شـقّ الـغَـمـام

(٤٥)

..(٤٥)..
استغفر الله العظيم من كل ذنب عظيم..
-
............................................................
<<بيت عزيز>>
عزيز واقف بوسط غرفته وسط انفاسه السريعك يحوس بدولابه وشنطته فوق السرير سحب الدرج الداهلي بالدولاب ورفع قاعدته خرج جوازه وصور طبق الاصل من اثباتاته واخذ باقي المبلغ المالي اللي من المرة اللي فاتت فتح الشنطة الكتف ودخل اغراضه فيها لبسين واثباتات ومبلغ وخنجره قفلها وناظر الشوال(قطعة تشبه الفروة بدون فتحات للاكمام يثبتها على راسه ويلتف بها)المرمي اعلى دولابه سحب الشوال وثبت الشنطة على كتفه  والتف بالشوال مغطي نفسه متلثم به 
............................................................
.
رازي وقف عند بيته بتعب فظيع يجتاحه هاليومين اللي راحت مرت عليه بثقل مابين القسم والمستشفى بعدم راحة والحين مسكته للخط لخاطر يوصل عالوقت عشان العملية المنتظرة ناظر ساعته وتنهد/زين معي وقت يمدي انام شوي
غيمة فتحت الباب/الحمدلله عالسلامة
رازي/الله يسلمك
غيمة سحبت الشنطة الصغيرة من ورا/انا باخذ الشنطة انت رح ارتاح وراك شغل شوي
رازي رفع يديه وتمدد/اااه الله يعين بس
غيمة نزلت/مو تنام هنيا انزل
رازي هز راسه بايه وسط تمدده
غيمة مشت للبيت
رازي تقدم لقدام يناظر الجوال المثبت عالطبلون قدامه واللي اعتلى رنينه السيارة اعتدل بسرعة من ناظر اسمه وبشك من اتصاله/نعم
بـيّـن بملامحه المحتدة/وينك؟ تعال لي بسرعة
رازي شغل السيارة بابتسامة هالاتصال اول اتصال يوصله من بـيّـن بعد القطاعة/ابشر مير انت وينك؟
بـيّـن نزل نظره على جرحه رفع يمينه وثبتها عليه تنهد بألم وصل لمسامع رازي
رازي حرك بسرعة جنونية/بـيّـن انت طيب
بـيّـن بانفاسه الثقيلة بوجع/عند بيت الغمة لاتبطي علي
رازي /ابشر ابشر
...........................................................
<<مجلس الشعر>>
نواف يناظر طاهر بخيبة/ماعينت شي ياجد
طاهر يتقهوى/ماعليه وانا جدك سهالات ماعليه/مد الفنجال/
سلمان الجالس قباله مد يده للفنجال واخذه وصب له قهوة
نواف دخل يده بجيبه بضيق وخرج اسوارة/كل اللي عينته ورقة مستشفى عن البيت كيلو مير مااخبر عندنا احد تعبان
سلمان اتسعت عيونه
طاهر/طشها وش تبي بالمقمة
سلمان فز وسحب الاسورة من يدين نواف بقوة وسحبها يقرأ الاسم ارتسمت ابتسامة على وجهه/نواف ياثور
نواف بغيظ/لاتغلط عاد
سلمان قرب منه ومسك راسه بين يديه وقبّله بابتسامة/الله يخلي لنا ذا الراس الافدغ قل امين
...........................................................
<<طوارئ المستشفى>>
رازي واقف عنده يناظره متكتف
بـيّـن المتمدد على جنبه الايمن بلبس المستشفى بيده مغذي عبارة عن مضاد يحمي من الالتهاب/قل وش عندك
رازي/ابد سلامتك
بـيّـن/جرحني سيم الشبك
رازي ضحك/كلنا ندري انه كذب
بـيّـن مارد
رازي/حتى الدكتور تغاضى لانه شاف الخوف بعيونك لاينكشف من سواها
بـيّـن/وبعدين لا دريت وش بتسوي
رازي المتوقع لصاحب الفعل رفع اكتافه/مالي شغل
بـيّـن/وذا الصحيح
عسّاف وقف عندهم بانفاسه السريعة بخوف/وش فيه وش الاي صار
بـيّـن جلس/ماصار الا كل خير
عساف ناظره/وين الخير وذا حالك
بـيّـن ناظر خوفه وابتسم/ياابن الحلال سيم جرحني وهه اخذ المضاد وطالع
رازي رفع يده/كنت معه
بـيّـن التفت يناظره
رازي/نصحته ونصحته مير تخبره مايدانيني ولا يداني مني كلمة
بـيّـن ناظر عساف/على الوعد؟
عساف بحدة/وانت كذا؟!
