شـقّ الـغَـمـام

..(٣٨)..

..(٣٨)..
اللهم صل وسلم على نبينا محمد..
سبحان الله وبحمده عدد خلقه ورضا نفسه وزنة عرشه ومداد كلماته..
-
<<بيت ام عايض>>
عايض يجهز القهوة عالدافور قبال امه يهمهم
ام عايض تناظره بشك/علامك متربع عندي من اصبحت؟
عايض/افا يمه ماتبيني عندك!!
ام عايض/لا والله ماابيك وانا اشوفك ضايع ماندري وين ارضك ووين وجهتك
عايض تنهد بضيق
ام عايض/يوم اني حليتها ودحرت خواتك عن طريقك علامك توسمت فعولهن وغديت عايض مانعرفه
عايض ناظر امه/يمه غالية تبي تمشي كل شي براسها وعاى هواها وماتبيني اقول شي
ام عايض/واللي تبيه يمشي سنع ولا قل سنع وانا امك
عايض سكت
ام عايض/لايركبك ابليس وتصد على قل سنع ثم تخطي هام الخطا اللي مابعده رجعة
عايض/مير يمه
ام عايض مقاطعته/وش العلم
عايض/تبي خلود تقدم بالطب وخالد مدري وين بيطس
ام عايض تهلل وجهها وزغرطت/ابرك الساعات وازينها مبروك ياعايض مبروك طلع من نسل ابوك من به فود
عايض بغيظ/وش هالهرج يمه!!
ام عايض/اي والله ذا الصحيح يالله تبلغني واشوف خلود تكتورة بالمستوصف ياسعد قلبك ياعايض ويل قلبي يازينها اي والله يازينها
عايض ابتسم من فرحة امه/يمه مابعد قدمت
ام عايض/وخالد خابرته يقول يبي الكلية الامنية
عايض/ماعليه منين ماراح يقبل شهادته زينة من يوم انه صغير
ام عايض اختفت ابتسامتها/وعلامك مستقعد للضعوف مالوم غالية على سواتها بك
عايض اتسعت عيونه/يمه
ام عايض/بدل ماتوقف معهم وتطارد باوراقهم تسوي هالسواة عيباه ياعايض عيباه
عايض/يمه وش سويت!!
ام عايض/والله لو اني بمحل غالية لاسوي سواتها واقرد زين ماطالبتك بالمحاكم
عايض/عوذا علامك يمه شبيتي علي
ام عايض تنهدت/علامك ياعايض علامك ماانت عايض اللي اعرفه عايض الاولي يهلي ويضحك وغالية اشوفها بعيونه علامها طفت عيونك
عايض/سواياها يمه
ام عايض/لا بالله رايتها بيضا
عايض/يمه انتي علي معها!!
ام عايض/ماسوت شي ابد صبرت وتحملت ماجاك منها ربع ماجاها من خواتك ومنك كان ماتدري
عايض تغير وجهه من كلام امه
ام عايض/كم سمعت بكاها بطريف هالحوش لحالها كم تلفظن عليها خواتك وسكتت كم حشمتك وتجملت ملافظك عليها وصبرت الا بالله انها اجودية قامت بي ماقصرت حتى مع سواياك انت وخواتك علمني ذالحين من المخطي ياعايض علمني
عايض سكت بتفكير
ام عايض تنهدت/ تعوذ من ابليس وانا امك وعود يم بيتك عيالك ماعادهم صغار يخافون منك لا هاوشتهم افرح بهم ولاتصير لهم مخناق يتمنون قطعه بيوم ياعايض
عايض رجف قلبه من كلامها
ام عايض/رح يم بيتك رح وحل امورك قعدتك يمي ماتسوي شي رح
............................................................
<<بيت سطام>>
سلام جالسة بالصالة تتقهوى وتسولف بالواتس بابتسامة اعتلت محياها
ريوف الجالسة بالجهة المقابلة من الصالة/ايه ايه اضحكي
سلام اختفت ابتسامتها ورفعت نظرها لها  مع تقفيلتها لجوالهاش
ريوف بابتسامة/واشبعي ضحك
سلام/الله يديمها علينا وعليكم
ريوف/امين بس ماظنتي بتدوم عليكم
سلام عبست بوجهها ووقفت وبين يديها صينية القهوة/الحمدلله اللي النعمة والارزاق بيده ماهو بيد خلقه/مشت/
ريوف وقفت ولحقتها/تعالي وش قصدك حسود ولا شحيحة!!
سلام ماردت
ريوف مدت يدها لكتف سلام ولفتها عليها بقوة
سلام لفت معها واختل توازن يديها اتسعت عيونها من مال الترمس اللي بالصينية
ريوف طاح الترمس على رجلها وانكسر واعتلى صراخها بالبيت
ام سطام خرجت من الغرفة واتسعت عيونها من اللي تشوفه اسرعت بخطواتها/ريوف!!
