شـقّ الـغَـمـام

..(٧)..

..(٧)..
لااله الا الله وحده لاشريك له الملك وله الحمد وهو على كل شي قدير
-
عزيز تلاشى الملل اللي كان محتويه بلحظة دخول سطام للمجلس اعتدل بجلسته بتوتر
سطام بابتسامة/ولا شهادة حفيد سحاب تكذّب؟
سحاب رجف قلبها من قوة الخيانة اللي اجتاحتها بهاللحظة انخرست ماكانت هالكلمات الا ضربة موجعة من العيار الثقيل خيانة ولا هي بأي خيانة،خيانة حفيدها علانية
طاهر تراقصت كل خلية بجسمه طرب على هالكلمات اللي داعبت اذنه كانت هاللحظة احب عليه من كل شي على وجه الدنيا اخيرا اخيرا تسلل شعاع النور لحياته اخيرا طرف أمل بهالديرة يرجع الامور لمكانها
سهم المتوقع لخيانة سطام من فترة طويلة ابتسم بسخرية عاللي يصير توقع خيانته لكن ماتوقع خيانته بصف طاهر وعياله
عزيز احتدت نظرته المتسلطة على سطام بغبنة
سطام كرر كلامه بتحدي من اجتاحته نشوة الانتصار بعد السكوت السايد بهاللحظة اخيرا اخذ موقف بحياته تحرك الظلام والقمع للنور/ياعم طاهر شهادة حفيد سحاب وولد الشيخ منصور تكذّب!!
طاهر/افا لا بالله ماتكذب محشومة سحاب ومحشوم الشيخ وولده
بارود بقهر منه/بس انا ماعينتك يمهم يوم علمتهم يلفون
سحاب بغبنة احتوتها شدت على قبضتها وبحدة/بارود تكذب سطام!!
بارود بنرفزة/بس ياعمة
سطام قاطعه بابتسامة/وشلون تبيني اظهر يمك وانت خابر العلم
سحاب/محشوم ياسطام محشوم وشلون مانصدقك وا
بـيّـن قاطعها/يعني اروح للبيت قضيتوا ظلايمكم
سحاب اجتاحها صداع من كلامه
سهم/احشم عمرك وتعلم وشلون تتكلم بمجلس الديرة وبين يدين سحاب
بـيّـن بابتسامة وعينه بعينه/ليه اوجعتك الظلايم/بسخرية/اوووه ياكبرها بحقك
سهم بغبنة/من
بـيّـن حك اذنه بمفتاح سيارته بعدم اهتمام اعطاه قفاه يمشي ورفع صوته يقاطعه/مير انه وراي طرق أعشيه ألزم علي من مقابلكم
سهم تقدم بخطواته يمشي وراه/اوقف محدن
رازي وقف بطريقه بابتسامة/كان هو تنازل/هز راسه بلا/انا ماتنازلت عن حقي
طاهر همس لمحارب/ألحق أخوك قلّه يسبقني يم البيت
محارب مشى
سهم/سحاب مانطقت حكمها للحين حتى تطلب حقوق
رازي/خبري طاهر اللي يحكم
سحاب انحنت شبه جالسة عالارض واسندت راسها على عكازها بصمت
سهم يناظره بغبنة
طاهر ناظر سهم/صحيح الحكم لي وكلكم شهود
عزيز وقف/ابشر يارازي بحقك واللي يحكم به
رازي قاطعه/دامني غريب اعلمكم طبوع الغرب انا عافي لوجه الله/مشى/
سطام زم شفايفه يكتم ضحكته
طاهر ابتسم
عزيز اخذ نفس يكتم غيظه
رازي اسرع بخطواته/ولد بـيّـن احترني
طاهر تنهد بابتسامة ومرر نظره على سهم وعزيز وبارود/العذر والسموحة الود ودي اقضب اللي عملها واجدعه بينكم مير حيل الله اقوى مالي حيلة ولا علم به
عزيز اخذ نفس/ماقصرت ياابو عياش ماقصرت عساك عالقوة
طاهر/الله يقويك ياشيخ والله اني مستحي عقب اللي حصل ياسحاب مير
سحاب مقاطعته/ابشر بسعدك ياابو عياش ابشر
طاهر/دام مُحارب عقد وكمل شروط المجلس ماظنتي به شي يرده عن دراسته هالمرة
سحاب تنهدت كل شي ضاع من يدها الليلة/ابد ابد ابشر بسعدك ابشر مير انه الجامعات
طاهر دخل يده بجيبه خرج ورقه مقاطعها/خابرن الجامعات قفلت بيبانها مير هالورقة/مدها لسهم/عطاني اياها محارب
سهم ضحك من ناظر الورقة
عزيز سحب الورقة من يدين سهم واتسعت عيونه وهو يقرأ رسايل القبول بابتسامة مجبرة/مبروك القبول مبروك
سطام ابتسم باستمتاع لاول مرة يشهد عجز جدته لهالدرجة
طاهر تنهد/مير إنا اتفقنا زواج صغير يلم اهلها واهلنا ثم ياخذ حرمته ويتوكل
سحاب ابتسمت كل شي مخطط له ومنتهين هم مايستأذنون أبد مثل باقي الديرة هم بس يبلغونها سواء رفضت او وافقت مسوين اللي يبونه دامه منطبق على قوانينها/عساه مبروك يامحارب وفالك التوفيق مالي شور والامور على ازين ماتكون
طاهر وقف/مير نستأذنكم ذالحين كثر الله خيركم والحمدلله عالسلامة ياشيخ تصبحون على خير/مشى/
سطام رفع يده/عاد استأذن أنا تكملون أموركم سلام/مشى/
سحاب/سطام
سطام وقف
سحاب بحدة/هاذي تالية علومك
سطام ابتسم/تدرين ياجدة الكذب ماادانيه ابد
عزيز قطب جبينه
سطام/ماكذبت تعشيت مع بـيّـن ورازي وكاستي تحتريني عندهم
سحاب/هذا اللي نويته خلاص
سطام بتأكيد لقراره/فمان الله /مشى/
سحاب شدت على قبضتها اللي يتوسطها الجنيه امتلت غيظ فوق غيظها كل المشاكل ابتدت من عندها وانتهت عندها مشت لداخل البيت بخطوات سريعة/ريوف بنت ياريوف
ريوف وقفت عندها/نعم ياجدة
مبروكة مدت يدها بحدة/تعالي معي
ريوف مسكت يدها/حاضر حاضر/مشت معها/
................................................
<<بيت ظاهر>>
ظاهر دخل بيته وقف على باب غرفة النوم المظلمة مالمحها عالسرير اتجه لغرفة ضاري فتح الباب تنهد من شافها نايمة على سرير ضاري قفل الباب بشويش
وداد ابتسمت وفزت من السرير وقفت عند الباب ولصقت اذنها بالباب حتى تسمع
ظاهر رجع طريقه لغرفة النوم فتح النور اتسعت عيونه وسرت رجفة بجسمه تسارعت معها انفاسه وثقلت رجوله من اللي يشوفه فوق السرير اخذ نفس يحاول يهدي نفسه بدون فايدة مشى بخطوات بطيئة وقف وعينه عالسرير يستوعب اللي يشوفه هالشي كان حلمه واحب ماعلى الدنيا لقلبه واليوم اصبح خوفه الاعظم
وداد اتجهت لدولاب ضاري فتحته بشويش وخرجت عبايتها اللي مجهزتها من قبل لبستها وحطت الطرحة على اكتافها اتجهت للباب زمت شفايفها وفتحته بشويش
ظاهر فتح ازارير ثوبه من اختناقه غرق بعرقه من كثر خوفه وعينه على بذلته العسكرية المفرودة عالسرير تراجع خطوات لورا وضرب ظهره بالدولاب وراه وكأن هالدولاب يوقفه ويوعيه بحقيقته اللي تناساها اخذ نفس من جديد مد يده الراجفة لبذلته العسكرية مسكها وغرقت عيونه دموع من ترددت بأذنه ذيك الاصوات اللي اخترقت قلبه وتركت أثرها عليه سحبها بقوة مجبر نفسه واتجه للمطبخ بخطوات سريعة
وداد خرجت من غرفة ضاري
ضاري دخل البيت
وداد ناظرته/روح نام بسرعة روح/دخلت لغرفة النوم/
ضاري ناظر تصرفها باستغراب لكن نفذ طلبها واتجه لغرفتها
ظاهر دخل المطبخ ورمى بذلته العسكرية بالزبالة
وداد تمددت عالسرير وتغطت كلها قبل رجوعه
ظاهر دخل للغرفة وارتمى عالسرير وتغطى كله وسط رجفته الواضحة
وداد رغم خوفها من اللي بيصير الا انها تحس بشي من السعادة والحماس بانتظار الفرصة اللي تنقذ حياتها بهالليلة
......................................
بـيّـن يمشي لجهة بيته ويديه بجيوبه والتفت وراه/طسّ يم بيتكم علامك تتبعني
رازي وقف/وش أبي بك ماابيك ولا ابي لك شوف ابي ابريقي وكاسي
رازي التفت وراه
بـيّـن/وانت علامك تتبعنا
سطام/تراكم ملزومين بي هماني شهدت لكم
بـيّـن/ماطلبت فزعتك
سطام اتسعت عيونه من الجحود
رازي عز راسه بموافقة/صادق
سطام بتهديد/اقول انت وياه ملزومين بس ولا بأعود وأغير كلامي كل ابوه
بـيّـن خرج يديه من جيوبه والتفت لبيته اللي يبعد على مسافة كم متر منهم وقطب جبينه/ولد يارازي
رازي التفت له
بـيّـن/طرق ماله حس
رازي احتدت ملامحه/معنا غريب ياولد
بـيّـن جرى لبيته
رازي جرى وراه بهمس/ولد اصبر اصبر يامهبول
سطام جرى وراهم
بـيّـن وقف ورا بيته وبخوف/طرق/قطب جبينه باستغراب/
طرق قباله اللحم ياكل منه
ديوان جالس جنبه يتقهوى من ابريق بـيّـن ورازي يناظر طرق ويمسح عليه بين فترة والثانية ناظرهم/وراكم ابطيتوا/شرب من كاسته/حتى شاهيكم برد
رازي الواقف جنب بـيّـن ضحك/والله عرفنا ان طرق مايسوا ريال على طول يجحد
بـيّـن احتدت نظرته/انت وشلون تجي هنيا هاه
ديوان/علـ/انصدم وعينه بسطام/
سطام اتجه لديوان وجلس جنبه سحب الكاسة الثانية وصب له شاهي
ديوان مرر نظره بين بـيّـن ورازي
بـيّـن بحدة/هي جت عليه هذا انت هنيا
رازي جلس قبالهم بابتسامة يناظرهم/ايه يادنيا سبحان خالقك جمعتي/مرر نظره بالترتيب بين ديوان ثم سطام ثم بـيّـن/خاين و ولد شيخ و راعي/أشر على نفسه/وغريب عن الديرة/ضحك وعينه ببـيـن/كود هالمرة تزين معنا؟
بـيّـن/انا بروح لجدي يبيني خذ هالخمة معك ماالقى واحد منكم مصبح بهالمكان سمعتوا/مشى وتركهم/
رازي ابتسم ووقف
ديوان/طول عمره لسانه متبري منه
رازي/عاد الا بـيّـن مااسمح لك تخطي عليه
.............................................
