شـقّ الـغَـمـام

..(٢٧)..

..(٢٧)..
سبحان الله وبحمده سبحان الله العظيم
-
<<بيت سطام>>
نور واقفة عند المغسلة تغسل الصحون بهدوء بعدم تصديق للي حصل من شوي وكأن اللي صار أشبه بالحلم بعد ماكان من سايع المستحيلات بعينها ينحل كيف لطف ربي بها وتسخيره لهم بقبلوها ودفاعهم عنهم غرقت عيونها دموع وهي تردد حمد وشكر لله اللي انعم عليها بوجود سند بهالحياة أخ وزوج بعد مايأست من وجود هالنعمة بحياتها تنفست براحة وتفاؤل بعد مرور هالكابوس مبدئيا بسلام ونهايته باذن الله بتكون على نور وسلام/الحمدلله الحمدلله
ام سطام وقفت على باب المطبخ تناظرها/عساك طايرة فرح عقب هالكلمتين اللي قالها يمك
نور التفتت تناظر امها بصمت
ام سطام ضحكت بخفة/ضحك بها عليك وصدقتيه صدق ماانتي ببنتي بنت عيّاش صحيح
نور ابتسمت/يمه دام اعترفتي اني طالعة لابوي معناه ابوي كان طيب معك
ام سطام احتدت نظرتها
نور/الواحد وش يبي من هالدنيا غير الطيب وذكره
ام سطام بحدة/مابقي الا هي عياش طيب!!
نور ناظرتها بصمت
ام سطام/ماعرفت الراحة الا يوم فارقته
نور/القلب يمه القلب ماكان معه ولا له
ام سطام اسرعت بخطواتها وسط اتساع عيونها وضربتها كف/كبر راسك يوم انشد ظهرك ببني طاهر وطال لسانك علي تتهميني يانور هاه تتهميني
نور ناظرتها وبرجفة صوتها/استغفر الله محشومة يمه قصدت عمي منصور
ام سطام تغير وجهها/حتى لو انه عمك وشلون ترمين هالكلام
نور/كلن يدري بحب عمي لك يمه
ام سطام/قدري الكلمة قبل ينطق بها لسانك ولا زواجتك ذي تلحق اللي قبلها/مشت/
نور بنفسها/ليتك يمه تقولين هالكلام لنفسك/تنهدت وبهمس/الله يهديك يمه الله يهديك
............................................................
<<مجلس ابو شاهر>>
سطام جالس قباله بهدوء
ابو شاهر بابتسامة/حياك سطام ياهلا ومرحبا والله اني يوم شفت رقمك فز قلبي من غلاها وشلون نور وامورها عساها بخير/ناظر فنجاله اللي من اخذه منه نزله بالارض ولارفعه ولا ارتشف منه حتى قطرة/تقهوى يارجل
سطام بجدية/ياابو شاهر تنشدني عن نور وشلونها عز الله انها فارقتها الراحة من عرفت ولدك
ابو شاهر بتقطيبة جبينه/خير ياسطام اكرمناكم بالطلاق
سطام بسخرية/وينها هالكرامة وولدك ماقصر باختي طول هالسنين يتهمها بعرضها
ابو شاهر شحب وجهه وبحدة/خاف الله وش هالتهايم ياولد منصور
سطام/ماقلتها عبث ياابو شاهر ولاني من اللي يكذبون وانت خابرني
ابو شاهر ناظره بحدة/واللي تقوله كبير وبالحيل وبلا
سطام قاطعه برفعة صوت/اخطيت يوم حشمت وظنيت انك تقدر الجمالة
ابو شاهر احتدت نظرته
سطام/والصحيح اني اتل ولدك بوسط مجلس ديرتك واعلمه الردى وشلون على عيون جماعته
ابو شاهر بحدة/استح ياسطام
سطام بنفس رفعة صوته/شاهر صور اختي معه وهي ماتحل له وكل يوم يتهددها بعرضها و والله يعقب ويخسى حتى يلمح طرفها والله ماعقلت ولدك ومنعته من رداه اني لاقضيت من توطيه علقته من رقبته على عيون الخلق ورحت بروحي للقسم ولاتتنازلون ياابو شاهر راضي بالقصاص دون عرضي
ابو شاهر ناظره بغبنة/مير كان اللي تقوله صحيح
سطام قاطعه/الردي ردي لو انه يحلف اديان تاصل السما من كثرها واللي اقوله صحيح غصب عنكم جميع
ابو شاهر/احشم عمرك واستح انت في بيتي
سطام/علمه كان وده يتهنى بباقي عمره اللي ما الله مبارك به يجيب جهازه وكل صور اختي اللي معه/وقف/ولا وربي دخلتي الجاية لهالبيت ماتاقف على رد فنجال ان تاقف على راسه/خرج/
............................................................
