ကမ္ဘာအဆုံးထိ မင်းရဲ့နယ်ရုပ်လေး [Chronicles of the Reincarnated Monarch ]

Chapter 4/U: Entering the Tiger's Mouth After Rebirth

စာအုပ်ကြီး​၏စကားကို ဘဝင်မကျလေသော မိန်ဓိရာဇ်မှာ နှုတ်ခမ်းတစ်တောင်လောက်ထော်သွားလျက်။ ထိုစဉ် သူ ဖျတ်ခနဲ သတိရသွားသည်မှာ ယခင် မိန်ဓိရာဇ်အနေဖြင့် လိင်တူချင်း သားမယားအဖြစ် ပြုကျင့်ခံရသူများထဲမှာ ပထမဦးဆုံးသားကောင်ဖြစ်ခဲ့လေသော 'ရာဇသိင်္ဂါ' အကြောင်းကိုပင်။

"နေအုံး...စာအုပ်ကြီး။ ကျွန်တော် ရာဇသိင်္ဂါအကြောင်းတော့ ပြည့်ပြည့်စုံစုံလေး သိချင်တယ်...သူက ဟိုအရင်မိန်ဓိရာဇ်ရဲ့အချစ်ဆုံးဖြစ်ခဲ့တယ်ဆို။"

စာအုပ်ကြီးက ခပ်တည်တည်နှင့်သာ စကားတစ်လုံးတည်း တုံ့ပြန်သည်။

"အင်း..."

စာအုပ်ကြီးဘက်က 'အင်း' ဆိုသည်နှင့် တစ်ပြိုင်နက် မိန်ဓိရာဇ်မှာ လေပေါ်မှာ ရှိနေသည့် စာအုပ်ကြီးကို ဆတ်ခနဲဆွဲယူလိုက်သည်။

"ခွေးကောင်လေး...ဖြည်းဖြည်းသာသာ လုပ်ပါဟ။ မင်း အခုလို ကြမ်းကြမ်းတမ်းတမ်းလုပ်ရင် ငါ ပြဲသွားလိမ့်မယ်။"

"ခင်ဗျားကလည်းဗျာ...စကားကို ဘယ်လိုပြောနေတာတုန်း။ ခင်ဗျားပြောနေတဲ့ပုံစံကိုသာ အခန်းစောင့်နတ်တွေသာကြားရင် မှောင်နေကြလောက်ပြီ။ ပါးစပ်လေး ပိတ်ပြီးတော့သာ ငြိမ်နေပေး။ ကျွန်တော် ရာဇသိင်္ဂါအကြောင်းကို သေချာဖတ်ချင်လို့...."

"မင်းတော့....ဟင်း..."

မိန်ဓိရာဇ်က မှော်စာအုပ်ကြီး၏အတွင်းစာမျက်နှာကို လှန်လှောဖွင့်ဖတ်နေခဲ့သည့်အခါ စာအုပ်ကြီးလည်း သူ့ဒေါသကို သက်ပြင်းနှင့်အတူ ဖြေသိမ့်လိုက်၏။ မိန်ဓိရာဇ်လည်း ချောမွတ်ပြောင်လက်နေသည့် မှော်စာရွက်များကို စိတ်ဝင်တစားဖြင့် တစ်ရွက်ချင်းစီ လှန်ဖတ်နေခဲ့သည်။ သူထင်ခဲ့သည့်အတိုင်း စာအုပ်တစ်အုပ်လုံး၏မှတ်တမ်းသည် ယခင် အင်ပါယာဘုရင်ဆိုး မိန်ဓိရာဇ်နှင့်ပတ်သက်၍ မကောင်းကြောင်းများသာ ပြည့်နှက်နေခဲ့ရုံမက ထိုမိန်ဓိရာဇ်၏ပုံများအပြင် ဖြောင်နန်းတွင်းရှိ ပုဂ္ဂိုလ်အားလုံး၏ပုံများကိုလည်း စနစ်တကျ မှတ်တမ်းတင်ဖော်ပြထားခဲ့လျက်။

ထိုမှော်မှတ်တမ်းများသည် ၂၁ ရာစုခေတ်က ပုံနှိပ်စာအုပ်များအတိုင်း ဓာတ်ပုံများနှင့်တကွ ပုံနှိပ်ထားသကဲ့သို့ပင်။ မိန်ဓိရာဇ်ပုံများအား စာညွှန်းတမ်း "Caption " များ ထိုးထားသည့်ပုံစံများကိုမြင်ရလျှင် မိန်ဓိရာဇ်တစ်ယောက် မျက်နှာအီးမှန်သွားသည်။ ရာဇသိင်္ဂါ​၏ပုံစာညွှန်းများနှင့် တခြားပုဂ္ဂိုလ်များ​၏ပုံစာညွှန်းများတွင်မူ ထိုကဲ့သို့ မဟုတ်ပါပေ။