<<بيت الشيخ>>
،،غرفة يـقـيـن،،
ريوف فتحت الباب
يقين جالسة قبال تسريحتها تعقم جرحها التفتت للباب
مبروكة دخلت وبحدة/امسكيها لي
يـقـيـن رفعت يدها لريوف توقفها وقفت بابتسامة متجهة لجدتها وقفت قبالها
مبروكة ضربتها كف بكل قوتها
يـقـيـن التف وجهها من الكف لكن بدون اهتمام ناظرت جدتها بابتسامة
مبروكة/ثمن اللي سويتيه غالي وبالحيل يابنت منصور
يـقـيـن اجبرت نفسها تتكلم وببحة تجرح معها حلقها/يخسي يقعد بهالبيت
مبروكة بغبنة/ان كان واجب الاختيار فأنتي الطالعة وهو الداخل
يقين بعصبيتها/يعقب يكفيه تدنيس لبيت ابوي
مبروكة/تعقبين انتي وابوك ذا بيتي
يـقـيـن تكتفت وبابتسامة/ان جينا للحق ماهو ببيتك ياجدة
مبروكة انفجرت هالمرة ومسكتها من شعرها وسددت ضربات ورا بعض ليقين بدون توقف/تعقبين وتهبين ذا بيتي بيتي قطع لهاللسان الوصخ ياوصخة قطع لهاللسان
ريوف رحمت يقين تحاول تفكها من بين يدين جدتها
مبروكة تركتها بعد فترة
يقين بعلامات بوجهها وشعرها المنكوش انتظر جدتها بحدة
مبروكة/غرك ابوك بالحيل بالحيل الشيخة بشور سحاب وسحاب هاذي هي قدامك والشيخة الحين بيد عزيز وانتي خطيبة عزيز وسحاب اللي خطبتك لعزيز نسيتي مكانك وانا اللي بأصحيك انتي كثير عليك عزيز
ريوف فز قلبها وناظرت جدتها باتساع عيونها وسرعت نبضاتها
مبروكة/وكثير عليك هالبيت وهالديرة بكبرها مير من ذالحين انتي ماانتي لعزيز
يـقـيـن ابتسمت وبتحدي/النفس عايفة من اول مافرقت ذالحين ابرك الساعات هالليلة
مبروكة ابتسمت
يـقـيـن كشرت بوجهها
مبروكة/ابرك الساعات ساعة تعرفين مقامك يايقين ومحد بيعلمك مقامك غيري
يقين ناظرتها بحدة
مبروكة مشت/يالله ياريوف تعالي ابيك
ريوف ناظرت يـقـيـن من فوق لتحت واسرعت بخطواتها ورا جدتها بتقفل الباب
مبروكة بدون لاتلتفت لهم/كبيه خلي بنت الشيخ إتهنى ببيت ابوها
ريوف مشت وراها
يـقـيـن ميلت فمها بشك غطت فمها بيدها من حست بوجع وكحت ورا بعض اتسعت عيونها بقلق من حست ببلل بيدها ابعدت يدها عن فمها ونزلت نظرها ليديها المتلونة اجزاء منها باللون الاحمر تنهدت بيأس من نفسها وعدم اهتمامها قفلت الباب وارتمت على سريرها بتفكير وش خطوتها الجاية مع عزيز اللي تقريبا انقطعت وسائل الاتصال بينهم كيف توصله هالمرة كيف تنفذ انتقامها وتاخذ حقوقها
....................................................
<<بيت ظاهر>>
ظاهر متمدد على السرير غرقان بنومته اللي كلها كوابيس تعرق بغزارة ماكانت البذلة الا محفز لكوابيسه اللي هدت من فترة
وداد التفتت تناظره بابتسامة وبنفسها برجى/تكفى هالمرة هالمرة بس سوها
ظاهر زفر بعمق كوابيسه/لاتروح ياعوض لاتروح
،
،
،،قـبـل ٣سـنـوات,,
~~نهاية العصر~~
بكامل لبسه العسكري على اكتافه شنطته وبين يديه سلاحه مصوبه لقدامه يمشط المكان ووراه وحدته المكونة من ست أفراد لفوا القرية كاملة وبعد ماتأكدوا من خلوا المكان التفت يناظره
إبراهيم أشر راسه بايه
ظاهر نزل سلاحه/نرتاح الليلة هينا وبكرة ان شاء الله نكمل
سامي نزل سلاحه ورمى نفسه عالارض وتمدد/اااه رجولي ذبحتني
بدر حط سلاحه على كتفه وهو يناظره/هذا انت متى يقوى قلبك حنا اولى الفرق الاستطلاعية المفروض تعودت ماسمونا الاسطورة عبث
بلال ناظر بدر وغمز له بابتسامة/ايه ايه تمصلح مع النقيب عشان يفكك كم يوم
وافي ناظر سامي/تراك افطن واحد منا وش فيك بكل مرة ترتاع
سامي جلس/تراني اصغركم يحق لي ارتاع
ظاهر ابتسم سامي عنده غير عن الباقين سامي بمقام اخوانه يذكره ببين وكثير نفس التحلطم ونفس الطلبات ونفس الحركات يميزه عنهم وبوضوح/والله انك شنب يومك تقدم وانت شايل كل هالروعة بقلبك
بلال وعينه على بدر يغيظه/ياحظك مدحك النقيب بنفسه
ظاهر/خلاص عاد فكونا تريحوا ورانا بكرة طريق اصعب من اليوم
،،منتصف الليل،،
،بدر ووافي المسؤولين عن المراقبة،
بدر تسلل برا المخيم البسيط والتفت حوله يتفقد المكان لفه مرة وثنتين وثلاث وقف على مسافة من المخيم بابتسامة دخل يده بجيبه وخرج سيجارته وولاعته رفع ولاعته
وافي وقف جنبه وسحب الولاعة بحدة همس/مريض انت ناوي تنكبنا
بدر همس له بثقة/مابه احد مشطنا المكان اليوم ومشتطه الحين وتعرفني ماتمر علي ابد
وافي دخل الولاعة بجيبه/ممنوع وان شميت ريحتها بلغت عليك بكرة/مشى وتركه راجع لمكانه/
بدر تجهم بوجهه ونفّس ودعا كم مرة هاى وافي بغبنة ابتسم وقت دخل يده بجيبه وخرج الكبريت وولع سيجارته اخذ نفس مرة وثنتين وثلاث
ظاهر داخل المخيم فتح عيونه وفز شبه جالس اول ماوصلته الريحة وقبلها صوت خطوات غريبة عليه يحس بها قريبة
بدر برا التفت لوراه من رواده احساس غريب رمى سيجارته ودعسها برجله بسرعة وقبل يتكلم سقط عالارض ميت برصاصة قناص ماأخطته أبدا
وافي متجه لبدر حتى يتهاوش معه اتسعت عيونه من اللي صار صرخ/صابونا صابـ/ارتمى عالارض هو الاخر ميت لنفس السبب/
ظاهر خرج من الخيمة بتشتت وبيده سلاحه واخترقت يده خلال هالتشتت رصاصة التفت وراه من سمع صراخ بلال المصاب مثله
ظاهر بحدة وعينه على سامي/لاتتحرك خلك مكانك
سامي المتمدد يحاول يوصل سلاحه اللي بينهم مسافة بسيطة توقف من سمع أمر ظاهر
ابراهيم فز وبيده سلاحه وضرب سلاح سامي بطرف رجله حتى يوصله له لكن رصاصة القناص كانت اسرع وارتمى عالارض
ظاهر شحب وجهه بصدمة ابراهيم مساعده وصديقه بكل مراحله العسكرية ارتخت يده يناظره بعدم استيعاب
سامي فز وجرى لظاهر بصراخ/ظاهر
ظاهر ناظره بصدمته مااستوعب
سامي دفه
ظاهر ارتمى عالارض من دفته
سامي اصابته رصاصة القناص وارتمى فوق ظاهر
بلال المصاب زحف وسط الامه وسحب  قنبلة يدوية من حدد مكان القناص المبدأي ورماها عليه
القناص هرب من وقعت القنبلة على مسافة قريبة منه
ظاهر لمحه بعيونه الغرقانة دموع دف سامي عنه وسحب قنبلة ورماه على المكان اللي لمحته عينه تمدد عالارض يتلفت حوله وبعد مدة تأكد خالي المكان فز لسامي جلس عنده وبرجفة يديه رفعه له/سامي سامي/ضمه له وبكى بحرقة/لا ياسامي لا تكفى لاتروعني انت اللي ترتاع مو بأنا تكفى
بلال التفت حولهم بألمه وبدموعه كل اللي بالخيمة اموات اعتلت صوت شهقاته من كثر الحزن غطى فمه بيده يكتمها حتى لاتفضحه ويصير هو وظاهر بنفس وضعهم
ظاهر مرر نظره بالمكان حوله بلحظة هدا المكان بعد ماكان يعج بالانفاس كيف تبخر وجود الاشخاص بلحظة كيف هالهدوء المفترض يكون مطمئن اصبح مرعب وكثير انسابت دموعه من وجع الفقد كانوا بمثابة الحياة كل واحد منهم يحمي الثاني بروحه خمس سنين اختفت كلها بلحظة
ظاهر التفت بحدة من حس بحركة جرى لمصدر الصوت
بلال همس/ظاهر ظاهر
ظاهر انقض عالقناص المبتورة رجله جلس فوقه وسط مقاومة القناص اللي قوته ماكانت اقل من قوة ظاهر وقدر يصيبه ظاهر سحب سكينة جيبه وسددها لرقبته مرة وثنتين وثلاث رماها وبدا يخنقه رغم انه مات من طعناته واعتلى صوت صراخه بجنون/رجعهم رجعهم لي رجعهم ذالحين يا###
بلال اللي يعرج وقف عنده ومسكه يبعده عنه بكل قوته/خلاص ياظاهر خلاص لاتجمع علينا الباقين خلاص
ظاهر دف بلال عنه والتفت يناظر المكان حوله يلفه الظلام كل شي اسود بأسود هدوء حتى اصوات صراصير الليل اللي تغطي الديرة معدومة بهالمكان غطى اذانيه وبانهيار صراخ/تكلموا لااحد يسكت تكلموا ليه ساكتين تكلموا
بلال احتدت نظرته وقف وضربه بطرف سلاحه مفقده وعيه
،
،
وداد قامت من مكانها ورفعت نفسها وانحنت قباله ووجهها بوجهه الفارق بينهم مسافة بسيطة همست/ظاهر
ظاهر فتح عيونه على وسعها
وداد فزت بخوف متراجعة لورا
ظاهر فز عالسرير يحاول يمسكها من لمح السواد اللي لابسته بهالظلام اللي مغطي الغرفة 
وداد جرت مبتعدة تحاول تخرج من البيت وسط صراخها اللي اعتلى/يـمـه بـيـذبـحـنـي الـمـجـنـون بـيـذبـحـنـي/فتحت باب البيت وخطت خطوتين لبرا/
ظاهر مسكها ورماها عالارض جلس فوقها وبصراخ بدون وعيه/رجعهم لي ذالحين رجعهم
...................................................
