شـقّ الـغَـمـام

..(٣٥)..

..(٣٥)..
أشهد أن لاإله الله الا الله وان محمد رسول الله..
اللهم صل وسلم عاى نبينا محمد..
اللهم اشف مرضانا ومرضى المسلمين..
-
وداد رمت سلة الملابس عالارض تكتفت/الحمدلله الجنة والنار ماهي بيد الخلق وزوجي راضي محد له كلمة علي!!
حمدة وقفت وهي تتكلم بغيظها/انرضيتي بحصاة على جبهتك يامال الخزى يالمخزية ياللي ماتستحين وين تعرفين الحيا وذي سواتك بالله ذا شي تطلعين به قدام احد غير رجلك مير ماعليك ملامة الملامة تلحق الثور اللي متوليك عساك تتلوين تحت رجوله من الوجع
وداد تنهدت بصوت مسموع/صعبة وبالحيل،اتلوى تحت رجوله ياكبرها به شي واحد هو يتلوى صحيح
حمدة عبست بوجهها باشمئزاز
وداد ثنت يمينها حول خصرها/قلبي وقلبه تلوت حول بعضها من كثر الحب مير عسى الله يعين قلوبكم ياهي بتمرض من كثر الغل والحسد
يقين(ببيت نور اللي كان بيت عياش قبل وسكنته فترة)واقفة ورا الباب ماسكته بيدها تحاول تفتحه بعيون تنطق غيظ/خليني اطلع تكفين
نور بفستان ابيض مشجر ناعم وبظفيرة فرنسية وقلوس شادة عالباب بيديها حتى ماتفتحه يقين/فكينا جايتني ننبسط ونغير جو ولا ننغث!!
يقين/يعني كل هالكشخة اللي جيت فيها وتتوقعين ماراح انبسط
نور بضيق خلق اتضح على ملامحها/مايسدك ننبسط سوا
يقين تركت الباب وانحنت تلبس كعبها القريب منها مجاور للباب/والله جلستك ماتنمل يانور عيني مير هالحية يبي لها تردين الصاع بصاعين ليش تحبسين نفسك وهي تسوي ماتبي وعلى هواها!!بنجلس برا المكان مو ملك لها تراه بيت جدك انتي احق منها!!/اعتدلت بوقفتها/بس بنطلع نتقهوى والله بس اتقهوى هاه حلفت
نور ميلت فمها للحظة عقدت حواجبها وهي تناظر طول الكعب/تتقهوين اجل
يقين مدت يدها للباب وبرجى/نوري تكفين
نور الحافظة والعارفة طباع اختها ماتقدر تمنعها اكثر/اوعديني هالكعب مايعرف الا رجولك والارض
يقين/وعد وعد
نور تنهدت ونزلت يديها عن الباب/هدي شوي فكينا من المشاكل
يقين فتحت الباب بحماس وناظرتها/غيري الفستان ولّا اقولك خليك كذا/خرجت/
حمدة كشت بيمينها على وداد/وعوه الا وعوه قلب من تلوى هاه!!قلبك وقلبه!!/ضحكت بسخرية/مير انها واضحة وضوح الشمس من غزى قلبه النور ماعاد لك مقعاد
وداد كتمت غيظها وارتسم على ملامحها
يقين وقفت على باب بيت نور وناظرت وداد رفعت يدها لعيونها تغطيها وعطتها قفاها وبنبرة عالية/اويلااااه ياعيوني ويلي
حمدة اتسعت عيونها من سمعت صوتها ثم التفتت لغصنة بنظرات حادة
غصنة صدت بوجهها للجهة الثانية متجاهلة نظرات جدتها
نور خرجت من بيتها
يقين تتصنع الفزع مسكت نور تلفها/لاتناظرين لاتناظرين به شي يروع ورانا
وداد ابتسمت من ناظرت نور تخرج/مالومك احد يتحمل كل ذا الزين
حمدة بسخرية/والله والفرقى وينه الزين!!كان الزين شرق فانتي غرب
وداد زفرت بابتسامة سخرية
حمدة/والله ماعرفتن الزين يابنات منور غركن طيب الرجال والا انتن ماتسون التالية من الغنم
وداد/معذورة معذورة ياام خلف العتب على النظر
حمدة بوسع عيونها/تعقبين وتخسين يامال العمى
وداد تخصرت وبابتسامة/مقيولة ماالحب الا للحبيب الاولي
نور شدت على قبضتها ولفت بترجع بيتها
يقين مسكت يدها شدت عليها توقفها وسط نظراتها الحادة بنهي عن اللي تسويه
نور ناظرتها برجى
يقين هزت راسها بخفة بلا
وداد ضحكت/محد متربع بقلبه غيري ولو مالي مقعاد مثل ماتقولين علامه يوم رجعتي لبيته صار عرس بالديرة ولا نسيتي!!
