة عزيز
رازي/وحنا عندنا عشانا ماحنا بفاضين لهم
بـيّـن/وش عندك العصر
رازي/ولا شي
بـيّـن ناظره بصمت للحظات
رازي يناظره بصمت وتفكير عميق
بـيّـن/موعدنا الليلة فمان الله/مشى/
رازي/فمان الكريم/كمل طريقه لبيتهم/
.......................
،،الـعـصـر،،
......................
<<بيت الشيخ>>
ام سطام تبخر البيت
ريوف تطقطق بجوالها بالصالة
ام سطام ناظرتها/قومي خلصي امورك مو تضغطين عمرك شوي وتزعلين تراهم شوي وجايين
ريوف بنرفزة/ياربي متى يفهمون هالناس انها عزيمة عشا عشا يجون من العصر ليش اوف صدق بدو
مبروكة بحدة/انطمي لااسمع لك نفس ياقليلة الادب لاصار بيتك ذاك الوقت تحكمي به مثل ماتبين
نور وقفت عندهم بكامل اناقتها فستان باللون الاول وايت وشعرها المرفوع كعكعة بمكياج ناعم وعلى اكتافها شالها المميز باللون الاسود ونهايته جنيهات الفضة مغطي ظهرها بين يديها صينية الفناجيل نزلته بوسط الصالة وقفت قبال امها ومدت يدها/هاتي عنك يمه وانتي ارتاحي
مبروكة/سبحان من خلق وفرق
ريوف شكرا بوجهها ووقفت/ايه والله سبحانه مير انه مكتوب عالخدم يظلون خدم/اسرعت بخطواتها متجهة لغرفتها/
نور تغير وجهها للحظة ومااهتمت ومشت تبخر البيت
ام سطام بعصبية/بنت
مبروكة/اسكتي ماتهاوشينها وانتي اللي كبرتي راسها على اختها كلهن بنات بطن وحدة مير انتي فرقتيهم عن بعضهن بفعولك
ام سطام بعصبيتها/يمه
مبروكة/وش اللي ازعلك خدم!!مير انتي تعاملين الخدامات اللي يجون احسن من بنتك ذالحين تزعلين يوم قالتها بملي فمها!!/لفت عنها ومشت/عجيب امرك يازينة عجيب
........................
<<بيت منيرة>>
غصنة منحني تناظرها تتطمن هي تتنفس او لا
غيمة نايمة تحت بطانيتها اللي منتصفه جسمها
غصنة تنهدت براحة من حست بها تتنفس وسحبت البطانية وغطتها زين خرجت من الغرفة بهدوء
نواف/ثوبي ليه محد كواه للحين
غصنة بهمس/اوووش!!بكويه لك انطم انت
نواف/ليه وش فيه
غصنة/غيمة تعبانة شوي
نواف اتسعت عيونه/الليلة
غصنة/ليه هو التعب يعرف وقت!!
نواف مد لها ثوبه/اجل سمي وضبطيه زين سمعتي/خرج/
غصنة سحبته منه بقوة/طيب طيب/خرجت برا بيتهم وناظرتهم جالسين يتقهوون/مين يبي يكوي شي يالله جيبوه مرة وحدة
حمدة بوسع عيونها/غصنة تكوي وش صاير بالدنيا
غصنة/جدة جيبي ثوبك اكويه تراها مرة بالتاريخ ماتكرر
حمدة/لا بالله ماابي اخاف تعدمينه
نواف اتسعت عيونه ورجع لها سحب ثوبه منها/خلاص لاتكوين لي مشكورة
غصنة سحبته بقوة/والله محد يكويه غيري حسب بس حتى فستاني بأكويه
نواف ماسك ثوبه/غصنة ثوبي
غصنة سحبته/ازهلها وانا اختك
نواف تركه بتردد
غصنة مشت/تلبس من فساتيني لو انحرق/جرت/
نواف جرى وراها بصراخ/غصنةةةة
غصنة/امزح امزح
...........................................
،،بنهاية القرية فيه حوش خاص لذبايح القرية من عنده مناسبة يحطها بهالحوش وبرا الحوش لوازم الطبخ كافة،،
يتلفت حوله بحذر متلثم وشنطته السودا على ظهره منفوخة وقف عند السور ورفع ثوبه ونط على السور وجلس فوقه حتى ينزل داخله واتسعت عيونه بصدمة وهو يناظر الملثم قباله
الملثم قباله بظهره شنطته مفتوحة وواضح فرّغ اللي بداخلها ومتجه لخارج السور رمش بصدمته وهو يناظره
الملثم الاول رمش من عرفه سحب شنطته وفرغ الاعشاب اللي بداخلها تحته داخل السور ونط عالارض من وصلهم الصوت
الملثم الثاني نط معه
الملثم الاول يجري ناظره/الله لايوفقك وش جايبك
الملثم الثاني يجري معه/انت وش جايبك
الملثم الاول وقف/رازي طسّ منا وانا منا والوعد بيتي
رازي/لايمسكونك بـيّـن
بـيّـن رفع ثوبه وبابتسامة حماس/خاف على روحك انا سبوق من يومي/جرى/
رازي ذكر الفرق بينهم بالجري وجرى عكس اتجاهه/الله لايربحك يابـيّـن
..........................................
<<بيت الشيخ>>
مبروكة واقفة قبال عزيز بابتسامة تبخره
عزيز بكامل كشخته ماسك يدها يوجهها حتى ماتحرق شماغه وثوبه
مبروكة بابتسامة/عساني ابخرك عريس وانا جدتك قل آمين
عزيز بابتسامة/امين امين ياجدة واشوف الفرحة بعيونك
بارود دق الباب وسط لهاثه/عزيز
مبروكة بحدة/ياعلّك ماتربح شيخ شيخ
بارود قشعر جسمه من سمع صوتها
مبروكة/اعرف ذا الحس عساك ماتلفي علي يابارود من تالي ماتلفي الا بشين يامال الشينة اللي تفكني منك
عزيز شد على يدها/جدة بارود خويي ماارضاها عليه
مبروكة/استغفر الله استغفر الله
بارود بتوتر/سحاب
مبروكة مقاطعه/هاه دامه قال سحاب والله ان وراه بلا اعجل انطق لاتذبحني بمكاني
بارود/الغنم بعضها مسهل(إسهال تكرمون)
مبروكة اتسعت عيونها بفجعة من مصيبتها/اعزلها عن بعضها
بارود/ماندري وش اللي صابها وهو صابها كلها ولى لا شفنا اثنين هاجين من السور ماندري وش سووا بها وعجزنا نلحقهم
مبروكة بغبنة/وتعلمني مامسكتوهم يامال الذهاب يابارود يامال الذهاب
بارود سكت بقلة حيلة
مبروكة شدت على يدها بكره للي بتقوله لكن ظرف هالليلة ووقتها الضيق اجبرها/رح يم طاهر اكيد حلاله محد شراه من مبطي
بارود بصدمة/طاهر ماغيره
مبروكة بصراخ وقهر/سمعت اللي قلته طسّ عن وجهي يابارود طس
...........................................