سلام ناظرت ام سطام بربكة/مادريت بتطيح عليها
ام سطام انحنت شبه جالسة عند ريوف تناظرها بفزع تبعد يدين ريوف عن رجلها/اشوف اشوف
ريوف جالسة عالارض بدموعها صرخت/حرقتيني الله يحرقك  يانذلة قاصدتني
سلام شدت عالصينية بين يديها/مادريت والله مادريت
ام سطام امتلت غيظ من سمعت صوتها وقفت تناظرها وهي تعدل خواتمها لباطن كفها
سلام/عمة هي لفتني وطاح الترمس عليها لو دريت بيصير كل ذا شلته بيدي
ام سطام ضربتها كف على وجهها
سلام انجرح خدها من الخاتم ناظرتها بوجه احتقن باللون الاحمر من كبح دموعها
ام سطام بغيظها/احرقتيها وماتدرين لو تدرين وش بتسوين
سلام/وذا الصدق مادريت
ام سطام/وتعيدين الكذبة!!/رفعت يديها حتى تضربها/
سلام رفعت الصينية
ام سطام ضربت يدها بحافة الصينية وصرخت من حست بحافة الصينية الحديد جرحت كفها
سلام ناظرتها بنظرات حادة/مادريت الصينية بتسوي بك كذا
ام سطام شدت على كفها المجروح بكفها الثاني/وشو!!
سلام مشت للمطبخ
ريوف وقفت وبصراخ جرت لسلام/والله لاربيك وانا بنت ابوي والله
............................................................
<<بيت نور>>
وداد واقفة عالباب تدق عليه بكل مافيها من غبنة بقلة صبر من انتظاره وحرقة قلبها من اللي صاير لها ولاهلها
حمدة الخارجة من بيتها واقفة على باب بيتها اتسعت عيونها من ناظرتها/انا بنت ابوي الصحيح بنته!!/اسرعت بخطواتها البطيئة/علامك لافيتن بشرك يالشر كل ابوه
وداد تجاهلتها ودقت الباب
حمدة/علامك مالك حس ولا سواتك الشينة اليوم قصت لسانك
وداد التفتت لها/ماني بفاضية لك ذالحين كبيني من لعاعتك تكفين
حمدة اتسعت عيونها/لعاعة!!اهبي يالورعة انا تقولين يمي لعاعة!!
ظاهر فتح الباب بملامح كلها نوم/خير علامك
حمدة/والخير وين وانت وين!!حتى حرمتك عجزت تربط لسانها عن اهلك
ظاهر ناظرها بحدة
وداد بلعت ريقها من نظرته بخوف من تصرف يقدم عليه ويضرها التفتت تناظر حمدة بغيظ/السموحة ياجدة
حمدة ناظرتها بذهول
وداد/تخبرين الحمل وسوالفه يطير العقل
حمدة/الله يعين ذا الحمل اللي تطشين شينك يمه وهو بري منك وكان عالعقل من مبطي مودعة مابك عقل
وداد احتدت نظرتها
حمدة ناظرت ظاهر/بنيتي/رفعت يمينها وقربت اصابعها من بعض/لو يقال بها هه تليتك من اذانك يالاجرب سمعت
ظاهر/ابشري ياجدة
حمدة/جدجد يطير باللي مادانيهم ويروع قلوبهم
ظاهر ابتسم من دعوتها
وداد كبحت غيظها
حمدة/مير لاتبطي في ذا ماودي تنكوي كبدي فوق مرّ القهوة سمعت/مشت راجعة لفرشتها حتى تتقهوى/
ظاهر/عودي يم بيتك/رجع الباب حتى يقفله/
وداد رفعت يدها موقفته وبغيظها/ابي اكلمك بسالفة
ظاهر/اليوم ماهو بيومك بكرة ان شاء الاه تلقيني عندك
وداد من بين اسنانها/ظاهر
ظاهر بابتسامة رضا/علامك
وداد/ابي اكلمك ضروري
ظاهر/اسبقيني والحقك
وداد/احتريك لاتبطي
ظاهر/لاتتشرطين علي روحي يم بيتك بس/قفل الباب بوجهها واتجه لغرفة النوم وقف يناظرها بابتسامة/
نور متمددة عالسرير ابتسمت من ناظرت ابتسامته/علامك شاقة الابتسامة وجهك
ظاهر تنهد/هو احد عنده هالزول ومايبتسم
نور سحبت المخدة غطت وجهها بخجل/خلااااص والله خلاص
ظاهر ضحك/طيب طيب ذالحين باتركك لكن شوي محد بيفكك مني محد/سحب محفظته وجواله من عالتسريحة/
نور جلست تناظره/بتتاخر
ظاهر/لا ان شاء الله نص ساعة وجاي وهاه بنتقهوى مع جدتي وامي ونعلمهم
نور بابتسامة/وش فيك مستعجل اصبر خل نكمل الشهور الاولى اقلها بعده يصير خير
ظاهر/لاعودت نتفاهم/خرج من عندها ومن البيت متجه لبيته فتح الباب ودخل وقفله وراه اتسعت عيونه وتراجع بخطواته لورا واصبح ملاصق للباب وراه ويديه تمنع يديها عن وجهه ثم ارتسمت ابتسامة عريضة/
وداد تحرك يديها بمحاولة منها توصله تخدش وجهه او تصيبه باي مكان المهم تبرد قلبها وبغبنة صرخت/ظاهر
ظاهر بابتسامة يحرك يديه مع يديها ويبعدها عن وجهه وجسمه باستمتاع/يــا نعم
وداد بطيف دمع غطى محاجر عيونها بصراخ مازالت مستمرة بمحاولاتها/ليش ليش ليش!!
