شـقّ الـغَـمـام

..(٤٠)..

..(٤٠)..
الله اكبر عدد كل شيء وملء كل شيء..
سبحان الله وبحمده عدد ماخلق وملء ماخلقء..
-
بـيّـن بابتسامة وثقة/هالمرة بيديني اشقك
مبروكة/ياصغير كان فادك الهرج فادك من مبطي كان معك سيد قومه علمني وينه ذالحين
،
،
~~قبل١٤سنة~~
بـيّـن(١٤سنة)واقف يناظر ابوه بتردد
خلف يشيل اكياس الشعير من حوض الونيت وينزلها بحوش علف الحلال الصغير ناظره/علامك واقف!!شيل البرسيم لاتوقف كذا اخلص
بـيّـن/يبه
خلف شك من تردده نزل الكيس ووقف يناظره/وش وراك من بلا يابـيّـن هالمرة
بـيّـن تراجع عن الموضوع كليًا بعد سماعه لكلمة(بلا)من ابوه اتجه للبرسيم يشيله وبوجهه العابس/ولا شي
خلف اعتدل بوقفته مثبت نظره عليه الى مانزله بداخل الحوش ورجت للونيت/ولد بـيّـن
بـيّـن ناظره/سم يبه
خلف/وش وراك علمني
بـيّـن/تخبر هاك الليلة يوم ماعودن النياق
خلف/ياكثرها من ليالي
بـيّـن/ليلة الاربع طعش من الشهر اللي راح
خلف ناظره بجدية كيف ينسى ذيك الليلة وينسى حالته يوم رجع كان وكأنه ممسوس ينتفض برعب ماهدت انتفاضته الا بحضن أمه/ايه علامهن النياق
بـيّـن/ماسرينا ندورهن؟
خلف عقد حواجبه/ايه
بـيّـن/هاك الليلة وقفت السيارة بوسط الوادي وكملتها رجلية/سكت/
خلف/وثم
بـيّـن/شفت ام زايد اعطت رجال شنطة وثم هالرجال دخل يده بجيبه ودخل اللي بجيبه بفم رجال مكتف بينهم يبه/شحب وجهه وهو يستذكر الموقف وعيونه بابوه برعب/يبه هاك الرجال المكتف هو مبارك المفقود من شهر
خلف بوجهه انخطف من اللي سمعه وفهمه مد يديه وثبتها على اكتاف بـيّـن/خيالات
بـيّـن ناظر ابوه بنظرات خيبة/لا يبه ماهو
خلف ضربه كف على وجهه مقاطعه بحدة/اللي شفته جن بوسط الوادي انت ماشفت شي سمعت
بـيّـن بلع ريقه كابح بكاه لاينفجر/والرعي اللي ذبح الناقتين والحوار بعد كذب
خلف/ماعندنا نياق موتت كلها بيعت
بـيّـن بقهر من اصرار ابوه عالرفض/بس انا لقيت الوادي اللي به هاك الرعي يبه
خلف ارتفع صوته/بـيّـن
بـيّـن سكت
خلف بتهديد/اياني واياك اللي قلته يطلع لغيري يابـيّـن سمعت
بـيّـن باستسلام/ابشر يبهر
..
العصر
..
<<بيت طاهر>>
خلف دخل للبيت بوجه شاحب
منيرة الجالسة بالحوش قبالها القهوة وغصنة صاحبة الاربع سنوات على رجولها/حياك ياابو ظاهر حياك/تغير وجهها من ناظرت وجهه وقفت بقلق/عسى ماشر خلف
خلف/وين عمي
منيرة/داخل
خلف/وأمي؟
منيرة/عمتي عند الربايع
خلف/لاأحد يدخل علينا سمعتي/جر خطواته السريعة لبيت طاهر دخل وقفل الباب وراه/
طاهر الواقف بنص الصالة ينزل اكمام ثوبه بعد ماتوضى ناظر خلف باستغراب/علامك ياولد
خلف/ياعم مبارك عينوه
طاهر ابتسم/هاه زين الحمدلله عود سالم
خلف/مير انه عينوه بذاك الوادي
طاهر عبس بوجهه/عساه سالم
خلف/الا ميت
طاهر احتدت نظرته
خلف/ياعم الوادي مابه اهله وانتي تدري
طاهر/الا به اهل
خلف بغضب/ياعم
طاهر بحدة/مير ماهم بجن
خلف تنهد براحة/بـيّـن شافهم ياعم والدبرة معه
طاهر بفزع/اقضب لسان الورع
خلف/علمته
طاهر/مالنا بشي ياخلف لا من قريب ولا من بعيد
خلف/الرعي اللي
طاهر قاطعه/ماندري عن شي ياخلف
خلف بنرفزة/مير
طاهر/خلف اسمع لي واسكت ماهو ذالحين
خلف/مثنى لحقه مالحق مبارك ياعم كيف اسكت مابها شكه ذالحين اكيد هي ورا موتته
طاهر/مثنى عيّن الرعي وعرفه واخذ جزاه
خلف شحب وجهه/يعني خابر العلم ياعم
طاهر بغيظ اتضح على ملامح وجهه/وانت تظن وقفت على مثنى لارحمت البعيد ولا القريب مير اصبر ماهو ذالحين ياخلف وعينك على ولدك لاينكبنا
..