حمدة بحدة/كل ابوها نعجتين صارت عرس ياحبك للتهول يابنت منور
يقين ضحكت والتفتت تناظرها/ليته احد ذاقها تاليتها حطيناها للبهايم ويوم اصبحنا محلها حتى البهايم عايفة
حمدة ابتسمت برضا من ردها
وداد بابتسامة/ياكثر الغبنة/قفلت انفها بيدها/يوه ريحة حراق تذبح!!
حمدة/الا ريحة عفنك اذوتنا(تصرع)وانتي قبالنا كذيا كان ماتدرين
غصنة شرقت بقهوتها
وداد اختفت ابتسامتها
يقين/ياشين شوفة النفس وليته على سنع يعني انا اللي ماشفت ظاهر الا مرتين وعرفت طبعه
حمدة/صحيح لولا هالكرش ماخطت رجلك البيت
يقين/المصيبة واضح السبب لنا كلنا مير انتي
حمدة كملت/تحبين التهول يابنت منور
يقين/صحيح
وداد رفعت قميصها تنفث على نفسها/قل اعوذ برب الفلق ومن شر حاسد اذا حسد اعوذ بالله منكم وبسم الله علي وعلى جنيني مالقوا بالورد عذروب قالوا به شوك
حمدة/تعقبين يكرم الورد عنك يالبرشومي
يقين/ترا حتى الضباع تحمل وتلد ماهو بمعجزة تكفين الحقي عمرك وتعالجي هاه شوفيني علمتك لاعبة بك الاوهام ياحول!!
وداد بغيظ/احترمي نفسك محد لاعبة به الاوهام غيرك!!
يقين تكتفت/وشلون اخذ بكلامك واحترم نفسي وانتي بهالمنظر قدامي يعني والله الواحد يستحي يلبسه اقلها اقفلي بابك عليك
حمدة/ويل حالي كان الله في عونك ياظاهر تصبح على ورد وتمسي على برشومي
وداد/برشومي يطير فيك يالعجوز
حمدة إتسعت عيونها/ياقليلة الحيا
وداد ناظرت يقين/وانتي زوجة راعي ولك وجه تكلميني!!
يقين بثقة/زوجة راعي معززة مكرمة مارميت نفسي على احد بلا كرامة!!
