شـقّ الـغَـمـام

(٢)

اللهم صل وسلم على نبينا محمد
.
..(٢)..
-
،،،،صـبـاح الأمـس،،،،
خرجت من الغرفة تجري بقميصها الروز الازرق وعلى راسها الطرحة مارة من وسط هالحوش اللي تطل عليه كل البيوت ومرت من قبالها بدون لاتوقف لها/سلام ياجدة
الجدة حمدة جالسة بظل بيتها على فرشتها مستندة بظهرها على جدار هالبيت تقلب بالراديو/وعليكم السلام/اتسعت عيونها تطالعها تمر بدون لاتسلم عليها/بنت!!!اهبي من بنت غصنة ياعساك تنشبين بالغصون اي والله
غصنة تجري وبصوت عالي/نعناعي ياجدة نعناعي!!
الجدة حمدة/ياعساهن
غصنة بصراخ/لاتدعين ياجدة تكفين
الجدة حمدة اتسعت عيونها/اعقبي اي والله اعقبي ارجعي البسي عباتك والله ان يدفنك مُحارب اليوم ارجعي
غصنة خرجت من باب البيت الرئيسي لكل البيوت
الجدة حمدة تنهدت/ياذا النعناع اللي ابلشتنا به عساه ماينبت/رقّ قلبها لغصنة/استغفر الله بس استغفر الله
غيمة بقميص روز باللون البنك الهادي وقفت عندها وانحنت تقبّل راسها اعتدلت بوقفتها/صبحتي بالخير ياجدة
الجدة حمدة جفلت للحظة وزفرت بخفة/هلا هلا
غيمة كملت طريقها بصمتها المعتاد للمطبخ الكبير اللي بزاوية هالحوش
سلام خرجت من بيتهم المتواضع اللي يشابه كل البيوت بذات التصميم غرفتين وصالة ودورة مياة ومطبخ صغير جدا اقرب للتحضيري فقط وهالبيت بالاضافة لاربع بيوت مشابهة له تماما يلفها سور يضمها جميع وخلف هالبيوت مباشرة جبل متوسط الطول يفصله مسافة بسيطة جدا يطل اعلاه على هالبيوت وقبال البيوت على مسافة تبعد امتار بيت شعر كبير للضيوف وخلفه مسجد صغير بدورة مياه واحدة فقط اتجهت بخطوات مهرولة وسط ابتسامة اعتلت وجهها ببجامتها الحرير وشعرها المسدول الطويل المتمايل من حركتها/جدددةةةةة
الجدة حمدة ابتسمت غصب لهاللطيفة بالعايلة وفتحت يديها/ياعين جدتها ياعينها
سلام ارتمت بحضنها وقبّلت راسها وضمتها ثم قبلت كتفها/ياصباحي الحلو وايامي الحلوة كلها
الجدة حمدة امتلى صدرها سرور/والله مازانت الايام الا بعد عافيتك ياعين جدتها يشهد مازان البيت واصحابه الا بعد عافيتك
سلام ابتسمت بحب ودفنت نفسها بحضنها
الجدة حمدة ضربتها بخفة على كتفها وبعتاب/وش ذا يابنت؟!!
سلام ضمتها وهي تتجاهل السؤال وغمضت عيونها/ابي انام ياجدة
الجدة حمدة تنهدت/اتركي عنك ذا الخلاقين والبسي مثل بنات عمك وش محلى لبسهن
سلام فتحت عيونها/يعني مو حلو ياجدة؟!!
الجدة حمدة ضمتها/والله مالها زين الا عليك
سلام ابتسمت
الجدة حمدة/مير الخاطر وماوده وانا جدتك
سلام اكتشفت بصمت يصاحب ابتسامتها
الجدة حمدة/وين المسفع(الطرحة)نسيتي ان به غير محارمك؟
سلام ميلت شفتها للحظة ثم نطقت/ياجدة اليوم سبت سبت
الجدة حمدة زفرت بخفة/مير إنه
غيمة وقفت عندها بهدوء كعادتها وقاطعتها/جدة القهوة بزعفران؟
الجدة حمدة فزت للحظة واخفت الفزة بزفرت نفسها/لا لا بس مهيلة هالمرة
غيمة/ابشري
الجدة حمدة/تبشرين بالجنة
سلام وقفت/انا بأكملـ/فزت من وصلها الصوت/يمه!!
غصنة غطى صوت صراخها المكان وتردد صداه لهدوء المكان/لاااااااااااا
سلام ضحكت/اكيد لعب بنعناعها
الجدة حمدة بنرفزة/والله من كثر دعاوي غيمة على ذا النعناع لو هو كافر أسلم تقولين ذا النعناع ذابح واحدٍ من اخوانها
غصنة داخلة للبيت بكل مافيها من سرعة برعب/جــدّة!!!
سلام فزت من جنب جدتها ودخلت لبيت جدها الاقرب لها
الجدة حمدة/اعقبي من مهبولة اعقبي
محارب بسروال وفانيلة الثوب الداخلية يجري وراها بصراخ/تـعـاااالـي
الجدة حمدة/عوذا عوذا منكم ومن شركم عوذا
غصنة دخلت بيت الجدة وقفلت الباب بكل قوتها وراها
سلام واقفة على يمين الباب من قبل تنتظرها قفلت الباب بالمفتاح
محارب وقف على باب البيت وهو يضربه بكل مافيه/اطلعي اطلعي ياقليلة الحيا اطلعي
الجدة حمدة بعصبية/علامك جاينا بشرك؟!!اخز ابليس يامال الخزى
محارب بعصبية/والله ياجدة انا مامعي شر بذا اليوم مير هي ماتستحي على وجهها صوتها تردد ووصل لديرة الجنون اللي ورانا عساهم بجن يفكنا منهم
الجدة حمدة/وعسى مسامعهم تمتلي من اصواتنا وش علينا منهم!!