الليل
..
بـيّـن بيده جيك اللبن متجه لبيت سرور وقف من ناظره قباله كمل طريقه/السلام عليكم
منصور وقف بوجهه/وعليكم السلام والرحمة
بـيّـن لف يمين عنه حتى يكمل طريقه
منصور وقف بطريقه
بـيّـن لف يسار
منصور وقف بطريقه
بـيّـن ناظره باستغراب/سم ياعم
منصور ناظره/علمني علامك تروعت هالروعة يوم شفت مبارك
بـيّـن انخطف وجهه
منصور ناظره بانتظار جوابه
بـيّـن بلع ريقه وصد/ماعمري شفت ميت
منصور تنهد وسط شكه/اسمع يابـيّـن تدري اني مايفرق عندي بني طاهر من بني سمّار الحق ياخذه راعيه غصب عن الجميع
بـيّـن ناظره/انا مااعرف شي/مشى مسرع بخطواته مبتعد عنه/
منصور تاكد من شكوكه/اجل ماتعرف شي ماهو الله يرحمه/مشى مسرع بخطواته/
..
<<بيت الشيخ>>
،،غرفة مبروكة،،
منصور جالس بعلامات غضب معتلية وجهه
مبروكة منزلة طرحتها تبلل يدها بالموية وتمسح على شعرها/وش اللي مزعلك هالنوبة يامنصور
منصور/مبارك يمه مبارك
مبروكة تمشط شعرها/الله يرحمه دربٍ حق علينا نسلكه والحمدلله على حال
منصور/يمه تعرفين قصدي زين
مبروكة مشغولة بشعرها/ياكثر شكاويك يامنصور اكثر من عرب الديرة
منصور/ماهو بمبارك لحاله قبله مصلح وقبلهم ناير وقبلهم مثنى
مبروكة احتدت نظرتها وتركت المشط وبنرفزة/وثم وش قصدك هذا انتم تقصيتوا الوادي ولا عينتوا شي ابد
منصور ناظرها بغيظه/ماودك تعلميني شي
مبروكة بانفعال/عوذا منك يامنصور عوذا كان عالوادي هذا هو اخوك راح يمه ولا عود ويوم انه عود،عود لقبره وشو له ترمي تهايمك علي
منصور ناظرها ساكت للحظات تنهد/مرد عجاج الوادي ينقشع يمه
مبروكة بحدة/وش تقصد؟
منصور وقف/ماقصدي شي ماقصدي تصبحين على خير/مشى/
مبروكة لفت طرحتها حول راسها وانتظرت فترة حتى ناموا اهل البيت خرجت من غرفتها تجر خطواتها للباب خرجت من البيت ورجعت الباب وراها بدون تقفله/
ابو فالح وقف قريب منها/ياعمة
مبروكة/وش سويتوا اليوم
ابو فالح/مامن جديد مير ان الشيخ من توسط المجلس وعيونه مافارقت وليد خلف
مبروكة باستغراب/خلف طاهر
ابو فالح/ماغيره
مبروكة عقدت حواجبها بصمت
ابو فالح بتردد/اقول ياعمة الشهر اللي راح بهذيك الليلة
مبروكة/وش بلاها
ابو فالح/وانا احتريك شفت ددسن مسرع معود الديرة من يمكم
مبروكة احتدت ملامحها/وعساك عرفت راعيه
ابو فالح/نفس الوليد ياعمة
مبروكة سكتت بتفكير
ابو فالح/هاذي علوم اليوم كل ابوها ياعمة
مبروكة/اجل اسمع العلم
..