وداد بصراخ/مين اللي بلا كرامة هاه
يقين/هدي هدي لايطيح ورعك وتبلشينا ياصاحبة المعجزة
حمدة/ماكذبت يسلم فمها كلن يدري ليش رجعك ظاهر وحتى طاهر ماكفّر عن يمينه لسواد عيونك يالمخزية
يقين/لاتنفخين راسك الفاضي ذا علينا اعرفي قدرك قبل تناطحين
حمدة/عسى ينطحك تيس مربوط بالشبك شهر ويفكنا منك وثم الراعي اخو زوجك يالفدغى اقضبي لسانك لايدري زوجك وثم لاتنفعك نعجتين ولا تشفع لك الكفارة
وداد تناظرهم بقهر وحقد/من كثر الحسد وقلة الحيلة مالكم غير ألسنتكم يوك عليكم
يقين/الا من خيابك تناطحين بوسع وجه
حمدة/وجهٍ اغبر يناطح على خساسة امحق مناطح/كشت عليها/هه/انتبهت لنور وبابتسامة/ياهلا ومرحبا ياحي الله نور الكون وكل اشراقه
نور اتجهت لها قبلت راسها وكفها/صبحتي بالخير جدة
حمدة/الخير وجهك وملفاك واقبالك/التفتت لوداد/سبحان من خلق وفرق/كشت عليها/مالت الا مالت تف
وداد جرت خطواتها السريعة لبيتها بقهر وقفلت الباب بكل قوتها وهي تتوعد بينها وبين نفسها
حمدة ابتسمت برضا من سمعت قفلت الباب الغاضبة منها
يقين بابتسامة رضا/عسى هالقفلة دايمة اشهد انها طرب
حمدة/اي بالله صدقتي/التفتت بابتسامتها والتقت عينها بعين يقين/
يقين اختفت ابتسامتها من ناظرتها
حمدة تنحنحت واتجهت لفرشتها حتى تجلس
يقين لفت عنها واتجهت لبيت نور بصمت
نور وقفت بحيرة بين تروح لاختها او جدتها
حمدة/الحقي اختك واكرميها بعدين تعالي يمي وتقهوي يابنية
............................................................
<<بيت عايض>>
خالد دخل للبيت يجري بفرح/خلود يمه وينكم 
خلود اتجهت له/هاه هاه بشر
غالية خارجة من غرفة العيال مسرعة بخطواتها/وش صار علمنا
خالد بابتسامته/جبت ٩٦
خلود صرخت ثم نطقت/مبروك مبروك
غالية ضمته بفرح/مبروك يمه مبروك
خالد بتردد/مير خلود
خلود بتوتر/وش؟اصلا ماذاكرت زين حتى لو جبت ٨٠راضية الحمدلله
خالد صرخ بابتسامة/ماذاكرتي زين وجبتي٩٩يالدافورة 
خلود تناظره بذهول/قل والله
غالية اتسعت عيونها بفرح/صحيح ياخالد
خالد/صحيح يمه صحيح
غالية زغرطت بكل مافيها/فالك الطب صحيح ياخلود/ضمتها/مبروك يابنتي مبروك
عايض وقف قبالهم بحدة/ماهو بعلى كيفكم الموضوع!!
غالية احتدت ملامحها والتفتت له
خلود/بس يبه
عايض قاطعها/مابه بس مردك تقعدين بلا وظيفة ماانتي احسن من بنات الديرة وش تبين بالعنا
غالية/العنا راضين به والرزق بيد الله وشو له توقف بطريقها!!ذا بدال ماتفرح وتعاونها
عايض/مابقى الا انتي تعلميني وش اعمل
غالية ابتسمت بسخرية
عايض احتدت نظرته من فهم مغزاها/غالية
غالية ناظرت عيالها/روحوا داخل
عايض/خليهم واقفين وشو له تطردينهم خليهم يشوفون اخلاق امهم الزينة
غالية/لا والله اني احاول اضف مابقى من جمايل بيننا لخاطرك وخاطرهم
عايض بحدة/غالية!!
غالية تنهدت/ماينفع الكلام بيننا وانت كذيا لاتفكرت بالموضوع عود وعلمنا/مشت/
عايض بصراخ/غالية غالية
غالية دخلت وقفلت الباب بدون اهتمام
خلود/يبه
عايض التفت يناظرهم بغضبه/خير
خلود بلمعة عيونها وبرجفة صوتها/اشتقت لك يبه
عايض ارتخت ملامحه بذهول
خلود/اشتقت لابوي الحبيّب اللي يسمع ويشاور ويضحك اللي قدامي ذالحين يشبه ابوي بس ماهو بابوي/مشت مبتعدة/
خالد ناظر ابوه بنظرات عتاب وسط صمته
عايض كبح مشاعره بمكابر/وانت بعد قل وش وراك
خالد مشى وتركه
عايض اسرع بخطواته خارج من بيته
............................................................