<<غرفة يـقـيـن>>
يقين بفستانها الكحلي بأكمامه الطويلة ماسك على جسمها العلوي ومنسدل من خصرها بوسع رافعة شعرها ذيل حصان وعلى اكتافها شالها الاسود جالسة قبال مراية تسريحتها كاشفة عن جرحها  البارز برقبتها وتقفل مخنق الذهب اللي تتخله فصوص باللون الاحمر حول هالرقبة المجروحة وقفلته سحبت الروج النود المرتمي على تسريحتها وعدلت روجها وقفت ورفعت شالها لفوق راسها ولا عطته كامل مشت ووقفت عند الباب ودقت الباب
ام سطام اللي تمر مابين المطبخ والحوش تامر على الصبابات يضيفون المتواجدين من ضيوفهم قطبت جبينها من سمعت صوت الدق واتجهت له تنهدت من عرفت مصدره وفتحت الباب اللي صار قفله خارجي اتسعت عيونها من شافتها بكامل اناقتها
يـقـيـن تحركت حتى تخرج
ام سطام تنهدت ووقفتها/يقين
يقين ناظرتها
ام سطام/احلفي ماوراك شر
يقين اشرت على فمها بعدم قدرتها عالكلام
ام سطام ابتعدت وتركتها تخرج
يقين خرجت واتجهت لمجلس الحريم اللي تجلس فيه عادةً جدتها وجلست بالمكان المخصص لجدتها بكل عز وشوفة نفس كعادتها وسط همسات و نظرات الكل مابين استغراب لتصرفها الحالي و ماحصل معها قبل كم يوم 
..........................................
عمر واقف قبالهم وبابتسامة احراج/ياعم طاهر حلالك من اطيب الحلال وازينه
بارود واقف وراه وصاد بوجهه بعدم رضا عاللي انطلب منه ينفذه
عمر/تخبر مابه حلال يكفي والسوق بعيد
//مُحارب ونواف وسلمان ورا جدهم بملامح معبرة تماثل ملامح بارود بالمشاعر//
طاهر/افا ياعمر افا ابشر ياولد مابيننا هالعلوم كان مافزعنا لسحاب لمن نفزع
بارود ميل فمه بسخرية
طاهر/وثم والله ماناخذ الريال تراها صدقة من عندي عن سلامة الشيخ عزيز
عمر قبل راسه/الله يكثر خيرك ياعم ماتقصر
بارود بغيظ/صدقتك تصدق بها لحالك هاذي صدقة سحاب عن سلامة الشيخ
عمر دق بارود بكوعه
بارود التفت له باستغراب بشعر جسمه من نظرات اللي ورا طاهر
//محارب يناظره بحدة ونواف وسلمان نفس الشي//
بارود تنحنح/كان ودك بصدقة عن الشيخ عزيز خلها يوم ثاني
طاهر بابتسامة/اللي لي لسحاب حنا تحت شورها هي والشيخ
بارود ميل فمه بعدم اعجاب
طاهر/الا وش صاب الغنم؟
عمر/يقولون صاب بعضها اسهال مايدرون وش البلى وهو صابها كلها او بعضها
مُحارب ابتسم بسخرية
نواف وسلمان كتموا ضحكتهم
طاهر/لاحول ولاقوة الا بالله
بارود مشى/عمر احتريك عند الحوش اعجل علينا
عمر/طيب طيب/دخل لشبك الغنم/
طاهر التفت للعيال وراه ناظر وجيههم ضحك من قلبه/الله يقطع شره
.......................................
<<قبال زريبة بـيّـن>>
بـيّـن مرتمي عالارض بأنفاسه السريعة/نعنبوا حيهم مابغوا يضيعوني
رازي مرتسم جنبه يماثله بسرعة الانفاس ابتسم/هذا وانت السبوق
بـيّـن التفت له/وش وداك هنا ماعندك شغل الليلة
رازي اللي فعلا كان محتاج شي ينفس فيه عن مشاعره وجت له الفرصة على طبق من ذهب عشا عزيز واستغلها وطغت مشاعر الراحة نسبيا بهاللحظة التفت له/وانت وش وداك هنا جهزت امورك الليلة
بـيّـن/انا من شفت وجهك دريت ان بك بلا
رازي/ومن يخاويك وش محصل من وراك غير البلاوي
بـيّـن كشر بوجهه وفز جلس ولف بجسمه يناظره/وش سويت بالحلال؟/اتسعت عيونه ومد يده وشده من ياقته وبعصبية/وش حطيت للحلال علمني
رازي تحرك معه من شدته وجلس دفه عنه وعدل ياقته/حطيت له حمّاض(عشبة)ماهو بذابحه ذا اللي طلعت به منك
بـيّـن تنهد براحة ثم ناظره بشك/من وين أخذته؟
رازي/من أم عمر
بـيّـن اتسعت عيونه/رحنا بها
رازي/لاتقول اخذته منها
بـيّـن هز راسه بايه
رازي وقف وثنى يديه حول وسطه ثم التفت له وشده من ياقته
بـيّـن وقف معه
رازي/نعنبوا ذا الوجه ماتعرف تدور يعني
بـيّـن ابتسم/خلك رجل جات الفرصة تجلس قدام سحاب معي
رازي احتدت نظرته بغبنة وشد على بـيّـن بقوة
ديوان وقف على مسافة منهم/والله دريت انه انتم
//التفتوا له//
ديوان/لذالحين وانتم بحلوق بعض حتى بعد مصايبكم
رازي ترك بـيّـن ورجع يده من ورا رقبة بـيّـن/ذا الحب ياجاهلينه
ديوان تنهد/جيت اعلمكم لاتقربون الوادي قريب الى مااشوف الوضع/مشى/
بـيّـن وعينه على ديوان/ولد رازي
رازي التفت له
بـيّـن بابتسامة/نويت اروح لسرّاي(اسم الوادي)
رازي ناظره بتفكير
بـيّـن/هاه معي؟
......................................