ظاهر ثبت يديها عن الحركة وبابتسامة/ليه تظنين محد متربع على عرش الخباثة غيرك!!
وداد مدت يدها بكل مافيها من قوة وخدشت رقبته
ظاهر دفعها مبعدها عنه بخفة لوضعها وبنبرة عالية/مخبولة صدق!!
وداد واقفة قباله بمسافة بسيطة بدموعها بغبنة/تشتت اهلي عشانها!!
ظاهر/اجل حلال تشتيت اهلي وحرام اهلك والله ان تعقبين
وداد شدت على قبضتها الراجفة من كثر القهر
ظاهر بابتسامته/رفعتك شوفة نفسك بسواياك الشينة فوق فوق لقمة الكبر لدرجة تشوفين جوالك بيديني وتضحكين مابه صور لاتحاول وانا كل مافتحته وثقت قروب خواتك ومسحت رسايل الاستدعاء اللي تجيك اول باول/انفجر يضحك/
وداد شحب وجهها من كمية الاستغفال اللي كانت تعيشها وثقتها مايقدر يسوي شي مجبور ينصاع لها لو مسك جوالها مليون مرة مابيده شي ولا له حيلة نست ان ظاهر الطيب معها غيرته بفعولها وصار عليها وحش مايرحم ولايحن عليها حتى حملها بهاللحظة مايشفع لها عنده
ظاهر/نسيتي ان محد يعرفك زين كثري ياوداد مير كان ظنيتي تلعبين على كيفك وانا اسكت مثل اول لك والله ان تخسين ثم تعقبين ثم تطسين خايبة وانا ظاهر
وداد بلعت عبرتها الفايضة على وجهها كانت تظن بافعالها ترجعه لها وتكون مثل قبل عنده كرهت تشوف اهتمامه الفايض لها يتحول لغيرها تراجعت عن غلطتها واحتواها الندم بفراقه كانت معه تحس بأنوثتها بحبه لها دلعه بكل لحظة ومراعاته لشعورها اكثر من اهلها ندمت على تفريطها به والاكثر كل ماكان لها تحول لغيرها بفترة قصيرة بدون حزن عليها وعلى فراقها والموجع لقلبها وجهه وروحه وكل مافيه تغير كثير تغير لدرجة كأنه عايش بضلال واحيته بهالفترة بس بفترة قصيرة قدرت تغيره عليها وهي اللي عاشت معه سنين ماقدرت تسوي اي شي
ظاهر بسخرية/ايه ياشين الواحد لاطغى ينسى ان مرده من بني ادم وكل بني ادم خطّأ
وداد احتواها شعور الذل والاهانة/خلنا نتطلق وتنازل عن القضايا
ظاهر ضحك/تظنين الطلاق يحل كل شي
وداد/مو هذا اللي تبيه
ظاهر/وفرعنتك علي بتروح مثل السلام عليكم!!