<<سيارة عسّاف>>
عسّاف يسوق بملامح غيظ وقت عمله اللي المفترض يتقصى ويوصل لخيوط قضيته المكلف بها راح كله ورا هالبين اللي مجنون ومو ناوي يهدي الامور حتى يكمل اموره بسلاسة التفت يناظره للحظة/هيه/رجع عينه عالطريق/حي ولا ميت؟
بـيّـن المتمدد جنبه بمقعد الراكب النازل لاخر درجة ومربوط حزام الامان عليه بملامح كلها تعب مغمض عيونه/لو اني ميت بارد عليك!!
عسّاف/ليتك مت وريحتني
بـيّـن ابتسم/عاد كثر دعاء سلمت هالمرة كود المرة الجاية
عسّاف سكت للحظات
بـيّـن فتح عيونه ورفع يده يناظرها/على وين
عسّاف/رايحين المحافظة دكتورك يقول لازم اشعة والصدق هالدكتور مدري عنه ماارتحت له نروح مستشفى المحافظة افضل
بـيّـن بابتسامة/تبيني أموت وتطارد فيني وسط المستشفيات
عسّاف عبس بوجهه/جدك يقول انك ماانت بهين وانا صابر عليك لخاطر جدك وهالصبر هاذي نهاية حدوده
بـيّـن/هالشايب لاتصدقه ولاتسمع له كلمة
عسّاف قطب جبينه باستغراب/تكذّب جدك!!
بـيّـن/شوفني صدقته ١٦سنة واحتريته والظاهر يبيني اكمل سنين عمري احتريه مير انها بعيدة والله لااخذ حقي
عسّاف/وتاخذ حقك بذبح نفسك وذبح غيرك!!
بـيّـن بغيظ/لانويت ذبح روحي ولا غيري!!
عسّاف/تفصل سلك البنزين والفرامل وتقتحم المكان كل ذا ومانويت اجل وشلون لا نويت!!
بـيّـن صد بوجهه ساكت
عسّاف/اللي سويته غلط وبعدين اذا تسببت بغيرك وش استفدت
بـيّـن صاد/هذا هم سلموا
عسّاف/وانت؟!
بـيّـن سكت
عسّاف/اسمع يابـيّـن انا جيت الى عندك لاتخليني اندم وارميك وراي
بـيّـن سكت يفكر
عسّاف/انت تعرف اشياء كثير وطاهر ماراهن عليك بلا أسباب ودك تضم يدك بيدي ونصير ضد هالسحاب
بـيّـن التفت له يفكر
عسّاف/كان نويت تجي بصفي اترك جنونك عند عتبة الباب مايجي معك
بـيّـن عبس بوجهه/من متى وانا بي جنون!!
عسّاف/بس الموضوع يبي له صبر سحاب وربعها ماجوا بسنة ولا ثنتين
بـيّـن تنهد/عنيت الغمام؟!اي بالله ودي أشقّ الغمام من مبطي مير عجزت عنها لحالي
عسّاف/هذا انا واللي وراي معك ودك يابـيّـن ولا؟!
............................................................
.
