شـقّ الـغَـمـام

..(٣٠)..

..(٣٠)..
لاإله الا الله وحده لاشريك له،له الملك وله الحمد وهو على كل شي قدير
-
.............................................................
<<مجلس الديرة>>
فالح جالس قباله بين يديه منشفة صغيرة يحركها بين يديه بملل وعينه عليها وعن يمينه الدلة رفع عينه له من سمعه يكلمه
طاهر يتقهوى وسط انتظاره لها بهالمجلس رفع عينه له/ولد يافالح
فالح/سم ياعم
طاهر/عمتك مطولة؟
فالح/والله ياعم مدري انا حدي هالمجلس وقهوته ماعندي علم مير كان ودك انشد لك عم عوض
طاهر/لا لا مايبي له
فالح زفر بضيق كان ينظف المجلس بانتهاء اليوم  باستعداد لرجوعه لبيته مد يساره للدلة ورفعها ثم مد يمينه لطاهر/فنجالك ياعم؟
طاهر/كب الدلة وتيسر يافالح
فالح خاطره ينفذ قوله لكن مسؤوليته تمنعه/لا ياعم
طاهر/ياابن الحلال تيسر كان عالدلال انا الخص بهن منك ماتعود الصبح الا وهن مسنعات
فالح/ياعم مير انه
طاهر قاطعه/ياولد
مبروكة من ورا الباب نطقت بنفس الوقت/حياك الله ياابو عياش
طاهر ابتسم/الله يسلمك ويبقيك ياام زايد/التفت لفالح/هاه لفت عمتك مبروك شبخة سطام ياام زايد مبروك
مبروكة/الله يجزاك خير
طاهر ابتسم من سمع جملتها وصدها عن الرد له بالبركة
مبروكة/حياك الله ياابو عياش يم المجلس حياك
طاهر/ازين لنا في ذا
مبروكة/مير انت لافين يمي مالفيت يم الشيخ حتى تجاس بمجلسه
طاهر ميل فمه بابتسامة جانبية
مبروكة باصرار/خلص شغلك وتيسر يافالح
فالح/حاضر ياعمة
مبروكة/حياك ياطاهر حياك الله
طاهر وقف من شافها اصرارها اتجه لبيتها رفع يده بيدق الباب وانتبه له مردود سمى ودخل/ياعرب يااهل البيت
مبروكة بكامل حشمتها مستندة على عكازها على مسافة من باب المجلس/حياك ياابو عياش حياك
طاهر نزل راسه مسرع بخطواته البطيئة لكبر سنه/السلام عليكم
مبروكة/وعليكم السلام والرحمة حياك
طاهر دخل للمجلس وجلس عند الضيافة المتواجدة بمنتصف المجلس
مبروكة جلست عند باب المجلس محافظة على مسافة بعيدة بينهم/حياك ياابو عياش ماانت بغريب
طاهر ابتسم/وينه راعي البيت؟
مبروكة زفرت بخفة بسخرية ثم تنهدت بصوت/هو بقى بها راعي بيت عقب سواة ولدكم!!
طاهر بابتسامة رضا/افا ياام زايد افا الظليمة شينة
مبروكة احتدت ملامحها تحت برقعها
طاهر/مير هالمرة لكم حق ذقتوا الظليمة وانتم ماعرفتوا طعمها من خلقتوا!!
مبروكة بابتسامة/يعني ولدكم تبلّى وليدنا!!
طاهر ضحك/ياكثر ماتبلّى ولدكم وليدنا مايضركم توذقون طريف من جور الايام
مبروكة بوسع عيونها/طريف ياطاهر!!تقول طريف!!/بنبرة ارتفعت/احرمتوه الشيخة وتقول طريف!!
طاهر بحدة/هذا هو بـيّـن ضيعتي عمره راعي ماراح من عزيز كثر ماراح من بـيّـن
مبروكة عضت شفتها بغبنة
طاهر اخذ الفنجال وصب له قهوة بابتسامة/من الاول وراك يامبروكة جريتي عيالنا لحرب بديتيها وانهيتها بروحك!!ماسدّك اخذتي الشيخة من اهلها بالقوة!!هذا انتي متوسطة بيتهم ماعفى قلبك وشبعت عينك!!ماسدّك احرمتيني الخوة!!ماطاب خاطرك لذالحين!!
مبروكة بقهرها/مايطيب ولايبرد وانت لذالحين مهتني بدنيتك!!
طاهر/يوك لهالقد!!