.
بـيّـن متمدد بالمقعدة الخلفية ومتلثم/هاه به احد؟
رازي الراقف بالمكان الموعود ينتظر له حدود الساعة/متأكد من المكان
بـيّـن/ليه شايفيني مثلك!!
رازي اكتفى بالصمت بدون رد
بـيّـن دخل يده بجيبه وخرج مبلغ ورماه لقدام
رازي ناظر المبلغ عن طرف/وشو له؟
بـيّـن/اطلبه زيادة
رازي/عشان
بـيّـن/اطلبه زيادة ولايدري عسّاف
رازي/بس
بـيّـن/كان باقي تود الوصل سوا اللي اقوله
رازي ابتسم بفرح/تم تم
.
............................................................
         الـلـيـل
............................................................
<<شقة محارب>>
ولاء وقفت عنده بملامح جامدة وبيدها كيس بداخله لزقات ومسحات طبية وشاش وقطن عنده بالارض
محارب بوجه تغطيه الكدمات متمدد عالارض بوسط المقلط بوجع/الله اكبر عليه به حيل/ناظرها بابتسامة/بس اخذ نصيبه يحسب اني هين واكلها وانا ولد ابوي
ولاء مدت يدها لقدام وتركت الكيس
محارب ارتفع عن الارض مسافة بسيطة بوجع من طاح الكيس من يدها على بطنه/اااه
ولاء بوسع عيونها/ترا خفيف!!
محارب تمدد على جنبه اشر لقدامه جنب التلفزيون اللي قباله/شوفي كريم العضلات هناك جيبيه
ولاء مشت وجلست بطرف الصالة/لا
محارب ناظرها بوسع عيونه/وشو!!
ولاء/اخدم نفسك
محارب/بنت من جدك
ولاء/ايه من جدي!!
محارب/تكفين ولاء ظهري يوجعني جيبيه وحطي لي
ولاء/انتظر خمس دقايق!!
محارب/خابرها خمس ثواني كيف صارت دقايق
ولاء ارتفعت حواجبها/والله!!زين تعرف انها ثواني!!
محارب جلس بصعوبة وناظرها/ولاء لو انتظرت الخمس ثواني حقتك ذي كان ذالحين ماني بجالس قبالك
ولاء ناظرته بصمت وسط زعلها
محارب/كان انتي فوق راسي تبكين بالمستشفى ولا بالـ
ولاء قاطعته وهي توقف ومشت باتجاه الكريم/بسم الله عليك يكفي خلاص/انحنت تاخذ الكريم/
محارب ابتسم من لمح زعلها يخف
ولاء التفتت وبيدها الكريم ناظرت ابتسامته وارتفع حاجبها بلوم/مستانس!!
محارب اختفت ابتسامته/لا
ولاء مشت وجلست وراه/ارفع لبسك
محارب ارتسمت ابتسامته من غاب وجهه عنها ورفع تيشيرته/الصحيح اني مستانس ياولاء
ولاء حطت الكريم على الكدمة الواضحة بظهره وبدت توزعه بصمت تسمع له
محارب/برد قلبي رديت شي من القهر اللي سكنه من ذيك السالفة
ولاء ضغطت عالكدمة باطراف اصابعها بقصد
محارب شد ظهره بألم/اح اح
ولاء قفلت الكريم وسحبت الكيس/عطني وجهك
محارب التفت لها بهدوء
ولاء تفتح المسحة/ايه وش سبب جنانه هالمرة؟/بدت تمررها على جروحه اللي بوجهه/
محارب/الكذاب يتهمني اني مواعد اخته بالزواج
ولاء انصعقت من اللي سمعته ووقفت تمسح جروحه تناظره
محارب وعيونه بعيونها/يقول ان معه ايصال بعشر الاف وعنده اثبات اني عطيتها هدية وهي ردتها وكل ذا عشان تشهد عليه معنا
ولاء بلعت ريقها/وبعدين
محارب بتفكير يجمع الامور/العشر الاف قيمة شنطتك وهدية مااعطيتها
ولاء شحب وجهها من فهمت الموضوع مدت يدها للكيس تاخذ لزقة/وش بيصير ذالحين؟
محارب/ننتظر التحقيق اعطيتهم كل اقوالي ونشوف
ولاء تلزق اللزقة فوق جرحه بملامحها الشاحبة
محارب رفع يده لامس يدها وشد عليها/ولاء يشهد الله مااعطيتها شي ولاكلمتها حتى التحويل للمسوقة اللي طلبت شنطتك منها كلمتها غيمة ماهو بأنا والشنطة وصلتني عن طريق الوسيط لقيتها عند الباب ماقابلتها ولا حتى لمحت زولها من بعيد
ولاء تنهدت ولامست بباطن كفها خدها/مصدقتك يامحارب مصدقتك والله لكن ذالحين صار ضروري نطلع من هالبيت
محارب باعتراض/مير اني
ولاء قاطعته/تكفى محارب تكفى
محارب تنهد بصمت وسط تفكيره بعد اللي صار اليوم
.