يوم جديد
..
خلف ركب الوايت ناظر ظاهر وبـيّـن الواقفين عالباب/روحوا جيبو اكياس الشعير وودوها يم الحوش
ظاهر(١٦سنة)/ابشر يبه
خلف ناظره بشك/ظويهر
ظاهر/افا يبه بس ابشر ماوراها
خلف ناظر بـيّـن/بـيّـن
بـيّـن/سم يبه
خلف بتحذير/لاتحيد عن اخوك
بـيّـن فهم قصده/ابشر يبه
خلف/روحوا بالدينّة
ظاهر/يبه جدي يحبها مايعطيني اياها
خلف رمى المفتاح على بـيّـن
بـيّـن مسك المفتاح
خلف/ان قال هالهيس هه ولا هه علمني
ظاهر بعبوس/ليه يبه بس
بـيّـن ناظر ظاهر ومد له المفتاح بابتسامة/عيون الصقر عليك اليوم
خلف ابتسم وحرك الوايت/فمان الله
ظاهر رجع يده ورا رقبة بـيّـن وضمه/اخيرا بنمتر الديرة بحبيبة جدي
بـيّـن دفع يده عنه/ابوي وصاني وتخبر كل شي الا كلام ابوي
ظاهر اعتلى وجهه الزعل/يامال الخياب/مشى للدينة/كان ماتجريت الحين متى يابـيّـن/ركب وشغلها ناظره من داخل السيارة/اعجل علينا
..
~حوش الاعلاف بوسط المحافظة~
ظاهر وقف عند الحوش ولمح صديقه اتسعت ابتسامته/بـيّـن
بـيّـن الواقف بحوض الدينة التفت له
ظاهر رمى المفتاح له/كفو العضيد كمل الشغل
بـيّـن/بس مين بيشيل معي
ظاهر مد يده لبين بمبلغ
بـيّـن اخذه باستغراب
ظاهر/خل العمال يساعدونك/مشى/
بـيّـن/الدينة مااعرف اسوقها زين ظاهر
ظاهر جرى لصديقه
بـيّـن رفع صوته/وش اقول لابوي لانشدني عنك
ظاهر مكمل طريقه/علمه الصحيح مثل دايم
صاحب الحوش وقف عنده/ولد
بـيّـن التفت له/سم ياعم
صاحب الحوش/بني جلوي(طاهر وسمار)صحيح
بـيّـن ابتسم/وصلت ياعم
صاحب الحوش/به مكرمة خذها معك وزعها على اهلكم
بـيّـن/كثر الله خيرك ياعم وابشر توصل
صاحب الحوش/ماهو مني المكرمة مير ادع لراعيها بالخير
..
يوم جديد
..
<<بيت طاهر>>
//تعالت اصوات الضرب عالباب والصراخ والتهديد لبني طاهر جميعا ومطالبتهم بـيّـن بالخروج على وجه التحديد//
//خرجوا اهل البيت بالحوش//
منيرة ضامة بـيّـن برعب لحضنها وغصنة متعلقة برجلها بدموعها
حمدة ناظرته بغيظ/ياليهودي وش مسوي هالنوبة
بـيّـن/ماسويت شي ياجدة والله ماسويت
خلف خرج من البيت باستغراب من هالازعاج واتجه للباب
حمدة مسكة يده توقفه بخوف/خلف رايح للموت برجلينك
خلف سحب يده من امه/الموت كان قعدت وسطكن وتاليتها دخلوا البيت عليكن والله مالبس الثوب ولايعتلي راسي شماغ ان التف بالمسفع وسطكن طول عمري
حمدة بحدة/يعقبون وانا بنت ابوي
خلف ناظر بـيّـن/خلك في ذا لاتطلع
ظاهر الخارج من البيت وبيده ساطور/انا ولد ابوي
منيرة وقفت كل شعرة بجسمه/ولد ظاهر
ظاهر مر متجاوزهم بخطوات سريعة
خلف مسكه من يده رجعه لورا بحدة/ولد
ظاهر/يبه
خلف/انثبر خلك عند امك وخواتك/مشى لباب البيت الرئيسي فتحه خرج وقفله وراه/ياهلا ببني سمار
مسعود سحبه من ياقته/لاسلمكم الله ولا رفع لكم شان عساكم بظالم يتسلط عليكم يابني طاهر ولا يرحمكم حتى الحلال مارحموته
خلف دف يديه بحدة/حياكم بالمجلس نتفاهم لافين بشركم وشلون ندوي وش بلاكم علينا
مسعود بغيظه/مجلسكم يحرم علينا نطبه جب ولدك ياخلف جبه
خلف عقد حواجبه/وش بلاك على عيالي بهالصبيحة
مسعود صرخ/والله لولا العيبة دخلت وتليته من يدين امه/مسكه من ياقته/جب ولدك وامش يم المجلس نتقاضى بالحق امش
..