محارب صرخ بنفس عصبيته/جدة!!
الجدة حمدة بنفس صرخته/ووجعاااه!!
محارب طنشها ودق الباب/اطلعي ياغصيّن عساك ماتثمرين اطلعي
الجدة حمدة مدت يدها الارض وهي تاخذ من التراب وتحذفه به/اهب من ولد عساها ماتستجاب اهب
غصنة من ورا الباب/ماني بطالعة انا ماسويت شي عشان تعصب علي!!
محارب صرخ/اطلعي!!
غصنة/ليه غبية انا اطلع لك وتذبحني
غيمة وقفت عند جدتها انحنت تنزل القهوة واغراضها وكملت طريقها لبيتهم بدون اهتمام للي يصير
الجدة حمدة/ولد صاحي انت ولا مهبول؟
محارب/الا بالله محد اصحى مني بذا البيت
الجدة حمدة/ويومه علامك عليها هاه علامك!!
محارب ثنى يديه حول وسطه وزفر/استغفر الله العظيم استغفر الله اطلعي وماني مسوي لك شي ابي اتفاهم معك بس
غصنة ضحكت من ورا الباب/ايه ذا التفاهم مرّ علي والله مااطلع
الجدة حمدة/وبعدين مابك حيا ترتكب البيت على راسك وهو به حريم!!
محارب كشر بوجهه/اهل ظاهر عند اهلها
الجدة حمدة بوسع عيونها/وسلام!!
محارب بدون مبالاة/سلام اختي وياكثر ماطبيت بها وطبت بي محرم لها مايحتاج
سلام احتقن وجهها باللون الاحمر من الخجل
غصنة التفت لسلام تناظرها وسط حواجبها اللي ترتفع وتنزل بابتسامة/ياأختنا انتي
سلام انقهرت منها مدت يدها ومسكت يد غصنة وفتحت قفل الباب ثم فتحته ودفت غصنة الامنة لبرا
غصنة تحركت معها بصدمة بدون استيعاب لغدرة سلام فيها
مُحارب اتسعت ابتسامته وهو يناظرها
سلام قفلت الباب عليها
محارب بابتسامة/ينصر دينك يابنت عمي اي والله
غصنة تجمدت مكانها وبخنقة صوتها/محارب
الجدة حمدة سحبت عكازها ووقفت تستند عليه/بوجهي ياولد بوجهي
محارب تقدم لها ومد يمينه وحاوط رقبتها من ورا يضمها له/هلا باأختي هلا بغصنة قليبي
الجدة حمدة/ولد محارب
غصنة بوجهها المحتقن بالاحمر كتمت كحتها/هلا بقليب غصيّن
محارب من ورا أسنانه وسط ابتسامته يضمها بطريقة اقرب للخنق/ياعيني انتي ابيك بموضوع
الجدة حمدة/كبّها ياولد كبّها
محارب باس اعلى راس غصنة وخفف شدته على رقبتها
غصنة رجف قلبها واتسعت عيونها وناظرته برعب من تصرفه
محارب/ياجدة لعينك والله ماني مسوي لها شي ابشري ابشري بي/ترك غصنة/
الجدة حمدة ابتسمت/بعدي اي والله وليدي بعدي
غصنة مسكت يده وبخوفها/تكفى سو بي اللي تبي تكفى
مُحارب بابتسامة/افا انتي الحشاشة(اخر العنقود)عليم الله محد يقول يمك حرف
غصنة برجى/مُحارب!!
محارب همس لها/ابيك بموضوع نتقابل بالبيت سمعتي
غصنة بلعت ريقها تسترجع وش سوت هالفترة اللي راحت
الجدة حمدة اتسعت عيونها من وصل لمسامعها صوت السيارة اللي تعرفها وتميزها زين نطقت بعجل/بنت غصنة افزعي جيبي لي الحِثال افزعي(الحِثال أو الحِثل بواقي الاكل والشرب يكبونه بطشت وصباح اليوم الجديد يخرجونه للغنم تاكله من باب إحسان النعم)
غصنة تكتفت واعتلت وجهها تكشيرة/لا ماني بجايبته
الجدة حمدة استندت على عكازها واسرعت بخطواتها متجهة للمطبخ/اهبي اهبي الله اكبر عليك
مُحارب ابتسم/كفو
غصنة ابتسمت وفكت تكتيفتها وهي تتجه للباب بخطوات سريعة
رفس الباب بكل قوته رافع صوته/يـاأهل البيت ياولد
محارب/حياك حياك
غصنة وقفت قبال الباب تكتفت تتصنع الزعل/لو اني ورا الباب الحين وصفقتني به وش صار لي هاه وش صار
بـيّـن بثوبه الأسود المثني ومربوط حول وسطه وهاللون زاد سماره سمار وشماغه الاحمر المعصوب حول راسه ابتسم ودخل يمشي باتجاهها/تستاهلين
غصنة عطته ظهرها ومستمرة بزعلها/والله لأعلم عليك ظاهر هين يابـيّـن ياللي مافيك رحمة
بـيّـن ميل فمه بابتسامة وانحنى وهو يشيلها وحطها على كتفه يدور فيها/ابوك يالمروحة تبينها على رقم كم؟
غصنة بصراخ/بـيّـن خلاص تكفى خلاص
بـيّـن/من هو اللي مافيه رحمة
غصنة/الشيطان الشيطان تكفى خلاص
بـيّـن نزلها ومسكها من يدها/من أول تعوذي واخزيه عنك ياام لسان
غصنة ناظرته بغيظ/من هي ام لسان!!