وداد باستسلام/اللي تبيه سوه مير فكنا من شرك
ظاهر/عاد بتقدرين تتحملين اللي ابيه حتى تفتكين من شري اللي كبرتيه بيديك؟
وداد ضمت يديها بغبنة وسط طيف دموع اجتمع بعيونها من كثر القهر بهاللحظة 
ضاري الواقف ورا باب غرفته بخوف من خروجه اخذ نفس وخرج من غرفته وقف ببداية الممر يناظر قفا امه ووجه ابوه المواجه له على مسافة منه/بابا ماما
ظاهر رفع نظره لضاري
ضاري غيّر نطقه/يبه علامكم
ظاهر ناظر وداد بابتسامة ومد يمينه لوجهها يمسح دموعها بخفة
وداد ابعدت راسها لورا برفض
ظاهر ابتسم برضا من فعلها ثم رجع يمينه ورا رقبتها ولفها لجهة ضاري حتى يشوفها واحتضنها بخفة بابتسامته/مابنا شي انا وامك نختار اسم لاختك
ضاري ناظرهم بتكذيب 
وداد بابتسامة شاحبة/روح ماما ذاكر روح حبيبي انا وابوك بنختار ونعلمك
ضاري/ابي اختار معكم
ظاهر بحزم/رح ذاكر لاحق عالاسامي رح يالله
ضاري جر خطواته لغرفته بزعل وقفل الباب
وداد دفت ظاهر عنها وابتعدت عنه بخطواتها لورا
ظاهر ابتعد عنها بابتسامة/الحمدلله الشعور متبادل ذالحين/ضحك وفتح الباب وخرج/
وداد ضربت الباب برجلها توجعت وبقهر بدموعها/الله ينتقم منك الله ينتقم منك يالظالم
.
............................................................
      الـلـيـل
............................................................
<<بيت سطام>>
سطام دخل لبيته بمشاعر متناقضة على كثر الراحة المجتمعة بصدره من اللي حصل بالمجلس اليوم الا انه يجتاحه شعور الحزن والضيقة على عزيز ماتمنى يحكم بهالحكم بحقه الا انه تمادى وكثير ووجب يوقفه عند حده طرا بباله سالفة عمه الصباح وطلب الطلاق من طاحت عينه على باب غرفتهم تكدر خاطره وضاق صدره هل فعلا هي مغصوبة عليه او هذا مجرد تسلط من ابوها عليهم تنهد بضيق انتصف البيت عقد حواجبه من ناظر ملامح امه الجالسة بالصالة وقف ع باب الصالة/السلام عليكم
ام سطام صدت بوجهها عنه/وعليكم السلام والرحمة
سطام انحنى مقبل راسه ماغاب عن عينه فعلها
ريوف تعرج من رجلها الملتفة بالشاش وقفت عنده وبغيظ/وين نلقى السلام وسلامك عندنا هاه
سطام اعتدل بوقفته وسط حدة ملامحه من سمع صوتها والتفت ناظرها
ريوف عقدت حواجبها بعدم فهم لملامحه
سطام بحدة/انتي بالذات مااسمع لك حس
ريوف بانفعال/وليه ان شاء الله!!امدى تشتكي لك المظلومة ياحرام يوك عليها
سطام عقد حواجبه من كلامها
ام سطام ناظرته/هي ماتشكي يمكن معك الحق مير انا ياسطام بعد مااشكي
سطام/سمي يمه اسمعك
ام سطام رفعت يدها المجروحة بدون ضماد/هاه ياسطام قول اني مخطية ذالحين بعد
سطام احتضن كف امه بين يديه يناظر جرحها ترك يدها ثم اتجه لغرفتهم بخطوات سريعة
ام سطام كبحت ابتسامتها برضا
ريوف ناظرت امها ورفعت حواجبها بابتسامة مع تكتيفة يديها بنفس الوقت
سطام فتح الباب عقد حواجبه من باب الغرفة المقفول/سلام/دق عالباب/سلام افتحي
سلام فتحت الباب بتردد ناظرته من ورا الباب اللي مافتحته بالكامل/نعم
سطام ناظر نصف وجهها الظاهر من ورا الباب باستغراب/سلام افتحي علمتك مااحكم القبيلة بظلم حتى اظلم اهل بيتي!!
ريوف اختفت ابتسامتها من سمعت كلامه
ام سطام تبدلت ملامحها عقب الرضا واعتلاها الزعل
سلام فتحت الباب/نعم
سطام ناظر جرح خدها العريض بذهول اعتلى وجهه للحظة مرر نظره على رقبتها المخدوشة وشفتها المجروح طرفها اخذ نفس يكبح رغبته بملامسة جروحها وطبطبته عليها وتطييب خاطرها انحنى ماد يده ليدها مسكها ومشى ساحبها وراه باتجاههم وقف عندهم مرر نظره لرجل ريوف وجرح امه ثم استقر نظره على خد سلام المجروح/مثل ماصابكن صابها ابي العلم كامل/ناظر امه/وكلن ياخذ حقه
ام سطام صدت عنه بزعل واضح
ريوف بنرفزة/مير انت مع مرتك مايبي لها علم ياابو العلم
سطام بحدة/ريوف!!
ام سطام/مرتك تقصدت اختك ويو
سلام قاطعتها/والله ماقصدتها!!