<<بيت الشعر>>
مُحارب جالس قبال جده وعن يمينه بـيّـن بعد ماصرفوا سلمان ونواف
طاهر/ولد يامحارب
مُحارب/سم
طاهر دخل يده بجيبه يخرج ورقة/لا أخذت زوجتك وتيسرت يم المدينة/مدها لمحارب/
مُحارب اخذها ناظر الورقة ثم ناظر جده باستغراب
طاهر/خلها معك بيجي يوم وتحتاجها
مُحارب/ابشر ياجد
طاهر/ولا رحت يم البيت لاتعلم احد انك من هالديرة
بـيّـن قطب جبينه باستغراب من هالطلب
مُحارب/ابشر ياجد
طاهر/رح يم امك
مُحارب ماتوقع ينطرد/هاه
طاهر/رح يم امك خلص امورك
مُحارب وقف/على امرك ياجد/مشى/
بـيّـن ناظر جده اللي بينهم مسافة
طاهر/علامك مبعدٍ عني تقل بي جرب
بـيّـن تحولت نظرته لاستغراب من فكاهة جده معه على غير العادة
طاهر/وراك ماتركد يابـيّـن
بـيّـن ارتفع حاجبه/وشلون افهمها ذي؟
طاهر/ضربت بيومين ورا بعض وأوجعت و
بـيّـن قاطعه/تذوق عن طرف لسانها ماذاقت من ماذقت شي
طاهر تنهد/يابـيّـن كانها سكتت فهالسكوت وراه شيٍ يوجع وبالحيل
بـيّـن بابتسامة ثقة/هالمرة مقبل كلي ولذالحين ماذاقت شي
طاهر احتدت ملامحه/إياك ووادي سرّاي يابـيّـن إياك
بـيّـن تكتف/والله الوادي ماهو بملكٍ لها
طاهر بحدة/بـيّـن
بـيّـن فك تكتيفته/اسمعك ياجد
طاهر/اصبر هالمرة انا معك مقبلٍ معك لاتسوي شي توردنا به يم آجالنا
بـيّـن ناظره بشك/احتريت سنين من ذيك الليلة اللي علمتني بها
،
،
بـيّـن(١٧سنة)وقف بهالبر ماحوله احد يبعد عن الديرة قرابة اربع كيلوات ناظر البيت اللي انحكم عليه يعيش فيه راعي محكوم يقاطعه الكل مجرد راعي ماينطق كلمة غير سم وابشر مو من حقه يتصرف بحرية امتلى صدره حرقة وقهر ارتسم اثرها بعيونه غرقت عيونه دموع يناظر البيت المهجور اللي حتى صاحبه عافه ورحل عنه انحنى شبه جالس يناظره بحزن ابعدته بكل جبروت وطغيان ابعدته عن اهله وناسه وكل شي يحبه كانت لحظة غضب فلتت منه وهي المنتظرة من سنين استغلتها ضده رغم فارق العمر بينهم مارحمته انقضت عليه بحكمها الجاير راعي ١٢سنة يخدم القرية وأهلها يكفر عن ذنبه بهالطريقة او يدخل السجن والنهاية جده اختار يكون راعي واجبره عالاختيار
الجد طاهر وقف وراه بغيظ/بـيّـن
بـيّـن مالتفت له ولا رد
طاهر/اصبر وانا جدك اصبر
بـيّـن طاحت هالدمعات اللي اختزنتها عيونه ماهلت غيرها ابد
طاهر/كلها سنة وترجع البيت
بـيّـن التفت يناظره بأمل
طاهر شد على عكازه بقهر/والله لا ارفعها لسابع سما ثم اهوي بها لقاع الارض والله لاتبرد قلوبنا من شوفتها تنوح
بـيّـن اخذ نفس يكبح عبرته ومسح دموعه بحركة سريعة ثم دخل يديه بجيوبه/سنة؟
طاهر ناظره بصمت
بـيّـن/اكيد سنة ياجد
طاهر/سنة يابـيّـن سنة
،
،
طاهر تنهد/هاك الليلة
بـيّـن/هاك الليلة أخذت من عمري عشر سنين وانا احتريك ياجد وتاليتها
طاهر قاطعه/تاليتها الليالي طالت لسبب ماهي بهينة والخطوة اللي هي تسويها بدقيقة احسب حسابها سنة وانا جدك
بـيّـن تنهد/اجل قضيت عمري وانا احتريك/وقف/
طاهر/هذاك اول يابـيّـن
بـيّـن قطب جبينه
طاهر/ذالحين اللي هي تبي تسويه بدقيقة حنا نسبقها بساعة
بـيّـن ناظره بشك
طاهر/طاوعني هالمرة ولاتروح يم سرّاي اصبر
بـيّـن سكت بتفكير قطب جبينه بتكذيب من اللي سمعه/ياجد
طاهر قاطعه بحدة/سمعته
بـيّـن جرى خارج من بيت الشعر متجه لبيتهم
.......................................
<<بيت الشيخ>>
نور خرجت من غرفتها تجر خطواتها بهدوء وسط التفاتتها مابين كل لحظة والثانية تتأكد من خلو المكان وقفت عند غرفته وفزت من سمعت اسمها
ريوف تكتفت/نور وش تسوين عند غرفته
نور تنهدت والتفتت لها/وش عليك!!
ريوف/لايكون رجع بعد اللي سواه بعزيز قليل الاصل
نور اتسعت عيونها/انتي الحين من اخوك سطام ولا عزيز!!
ريوف/ايه نسيت انكم من نفس الحزب
نور/هذا عندك ولا الاخوان ابدا مابينهم احزاب والله يسمع منك ان شاء الله ألقاه بغرفته وارتاح
ريوف/اذا فتحتي ومالقيتيه لاتموتين علينا واذا مامتي روحي جهزي لجدتي دواها/مشت/
نور فتحت باب غرفته ودخلت قفلت الباب وراها اسرعت بخطواتها وقفت على سريره وسحبت شنطة السفر الصغيرة اللي فوق دولابه ونزلتها فتحتها وبدت ترمي اغراضه داخلها خرجت من الغرفة بنفس الطريقة اللي دخلت فيها اسرعت بخطواتها لباب البيت وفتحته بشويش
سطام دخل متلثم بشماغه وفك لثمته بابتسامة
نور ناظرته تتفحصه تطمنت وضربته بخفة من كثر قلقها عليه طول اليوم/وين ذلفت
سطام ابتسم همس/قريّب قريّب
نور/ويومه قريب ورا ماعلمتني
سطام ناظر شنطته وناظرها/وين شنطتك
نور/ماني برايحة معك
سطام اتسعت عيونه/ليش
نور/لازم احد يكون موجود عشان يـقـيـن كيف نمشي ونتركها
سطام سحب يدها وخرج الشال من جيبه وحطه بيدها
نور ناظرت شال يـقـيـن باستغراب
سطام بابتسامة/اختك ذيبة ماينخاف عليها امشي معي
نور هزت راسها بلا/تكفى سطام لاتجبرني
سطام/اسمـ
نور قاطعته/نويت اروح لجدي
سطام/وش عليك من جدتي وجدك امشي معي ونرتاح
نور ابتسمت/ماتدري يمكن اضبط امورك هناك
سطام/امشي معي نعيش على هوانا محد له كلمة علينا
نور/ظنك سحاب بترضى
سطام احتدت ملامحه/ماشفنا رضاها وحنا بوسط بيتها ونقول سمي وابشري
نور هزت راسها بلا/اسمع اختك رح الله ييسر امرك والجوال مايقصر بيننا
سطام ناظرها بكسرة خاطره تمنى تكون معه ماوده يتركها بهالبيت بتتحمل بعده كثير عنه وعنها
نور مدت يديها لشماغه تحاول تلفه/رح رح الحين
سطام لف الشماغ يتلثم فيه ثم خرج
نور قفلت الباب
سطام ظل مكانه واقف ورا الباب بتفكير ارتفع حاجبه من طرا بباله الموضوع فك لثامه ونسف شماغه يعدله ومشى بابتسامة يجر شنطته وراه
.
(غرفة مبروكة)
مبروكة جوالها على اذنها/فهمت 
سهم تنهد/بس
مبروكة/كبّهم يسرحون ويمرحون لاتطري شي
سهم سكت
مبروكة/حقٍ علي ان تنعاد ذيك الليلة من جديد
نور وقفت ورا الباب تسمع
سهم/ماهو بزين نكرر الامور ماعادت الامور مثل الاول
مبروكة ضحكت
سهم قطب جبينه
مبروكة/سهم ياهيه علامك!!لعبت بك الدنيا برا ونسيت من تكون سحاب انا لانويت الشي حتى الجن مايقدرون يردونه
سهم/محشومة ياسحاب محشومة مير
مبروكة/ارفع علومك هالمرة مسامح/بتهديد/مير الجاية مالنا بمسموح وتخبر تاليه
سهم ميل فمه
مبروكة ضحكت/علامك اضحك معك
سهم كشر بوجهه
مبروكة/انت سهم ماهو بأي أحد مثلك مثل عزيز عندي
سهم بنفسه/ايه مثل عزيز مير ماني بعزيز/بحسرة/بعيدة عن خشمك الشيخة ياسهم بعيدة
مبروكة/عاد سو اللي علمتك بكرة وتريح بعده لحد ماعلمك فمان الله/قفلت/
مبروكة بحدة/تعالي
نور دخلت وبيدها درا جدتها وقفت عندها
مبروكة رفعت عكازها وسددت ضربة لنور بكل قوتها على اذنها
نور تحركت خطوة لورا بوسع عيونها
مبروكة بحدة/وتبعدين بعد!!
نور بلعت ريقها
مبروكة/لاتحسبين اني مااعرف انك اتسمعين علي مير اني ابي اعرف وش تالية هالتسمع
نور/مااتسمع بقصد ياجدة يعلم الله
مبروكة قطبت جبينها
نور/اخاف ادخل وتهاوشيني مثل اول اقطع اشغالك
مبروكة سكتت بشك
نور برجفة صوتها/جبت الدوا ياجدة
مبروكة/حطيه وطسي
نور نزلته بسرعة وخرجت اسرع
مبروكة تاخذ دواها بتفكير بينها وبين نفسها/يقين ماعاد تصلح ابد وريوف مطفوقة/زفرت تطرد الفكرة/صعبة بالحيل دم طاهر يجري بعروقها مامنها فود ابد
نور دخلت غرفتها وقفلت بابها وسط انفاسها جلست عند الباب تحس بعظامها توجعها ضمت نفسها/يمه يمه بغت تجيب اجلي يمه/اخذت نفس وقفت واتجهت لدولابها الصغير انحنت شبه جالسة وسحبت خشبة اسفل الدولاب دخلت يدها لتحت الدولاب وسحبت كيس باللون الاسود داخله دفترها اللي بداخله القلم تربعت وكتبت فيه تنعاد ذيك الليلة قطبت جبينها بتفكير تقلب بصفحات دفترها اللي تكتب فيه تجميع الكلام من سنة(الحداد،سرّاي،الطير لايطير،الاغراض،فلوس كل شهر مبلغ كبير،اتصال بنفس الوقت كل شهر،..........)تنهدت بشكوك تدور حول جدتها قفلته وشدت عليه وكأنه أغلى ماتملك قفلته ورجعته داخل الكيس ورجعته لتحت الدولاب ورجعت الخشبة بحرص لمكانها
................................................