<<مجلس الديرة>>
منصور جالس يناظر وجيههم المتجمهة/عسى ماشر يابني سمار
مسعود بقهره/جيناك طلاب للحق ولا نبي دونه رضاوة
منصور/جاك وابشر به
مسعود/اصبحنا بعضنا حلاله النصيفة قاضي وبعضنا كل ابوه بلا بلى ينذكر
منصور اتسعت عيونه بذهول/عوذا وش ذا العلم
ابو فالح وقف قباله بوجهه المذهول/ياشيخ الحلال الحلال
منصور شحب وجهه
مسعود ناظره بوجهه القاتم من كثر القهر/لحقه مالحقنا
ابو فالح ناظرهم بذهول/كل ابوكم
مسعود ناظر خلف وبـيّـن بقهره/الا بالله عرفت بلاه/اشر على بـيّـن/ماعينّا خير عقب العلف اللي لفى به يمنا
منصور ناظر بـيّـن/صحيح هالقول يابـيّـن
بـيّـن ناظر ابوه
خلف اشر له يتكلم
بـيّـن برجفة يديه اللي ماقدر يخفيها من الانظار الغاضبة المتسلطة عليه/صحيح جبت العلف مير وش يدريني انه هاللون
مسعود/حنا اللي وش يدرينا عنكم يابني طاهر
خلف /كل مرة تاخذون بقوله وتشهدونه ومسمينه البـيّـن بينكم علامكم ذي المرة جحدتوه
مسعود/من كبر سواته عجزنا نسمع له هالنوبة
خلف بحدة/اقضب لشانك واحشم عمرك كان ماتبيني ارميك مثل هالرمية يامسعود
مسعود وقف وبتحدي/ايه قضيتوا عالحلال وسطيتوا ماعاد يردكم شي عن العرب ذالحين قم كانك صادق قم
خلف فز وسحب مسعود من ياقته قبل ينهي كلامه وسط اصوات غاضبة غطت المجلس مع مسعود ضده
منصور وقف وبحدة/بس
//خلف ومسعود التفتوا له وسط سكون الاصوات//
منصور/السالفة بها بلا وشلون يموت الحلال جميع
مسعود/مايبي لها نشدة/ناظر خلف/الغل ملا قلوبهم علينا ولا شلون حلالهم ماصابه شي
منصور ناظره بحدة/بس يامسعود بس/مرر نظره بالمجلس/روحوا بيوتكم ولا اصبح الصبح عودوا يمي
..
يوم جديد
..
~~مجلس الديرة~~
طاهر الغايب امس عن المجلس لانشغاله بامور خارجها متواجد اليوم بوجه كاسيه السواد من كبر هالتهمة الباطلة بحق حفيده
منصور/حياكم الله جميع يابني جلوي
//بني سمار ماعجبهم كلامه وكانه يلين قلوبهم باللي حصل وهذا المقصود//
مسعود يناظره بغيظ
منصور/الصحيح يالربع السالفة بها علم
مسعود عقد حواجبه
طاهر ميل فمه بتوقع للي حصل ومعرفة السبب وراه
منصور/صاحب الحوش عقب المكرمة امس باع حوشه وماعاد هو بالمحافظة كل ابوها
خلف شد على قبضته بقهر
بـيّـن بلع ريقه بيأس ثبتت التهمة بحقه وانتهى الموضوع
مسعود/وحنا وش علينا منه قلعةٍ تاخذه ولا يرده
منصور/العلم كل ابوه عند هالرجل يامسعود
مسعود ناظر بـيّـن/بلاك من اللي اخذها منه الخطا عليه
بـيّـن بقهر منه/اشوف يومها مكرمة ماعييت عنها اخذتها وانت مستانس ذالحين تردها يمي!!