مبروكة/وازود
طاهر احتدت ملامحه/مير خابرك من اول البعير لاحقد ارحم منك
،
،
~~قبل٥٢سنة~~
طاهر صاحب الثلاث والعشرين سنة عاصب راسه بشماغه رابط ثوبه حول وسطه بمنتصف الظهر تحت شمس القايلة الحارقة بيده بارودته يجري ورا هالضبع اللي أبلشهم ووصل به هالمرة يسرق احد صغار الغنم بجرأة بدون خوف من تواجد الراعي والمارين
فايز يجري وراه وبصراخ/طاهر يامهبول لايقرطك تعزف العافية
طاهر المعروف بسرعته بين اهل الديرة محد يجاريه بالسرعة وقف وصوب عليه وسط انفاسه السريعة ورماه
//ارتمى الضبع عالارض بعد الرصاصة اللي صابته//
طاهر وقف يلقط انفاسه بتعب
فايز يجر خطواته مهدي سرعته من ناظره واقف وبصوت انفاسه/وش موزمك(حادك)تطارده يامال الطراد
طاهر التفت له بابتسامة بصوت متقطع من سرعة انفاسه/الوعد الذيب الليلة
فايز اتسعت عيونه/ماني بخويٍ لك الليلة
طاهر يجري بخطواته لورا باتجاه الضبع وبابتسامة لفايز/خويٍ لاجارت لياليّه التفت يمناي وعينته
فايز/ابوك يافايز يالرمّة كان ماعينتني يمناك الليلة!!
طاهر العارف لنقطة ضعف صديقه ضحك والتف للضبع وانحنى ياخذه بابتسامة/فايز يافايز صحيح انك يمناي
..
<<بيت مشرف>>
مبروكة(١٦سنة)بطرحتها وعصبة راسها المزينة بفصوص الفضة بين اصابع يمينها عود الكحل وبيسارها مراية مكسورة تناظر انعكاسها تتكحل
فاطمة بذات العمر بين يديها صغيرها صاحب الاسهر المعدودة وانتفاخ بطنها معلن عن قدوم الاخر بالاشهر القريبة/يابنت والله انها بعيدة
مبروكة التفتت لها تناظرها بحدة/وش انهي اللي بعيدة هاه!!
فاطمة فزت من تعصيبها/مرته لذالحين حية ومعها بزر
مبروكة تنهدت ببرود وهي تكمل تكحيل عينها اليسرى/ياعيني انتي الشرع محلل اربع وثم الشرط هالنوبة يعرس من بني سمّار وهو معرس على بنت عمه من بني طاهر كان وده بالشيخة مجبور يعرس منا ذا العهد
فاطمة بعبوس/يابنت الله يكفيك شر عنادك
مبروكة نزلت كحلتها والتفتت لها بثقة تناظرها/علميني من هي اللي بني سمّار وبني طاهر جميع يتمنون تراعيهم لو هو عن طرف؟
فاطمة ناظرتها تتأملها فعلا هي اجمل بنات الديرة كم تقدم لخطبتها افضل الشباب واجملهم خلق وخُلق لكن الرفض كان من نصيبهم جميعا همست/مير مايبي لها راي
مبروكة ابتسمت/هماها على طريف تحتري موتها!!
فاطمة مدت يدها لطرف ثوبها من الاعلى ورفعته تنفث على نفسها/عوذا عوذا من هالطواري
مبروكة/حتى لو اخذني على راسها ثانية مردّه يرميها رمية التسلاب
فاطمة ناظرتها بشي من التردد/خافي الله بالضعيفة معها وريع ضعيف
مبروكة/الحمدلله على كل حال هاذي دبرة الله بخلقه
فاطمة قطبت جبينها بشك من كلامها
مبروكة مدت يديها لغوايشها الذهب تلبسهن وسط تنهيدتها/ايه بكرة تلفين يمي وتقولين تكفين يامرة الشيخ كلمي الشيخ يسنع وليدي
سرور وقفت عالباب بانفاسها السريعة/مبروكة
فاطمة ناظرتها/وعيباه ياسرور اعرستي ولذالحين ماعقلتي!!علامك يامرة!!
مبروكة ناظرتها/خير ياسرور
سرور/طاهر ذبح الضبع اللي مهبل بالرعيان هذا هو ارعيته غادين يم المجلس
مبروكة سحبت المراية تتاكد من شكلها ثم فزت واقفة وجرت خطواتها السريعة/مشينا يالله يالله
فاطمة تنهدت بعدم رضا على سواياهن وقفت وبين احضانها صغيرها متجهة لبيتها
..