<<بيت ظاهر>>
وداد جرت مبتعدة تحاول تخرج من البيت وسط صراخها اللي اعتلى/يـمـه بـيـذبـحـنـي الـمـجـنـون بـيـذبـحـنـي/فتحت باب البيت وخطت خطوتين لبرا/
ظاهر مسكها ورماها عالارض جلس فوقها وبصراخ بدون وعيه/رجعهم لي ذالحين رجعهم
وداد اللي مرت بنفس التجربة معه مرتين قبل سنتين بنفس السيناريو تماما وهالمرة الثالثة كانت مستعدة لها بكل مافيها فتحت سكينة الجيب المحتفظة بها بيمينها رفعتها موجهتها له حتى تصيبه
ظاهر ابتعد براسه لورا ومرّ طرف السكينة ولامس خده الايمن مسبب له جرح غاير وواضح رفع يمينه ومسك يدها اللي بها السكينة وضرب يدها بالارض بحركة اعتيادية من تدريباته
وداد صرخت بألم وطاحت السكينة من يدها
ظاهر بحدة ملامحه من حركتها رفع يمينه وقبضتها وسدد لها لكمة
نواف وقف عنده ومسك يمينه يوقفه بفجعة/ظاهر
سلمان حاوطه من وسطه وسحبه بدون فايدة
ظاهر ضرب سلمان على راسه بطرف كوعه بكل قوته
سلمان تركه ومسك راسه بألم
ظاهر حرك يده ورمى نواف على ظهره
ضاري يناظرهم وسط دموعه
غصنة وقفت عندهم بعبايتها وبدموعها/ظاهر خلاص تكفى خوفت ضاري
ظاهر اتسعت عيونه من ناظرها وقف تارك وداد ومشى بخطوات ثابتة متجه لها
غصنة قشعر جسمها بخوف من نظراته
سلمان فز واقف ووقف بينهم
منيرة اللي خرجت بعجلة وعلى راسها طرحتها المبعثرة فقط وقفت بين سلمان وظاهر مافيه اي فاصل يذكر بينهم
ظاهر ناظر امه بحدة ومد يده حتى يمسكها
سلمان مد يده بفزع وسط اتساع عيونه/عمة
مُحارب وقف ورا ظاهر وحاوطه من وسطه رفعه ولف فيه للجهة الثانية عن امه وبوجهه على مسافة وداد
غصنة جرت لضاري مسحت دموعه ودفنت وجهه بحضنها عن اللي يصير
وداد واقفة وبيدها الراجفة سكينتها موجهتها لظاهر
ظاهر يضرب على محارب يحاول يوصلها
مُحارب بصراخ يقاوم ظاهر/احذفيها بسرعة احذفيها
وداد بصراخ/ابعد عني ابعد
مُحارب مو قادر عليه اكثر/نواف سلمان
بـيّـن دخل للبيت يجري وبطريقه ضرب يد وداد بكل قوته
وداد طاحت السكينة من يدها ومسكتها تتألم
بـيّـن مسك ظاهر مع مُحارب 
ظاهر قاوم وقاوم بدون فايدة صرخ من قلبه بانهيار ارتخى جسمه لحظة اغمى عليه من بينهم
مُحارب جلس من ثقل ظاهر اللي كان اغلبه عليه
بـيّـن شد على ظاهر ونزله فوق محارب الجالس
منيرة اللي ماكفت دموعها حزن على حالة ولدها اللي كان بأحسن حال وانقلب حاله بلحظة اسرعت بخطواتها لعيالها جلست عندهم ورفعت راسه لحضنها وسحبت بيدها طرف طرحتها تمسح خده عن دمه وسط دموعها اللي بللت خده بدون اي كلمة
بـيّـن منحني شبه جالس بلغ غصته من منظر امه واخوه اللي ماتوقع بيوم يشوفه احتدت ملامحه من سمع صوتها
وداد برجفتها الواضحة بصوتها/هالمرة ماني بساكتة والله بعالي سماه لاتوصل لسحاب واخذ حقي من عيونكم
بـيّـن التفت لها يناظرها بحدة
وداد/هالمرة بغى يذبحني المرة الجاية مافيها بغى بيذبحني اكيد هالمجنون
غصنة سالت ضاري وجرت فيه لبيتهم
بـيّـن كبح غيظه ومن بين اسنانه نطق/احشمي عمرك وحسّني ملافظك لاأعلمك كان اهلك ماعلموك
وداد انحنت لطرحتها المرتمية على باب البيت وتمرغت بالتراب لفتها على راسها ورمتها على وجهها/ماقلت غير الصدق كان اوجعك الصدق ماهو بذنبي ياولد خلف
بـيّـن باستقعاد/انتي روحي لسحاب وانا بروح للشرطة
وداد احتدت نظرتها
بـيّـن بابتسامة/شروع بالقتل
وداد اتسعت عيونها
بـيّـن/سلاح ابيض والنية مبيتة من مبطي/أشر عاللي حوله بيده/والشهود موجودين
وداد تكتفت/دفاع عن النفس ومايلحقني ملامة دام سجله النفسي مليان
بـيّـن اسرع بخطواته وسط احتداد ملامحه ورفع يده بيضربها
طاهر دخل البيت ووقف على مسافة منهم وبحدة/بـيّـن
بـيّـن قبض يده وشد عليها ونزلها
وداد بتحدي/سوها وش تحتري
بـيّـن عض شفته بقهر يناظرها
وداد بلمز/ماهو هذا انتم يارجال بني طاهر عادتكم تضربون الحريم مايردكم شي لاحيا ولا مستحى
بـيّـن احتدت نظرته
طاهر شد على قبضته بوسط غيظ اعتلى ملامحه 
،
،
،،قـبـل ١٦ سـنـة،،
بممر القرية المهجور اللي يغطيه الظلام ويلفها السواد مسرعة بخطواتها مبتعدة قبل يلمحها احد زادت سرعتها من حست بخطوات تتبعها وقفت والتفتت بحدة
يمشي خلفها بلثمته بخطوات مماثلة لسرعتها وقف من وقفت وعينه تنطق بكل مافي داخله من قهر وغيظ
زينة بشوفة نفسها المعتادة وبتحدي/ياهيه لو تدري من أنا ماترفع راسك ولا عينك تناظرني بهاللون
خلف دخل يديه بجيوبه ورمى الرسايل بوجهها
زينة اتسعت عيونها كل رسالة كانت قطعة من قلبها كم انتظرت رد منه كم كتبت وسط دموعها مو مجرد حب الا هو عشق طفولتها ومراهقتها غلطتها الوحيدة وافقت بدون ماتدري ايهم المتقدم وانحكم عليها بالفشل حتى قبل تبدأ رفضت هالظلم بكل مافيها وهاذي اخر حلولها مستعدة تبيع كل شي عشان لحظة من مقابل وجهه وصوت سوالفه وضحكاته ناظرت خلف بلمعة عيونها
خلف بقهره/نعنبوك شتتينا هججتي اخواني من بعضهم حامد وهج من الديرة من سواياك وعيّاش مات بحسرته منك وفوق ذا كله ماملا عينك منصور اهبي الله اكبر عليك اهبي اعتقي حامد اعتقيه كبيه لحاله كبيه
زينة شدت على يديها تطرد توترها وبانكار/مدري وش اللي تهرج عنه
خلف دخل يده بجيب فروته وخرج شالها المعروف امين ينتمي بهالديرة هالشلل اللي محد يمتلكه الا سحاب ونسلها
زينة رجف قلبها من طاحت عينها على شالها بين يديه
خلف بحدة/تراني ساترٍ عليك ماهو لعيونك الا منى عيني ارفع الستر عنك ويرجع حامد للديرة ماردني عنك الا بنية اخوي/رجف صوته بعبرة وهو يتخيلها/وشلون احط عيني بعينها وانا مسويٍ بها هاللون
زينة ضحكت/ويل حالي مادريت عنك ويلي
خلف قطب جبينه
زينة بضحكة/اثاريك طلعت عشقان وانا مادريت حـ
خلف ببرود عروق رقبته وجحوظ عيونه من صدمته باتهامها ضربها كف بكل قوته
زينة ارتمت عالارض وسط صوت رن بأذنها من قوة ضربته شدت يديها عالارض رفعت عيونها والتقت عيونها بعيونه
بـيّـن(١٢سنة)واقف على مسافة منهم يناظرهم بوسع عيونه من صدمته باللي شافه ابوه يضرب حرمة ومو بأي حرمة عرفها من هالشال المزين بالفضة تراجع لورا متخبي بجدار هالبيت المهجور وسط انفاسه السريعة تحرك بيهرب من المكان كله وقف من طاحت عينه عليها وراه
همست له/اوووص
بـيّـن التزم الصمت ظل واقف بمكانه
اسندت يديها على كتوفه وشدت عليه حفرته باظافرها من كثر غبنتها باللي سمعته
بـيّـن غمض عيونه بالم ورجفة يعيش بموقف اكبر واصعب من عمره بكثير
زينة ناظرت خلف بحقد
خلف/انتي حرام بك الحشيمة واجب ينفذ بك شرع الله ولايغض عنك الطرف مير هين وانا ولد ابوي ان ماخليت اهل الديرة كل ابوهم يدرون عن سواد وجهك مااكون انا ولد طاهر/مشى/
زينة وقفت وسط محاجر عيونها الممتلية دموع كل شي ضاع حبها المنتظر من سنين بيت العز والشيخة اللي تربت وعاشت فيها وتزوجت منهم الحين بتنطرد منه جرت خطاها وسط حسرة على نفسها جاهلة لوجود شخص حضر الموقف كامل غير اللي شافته هي
~~صباح يوم جديد~~
،،مجلس القرية،،
،،مجتمع بالمجلس رجال الديرة وكم ضيف وشيخين من القرى المجاورة،،
جالسة متوسطة المجلس بشالها اللي يغطي معلن هويتها للمجتمعين بوضوح
منصور يناظرها بصدمة من وجودها بهالمكان
زينة اخذت نفس وبصوت جهور/انا توسطت هالمجلس طالبتن الحق انصفوني ياوجيه الخير عليكم الله وامان الله ابي حقي ولاغيره زيادة طالبتكم
منصور منصعق من اللي يسمعه
زينة ناظرته/ياشيخ منصور ماهو بقصورن فيك مير اني ذليت تعفي عن حقي لوجه الله وتسامحه وانا كل رجاي ومناي ابي حقي بس ماابي غيره انصفوني من الظلم والقهر تكفون ياوجيه الخير ردوا علي كرامتي تكفون
الشيخ منصور اخذ نفس وكبح غيظه/امري ياام سطام ان كان لك حق خذيناه على عينك وسلمناك اياه
زينة/خلف ولد طاهر
خلف شد على قبضته بقهر من اتجهت له الانظار
زينة بصوت راجف/تعرضني البارح وضربني وانا لاحول ولاقوة لي به  ولا لي علم وشو له سوى بي هالسواة/وبتشكيك بنيته/ولى وشو مغزاه
طاهر انصعق من اللي يسمعه والتفت يناظره
خلف كتم غيظه وسكت
زينة/وشاهدي موجود منه وفيه/التفتت تناظره/
بـيّـن جالس جنب ابوه انكمش على نفسه من اتجهت الانظار له
خلف اتسعت عيونه بصدمة
زينة اشرت عليه/بـيّـن البيّن
بـيّـن لاول مرة بحياته يكره اسمه ويكره حتى هاللقب كل عمره من عرف نفسه وبدا يوعى مايكذب ابدا حتى يكون اسم على مسمى مثل ماسكته جدته وتغنت به بالديرة بلع ريقه بقلة حيلة وسط افكاره اللي تعصف به رفع راسه من وصله الصوت
خلف/خلك مثل اسمك بـيّـن يابـيّـن
منصور/بـيّـن صحيح هالكلام
بـيّـن سكت
طاهر بحدة/انطق
بـيّـن غمض عيونه/ايه شفته
طاهر بردت عظامه بفجعة وخيبة
خلف بملامحه الهادية يناظر الشيخ بدون ادنى اهتمام لكل النظرات والهمسات من حوله
منصور قطب جبينه بشك
بـيّـن نطق بعجالة/مير إنه هو مايسوي شي عبث تكفون تكفون
منصور ناظر خلف بدون اهتمام لتوسلات بيّن ونظراته/ياابو ظاهر احلف عـ
خلف بدون ندم واضح للكل/ماله داعي الحلف ايه ضربتها وهي تدري ليش
زينة بكت/ياويلك من الله ياظالم معتدي وترميني بعد مابك حشيمة مير وشو له الحشيمة وانت ماخفت من الله
بـيّـن خرج من المجلس يجري ماتحمل يظل دقيقة،اكثر مكان يحبه ويحب يجلس فيه ويستمتع بكل مايقال اصبح بهالدقايق جحيم مستعر تحته وحوله خرج تجره خطواته مبتعد عن الديرة بلا هدف وسط دموع هلت من عيونه بحسرة اليوم اصبح اسمه نقمة عليه شهد ومو بأي شهادة شهد ضد ابوه وهو موقن بقرارة نفسه ببراءة ابوه لكن مين بيسمع له مين بيصدق هي مرت الشيخ وابوه مجرد قروي جلف ماله علاقات الا مع اخوانه جلس وانهار لوحده بهالبر الخالي بدون حتى مايعرف وش الحق اللي طلبته زينة من ابوه
~~الـعـصـر~~
بـيّـن دخل للبيت بوجهه المكتسي بالسواد
حمدة المنهارة بوسط عيونها المتفجرة بشلال من الدموع من لحظة وصلها الخبر وانقلب حال البيت اللي بدت تزين اموره من فترة بسيطة التفتت تناظره
حامد اللي راجع للديرة من فترة بسيطة قرابة الشهرين بعد غياب سنين شايل شنطته بيده مسرع بخطواته
حمدة وقفت ومسكته/وين ياحامد على وين وانا امك؟
حامد بتوتر/مالي مقعاد بهالديرة ابد مالي مقعاد قبل سنين عياش واليوم تبلت خلف وبكرة كان ماقدرت تاصلني تذبحني تسويها 
حمدة/يايمه الديرة كلها تدري بفعلها
حامد هز راسه بنفي/مخطية يمه مخطية محد يدري غير اهل هالبيت وزهى يمه زهى
حمدة بدموعها/لاتحرق قلبي ياحامد لاتحرقه تكفى
حامد برجفة صوته/زهى يمه بلكن تسلم منها علميها هي طالق طالق طالق واطلبيها تبيحني يمه اطلبيها/مشى بخطوات سريعة/
حمدة بوسط شهقاتها تجري وراه/لا ياحامد لا ياوليدي لاتفرق عويلتك يمه لا
حامد خرج
حمدة اخيرا انتبهت له ناظرته بقهر
بـيّـن ثبت مكانه يدري باللي سواه ويستاهل مايجيه راضي بعقاب جدته والاهم ابوه يبي يشوف ابوه بهاللحظة مشى حتى يدور عليه/وينه ابوي وينه
حمدة ضربته كف بوسط دموعها/وش تبي فيه ناوين تكمل الباقي!!