مسعود انخطف وجهه من الرد اللي ماتوقعه ولا طرا على باله بيرد من امس وهو ملتزم الصمت
خلف ابتسم برضا/صحيح الخطا عليكم يابني سمار ماهو بكل مكرمة تقبلونها هذا حنا رديناها وحلالنا مابه الا العافية
طاهر عبس وجهه واخذ نفس من ولده وحفيده اللي زادوا المشكلة بردودهم
مسعود فز من مكانه وسحب خلف من ياقته وتبادلوا اللكمات ومعه كم رجال فازع وسط هتافات الرضا من الجالسين وعدم فزعتهم لحل المشكلة
منصور حاول يبعدهم لكن ابعدوه عنهم وضرب ظهره بطرف المشب وتوجع ماقدر يوقف
بـيّـن ناظر الرجال اللي فوق ابوه فز للمشب وسحب الملقط وضرب الرجال اللي فوق ابوه واحد واحد على روسهم بكل قوته متسبب لهم بجروح عميقة ينزفون منها
مجيد وقف وراه وثبته بيديه
بـيّـن ضرب مجيد براسه واجبره يتركه ثم تعلق برقبة مسعود وعضه من رقبته
مسعود الجاثي فوق خلف يضربه تركه وصرخ بألم يحاول يفكه
بـيّـن تركه من شافه يترك ابوه وجرى لابوه
خلف احتضن ولده
منصور وقف وبصراخ/عوذا ماانتم برجال تعقبون الا يابعد المرجلة عن اشنابكم وتف تف عليكم كل ابوكم يابني جلوي
طاهر وقف بعد هالمعركة وببرود/يابني سمار حق الراس راس مثله ومعه علفه وندحر الشر
مسعود بقهره/مارضيناه ياطاهر وبعيدة عن خشمك
منصور/حق الراس براسين ياطاهر
طاهر/تم
منصور/ومعه علفه مثل ماقلت
مسعود ناظر منصور بعدم رضا/نبي شور سحاب ياشيخ نبيه
منصور شد على قبضته ممرر نظره عليهم بقهر
طاهر ناظر منصور رحمة فيه من سوء موقفه بهاللحظة قومه مااحترموه ولا اعطوه مجال يفك النزاع تجاوزوه واتجهوا مباشرة لسحاب/دام تهدا النفوس ياشيخ شاور سحاب وعلمنا
مسعود/لا المشورة على عيوننا جميع
//بعد دقايق من وصول سحاب وسماع السالفة//
طاهر/وحنا قلنا ابشروا بالعوض حق الراس براسين ياسحاب
سحاب/رايتك بيضا ياابو عياش ماقصرت مير ماظنتي هاللي تقوله يسدّ مايبري النفوس ابد
خلف عبس بوجهه
بـيّـن ناظر الباب الفاصل بخوف محتويه كل هالتهمة معلقة على طرف لسان هالادمية اللي بعينه هي وحش او بالاصح افعى متلونة ارتدت قناع السحاب اللي مايجر وراه الا كل خير لكن بعيونه هي غمامة مايدرون عن حقيقتها اكيد بتجر له مصيبة من نوع فاخر مثل ماشهدت موقف ابوه وزينة واجبرته عالصمت بذيك اللحظة متاكد وواثق انها ورا تهمته هالمرة اكيد درت انه يعرف بشي من سواياها اللي ماتبي احد يدري فيها وجرته لهالموضوع موقن انها تبي نهايته ونهايته بتكون على يدها مثل ماتبي
سحاب/واجب عليه يرعى حلال الديرة وعن كل بيت خمس سنين مير رحمةً به يرعى الحلال كل ابوه ٢٥ سنة
بـيّـن رجف قلبه وسط ذهوله
طاهر شد على قبضته بغيظ
خلف انصعق من اللي قالته وفز بانفعال من كثر القهر/معصي اللي يضيع عمره عشانكم وعشان حلالكم بحريقة كل ابوكم
طاهر غمض عيونه من سمع  انفجار خلف
مسعود بانتصار/الحكم وقبلتوا سحاب تحكمه يومه ماطابق هواكم زعلتوا محد معصي غيركم يابني طاهر
سحاب/مايرجع عن العهد غير الخوان ياولد مرضي
خلف بحرقة قلبه/خليني خوان وش علي منكم تصدقون اللي تبونه انتم ولا عليك بالصدق اللي يشق عيونكم شق يامال الشقة بينكم يابني سمار يامالها اي والله،والله ان تعقبون ولدي مايضيع عمره عليكم والديرة وكابينها لكم كل ابوها لابوكم لاابو من جمعكم