<<مجلس الديرة>>
طاهر وقف رامي السلق بوسط المشب بابتسامة وعينه بعين مشرف المتصيد لاخطائه/هذا المشقيكم ياربعي عوذا نويته بعد ماخرطت يدي من الغدا قلت صعيب مير انه اهون من الهين
ابو طاهر الجالس بصدر المجلس بابتسامة فخر بولده اللي بني سمّار يحاولون ينتزعون الشيخة منهم بدون فايدة
مشرف/كفو عشت ياابو عياش عشت مير انه
طاهر قاطعه/الذيب مانسيته الوعد الليلة/ابتسم/مااحسن منك ياعم الليلة حنا وراك تقص أثره
مشرف بلع ريقه/مير بنيتي بالبيت لحالها مااقوى اكبّها
طاهر/ماعليه تمرح عند مرتي معززة مكرمة ياعم
ابو طاهر ابتسم بموافقة/صحيح ياابو مبروكة ماازين منك بقص اثر هالمسعّر والعييل تخبرهم يضيعون مرات
مشرف سكت مجبر
طاهر ضرب يديه ببعضها ينفضها/اجل لاصلينا العشا لفينا يمك انا وفايز وشدينا رجلينا يمهم/فتح شماغه ونسفها/
مشرف هز راسه رغم عدم رضاه/على خير على خير
طاهر ناظر ابوه/ياشيخ تامر على شي
ابو طاهر/سلامتك وانا ابوك سلامتك
طاهر/السموحة يالربع/مشى/
فايز وراه بابتسامة حماس/ياولد ذالحين انا اسبقك يم الخلا
طاهر كبح ضحكته/نشوف الليلة وش بيسوي هالشويب بنا
فايز اسرع بخطواته ومشى جنبه بضحكة/خوفي نصيده قبل الذيب
طاهر انفجر يضحك سند كوعه على كتف فايز/ياولد فالك ماقبلناه ناقص انا من قومك عِدا!!
مبروكة جارة خطواتها بتبختر
طاهر احتدت ملامحه من ناظرها على مسافة اعتدل بوقفته واسرع بخطواته
سرور تمشي بجانب مبروكة بخطوات سريعة ثم تهدي خطواتها بسبب مبروكة التفتت لها وهمست/اسرعي علامك
مبروكة ماردت
طاهر مرّ من جنبهم صاد
فايز وراه بمماثله لفعل طاهر
مبروكة وقفت والتفتت له بابتسامة تناظر قفاه/تجيبك الايام ياطاهر تجيبك
..
<<بيت الشيخ ابو طاهر>>
//يسكنه الشيخ ووحيده طاهر وعايلته رغم كبره الا انه اغلبه خالي بعد رحيل اخوان الشيخ للمدن وتركهم للديرة//
طاهر دخل لبيته بابتسامة اسرع بخطواته/منيرة منّور يابعد كل الزيلان يامنورتي
سارة(٢٠سنة)بوجهها الشاحب وجسمها الناطق بتعبها بوضوح خارجة من الغرفة وبين يديها منيرة صاحبة السبع اشهر بالقوة مثبتتها من كثر حركتها من وصلها صوت ابوهز
طاهر جرى/ياعين ابوي انتي ياهلا ومرحبا/وقف قبال سارة اخذ منيرة من يديها وقبّل جبينها/هلا بام منيرة/ثم بدا يوزع قبلاته على منيرة بحب وسط ضحكاتها/
//عالقهوة//
سارة ناظرتهم بابتسامة/طاهر
طاهر نزل فنجاله/سمي ياام منيرة
سارة بابتسامتها/سم الله عدوك ياابو منيرة عينت لك بنية حلال
طاهر اختفت ابتسامتها واحتدت ملامحه رفع عينه عليها/سارة اقطعي الهرجة دام هذا اولها!!
سارة/محد اخبر بعمره ياطاهر
طاهر بحدة رفع صوته/سارة!!
منيرة اختفت ضحكتها تناظر ابوها بوجهه اكتساه البكى المكبوح
سارة تنهدت/هالمرة ماني بساكتة اسمعني مثل مااسمعك ولّا ورب البيت ان تشرق شمس بكرة وماتعيني لا انا ولا منيرة بالبيت
طاهر/علامك يابنت ضيعتي عقلك وانتي اعقل الحريم بهالديرة!!