،،،الـلـيـل،،،
....................................
<<بيت ظاهر>>
ظاهر يقفل كبكاته قبال المراية مد يده لعطره قطب جبينه باستغراب يناظره
ضاري ببجامة
ظاهر/وش فيك مالبست للحين؟
وداد دخلت وبين يديها جوالها وجلست عالسرير تطقطق فيه/مو برايح
ضاري/يبه انا ابي اروح
ظاهر التفت يناظره/وليش ان شاء الله
وداد/مثل مااحنا درينا باخر اللحظات نتنازل لهم عن باقي هاللحظات يشبعون فيها
ظاهر/اقول خلي عنك هالكلام اللي ماله سنع وخلي الولد يلبس
وداد رفعت عينها له/ولدي مايروح وكان مااروح له
ظاهر/لاتروحين انتي بكيفك مير ولدي يحضر ملكة عمه
وداد بنرفزة/قلت مايروح يعني مايروح
ظاهر ناظرها وكتم غيظه خرج من الغرفة ودخل لغرفة ضاري يخرج له ملابسه
وداد فزت من السرير ووقفت عنده وقفلت الدولاب/قلت مايروح
ظاهر/وداد اخزي الشيطان لاأخلي شيطاني تطير فيك
وداد ضحكت/ليه هو انت مقصر انا صابرة وحامدة لكن انت ياكبر جحودك
ظاهر بحدة/احترمي نفسك والزمي حدودك خلي هالليلة تمر على خير
وداد/تمر على خير ليش لا لكن ضاري مايروح
ظاهر دفها عن الدولاب وبحدة وسط غيظه/يروح وبنشوف وش بتسوين
وداد ناظرته بقهر من حركته فيها مشت لغرفتها وقفلت الباب وراها بقوة
ظاهر يرمي ملابس ضاري فوق سريره/يالله البس لانتأخر
ضاري لبس بحماس بدون اهتمام للي صار من شوي هالوضع بالنسبة له اصبح طبيعي
وداد تبخر قهرها بلحظة وابتسمت بوناسة اتجهت لسريرها وارتمت فوقه بحماس
........................................
<<بيت منيرة>>
غصنة فتحت الباب الغرفة بشويش وميلت فمها باستغراب من ناظرتها
غيمة قبال المراية بمكياجها المعتاد كحلة وروج وايلاينر ترفع مقدمة شعرها ب ركة بسيطة
غصنة ناظرتها للحظة ثم ناظرت المراية ترفع شعرها/ماشاء الله خلصتي وانا اللي أحسبك نايمة
غيمة/خلصتي أمورك؟
غصنة/ايه عند سلام
غيمة/وامي
غصنة بنرفزة ارتفع مع صوتها للحظة/ايه/خفضت صوتها/كل شي تمام 
غيمة/وال
غصنة قاطعتها/كل شي كل شي تمام/ناظرتها بتردد/وانتي
غيمة ناظرتها/وش فيني؟
غصنة تراجعت للدولاب وراهم سحبت فستانها/لاتناظرين/بدت تلبس/
غيمة/ماتبطلين الحركة ذي
غصنة ابتسمت/تتوقعين وين بيسكن مُحارب
غيمة/اكيد برا مين يبي يجلس بهالنار
غصنة وقفت قبال المراية واعطتها ظهرها/سكريه
غيمة تنهدت وقفلته/بـيّـن؟
غصنة/يقول نواف انه من اهل العروس
منيرة دقت الباب/يالله يابنات تاخرنا
غصنة جرت للباب وفتحته/يمه محارب وينه
منيرة/عند جدتك بالحوش برا
غصنة خرجت وجرت بابتسامة/مُحارب
مُحارب بكامل كشخته التف وناظرها
غصنة وقفت/وااااه/اتسعت ابتسامتها/من ذا المزيون ماعرفته
حمدة بابتسامة/اذكري الله مايحسد المال الا راعيه
مُحارب ميل فمه بابتسامة وبين يديه السبحة يحركها بحركات دائرية
غصنة تدور حوله تناظره باعجاب/ماشاء الله ماشاء الله ماعرفتك وانت نظيف
مُحارب احتدت نظرته 
غصنة تراجعت ورا جدتها
نواف المستعد للعزيمة ضحك/الحمدلله ماهو بأنا لحالي شفت
مُحارب مد يده وضرب عقاله
نواف طاح عقاله وشماغه عالارض وبغيظ/محارب
حمدة/لااله الا الله لااله الا الله حتى انت انهبلت مثلهم الليلة
ظاهر وضاري خرجوا من البيت
ضاري ابتسم وجرى لهم/عم محارب
نواف عقاله على راسه وشماغه على كتفه بعد حركة مُحارب وقف قدام مُحارب واستقبل ضاري احتضنه ورفعه يدور فيه
ضاري صرخ/نواف نواف
نواف بضحكة/اجل هو عمك وانا لا
ضاري/عم نواف عم نواف
نواف نزله
ضاري بزعل/خربت شماغي
غصنة جرت له وضمته/الزين زين وش مايلبس ياعيني انت
ظاهر وقف عندهم/يالله أبطينا عالناس
حمدة/نحتري
منيرة خرجت من بيتها ووراها غيمة
حمدة/هه طلعت
ظاهر/مشينا
مُحارب توتر فعلا وهو المتناسي ومتجاهل كل احاسيسه من الصباح اخذ نفس
//غصنة ونواف ناظروا بعض من انتبهوا لانفاسه ابتسموا//
محارب مشى
غصنة اسرعت بخطواتها وقفت جنبه احتضنت يده اليمنى وهمست/عاد اذا عالزين لاتخاف ابد
مُحارب ارتفع حاجبه/ومين قال اني خايف
نواف وقف جنبه واحتضن يساره/والله اني بفقد صفقاتك لي يامحارب
محارب/تراني بأملك وارجع للبيت واصفقك ابشر لاتشيل هم فراق الصفقات
نواف ترك يده/ياحبي لك ولمزوحك/اسرع بخطواته مبتعد عنهم/
مُحارب رفع صوته/الوعد لا رجعنا يانواف
غصنة تضحك بخفة وعينها على نواف المبتعد
مُحارب التفت لها ودفها من راسها بطرف اصبعه
غصنة تركته/اه
محارب/وانتي تغطي سلمان برا
غصنة كشرت بوجهها/طيب طيب حتى بهالليلة لازم دفة الراس
مُحارب ناظرها
غصنة ليست بسرعة وخرجت ورا نواف
مُحارب ابتسم وعينه عليهم وقف عالباب ومد رجله بيخرج بوسط توتر يجتاحه من خوفه يتكرر الرفض مثل كل مرة زفر/يارب توفيقك
طاهر مد يده ودفه بخفة لبرا
مُحارب خرج والتفت وراه
طاهر/هالمرة غير هالمرة اللي وقفوا معنا وماتخلوا عنا توكل يامحارب توكل
.......................................