بـيّـن حبس دموعه يناظرها
حمدة/ياليهودي تشهد على ابوك!!حتى اليهودي اطهر منك ماسوا سواتك
بـيّـن ناظرها بصمته
حمدة مسكته من ياقته وشدته تهزه وسط دموعها/نعنبوك سميتك مادريت بتذبحني به حسيبك الله يابـيّـن حسيبك الله ياليهودي
،
،
وداد ابتسمت برضا عالي وجدا تتحداه/علامك مد يدك وش تحتري
الجدة حمدة الواقفة ورا تراقب الاحداث بهدوء امتلى صدرها غيظ من انعاد الموضوع اللي يمسها وكثير  مدت يسارها لامست كتف وداد لفتها عليها وضربتها كف بكل قوتها
وداد مسكت خدها بوجع تحس بخواتم يدين حمدة اخترقت خدها وجرحته
حمدة بحدة/مير ماهو بس رياجيلنا حتى حريمنا يربون من ناقص تربيته
وداد مدت يدها بتضربها
منيرة مسكت يدها تناظرها بحدة ودقت يدها
وداد انصدمت من منيرة كثير ممكن هالشي متوقع من حمدة لكن منيرة مستحيل دائما هادية ولاتتدخل بأحد
منيرة/حدك الا عمتي اكسر يدك
حمدة/تعقب وتخسى تلمسني مابقى الا هي اسمعي يابنت منور وحطي العلم حلقة باذنك رجالنا اشرف واطهر من بياض السحب بأعالي السما مايدنسه كلمة رمتها فم حاقد ولا لسان ظالم وذا العلم بعيد عن خشمك وشلون تعرفينه وتفهمينه وانتي لون قلبك يماثل للون العباة اللي انتي لابستها
وداد زفرت بسخرية/دايم ترفعون انفسكم فوق انتم المنزهين والديرة كل ابوها غلطانين مير ذالحين انا بأوعيكم وأعلمكم تراكم بعيون الديرة ماتسوون التالية من الغنم
بـيّـن تحرك والتقت عينه بعين جده اللي نهره بنظراته
حمدة تحركت ومسكتها منيرة اللي منصتة لها بابتسامة
وداد/وامجاد بني طاهر اللي لذالحين عايشين على ذكرها ولت وادبرت وحلّ مكانها خلف وولده وذكرهم اللي كان يتغنى به من زينه/ضحكت/
منيرة ضربتها كف
وداد تحركت بتضربها وقفت من وصلها صوته
طاهر بابتسامة/مير يابنت منور اقلها لنا طاري وسط العرب وراضين بهالطاري كيف ماكان لونه ازين من غيرنا
وداد احتدت نظرتها
طاهر/ذالحين جا دوري اوعيك بالحقيقة اللي غابت عن عينك من سنين ياوداد
وداد توترت كانت ولازالت تهابه تخس بخوف من ناحيته رغم انه ماتعرض لها بيوم ابد
طاهر/غرّك حلم ظاهر وكبر راسك تظنين ان محد بهالدنيا تحمل كثرك والحقيقة ان محد تحملك كثر ظاهر
وداد ضحكت باعتراض على كلامه/ظاهر تحمل!!ليه هو شاف مني شي حتى يتحمله!/صرخت/محد تحمل بهالبيت اكثر مني حتى انتم ماتحملتوه
طاهر/ياشينة الاطباع يازفرة اللسان
وداد سرت رجفة بجسمها من غبنتها
طاهر/ماتحشم الكبير ولاتحترم الغايب ولاتلين للصغير
وداد شدت على يدها بغبنة
طاهر ناظر صمتها/والله ان سكوتك ماهو من جميلة الا ان كل حرف نطقت به واقع منطبق عليك وراجعته نفسك وأقرت به مير الله حق وجنته حق وناره حق ودينه حق ورسوله حق/مسك شنبه بيده/ماهو بعلى رجال كان ماطلقك هالاسبوع وتزوج تاج راسك تسواك وتسوى اهلك والديرة كل ابوها
وداد ضحكت/نشوف من هي هالتاج اللي بترضى به بعد اللي حصل بهالليلة
طاهر/مير ماهي من سلومنا نطرد العرب توالي الليول امرحي ببيتك الليلة وودعي مكانٍ كان لك جنة وماانتي معيّنة مثله ولا مثل راعيه وبكرة يتعذرك البيت وراعيه/عطاها ظهره ومشى/
وداد/هالبنت ماذقت فيه الا المر عافته النفس من اقصاها مالي مبيت فيه ابد
طاهر وقف معطيها قفاه بدون اي التفاته لها/ولد يامحارب اسر بها يم اهلها
وداد/انا بنت الديرة ماعلي خوف من اهلها الخوف كان قعدت بهالبيت دقيقة وحدة
طاهر على نفس وضعه أشر بعكازه عالباب/هذا حنا مشرعين الباب الله يستر عليك تخبرين بيت اهلك
وداد بصراخ/ضاري ضاري طلعوه طلعوا ولدي طلعوه
طاهر التفت لها هالمرة
بـيّـن/تعقبين وتخسين تاخذينه
وداد/ماهو بكيفك يالراعي انت اخر من اسمع له بعمري
بـيّـن شد عليه وتقدم لها
وداد بحدة/ولدي ذا تعقبون تاخذونه مني
طاهر/مير وليدنا مانرضى يسري بهالليول نخاف عليه من ادناة الدون
وداد بتحدي/ولدي يجي معي
طاهر/وليدنا ماله مسرى الصبح نلحقه بك وان كان ودك هذاك بيتك الليلة مثل ماعلمتك ولا اسري براسك ماعندي علم غيره/مشى وتركها/
وداد شدت على قبضتها بقهر واستسلمت بخوف ياخذون ضاري منها اتجهت لبيتها وجلست عالباب خارجه
حمدة ناظرتها بغيظ/والله يابنت منور تحفين ولاتلقين مثل ظاهر مير ماعلى الردي حسوفة
.........................................
<<يـوم جـديـد>>
.........................................
<<بيت الشيخ>>
سطام جالس قبالها يناظرها
مبروكة تناظره بحدة/فوق شينك لافي خير وش بغيت ياولد منصور
ام سطام تناظره بغيظ من اللي سواه
سطام/انا جيت اطالب باملاك ابوي ماهي بمعقولة ان ابوي قاعد عالشيخة ويصرف علينا منها
ام سطام بغبنة/ماتستحي انت اي تحاسبنا وابوك حي للحين
سطام/انا ماجيت احاسب انا جيت اشوف وضعنا المالي واعز نفسي وخواتي ماسويت شي غلط
مبروكة/ابوك ماله شي
سطام قطب جبينه/كيف يعني
مبروكة/ابوك مثله مثلك موظف عندي ياخذ راتبه من خيري
سطام/والمحلات
مبروكة/مالك شي عندي تيسر
سطام هز راسه بهدوء وقف/يالله اتركم بحفظ الله/مشى كم خطوة ثم وقف والتفت لمبروكة بابتسامة/الوايت اللي برا لابوي انا شريته من ماله وفاتورته اكيد بغرفتي
ام سطام بغبنة/صاحي انت هاذي نهاية ولد الشيخ
سطام/الشغل ماهو بعيب
مبروكة/خذه
ام سطام/يمه
سطام ابتسم
مبروكة/مير محدن من الديرة بيعبي منك
سطام بابتسامة/ليه هو مابه ديرة غير ذي
مبروكة احتدت نظرتها
سطام/عهدنٍ علي اول تعبية لاعشيكم بها
ام سطام بقهر/اذلف اذلف طسّ برا طس
سطام مشى بابتسامة/فمان الله يمه فمان الله
ام سطام ناظرت مبروكة/يمه هذا اولها الله يستر من التالي
مبروكة/مو بصاير الا كل خير
ام سطام/يمه لزميه حدوده علميه
مبروكة بحدة قاطعتها/زينة
ام سطام سكتت بغبنة
مبروكة/كبيه يتهنى بعمره يسوي مايبي وانتي ذوقتيه ذاك الشي اللي ماهو بهين/تنهدت/بشري جهزت المواجيب
ام سطام/ايه كل شي جاهز
مبروكة/تجهزن انتي وبناتك كل ابوكن تروحت معي
ام سطام شدت على يدها بكره/ماله لزمة البنات يكفي انا
مبروكة/كل ابوهن واولهم سويدة الوجه اللي سوا بنا كل ذا
......................................
<<بيت منيرة>>
غيمة تتقلب بمكانها مو قادرة تنام من وصلتها الريحة قامت من نومتها بغيظ خرجت من الغرفة اتجهت للمطبخ وقفت تناظرها بتكتيفتها
غصنة عند الفرن فوقه ابريق النعناع تغني بروقان/صباحي ورد وفل ولوز ياعمري انا صباح الخير
غيمة قفلت خشمها بيدها/وبعدين يعني وبعدين
غصنة غنت واتجهت لها فاتحة يديها/ياصباح الورد والفل
غيمة مدت يدها وشدت شعرها
غصنة اتسعت عيونها/اااه طيب وش سويت!!
غيمة بحدة/كم مرة قلت لك سويه وانتي لحالك هاه
غصنة مدت يدها وشدت شعرها
غيمة اتسعت عيونها/اااه
غصنة/حتى انا اعرف امد يدي مير اني من ذالحين الى ماتقوم القيامة طابخته وانتي فيه بعد وش بتسوين يعني
غيمة مدت يدها الثانية وشدتها
غصنة بادلتها بالمثل
غيمة بصراخ/فكيني
غصنة بعناد/انتي اللي بديتي فكي اول
مُحارب نايم خارج غرفة امه عند الباب متلثم بشماغه جلس وبحدة/وبعدين يعني وبعدين
منيرة فتحت الباب بشويش وبنظراتها اللي تنطق بشعورها خرجت وقفلت الباب وراها بهدوء/خير سلامات مرضى!!