بـيّـن تركها ومشى وسط ابتسامته
غصنة مالت ثم انحنت بوقفتها/اهب مابك رحمة تتركني اطيح
محارب اسرع بخطواته ووقف قدامه رفع نفسه يسلم على راسه تسليمه سريعة
بـيّـن اختفت ابتسامته ودف محارب بعيد عنه
الجدة حمدة بملامح كلها غيظ وبيدها طشت مليان حِثال كبته بوجه بـيّـن
.....
(غيمة ٢٤ سنة)،،(محارب٢٣سنة)،،(سلام٢٢سنة)،،غصنة(١٦سنة)
...
اعتدال بعبايتها بيمينها حافظة الفتة وبيسارها ابريق الشاهي ميلت فمها بكدر وضيقة تجر خطواتها بثقل ابتدت يومها بدون شوفته راجعة طريقها باتجاه البيت وقفت وقطبت جبينها تناظر اللي واقف قبالها على باب البيت للحظة ثم احتدت نظرتها/خير وشو له جاي وش تبي؟!!
سهم بعتب/افا تقابلين عمك بهاللون!!
اعتدال كتمت الدعوة بقلبها/ماعندي غير عم واحد وساكن بالمدينة مايلفي ذالحين مايلفي الا بالاجازة
سهم ميل فمه من كلامها/وراك ماانتي بالمدرسة
اعتدال زفرت بضحكة خفيفة/ماشاء الله تبارك الله الله لايضرك مهتم بالحيل!!
سهم بنرفزة كتمها وبلطف/وراك يابنية؟
اعتدال تكتفت/خلصت من مبطي ياللي ذبحك الاهتمام فينا!!
سهم عض شفته بندم ثم هز راسه بهدوء/فتحت الباب وعيّا ينفتح وش السالفة؟
اعتدال بسخرية/بالله!!
سهم/وينها العجيّز؟
الجدة سرور فتحت  الباب وبحدة/بنت اعتدال ادخلي وشو له تطقين حنك مع الغُرب؟!!
اعتدال اسرعت بخطواتها/ابشري ياجدة/مرت من جنبه ودخلت للبيت/
سهم رفّ قلبه واهتز صوته من طاحت عينه عليها/يمه
الجدة سرور/اعقب ماني بأمك ولا اعرفك/قفلت الباب بوجهه/
سهم بلع عبرته ندمه الوحيد بحياته قطيعة امه له ورضاها عليه صعب بوضعه الحالي صعب كثير التف حتى يرجع لمكانه اللي اختاره من سنين وقف من طاحت عينه عليه ميل فمه بابتسامة وهو يناظره بحزن/علمني وراه قست علي بالحيل خابرها ترضى بالهيّن علمني ليه كل ذا علي ليه؟
...
<<بيت الجدة مضاوي>>
ولاء جالسة قبال جدتها وهي تحرك كوب قهوة الكابتشينو اللي تصبح عليها كالعادة وبيدها جوالها زفرت بطفش من النت اللي يقطع بين كل لحظة والثانية بسبب الارسال رمت جوالها جنبها بعد ماقفلته/يارب تحن غيمة وتجي
مضاوي ارتشفت من فنجالها/وراه هي تجي دايم تلحلحي انتي واعمديها(روحي انتي)
ولاء تغير وجهها وبربكة/لا ياجدة وش اروح بذا الصباح اخاف جدها موجود واخرب جلستهم
مضاوي بنص عين/ايه الله يرحم اللي ترقى اكتافه وتتوسط حضنه
ولاء تغير وجهها/جدة ترا ذا قبل سنين كبرت/رفعت صوتها/تراني كبرت ياجدة كبرت
مضاوي قطبت ملامح وجهها وهي تناظر كوبها /يابنت اتركي هالغثى عنك كبدك ماتوجعك
ولاء/كان اوجعتك انتي لاتقهويتي بتوجعني لاتقهويت
مضاوي ميلت فمها بعدم رضا على كلامها/مير الله يرزقك برجلٍ يحب ذا البلا اللي تلطّينه(تشربه)
ولاء/عاد اخر همومي يرضى على اللي أشربه خليني ارضى بالزواج اول
مضاوي تغير وجهها بضيقة من كلامها وتغيير للموضوع/التيس الأجرب أبطا علينا متى ناوي يمّر لايكون يحتري وحدة تمرض حتى يجينا منهبل
ولاء زفرت/والله ياجدة هالمرة ماني بمدافعة عنه صدق انه تيس أجرب
مضاوي اتسعت عيونها واعتدلت بجلستها وهي تسمع هالنبرة لاول مرة تجاه هالشخص/اصدقيني ياولِى
ولاء كعادتها تعدل نطق اسمها/ولاء ياجدة ولاء
مضاوي/كبي عنك ولِى ذالحين وعلميني اخوك وش وراه
ولاء كتمت الموضوع الحقيقي وتنهدت بضيق/قاهرني ياجدة قاهرني اربع سنين ماشفناه الا كم مرة وش ذا والله لو احنا اكبر اعداءه!!