<<بيت مضاوي>>
ولاء تلف البيت بالمبخرة وسط ابتسامة خفيفة التفتت من ناظرتها واقفة جنبها/اليوم كنتي تكلمينها بس انا ماتنطقين معي حرف/انحنت وجلست قبالها تعدل فستانها/والله ياابوك ذا يبي له تأديب مادرينا فيك ويوم درينا مادرينا ان بيصير كذا ولا كان انتي اجمل وحدة الليلة
رازي يمشي باتجاههم/ايه ايه خربي بنيتي علي
غيمة الصغيرة جرت له/بابا
ولاء وقفت وبيدها المبخرة/اسمعوا من يتكلم
رازي وقف عندها وسحب المبخرة من يدها/روحي تجهزي الناس على وصول
ولاء بفستان مشجر ناعم/جاهزة
رازي ناظرها/من جدك كذا!!صدق اني رجال لكن مو بلبس ذا لليلة
ولاء بسخرية/ااه بحكم خبرتك يعني
رازي ناظرها بتقطيبة جبينه
مضاوي خرجت من المطبخ/وهو الصادق ذا مو بلبس روحي البسي الاحمر
رازي ضحك وغمز لها قلد جدتها/البسي الاحمر ياولى يمكن يهون من بدايتها
ولاء رفعت يدها بغيظ/من اللي يهون هاه
رازي تراجع لورا يضحك
ولاء/والله انا اللي اهون واتركم تتهاوشون انت وصديقك/ناظرت جدتها/وانتي وصديقتك
مضاوي اتسعت عيونها/وشو
رازي/يمه سوت تحديد الكل
مضاوي/بنت من ذالحين علميني ماتبينه ارد الناس قبل كل شي
ولاء باحراج/يعني ياجدة انا ماقلت ماابيه بس
مضاوي قاطعتها/روحي والبسي اجل واتركي الهرج اللي ماله طعم
.............................................
<<بيت الشيخ>>
يقين جالسة بمكان سحاب بملل واضح على وجهها تنتظرها من العصر بعدم اهتمام لهمز ولمز من حولها الواضح بلغة جسدهم اكثر من نظراتهم
نور وقفت عندها وانحنت تهمس لها/يقين خلاص عاد
يقين صدت بوجهها بعدم اهتمام
ريوف تمشي بخطوات ثابتة متزنة راسمة عليها الثقل فوق رزتها اللي تنطق بها هيئتها وقفت على مسافة بسيطة منها وبصوت منخفض/قومي
//التفتوا اللي حولهم يناظرونهم//
يقين ناظرتها بابتسامة
نور ناظرتها وبهمس/ماله داعي هالحركات ريوف
ريوف بدون اهتمام لنور وارتفع صوتها/قومي يقين ولا باقي عقلك راح مع صوتك
يـقـيـن ضحكت بخفة ورفعت رجل فوق رجل وتكتفت بتحدي
ريوف/قومي هالكرسي نظيف مايجلسون عليه
نور ضربتها كف بكل قوتها
ريوف ناظرتها بحدة
نور بغبنة/كيف قدرتي تلمحين حتى!!
ريوف من بين اسنانها وبرجفة غضب اسوي بجسمها/احمدي ربك حولنا ناس تراهم شافعين وبالحيل
ام سطام بحدة/نور يقين ريوف تعالوا
،،غرفة ام سطام،،
ام سطام التفت وضربت نور كف
ريوف تكتفت بابتسامة ورضا
نور المتوترة من كل شي من فقدان سطام اللي للحين ماتدري عنه ومن يقين اللي تعبت منها ومن عنادها ومن ريوف اللي ماتحشم احد ولاتفكر باخوانها وفوق كل ذا امهم اللي تعبت وهي تحاول توصل لبر معها ناظرتها بغيظ ارتسم على ملامحها بعد فترة طويلة
ام سطام امتلت غيظ هالنظرة تكررت من اكثر اثنين تحبهم وتخاف منهم اكثر من حبها لهم البارح نظرة سطام واليوم نور
نور/تقذف اختها بدون خوف من الله ولا حيا من الناس مافكرت وش يضر اختها ابدا بدل ماتأدبينها ترفعين يدك علي انا اللي اقوم بواجبك
ام سطام/ماطلبت منك تقومين بواجبي ابد
نور شدت على قبضتها بقهر
ام سطام ناظرت يقين بتهديد/وانتي امسكي ارضك واطردي ابشر من راسك ولا جدتك بتطردنا كلنا
يـقـيـن تنهدت وخرجت من الغرفة
نور فاض الكيل وانتهت قدرك تحملها تعبت اعصابها بعد اللي شافته اليوم ريوف فاقت كل توقعتها وامها زادتها تجبر كانت هاذي النقطة الفاصلة بالنسبة لها تتحمل كل شي على حسابها لكن مستحيل تتحمل شي على يقين يـقـيـن اللي ماكانت اخت وبس يقين القلب الطاهر اللي احتواها بعد ازمتها ووقف معها نوت تصحي امها وتوعيها تصحيها من هالغفلة والتساهل بحقوق عيالها وتمييزهم عن بعض/انا أبي اروح لجدي
ام سطام اللي عينها على يقين الخارجة انصعقت من اللي تسمعه التفتت تناظرها بصدمة
نور/جا الوقت اللي اكون فيه عند اعمامي
ريوف ضحكت وصفقت بيديها/واو واو الحين جدتي بتطورنا صدق يمه
نور/انا رايحة لجدي طاهر واللي يصير يصير/خرجت/
...............................................
