ကမ္ဘာအဆုံးထိ မင်းရဲ့နယ်ရုပ်လေး [Chronicles of the Reincarnated Monarch ]

Chapter 4/U: Entering the Tiger's Mouth After Rebirth

အခန်း (၄)
ပြန်လည်မွေးဖွားလာပြီးနောက်
ကျားခံတွင်းသို့ အပြီးတိုင်ဝင်သွားခြင်း

"ဟင်း....စိတ်ညစ်ပြီး ပျင်းလိုက်တာ စာအုပ်ကြီးရယ်။ ဖြောင်ခေတ်မှာ PS 5 တွေ Nintendo Switch တွေလည်း မရှိ။ ဖုန်းလည်း မရှိတော့ စွန်းပျင်းဖို့​ ကောင်း.......ဝါး......"

အခန်းဆောင်သည် ဖယောင်းတိုင်မီးများ ထွန်းညှိထားလျက်။ ညအိပ်ချိန်မှာ အိပ်မပျော်နေသဖြင့် ကျွန်းကုတင်ပေါ်မှာ ထထိုင်နေသော မိန်ဓိရာဇ်က လက်နှစ် အပေါ်ဖက်သို့ အကြောဆန့်တန်းကာ တဝါးဝါးသမ်းဝေလိုက်သည်။ ထိုအခါ လေပေါ်မှာရှိနေသည့် လူမျက်နှာနှင့်မှော်စာအုပ်ကြီးက မိန်ဓိရာဇ်မျက်နှာရှေ့တည့်တည့်သို့ ရောက်ချလာသည်။

"ပျင်းရင် ငါ့ကိုဖတ် "

ထိုအခါ ပျင်းရိပျင်းတွဲဖြစ်နေသည့် မိန်ဓိရာဇ်လည်း စာအုပ်ကြီးကို အတင်းဖျစ်ညှစ်ကာ ဖက်ထားခဲ့သည်။ စာအုပ်ကြီးလည်း မိန်ဓိရာဇ်​၏လက်နှစ်ဖက်ကြားကနေ အတင်းရုန်းကာ ပျံထွက်ဖို့ ကြိုးစားသည်။

"ဟဲ့ကောင်...စာဖတ်ခိုင်းနေတာ၊ ငါ့ကို ဖက်ခိုင်းနေတာ မဟုတ်ဘူး။ လွှတ်စမ်း။"

"ဪ မသိပါဘူးဗျာ။ ဆောတီး။ ဒါနဲ့ ခင်ဗျားဆီကနေ ဘာစာတွေ ဖတ်ရမှာတုန်း။"

"အရင်တုန်းက ဖြောင်အင်ပါယာအကြောင်းတွေနဲ့ မင်း ရှုပ်ခဲ့တဲ့အကြောင်းတွေ..."

"ဟာ...မဖတ်ချင်ပါဘူး။ ဖတ်လိုက်ရင်လည်း ကျွန်တော့်အကြောင်းတွေ ကောင်းတာ တစ်ခုမှ တွေ့ရမှာ မဟုတ်ဘူးမလား။ ဖတ်ဘူး...ဖတ်ဘူး။"

"အဲဒီအကြောင်းတွေ မဖတ်ချင်လို့ မရဘူး။ ငါ့စာရွက်လေးတွေကို စာမျက်နှာနံပါတ်တွေနဲ့ မှတ်တမ်းတင်ခံထားရတဲ့အကြောင်းအရာတွေ ပြောင်းမပြောင်း စစ်ဆေးပေးမဲ့လူက မင်းကလွဲရင် တခြားသူ မရှိဘူးကွ။"

"အဲဒီလိုလား..."

"ဟုတ်တယ်"

"ဒါနဲ့....ခင်ဗျားက ဘယ်လိုလုပ် ခုလိုပုံစံမျိုးဖြစ်နေရတာလဲ"

"အဲဒါကလည်း ငါ့နာမည်ကို မေ့နေသလိုပဲ...မေ့နေတာ။ ရန်ငြိုးတွေကြောင့် ကျိန်စာတိုက်ခံခဲ့ရတာတော့ ကျိန်းသေသိနေပေမဲ့လည်း ငါက မှတ်ဉာဏ်ဆိုးတွေအားလုံးကို ပြန်မမှတ်မိချင်တော့လို့ မေ့သွားတာလည်းနေမှာ။ မင်းကိုပြောဖူးခဲ့သလိုပါပဲ။ အဖြေတွေအားလုံးက မင်းဆီမှာလေ။ မင်းသာ ဒီတစ်ကြိမ်ဖြောင်ခေတ်မှာ စောက်ချိုးလေးပြေပြေနေပြီး လိမ္မာမယ်ဆိုရင် အရာအားလုံးက လွယ်ကူနေမှာ အသေချာပဲ။"