بـيّـن عقد حواجبه/ليه علامي!!
عساف سكت
رازي/عساف خير البر عاجله خلنا نقضي امورنا يسد تأخيرنا الايام اللي مضت
عساف تنهد والتفت حولهم قفل الستارة/لا طلعنا اسلمكم العهدة وبعدها
بـيّـن وقف مقاطعه/يالله رازي
عساف/هيه انتظر باقي شوي على محلولك
بـيّـن/مابي صبر/سحب حامل المغذي معه ومشى باتجاه الممرضة/يالله يالله مشينا بس
............................................................
<<بيت سطام>>
ام سطام دخلت للبيت بهدوء
سطام دخل بملامح كلها قهر وغبنة من يقين
سلام دخلت وراهم كشفت عن وجهها ونزلت طرحتها بدموع منسابة من اللي حصل وكيف تبلغ اهلها وكيف تتطمن على بـيّـن
ام سطام التفتت تناظرها باستغراب من بكاها
سطام ناظرها/سلام لاتشيلين هم اكيد انه بخير بـيّـن واعرفه ماعليه خلاف اصبري انا بأتطمن عليه واعلم اهلك
سلام ببحة صوتها/ان شاء الله/مشت لغرفتهم ودخلتها/
سطام جر خطواته باتجاه غرفة ريوف
ام سطام عينها على سلام حتى دخلت/سطام
سطام التفت باستغراب/نعم
ام سطام تقدمت له/تحرص على بيتك كان ودك يعمر
سطام عقد حواجبه باستغراب/كيف
ام سطام وقفت قبالها/مرتك تسرح وتمرح على كيفها وانت لاهي
سطام يناظرها باستغراب
ام سطام/مافز قلبك وهي تصيح ذا الصياح كل ابوه على من!!على ولد عمها حك اذنك ياجحا
سطام ارتفع حاجبه من اتهمها/ولد عمها ربت معه اميد بتخاف عليه مثل اخوها
ام سطام ضحكت/ماينخاف غير عليك والله يالضعيف يوك عليك ياسطام المرة اليوم تكلمه وتواعده وانت نايم ماتدري عن شي
سطام/يمه بـيّـن زوج يقين
ام سطام/اول زوجها ذالحين الباب مفتوح
سطام بنرفزة/يمه اتركي سلام بحالها دام ماتعرضتك تكلم اللي تكلمه بكيفها/مشى لغرفتهم بخطوات سريعة/
ام سطام تناظره بقهر/لاطاح الفاس بالراس لاتجيني تصايح ياسطام سمعت
سطام دخل لغرفتهم وقفل الباب بقوة
سلام التفتت تنتظره باستغراب/علامك
سطام ناظرها/سلام كلمتي بـيّـن اليوم
سلام تغير وجهها للحظة/ايه كلمته ليه ممنوع
سطام/اي شي تبيه اطلبيه مني ياسلام
سلام/ومن اطرا اني ابي منه شي!!
سطام/انا ادري انه مثله مثل سلمان عندك مير لاعاد تكلمينه تراني ماارضى
سلام/سطام بـيّـن ماعمره كملني حتى قبل نتزوج وحتى رسايله كانت كلها يطلب خواته اللي ماردوا عليه
سطام/بس اتصل اليوم!!