سطام ناظر سلام بحدة/لاتقاطعين ماطلبتك تقولين وش عندك لذالحين
سلام شدت على كفها بعبرة اجتمعت بحنجرتها نزلت نظرها للارض وبنفسها/اكيد بيوقف معهم كلهم بيشهدون علي ويصدقهم/بلوم لنفسها/انا وش جابني بينهم ليه تزوجته ليه ليتني سمعت كلام ابوي ياليت
ريوف تناظرها بقمة الاستمتاع
ام سطام/المهم اني منعتها وتسببت بي فوق اختك بعد
سطام/وش هو المنع يمه؟
ام سطام سكتت
سطام باصرار/كيف منعتيها يمه؟
ام سطام بانفعال من سؤاله/ضربتها يعني كيف امنعها اجل
سطام/وتلومينها لادافعت عن نفسها
سلام رفعت نظرها له تناظره بذهول
ريوف بانفعال/انا قايلته انك مع مرتك هاه يمه شفتيه شفتي وش قلت لك انا من اول هاه وش قلت
سطام/قلت انا تسكتين وتسدين حلقك ذا لاتواطاك
ريوف بوسع عيونها/نعم
سطام/لانشدتك اهرجي وقتها
ريوف عض شفتها السفلية بغبنة
سطام/شفتيها يمه؟
ام سطام عقدت حواجبها بعدم فهم
سطام/شفتيها تقصدت ريوف
ام سطام سكتت
ريوف/ليه يعني اكذب عليكم!!
سطام ارتفع صوته/ريوف
ريوف ميلت فمها بغيظ
سطام ناظر امه/وش شفتي يمه؟
ام سطام شدت على قبضتها بصمت
سطام/يمه
ام سطام ناظرته بحدة/اختك بالارض وتصايح من الحرق وجرحها
سطام/يعني ماشفتي شي/ناظر ريوف/هاه قولي وش وراك؟
ريوف/مشيت وراها اعطيها صحن التمر اللي نسته وهي مسرعة تقل مقروصة ولا بها بلا امداني المس كتفها الا وقعت الترمس علي عنية
سلام تناظرها بوسع عيونها
ريوف/ويوم امي دافعت عني ضربت اني وبعدها ماتحملت واخذت حقي منها
سطام سكت للحظات يناظرها بشك
ريوف تكتفت بلامبالاة لنظراته
سطام تنهد/بجيب لي موية احد يبي معي
ام سطام ناظرته باستغراب
سطام/بالمجلس قلبي منعل وبالبيت بعد منعل الشكوى لله/مشى للمطبخ دقايق ورجع وبيده علبة الموية ناظر سلام وبنبرة هادية/سلام
سلام ناظرته بتوتر
سطام/وش اللي صار
ريوف/باقي تسمع لها ليه وحنا ماسدك ماقلناه ولا كذابـ/سكتت وسط شهقة اعتلت منها/
سطام عبس بوجهه بانزعاج فتح علبة الموية وكبها بوجهها
سلام تناظر ريوف بذهول
ام سطام تناظر ريوف بوسع عيونه
سطام بغيظ ماتحمل يكبحه/الكذوب والله انتي صينية القهوة مابها صحن تمر
ام سطام رجف قلبها
ريوف تسارعت نبضات قلبها بتوتر وبعصبية/يعني عشان مالقيته بالصينية تتهمني!!
سطام/حتى الزبالة دورت بها نوى ماعينته ياريوف
ريوف انخطف وجهها وبلعثمة/وش يدريني وش مدبرة من وراي
ام سطام بلعت ريقها
سطام ناظرها بشك ثم التفت لسلام/وش اللي صار ياسلام
سلام برجفة صوتها/كنت اتقهوى بالصالة وضحكت وريوف رمت كلام ان اضحكي واشبعي ضحك
ام سطام عقدت حواجبها باستغراب
سلام/خرجت من الصالة ولحقتني لفتني بقوة والترمس بوسط الصينية وطاح عليها وبعدها عاد جت عمتي عالصوت
ام سطام شدت عاى كفها
سطام ناظر ريوف بحدة
ريوف/عساك مصدقها!!
سطام/اي بالله مصدق عيني تلقط الكذوب من اولها
ريوف صرخت/سطام
سطام/اقصري حسك يامال العقل عسى الله يرزقك بواحد
ريوف/اصلا انت مابقى غير ذنبك تهزه وراها
سلام اتسعت عيونها
سطام رفع يده
ام سطام ضربتها كف بكل قوتها
سطام شد على كفه بكل قوته بغيظ
ريوف ناظرت امها بغبنة وسط لمعة عيونها
ام سطام من بين اسنانها/علمتك اخوك ماتخطين عليه
ريوف
سطام مد يده لشعرها وسحبها
ريوف انهالت دموعها من الالم وصرخت/كبني
سطام يناظرها بحقد/احمدي ربك ماذبحتك عاللي سويتيه ياريوف
ريوف شحب وجهها ووقفت الغصة بحلقها من الخوف
ام سطام بردت عظامها من اللي سمعته
سطام/وربي لولا نقص عقلك بعيني لانزل عقلي لك وادفنك بوسط هالبيت ومحد له كلمة علي
ام سطام مدت يدها له تلامس يده حتى يترك ريوف وتهديه/تعوذ من الشيطان ياسطام
سلام تناظرهم بعدم فهم
سطام ناظر امه بغضبه
ام سطام ابعدت يدها/اخز ابليس ياسطام
سطام حرك شعر ريوف بيده وتحركت معه ريوف/مخزية الف لكن ابليس الانس ذا اللي قدامي وش يخزيه عني هاه
ريوف هلت دموعها/وش سويت لك انا هاه وش سويت؟!!