غصنة ماسكة غيمة ماتركتها وطيف دموعها بعينها/يمه قولي لها تفكني
غيمة تركتها
غصنة ناظرتها بشك
منيرة/غصنة
غصنة تركتها وسط ترددها
غيمة اتجهت لغرفتها ودخلتها
غصنة بغبنة منها/نعاف النعناع عشانها عافته وش هالظلم
منيرة/يعني ماصبرتي الى ماتروح لولاء وسويتي اللي تبين
غصنة/والله يمه الكيف ماهو على امرها عاد
غيمة خرجت بعبايتها وجرت
غصنة اتسعت عيونها وجرت وراها
منيرة مسكتها/صاحية انتي تطلعين كذا سلمان ببيتهم اليوم
غصنة بكت وسحبت الطرحة اللي على راس امها وخرجت  تجري بصراخ/غيمة تكفين
منيرة التفتت تناظره باستغراب من هدوءه
محارب متمدد مكمل نومته
منيرة تنهدت/عساه عافية اقلها واحد منا ينام قرير العين
.
<<بيت الجد طاهر>>
نواف خرج ماسك ظهره بيده وحانيه شوي يجر خطواته بهدوء ناظر اخواته اللي مروا من قدامه يجرون ثم ناظرها باستغراب
حمدة جالسة على فرشتها بتكشيرة معتلية وجهها بعد اللي حصل البارح بدون قهوة قبالها لكن هالمرة قبالها صندوقها الصغير المفتوح قدامها ومبعثرة اغراضها خارجه من كحلة وكم روج هدايا من البنات ولامرة استخدمتها ماتعترف الا بروجها السحري واكياس حنا ومراية دائرية صغيرة وذهبها المعدود ناظرته وسحبت علية دائرية بغطا احمر/تعال وانا جدتك ادهنك
نواف/لا ياجدة شوي ويفك ظهري ماعليك
سلمان خرج من بيتهم والتقت عينه بعين نواف ضحك بسخرية سكت ومسك راسه يتوجع
نواف كشر بوجهه للحظة ثم ضيّق عيونه يتأكد وانفجر يضحك
سلمان منتفخ مكان ضربة ظاهر له
نواف/ادهنيني ياجدة ادهنيني مرده ماهو بمثله/ضحك/
سلمان بتكشيرته/جدة ادهنيني معه
حمدة مدت يدها على كحلتها هونت/كل واحد عنده أمه طسوا عني/سحبت مرايتها وبدت تكحل عيونها/
نواف/جدة
بـيّـن دخل للبيت ناسف شماغه على راسه يلعب بسبحته بيده وطرق وراه/هيه ياولد/وقف يناظر جدته بابتسامة/
حمدة اتسعت عيونها/اعقب لافي علينا بسلقك!!تهجج عنا الملايكة اذلف اذلف انت وياه اهب عساك ماتربح
بـيّـن بابتسامة اشر بيده لطرق بقصد/ابشري ياجدة ابشري
طرق خرج يتبختر بمشيته
حمدة اتسعت عيونها/انا بنت ابوي ابوه وش ذا العلم
بـيّـن ضحك ينتظر ردة فعلها وماخيبته
حمدة/قطع لهالضريسات علامك لافي يمنا
بـيّـن يعدل ياقة ثوبه بابتسامة/جيت اشوف الفرحة بعويناتك ياجدة
حمدة تنحنحت ونزلت عينها على مرايتها تكمل كحلتها/ومن متى تلفي علينا بالافراح ماوراك غير الاتراح
بـيّـن ضحك/عني ياجدة فرحتك اليوم عن خمسين سنة قدام ولّى
حمدة اخذت روجها السحري ومررته على شفايفها
بـيّـن صفر/يوه يايمه الليلة يوه ياذكر الله والزين وانا اقول اشابه من بالزين طلعت قطرة من بحر حمدة
حمدة فلتت منها طرف ابتسامة سيطرت عليها/اعقب مابك من الزين شي
بـيّـن/مير انا الغلطان ياجدة ولا انتي كريمة وانا رفست النعمة
حمدة مسكت راسها/وووه وووه صدعت بي صدعت رح يم امك طس عني/ناظرت نواف وسلمان المستغربين من استمرارية جدتهم بالسوالف مع بين لاول مرة من سنين/طسوا عن وجهي انتوا بعد وش تحترون يالله يالله
بـيّـن/ابشري ياجدة ابشري/مشى لبيتهم وقف من سمع اصواتهم غير طريقه ماشي باتجاههم/
.....................................
<<بيت مضاوي>>
،،عالفطور،،
غيمة بحضن جدتها
مضاوي تفطر غيمة بابتسامة بدون ماتفطر
ولاء تفطر وعينها على جدتها وغيمة/ياسبحان الله مغيّر الاحوال
رازي يفطر/اذكري الله يالغيور بسم الله على بنيتي وجدتي
ولاء كشت بيدها عليه/ماشاء الله ماشاء الله/مدت يدها للخبز/
رازي ماقدر يمسك نفسه اكثر وهو ملاحظ مناكيرها باللون البنفسجي الهادي تزين اظافرها/ايه بس ايه الشكوى لله ياعروس
ولاء التفتت له بتقطيبة جبينها/خير
رازي/صبي لي شاهي ياعروس
ولاء صبت له ومدت الكاسة له
رازي مد يده
ولاء ابعدت الكاس/قل وش وراك
رازي اشر بيده بمعنى جيبي/الله يعين ياعروس
ولاء مدتها له
رازي مسك الكاسة
ولاء ماتركتها/قل يالله
مضاوي/اعقلوا ياعيال
رازي ابتسم من كلمة جدته
ولاء احتدت نظرتها
رازي/انا ماقلت شي
ولاء حركت راسها/اخلص بس اخلص
رازي رفع يدها الثانية ومسح كفها بخفة
ولاء ابعدت يدها
رازي ابتسم نزل كاسته/ايه عروس عاد مااقدر اقول الا ياماشاء الله
ولاء فهمته/ايه الله يعين صدق عالاقل انا الكل درا ماهو بالدس
رازي تغير وجهه
ولاء مدت لسانها له
رازي تنهد/عاد الصدق محارب ونعم ياولاء يازين حظك يوم فزتي به
ولاء بغيظ/وش قصدك
رازي مد كفه ومسك كفها/وهو داعين له كل اهله يوم رضيتي به
ولاء بلعت غصتها
رازي ناظر جدته/جدة لامشوا الجماعة وش رايك نطلع نحتفل ونبيت بالمدينة
مضاوي/رحوا انتم
ولاء بسرعة/وانا بعد ماابي
رازي قطب جبينه باستغراب
مضاوي/الليلة كانها عرسك اللي ماحضرته
رازي تنهد من رمياتهم عليه/وش فيه ياجدة
ولاء بابتسامة/ماتشوف الحنا بيد جدتي الليلة عيد عيد
.................................................................
بـيّـن يمشي بهدوء وسط استغرابه من اصواتهم وقف ورا السور عند الجبل الصغير اللي ورا بيت الجد تحديدا قطب جبينه يناظرهم
غيمة منحنية شبه جالسة قبال نعناع غصنة تقطعه وترميه بقهر
غصنة بدموعها تسحبها/غيمة تكفين خلاص والله مااسويه تكفين
غيمة مستمرة تقطعه
بـيّـن اسرع بخطواته وسحبها/صاحية انتي تدرين كم لها تحتريه ينبت
غيمة دفت يده وبعصبية/كم علمتها لاتسوينه لاتسوينه امره النعناع اكرهه وهي ماتفهم ماتفهمني ليه ليه
بـيّـن ناظرها ساكت يفكر تصرفها
غصنة انحنت شبه جالسة تناظر بقايا النعناع المبعثر بالمكان وقفت بينهم وبقهر منها وسط دموعها/سويت نفس ماتقولين بكل مرة هي هالمرة اللي ماطعتك/برجفة صوتها/وسويتي بنعناعي هاللون
غيمة صدت بوجهها عنها تتجنب نظراتها
بـيّـن الواقف وراها لامس اكتافها وباس راسها/ابشر بالعوض ازينه لك لاتزعلين
غصنة/تدرين عاد اكبر غلط سواه ابوي يومه سماك غيمة وانتي والله ماانتي بغيمة الغيمة تسر الخاطر مير انتي غمّة ضيقت صدورنا
غيمة برجفة صوتها تكبح فيها عبرتها/صدق!!اجل انا بأنكشف عنك
غصنة كشرت بوجهها
غيمة ناظرت بـيّـن/بـيّـن ابي اجي عندك مالي مقعد بمكان يشوفوني غمة عليهم
بـيّـن حك جبهته/حياك توسطي قلبي قبل بيتي ماعندي مشكلة مير بالاول امي ترضى
.
ظاهر صحى من نومته بعد ذيك النوبة اللي اجتاحته جلس ومسك راسه بألم ناظر حوله زفر من عرف غرفة أمه وقف وهو يحس بصداع قوي محتويه جر خطواته وفتح الباب قطب جبينه باستغراب يناظره
مُحارب لازال على نفس وضعه متمدد نايم
ظاهر اتسعت عيونه من جمع افكاره وفهم سبب وجوده نط من فوق مُحارب
مُحارب فز من نومته وجرى وراه من حس وسمع خطواته
ظاهر جرى لبيته ودخله
مُحارب وقف برا يناظره
حمدة تتقهوى رفعت صوتها من شافت ظاهر/ولد ياطاهر
الجد طاهر داخل البيت يحوس بالثلاجة/علامك
حمدة/ظاهر ببيته
طاهر تنهد ووقف مستند على عكازه خرج من بيته متجه لبيت ظاهر
ظاهر يدور مثل المجنون داخل بيته وبصراخ/وداد ضاري ضاري ياابوك وداد بنت
طاهر وقف على باب بيت ظاهر مستند عالعكاز /ولد ياظاهر
ظاهر خرج برعبه /تكفى ياجد علمني لايكون سويت بهم شي
طاهر ابتسم/ومن متى ظاهر الحنيّن يضر احد وانا جدك
ظاهر زفر براحة/اجل وينهم
طاهر/اسمع ياظاهر هالمرة ماتصلح لك
ظاهر قطب جبينه/كيف يعني
طاهر/اللي ماحشمتك قبل تحشم اهلك ماتلزمك حتى الصبر مايثمر بها الاعوج اعوج مايتعدل وانا جدك مهما سويت
ظاهر/بس ياجد انا
طاهر قاطعه/بعالي الصوت نطقتها ناوين تذبحها
ظاهر انخطف وجهه
طاهر/وهي تدري بالعلة واسبابها
ظاهر سكت
طاهر/ياولدي ماتلزمك وحدةٍ مثلها
ظاهر/هذا بيني وبينها ذي حياتنا ما لأحد حق يتدخل/مشى/
طاهر بأمر وبحدة/ماتروح يمها الليلة ياظاهر تسمع
ظاهر وقف
طاهر التفت له/هالاسبوع وانت مطلق
ظاهر التفت بوسع عيونه
طاهر/ماطلقت بيتي وبنتي وعيالها مالك بهم عازة/مشى وتركه/
مُحارب يناظر جده بصدمة من كلامه
ظاهر بانفعال /ماني مطلق ياجد وامي واخواني مالك كلمة بيننا
منيرة بحدة/هدا جدا حدك ياظاهر
ظاهر/يمه مااقدر وداد
منيرة قاطعته/مانسيت دخلتك علي وقولك احبها وابيها قلت ابشر حتى لو اني ماادانيها لاهي ولا اهلها لكن لعينك تبشر هالادمية ماتصلح ابد ياظاهر ماتصلح
ظاهر/ابعدها عنكم ابشروا مير لاتبعدونها عني
طاهر كمل طريقه بدون يناظره/تطلقها وازوجك بعد وانا ولد ابوي
......................................................