سارة/انا خابرة وادري ان عمي اجبرك على الجيزة
طاهر اتسعت عيونه بذهول من علمها
سارة ابتسمت من ناظرت ملامحه/مانسيت ولا غاب عن عيني لذالحين بكاك بهاك الليلة يوم عمي خيرك بيني وبينها
طاهر رجف قلبه وبلعثمة/سسارة مير اني
سارة قاطعته/البني ادم ماله سلطة على قليبه ياطاهر ويشهد الله ماشفت منك الا كل خير ومحبة
طاهر/يابنت عمي لو تنعاد هاك الليلة من جديد والله بعالي سماه اني لاخذك مرة وثنتين وثلاث
سارة بابتسامة/ونعم من طيب اصلك ياولد عمي مير ذالحين ودي انك تعرس على عيني
طاهر/سارة تكفين فكينا من هالطاري
سارة/طاهر اسمعني ثم بعدها اسمعك
طاهر تنهد/هاه وش بقى عقب ذا كله
سارة/حمدة
طاهر تسارعت نبضات قلبه لازال يكن ذاك الحب اللي توقع نساه ونسى ايامه من سنين اربع سنين مرت على زواجها ورحلت مع زوجها وانقطع ذكرها عن الديرة وانقطعت عن باله وانشغل بدنيته توقع نساها ونسى ذاك الحب اللي يسكنه توقع ان قلبه هدا وهدت فزاته اللي كل مالمح زوله يداهمه اخطأ بظنه لنسيانها لازالت تسكنه حتى اللحظة لكنه يتنساها بكل مافيه
سارة/عودت يم الديرة عودت عند جدتها زوجها توفى من سنتين ومعها وليدها صغيّر شفته امس يازينه توه ماكمل الثلاث
طاهر ناظرها بخوف وتردد من اللي ناوية تقوله
سارة ناظرته/ورا ماتاخذها منها اتطمن على منيرة بين يديها
طاهر بعصبية/منيرة مالها غير امها وش هالعلوم الماصخة!!
سارة/علمني قبل ياخذها غيرك ياطاهر
طاهر بلع ريقه من اجتاحه توتر وارتسم على وجهه بيفقدها للمرة الثانية بيفقدها بدون مايبذل مجهود ويبقى على لوم نفسه وحظه بنهايات الليالي لحاله سكت بتفكير
سارة تنهدت براحة العادة ينفجر بوجهها بغضب برفض كلي للفكرة لكن هالمرة غير لانت ملامحه وسكنه الهدوء وغرق بافكاره صحيح حمدة صاحبة لسان سليط لكن على من يتجاوز حدوده معها طالتها افتراءات اجبرتها تقفل باب جدتها عليها لكن قلبها يفيض بالرحمة للي حولها لهالسبب مستأمنتها لابعد الحدود على منيرة حتى قبل الموافقة منهم الاثنين ناظرت منيرة مدت يديها/تعالي تعالي
...
الليل
..
<<بيت الشيخ ابو طاهر>>
سارة جالسة عند النار تجهز العشا بملامحها الشاحبة من تعبها المعتاد
مبروكة جلست جنبها ومدت يدها/هاتي عنك
سارة ابعدت يدها حتى ماتاخذ الملعقة/واعيباه ضيفتي تجهز عشانا لايدرون العرب
مبروكة/يابنت الحلال ماني بضيفة وانا كل يوم عندك الا كانك ترعيني ضيفة لذالحين!!
سارة/يشهد الله انك عزيزة وغالية مير لا بالله ماتقربين شي الليلة
مبروكة زفرت بضيق/ليه ياسارة عاد!!
سارة بابتسامة/روحي يم منيرة كانك صادقة لاتلقط الحصى وتبلعه
مبروكة وقفت/ابشري/جرت خطواتها بالبيت تتأمله ابحرت بخيالها كونها صاحبة هالبيت بالمستقبل القريب وانتهت حتى لاسماء عيالهم واي الغرف تناسبهم صحت من هالمخيلة على صوت منيرة الصغيرة ناظرتها مميلة فمها للحظة ثم جلست عندها وبابتسامة/حتى انتي حياك الله/اشرت على احد الغرف وبنفس ابتسامتها/هذيك غرفتك ماتذوقين الضيم وانتي تحت جناحي
..
<<بالبر>>
مشرف شبه جالس يناظر الارض بحيرة
فايز الواقف وراه التفت يناظر طاهر بابتسامة
طاهر المشتت بتفكيره بكلام سارة انتبه باخر لحظة لنظرات فايز وابتسم
فايز قطب جبينه باستغراب منه
مشرف وقف تظاهر بالثقة/عليم الله انه/اشر لقدام/في ذاك
طاهر بضيقة اخلاقه الليلة/وشلون شفت الاثر بهالظلمي
مشرف التفت له بغيظ/وشو
فايز بعلثمة/ياعم مشرف تخبر طاهر مايداني الظلمي
طاهر التفن يناظره بوسع عيونه من كبر الكذبة
فايز/ولّا علامه استفزع بك دون باقي العرب
مشرف تنحنح رغم عدم رضاه/ورعان وش يعرفكم بعلوم الذيابة وصيدها!!
طاهر زفر بسخرية
فايز ناظره بحدة يسكته/صدقت ياعم مير وش قولك نتريح ونحتريهن يم الشبوك
مشرف/زين الراي/مشى قبلهم/
طاهر ضحك بغبنة همس/مير الذيابة تخبر الريحة
فايز ناظره بحدة يطلبه يسكت
مشرف التفت وراه/علامكم اعجلوا وخرتونا!!