ظاهر جالس داخل سيارته قبال هالبيت اللي انتهت به جواب أسئلته لهالمكان متكتف ينتظر وصوله قطب جواله من ناظر الرقم الغريب يراسله رسايل متتالية بأوامر(افتح الحظر..فيه موضوع ضروري نحلّه سوا..شف الموضوع وبعده رجع الحظر بكيفك)قطب جبينه بتفكير من عرف صاحبة الرسايل هل يرد او يتركها بنفس وضعها تنهد وصل لموضوع نور الخطير ماعاد تفرق معه رسالة منها دخل على رقمها وفتح الحظر
وداد المتربعة فوق سريرها ساندكةظهرها على السرير وراها تقضم اظافر يمينها بلا شعور عينها على جوالها راسلة رسايلها له تنتظره يرفع عنها الحظر اتسعت عيونها واعتدلت بجلستها من ناظرت علامة الصح صارت باللون الازرق
ظاهر قطب جبينه من فتح الصورة وكانت عبارة عن صورة لسونار قرأ الرسالة تحتها(أنا حامل)رد عليها بسرعة بدون اي انتظار/ويعني!!
وداد اتسعت عيونها بصدمة من رده توقعت يطير فرح وهو اللي كان يتمنى عيال غير ضاري وهي الرافضة كيف يمر الخبر عليه ويستقبله بكل هالبرود اتصلت عليه مباشرة بدون تردد
ظاهر فتح الخط بصمت
وداد بنرفزة/وش اللي يعني هاه
ظاهر/حاله من حال ضاري ياهلا ومرحبا به
وداد بغبنة منه/هو كل شي على هواك!!
ظاهر/اي بالله على هواي ماهم بعيالي
وداد بقهرها/والله لاأحرمك منها والله
ظاهر فز قلبه من عرف انها بنت وبتهديد/انتبهي عليها وبالحيل والله لو يصيبها شي بيني وبينك محاكم والشاهد الله/قفل بوجهها/
وداد صرخت باعلى صوتها من كثر قهرها/ظاااهر ظااااهر 
نوار دخلت مفزوعة وقفت عندها/بسم الله علامك بنت انتبهي لايصيبك شي
وداد بقهرها/يهددني يهددني انا والله لاذوقك من نفس اللي ذوقتني ياظاهر والله
ظاهر رمى الجوال عالكرسي جنبه بملامح نفور منها عتبه الوحيد انه ماعرف حقيقتها وانتهى به الحال بضحيتين ضاري والمسكينة اللي جاية بالطريق قطب جبينه من ناظر السيارة توقف عند البيت
شاهر وقف بسيارته قبال بيته بوجهه ينطق سواد تخلص من  ضغط سحاب وطاح تحت سهم الاي واضح ماهو بناويها سلامة نزل من سيارته يجر خطواته فتح بابه وانصدم من حسّ بنفسه يندفع لداخل بيته بقوة حاول يلتفت ويناظر وحتى يقاومه ويدافع عن نفسه لكن بدون فايدة قدام هالقوة اللي داهمته فجأة وبوضع مايسمح له يدافع عن نفسه
ظاهر عرقله بطرف رجله اليمنى
شاهر طاح عالارض
ظاهر جلس فوقه ومن بين اسنانه/شاهر سعد
شاهر الملاصق للارض يحاول يتحرك/فكني خلني اشوفك والله ان تعد نجوم السما بعز القايلة
ظاهر بغبنة/والله انت اللي بتعدّها وانا ولد ابوي
شاهر/من انت كان فيك خير فكني وعلمني من انت
ظاهر ضغط عليه اكثر/لا دريت من انا أتمنى الموت ولا انك عرفت ياشاهر
............................................................
