#مـتـاهـة_ديـهـيـا (جـنـتـي الـمـلـتـهـبـة)
#ميار_إنصاف
#الجزء_16
نضت صباح بسباب الحس في شمبرتي لقيت نساء خاوتي زوج هنا اميمة وتنهنان هذو نساء خاوتي تالمون ملاح معايا نحسهم خوتاتي مشي نساء خوتي خلاص عكس مرت بلال لفعى تغير مني تقول ديتلها ورث باباها … صبحت عليهم ورحت غسلت وجهي ورحنا للكوزينة فطرنا كي كملنا كل وحدة حكمت شغل ديرو اميمة حكمت الغداء واانا وتنهنان حكمنا الفريز وتسياق وكي ناضت مريم جات عاونتنا بدينا بالصالون هو الأول لقينا حالتو حالة خرجنا الفراش كامل لشمس وكنسنا زرابة برمناهم خرجناهم ورجعنا سيقناه رديناه يشعل خليناه يشيح وكملنا شنابر لخرين كي كملنا رجعنا فرشنا الحالة وتغدينا غسلنا الماعن وقعدنا فصالون نشايخو عماماتي مزالو عندنا حتى العشية باه يروحو … لحقت الربعة تاع العشية نضت انا ومريم وجدنالهم سينية قهوة وحليب حطينا القاطو لي بقا من خطبتي تقهوينا وروحو انا قاعدة حتى سمعت صزت بابا يعيطلي رحت عندو _انعم ابابا، جبد باطة مدهالي _ هاكي هذا تيليفون راهو بعثهولك راجلك، حكمتو عليه وهبطت راسي هو خرج وانا رحت لشمربتي لقيتو شرالي تيليفون كبير ومحطوط فيهم بيس وورقة كي فتحتها لقيتو قالي منين يلحقك عيطيلي _ رحت غلقت بابا شمبرتي بالمفتاح وعيطتلو _ألو ديهيا لباس _الحمدلله عيشك وانت وش حوالك، لباس نحمدو ربي _مرسي على تيليفون، بلا مزيتي اخر مرة تعاوديها هذا حقك عليا دوك صاي راكي محسوبة عليا _عيشك، حكيت معاه شوي وكوبيت حاطة يدي على قلبي ايمااا واحد شعور نحسو كي نكون نحكي معاه لا يوصف ومن هذاك اليوم بقنيا نحكيو تقريبا يوميا خاصة فالليل والفت غيلاس وبديت نميل ليه صح مشي حب كبير لكن قدر يدي بلاصتو في قلبي فاتو ثلث اشهر ليه ليه ماحسيتلهمش كامل تالمون نجري غير مع جهازي ونوجد لعرسي خاوتي مزادوش دارو بيا مايهدرو معايا مايشوفو في وجهي بلال رجع لدار بعد ماطلب سماح من بابا وهكذا تصفاو القلوب بينهم اليوم بكرت دوشت اليوم نروح مع بابا نعقد انا وغيلاس بعد ماكملو لونكات لأنو العسكري قبل مايعقد لازم يديرو لونكات على مرتو وعلى خوالها وعمامها وكي عدت انا بنت عمو مطولوش ليه ليه مدولنا الموافقة … لبست جلباب في النوار ودرت نقاب لأنو غيلاس شرطو عليا ومكانش عندي اعتراض عليه هك افضل عيطلي بابا خرجنا ورحنا لقيت غيلاس وعمي ثم سلمت على عمي وغيلاس صافحتو دخلنا عقدنا وخرجنا صاي دوك وليت مرت غيلاس فالشرع والقانون …
أنت تقرأ
#مـتـاهـة_ديـهـيـا (جـنـتـي الـمـلـتـهـبـة)
General Fiction꧁البداية بتاريخ 11/07/2023꧂ ꧁النهاية بتاريخ 17/08/2023꧂ فتاة من أصول جزائرية أمازيغية شاوية تقع ضحية علاقة غير شرعية لمدة سبع سنوات بعدها تكتشف أن حبيبها متزوج وأب أربعة أطفال ...