<<بيت مضاوي>>
،،عند الرجال،،
عمر جالس بتوتر بعد ماعرف سبب عزيمتهم اللي توافق عزيمة سلامة الشيخ بوسط ندم اخفاه عنهم انه لبى عزيمتهم
سلمان التفت له بابتسامة/عمر كلنا بنحضر عزيمة الشيخ عيب علينا كان مالبيناها
الشيخ ناظر رازي بعد الكلمة القصيرة عن الرباط المقدس بين الاثنين ومايترتب عليه من حقوق وواجبات وعلى رأسها مخافة الله اولا واخيرا نطق/قل زوجتك أختي ولاء على مايرضي الله وعلى مايرضي رسول الله صلى الله عليه وسلم وعلى الصداق الذي تراضينا عليه
رازي ردد وراه بابتسامة وعينه على محارب
محارب بوسط مشاعر مختلطة من التوتر والفرح واخيرا تحقق حلمه ماكان حلمه بالزواج ابدا حلمه يطلع من هالديرة واول خطواتها الزواج وكان هالقانون عائق قباله من ثلاث سنين هالقانون فرض على كل شباب الديرة مايطلع منها اي شاب الا وهو متزوج حتى لو كان صغير سن فرض وواجب من سحاب الديرة ولا لهم اي حق برفضه مغلوب على امره ومحكوم عليه بالبقاء بهالديرة اخيرا كسر هالقانون اخيرا ارتسم قباله طريق الحياة بعينه طريق يتشارك فيه هو ولاء الحياة بيصونها ويقدرها ويحترمها اصبحت راعية معروف كبير بعينه هي الأمل وشريكة الحياة اللي متحمس لها بكل مافيه
الشيخ ناظر محارب/قل قبلتها لنفسي
مُحارب رجف بداية صوته وسط ابتسامات اخوانه/قبلت نكاحها لنفسي على كتاب الله وعلى سنة رسول الله وعلى الصداق الذي تراضينا عليه
//انشحنت النفوس فرح فوق الفرح اللي قبل عقد النكاح كانت اسرع خطبة وعقد بتاريخ العايلتين لكن لكل ظرف حكمه//
الشيخ/بارك الله لك وبارك عليك وجمع بينكما في خير وألف بين قلبيكما جعله الله زواج مبارك .....
بـيّـن فز واقف من خرج الشيخ
ضاري جرى برا المجلس
بـيّـن ضم محارب بكل قوته
مُحارب رفع يده ومسك شماغه بضحكة
بـيّـن بفرح غامر/مبروك يااخوك مبروك والله وكبرنا يامحارب كبرنا
مُحارب بابتسامته/عقبالك يابـيّـن عقبالك
ظاهر ابتسم ووقف عندهم
بـيّـن تركه/اكيد وتراه مو باي كتاب والسلام كل الديرة بتحضره ماهو مثلك
محارب ضحك/امين الله يعجل به على خير
ظاهر سلم عليه/مبروك يامحارب مبروك
//وتوالت تبريكات الحاضرين//
،،عند الحريم،،
ضاري دخل عندهم
غصنة جرت له/هاه هاه خلصوا
ضاري بوناسة/ايه ذالحين عمي محارب يجي هنيا عادي
اعتدال ضحكت/وانت يجي عندي يعني
ضاري ايه يصير يتقهوى معنا من زمان ابي رجال معي وسطكم
اعتدال ضحكت بصوت
غصنة/يدخل عند ولاء مو الباقين يالدايخ
ضاري ناظرها
غيمة الصغيرة مسكت يده/نلوح
ضاري شالها ومشى/ذالحين دورك تجين وسط الرجال مثلي وسطهم
اعتدال بضحكة/والله قلبه مليان المسكين/التفتت ورا وناظرتها ثم همست لغصنة/وش فيها غيمة متيبسة الليلة
غصنة بربكة/يتهيأ لك انا بروح لولاء
اعتدال مشت معها/احسه عشا عادي مو بكتب كتاب وملكة وحركات
غصنة/اسكتي بس ولاء لو عليها جلست تقهوت مع حزب الجدات لولا ان غيمة طردتها فاتك حلطمتها تقول تبي تجلس بالبراد الجو يهفهف يبي له كوفي وحش جدتي وجدتها وجدتك
اعتدال ضحكت/مي بصاحية والله
................................................
<<بيت الشيخ>>
يقين تتمشى بغرفته تصب الزيت حولها استغلت وضع حريم الديرة اللي يتعشون رمت العلبة ورفعت الكبريت ورمت العود المشتعل بالغرفة خرجت وقفلت باب الغرفة نزلت شالها وربطته بالباب ناظرت باب الغرفة وهمست لنفسها بصوت غير مسموع كعادتها وبابتسامة/الحمدلله على سلامتك عزيز/واتجهت لغرفتها/
وقف يناظر الغرفة بتفكير بعد ماشاف اللي سوته تنهد وفتح شالها وعلق بالباب سحبه وانقطع ناظره زفر ودخله بجيبه وخرج مبتعد
،،غرفة مبروكة،،
ام سطام بفزع وسط دموعها/تقول بتروح لجدها يمه بتروح له
مبروكة تنهدت/ذالحين انا حسيت بصوتك كيف المعازيم اللي شافوا وجهك!!
ام سطام/يمه
مبروكة/اللي يسمعك يقول به مصيبة خليها تروح لهم كم سنة وهي عندك
ام سطام اتسعت عيونها/واترك حمدة تتشمت بي اختارتهم علي/بدموعها وبرفض/مااقدر يمه مااقدر بموت بموت
مبروكة/زينة
ام سطام ناظرتها
مبروكة/طول سنينها وهي ساكتة وش ثورها ذالحين
ام سطام سكتت
مبروكة تنهدت/خليها تروح عشان تعرف ان هنيا جنة عن عندهم
ام سطام/مير
مبروكة/يازينة
ام سطام بقهر/طيب يمه
مبروكة/روحي للمعازيم ذالحين لاحقتك
ريوف دخلت بفجعة/جدة غرفة عزيز تحترق
مبروكة اتسعت عيونها/والعرب دروا؟
ريوف/محد درا مير الريحة وصلت بارود ومعه اثنين يطفونها واكيد ذالحين بيجون باقي الرجال
مبروكة بحدة/خليكم مع المعازيم اكرموهم دامهم لحقوها مامن خوف قدروا عليها
....................................