سلام/صحيح اتصل مير تظن اتصاله هالمرة اللي ماسواه من قبل كان بس لاجل يثير المشاكل اكيد كان لسبب وضروري بعد
سطام ناظرها بانتظار بقية الكلام
سلام/اعذرني سطام السبب عائلي بالحيل مااقدر اقوله
سطام تنهد/زين هلى راختك مير لا عاد تكلمين اهلك عند امي ياسلام
سلام عقدت حواجبها باستغراب
سطام/سمعتيني وياليت لاعاد تكلمينه ابد
............................................................
.
<<باحد الاودية الخالية>>
رازي واقف بسيارته بالمكان المعهود اللي يستلم فيه البضاعة
بـيّـن الجالس وراه يهز رجله بقلق من انسحابه
رازي الميت نوم تثاوب/ماعليك بيجي ذي فيها مبلغ وقدره
بـيّـن ناظره/مير تحرص لاتزل بالهرج
رازي ناظر السيارة المتجهة لهم وعينها عليها/تمدد مثل دايم
بـيّـن/مير
رازي بضيق اخلاق من قلة نومه/ومرّ للعدو تمدد وفكنا
بـيّـن التزم الصمت وسند ظهره عالمقعدة وراه جالس
شاهر وقف بالسيارة قباله وكبس بالنور لرازي
رازي نزل مشى كم خطوة ووقف
شاهر نزل من سيارته وبيده شنطة البضاعة
رازي مد شنطة المبلغ له
شاهر اخذ المبلغ وسلمه شنطة البضاعة وبابتسامة/عالبركة
رازي بابتسامة/يبارك بعمرك
شاهر فز برعب من اعتلت اصوات الدوريات المكان جرى للسيارة وسط صراخه بتهديد/هين يالخسيس هين
رازي جرى وراه
شاهر ركب سيارته وبيقفل بابه ناظر رازي القريب منه فتح الباب بكل قوته ضرب بطرفه وجه رازي
رازي انحنى عالارض وغطى وجهه بيديه بألم
شاهر قفل وسط تشغيله للسيارة
بـيّـن اللي نط مكان السواق من لمحه يهرب شغل السيارة وحركها تجاهه بسرعة وصدمه 
//اجتمعت الدوريات حولهم مغطية المكان//
............................................................
.
بـيّـن يسوق بابتسامة باتجاه الديرة بعد وصولهم لبدايات الفرج ناظر رازي بالمراية
رازي بكدمة باللون الموف حول انفه متمدد على ظهره ورا نايم
بـيّـن عقد حواجبه من ناظر اللي يأشر على طرف الطريق محتاج لتوصيلة عقد حواجبه بشك/هيه رازي
رازي مارد
بـيّـن ناظر الواقف بشك/رازي اوقف له ولّا؟
رازي نايم
بـيّـن لف السيارة لجهته/نصفي الامور مرة وحدة/وقف وفتح القزاز/ياهلا ومرحبا/انحنى فاتح الباب/حياك
ركب للسيارة متلثم بشواله اللي يغطيه لحد ركبه بصمت
بـيّـن/من وين ياوجه الخير
عزيز بصوت منخفض/ماني من هالديار
بـيّـن بابتسامة/حياك الله بيننا مير تحرص به واحد خسيس امعط عاث بالديرة لذالحين يدورونه
عزيز دخل يديه تحت الشوال فاتح شنطته بخفة
بـيّـن التفت له/هاه ياعزيز ودك اوديك مجلس الشيخ ولا الشرطة
عزيز احتدت نظرته وكشف الشوال عن وجهه
.