مضاوي ميلت فمها بعدم تصديق لكلامها/والله مدري عنك انتي وهالتيس مايجيب راسه غير خويه ولا حنا عسى الله يعوضنا خير
ولاء/لا عاد ياجدة حرام الظلم هو مقصر لكن باقي ماجحدنا للحين
مضاوي/الله يستر منه بس هذا اللي اقوله الله يستر
...
،،،مـجـلـس الـقـريـة،،،
عزيز مميل المسند متكي عليه ومايل بجلسته وفنجاله بيده
بارود جالس عن يمينه يناظره بمعنى عدّل جلستك
عزيز طنشه وبملل من هالروتين/وثم؟
ابو صالح بقهر/ياشيخ يرضيك يتوخر عالحلال مايسقيه يرضيك؟
عزيز زفر وعينه بفنجاله ثم رفعه يتقهوى
ابو صالح/وثم فوقها يرادد بالكلام محد يقواه هالراعي
عزيز بنفسه/الله لايلومه من يصير عليكم
ابو صالح رفع صوته/ياشيخ!!
عزيز اعتدل بجلسته وزفر/ابشر ابشر باللي يرضيكم نجيبه على عيونكم الليلة نعلمه واجبه ويتعذر لكم بعد رضيت يابو صالح؟
ابو صالح بشك/أكيد ياشيخ؟
عزيز احتدت نظرته من تشكيكه بكلامه
سطام دخل بيده اغراض القهوة وبيده الثانية مفاتيحه نزل الاغراض عند المشب/عيب ياعم عيب!!
ابو صالح اتسعت ابتسامته وهو يناظره وقف/هلا بسطام ياهلا
عزيز امتلى صدره غيظ من هالمنظر
سطام وعينه على فالح عامل الدلال/سنعها يافالح/ناظر ابو صالح وهو يدخل المفاتيح بجيبه واتجه له وسلم عليه/وشلون تشكك بكلمة الشيخ وشلون هاذي بحق ياعم بحق/جلس جنب عزيز/
ابو صالح باحراج/حقكم علي ياولدي لكن انت خابر هالراعي مقوي ماينقدر عليه
سطام زفر بضيقة وهو يعرف اطباعه هالعنيد زين/ابشر اجيبه يستسمح منك مايصير خاطرك الا طيب
ابو صالح/لاااا كلمة الشيخ يتعذر بالمجلس
سطام ميل فمه بعدم رضا عن الموضوع بذات نفسه كيف بيرضى هو
سهم دخل/ابشر مثل ماوعدك الشيخ بيتم ابشر
سطام كشر بوجهه للحظة
ابو صالح اتسعت عيونه
عزيز فز واقف بفرحة/سهم!!/اتجه له/ياهلا والله ومية هلا ومرحبا ياهلا/ضمه بحب/ياهلا تو مانورت الـديــرة ياهلا
بارود ماتقل فرحته عن عزيز سلم بحفاوة على سهم
سهم حط يده من ورا رقبة عزيز وعينه على ابو صالح/الشيخ مايثني كلمته ياابو صالح قالها ابشر وهو عند كلمته ابشر
ابو صالح بنفسه/عزّالله اللي قعدنا بها عوّد وبتعود معه البلاوي من جدّ وجديد
سطام وقف بابتسامة/حياك الله ياابو محسن حياك/مد يده وسلم عليه/
سهم سلم عليه بابتسامة/الله يحييك ويبقيك
سطام/عاد استأذنكم وراي خط
عزيز بابتسامة وبدون لايناظره/درب السلامة/وسحب سهم من يده يجلسه وجلسه جنبه بدون اهتمام لسطام ياخذ علومه/
سطام تنهد وخرج من المجلس واتجه للبيت الكبير الملاصق لمجلس القرية دخل متجه لصالة البيت ابتسم وهو يناظرها قباله جالسة وقبالها دلال القهوة والشاهي والحلا/ياحيّ ذا الشوف ياحيّه
نور عينها بجوالها ابتسمت من سمعت صوته قفلت جوالها ورمته جنبها/حي عيني ياحيه حياك معي فنجال يحبه قلبك
سطام جلس وهو ينزل شماغه/اي بالله ماازين من الفنجال الا صبابته
نور مدته له/سـمّ
سطام اخذه منها/سلمت هاليمين سلمت/ارتشف منه/وين خواتك؟
نور/وحدة بمكانها المعتاد
سطام زفر بضيقة وهو يتناسى هالموضوع ورفع فنجاله يتقهوى/والثانية؟
نور/نايمة كالعادة ماتفوت النوم بالويكند
سطام تنهد/زين احد منا ينام مرتاح/مد يده للتمر قباله اخذ حبة وتركها من سمع صوتها ووقف يسرع بخطواته اتجاهها بابتسامة/ياصباح الخير ياكل صباحاتي الزينة
ام سطام بتكشيرة اعتلت وجهها رفعت يدها وهي تطبع كف على خده الايمن وبحدة/عساك ماتصبح الا على ضيقة قل امين
سطام بلع ريقه يهدي تسارع نبضاته وابتسم/ليه يمه عسى ماشر
ام سطام/واللي يعرفك يعرف الخير انت ماوراك الا الشر
سطام زفر/امريني يمه
ام سطام/لاجّني(ازعجتني)من امس بنبكّر بنبكّر وتاليته اشرقت الشمس وانت حتى ماأحرمت!!