..
<<بيت الشيخ ابو طاهر>>
ابو طاهر يتعشى بصالة البيت/تعشت ضيفتك؟
سارة/كثر الله خيرك ياعم عساه دايم ومبروك
ابو طاهر ابتسم/عساه هني وعافية ياسارة
سارة/ياعم
ابو طاهر رفع عينه ثم نتظرها للحظات وقف اكله من لمح الجدية بعيونها/هاه يابنت عاطي وش وراك
سارة/تراني خطبت حمدة لطاهر
ابو طاهر انفجر بصراخ/وشو تخطبين لطاهر من!!
سارة بثبات/اللي سمعته ياعم حمدة بنت حسن ماغيرها
ابو طاهر/انهبلتوا يابني طاهر صحيح ماعينتي غير بنت الغريب ماهم منّا ولا من بني سمّار ياكود ارضى بها فوق راسك!!
سارة/تخيرت اللي تخاف الله ببنيتي ورجلي وتقوم بهم على سنع ومحبة
ابو طاهر/ياكثرهن يابنت عاطي مير عيونك مغشين عليها!!
سارة/ياعم
ابو طاهر قاطعها/وضيفتك الليلة ولّا بعد مغشيتن عينك عنها هاه
سارة تنهدت/ماتصلح لطاهر ياعم
مبروكة الواقفة خارج الصالة تسمع النقاش بدون قصد كانت مارة تبلغها عن نومة منيرة وصدف تواجدها بوسط هالنقاش الحاد رجف قلبها من طاري هالحمدة اللي ماطرا على بالها بيوم وصدمة عمرها رفض سارة لها بهاللحظة بلعت ريقها تكبح غصة توسطت حنجرتها بلا ارادة منها
سارة/طاهر حار وهي حارة هو شيخ وهي تحب الشيخة البيت مايتحمل راسين يتناطحون والله ان ياقع سقفه قبل يخلص بناه
ابو طاهر بحدة/الشيخ يبي له شيخة ودام قلتي عنها شيخة فهمي عزّ الطلب ياسارة
سارة باصرار على رايها/ياعم مابه غيرها توسطت قلبه ولا به غيرها ملت عيني ياعم
ابو طاهر بحدة/بعيدة عن خشمك وخشمه ياسارة
سارة باستخدام لاخر سلاح بين يديها/ياعم بنيتي امانة برقبتك كان الله خذاني
ابو طاهر قشعر جسمه/عوذا من هالطاري انهبلتي ياسارة!!
سارة بابتسامة/مير ياعم مايخفاك المودع وراه تهج عويناتك عن عويناتي هالايام
ابو طاهر سكت
سارة ابتسمت/ياعم منيرة تكفى ياعم
ابو طاهر/مير ياسارة
سارة برجى/ياعم مابه مثل حمدة لها ياعم تكفى لاتردني ودي اتطمن ياعم تكفى
ابو طاهر ناظرها بصمته
سارة/ياعم مابه فرق بين بنت الشيخ وبنت الغريب الغريب ماشفنا منه الا كل خير علامكم عليه ياعم وهو راعي مواجيب
ابو طاهر ساكت
سارة/ياعم ارحم قليب طاهر وحنّ على منيرة من لهم عقبك بعد عمرٍ طويل
ابو طاهر ناظرها/مير ياسارة
سارة/ادحر ابليس وطاوعني ياعم تكفى طاوعني
ابو طاهر سكت بتفكير بعد اصرارها على طلبها رغم معارضته الشديدة
مبروكة واقفة وسط شلال دموعها اللي ماقدرت تمنعه كيف تكسّر قلبها وتحطم وش يعني طاهر يحب!!كيف اصلا يحب وهو حتى سارة مامنحها حبه اعطاها الاحترام واكتفى كيف هان على سارة الخيانة كيف قدرت تخونها وتخون محبتها لها وتخطب له غيرها وهي بذا القرب منها وقبال عيونها،كيف استسهلت تهينها وتخطب لها وحدة غريبة عن الديرة بوجودها كيف تجرأت تحطها تحت ضوء المقارنات ولا وجود للمقارنة بينهم هي الاكمل من كل النواحي  انشحن صدرها غضب من هالسارة ونيتها لطاهر جرت خطواتها بغضب خارجة من هالبيت وراجعة لبيتهم
..
يوم جديد
..
