ဝမ်လုံက သူ အမြန်လာခဲ့မည်ဆိုသည့်အကြောင်းကို ရိုသေလေးစားစွာဖြင့် ပြောလာလေသည်။
"လူကြီးမင်း ခင်ဗျာ...ဘယ်လို ဟင်းလျာနဲ့ ဘယ်လို ဝိုင်အမျိုးအစားကို မှာယူချင်ပါသလဲ"
စားပွဲထိုးတစ်ယောက်က ရှောင်လုံ၏ စားပွဲ ရှိရာဆီသို့ သုတ်သီးသုတ်ပြာပြေးလာပြီး မေးမြန်းလိုက်သည်။
စားပွဲရှိ လူတိုင်းက ရှောင်လုံကို ကြည့်လိုက်ကြသည်။ သူ့၏ ခွင့်ပြုချက်မရှိဘဲ မည်သူကမှ သူတို့စိတ်ကြိုက် မှာယူရဲခြင်း မရှိပေ။
"အရင်ဆုံး မင်းတို့ဆီက အကောင်းဆုံးဝိုင်ကို ရှစ်အိုးလောက် ယူလာခဲ့...အကောင်းဆုံးဟင်းလျာတွေကိုပါ ယူလာခဲ့ကွာ"
ရှောင်လုံက ရိုးရိုးတန်းတန်းသာ ပြောလိုက်သည်။ စားပွဲထိုးက နောက်ထပ် စကားအပိုများ ဆိုမလာမီ သူက ထိပ်တန်းစကြာဝဠာအဆင့် စိတ်ဝိညာဥ်ကျောက်တုံး တစ်တုံးကို စားပွဲပေါ် တင်လိုက်လေသည်။
ဤသည်ကို မြင်လိုက်သည်နှင့် စားပွဲထိုးသည် အားပါးတရ ပြုံးကာ ထပ်တလဲလဲ ဦးညွှတ်လိုက်လေပြီး ဝိုင်နှင့် ဟင်းလျာများကို ချက်ချင်း ယူဆောင်ပေးမည်ဖြစ်ကြောင်း ယဥ်ကျေးစွာ ပြောလိုက်သည်။
ရှောင်လုံတို့ အုပ်စုက သူတို့ မှာယူထားသည့် အစားအသောက်များကို စောင့်ဆိုင်းနေချိန်တွင် ဝမ်မိသားစုတပည့် ဝတ်စုံများ ဝတ်ဆင်ထားသော လူငါးယောက်သည် စားသောက်ဆိုင်ထဲသို့ ဝင်လာလေသည်။ သူတို့ ဝတ်စုံ၏ ရင်ဘတ်ပေါ်တွင် နတ်ဘုရားသားရဲ မြေခွေးဖြူ၏ ဦးခေါင်းပုံတံဆိပ်ကို ချုပ်ထားပေသည်။
သူတို့၏ အသွင်အပြင်များအရ အားလုံးသည် ဝမ်မိသားစု၏ ပင်မတပည့်များ ဖြစ်ဟန်ရသည်။
ဝမ်မိသားစု၏ ကာကွယ်သူသည် ရှေးဟောင်းသားရဲဖြစ်သော အမြီးကိုးချောင်း မြေခွေးဖြူ ဖြစ်သည်။ ထို့ကြောင့် ဝမ်မိသားစု ပင်မတပည့်များ၏ ဝတ်စုံပေါ်တွင် မြေခွေးဖြူ ဦးခေါင်းပုံ သင်္ကေတ ရှိနေခြင်း ဖြစ်သည်။
စက်ဆုပ်ဖွယ်အမူအကျင့်များဖြင့် မာနထောင်လွှားနေကြသော ထိုငါးယောက်သည် ပြတင်းပေါက်နားရှိ စားပွဲတစ်ခုနားသို့ သွားလိုက်ကြပြီး အခြားမိသားစုများမှ တပည့်များကို နှင်ထုတ်ကာ ထိုင်လိုက်ကြလေသည်။
YOU ARE READING
ပြိုင်ဘက်ကင်းသိုင်း၀ိဉာဥ်(ဟောင်ရှောင်လုံ) Book 1
Adventureပြိုင်ဘက်ကင်းသိုင်းဝိညဉ် သူရဲကောင်းတွေဟာ အချိန်တော်တော်များများမှာအထီးကျန်ဆန်ကျတယ်မလား ။ အထီးကျန်ခြင်းတွေကို ကြံကြံခိုင်ရင်ဆိုင်နိုင်မှလဲ ပြိုင်ဘက်ကင်းအဖြစ် သိုင်းလောကရဲ့ထိပ်ဆုံးမှာရပ်တည်နိုင်မှာပါ။ ကမ္ဘာမြေရှောင်လင်ကျောင်းရဲ့ ကျောင်းတော်သားတယော...
761 - 765
Start from the beginning