<<الـمـسـتـشـفـى>>
طاهر وقف قبال عسّاف بوسط انفاسه/هاه ياعسّاف بشر
عساف/طيب الحمدلله قلت لكم من اول
طاهر/وينه فيه؟
عسّاف/داخل بس يقول فيه نوع اشعة ماهو بعندهم مافهمته الصراحة
طاهر/كثر خيرك اتعبناك معنا 
عساف ماصدق اخيرا يتحرر من هالواجب اللي انفرض عليه بدون موافقته وانجبر ينفذه ابتسم من اعماق قلبه ومد يده مصافح طاهر بحرارة/الله يسلمك مامن تعب
طاهر يناظر كثر الفرحة بعيونه باستغراب
عساف/تكفى عقّل مجنونكم اللي داخل
طاهر باستغراب/كيف!!
عسّاف بهروب من سواله وتجنب لتاخيره الزايد/اسأله وهو بيجاوبك/مشى/فمان الله/اسرع بخطواته/مع السلامة
محارب يناظره باستغراب/علامه ياجد هج تقل مقروص
طاهر بابتسامة/كبّه رجال مشغول
عسّاف/الله والشغل تراه راعي حلال!!
طاهر ناظره بحدة/الله اكبر انتفخ ريشك يوم صرت تدرس نسيت وين مراعتك اول
محارب عبس بوجهه/ياجد تخبر ماعنيت هاللون!!
طاهر/اص اص بس لااجلدك على عيون حرمتك وحرمة اخوك اص ثم علامها حرمتك جت معنا
محارب سكت وشلون يقول لجده انها رفضت تتركه بحالة القلق والخوف اللي ارتسمت عليه من عرف بخير حادث بـيّـن/مابغت تكب مرة بـيّـن بهالحالة لحالها
طاهر التفت يناظر يقين
يقين واقفة بثبات وهدوء
طاهر/مير ماشاء الله الف من ذكره مامن داعي
يقين محتضنة ذراع ولاء بثبات صادة بوجهها عن طاهر بشي خالط قلبها من الضيق من وجوده بعد ذيك الليلة بعد ماضمها تحت جناحه ترك حمدة تهينها وسطهم بدون يوقفها عند حدها لكن بهاللحظة غلب خوفها وقلقها وغضبها مشاعر ضيقها من وجوده كل تفكيرها محصور بسلامته بهاللحظة تركت يد ولاء وتقدمت لعند طاهر
محارب ابتعد من ناظرها تقترب
طاهر التفت يناظرها
يقين/كيف بـيّـن ذالحين
طاهر/الرجل الفازع به يقول ماعليه طيب نحتري الدكاترة وش يقولون
يقين ابتعدت عنه راجعة لعند ولاء بانتظار ثقيل على قلبها بكره لكل المستشفيات ومابداخلها
.
............................................................
     يـوم جـديـد
............................................................
<<بيت طاهر>>
سلمان وقف ورا سيارة ظاهر الملاصقة لسور البيت من الخارج انحنى شبه راكع يناظر نور السيارة الخلفي باستغراب
نواف وقف عنده/علامك
سلمان قطب جبينه/ولد خابرن ظاهر بالعلّة عيّن هالاسطبات لسيارته علامها مقلّعة!!
نواف انحنى يناظر السيارة معه التفت يناظره/ولد ماهي مقلعة ذي مكسرة عنوة
ظاهر وقف عندهم/هيه انت وياه
//سلمان و نواف فزوا//
نواف اعتدل بوقفته/السلام يامسلم السلام اول روعتنا
ظاهر عبس بوجهه/وش مسوين حتى ترتاعون هاه!!
سلمان/ظاهر علامها اسطباتك مكسرة !!
ظاهر استند بطرف كوعه على شنطة السيارة/والله ابد مازانن لعيوني كسرتهن
سلمان يناظره باستغراب
نواف/مابغيت تلقاهن وغاليات ليه كسرتهن ابوك يالبطران!!