سطام/ابشري الحين أحرم ابشري
ام سطام/البس عباتي والقاك جاهز سمعت
سطام لامي بطرف اصبعه انفه/ابشري على هالخشم ياام سطام
ام سطام/وعوه اقطع اسم ام يقين ام يقين/لفت وطاحت عينها على نور وقفت/وانتي ماغير تبلعين بذا القهوة ماتروين
نور وقفت/امري يمه
ام سطام/جهزي الفطور لجدتك واختك النايمة ذي صحيها وراها امتحان لاترسب السنة ذي بعد ماني بناقصة ارمي وجهي عند كل من هب ودب صحيها لو تكبين فوقها نار جهنم/مشت/
نور تنهدت وتقدمت لسطام اللي معطيها قفاه مدت كفها لكفه ومسكته وشدته/كل شي بأجره وانا اختك كل شي بأجره
سطام تنهد وابتسم ولف لها/ايه ماعادها تأثر تعودنا ولّى؟
نور ضحكت بخفة ورفعت يدها لفمه ودخلت التمرة بفمه/كل كل لاتتمدد علينا هينا وانا مقدر عليك
سطام ضحك وهو يمضغ التمرة يتخيل شكلها تسحبه/عزالله انك مقرودة كان صارت
نور ضربته على كتفه بخفة/بسم الله عليك لاتفاول!!
سطام مشى ونزل النواة ورماها وراه/خل أجهز قبل استقبل شي ثاني
نور رفعت يديها تمسك النواة وارتسم الحزن على وجهها/الله يجبر قلبك وانا اختك الله يجبره
.....
<<بيت الجد طاهر>>
الجدة حمدة بملامح محتدة كبت الحِثال بوجهه/اعقب ياليهودي وش مدخلك بيتي؟
محارب اعتدل بوقفته اتسعت عيونه وهو يناظر بـيّـن
غصنة غرقت عيونها دموع/جـدّة!!!
الجدة حمدة بحدتها/تعالي اكفخيني احسن!!
بـيّـن مسح وجهه بطرف كمّه وبابتسامة/عليم الله ياجدة إنه أحب لقلبي من ما زمزم دامه من يدك
الجدة حمدة ارتفع ضغطها/اعقب ياليهودي الله يشرف ما زمزم عنك حتى زمزم ماينظفك
مُحارب بقهر/جدة!!
بـيّـن أشر له بمعنى اسكت
الجدة حمدة مررت نظرها بين غصنة ومحارب/ماعليكم شرهة ياعيال خلف تصفون وراه عشانه اخوكم ماعليكم ملامة
بـيّـن زفر بابتسامة
الجدة حمدة بغيظها وهي ترفع عكازها بوجهه/علامك لافي يم بيتي هاه علامك؟!
بـيّـن يناظرها بحاجبه الايمن المرتفع من كلامها/بيت جدي!!
الجدة حمدة/تعقب بيتي اطلع برا اطلع
بـيّـن/ابشري/مشى/
غصنة بقهر/والله لأعلم عليك جدي ياجدة
الجدة حمدة/اعقبي والله إني لاأطردك انتي وياه برا اسكتي عني ازين لك اسكتي
بـيّـن خرج برا البيت وتسلق الباب ووقف أعلى الجدار اللي فوق الباب/اقول ياجدة
الجدة حمدة التفتت له بوسع عيونها مصدومة من حركاته اللي مايتركها/صحيح ماتستحي اهب من ولد
مُحارب ابتسم
غصنة زفرت براحة والتفتت لجدتها وتكتفت/وقف عالباب والباب والجدار اللي فوقه من حرّ مال امي مالك حق تمنعينه عنه
الجدة حمدة ناظرتها بقهر منها واتجهت لها/انقلعي عن وجهي لاأذبحك اليوم انقلعي
غصنة جرت وتخبت ورا محارب
بـيّـن ثنى ركبه شبه جالس فوق الجدار/ياجدة ترا
الجدة حمدة قاطعتها/وجدجد يدبي(يمشي)عليك ماني بجدتك ياليهودي
بـيّـن/ياعين اليهودي ابشري
الجدة حمدة/وعمى اي والله قطع ذا اللسان وش طوله مغير تراددني
بـيّـن/استغفر ياجدة مامعي حيلة غيره ذالحين
غصنة خنقتها العبرة
بـيّـن/ترا عنزتك ولّدت وجابت اثنين والعنز جاها شرّاي ابيع ولا لا؟
الجدة حمدة/لاتبيع وثم تقدر تكلمني بالماخوذ ماله داعي شوفتك اللي تكدر الخاطر
بـيّـن/وينه الماخوذ ياام خلف؟
الجدة حمدة دخلت يدها بجيب قميصها/هذا هو/سكتت ماحصلت جوالها/
بـيّـن ابتسم ودخل يده بجيبه وخرج تعليقة بخيط طويل ورماها على مُحارب
محارب مسكها
بـيّـن/علقيه بها ياجدة حتى مايضيع الماخوذ يالله فمان الله/رفع يده فوق راسه يلامس شماغه ونط من الباب للارض/
مُحارب رمى التعليقة عالفرشة ولحق بـيّـن
الجدة حمدة اتسعت عيونها/اهب مابك حيا تطش غرضاني!!