<<بيت مشرف>>
سرور جلست قدامها بتعب مدت لها العشبة/هاك
مبروكة بملامح منفوخة من كثر بكاها من القهر اخذتها بهدوء
سرور/هاه ترا عمتي تقول ماتكثرينها ابد ريحة بس مير ماعلمتيني علامك وش تريدين بها
مبروكة ماردت
سرور ناظرت وجهها بتمعن/علامه وجهك قايلن هاللون اتسعت عيونها/لاتحطينها على وجهك اخاف تعمل بك علّة مابعد نشدت عمتي تجيب شي او لا
مبروكة بهدوءها/مرني العصر اعطيك لبن تاخذينه معك لا غديتي يم سارة
سرور ناظرتها باستغراب/ماانتي برايحة معي؟
مبروكة ناظرتها بحقد/يحرم علي اطبّه وهي به ياسرور
سرور قشعر جسمها من نظراتها
مبروكة/مريني لاتنسين
..
بعد اسبوعين
..
<<بيت الشيخ ابو طاهر>>
//اليوم اخر ايام العزا//
ابو طاهر بوجه مكتسيه السواد من كثر الحزن على فراقها كانت سارة بنته قبل تكون بنت اخوه اليتيمة كانت ونعم الابنة الحنونة البارة العطوفة عاملته معاملة الاب ماقصرت بحقه بيوم وهو ماقصر بحقها يجتاحه شي من الندم وتأنيب الضمير على بعض اللحظات اللي يحس بشي من الخطأ بحقها تنهد من سمع موعظة احد المعزين له بوجوب الصبر همس/الحمدلله على كل حال الحمدلله/التفت يمرر نظره بين الحاضرين يدور عليه والتقت عينه بعين الاخر المتواجد واشر له/
فايز بين يديه الدلة يباشر المعزين اسرع بخطواته من اشر له الشيخ يجيه وقف عنده وانحنى/سم ياشيخ
ابو طاهر باستغراب/وينه طاهر
فايز/مدري ياعم من اصبحنا ماارعيته
ابو طاهر بقلق/كب اللي بيديك ورح عيّن خويك وينه رح يافايز
فايز/ابشر ياعم ابشر
..
<<اخر العصر>>
طاهر حاول بكل مافيه يتماسك اليومين اللي فاتت وفعلا نجح وقدر يسيطر على نفسه ويتماسك لكن  اليوم خانته مشاعره واجبرته يهيم بالديرة على وجهه وبلا هدف يجر  خطواته وسط اثار صدمته بوفاة سارة كانت له نعم الزوجة ونعم الصديقة رغم جفاه القلبي من ناحيتها الا انه عاش بحبها وحنانها واحتواءها له عاملته بما يرضي الله وعلى اكمل وجه احتواه الندم الممتزج بحزنه وسيطر عليه كيف راحت بسرعة باقي مااعطاها حقها للحين ماعيشها ملكة تتربع على عرش قلبه توفت وهو مقصر بحقها بالحيل وقف على راس رويع(يشبه الجبل لكن صغير مو بذاك الطول)رفع راسه لفوق يسحب الهواء بكل مافيه حتى يكبح دموع الحزن لاتنزل ويعلن احتلاله لصدره هلت دموعه بدون اخذ لرايه بل من كثر سيطرة لمشاعر فقده لها صرخ/سااااارررةةة!!
مبروكة المراقبة له طول ايام العزا بانتظار انفجاره بعد هالهدوء والرضا اللي كان مسيطر عليه بغرابة مشت وراه لحظة خروجه من المجلس تتبع طريقه طول الطريق ماانتبه ولا حس بها ابد ايقنت هاذي فرصتها العظيمة هينا دورها بتثبيت اول ركايز علاقتهم ببعض نطقت بعد ماتردد صدى صوت صرخته بالخلا/احزن على سارة
طاهر التفت لها باثار دموعه الواضحة على وجهه بتقطيبة جبينه من تواجدها
مبروكة برجفة صوتها/واملا صدرك بذكرى سارة
طاهر يناظرها باستغراب
مبروكة/وبعدها اصير لك سارة
طاهر بعدم استيعاب/هاه!!
مبروكة تقدمت له/انت ليه تدور حولي وماتراعيني ليه عينك تبعد عن الخير اللي بين يديك
طاهر احتدت ملامحه وتراجع بخطواته لورا/استحي يامرة!!
مبروكة مدت يدها ليده/طاهر/مسكت طرف كمه بكل مافيها برجى وسحبته لها/ليه ياطاهر ليه
طاهر بوسع عيونه سحب يده مبعدها عنها بكل قوته/اعقبي ياالردية!!
