ပြိုင်ဘက်ကင်းသိုင်း၀ိဉာဥ်(ဟောင်ရှောင်လုံ) Book 1

436 - 440

သို့သော် နောက်ကျသွားလေပြီ ။ သူ့စကားသံမဆုံးသေးခင်မှာ  စကြာဝဠာနတ်ဘုရားဂိုဏ်းသားများ အပေါ်သို့ မရေတွက်နိုင်သော လက်သီး ၊ လက်ဝါးချက်တွေကျဆင်းလာသည်။ လက်သီးလက်ဝါးချက် ထိမှန်သူများ၏ ခန္ဓာကိုယ်များက တစ်စစီ  ပေါက်ကွဲသွားကြသည်။

လေထဲတွင် စကြာဝဠာနတ်ဘုရားဂိုဏ်းသားများ၏ သွေးမှုန့်သွေးစများဖြင့် ပြည့်နှက်သွားသည်။

".... ဟောင်ရှောင်လုံ ....ငါမင်းကို သတ်မယ် ...."

ရှဲဟွေက ကျယ်လောင်စွာ ဟစ်ကြွေးလိုက်သည်။ ချန်ရှောင်ဖန်း အပါအဝင် တခြားအကြီးတွေကလည်း ရှောင်လုံကို မီးတောက်နေသလို နီရဲနေသော မျက်လုံးများဖြင့် စိန်းစိန်းဝါးဝါး စိုက်ကြည့်နေကြသည် ။

ရှောင်လုံ လက်ချက်မိသွားသော ဂိုဏ်းသားများက
စကြာဝဠာနတ်ဘုရား ပိုးမွေးသလို မွေးခဲ့ရသော အဓိကသိုင်းသမားများဖြစ်ကြသည်။ သူတို့တစ်ယောက်ချင်းစီက ရှားမှရှား အစွမ်းအစတွေကို ပိုင်ဆိုင်ထားကြသည်။ သူတို့ကဲ့သို့လူတွေက အနှစ်တစ်ရာမှာတောင် တစ်ယောက်ပေါ်ထွက်လာဖို့ မလွယ်ကူပေ ။ သူတို့အားလုံးက စကြာဝဠာနတ်ဘုရားဂိုဏ်း၏ မြောက်များစွာသော သယံဇာတ ကြိုးစားပန်းစား ပြုစုပြိုးထောင်ထားကြသော အနာဂတ်မျိုးဆက်များဖြစ်ကြသည်။ သူတို့ထဲက အများစုဟာ ကောင်းကင်အဆင့်၁၀ သိုင်းသမားများဖြစ်ကြသည် ။ တစ်ချို့ဂိုဏ်းသားတွေဆိုရင် စကြာဝဠာ တစ်ပိုင်းအဆင့်ကိုတောင် ရောက်ရှိနေကြလေပြီ ။

သို့သော် စကြာဝဠာနတ်ဘုရားဂိုဏ်း၏ နှစ်ပေါင်းများစွာ ပြုစုပြိုးထောင်လာခဲ့သော အနာဂတ်မျိုးဆက်များက မမျှော်လင့်ဘဲ ရှောင်လုံလက်ချက် မိသွားသည်။ ရှောင်လုံလက်ချက်ဖြင့် စကြာဝဠာနတ်ဘုရားဂိုဏ်း၏ အထူးချွန်ဆုံး၊ အရည်အချင်းအရှိဆုံးဟု ဆိုနိုင်သည့် အဓိကဂိုဏ်းသား သောင်းနှင့်ချီ သေဆုံးသွားခဲ့လေသည်။

ရှဲဟွေက မီးခိုရောင်ဓားတစ်လက်ကို ထုတ်လိုက်သည်။ ထိုမီးခိုရောင်ဓား၏ ဓားသွားပေါ်တွင် အနက်ရောင် ရှေးဟောင်းစားသားများဖြင့် ပြည့်နှက်နေသည်။ မီးခိုရောင်ဓား၏ ဓားရိုးကတော့ အနက်ရောင် ဦးခေါင်းခွံတစ်ခုဖြစ်သည်။