ظاهر/خلصتوا؟
سلمان مسك نواف من يده يسحبه معه مبتعد بخطواته/لا سلمت سلمت فمان الله
ظاهر ركب السيارة وحرك
نواف سحب يده من سلمان/علامك تجرني تقل عنز
سلمان مشى/الحمدلله خابر روحك
نواف جرى وراه/وشو
سلمان التف مبتعد عنه ومسكه من رقبته يخنقه
نواف يقاومه
سلمان/ياحمار القايلة ماتفطنت؟
نواف وقف مقاومته/وش؟
سلمان خفف ضغطه على رقبة نواف بتردد همس/الشنطة بها بلا
نواف دفه/كب عنك الوسوسة
سلمان مشى/انا مدري عن شي/التفت يناظره ويجر خطواته لورا وبتأكيد/احنا ماندري عن شي سمعت
ظاهر وقف بسيارته عند بيت سطام نزل يهمهم مبسوط فتح شنطة السيارة وناظره بابتسامة/لذالحين حي زين
شاهر المربوط باحكام مغطى فمه ومرمي داخل الشنطة غرقان بعرقه يكافح يلقط انفاسه من فتحات الاسطبات عبس بملامحه بانزعاج من نور الشمس اللي سطع فجأة بعد الظلام الدامس بهالشنطة
ظاهر بابتسامة اشر على بيت سطام/هاه تعرف البيت
شاهر قطب جبينه للحظة احتدت ملامحه من عرف البيت همهم بدون فايدة من اللاصق المغطي فمه
ظاهر حك اذنه ببرود/حسب خبرتي من اللي عشته بالعسكرية/ناظر ساعته/اممم احتمالك الباقي مايتعدى ساعتين/ناظره بابتسامة شر/مير انا بأتحداك واحتريك الى بكرة اشوف انت تقوى تبقى حي ولا تموت
شاهر اتسعت عيونه صرخ صرخة مكتومة بدون فايدة تحرك بمحاولة يفك نفسه
ظاهر/نتقابل بكرة/قفل الشنطة/ابتسم من ناظر نور تخرج من بيت سطام تنهد براحة ورضا/ياهلا ومرحبا بنور ظاهر ياهلا
............................................................
<<المستشفى>>
بـيّـن الواقف داخل دورة المياه يبدل ملابس المستشفى بملابسه اللي وصلها له محارب وقف يناظر ملامحه وشلون تغيرت كثير بعد ماتجرح والاي ماانجرح تلون من اثر الكدمات تنهد بضيق وقلق من صمتها على غير العادة رافقت معه بالطوارئ واصرت تكون هي بجنبه ولاتتركه لحظة كان اخر ماسمع منها(الحمدلله عالسلامة وجعله اجر)ومن بعدها مانطقت بحرف تجاهه فتح الباب واتجه لسريره يناظرها
يقين جالسة بعبايتها ونقابها على طرف السرير وقفت من ناظرته واسرعت بخطواتها له
بـيّـن التزم الصمت ينتظرها تبادر
يقين مدت يديها لذراعه حتى تسنده
بـيّـن سحب ذراعه منها بزعل/الحمدلله طيب مابي خلاف
يقين امتثلت لطلبه بدون جدال ومشت جنبه
بـيّـن جلس عالسرير وناظرها بهدوء
يقين بادلته النظرات بصمت
بـيّـن احتدت نظراته وبنرفزة/علامك علي!!
يقين جلست عالكرسي ببرود/مابي شي
بـيّـن ناظرها بصمت
يقين بادلته النظرات
بـيّـن بنرفزة/وثمّ؟
يقين/احتري تقول لي اخطيت 
بـيّـن عبس بوجهه/هاه!!
يقين/المعذرة كان اوجعتك بدون علم
بـيّـن ميل فمه بتفكير
يقين ناظرته بنظرات لوم
بـيّـن/اصبري علي اتفطن وش اخطيت به
يقين ارتفعت حواجبها وبسخرية/صحيح!!
بـيّـن بتفكير/ماأخبرني اخطيت ابد!!
