يحبها قلبي مع حبها لي

البارت الثالث والثلاثون

خالد لما شاف فالح وناصر دخلوا خيمتهم قعد شوي وهو يقوم يطلع وعلى طلعته من الخيمه رفع راسه وهو يشوف لميس طالعه من خيمتهم بعد ضحكوا على الصدفه وهو يمشي بسرعه ويمسك يدها ويروحون ورا سيارة فالح عشان يجلسون على حافة الصندوق
لميس وهي متكيه بيدينها على ورا وتناظر بالسماء: ايه شبغيت
خالد كان يناظر ب لميس ويتأمل كل انش توصله عينه: يا سبحان خالقك وشلون كل هالجمال ب حبيبتي؟
لميس ضحكت وهي تغطي وجهها بيدينها: يووه اذا جبتني هنا بس عشان تتغزل اتوتر ترا
خالد قرب منها وهو يحاوط كتفها: لا تكفين وجهك لا تغطينه عني
ابتسمت لميس بهدوء وهي تمسك يده الثانيه بيدينها الثنتين وتضحك من فرق الحجم وناظرت بخالد لما تنهد وهو يناظر السماء: قمر الليله يشابه نور وجهك وضيه
لميس وهي باقي تناظر فيه واول مره تشوفه بهالقرب: بس الي اعرفه القمر انت
خالد نزل عيونه عليها ولما شافها قريبه منه كذا وعينها بعينه استحى وناظر قدام وهو يبتسم: ما يضر النجمه تاخذ مكان القمر مرات
لميس لما استحى خالد حمر وجهها بخجل ولا عاد عرفت تتحرك عشان تبعد حتى وبقوا على هالحال ويناظرون السماء بصمت الين غفت لميس على كتفه وصحاها بهدوء عشان تروح تنام داخل
وفاليوم الثاني صحى الكل بدري والنومه مو عاجبتهم والكبار يسوون الفطور والبزران للحين نايمين
دانه: ركوني امس ما بغى ينام
هدى: ما ينلام توه طالع فجاة راح البر لا هو ولا حنان وعمر
هيفاء: بنتي شقرديه عجبتها نومة البر
سالم وهو ماسك حنان بحضنه ويرضعها: حيي والله ذا العين
ضحكوا وهم يتجمعون على الفطور ويصحون النايمين وما جت الساعه ٩ الا والكل موجود
كانوا البزران يلعبون كوره ورند جالسه جنب سالم وتلعب حنان الي بحضنه: متى تصير تلعب معي طفشت من الأولاد انا
سالم ضحك وناظر ب لمى ورجع يناظر برند: اذا كبرت بتخلينها تلعب معك
رند وهي تتحمس بالسالفه وتشرح بيدها بحركات طفوليه: اكييد وما بخلي احد من الاولاد يجيها بس انا وهي نلعب صح ماما
لمى ضحكت: صح صح
محمد: طيب وانا؟ بعد ما راح تلعبين معي خلاص
رند ضحكت ب ترقيعه وهي تركض لحضنه: ههههههه لا انت عادي
محمد حضنها وهو يضحك ويسدحها بحضنه ويدغدها والجالسين يضحكون عليهم
وكانوا خالد وسعود و وليد ومازن وفهد يلعبون واحد طش(حبشه-غميضه- الي تبون) وكان الدور على خالد يدورهم
سعود ركض ورا الشعيب وناظر بمازن الي وراه وهو يمسك يده وابتسم مازن وهم ينزلون راسهم عشان خالد ما يشوفهم وسعود لا شعوريًا ما فك يد مازن وكان كل كا تحرك ياخذه معه
جلسوا بمكانهم الين سمعوا صرخة خالد: مسكتتت فههدد
فهد وهو يتأفف بضحك: والله غش علموك البنات ههههههههههههه
خالد وهو يهز كتوفه: مالي دخل المهم مسكتك
رغد ضحكت وهي تغمز لفهد: خلها علي هههههههههه
فهد: حيي هههههههههه
طلعوا سعود ومازن وهم رافعين ثيابهم بيدينهم ويضحكون: مسكك يالهطف هههههههههه
مازن: واااك والله مسكه ههههههههههههه
فهد: الدور جايكم يالجحلط