       ،،الـعـصـر،،
........................................................
<<بيت مضاوي>>
ولاء واقفة قبالها بفستان ناعم جدا باللون الفيروزي الهادي سادلة شعرها المنتصف لاكتافها بمكياج يماثل لنعومة فستانها رافعة طرف فستانها ولافته حول يسارها وبين يديها صينية القهوة تمشي متجهة له
رازي اسرع بخطواته لها اخذ منها الصينية وبغبنة/نعنبوا حيي اللي فاتتني ماجبت وحدة عنك بهااليومين
ولاء بابتسامة/حصل خير ماقتلني اوصلها لك اللي جهزت كل شي غيمة
رازي فز قلبه من سمع اسمها واتضح على ملامحه
ولاء/من الظهر ناشبة بحلقي/سكتت من انتبهت لوجهه/
رازي تحاشى نظراتها من انتبه لها/الله يجزاها خير ماهي بغريبة على عيال العم خلف
ولاء همست له/تراها تلعب مع سميتها
رازي ناظرها وبلع ريقه
ولاء/ماتدري يمكن يتغير شي اصبر شوي
رازي زفر/شوي وراجع لك تدخلين معي
ولاء توترت وارتسم على ملامحها
رازي انحنى لمستواها وضرب كتفه بكتفها بخفة/قمر وانا اخوك خوفي ينشب مثل اللي عندك وتفوتنا الوجاهة
ولاء دفته/بتفوتنا من سواليفك اللي ماتخلص
رازي مشى
ولاء رجعت طريقها لغرفتها وسط صوت خلخالها اللي مايفارقها ابد فتحت الباب ودخلت بوجه مخطوف
غيمة ناظرته/بسم الله وش فيك
ولاء بتوترها اللي تفشل تخبيه عن غيمة/رازي قال تجهزي
غيمة/تراه اخوي وابشرك ماياكل
ولاء كشرت/لا والله
غيمة/ادري عنك
رازي/ولاء
ولاء جفلت للحظة
غيمة وقفت وضمتها/لولا العلة اخوك دخلت معك
ولاء فكتها/هيه تراها اخوي
غيمة/ماندرين يمكن بكرة اخوي يصير علة بعد
ولاء ميلت فمها بعدم رضا
غيمة/جهزت لك العصير مع اني ادري اخوي مايعرف ذا العلوم
ولاء/ماعليك انا اعلمه
غيمة ضحكت بوسع عيونها من كلامها
ولاء اخذت نفس وشدت ظهرها بثقة وخرجت من غرفتها ووقفت جنب رازي بعد ماتجعل للمطبخ وبيديها صينية العصير
رازي بابتسامة/هاه تبين نهون
ولاء ناظرته برفعة حواجبها/والله!!
رازي ضحك بخفة/لاتخافين ترا عيونه كذا تخوف ولا هو طيب/مشى/يالله
ولاء ناظرته باستغراب من كلامه ومشت وراه
مُحارب اللي يتصاعد توتره كل ماراح رازي لداخل البيت ثم يرجع لوضعه الطبيعي اول مايرجع رازي لوحده وهالمرة رازي راح لداخل البيت تصاعد توتره كالعادة وزاد ماهدا ابد من سمع صوت خلخال شد على سبحته بيده وعينه بالارض
رازي بابتسامة/حياك ادخلي
ولاء شدت عالصينية بيديها قرت كل ماتعرفه من الايات والاذكار
مُحارب وقف اول ماسمع صوت خلخالها اللي مع وقعه تسارعت نبضات قلبه
ولاء دخلت وهي تتحاشى تناظره
مُحارب اول ماطاحت عينه عليها وظل يناظرها بانجذاب ونسى الباقي عيونها الواسعة صحيح عيونه واسعة ومعروف بين اخوانه بهالميزة لكن هي عيونها اوسع منه تمنى ترفع نظرها له حتى يتمعنهت زين
رازي اخذ منها الصينية
ولاء تقدمت بخطوات ثابتة ظاهريا لكن تحس برجفتها مدت يدها له وببحة صوتها/السلام عليكم
مُحارب ابتسم من سمع صوتها كم مرة سمع صوتها وعيّب عليها بينه وبين نفسه كان يظنها تتصنع البحة لكن اليوم تأكد وهو يناظرها هاذي حقيقة صوتها هو اللي افكاره تحذف به بعيد احيان وحذفاته شين/وعليكم السلام والرحمة/سلم عليها خد بخد ثم قبل جبينها كاعتذار لها عن سوء ظنه/
رازي اتسعت عيونه وكبح كلام يدور بخاطره وكثير
ولاء غمضت عيونها بتوتر وبنفسها/يمه ذا وش فيه مو مثل ماقالت غيمة/تراجعت لاإرادي بخطواتها لورا مبتعدة/
مُحارب تراجع من انتبه لنفسه واللي سواه بجرأة على غير عادته اجتاحته حرارة من كثر احراجه وبدا يتعرق
رازي مسكها من يدها وسحبها جنبه جلس قبال محارب قاطع توترهم الاثنين/ارتاحوا ارتاحوا/ناظر محارب بنظرات حادة/
مُحارب شال عيونه عن رازي من التقت نظراتهم وعرف انه جاب العيد
رازي بنفسه/وقدامي بعد والله لاأصير لك حبة الهيل هين ياللي ماتستحي هين
...............................................
         ،،الـلـيـل،،
...............................................
<<بيت طاهر>>
منيرة تناظر الكنبات الثلاث المفردة الموضوعة قبال باب البيت بمسافة قصدا واتجهت لها وبضيقة/عمة لزوم يعني هاللون
حمدة بثوبها الاحمر وطرحتها السوداء اللي تلمع اطرافها بفصوص فضية بكحلتها المدعوجة بعيونها من الصباح كل ماخفت هالكحلة زادتها بنقاب يغطي وجهها مخفية تحته الروج اللي حطته ومحد بيشوفه مشت متجهة لهالكنبات/خير يامنيرة خير حتى بذا اليوم ناوية تضيقين علي!!بسم الله/جلست عالكنبة اللي بالوسط/
منيرة/ياعمة جايين يصلحون لاتشبينها طلبتك
غصنة متكتفة واقفة عند الباب صادة بوجهها عن غيمة اللي واقفة قبالها تنتظر الضيوف
منيرة/ياعمة
حمدة قاطعتها رفعت يدها تناظر الساعة/علامهم ابطوا
منيرة/الضيوف
سلام وقفت جنب جدتها وبيدها المبخرة
حمدة تتبخر/قطعة/وبابتسامة/ودي مايلفون حتى اعرف لهم زين/ميلت فمها بزعل/هين اعرف لهن انا
//دق الباب//
غيمة من وراه/مين
مضاوي ضربته بقوة/فكي لاافك ضروسك
غيمة فتحت الباب
مضاوي دخلت تعاجل بخطواتها البطيئة لكبر سنها بزعروطة اعتلت المكان متجاهلة السلام على غصنة وغيمة
سرور دخلت وراها بابتسامة/ماشاء الله ماشاء الله
ولاء وراهم وبيدها بيد غيمة الصغيرة بوسط ابتسامتها سلمت على غصنة
غصنة همست بعبط/بشري عسى اخوي حاز على رضاك
ولاء اخفت احراجها/قلتي شي ماسمعتك
اعتدال وراها بضحكة/اكيد اكيد حاز ومليون ناظري وجهها
غيمة قفلت الباب/خلاص عاد
حمدة وقفت بابتسامة
مضاوي ضمتها/يازينه الاحمر ماعلمتك انه ازين ثيابك
سرور وراها/مير ان حمدة هي اللي تزين هالثياب ولا الثياب كلها قطعة قماش لاتروح ولاتجي
حمدة ضحكت وسلمت على سرور واحتضنت يديهم وجلست مضاوي عن يمينها وسرور عن يسارها ثم اشرت بطرف عكازها عالباب قبالهن وبابتسامة حماس/هاه حتى نشوفهن زين وهن مغتاظات
مضاوي ضحكت/من ذالحين خشمها هالمبروكة بينفرش من الغيظ
سرور/وزينة اللي ماحلاها الله عيونها تلاقط من الغبينة ولاتقدر تقول شي
حمدة ضحكت/ماجبت هالكراسي عبث
منيرة تنهدت بقلة حيلة وش تقدر تسوي قبال هالثلاثي اللي يعزز لبعض بكل لحظة
//دق الباب بضربات متتالية//
//غيمة وغصنة هالمرة التقت عيونهم ببعض//
غيمة/من؟
ام سطام ورا الباب جنب سحاب ووراها حريم الديرة بين يديهم اكياس هدايا وكم طقم ذهب يخالطه مبالغ مالية مغلفة بتكلف واضح وصريح/افتحي يابنت
غصنة جرت لجدتها
غيمة بمماطلة/مين؟
مبروكة/سحاب الديرة
غصنة بوسط انفاسها/جو ياجدة جو
حمدة احتدت نظرتها/لاتفتحون
...................................................
<<بـيـت الـشـعـر>>
الجد طاهر جالس بصدر المجلس ببشته المعتلي اكتافه وعينه عليهم
بـيّـن بثوبه الاسود الفارق عن كل اللي حوله اصحاب الثياب البيضاء اللي يشابهها بهاللون بلون غترته فقط ناسفها ببعثرة منحني شبه جالس قبال المشب يجهز القهوة
رازي واقف عنده رافع كل شماغه فوق راسه ومثبته بالعقال/زيد زيد الهيل
بـيّـن رفع راسه وبنرفزة/تعال امسك مكاني ولا طسّ عني
رازي/قم
بـيّـن وقف يضرب يديه ببعض ينفضها/هاه اشوف
رازي دخل يديه بجيوبه/ولد محارب
مُحارب يرتب الكاسات النظيفة بالصينية اسرع بخطواته من سمع اسمه منه/سم
رازي اشر بطرف دقنه عالقهوة/زين القهوة
بـيّـن اتسعت عيونه
مُحارب/ابشر/جلس/
بـيّـن مسكه مُحارب من يده يوقفه/قم قم
مُحارب وقف
بـيّـن مسك رازي من ياقته من ورا وشده
رازي طاح شماغه وبوسع عيونه/خير!!