بالجهة المقابلة من نفس الطريق يسوق سيارته وسط ازعاج الصغار وصراخهم ابتسم ناظر المراية يناظر انعكاسها/ياشينك لاخنفرتي ياحلايا يوه ياشينك شيناه اضحكي يابنت خلي الضروس تطلع وينور وجهك
عباير ببطنها البارزة بوضوح ضحكت/من مبطي شانت توك ترعي الشين
حلايا(١١سنة)بعباية وطرحة على اكتافها منفسة/والله حاطيني وسط زريبة عيال وتبوني اضحك!!منين مالديت وحولي ولد ذابت كبدي تعبت خلاص
بتال ضحك/افا ذول كلهم محزمك
حلايا نطقت معه بتقليد/بالايام الصعيبة
بتال ضحك على طريقة تقليدها/تربية جسار الخايس
حلايا/اول تمشي علي خلاص طلعوا مع خشمي العيال/ناظرت عباير/تكفين عباير تكفين قولي بنت ماهو بولد
بتال بابتسامة/ولد
عباير ناظرته بغيظ وشدت على يده بلوم
حلايا انفجرت تبكي/ليه طيب ليه وش يضرك انتي وامي تجيبون بنات وشو انا تعبت
غازي(٧سنوات ولد بتال)وقف جنبها بضيق/حلايا لاتصيحين
بتال(٦سنوات ولد جسار)واقف عالمقعدة يناظرها/لاتصيحين حلّوي بكرة امي تجيب لك بنت لاتصيحين
فيصل(٥سنوات ولد بتال)واقف ومتكي على درج السيارة بين امه وابوه ضرب ابوه
بتال اتسعت عيونه/ولد!!
عباير/احسن تستاهل
فيصل ناظرها/هاه حلايا ضربته
عادل(٤سنوات ولد جسار)انحنى متكي على رجولها مد يده يمسح دموعها يناظرها/حلاص حيايا حلاص
بتال بضحكة/ياحيايا خلاص كلهم قاموا لخاطرك خلاص وبعدين وردة وسط الزريبة مين قدك بالله قولي لي
حلايا بدموعها/وليه ماني وردة وسط الورود وش يضر لو حولي بنات
عباير/بنت حلايا بنت
حلايا نطت واقفة ودخلت عندهم/عليك الله يابعرة صدق
بتال ضحك/صدق ومحد يسميها غيرك
عباير التفتت له/ماشاء الله والله
حلايا/لاتحاولين خلاص من الحين ترا اسمها ورد
بتال/ياعيني بدا مشروع تحويل الزريبة لبستان عند حلايا
عباير ابتسمت وناظرته/تخلي امها تكمله انا ماعندي ورد خلصنا
بتال رفع صوت الراديو/وشو مااسمع
عباير رفعت صوتها/سمعت بس خل عنك
بتال عقد حواجبه يناظر السيارة اللي ققبالهم تحوس بالطريق وابتعد عن الاسقلت ومشى عالطريق الترابي وهدا سرعته ناظرها حتى مرت من جنبه ولف وراها يلحقها
.
عزيز مد يساره بكل قوته لراس بين وضربه بالقزاز جنبه
بـيّـن ترك الدريكسون للحظة من فجأته بضربة عزيز وتكسر القزاز متسبب بجرح براسه ثم شد عالدريكسون بتثبيت للسيارة اللي بدت تحوس عالطريق بدون سيطرة منه 
عزيز بملامحه المحتدة رفع الشوال كله على اكتافه ورفع نفسه شبه جالس عالمقعدة فتح خنجره وسدده لبـيّـن
رازي فز ماد يده معترض طريق الخنجر وانغرز بيده
عزيز امتلى غبنة من رازي سحب الخنجر من يد رازي بقهر ودف يده مبعدها وسدد الخنجر من جديد كل مطلبه بهاللحظات موت بـيّـن او عالاقل يتسبب فيه بعاهة ترضي خاطره وتطيب قلبه
بـيّـن مشغول بالسيارة يبي يسيطر عليها باي طريقة
رازي وقف واعترض الخنجر بنفس اليد للمرة الثانية
عزيز احتدت نظرته وسحب خنجره ووجهه من جديد
رازي اعترض طريق الخنجر هالمرة بكل جسمه واصبح حاجز عريض يمنعه من الوصول لبـيّـن
عزيز صرخ بقهر وسدد طعنات متتالية لرازي