مبروكة اختل توازنها من سحبة يده بوسط  صدمتها من ردة فعله وصدمتها اكثر من اللي نطق به بحقها تراجعت لورا بمحاولة منها تتوازن لكن بدون اي فايدة ارتمت على الارض وضرب راسها بمجموعة الصخور المتشكلة بغزارة عند مكان وقوفها قبل السقوط اعتلت صرخة من قوة ألمها وسكنت بدون صوت ولا حركة فاقدة لوعيها
طاهر ناظرها باشمئزاز مشى لخطوات ثم التفت وراه يناظرها بشك رجع طريقه لها وقف عندها/هيه
مبروكة ماردت
طاهر انحنى شبه جالس يناظرها بتردد اخذ نفس ومد يده لها لمسها بخفة/هيه بنت
فايز الواقف اسفل الرويع يناظره بصدمة
عطية الراقف بوسع عيونه صرخ/عيب استح على وجهك محارم الخلق استح
فايز رحف قلبه من الحكم المسبق وسوء الظن والتفت يناظره بذهول
طاهر التفت يناظره بحدة من قوة كلامه بحقه
..
الليل
..
<<بيت مشرف>>
مبروكة فتحت عيونها صحت من اغمائها تناظر المكان حولها بذهول
مشرف فز بخوفه من ناظرها/بنت مبروكة
مبروكة جلست بملامحها المخطوفة وبرجفة صوتها/يبه انت وينك علامك اتدسس عني!!اوحيك قريب وماارعيك
مشرف هوى قلبه برعب جلس جنبها مسك يديها/مبروكة علامك يابنت لاتروعيني
مبروكة هلت دموعها وشدت على يده/وينك يبه ماارعيك/صرخت/ماارعي شي الدنيا ظلمى يبه ظلمي يبه/سكتت للحظة باستذكار للي حصل فوق صده راح اغلى شي بالحياة من بين يديها صرخت بهستيريا/طاهر طاهر 
مشرف احتضنها بين يديه يهديها بوسط رجفة صوته من غصته/ياابوك علامك بسم الله عليك علامك
مبروكة بوسط شهقاتها صرخت/اخذ روحي يبه اخذ عيوني يبه اخذها/اعتلت شهقة من اعماق قلبها من كثر القهر واغماء عليها من جديد بين يدين ابوها/
..
//بعد ثلاث ايام//
..
<<مجلس الديرة>>
مشرف بصراخ وسط غبنة ملت صدره/بنتي انعمت من سوايا هالردي لو مالحق عليها ولد الحلال الطيب كان الله العالم وش صابها فوق العمى!!
ابو طاهر/احشم عمرك ياابو مبروكة الكل يشهد بفعول طاهر وطيبه واكيد السالفة بها شي مافهمناه
مشرف/ايه ايه حامي عن ولدك هماه ولد الشيخ ولد بني طاهر روس القوم راعين الاولة والفعول الجزيلة وانا بنتي بنت بني سمّار اللي يتبعونهم يوكل حقها!!
ابو طاهر/استهدي بالله يارجل خلنا نحل الموضوع
مشرف/وش تحل وولدك أعمى بنتي وقطع رزقها الحل انه ياخذها طرق وهو مايشوف الدرب ولا الشيخة بعيدة عنكم يابني طاهر جميع
ابو طاهر احتدت ملامحه
//اعتلت اصوات بني سمّار بالظلم الواقع هالمرة وكثير عليهم ولدهم ارتكب جريمة بحق بنتهم ولولا اللي حصل محد كان يعرف الى اي مدى بينتهي الموضوع وكل شخص يرمي توقعه واستنكاره وغضبه وعدم رضاه اختلطت الاصوات معبرة عن كمية الغضب اللي احتلت سما بني سمار وبداية نهاية بني طاهر//
فايز يناظر بني سمار بصمت بعدم رضا على اتهامات جماعته الظالمة بحق طاهر ناظرهم بقلة حيلة كيف بيقدر صوته الوحيد على هالجمع الثاير الغاضب
ابو طاهر/يابني سمّار
مشرف تكلم من سكت الكل بعد ندا ابو طاهر/لاتظن انك شيخنا بيروعني واسكت عن حق بنتي لا بالله مابي خير/التفت لهم يمرر نظره بينهم/ولابكم خير كان سكتوا عن حق المظلوم
//اعتلت اصواتهم من جديد بذات الكلام والاتهامات//
طاهر الجالس بصمت يسمع جميع أنواع الاتهامات والشتايم بحقه شاد على قبضته بغضب يكبحه يستقبل منهم سيلهم الجارف بانتظار نهايته حتى يدافع عن نفسه طال الانتظار ونفذ صبره صرخ/بــس انكعموا عنّا يامال الذهاب!!
//الكل يناظره بصمت وصدمة//
ابو طاهر غمض عيونه وزفر بخيبة ايقن هالصرخة ماهي الا نهاية بني طاهر وواجب عليه يتصرف
طاهر بغضب/ماربيتوا بناتكم وجايين يمّنا تحذفونا!!