بدا فهد يعد والعيال ينحاشون وخالد ناظر بصدمه لانهم جو وراه وقال بهمس: وجع روحوا انخشوا بمكان ثاني
مازن: هذا مكاننا انت الي جاي
خالد: لا يكون ب اسمك اقول انقلع بس
تفاجئوا ب فهد الي جاء من وراهم وشافه سعود وركض وخالد ومازن ركضوا ورا سعود قبل يدرون ان فهد وراهم أساسا
وكان ضحكهم مالي المكان وهم يركضون وفهد وراهم والبنات يناظرون فيهم من بعيد ويضحكون عليهم
هدى وهي تهمس لشموخ: بالله فهد وجه اب؟ ذا للحين يلعب واحد طش
شموخ ضحكت وهي تضربها: وجع حرام عليك خليه يستانس
الجد وهو يناظر فالبنات: ودكم تلعبون؟
لميس: اي والله
الجد: اجل اختاروا ياخذكم فالح لمكان مافيه غيركم وتاخذون راحتكم ولا احشر العيال ف خيمتهم
هدى ضحكت: ما يحتاج يا جدي ههههههههههههه
الجد: لا بالله يحتاج ابي حفيداتي يستانسن بالبر والجو زين
نوره ضحكت: بمعنى يا يبه تبيهم يجون مره ثانيه للبر
الجد ضحك وهو يحك راسه: اجل قم قم يا فالح ود خواتك بمكانٍ زين
فالح قام: يله اركبوا السياره وان كان ودكم اقعد عشان ما تضيعون السياره عادي
نوف ناظرت فيه: انا بسوق
ناظر فالح ب استغراب: تعرفين؟
نوف هزت راسها بالايجاب: ايه ناصر مرات يخليني اودي فصولي بالرياض وانا الي اسوق
فالح ناظر بناصر: ذي صادقه
ناصر ضحك: ايه تعرف تسوق سيارتي بس غيرها لا
نوف: ماش مو كل السيارات نفس سيارة ناصر
فالح وهو يجلس: اجل وديهم انتي
شيخه: يويلي مهبول انت
فالح: وشو يا عمه خلهم يروحون بنفسهم ويرجعون
ناصر وهو يطلع المفتاح من جيبه: والله عادي ترا تعرف قد ساقت بشوارك الرياض مهوب مصعبٍ عليها البر قومي قومي نفداك وديهم
نوف ضحكت وهي تاخذ المفتاح وتغمز للبنات يقومون وقاموا بحماس لان بيكونون لحالهم وتحاشروا بسيارة وحده
دانه كانت بتقعد عشان ركوني بس فالح رفض تمامًا وقال انا بمسكه ونوره وشيخه طمنوهم ان الرضيعين عندهم وخل ياخذون راحتهم وفعلًا راحت معهم
شغلت نوف السياره وهم يصارخون بحماس ومروا من قدام العيال الي وقفوا يناظرون فيهم بصدمه وهم يضحكون ويرجعون للجلسه
اما سيارة البنات وقفت في مكان قريب من المخيم وهم ينزلون
دانه: نوف اكيد بتدلين طريق الرجعه
نوف: ايه معليك سهل
شموخ وهي تصفق عشان تجذب انتباههم: خلاص الحين لا تفكرون بشي خلونا نستانس وبس
بدوا البنات يلعبون كل انواع الالعاب من واحد طش الى القنبله انفجرت ب اي مدينه وكان ضحكهم بكل مكان وانهد حيلهم من التعب وهم يجلسون قريب من السياره ويلهثون بتعب
شذى: والله مااذكر متى اخر مره لعبت لهدرجه
نوف وهي تضرب كف يدها بضحك: وربيي اهخ يا حلو اللعب والراحه
لمى: يله يله نقوم نرجع تأخر الوقت
قامت نوف وهي تشغل السياره والبنات يركبون ومشت وبنص الطريق دانه تكلمت: نوف كأننا طولنا
نوف وهي تحاول تطمنهم: لا معليكم بس بنرجع من طريق ثاني عشان ما نغرس
وناظرت ب شذى الي جالسه جنبها وشذى فهمت من عيونها انهم بورطه
رغد حطت يدها على قلبها: احلفي اننا ما ضعنا
شهقوا البنات وتداخلت اصواتهم في بعض وزاد توتر نوف وقالت بصوت عالي: خلااص اسكتوا خلوني اركز ما ضعنا