رازي قدر يحمي نفس بمنع اغلب الطعنات لكن صابه البعض الاخر اجتاحه التعب من كثر الامه وتعبه السابق ارتخى بمقاومة عزيز
بـيّـن وقف بالسيارة بمنتصف الطريق السريع دف رازي لورا ولكم عزيز
عزيز تراجع
بـيّـن ثبت يد عالمقعدة والثانية عالدريكسون ورفع نفسه ورجوله ووجهها بكل قوته ضارب فيها عزيز
عزيز ارتطم بالباب مااعطى نفسه اي فرصة للالم فتح الباب ونزل يجري
بـيّـن نزل يجري وراه
بتال وقف بالسيارة ورا سيارتهم ناظر عباير/عباير اقفلي الباب وارجعي البيت لاتوقفين لاحد لاتوقفين الا عند البيت حلايا ناظرت الرجال قبالهم اللي تلون ثوبه باللون الاحمر برعب/بتال
بتال صرخ/لاتناظرون/نزل قفل باب السيارة وراه/
عباير نطت من مكانها لمكانه
بتال جرى لشنطة سيارته فتحها واخذ عدة الاسعاف اللي ماتفارقه ابد وقفل الشنطة وضرب عليها بمعنى حركي
عباير غيرت طريق السيارة باتجاه ام جلاجل وحركت السيارة مبتعدة
رازي نزل من السيارة يناظر بـيّـن المبتعد/بـيّـن/ارتمى عالارض بوجع وتعب يحس انتهت طاقته ماعاد بقى له نفس بهالحياة/
بـيّـن وقف وهو يذكر حالة رازي التفت راجع طريقه يجري له وقف يناظر بتال بذهول
بتال المنحني شبه جالس بمحاولاته يوقف النزيف رفع عينه لبـيّـن صرخ/تعال ساعدني نفزع به اسرع
.
............................................................
            منتصف الليل
............................................................
<<بيت مبروكة>>
يقين خارجة من دورة المياه بعد انهيارها الموجع بداخلها على وضعها بهالفترة السيئة بالنسبة لها وانهت هالانهيار بوضوء لصلاة الوتر جرت خطواتها باتجاه الصالة اللي اصبحت غرفتها ملازمة لابوها ماتركته دقيقة بمراقبة لكل شي يخصه وقفت من ناظرته شدت على شنطتها وتراجعت بخطواتها لورا بخوف
عزيز الملتف بشواله بيده الراجفة المنفوخة بوضوح برجفة صوته/انا في وجهك
يقين عقدت حواجبها
عزيز فتح الشوال عن وجهه/انا في وجهك يابنت العم
يقين بغبنة/وجهي اسود من كثر سواياي الشينة/خرجت مسدسها من الشنطة/مايضرني سواد وجه وسط العرب يبرد على قلبي وياخذ حقي
عزيز تراجع بخطواته/تكفين يايقين طالبك
يقين اطلقت عليه بكل قهر ارسلت عليه رصاصة محملة بوجعها وانكسارها ودموعها بالسنين اللي مرت عليها
عزيز صرخ من استقرت الرصاصة بكتفه
يقين/معك ثلاث ثواني ماذلفت كملت عليك
عزيز يناظرها بقهر وسط انفاس المه المسموعة
يقين/واحد
عزيز خرج من البيت بخطوات سريعة
يقين جلست عالارض بانهيار وسط رجفتها/وش هالقلب يايقين وش هالقلب
مبروكة وققت عندها بفزع/علامك وش اللي صاير
يقين بدموعها/حرامي واخذ جزاه
مبروكة بعصبية/انهبلتي ناوية على روحك
يقين/ياليت ياليت
عزيزي جر خطواته برجفة واضحة وبالم اتجه لبيت بارود وضرب عليه الى ماتعب مااستقبله اي رد جر خطواته خارج من الديرة وبتعبه/ياديرة المرض/وقف من ناظر سيارة توقف جنبه/
//انفتح باب السيارة وانسحب لداخلها بدون اي صوت صدر منه وحركت مبتعدة//
............................................................
//اخر الليل//
.