غصنة تكتفت/وش تبين بأغراض اليهودي ياجدة؟
سلام خرجت وهي تزفر بخفة/اخيرا
الجدة حمدة رفعت عكازها/والله لااعقطك(اضربك)بها امسكيها ياسلام
غصنة هربت لبيتهم تدري سلام ماتعصي كلام الجدة
بـيّـن يمشي باتجاه سيارته وهو ينفض ملابسه
محارب وقف جنبه بضيق وهو ينفض اعلى ثوب بـيّـن بيده/علامك وقفت ماتحركت يومها تنثره يمك
بـيّـن ابتسم/خلّها اقلها تهرج معي
محارب زفر بصمت
بـيّـن استسلم وبدا يفصخ ثوبه/وشلون ظاهر؟
مُحارب/نفس دايم اصبر اعطيك من ثيابي
بـيّـن مسكه/مايحتاج رايح يم البيت/التفت يناظر بيت الشعر/وينهم السلق مالهم حسّ؟
محارب/علمي علمك من صحيت ماشفتهم
بـيّـن قطب جبينه بتفكير/يصير خير يصير خير/رمى ثوبه بالحوض وركب سيارته/يالله لااوصيك عالبيت يامحارب
محارب/لاتوصي حريص لاتوصي
بـيّـن حرك سيارته ومشى
.....
،،،الـمـسـتـشـفـى،،،
يـقـيـن جالسة عالكرسي محتضنة كفه بعد ماانتهت من تنظيفه وبابتسامة/البارح سويت مرقوق يطير العقل يبه من لذته مو ناقص الا تذوقه ابشر بأزين للديرة كلها لاقمت بالسلامة لو انه يفتت ظهري تفتيت نذر يبه هاه نذر/ناظرته تأملته بحزن وضيق مرت ست سنين وهو بنفس الحالة يلفه مفرش السرير الابيض وعلى انفه انبوب التنفس وهادي كالعادة يغطي الغرفة صوت الجهاز اللي ركبته الممرضة بعد ماانتهت يـقـيـن من تنظيف ابوها/تدري نور ودها تجي كل يوم لكن تعرف امي وجدتي كيف يعاملونها وهي طيبة بالحيل حتى ماترد ابد يبه/بلعت عبرتها وشدت على يده/يبه مااشتقت للبيت مااشتقت للديرة طيب مااشتقت للمجلس ومشاكل القرية والقرى اللي حولنا تحلها؟/ضحكت بخفة/عاد ابشرك القرى اللي حولنا من دخلت المستشفى صاروا يحبون مشاكلهم بانفسهم ماعاد يجون يمنا شفت يبه من رحت محد احتاج راي الشيخ شفت يبه انك مهم مايبون الا انت ساحبين على عزيز احلى سحبة يبه/ضحكت تنهدت/يبه يالله قوم ماتبي تحضر زواجي انا وعزيز ننتظرك يبه وعدت تزوجنا يالله يبه متى بتقوم تكفى يبه/هلت دموعها وضمت كفه تناظره بشوق له ولصوته وكله/
......
بـيّـن يلف بسيارته الديرة ساند راسه عالمقعدة وراه ومخرج يده برا السيارة بتفكير اتسعت عيونه وحرك بسرعة للمكان وقف من شاف سيارتهم ميل فمه بابتسامة ونزل وهو يترك نعوله عند السيارة يتخطى بهدوء ووقف وراهم بنفس الهدوء وهم معطينه قفاهم وعيونهم على صندقة الحمام
نواف/اهب مااكثرهن
سلمان/ماكبّر جنوبه الا هنّ/كشر بوجهه/بس حرام والله حرام السرقة ترانا كبار
نواف/من قال انا بنسرقهن!!
بـيّـن/أجل؟!!
نواف جفل/بسم الله
سلمان جفل مثله والتفت مسك بطنه من التقت عينه بعين بـيّـن/اااه يابطني
بـيّـن مسكهم الاثنين من قفاهم/يابطوننا كلنا/مشى راجع سيارته وهو يسحبهم/
نواف يرجع بخطواته لورا/مظلومين والله مظلومين يابـيّـن
بـيّـن/الله اكبر!!مظلومين وانتم إتدسسون(متخبين)وتتجسسون على خلق الله/وباستهزاء/ياحرام اي والله ياحرام
سلمان وقف ودف يد بـيّـن عنه بنفس الوقت وبنرفزة/عاد حنا رجال وش له تجرجرنا وراك
بـيّـن اتسعت عيونه وترك نواف
نواف بلع ريقه ومرر نظره بينهم
بـيّـن/من زين الفعول اجركم وراي!!