بـيّـن/انت تزينها تتأمر على اخوي ماشاء الله ياذكر الله عليك
رازي دف يده عنه وبغيظ/خلني افرح شوي يالحسود اخيرا صار عندي اخو اصغر مني
مُحارب رف قلبه من سمع بكبر الثقة فيه من رازي انحنى لشماغ رازي الطايح ورفعه من الارض ومده له
بـيّـن اتسعت عيونه
رازي مد يده لمحارب واخذ شماغه بابتسامة/يمينٍ  مااعدمها
بـيّـن بحدة لمحارب/يالخبل لاتصدقه ذي طريقته يشتغلك
مُحارب جلس يجهز القهوة وبدون يناظر بـيّـن/انا اصلا فاضي ماوراي شي
بـيّـن/يالـ/سكت من غطى صوت تكسر القزاز المجلس والتفت يناظر مصدر الصوت/
سلمان اللي كان شايل صينية الفناجيل تعثر بطرف السجادة وطاح باللي معه
نواف معطيه قفاه يحط البخور فوق الجمر بالمباخر اللي عنده التفت وراه يناظره ومسك راسه بصدمة
بـيّـن مشى لنواف بخطوات سريعة
نواف تراجع لورا/دقيقة دقيقة اعلمك
بـيّـن ضربه على راسه
نواف/اااه
سلمان مارفع راسه يجمع القزاز بصمت
بـيّـن شده من ثوبه ودفه لقدامه/كم مرة اعلمك سلمان مايشيل شي وقت العزايم ناكبنا دون عزايم كيف عاد ذالحين
نواف وقف وناظره/والله ماشفته والله خابره لو شفته ماخليته ياخذهن اجتهد الله لايكثر خيره
بـيّـن ثنى يديه حول وسطه/بسرعة بسرعه لاأخليكم تاكلونه بسرعة
رازي مشى له/هد هدا ذالحين نخلصه
بـيّـن دفه لعندهم/عاونهم انا رايح البيت اجيب فناجيل
طاهر/لا يابـيّـن خلك هنيا ولد يامحارب رح انت
مُحارب مشى/ابشر
بـيّـن رجع عند الدلال يتحلطم
طاهر رفع عينه للمتواجد قباله بجسده مبتعد بعقله عن كل مايدور حوله
ظاهر عينه بالارض ضايع وسط افكاره يخمن وش اللي سواه لوداد وزعلها كيف يراضيها وكيف يلين قلبها وهي صاحبة الزعل الشين بصعوبة ترضى كيف يفرط بحب عاشه معها تحت سقف واحد ضمهم عالحلوة والمرة كيف يعيّش ضاري تحت سقف ناقص كيف مايعيش بظل عايلة متكاملة تنهد بضيقة
طاهر مافاتته هالتنهيدة/ولد ياظاهر
ظاهر رفع عينه لجده
طاهر/وعسى ان تكرهوا شيئا وهو خير لكم
ظاهر بحدة/بس انتم اجبرتوني عالكره ماهو بأنا اللي اخترت
طاهر/جهز امورك جوازك مع مُحارب بنفس الليلة
ظاهر اتسعت عيونه/جدي!!
طاهر وقف من سمع اصوات السيارات/هذا اللي عندي ياولد خلف/مشى/
رازي وقف واتجه عند المشب لبـيّـن تكتف بابتسامة
بـيّـن جالس عند المشب بعدم اهتمام للاصوات المنتهية لمسامعه من خارج البيت
رازي/ترا هالتصرف فاضحك وبالحيل
بـيّـن ابتسم/خلهم يحتروني شوي مايضرهم
رازي/تبيهم يحترونك وانت ازين لهم القهوة!!
بـيّـن/رازي انقلع عن وجهي
رازي/تراك بتفتح لهم مجال للعيبة وخابر وبني طاهر مايتركون لاحد مدخل
طاهر برا البيت/ولد يابـيّـن رحب بضيوفك
بـيّـن زفر وقف ينفض يديه واتجه لجده وهو يفتح غترته ويعدلها وقف جنب جده ومعه اخوانه ورازي
الشيخ عزيز نزل من السيارة اللي وراها ثلاث سيارات الاولى حوضها كله غنم والثانية كلها ابل والاخيرة كلها اغراض للبيت ووراه سيارات اهل الديرة غير اللي وصلوا بدون سيارة ماتحركوا الا لحظة خروج الشيخ من بيته
سهم اللي يسوق نزل
بارود معهم بنفس السيارة نزل
بـيّـن احتدت نظرته بسخرية من شاف السيارات
رازي بضحكة همس/ذبحتهم برضاك ناظر وش شارين عشانك لاتنسى خويك المسكين
بـيّـن مارد
رازي تنهد/محد بيشريك هد عمرك
الشيخ عزيز وقف ومن وراه اهل الديرة/السلام عليكم ورحمة الله وبركاته
طاهر/وعليكم السلام والرحمة هلا ومرحبا يالله ان تحييهم
الشيخ عزيز/زين فعلكم وزين منطوقكم والله دام رحبت ياعم طاهر باذن الله ماتردنا هالوجيه الطيبة
طاهر ابتسم/وافي ياشيخ وافي ومتجمل
الشيخ عزيز/تخبر ياعم بني ادم خطاء وخير المخطين التوابين وهذا حنا ببابكم يابني طاهر تايبين عن الخطأ جينا يمكم نلتمس العذر والسموحة عن ماسوينا باخونا بـيّـن يومنا جاهلين
//نواف وسلمان ماقدروا يسيطرون على ملامحهم من صدمتهم بكلمة(اخونا)والتفتوا يناظرون بعض يتأكدون من اللي سمعوه//
طاهر مارد عليهم
عزيز ناظر بـيّـن/اخوي يابـيّـن ياراعي الجميلة والفزعة والفعول الكفو الطيبة ماهي بغريبة عنك وقفت وقفة عن مية رجال لبنت شيخ القبيلة يوم اعتزت بك مير الملامة على ابليس دخل معنا وسبقنا بظنونه وانت صاحب العقل الرشيد والراي السديد ان شاء الله انك بتكون اطيب واجزل منا تصفح وتعفو عن ماقلنا وسوينا بك
بـيّـن تنهد رفع اصبعه يحك اذنه بتفكير
بارود احتدت نظرته
سهم قطب جبينه وشد يده باستعداد للي بيقوله
عزيز برجفة قلبه رغم صلابة ملامحه وراه رجى ردد بنفسه/تكفى اقبل اقبل وافق
رازي رفع يده ومسك يد بـيّـن
بـيّـن ناظره باستغراب
رازي اشر عليهم بحركة بسيطة براسه بمعنى رد
سهم/يا
عزيز قاطعه بسرعة/وهاللي قدام عيونكم شي بسيط والله انه يسوى ادناة الدون ولايسوى شي من طيبكم اللي سويتوه معنا
طاهر تنهد/جيتك لاحدنا كافية ووافية ياشيخ والله يبيض وجيهكم يوم رديتوا الردى عنه وبينتوا طيب فعله وتجملتوا يوم علمتم بالصدق والله يجود عليكم ويكثر خيركم مير انه عطاياكم مردودة
//ارتسمت الصدمة على وجيههم من الرفض//
بـيّـن التفت لجده بصدمة كان يبي يرد هالعطايا يفكر وشلون يقولها وكل ماقالها براسه انتهت جمله بشتم للديرة وكل من عليها وكان هذا سبب صمته فقط ماقدر ينطق جملة وحدة لطيفة لانهم بعينه مايستاهلون ابد ولسانه خانه ماقدر يساعده ويجمل كلامه
سهم ابتسم كل شي بالضبط حصل مثل ماقالت له
،
،
،،منتصف ليلة البارح،،
،،مجلس الديرة الخالي،،
سهم/سمي ياسحاب
سحاب/بكرة لاأجزل الشيخ بالكلام واعطى هالعطايا بيعيي عنهن طاهر
سهم قطب جبينه
سحاب/وقته تدخل انت واجزل بعطيتي
سهم قطب جبينه/ابشري
سحاب/عطيتي بنت الشيخ وعلى مسماها عطية
سهم اتسعت عيونه
سحاب زفرت بملل من سكوته/علامك!!
سهم بلعثمة للحظة/مابي شي مير
سحاب قاطعته/اسمع ياسهم محدن بهالديرة يوازيني بالعقل كثرك
سهم ناظرها
سحاب/انت ماتصلح لك الشيخة ياسهم
سهم انصدم من معرفتها بأفكاره
سحاب/خابرتك من يومك صغيّر منى عينك تتصدر المجلس وتامر وتنهى وتسمع سم وابشر وعلى امرك مير انت مكانك فارق عنهم وبالحيل
سهم ناظرها باهتمام
سحاب/انت يميني يمين سحاب اللي تامر وتنهى باسمي انت سحاب هالديرة لاقضت سحابتها بيوم
سهم ناظرها باستيعاب وشلون راحت عن باله الشيخ الفعلي عمره ماكان شيخ الديرة اللي يجلس بالمجلس الشيخ الفعلي اللي يتوجهون له اهل الديرة ويطلبون منه ويتوسطون عنده كانت سحاب هي فعليا الشيخ الحقيقي لهالديرة ثبت نظراته عليها
سحاب ابتسمت من وصل له افكارها/ولد ياسهم عطايا سحاب ماتنعطى عبث عرفت ياسحب؟
سهم اخذ نفس/ابشري طال عمرك ابشري
عزيز برا باب المجلس بنبضات قلبه السريعة بجنون من الصدمات المتتالية اللي استهلت لمسامعه وحدة ورا الثانية مشى بخطوات هادية ماهمه الشيخة بهالوقت همه كيف يوقف هالعطية المخزية رجف قلبه بخوف من جدته لاول مرة اللي سمعها جدته اكيد لكن تجردت عن كل مشاعرها معقول جدته اخذ نفس يركز فيه على هالمصيبة
،
،
عزيز شد على قبضته بغبنة ارتسمت على ملامحه بنفسه/انا الغلطان اللي اعتمدت عليه/التفت يناظره/
سهم/صدقت ياعم طاهر صدقت
بـيّـن ناظره باستغراب
سهم/هالعطايا ماتوجّب جزيل فعله
عزيز همس له بحدة/سهم
سطام وصل عندهم والمفترض يكون على راس الحاضرين لكن فعليا تفكيره بالموضوع اللي ينتهي بنفس النتيجة كل مرة ارهقه للحد اللي تمنى ياخذ اخواته ويهرب لكن الهروب ابدا ماهو بحل نطق/صدقت ياسهم
//التفتوا له//
سهم ناظره باستغراب 
عزيز ناظره برجى وبنفسه/تكفى ياسطام قل لقيت حل قله وفكنا من ذا العطايا
سطام بابتسامة/الفعل الجزل الطيب يستحق شيٍ اكثر منه او اقلها مساويه بالجزيلة
طاهر هز راسه/صدقت
سطام/والديرة مابه اجزل من نسب الشيخ
عزيز هوى قلبه بصدمة من اللي سمعه وارتسم على ملامحه بوضوح
بـيّـن ناظر سطام بعدم تصديق للي يسمعه
سهم اتسعت عيونه بصدمة
رازي اتسعت ابتسامته باستمتاع من اللي يصير
طاهر ابتسم برضا
سطام/والكفو اللي صان وقت الفزعة وفدا بروحه مابه احد يستاهل نسب الشيخ اكثر منه
سهم احتدت ملامحه
طاهر ضحك بسرور ارتسم على محياه رغم انه سطام حوّر الموضوع بطريقته لكن تقبله بصدر رحب/وحنا وين نلقى نسب ازين من نسبكم يابني سمّار راعين الكرم والجود والفزعات راعين الصيت الزين وسط العرب
سطام/والله انها ماهي بغريبة على بني طاهر راعين الفعول الطيبة المشهود لها من سنين
طاهر مد يده لسطام بوسع ابتسامته/حياك الله ياولد منصور
سطام صافحه بابتسامة
طاهر مرر نظره عالمتواجدين وبصوت جهوري وسط ابتسامته/ياهلا ومرحبا حياك الله ياشيخ حياكم الله يااهل الديرة حياكم الله جميع
//سلمان ونواف ناظروا بعض وخرجوا جوالاتهم يتسابقون عالخبر//
طاهر بحدة وعينه عليهم/القهوة ياولد
بـيّـن وقف جنب جده يناظره
طاهر اشر له يجلس بعيونه
بـيّـن ظل يناظره
رازي سحبه وهمس/اجلس النظرات كلها عليك
ظاهر واقف يقهوي الضيوف متأكد بـيّـن بيحلها كعادته كل فكره محصور كيف يقنع جده ويرجع وداد ويلغي سالفة الزواج بكبرها
........................................................
#شقّ_الغَمام