<<بيت بـيّـن>>
بـيّـن قافل على نفسه ببيته متمدد عالسرير على جنبه الايمن رافع تيشيرته وكاشف عن مكان اصابته شايل ضماده وتاركه مكشوف بضيق الكون كله يدري هالمواجهة بتكلفه كثير وهالتكلفة بتكون مليون بالمية على نفسه ماتوقع تأثيرها بيكون عاللي حوله بهذا التاثير القوي خسر حبه  وتسبب باصابة قوية لصديقه مرر نظره بهالبيت المظلم رجع وحيد بلا أنيس بعد مادخلت حياته ايام معدودة واعتاد وجودها والسعادة معها اجتمعت بصدره مشاعر انكسار ولوم زادته فوق ضيقه ضيق عقد حواجبه من سمع صوت الباب ينفتح اعتدل عالسرير وجلس كاتم ألمه سحب نفسه من السرير واسرع بخطواته الدولاب مقابله سحب سيكتونه وجهز ذخيرته بهدوء ووقف موجه فوهته ناحية الباب بملامحه الحادة 
يقين فتحت الباب وخطت اول خطوة للبيت بعد رحليها المفاجئ بدون اسباب تنهدت براحة من ناظرت المكان يلفه الظلام همست بينها وبين نفسها/نايم الحمدلله/وقفت من حست بفوهة السيكتون تلامس جبينها من الجانب/
بـيّـن عقد حواجبه بشك ومد يده لمفتاح النور فتحه وناظرها باستغراب من تواجدها
يقين تحركت بهدوء رغم وضعه اللي ماتغير مانزل السيكتون ابد ودخلت للبيت وقفلت الباب وراها
بـيّـن بحدة/ليش جاية
يقين/دريت باللي صار
بـيّـن بغيظه/ووش عليك!!
يقين التفتت تناظره ومدت يدها لفوهة السيكتون ونزلته
بـيّـن ضرب السيكتون بيدها مبعدها تراجع بخطواته لورا ولازال مصوب عليها وبحدة/وش جايبك
يقين تقدمت بخطواته همست كابحة عبرتها/ماقويت أكبك لحالك
بـيّـن ابتسم بسخرية/وقويتي ترسليني للموت!!
يقين تقدمت له
بـيّـن منعها تتقدم بدفعها بطرف السيكتون
يقين تراجعت بخطوة لورا وتوجعت فوق وجعها اوجاع كل مافيه ينطق بصده الواضح وتخليه عنها التمعت عيونها بدموعها وبرجفة صوتها الواضحة/ليه تقوله ليه!!من الناس كلهم انت اللي تخبرني يابـيّـن كيف تظن هالظن فيني كيف تظن اني اقوى ارسلك للموت كيف!!
بـيّـن بوجع قلبه اللي ارتسم على ملامحه/ماهو البلا اني اخبرك واخبر كل تفاصيلك/احتدت نظرته وارتفع صوته/كل مافيك نطق، وقفتك وثبات يديك وحتى عيونك نطقت فارقني تكفى فارقني
يقين هلت دموعها تسمعه بصمت ماتوقعت تترك هالاثر بقلبه ماتوقعت ينجرح منها مثل هالجرح العميق وهو اللي يفهمها ويعذرها توقعت بيكون ينتظرها وبنهاية الوقت ترجع وتلقاه باقي مثل ماتركته بـيّـن الحبيب اللطيف الوفي اللي يحط مليون عذر لخاطرها
بـيّـن بغبنة/وفوق كل ذا سميتي انا ماذبحتني الرصاصة كثر ماذبحني تسميتك مرد الرصاصة تطلع ويبقى مكانها جرح تداويه الايام مير اثر الرصاصة الصحيح هي بسم الله هي اللي صابتني واستقرت بوسط قلبي 
يقين بصراخ وسط دموعها/مير اني سميت عليك بسم الله على روحك وقلبك وكل مافيك يارب اجعلها تخطيه يارب لاتاخذ روحي مني يارب
بـيّـن عقد حواجبه من كلامها
يقين بعتاب/انت اكثر واحد تخبرني ليه ماوصلك خوفي،ليه ماشفت رجفة قلبي قبل تشوف ثبات يديني،
بـيّـن يناظرها بشك
يقين تناظره بدموعها بانفعال/وليه ماتصرفت يوم جيت المستشفى ليه ماسويت اللي تسويه ذالحين ليه ماثرت علي مثل هالثوران ذالحين ليه حديتني اوجعك واوجع قلبي معك
بـيّـن بنبرة عالية/ليش طيب ليش كل ذا ليش!!