سلمان/قلنا لك مظلومين
بـيّـن زفر/يالله ماعليه بأمشيها مظلومين وشو له التدسس؟
نواف وسلمان ناظروا بعض واكتفوا بالصمت
بـيّـن تنهد/ويالله مرة ثانية بأسكت ولاني بسائل مير لاقامت الدنيا لاتستفزعون بي سمعتوا/مشى/
نواف لحقه واحتضن ذراعه اليمنى ومشى معه/اقول بـيّـن وش رايك نكشت؟
بـيّـن ميل فمه بابتسامة جانبية
سلمان اسرع بخطواته واحتضن ذراعه اليسرى/تكفى ياولد عمي تكفى قل تم
بـيّـن وقف ومرر نظره بينهم/ياذكر الله على هالوجيه مغسولةٍ بمرق مامن حيا!!/رفع يمينه ودف راس سلمان بطرف اصبعه ثم رفع يساره ودف راس نواف بطرف اصبعه وبنفس الوقت يتكلم/يانعنبوها كشتة معكم تقلّعوا عن وجهي ماني بفاضي لكم وراي شغل
نواف كشر بوجهه/يامااكثر اشغالك ماتخلص
سلمان بزعل/ياخسارة تكفى
بـيّـن/اقول عاد انت واياه والله وبالله وتالله لو
نواف جرى للسيارة قبل يكمل كلامه
سلمان يجري وراه
بـيّـن كتم ضحكته وكمل طريقه للسيارة وقف عندها والتفت 
نواف وقف بالسيارة على مسافة بسيطة منه/اقول نجيك نسمر معك الليلة؟
بـيّـن اسرع بخطواته وهو يرفع يده بيضربه
نواف فحط بالسيارة مبتعد
بـيّـن ضحك بخفة/مرجج الله يصلحكم بس/ركب سيارته وحرك وقف عند البقالة وضرب عالبوري/ياعمّار ولد ياعمّار
عمّار(عامل البقالة)خرج وبيده كيس اغراض وبابتسامة/اهلا مودير
بـيّـن بابتسامة شقت وجهه/الله يرفع قدرك كثر ماترفعني ياعمّار قل امين
ابو صالح خرج من البقالة/ايه امين امين انت ماانت بمدير الا على عمّار واشكاله
بـيّـن ابتسم/بشر ياابو صالح لقيت من يسقي حلالك؟
ابو صالح انقلب وجهه
بـيّـن ضحك/مردك ترجع للمدير/حرك ومشى/
ابو صالح بغبنة/هين ياولد خلف هين
....
(نواف و سلمان ١٨سنة)
....
الجدة حمدة تتقهوى بصمت وعلى وجهها الضيق
الجدة مضاوي ناظرت سلام وباستغراب/وينها غصنة خابرتها ماتفوت قهوة الضحيوية معنا
الجدة حمدة بنرفزة/عساها ماتقهوت ام لسان خليها
الجدة مضاوي ناظرت سلام وهمست لها/علامها شايشة جدتك؟
الجدة حمدة/انشديني انا وشو له تنشدين البزارين
سلام زمت شفايفها ونزلت الترمس من يدها وقامت مبتعدة لبيت عمها
الجدة مضاوي زفرت/وعلامك شايشة ياحمدة
الجدة حمدة/واللي يصتبح بـشـوفـة اليهودي يعيّن خير
الجدة مضاوي/إلا يازين هاليهودي وزين طواريه الله يعزه
الجدة حمدة بعصبية/مضاوي!!
الجدة مضاوي/ادري عنك ذبحتي الولد وثم تراه مسلم على دين محمد ياويلك من ربك يومك تكفرينه!!
الجدة حمدة/الا يستاهل الخوان ماهو على دين محمد!!
الجدة مضاوي تنهدت/انا عجزت عنك وتعبت منك بكيفك خلك تنادينه ياليهودي ثم بعدين تندمي يوم ماينفع الندم
الجدة حمدة/كبيني انا واليهودي عنك وينها سرور؟
الجدة مضاوي/عهدي بها امس عقبه ماشفتها
الجدة سرور دخلت للبيت/ياعرب يااهل البيت
الجدة حمدة/حياك حياك
الجدة سرور جلست ناظرت الجدة مضاوي وبنرفزة/صبي لي قهوة وانتي مغير تراعيني
الجدة مضاوي/عوذا المسلمين يسلمون وينشدون عن الحال وانتي لافية بشرك
الجدة سرور سحبت الترمس وصبت لها قهوة/من حرّ مااوحي
الجدة مضاوي مررت نظرها بينهم/اعوذ بالله من الشيطان/رفعت عباتها وهي تنفث على نفسها/اعوذ بالله منك ياابليس كل وحدة بارك على راسها خويها تف تف علي بسم الله علي
الجدة حمدة/ايه هو اللي عنده رازي يحب يده وجه وقفى ليتهم مثله
الجدة مضاوي/اذكري الله وثم هالتيس اللي تمدحينه ماشفته من سنتين والسنتين اللي قبلها ماجاني غير مرتين
الجدة سرور/مردّه فاكك شره يامال العافية
الجدة حمدة/اي بالله صدقتي
الجدة مضاوي/اقول اسكتي انتي وهي ولااسمع شوي وحدة منكن تونون عند اذني من راسها هه هاذي فعول يديكم امسكن ألسنتكن حتى مايضرب ضغطكن وابتلش بكن انا والضعوف هالعيال
.....