............................................................
<<بيت ظاهر>>
وداد جالسة بالصالة تنتظره بملامح كلها غضب
ظاهر دخل للبيت يجر خطواته بهدوء وبملامحه الهادية
وداد فزت واقفة من سمعت صوته واتجهت له وقفت قباله/وين كنت؟
ظاهر بملامح محتدة/خير!!تحققين معي!!
وداد/كنت عندها
ظاهر/واذا اني عندها وش دخلك انتي!!
وداد بصراخ وغبنة/ليلتي كيف تروح لها
ظاهر بحدة/اووووص لايرتفع صوتك ليلتك وجيت عندك مالك شغل وين اروح ووين اجي/مشى مكمل طريقه متجاهلها/
وداد بقهر/وش هالاسلوب الزفت واجب عليك العدل!!
ظاهر التفت لها بابتسامة سخرية/تحمدي الله انك حامل ولا اسلوبي كان علمتك كيف شكله/مشى/امسي امسي واخزي ابليس
وداد/اليوم جدتك وزوجة اخوك وحتى زوجتك تهجموا علي
ظاهر/مايخطون ابد اكيد تستاهلين مايجيك
وداد بصراخ/المفروض تنتبه لي مو انا حامل ببنتك اللي تنتظرها من سنين!!
ظاهر ببرود/ماعليك خلاف ولولا اللي الصور اللي معك كان لي تفاهم ثاني معك
وداد/نور
ظاهر وصل عند باب غرفة ضاري اللي اصبحت غرفته المشتركة مع ضاري من رجعت وداد وقف من سمع اسمها
وداد ابتسمت من لفتت انتباهه/بكرة ليلتها ماتروح تبات عندي
ظاهر التفت لها يناظرها بحدة
وداد تكتفت بابتسامة/اذا عييت تعرف وش بيصير/مشت تتبختر بردت قلبها شوي بعد اللي صار اليوم/
ظاهر دخل رمى شماغه وتمدد على فراشه اللي بالارض بجانب سرير ضاري بغضب خرج جواله من جيبه فتحه وناظر اسمها بتردد قفله ورماه تحت السرير بغيظ
............................................................
<<وادي سرّاي>>
سحاب جالسة ببيت الشعر المجاور للحوش وبابتسامة/حي الله ابو مظفر ياحيه
ابو مظفر بملامح محتدة مارد
سحاب كتمت غيظها من عدم رده/جابك الله من غير ميعاد ودي اعرفك بـ
ابو مظفر بحدة/ماابي اتعرف ولا اتخبّر ماجيت من فضاوة ولا جيت من رضا وش العلم ياسحاب
سحاب/عسى ماشر
ابو مظفر بتشكيك/يعني ماهو دربك!!
سحاب بغضب/استح ياابو مظفر وش هالهروج وشلون تتهمني وحنا عشرة سوا!!