سطام/اجل انا ياريوف انا ماني من بني سمار!!تغدرين بي ولمن لعزيز!!
سلام انخطف وجهها من قوة الاتهام وكبره
سطام بقهره/ذا عندي كله بكفة واتصالك معه بكفة وشلون تجرأتي وكلمتيه وشلون!!/دفعها لبعيد/مير السفيه سفيه وانا أعقّل السفيه وانا ولد ابوي/بحدة/جوالك تجيبينه وجهزي عمرك من بكرة تروحين ليقين اللبن محد يمخضه ويوزعه لاهله غيرك انتي
ريوف تناظره بذهول
ام سطام/سطام
سطام برفض قاطع/يمه انا اتخطرا كل شي تسويه  واقول تكبر وتعقل مير مابه عقل العقل عندي وانا اللي برده براسها
ريوف بقهر منه/انا بروح عند جدتي مالي قعدك في ذا البيت
سطام/ولي امرك انا انا وبس كان طلعتي من ذا الباب بدون اذني حشيت رجولك ياريوف سمعتي
ريوف هلت دموعها وبصراخ/مو بعلى كيفك تتامر علي
سطام/الا على كيفي وهواي وغصبا عليك/وبقصد/فوق اني شيخ القبيلة ولي امرك بعد
ريوف جرت خطواتها السريعة للغرفة
ام سطام ناظرت سطام بصمت
سطام/يمه كبيني اتصرف باللي اشوفه
ام سطام ناظرت سلام بغيظ
سلام شدت على قبضتها بتوتر
ام سطام مشت للغرفة
سطام/سلام
سلام ناظرته بعتب
سطام مد يمينه يلامس جرحها بخفة
سلام توجعت من لمساته
سطام ابعد يده يناظرها تقدم لها اكثر وقبّل جبينها
سلام ناظرته تكبح دموعها محتويها احساس الانهيار وتكبحه بكل مافيها
سلام مد يمينه محتضن لكف يمينها برغبته المكبوحة طول فترة نقاشه معهم كل ماطاحت عينه عليها ولمح نظراتها المرعوبة وهي وحيدة بينهم وصله احساسها بالغربة والخوف واوجعه نفيها له ليه تحس بالغربة وهي وطنه وهو موطنها يوجعه شعور النفور اللي يوصله منها بكل لحظة وده يضمها ويمسح عليها يطمن قلبها المرعوب بينهم وده يصارحها لها معقولة للحين ماوصلك شعوري اكتفى بسحب كفها واحتضنها بين يديه بصمت
سلام انسابت دمعة تمردت على كبحها من احتضنها وشدت على كففوها بكل مافيها تكبح الجمع اللي وراها
سطام تنهد/اعذريني كان قسيت يشهد الله قسيت عليك والموجوع انا ياسلام المعذرة ياعيني المعذرة
سلام هلت دموعها وتكبح شهقاتها
سطام/اعذري اهلي مايصير الا اللي يرضي قلبك اعذريني واعذريهم ياسلام يالكريمة ياصاحبة العفو اعذرينا
سلام هزت راسها بوسط حضنه بصمتها
سطام قبّل راسها وظل محتضنها تبكي بين يديه حتى تهدا
.
............................................................