،،،،،الـلـيـل،،،،،
يـقـيـن خرجت من غرفتها ببجامتها وقفت اعتلت وجهها تكشيرة وهي تناظرها
نور بيدها صينية العشا وترمس الشاهي متجهة لها وقفت قبالها
يـقـيـن بعدم رضا/قولي لعوض يوديه له
نور/لو تدري جدتي بتذبحنا حنا الثنتين
ريوف وقفت عندهم مدت يديها مسكت الصينية وبابتسامة/أنا أنا أوديه
نور ابعدت الصينية وبنظرة حادة/لا يـقـيـن توديه
يـقـيـن/يوه يانور ماابي فكيني تكفين
نور مدت الصينية وضربتها بجسم يـقـيـن بخفيف/وديها انتي وفكينا من ذا السالفة اللي ماتخلص
يـقـيـن اخذتها وهي تتافف بصوت واتجهت لغرفتها تلبس عبايتها
نور مدت يدها ومسكت ريوف وسحبتها معها
ريوف مشت معها وهي تسحب يدها تفكها من نور/اتركيني اتركيني
نور تركتها وناظرتها بحدة/روحي ذاكري واتركي الفزعات اللي على قل سنع
ريوف/ماني مذاكرة كيفي مالك شغل انشغلي بنفسك يالعجوز/مشت ودخلت لغرفتها وقفلت الباب بقوة/
نور تنهدت/الله يهديك بس الله يهديك
يـقـيـن وقفت بعبايتها ونقابها وشالها المميز العريض اللي على اعلى راسها وينتهي طوله الى اسفل ركبتها
نور ناظرتها/لاتتاخرين سمعتي
يـقـيـن/يعني وش باسوي معه مثلا بأحط له سمه وارجع
نور/يـقـيـن!!
يـقـيـن مشت
(نور٣٠سنة)،،(سطام٢٥سنة)،،(ريوف١٩سنة)
....
غصنة برا بيت الشعر بعبايتها ونقابها بيدها اليمين كوب موية ويدها اليسار ثانيتها ومثبتة كفها على خصرها وتهز رجلها اليمين بحركة سريعة
مُحارب وقف عندها واخذ الكوب/هاه بشري وش صار؟
غصنة بنرفزة/تراك اشغلتني من اصبحنا الى ماامسينا وانا رايحة راجعة رايحة راجعة
مُحارب رفع يده وضربها بخفة على راسها ومن بين اسنانه/اقصري صوتك به سلمان!!
غصنة حركت يمينها بوجهه تأشر عليه/ترا انا وسلمان مثلك انت وسلام تريّح
مُحارب ناظرها بحدة
غصنة بلعت ريقها ونزلت يدها
مُحارب/اخلصي وش قالت بعد ماضحكت
غصنة/طردتني
مُحارب اتسعت عيونه/وشو!!
غصنة غمزت له/بس تعرف اختك نشبت لها نشبة ماتنساها بحياتها
مُحارب ارتفعت حواجبه/وثم؟
غصنة كشرت بوجهها/ضحكت علي وبعدين شافتني صاملة اللي ماوراه قالت بكرة أعلمك
مُحارب زفر/الله يجيب بكرة على خير الله يجيبه
غصنة بتردد/اقول مُحارب
مُحارب ناظرها/وش
غصنة/ليه ماتعلم أمي أزين مـ
محارب قاطعها بتهديد/والله لو يدري مخلوق بهالسالفة غيرنا يالثلاث ذبحتك سمعتي والا
غصنة/ابشر ابشر
مُحارب مد يده لظهرها ودفها بخفة/يالله البيت يالله
غصنة مشت بحلطمتها/لاحمدًا ولا شكورا الله من الجحود
مُحارب رفع صوته وتكتف وعينه عليها الى ماتوصل البيت/بسرعة اعجلي
غصنة اسرعت/طيب طيب
مُحارب دخل بيت الشعر وناظرهم وميل فمه ثم نطق/الحمدلله والشكر
نواف وسلمان مشغلين شيلة بجوالهم ويرقصون
مُحارب تمدد على فراشه/أمسوا واقفلوه
سلمان قفله على طول/ابشر طال عمرك
نواف يناظره بغيظ/يالرخمة
سلمان تمدد على فراشه/لا صار اللي شغال جوالك نشوف من الرخمة
غصنة مارة من الحوش متجهة لبيتهم منزلة طرحتها على اكتافها التفتت تناظر وراها من سمعت الصوت اتسعت ابتسامتها وجرت له
ضاري(٧سنوات)اللي يماثلها بالشوق يجري اتجاهها بابتسامة/غصيّن
غصنة انحنت وضمته لها ودارت فيه/ياروح روحي انت/وقفت تنزله وتبوسه على خده بنفس الوقت اعتدلت بوقفتها/مع مين جيت؟
ضاري بابتسامته/ماما وخالي
غصنة ميلت فمها/وابوك وينه؟
ضاري/بابا ماشفته اليوم
غصنة هزت راسها/اها/مسحت على شعره بخفة/روح لماما حبيبي انت ساعدها
ضاري/تحتريني؟
غصنة باسته على خده/بكرة ان شاء الله بتشبع من بعض الحين وقت نوم
ضاري وصله صوت أمه اللي تناديه/يالله مع السلامة/جرى/
غصنة لفت عنه واسرعت بخطواته وبنفسها/وجعوه من صوت ماتحترم احد حتى بوقت النوم!!
......
بـيّـن جالس قبال دافوره الصغير برا بيته يجهز عشاه البسيط وطرق(كلبه)يلف حوله زفر/طرق ماتشبع انت توني حاط عشاك اذلف عني خلني اخلص عشاي واتهنى به اذلف
طرق وقف والتفت جهة الظلام وكشر عن انيابه متخذ وضعية الاستعداد للهجوم
بـيّـن احتدت ملامحه وسحب سكين من بين اغراض الطبخ ورفع نفسه مغير وضعية جلوسه الى شبه جالس وعينه عالظلام ينتظر الجاي صاحب الخطوات اللي كل مااقترب وضح صوتها اكثر شد على سكينته باستعداد للدفاع عن نفسه
.
#شقّ_الغَمام