يقين /والله خابرتك يابـيّـن/ضربت كف يمينها بكف يسارها مصدرة صوت/مثل مااني خابرة خبز يديني
بـيّـن عقد حواجبه/وش مسوي علميني بلكن اعرف واتفطن
يقين وقفت وتقدمت له جلست جنبه عالسرير تكتفت وناظرته/الله اكبر يالحادث اللي ماصار الا بمحلس بني سمّار
بـيّـن ناظرها بهدوء
يقين بنرفزة/ايه كلنا نبي نوقّع بني سمّار يابـيّـن مثلك مير ماهو نرمي انفسنا بهاللون لو مااخبرك صاحي كان قلت مجنون
بـيّـن اكتسى الحزن ملامحه بعد ماطرده بذيك اللحظة اللي قرر فيها ينتقم لطرق وياخذ حقه زفر بضيق وقهر على سواة عزيز الخسيس برفيق دربه وأنيس وحدته طول هالسنين صد بوجهه يتجنب نظراتها وبرجفة صوته/وشلون ماانجن عقب اللي شفته يايقين
يقين الفاهمة لسبب تصرفه وجنونه بذيك اللحظة ماكان الا مقتل طرق الحيوان المسكين اللي ماله اي ذنب بهالمشاكل بين بني ادم عديمين الرحمة قساة القلوب كيف تجرد عزيز من الرحمة وذبحه بمنتهى السهولة حتى يحرق قلب صاحبه  رفرت بسخرية من ذكرت عزيز وفعايله باع عمه واختها بلا ضمير وش يمنعه عن حيوان لاحول ولا قوة له وش تقول وكيف تواسيه بالنسبة لها يكون مجرد كلب لعبت معه كم يوم لكن بالنسبة لبين شي كبير عاشره وعاش معه سنين بملامح حزن احتلتها من حزنه مدت يدها لوجهه ولفته لها مجبرته يناظرها
بـيّـن ناظرها بكسرة نفس ارتسمت على ملامحه بوضوح
يقين احتضنت وجهه بين كفوفها بصمت
بـيّـن برجفة صوته/ذبحتهم لطرق طعنة بقلبي يايقين احرقوني هالمرة احرقوا قلبي بالحيل تمنيت اموت عقب ماشفته معلق حتى طرق عجزت اردهم عنه ياقهري يايقين ياقهر قلبي ووجعه
يقين بغصة توسطت حلقها من وصلها كثر وجعه ولامس قلبها سحبته من يدها وضمته لحضنها بكل مافيها/بسم الله عليك وعلى روحك وقلبك 
بـيّـن دفن وجهه اكثر يقاوم انفجار دموعه من كثر القهر وصبره عليهم
يقين برجفة صوتها من كثر عبرتها/هالمرة انا وانت بناخذ حقك وحقي لاعاد ترمي نفسك وتفجعني فيك يابـيّـن لاراحوا الكل انا فيه انا ببيتنا احتريك تكفى لاعاد تسويها طلبتك تكفى
بـيّـن دفن وجهه بكتفها بحزنه وبرجفة صوته/قلبي يوجعني يايقين يوجعني
يقين مسحت على ظهره/بسم الله عليك بسم الله/بدت تقرأ آيات القران بمحاولة عسى يهدا هالقهر اللي محتله لاقصاه بقلة حيلة منها/
...........................................................
.
