#مـتـاهـة_ديـهـيـا (جـنـتـي الـمـلـتـهـبـة)

الجزء 32

#مـتـاهـة_ديـهـيـا (جـنـتـي الـمـلـتـهـبـة)
#ميار_إنصاف
#الجزء_32 (الهدوء ما قبل العاصفة)

فاتو أربع اشهر على زواجي بغيلاس عشت الحب الحنان الرومانسية صراو معانا مشاكل شوية برك من غيرتو على لخريج بصح ولا يوم خلاني نرقد زعفانة منو كان قد هدرتو تاع صح تأكدت من مشاعري اتجاهو غيلاس ولا يمشيلي في العروق هو لي وراالي الحب الحقيقي مشي بالهدرة برك بل بالافعال …
اليوم نضت فرحانة والمورال طالعلي غيلاس مكانش راح يخدم رحت لصالدوبان درت روتيني اليومي وتوضيت خرجت رحت صليت الفجر وبديت نفرز فدنيا بديت بشومبرتي بدلتلها ديكورها خبيت لكوفرلي لي كنت دايراتو وجبدت واحد خلاف فالغوز بيبي بدلت الكاشريدو درتو فالڨري شعلت البخور خليتها تتبخر ورحت للكوزينة كانت نقيا انا فيا طبيعة موحال نرقد وكوزينتي فيها ماعون موسخ درتلها ميناج خفيف برك ووجدت حاجة خفيفة للغداء غيلاس مايتغداش فدار اليوم تغديت غسلت ماعني وقررت
ندير اليوم عشاء رومانسي لغيلاس ملي تزوجنا جامي درتلو ديما جي المبادرة منو هو يحب لي بلا الخفاف على هذي وجدت حوتة كبيرة وبطاطا طيبتهم في الكوشة درت لاسوب تاع العدس الأحمر تحلية درت بودينغ ماجيت نكمل كانت الساعة 4 تاع العشية مزالتلي غير ميني بيتزا ونكمل وجدت صوالحها ودخلت لدوش فحفحت روحي وجدت روحي كأنو ليلة دخلتي خيرت نويزات فالغوز بيبي صاتان حطيتها على سرير ولبست بيجامة شورت وبيستي ورحت كملت لبيتزا ووجدت طابلة مزالت نص ساعة ويدخل من الخدمة رحت درت ماكياج خفيف ايشادو خفيف فالغوز وكحلت عينيا ودرت ايلاينر جاو عينيا هبال ديما يقولي عينيك فتنة  سلبولي عقلي طراسيت شواربي ودرت غوجالفغ غوز فونصي لبست نويزات وفوقها لبينوار تاعها يلحق للركبة كسلت شعري وطلقتو رشيت من ريحتي لي يحبها و شعلت شوي شموع في شومبرة ورشيت فيها ريحة الورد رحت للكوزينة حطيت العشاء يسخن وثاني شعلت فيها شوي شموع رشيت الورد فالباب تاع دخلة هذي من فوائد تكون دارك وحدك رحت للكوزينة وقعت نستنى فيا شوي وسمعت الباب تفتح وصوتو يعيط ديهيا درت شهيق وزفير وخرجت ليه وقفت قدام الباب تاع الكوزينة كان هو مهبط راسو للأرض يشوف مع الورد كي سمع خطواتي طلع راسو دهش فيا بقا غير يشوف عراني بعينيه _ارواحي هنا، رحت عندو ونمشي بعقلي طابس عندي باسني من خدي _واش الزين هذا اكل
ضحكت، هيا روح اغسل وارواح تتعشا العشاء واجد _علاه لي يشوف زين هذا يخمم في عشاء _يا غيلاس من قبيل وانا واقفة نطيب وانت تقولي شكون يخمم في العشاء عيب عليك، مالا نروح نغسل ونجي نتعشا كي عدتي تعبتي اما كون جات بيدي انت تكفي وتوفي نعلبوه عشاء _ابتاسمتلو وهبطت راسي لحد الان مزال موالفتش بهدرتو وافعالو نحشم بزاف … راح غسل وبدل حوايجو وجا قعدنا نتعشاو .. انا ناكل بساكتة وهو عينيه راح يفتارسوني طلعت راسي شفت معاه لقيتو عاض على شواربة ومركز معايا _ معجباتكش الماكلة!؟؟، تنهد انا فاه نخمم وهي تخمملي في الماكلة حكملي يدي وبدا يشعرلي بواحد الكلام يذوب الحجر مشي غير القلب ..
يا سمـــــراء ولعيون رصاص♡
عينــــــــــك تسلب قتالا

شاويـــــــة يا بنيت لوراس♡
ديهيــــــــا ماشي من والا

الفــــــــــم جوهر الماس♡
شعرهــــــا مد،بي شلالا

ذهــــــــب مهيش نحاس♡
العيـــــــن السود مذبالا

نضــــــرة فارس ڨياس♡
سحرت قلوب الرجالا

النيـــــــف مرسوم قياس♡
والصوت حنين بهالا

شاويــــــة زينت للباس♡
طبعــــــــــك شارد غزالا

طلعـــــــت مابين الناس♡
حرة ماشي بدالا

تبقاي تاج عالراس♡
الغيارة راهم  بحالا

الفحلة عنها الحراس♡
تتمايل والمشية ختالا
     
داك شاوي ودمو حامي ♡
غيلاس ماشي من والا