سحاب/زين على ماتريد ياابو فالح افزع يم الشرطة يشوفون العلف لذالحين بقاياه به رح وانت ياخلف ارحل محدٍ له كلمة عليك مير قبل ترحل عن الديرة مر الشرطة بالاول
طاهر عض شفته السفلية بقهر
خلف شد على قبضته حتى تجرح باطن كفه ونزف
سحاب/بغينا نحلها بيننا كود يحصل مايحصل بالسنين ونعفيه عنها
خلف يسحب انفاسه بسرعة من غيظه
بـيّـن وقف وبكل مافيه من كره وغيظ وقهر/تعقبين وتخسين سواد فعايلك ترمينه علينا ادري بـ
طاهر فز واقف وضربه بعكازه بكل قوته مجبره يسكت
بـيّـن توجع وسكت مثل مايبي طاهر
خلف سحب بـيّـن وراه مبعده وبوسع عيونه/عم!!
طاهر بقهر احتل صدره/معصي مايعقب ويخسى الا انت طالت مابقى الا انت ترفع صوتك فوق سحاب
خلف/والحكم الظالم نسكت عنه
طاهر/ايه تسكت اسكت ياخلف اسكت وعقّل ولدك كان باقي به عقل
مسعود بسخرية/يقول يامال الشقة والشقة بينهم الحمدلله بس الحمدلله
منصور بقهر وعدم رضا وقف/يابني سمار ماعاد لي عليكم شيخة
سحاب انخطف وجهها
مسعود بربكة/وش هالكلام ياشيخ
منصور/قضيتوا وتحاكمتوا الراس براسين ولا ارضاكم ماارضاكم الا كسر النفوس وليته على حق
ابو عايد/واللي صار ياشيخ!!
منصور/جاب المكرمة الى عندكم وجازيتوه على شيٍ مادري به عجيب يابني سمار عجيب
سحاب/وش يرضيك ياشيخ
منصور زفر بسخرية/وش اللي يرضيني وحكمي مارضوا به!!
سحاب/لخاطر الشيخ نطرح خمس لا بالله نطرح ثمان والباقي يحكمهن فعله
خلف بقهر/١٧سنة يرعى لكم
سحاب/وبيته بلحاله راعي الديرة
منصور شد على قبضته بتفكير كيف يترك الشيخة وماتأكدت شكوكه/تم
خلف ناظر منصور بغبنة
طاهر/تم قبلنا حكم سحاب تم مير عطونا كم يوم ندبر امورنا
سحاب بانتصار/معكم شهر ماهو بكم يوم الله يستر عليكم يابني طاهر الله يستر عليكم
طاهر ناظر خلف وبـيّـن/مشينا/مشى/
خلف مشى ويده بيد بـيـن بكل مافيه من قهر وحرقة بانتظار لتفسير عمه ورا هالقبول
بـيّـن يجر خطواته بعدم استيعاب عيونه عالارض يمشي بسبب سحب ابوه بضياع كيف يعني بتوقف حياته بيترك المدرسة بيطلع بيت لحاله وش بيسوي لحاله وهو بذا العمر رجف قلبه من كثر الوجع ليه تخلوا عنه ليه جده تخلى عنه بهالسهولة ليه ماوقف بوجه هالسحاب واخذ حقه منها ومن قومها ليه استسلم بهالسرعة اكيد فيه سبب اكيد جده مايسكت عن حقه ابد مايتخلى بهالبساطة صحى من دوامة افكاره على صوت ابوه الواقف قبال باب البيت الكبير
خلف تعمد يتأخر حتى ابوه يصرف امه ومنيرة عنه تنهد بعد وقوفه قبال باب البيت/بـيّـن
بـيّـن رفع راسه يناظره
خلف/لاتنسى انك اسم على مسمى انت بـيّـن اللي يشهدونك بالمجلس وياخذون بكلامك لايدخل قلبك شك ابد انت بـيّـن خلف اللي مايكذب ابد ولاتهزه اكذاب العفون
بـيّـن غرقت عيونه دموع من كلام ابوه/يبه والله مالي بشي ابد
خلف احتضنه/بـيّـن مايكذب ابد مصدقك وانا ابوك مصدقك/دخل للبيت/
بـيّـن مشى وراه
خلف جلس فوق فرشة امه بالحوش وتلثم بشماغه
بـيّـن/يبه ماانت بنايم بالبيت
خلف بابتسامة/لا ادخل وانا ابوك ادخل امك تحتريك
بـيّـن قبّل راسه واتجه لبيتهم
..