<<بيت منيرة>>
غيمك واقفة قبال المراية تمزل حلقها ثم بدت امسح مكياجها
غصنة دخلت بزعل/يعني وش ذا الكتاب العريس ماشاف عروسته ولا
غيمة ابتسمت/تقصدين فاتك تشوفين وش بيصير بينهم
غصنة اتجهت للدولاب بتكشيرة فتحته ومدت يدها تخرج له بجامة وفتحت الجوال اللي احتفظت فيه صباح اليرم قفلته بوجهه وقت اتصاله كذا مرة ثم قررت تحطه عالصامت ودفنته وسط ملابسها اخذته وفتحت دولاب غيمة /ظلم والله ظلم
غيمة تفتح سلسالها بابتسامة/لاتخافين بكرة بيلبسون الدبل وبتشبعين نظر/قطبت جبينها/وش عندك عند دولابي؟
غصنة قفلت دولابها/ابي بجامتك الحرير ذيك احسها تناسب مود الليلة
غيمة ميلت فمها/ماكثر الله الا بجايمك وقمصانك
غصنة غمزت وهي خارجة/بس اللي لك غير
غيمة تنهدت/روحي بس روحي مافيه
غصنة مدت لسانها/مالقيتها اصلا يالحسودة/خرجت واسرعت بخطواتها وهي تنفض يمينها من توترها/
غيمة وقفت وقفلت الباب وبدت تنزل فستانها اتسعت عيونها من وصل مسامعها ذاك الرنين اللي تعرفه زين رجف قلبها واتجهت عيونها للدولاب وقفت تنتظره بعدم  تصديق اتجهت للدولاب بخطوات بطيئة عكس قلبها الاي تسارعت نبضاته لحد الجنون فتحت الدولاب وناظرت نور شاشته الخفيف من تحت الملابس توقف عن الرنين هدا قلبها وفزت من عاود رنينه ياااه كم لها عن ذا الصوت كم عادت لها ذكريات فرح وضحك وبكا وقهر وخيبة اختفى قناع الهدوء اللي لبسته من صحت واحتقن وجهها باللون الاحمر غرقت عيونها دموع ناظرته مدت يدها برجفة ناظرت اسمه(وصالي)تذكرت زعله من هالاسم وقت ردت عليه باسم وصال ودلعته وصالي كان هالاسم اسم على مسمى بالنسبة لها كان حبل الوصل لها بالحياة بعد فراق بـيّـن المرير لهم لذيك السنة اللي وقفت فيها حياة كل من بهالبيت كان حبل وصل غيمة بالعالم حولها والاهم حبل وصال غيمة لبيّن حتى لو جهل بيّن بوصله بينهم مارمت هالجوال اللي كل مافتحت دولابها وطاحت عينها عليه وهي تحوس بأغراضها ذكرته وذكرت ايامهم الحلوة ووعدهم لبعض مرت سنين وهي تنتظره بأمل مرت سنين وهي عايشة على ذكرى الوعود رغم معرفتها بأنه قطع العلاقة بينهم لكن كان أملها أقوى بانتظاره فتحت الخط ولامست سماعة هالجوال اذنها كان الصمت سيد الموقف من الطرفين
رازي يجر خطواته متجهة لبيت بـيّـن وبمحاولة بائسة لعل وعسى ترد عليه ويشرح لها موقفه فز قلبه من وصل لاذنه صوت انفاسها الخافت ضاع الكلام اللي كان مجهزة من الصباح راح عن باله كل تبرير وترتيب لهالتبرير حتى تفهمه حبة حبة
غيمة انسابت دموعها بخفة وكانت اسم الى مسمى غيمة وفاضت هالغيمة فعلا
رازي رجف صوته يدري اللي سواه خطأ وكبير بحقها/غيمة
غيمة اللي كانت تنتظر هاللحظة مدة طويلة تنتظر تسمع اسمها منه توقعت يفز قلبها وتذوب كلها عنده وتقبل عليه بدون اهتمام للعواقب لكن عكس توقعتها ماتحركت فيها شعرها تحس بشعور غريب على كثر الشوق له فاقه الصد بهاللحظة اكتفت بالصمت
رازي وابتدأ بجملته المحببة لقلبها/ماودك تمطرين رازي ياغيمته
غيمة بصدود/رازي عنده غيمته ذالحين وسماه ماتتحمل غيمتين بنفس الوقت
رازي/يعلم الله كان جهل ياغيمة
غيمة ماردت
رازي/أقبل عليك وتسمعيني؟
غيمة/والمسكينة اللي معك تدري انك مقبلٍ على غيرها
رازي/ياغـ
غيمة قاطعته/ماهو أنا الخسيسة اللي ترضى على غيرها ولا هو انا اللي أقبل عالقلوب بأوجاع كان هاذي شيمة عرفتها بعدي فأنا على عهدك ماتغيرت اسم على مسمى أمر وأحيي ماني من اللي يمرون ويذبحون
رازي سكت من عرف مقصدها/لكن ياغيمة
غيمة مقاطعه/الظاهر المدن غيرتك خبري بك ذهين تعرفها ومحدن نطقها
رازي برجفة صوته/سامحيني ياغيمة سامحيني وأنا باقي على العهد
غيمة ضحكت بخفة/اي عهد اللي تعلمني به عساه العهد اللي كسرته باول الطريق!!
رازي/اسمعي ياغيمة ولاتسوين سواتي
غيمة/علمتني اياها وأعلمك إياها ذالحين رح الله يوفقك ويستر عليك
رازي وقف من سمع كلامها انطعن وقت نطقها لولاء ومرض من كثر ماتخيل ردة فعلها وكيف بيكون وقع هالكلام عليها وماكان الا انه هو المتضرر من كثر التخيل كيف الحين انعادت عليه منها وصابته من جديد دارت الدنيا مثل ماتمنى لكن هالمرة دارت عليه كان المخطي وهذا جزاه/حق حق وواجب يابنت خلف لكن يشهد الله انها على غير بينة تكفين تكفين طالبك لاهدت عواصفك اقبلي علي واسأليني حتى مايكون ماتعيشين الندم اللي اعيشه اليوم تكفين
غيمة عضت شفتها بتردد ذرة صغيرة بأعماق قلبها تطلبها تسمعه لكن كل مافيها بهاللحظة يدفعها للصدود
رازي اخذ نفس مستبشر بصمتها/طالبك تكفين لاتردين علي الحين انا على امرك وعلى شورك راضي بحكمك خذي وقتك ثم اسمعيني
غيمة بنرفزة/انا
رازي قاطعها/فمان الله ياغيمة رازي فمان الله/قفل/
غيمة ناظرت جوالها بغبنة هرب رافض ردها بأي يحق يرفض ويملي عليها افعالها وهو الخاين زفرت بوجع وحيرة وجع من قوة الخيانة وحيرة من كلامه مابين تصدقه وتسمع له او تكذبه وهو اثبت لها هالشي بخيانته عضت شفتها بغضب منه وقفلت الجوال ورماه بكل قوتها فوق الدولاب همست لنفسها/اللي يخون مرة يسويها مرات
.........................................