<<بيت بـيّـن>>
بـيّـن دخل للبيت/سلام
يقين الواقفة ورا المغسلة تغسل خطفت نظره سريعة عليه باستغراب اخفته من تأخره على غير العادة/وعليكم السلام والرحمة هلا ومرحبا
بـيّـن جر خطواته وقف وراها مد يديه محاوط لخصرها واحتضنها دفن وجهها بكتفها بصمت
يقين بابتسامة/هاه ماصار اللي تبيه
بـيّـن بهمس/يعني صار وماصار
يقين/وبعدين
بـيّـن/مدري احس اني قسيت
يقين عقدت حواجبها باستغراب/ليه اليوم ماهو لبني سمار؟
بـيّـن/لهم ولغيرهم
يقين سكتت
بـيّـن/وبنفس الوقت حلال اللي اسويه يايقين
يقين/انت صح لاتتردد
بـيّـن سكت
يقين غسلت يديها ونزلتها ليديه تبعدها عن خصرها
بـيّـن فز للحظة من يديها الباردة اللي لامسته وشد على خصرها
يقين تنهدت/كبني
بـيّـن شد عليها/لا
يقين قرصت يده بقوة
بـيّـن تركها بعبوس وجهه ملامس يمينه بيساره بمكان قرصتها/اااه
يقين سحبت يمينه بين يديها تمسح مكان القرصة بسخرية/بسم الله عليك توجع ياماما؟
بـيّـن سحب يده بغيظ/مخالب مو باظافر عوذا وش ذا
يقين بزعل/اذكر الله
بـيّـن/لااله الا الله الف من ذكره مير لاجيت اذكي عطيني واحد/جرى/
يقين جرت وراه/وين بتروح/بسخرية/ياكبر البيت كبراه
بـيّـن وقف عند السرير والتفت لها يناظرها بابتسامة
يقين رفعت اصبع يمينها/انا اقول نجرب ذالحين ازين نذكيك ومنها نتاكد يذكي زين او لا
بـيّـن تقدم لها واحتضنها مكتفها بقوة بين يديه ورفعها
يقين تتحرك بين يديه تحاول تتحرر من يديه صرخت/بـيّـن
بـيّـن قبّل خدها الايمن/ياعيونه
يقين ميلت فمها تكبح ابتسامتها/فكني
بـيّـن مشى وهو مكتفها/لا
يقين/ترا باذكيك صدق
بـيّـن قبّل خدها الايسر ناظرها بابتسامة/حلالك
يقين ضيقت عيونها بسخرية من كلمته
بـيّـن اتسعت عيونه من فهم نظرته/انا ولد ابوي ولده
يقين قبّلته مجبرته يسكت وناظرته بابتسامة
بـيّـن ناظرها برفعة حاجبه الايسر مميل فمه يكبح ابتسامته متظاهر بالزعل
يقين/اي والله ولد ابوك ياولد ابوه نزلني تكفى ترا التعليقة ذي شينة اوجعتني
بـيّـن ابتسم من كلامها
يقين اتسعت عيونها من فهمته انخطف وجهها/لا تكفى لا طلبتك ياولد خلف
بـيّـن ضحك ومشى فيها بين يديه/قضت بعد التعليقة مابها ولد خلف يابنت منصور جنيتي على روحك
يقين نطقت بسرعة/تكفى تكفى تكفى راضية بكل شي تبيه الا ذا تكفى تكفى تكفى
بـيّـن يتلفت حوله باستعباط/اسمع لي وزوزة ذبان/وقف قبال الثلاجة ومسكها بيمينه بكل قوته وفتح الثلاجة بيساره/
يقين ابتسمت بانتهاز للفرصة وتحركت بكل قوتها حتى تفلت من يده وفلتت
بـيّـن مسكها بيدها اليسرى بيمينه وناظرها بابتسامة وتهديد/والله لأحقنه بحلقك بمحقان
يقين وقفت برجى/تكفى بـيّـن 
بـيّـن خرج جيك الحليب الصغير من الثلاجة وسحبها لحضنه وصدره ملاصق لظهرها وقرب الجيك منها/قولي بسم الله واااااه يالله يالله
يقين بدموع ملت محاجرها/بـيّـن تكفى يابـيّـن مااحبه والله مااحبه
بـيّـن باستمتاع/بس اذوقك بعض من منتجات حلالك
يقين/تكفى انا الراعي والسلق والحلال كل ابوه بس فكني
بـيّـن ماقدر يقاومها اكثر وانفجر يضحك تركها
يقين جرت مبتعدة عنه
بـيّـن بضحكه/تكرمين عن السلق والحلال تكرمين
يقين مكملة جريها خرجت من البيت
بـيّـن يناظرها بضحكة/عودي بس وعيني من الله خير
يقين/انت اللي بتعين من الله خير وتكبني؟
بـيّـن رجع الجيك الثلاجة/ذا القد ماتصدقيني؟
يقين تنحنحت بخفة ودخلت البيت
بـيّـن تقدم لها واحتضنها بضحكة خفيفة
يقين ضربته على ظهره بزعل/ليه كذا طيب ليش تناقرني
بـيّـن تنهد بابتسامة/احبك واحب مناقرتك واموت على زعلك من المناقر واموت على ترجيك وانتي دارية مااردك كل ذا وتنشديني ليه اناقرك
يقين بلدلته الحضن بابتسامة/انت ليه كل اعذارك مقنعة!!