يوم جديد
..
بـيّـن صحى من نومه بفزع على صياح حمدة اللي غطى المكان خرج من البيت بتسارع نبضات قلبه وقق يناظرها بشحوب من المنظر اللي ماتوقع يشهده بهالسرعة
حمدة ضامة خلف بحضنها تبكي/ويلك ياحمدة ويل قلبك عيالك سبقوك ياحمدة سبقوك
بـيّـن جثى عالارض مثبت عيونه على ابوه بين يدين جدته
حمدة بدموعها/خلف ياولدي قم لاتروعني تكفى وانا امك قم
بـيّـن انسابت دموعه مثبت عيونه على جبله الشامخ بهالحياة اللي يوقف بوجه كل طاغي ويصده عنه كسرة البارح هدت جبله واصبح مكشوف صرخ من قلبه بصرخة قهر غطت صراخ حمدة وطغت عليه
،
،
بـيّـن ابتسم من ثقتها اللامحدودة/الشكوى لله عمى عيون وقلب وبصيرة
مبروكة زفرت بسخرية/جيوشك مردّها مثل دايم تساوى بالتراب هذا انت من مبطي ماغيرت شي
بـيّـن تجهم وجهه/وشو له تبيني
مبروكة بتتكلم
بـيّـن سبقها/تبين تعرفين من اللي يلعب من وراك
مبروكة احتدت ملامحها
بـيّـن ابتسم بسخرية/افا سحاب ماعادت هي سحاب قاموا يلعبون حولها افا ياذا العلم
مبروكة بحدة/من ياولد خلف
بـيّـن بحدة/لاتطرينه على لسانك
مبروكة باستفزاز/من هو يالراعي
بـيّـن ضحك/السحاب تبي الراعي يقودها خابرن الراعي يلحق السحاب!!
مبروكة بحدة/ماانت بناوي تعلم
بـيّـن ابتسم باستغباء/وش اللي اعلم عنه انا ماادري وش تبين من الاساس
مبروكة بذهول/انت خوي سهم
بـيّـن ضحك بخفة وتنهد/ايه يالدنيا ايه عجيبة صحيح
مبروكة بحدة/هالديرة مابه احد يفزع لسهم غيرك
بـيّـن ابتسم من ظنها فيه بتحدي/ومحد بيخليك تلمسين القاع غيري
مبروكة بحدة/تعقب ياولد خلف القاع مرتعك ومراحك
بـيّـن/راضي دامني اجرك له واشوفك ذليلة راضي/وقف/لاتظنين هالديرة تحت هواك لحالك لاتنسين ابو مظفر ياسحاب/مشى/
مبروكة شد على فبضتها وعقدت حواجبها بشك مابين تصدقه او تكذبه ماطلبته الا حتى تجس نبضه وصدمها بكونه الموزع ماهو بس يدري بسالفة تجارتها ومن بين اسنانها همست لنفسها بغبنة/تبطي انت وسهم وابو مظفر كل ابوكم
بـيّـن خرج من بيتها بابتسامة اخذ نفس/هذا اول الضيق يامبروكة اوله/جر خطواته وهو يخرج جواله من جيبه يتصل ابتسم من سمع صوته/يامرحبا بهالصوت وراعيه
عساف/مروق على عير العادة 
بـيّـن بابتسامة انتصار/مدري بس جرني الشوق واتصلت بك
عساف/انتبه لايجر رجولك عندي اكسرها لك
بـيّـن بضحكة/ادري اننا تحت العين هالايام داري
عسّاف/وش وراك
بـيّـن بابتسامة/وراي كل خير يا
عساف بتنبيه/احم
بـيّـن بضحكة/كل خير
............................................................
#شقّ_الغَمام