يقين بنفس نبرته/وكيف تبي مبروكة تصدقني وتأمني وهي ماحست بانهيارك
بـيّـن صرخ/ووش دخل مبروكة!!
يقين/كل شي ابتدأ منها وبينتهي عندها يابـيّـن ليش تظن سمحت لي ابقى في بيتها لولا سواتي فيك
بـيّـن يناظرها بصمت
يقين/كيف اكب ابوي بين يديها وهو اول شي نطقه بخوف لاتكبيني لامي يايقين تكفين لاتكبيني
بـيّـن عض شفته بغبنة
يقين بدموعها/ابوي يترجاني يابين وين وصلت جدتي حتى ابوي يترجاني افكه منها قولي كيف ادخل بيتها وانا من بني طاهر هاه لازم ارجع لبني سمار حتى مبروكة ماتضر ابوي
بـيّـن نزل سيكتونه ومد يده ليدها سحبها ومشى باتجاه الباب يسحبها وراه
يقين تقاومه تحاول تسحب يدها منه/بـيّـن اسمعني بـيّـن
بـيّـن وقف عند الباب وفتحه
يقين من وصل للباب تسارعت نبضات قلبها معقولة هاللقاء هو اللقاء الاخير بينهم معقول ينتهون بهالطريقة البشعة وهم كل واحد منهم يعشق الثاني معقول سوء الفهم هو ينهي مابينهم بسهولة سحبت يدها بقوة منه وصرخت/بـيّـن
بـيّـن وقف والتفت لها بنظراته الحادة/مايضرك تلمحين لي وحتى ترمين كلمة اعرف من وراها مقصدك
يقين/قلت لك انهيارك هو رضاها وهالثمن اللي بندفعه وهالشي غالي وبالحيل يابـيّـن
بـيّـن/لاا انت ماعطيتني الثقة اللي عطيتك ماأمنتي سرك لي مثل ماأمنتك اسراري انتي غدرتي بي وطعنتيني يوم انا كنت مأمنك ومعطيك أماني اخذتني ذابل واحييتيني وتفننتي باخذ هالحياة من عيوني
يقين بدموعها/مو كذا ماقصدت كذا ابد يابـيّـن
بـيّـن يمينه ليدها وسحبها من جديد وفتح الباب لنهايته بيساره حتى يخرجها من بيته معلن لها ولنفسه نهاية رحلتهم سوا عند هالنقطة
يقين سحبت يدها من يمينه وثم مسكته من معصمه بقوة
بـيّـن حرك يساره مرجع الباب حتى يقفل وانتصف مسافته بدون ينقفل وصد عنها يتجنب يناظرها رغم وجعه بخيانتها له الا انه يخاف يحن قلبه ويضعف ويتراجع عن قراره اللي تعب وهو يقنع نفسه بهالقرار الصعب على قلبه وعند اول مراحل قبوله توسطت بيته وزرعت بنفسه شي من التردد
يقين برجى/لا يابـيّـن لا
بـيّـن الصاد غمض عيونه وزفر نفس
يقين برجى/بـيّـن
بـيّـن ناظرها بحدة/اسمعي يابنت الناس ماني بردي ولا خوان ابشري العهد باصونه واكمله معك وابوك بمقام ابوي افديه بروحي ولايضره شي
يقين رجف قلبها وسط ملامحها المذهولة من كلامه اعلن التخلي تقبله وانتهى والحين جا دورها تقتنع مثل مارضى قلبه وانتهى
بـيّـن/ولاقضينا من هالسالفة الله يستر علينا وعليك/مد يده فتح الباب وناظرها/
يقين تناظره بصدمتها
بـيّـن/الله يستر عليك روحي بيتكم
يقين خرجت تجر خطواتها بوجع/ماعاد هو بيتنا صار روحي بيتكم/ضحكت بخيبة وكملت طريقها راجعة للبيت/
بـيّـن وقف يناظرها حتى ابتعدت قفل الباب وارتمى على سريره بوجع جرح و وجع قلب غطى عيونه بمخدته بمحاولة منه حتى ينام رغم معرفته بالكوابيس اللي بانتظاره
.
............................................................
#شقّ_الغَمام