بـيّـن ضحك بخفة/لاني تربعت بقلبك
يقين سكتت بخجل
بـيّـن/واعذاري كلها مقبولة حتى الشين منها يزين ولّا؟
يقين ماردت
بـيّـن ابعدها عن حضنه بابتسامة/وين رحتي
يقين دفنت وجهها بصدره شدت عليه بيديها برفض تتركه
بـيّـن ضحك برضا وبادلها الحضن/خلاص خلاص لاتكسرين ظهري دريت بجوابك خلاص
يقين عبست بوجهها وشدت عليه اكثر بعناد
بـيّـن/اااه اااه خلاص خلاص طيب انتي المتربعة بقلبي خلاص خلاص تكفين هدي شوي تكفين
.
............................................................
    بـعـد أسـبـوع
............................................................
<<بيت عزيز>>
عزيز جالس بطرف غرفته بظلام
بوجه اكتساه السواد وارتسمت عليه اثار الضيق والهم والكدر جالس يلفه السكون من حوله وبداخله يلفه سيل من تزاحم افكاره اللي تجر له هم فوق هم الى ماوصل به لهالحالة فز من دقة الباب اللي صحته
سطام ورا الباب بتهديد/ياهيه قضى الاسبوع مثل ماعطينا جدتك وانت لذالحين بالبيت الليلة نجرك من هالبيت لاتظن مانسويها اللي حكمناه يطلع من ديارنا نطلعه لو هو على قبره/مشى/
عزيز امتلى صدره غيظ من سيل اوامر سطام المستمر بدون توقف وبكل ظلم بحقه احتدت ملامحه وقف فتح دولابه سحب محفظته بالمبلغ البسيط بداخلها واخذ شماغه ثم اتجه للمطبخ الصغير يرمي الاغراض عالارض بلامبالاة وقف يناظر السكينة من طرت بباله هدية جدته له رجع لغرفته بخطوات سريعة مد يده لاعلى الدولاب وسحب الخنجر المرمي من وقت تخرجه بهالمكان ناظره بابتسامة/جا وقتك ذالحين/مشى بخطوات سريعة خرج من بيته/
............................................................
<<بيت طاهر>>
طاهر يطالعهم بعدم تصديق
حمدة بعيون غرقت دموع/تقوله صادق ياظاهر؟
ظاهر باحراج/ياجدة والله ودي اعلمكم مير هي معيّة تقول اصبر واليوم رضت نعلمكم زين مابقت على رايها الاول عقب ثلاث شهور
حمدة زغرطت وبابتسامة عكست فرحتها العميقة/الف الف مبروك يابنيتي عساه مبروك
نور الجالسة جنب ظاهر وقفت وانحنت مقبلة لراس جدتها/الله يبارك فيك ياجدة
حمدة/وصل سلامك وصل ارتاحي بس
نور جلست جنب جدتها
حمدة ضمت كفوف نور بين كفوفها وناظرتها بدموعها/الله يتمم لك على خير ياعيني
طاهر وقف ودخل لغرفة نومه خرج وبيده الرشاش
ظاهر اتسعت عيونه بذهول/جد
طاهر خرج من بيته
ظاهر فز ومشى وراه
طاهر رمى الرصاص بالجو وبصوت عالي/يابني طاهر حفيد عياش مقبل عليكم يابني سمار حفيد عياش مقبل عليكم
//فزعوا اهل البيت من الصوت وخرجوا الكل//
نور بخجل همست لجدتها/ياجدة ماابي احد يدري
حمدة ضحكت بخفة/وراك ماتكلمتي العلم لاغدا بين اكثر من اثنين ماينقضب وثم الله يلوم من يلومه انت ريحة عياش الباقية كبيه وانا جدتك كبيه يستانس
ظاهر ابتسم لفرحة جده
طاهر/ولد يانواف
نواف الواقف قباله بملابسه الداخلية بوجهه المفزوع/سم ياجد
طاهر/امش وتلّ ازين القعدان وازين روس الحلال واعزم اهل الديرة كل ابوها على العشا الليلة
نواف بعبوس/بس ياجد ازين القعدان خاتم وانت معطيني اياه
طاهر/لك فوق سعره خمس امش
نواف اتسعت ابتسامته وجرى/ابشر ابشر ياجد
سلمان/هيه ثوبك ثوبك
طاهر/امش معه ياسلمان مايدبر الامور لحاله امش معه
سلمان لحقه/سم ياجد
طاهر رفع صوته/ولد ياسلمان لاتنسى بيّن واهله
ظاهر/مير بين تعينه عند الشيخ بالعصر مايحتاج نروح يمه
طاهر ناظره/عقل اخوك وهو مستقعد لنسيبك
ظاهر رفع يديه/مالي شغل عقله معه ياجد
طاهر تنهد بابتسامة/مير ماعلي منه الليلة،الليلة علي بالبشارة الزينة للعرب شبوا عالقدور وولموا القهاوي يابني طاهر شبوا ناركم  شبوها
.
............................................................
#شقّ_الغَمام