ابو مظفر/اجل من الاي يلعب حولنا وقضى على الموزعين حولنا حتى يوم رخصنا مارضوا يشرون يقولون عينوا بضاعة ازين والزين وعدتيني به بعد اسبوع مر دهر ولذالحين ماشفته!!
سحاب بحدة/مير اللي وعدتك به اخذه صبيك ياكود البلا من يمك وتطشه يمي!!
ابو مظفر/وشو ترمينها علي!!
سحاب/هماك رميتها يمي ظليمة!!
ابو مظفر وقف بغيظ/هين يامبروكة هين
سحاب بحدة/اخز الشيطان واجلس وثم استح على وجهك وش هالقول
ابو مظفر/وش هالقول!!وانتي وش تقولين
سحاب/يابو مظفر لاتبيع اللي بيننا بلحظة غضب اللي يلعب حولنا مبزرة غرتهم مشت عالكيف لازم نعلمهم الدرس ولّا؟
ابو مظفر ناظرها بتفكير
سحاب/استهد بالله واقعد خلنا نتشاور ونحل الموضوع اقعد ياابو مظفر
............................................................
<<بيت سطام>>
،،غرفة سطام،،
سلام فتحت الباب بعد ماانتهت من تنظيف المطبخ ناوية تفاتحه بالموضوع تنهدت من ناظرته
سطام نايم عالسرير بملامح كلها تعب بعد يومه الطويل
سلام اتجهت للتسريحة حتى تحط كريمها كالمعتاد جلست على كرسي التسريحة  وقطبت جبينها باستغراب من ناظرت المناكير باللون الاصفر وتحته ورقة سحبت الورقة وفتحتها(شفتهن بالمحل على طريقي اعرفهن ينحطن على الاصابع وطريتي علي مير والله يدك حاليها الله بلياها)ابتسمت بخجل من تبريره اللطيف التفتت تناظره للحظة ثم ناظرت المناكير وفتحتها ومررتها على طرف اظفر خنصرها الايسر وناظرته بابتسامة تنهدت بمشاعر كلها رقة وبنفسها/ذويق يجنن على يدي هاللون صدق/اختفت ابتسامتها من ذكرت كرهها له والتفتت تناظره بتفكير طول هالاسبوع كان محترم ولطيف ورجل بمعنى الكلمة في كل تعامله سواء معها او مع امه وحتى اخواته وقبيلته طردت هالمشاعر وبنفسها/لايغرك توه اسبوع علامك استسلمتي له/التفتت بفزع من صوت أنينه المفاجئ همست/بسم الله/ناظرته بانتظار حتى يهدأ وقفت واتجهت له من استمر أنينه وانحنت شبه راكعة قباله/سطام سطام
سطام مارد
سلام انحنت شبه جالسة مدت يدها تلامس اعلى كتفه/سطام
سطام فز من نومه جالس
سلام/بسم الله عليك بسم الله
سطام ناظرها بفزعه/علامك بك شي صايبك شي اهلي بهم شي؟
سلام/كلنا الحمدلله تطمن
سطام مسح وجهه بكفوفه وسط تنهيدته
سلام بهدوء/بس انت علامك تون وانت نايم
سطام ناظرها/اكيد من تعب الشغل اليوم/ابتسم/المعذرة روعتك بهالليل
سلام تسارعت نبضات قلبها من اعتذاره ونظراته الهادية مافقد بشاشة وجهه ولطفه حتى يوم قاطعت نومه اعتدلت ووقفت
سطام انتبه لاصباعها مد يده ليدها ومسكها
سلام قشعر جسمها من لمسته وناظرته بجسمها المشدود
سطام بفرح انعكس على ملامحه/زهى بك هاللون صدق يزهى بك ياسلام
سلام سحبت يدها من يده بكل مافيها
سطام اختفى فرحه وتبدل بالذهول من فعلها وظل يناظرها
سلام جرت خطواتها بسرعة من حست بخجلها بيفضحها قدامه وهي اللي وعدت نفسها ماتضعف وتنتقم منه بيوم وتندمه على فعلته متجهة لمكانها عالسرير ارتمت وتغطت معطيته ظهرها/تصبح على خير
سطام همس/وانتي من اهله/تمدد بخيبة وكل تصرفاتها تأكد له صحة تفكيره/
............................................................