<<بيت الشيخ>>
//تجمهروا الرجال برا البيت من جهة مدخل عزيز طفوا الحريق ومر الموضوع بسلام حتى غرفة عزيز مااحترقت بالكامل جزء منها فقط//
سحاب من ورا الباب/عساكم عالقوة ماقصرتوا كثر الله خيركم وجمل حالكم/مابين جملة والثانية تشكر وتمنع فزعات وشرهات بينها وبين اهل الديرة وبعد فترة تفرقوا التفتت للغرفة/ريوف
ريوف من ورا الباب اللي بينها وبين داخل البيت اتجهت لها/سمي ياجدة
مبروكة مدت يدها لها
ريوف مسكت يدها
مبروكة استندت عليها ودخلت للغرفة كشرت بوجهها وكحت مجبرة/يابنت وش كبره
ريوف ناظرت الغرفة/كبير ياجدة كبير
مبروكة قطبت جبينها/بارود يقول بسيطة
ريوف/اذا نص الغرفة راح والباقي ماينجلس به بسيط عنده ذا شي ثاني
مبروكة تنهدت ولفت خارجة من الغرفة
ريوف/جدة عرفوا العيال وش السبب
مبروكة دعست على شي وقفت بشك من تخمينها حافظت على ملامحها/يقولون الصغار يلعبون بالنار وشلوا فيها
ريوف ميلت فمها/يمكن
مبروكة/روحي حطي لامك عشا خليها تتعشى
ريوف/جدة
مبروكة/روحي بس انتي انا ادبر اموري ماني سحاب على قلة سنع
ريوف/محشومة ياجدة محشومة
مبروكة اشرت براسها بخفة بمعنى روحي
ريوف مشت
مبروكة ابعدت رجلها بخفة وانحنت سالته بيدها تحسسته بشويش واحتدت نظرتها وقفت عند الباب/بارود
بارود/سمي ياسحاب
سحاب/علم سهم يجهز الامور بكرة ان شاء الله ورانا غبشة لبيت بني طاهر
بارود كشر بوجهه ماعجبه الموضوع
سحاب/واسمع
بارود/سمي
سحاب/بني طاهر لبوا؟
بارود باستغراب/ايه كلهم الديرة كل ابوها لبّت مغير اثنين
سحاب/اجل اسمع العلم
.................................
<<بيت بـيّـن>>
بـيّـن متكي عالارض قباله ابريق الشاهي وكاسته وطرق قباله بمسافة عند الزريبة تحديدا ونايم 
رازي جلس جنبه وبيده ابريقه وكاسته/سلام
بـيّـن ماعدل جلسته/وعليكم السلام خير وش تدور
رازي جلس/ادور النفاه
بـيّـن/والنفاه عندي!!
رازي ضحك/حيل الله اقوى وش اسوي عاد
بـيّـن قطب جبينه وميل فمه/علامك ياولد ماانت بمضبوط من امس
رازي ابتسم/النعناع قاضي من البقالة
بـيّـن بمجاراة له/وقطعة وش ذا النعناع اللي يكدر خاطرك
رازي لف عليه بتغلي/تجيب لي لاعبتن بي ودي به
بـيّـن اللي مو عاجبه وضعه وبدا يقلق فعلا عليه وقف/الله من وحامك ابشر اجيبه لك وانا ولد ابوي
رازي اتسعت عيونه/صدق
بـيّـن/الله يعفي عني بأسرقه لك مير لاتعلم علي
رازي كشر بوجهه/لايكون نعناع غصنة اللي تطرد عنه البساسة
بـيّـن/اجل من وين تبيني اجيب لك بهالليل
رازي/اسرق من بيتكم
بـيّـن/تعقب وتخسى مابقى الا هي اسرق امي بدا مااملا ثلاجتها!!
رازي وقف بعصبية/اجل نعناع غصنة
بـيّـن/احمد ربك افزع لك
رازي شد ياقته/امحق فزعة
بـيّـن شده/ماتستاهل افزع لك وياكثر نعناع غصنة عليك يحصل لك تلقى بزينه
رازي/امحق زين اللي تسقيه بساسة
بـيّـن حاوط رقبة رازي بيمينه وثبت جسم رازي بيساره يخنقه/تعقب وتخسى
رازي يحاول يفك نفسه/بـيّـن بـيّـن خنقتني
بارود وقف عندهم/الله يازين هالمنظر لو انه صحيح
رازي وقف مقاومة وابتسم/راضي دامه بـيّـن وانت الشاهد تراني متنازل وراضي دامه هو
بارود اختفت ابتسامته واحتدت نظرته
بـيّـن ترك رازي/ياكثر جياتك هالايام يابارود
بارود/تحتريكم سحاب
بـيّـن ارتفع حاجبه
رازي بسخرية/قول لها مسامحينكم بالواجب اعتبروه وصل
بارود/وليه من انتم حتى يقام الواجب لكم
//بـيّـن ورازي ناظروا بعض وضحكوا//
بارود احتدت نظرته
رازي بضحكة وعينه بـبـيّن/صادق انت راعي
بـيّـن بضحكة/وانت غريب
بارود/لاتبطون سحاب تحتريكم/مشى وتركهم/
بـيّـن اختفت ضحكته وناظر قفا بارود بتفكير
رازي تكتف/من ذالحين تراني جاحدك
بـيّـن زفر بابتسامة/اجحدني واجحدك
رازي ضحك بحماس/اشتقت لذيك الايام يومها تطق منّا خسارة مايمدينا نشوفها الحين
..............................................
<<بيت الشيخ>>
،،غرفة نور،،
ريوف دخلت ورمت صينية الاكل عالارض
نور جالسة على سريرها اتسعت عيونها/خافي ربك نعمة انتي مايردك شي!!