وداد الحافظة لنظام اهل البيت اللي عاشرتهم سنين تدري بخلو الحوش بهاللحظة من حمدة وقهوتها وحتى منيرة وبناتها وشغلهم بالمطبخ حافظة وعارفة لاماكن مفاتيح ابواب هالبيوت من كثر ثقتهم ببعض مستغلة هالمعرفة فاتحة باب بيت طاهر الرئيسي اللي تعرف مكان مفتاحه اسفل احد الاحجار يمين الباب دخلت متجهة لذاك البيت اللي عاشت به سنين بحلوها ومرها متجهة حتى تعكر صفو حياته لو للحظات هي راضية بكل مردود تجاهها مقابل هاللحظات السعيدة لقلبها وقفت قبال البيت وضربت عالباب بانتظار من احتلت مكانها وعالمها بدون تعب او مجهود
نور واقفة بمنتصف الصالة تنزل عبايتها بعد مانزلها ظاهر عند البيت بابتسامة ورضا عن كل امور حياتها بهاللحظة اسرعت بخطواتها من سمعت صوت الباب/طيب طيب/فتحت الباب بابتسامة/هلا ومرحبا حيـ/قطبت جبينها باستغراب من هالسواد قدامها/ـاك الله
وداد تكتفت وناظرتها من فوق لتحت زفرت بسخرية/ايه ياظاهر بعد وداد وطيب ايامها ترزق بهالاشكال عجيب
نور احتدت نظرتها من سمعت هالتعريف المليء سخرية/الحمدلله اللي منّ عليه برزق وخير افضل مما كان عليه يوم اخذ حفيدة سحاب
وداد احتدت نظرتها من ردها دفت الباب حتى تدخل
نور ردت الباب تمنعها/ماسمحت لك تدخلين بيتي!!
وداد برفعة حاجب/بيتك!!/ضحكت/عشنا وشفنا والله!!
نور/ايه بتعيشين وتشوفين حبيبتي دامني قبالك
وداد بحدة/ابعدي ابي اخذ ولدي
نور/لاسمح لك ابوه بيجيبه لك
وداد بغيظها دفت الباب بكل قوتها
نور تراجعت بصدمة من دفتها وناظرتها بوسع عيونها من وقاحتها وبحدة/اطلعي برا
وداد مررت نظرها بالبيت بذهول ثم انفجرت تضحك
نور قطبت جبينها باستغراب من ضحكها
وداد التفتت تناظرها بابتسامة/الصحيح كنت مستكثرة فضلتي عليك مير يوم شفت حتى اثاثي ماتنازل وغيّره عرفت وش الفرق بين قدري وقدرك
نور انخطف وجهها من كلام وداد
وداد بابتسامة شماتة غمزت لها/اقول لايكون حتى غرفة نومي ماتغيرت/بضحكة/يمه لايكون عطري اللي طاح ورا  الكومدينة لذالحين موجود
نور رجف قلبها من كلامها
وداد ناظرت صمتها وذهولها تنهدت بابتسامة/ايه ياحفيدة سحاب بالعافية عليك فضلتي بكافة انواعها/انفجرت تضحك ولفت عنها مبتعدة/
نور اسرعت بخطواتها للكومدينات حول السرير سحبت الاولى زفرت براحة من ماحصلت لها اثر اتجهت للثانية وسحبتها بردت عظامها من ناظرت عطرها فعلا موجود مثل ماقلت جلست تغالب دموعها من تسلل لقلبها شي من شعور الخيانة صبّرت نفسها/شراك يانور شراك وش لك بهرج الحريم وش عليك/ماتحملت وانفجرت تبكي تحس بجرح اجتاح قلبها من شعور النقص بهاللحظة/
............................................................
<<مجلس الديرة>>
سهم جالس متوسط صدر المجلس بكل ثقة/حي الله قومي حي الله بني سمّار ياحيهم
ابو عايد/الله يسلمك ياسهم مير دام الشيخ ماهو بفيه ناد يمّنا سحاب مثل ماعلمناك
سحاب ورا الباب باستغراب من طلبهم بمقابلتها دون علم عزيز/ياهلا ومرحبا ببني سمّار حي عزي وذكري وسط العرب ياحيهم
ابو عايد/الله يسلمك ياسحاب
سحاب/علمني سهم البارح تبون بعلم خاص دون علم الشيخ امروني وابشروا به كان اقدر عليه ابشروا وانا سحاب ابشووا ياقومي
ابو عايد شد على قبضته وباستجماع لشجاعته/ياسحاب القوم كل ابوهم مايبون عزيز شيخٍ علينا،بني سمّار مايبون هالشيخ شيخٍ عليهم
#شقّ_الغَمام