<<بيت بـيّـن>>
بـيّـن جالس قبال صحن الكبسة بشي من الكدر بسبب رفض رازي يسلمه الزيادة اللي طلبها وهدده يبلغ عساف رغم معرفته ان رازي مابيسويها لكن يكره كونه تحت التهديد ناظر الاكل/كل يوم دجاج دجاج مافيه لحم
يقين مامدت يده تنتظره يبدأ ماغاب عنها ضيق خلقه فضلت الصمت وتنتظره يبادر لكن صدمها كلامه وناظرته بوسع عيونها
بـيّـن/بكرة نصبح نابتة لنا جنحان ونبقبق 
يقين بغيظ/احمد ربك عالنعمة الرسول ماعاب طعام قط كيف قويت تعيب!!
بـيّـن حس بغلطته السخيفة تنهد/اللهم صل وسلم عليه استغفر الله يارب الحمدلله عالنعمة
يقين/ياربي لاتواخذنا بـ/سكتت/
بـيّـن ناظرها بحدة/وش انا سفيه!!
يقين بانفعال/بس لاتواخذنا بس،لاتدخل بنيتي عاد،علامك شايش من دخلت من باب البيت وانا اتصدد عنك تقل نار ماشبعت تبي زود
بـيّـن تنهد بصمت مد يده
يقين سحبت صحن الكبسة مبعدتها
بـيّـن ناظرها بوسع عيونه/ماقلت شي
يقين وقفت/ادري مايصير تاكل رز وصدرك منغم بيغمك زود
بـيّـن/الا خليني ادقها بالخمس بلكن تفك
يقين مشت وحطت الصحن فوق الفرن وغطته والتفتت له/لا ماتفك بهاللون/رجعت له وجلست قباله/علمني علامك وش مزعلك؟
بـيّـن بكذب/ماعينت شغلة اتطلب بها اخوك بالمجلس الليلة
يقين ناظرته بشك/بس؟
بـيّـن/ايه
يقين/بسيطة نسري ذالحين انا وانت ونفك شبوك الحلال وخلها تقبع بينهم الليلة
بـيّـن ابتسم برضا من فكرتها
يقين ناظرت ابتسامته وضيقت عيونها/ياحبك للشر
بـيّـن تنحنح/ماهو بشر هو
يقين قاطعته/وش ذنب الحلال بفعول اهلها هاه
بـيّـن/هاه ذا قولي/اشر على لسانه/على طرف ذا وسبقتيني
يقين ناظرته بتكذيب/ايه صحيح
بـيّـن/جيبي العشا جيعان على فطوري معك
يقين فزت/وليه وش ملهيك الله واللي مايفكون مخيط بدونك!!/نزلته قباله/
بـيّـن سمى واكل لقمة ومارد الا بعد ماانهاها/الدنيا تلاهي شي يجر شي ونسيت العيشة كل ابوها من الاساس
يقين/ياشين طبعك شكلي باسوي لك سندويشة مثل ايام المدرسة
بـيّـن رد بعد ماانهى لقمته/والله انها زينة مير ذالحين افزعي يم الددسن به غرضان جيبيهن
يقين/ماهو مامديت يدي ماودي بالعشا!!