مشرف بوسع عيونه/وشو!!اعقب يالردي
طاهر ناظره وبانفجاره/ماالردي الا انت ياكبر الظلم وياشينه الله بعالي سماه يشهد مالمستها ولاقربت منها لمستي يوم وقعت ولمسة معونة ماهي بلمسة سواد ظنونكم ياسويدين الوجيه
مشرف/تعقب وتخسى محدن سويد الوجه غيرك
طاهر/ارعوا من يكعمنا من مايعرف الشرق من الغرب ونافخ ريشه علينا!!
فايز المتربع حنى راسه ليمينه وسنده على كفه اليسرى المستند كوعها على فخذه الايسر بقلة حيلة
طاهر/ماهو بكيفكم تلزوني على شين مااريده!!وشرطكم ذا اللي تمارونه(يلوحون)فوق روسنا من سنين ماهو ماهو بساطيٍ علي
ابو طاهر رفع صوته/صحيح
//التفتوا يناظرونه بعدم تصديق//
ابو طاهر/طاهر مرته الله يرحمها خطبت له بنت حسن قبل تتوفى
مشرف اتسعت عيونه/وشو اتسيدنا بنت غريب!!عز الله كملت شيخ معتدي ومرته بنت غرب مانعرف لهم اصل وسط العرب
طاهر/والله لو مابقى على وجه الارض غير بنتك مااخذتها مااخذتها وهي كاملة ختى اخذها ذالحين!!وثم احشم عمرك بنت الغريب صاينة روحها احسن من اللي تدوج على راسها وسط البيوت بدون حيا!!
مشرف هجم على طاهر
طاهر سدد له ضربة وقفت مشرف عند حده وقدر عليه بسهولة بحكم فرق السن بينهم/تعتدي علي في بيتي ومجلسي واسكت لك/مرر نظره بينهم/تعقبون تعتدون علي واسكت لكم ياقوم بقعاء!!
ابو طاهر وقف ونزل بشته ورماه عند مشرف/هاه الشيخة لكم يابني سمّار واعتقونا منكم
طاهر انتفض قلبه من سمع كلام ابوه والتفت يناظره بذهول
مشرف ضم البشت بغبنة وحرقة وقف/ليه هي الشيخة تنقص منكم شي
طاهر التفت يناظره بغبنة/هذا انتم تداحرون تبونها من مبطي يوم جتكم تردونها!!
مشرف/حق بنتي ماتكفيه شيخة ابدا
ابو طاهر/وش اللي يرضيك ياابو مبروكة
مشرف/البيت والمجلس
طاهر اتسعت عيونه
مشرف/وزولكم يبعد عنّا اقلها كيلو
ابو طاهر/تم
طاهر التفت يناظر ابوه وسط سرعة نبضات قلبه وبرجى/يبه البيت بيت جداني وشلون ترضى يبه هذا بيتنا من سنين وبنين تكفى يبه
ابو طاهر رفع يده بوجهه يسكته/غيره يامشرف
مشرف/نص حلالك تاهبه بني سمّار
ابو طاهر/حلالي كله فدا راس ولدي يحرم يعود يمّنا لو هو راس
طاهر امتلت عيونه دموع وبحزن خيم على صوته/يبه
ابو طاهر التفت يناظره بحدة ينهاه
طاهر بلع ريقه كبح دموعه من كثر القهر
ابو طاهر جر خطواته/امش ياطاهر قومٍ ماقدروك وش تريد بمجالسهم امش
طاهر جر خطواته ورا ابوه بندم وحزن متسبب بنهاية شيخة بني طاهر على يديه
،
،
مبروكة/ماعرفت الحقد الا من سواياك!!
طاهر/سواياي تبرق وترعد طهر غطسي الرايات السود بهن وطلعيهن يبرقن بياض من نقى فعولي يابنت مشْرف
مبروكة ضحكت/نقى فعولك عساه بنقى فعلك بي
طاهر ضحك/ايه من كثر اكذابك حتى كذبتك صدقتيها!!
مبروكة بابتسامة/ماسدتك مذلة السنين تبيني اكمل عليها بيننا!!
طاهر بابتسامة ثقة/لا بالله انا اللي بأماري بمذلة بني سمّار تحت سما بني طاهر
مبروكة احتدت نظرتها
طاهر/طلع من يفرش الدرب لي ويقول سم حياك ومن احب عيالك عليك يامبروكة
مبروكة امتلت غيظ
طاهر بابتسامة/هاه يامبروكة تبينا نماري على عيون بني سمّار جميع ولا نماري بها بيننا؟
مبروكة شدت على عكازها بقهر
طاهر بابتسامة رضا/علمتك من الاول وشو له تجرين العيال بيننا
.
#شقّ_الغَمام