ريوف/اسمعوا اللي تتكلم وانتي ماخفتيه لمى فجعتي امك بكلامك
نور/وانتي وش عليك مني
ريوف انصدمت
نور/بيني وبين امي مالك شغل
ريوف/انتي من جد تتكلمين بتروحين بيت جدك؟
نور/اعيدها لك مالك شغل
ريوف/نصيحة بتندمين
نور/ماطلبت مشورتك وايه صح مالك شغل
ريوف بنرفزة/الا لي شغل دامك تلعبين باعصاب امي
نور/برا يالله اطلعي برا عني
ريوف/بتندمين قد شعر راسك اذا سويتي هالقرار
نور ضحكت/ماتفرق اصلا يالله برا
.........................
،،مجلس القرية،،
عزيز جالس بملل
بارود راجع انصدم يناظرهم متواجدين
سهم بابتسامة/ياعم طاهر امرني
الجد طاهر/مايامر عليك عدو مير اني احتري سحاب
عزيز/سحاب على مرقدها الحين
طاهر بابتسامة/لا سحاب ماترقد وانتم مجتمعين في ذا
سهم ابتسم/عاد ياعم ورا انك ظلمتنا مير ابشر/خرج جواله/ذالحين اكلمها لعينك
طاهر بضحكة/تسلم تسلم
سهم اتصل فيها/ياسحاب الهم طاهر ينتظرك
طاهر بابتسامة/علمها مُحارب بيبشرها بشارة
//بـيّـن ورازي دخلوا المجلس//
مُحارب الجالس جنب جده انصدم من وجودهم
رازي ابتسم/هلا بالنسيب
//ارتسم الاستغراب على المتواجدين من غير اهل العرسان//
مُحارب وقف وابتسم له/الله يسلمك
رازي سلم عليه
بـيّـن تنهد وهمس/بدينا
رازي همس له/تغار
بـيّـن كشر بوجهه وبصوت مسموع/مابقي الا هي
عزيز يناظرهم ويناظر علاقتهم اللي ماتغيرت ابدا رغم الظروف تمنى يكون بمكانهم مجرد أمنية لحظية لكن اخذت كل عقله بهاللحظة
سهم احتدت ملامحه من استهتارهم ولامبالاتهم للمتواجدين
طاهر انتبه له تنحنح
//رازي وبيّن اسكتوا// 
سحاب من ورا الباب/ياهلا ومرحبا ياهلا بابو عياش ياهلا بالكريم ابن الكرام
ظاهر بابتسامة/حق وواجب ياسحاب حق وواجب والشيخ مثله مثل عيالي مامن فرق الا هو ابدى منهم
سحاب/من طيب اصلك يابو عياش من طيبه
طاهر/ياسحاب محارب وده يبشرك
سحاب/ياهلا ومرحبا بالبشارة وراعيها سم
مُحارب/الليلة عقدت على بنت العم مثنى الله يرحمه
سحاب اختفت ابتسامته سكتت للحظة وتداركت الموقف/الف الف مبروك عساها زواجة الهنا يامحارب
مُحارب/الله يبارك فيك الله يبارك فيك
سحاب/مير ياولدي ماعينت غير بنت الغُرب بنات الديرة واجدات
رازي شد على قبضته بغيظ
بـيّـن ناظره عن طرف ثم علق عينه عالباب اللي بينهم ورغم حجمه العادي المماثل لباقي الابواب إلا انه مشابه بعينه لسور الصين بطوله وعرضه
طاهر/ونعم ببنات الديرة مير بنت مثنى ماهي بأي بنية اهلها راعين الاولة يوم الكل تخلّى ياسحاب
رازي ميل فمه بابتسامة
سحاب شدت على قبضتها بتوتر ماتعودت عليه بهالاسلوب كان خاضع ومطيع وبدون اي صوت واحيانا حتى بدون حضور للمجلس لكن هالايام تغير عن السنين اللي راحت كلها وهالتغير يخوفها وكثير/ونعم ونعم عسى الله يوفقهم ودام انك حاضر نطلبك الحكم ياابو عياش
طاهر قطب جبينه/ماورا حكمك حكم وانتي عين العقل ياسحاب
سحاب/هالمرة لازم نسمع حكمك حتى مايقولون تعديت عليهم ظلم
طاهر/استغفر الله استغفر الله اللي يقوله هو الظالم
سحاب/يرضيك يشبون بغرفة الشيخ يرضيك يروعون حريم الديرة وصغارها يرضيك يروعون ضيوفي يرضيك
بـيّـن اتسعت عيونه
رازي كتم ضحكته وبنفسه/والله اني مسكين
مُحارب كشر بوجهه
طاهر ناظرهم بحدة/صحيح؟!!
بـيّـن تنهد/خابر سحاب ماترمي الحجة الا ومعها البينة
سحاب/البينة اهل الديرة واولها ابو عياش
طاهر قطب جبينه باستغراب/انا!!
سحاب/الكل حضر العشا مغيرهم يالاثنين
بـيّـن زفر بضحكة خفيفة
رازي/عشان ماتعشينا معكم صرنا حنا الفاعلين!!
طاهر/وين كنتوا
رازي/عند بيت بـيّـن وكاميرا البيت شغالة
بـيّـن/الكاميرا خربانة من بعد ذيك الليلة وللحين ماصلحتها
رازي التفت له بوسع عيونه/نعم!!
طاهر شد على عكازه بغبنة/من يشهد لكم انكم عند البيت
بـيّـن ابتسم متعود على هالاتهامات
رازي احتقن وجهه من غيظه وشد على يديه بغبنة اخذ نفس يهدي نفسه ويجمع افكاره
طاهر كرر سؤاله/من يشهد ويطرد عنكم الحجة
بـيّـن بسخرية/طرق
رازي انجلط من بروده التفت له/بـيّـن اسكت واللي يرحم والديك اسكت
بـيّـن برفعة حواجبه/والله اني صادق طرق
رازي بحدة/بـيّـن
طاهر كرر سؤاله على أمل برازي وغاسل يده من بيّن/به احد يشهد؟
رازي احتر وبدا يتعرق ماقدر يحصل اي شي يثبت وجودهم
سحاب بابتسامة انتصار واضحة بصوتها/ماقصرت رايتك بيضا ياابو عياش
طاهر كتم غيظه
سحاب/عطيتهم حقهم سألتهم ثلاث مرات وماعندهم احد يشهد
سطام دخل بعد ماعزم امره وقاطعها/ومن قال ماعندهم شاهد
//التفتوا له بصدمة من وجوده//
سطام بابتسامة/ولا شهادة حفيد سحاب تكذّب؟
.
#شقّ_الغَمام