بـيّـن/اعجلي اعجلي العشا مكانه تتودين وهو مكانه
يقين ناظرته بغيظ كيف يقومها وهي مااكلت
بـيّـن/علامك قاعدة لذالحين
يقين وقفت بغيظ وجرت خطواتها خارجة من البيت وسط حلطمتها/ماحلى بعينه يرسلني الا وقت العيشة ليه مانطق قبل احطه/فتحت الددسن/انا الغلطانة افكر فيه وهو مايفكر فيني ابد/عقدت حواجبها من ناظرت بوكس هدية باللون الابيض فتحته واتسعت عيونها من ناظرت مسدس ابو محالة بداخله مدت يدها له بسرعة بعدم تصديق واحتضنته بين يديها واعتلت صرختها المكان وتردد صداها/
بـيّـن الواقف عالباب يناظرها بابتسامة/هاه باقي غلطانة عشانك فكرت فيني ولا فكرت فيك؟!!
يقين جرت له وبين يديها المسدس ب اللي تسامة واحتضنته بسعادة/مشكور مشكور مشكور
بـيّـن بضحكة/كل ذا القد تبينه
يقين تركته وعينها عالمسدس تتفحصه بعيونها ويديها/لو تدري وش كثر طلبت امي وابوي وجدتي وعيوا علي ماتوقعتك تجيبه وانت عييت علي بعد يوم طلبتك
بـيّـن بابتسامة/صحيح كنت معيي بس ذالحين وضعنا تغير لازم معك شي يحميك
يقين وجهته عليه تجربه بدون انتباه وبابتسامة/احلى هدية بالحياة
بـيّـن مد يده وابعد فوهته عنه/هذا بدل الذهبان اللي لجيتيني بها
يـقـيـن مدته له بجمود/لا ابي ذهبان
بـيّـن ارتسمت ملامح الغيظ على وجهه وهو استلف باقي قيمته حتى يشريه لها/هاتيه اجل
يقين ابعدت المسدس عنه محتفظة فيه بابتسامة/ازين من الذهبان بعيني والله
بـيّـن تنهد براحة وهو يناظر فرحتها/الود ودي املا البيت مسدسات وذهبان كان اشوف كل هالفرحة بعيونك
يقين ناظرته/اي شي منك يازينه وياكبره بعيني يابـيّـن
بـيّـن/اخبر ان به شكرا وكثر خيرك ولا مابه شي امسي والسلام
يقين/ايه بالله امس
#شقّ_الغَمام
..(١٥١)..
-
بـيّـن/دام امسي اكمل عشاي ازين لي/لف حتى يدخل البيت/
يقين مدت يدها ليده وقفته
بـيّـن التفت لها/وش بعد؟
يـقـيـن رفعت نفسها مقبلة خده
بـيّـن ناظرها بابتسامة رضا
يـقـيـن بابتسامة/اي بالله بتمسي صحيح ولاهو بأي مسى
بـيّـن ضحك وانحنى وشالها بين يديه دخل بيته وقفل بابه برجله
يقين علا صوت بطنها
بـيّـن ضحك/الجوع الله يقطعها ذبح قليبي
يقين بزعل/كله منك/حاوطت رقبته بيديها/بس ماعليه هالمرة مسموح
بـيّـن/يخسى الجوع وانا ولد ابوي/نزلها/اضربي بالخمس الليلة واتركي الملعقة عنك
يقين باستعطاف/وبعده مسموح؟
بـيّـن ضحك/مسموح مسوح تعشي بس
.
............................................................
    يـوم جـديـد
............................................................
<<الجامعة>>
ولاء تمشي بخطوات سريعة بشنطتها الجديدة اللي ماكملت الاربع وعشرين ساعة حتى دخلت الكلاس وقفت عالباب متجاهلة وجود الدكتورة مررت نظرها عالمتواجدين بتمعن
الدكتورة بانفعال/غياب مافيه احد يدخل بعدي
ولاء احتدت نظرتها من شافتها ماكانت بعيدة ابد بالعكس جالسة بالصفوف الاولية قدام اسرعت بخطواتها باتجاهها
رؤيا ابتسمت من ناظرت ملامحها رفعت يمينها ورجعت خصل شعرها ورا اذنها والتقت عينها بعين ولاء/مو ذنبي اذا زوجك
ولاء رفعت الشنطة وضربت بها رؤيا على وجهها بكل قوتها
#شقّ_الغَمام