ربع دستة مجانين ( جاري التعديل )

part 3

في منزل الثلاثي

عادت جنة إلى المنزل ولكن صدمت مما رأت وجدته هو أمامها بعد غياب خمس سنوات فأسرعت إليه وقامت باحتضانه بقوة ( أوعى تفهمني غلط)

جنة : يااااه يا عبد الصمد أخيرا رجعت ده أنا كنت فقدت الأمل خالص و قولت أحسن ريح و استريح

باسم : و أهون عليكي يا بيبي ده أنا اللي في القلب

جنة : خالص ده أنت حتى مش في الصباع الصغنن
ده أنا كنت بصلي كل يوم ركعتين شكر على إنك مش هنا

الأم : ولما انتي كده مش طايقاه لسه افشه فيه ليه ؟ ابعدي عن الولا خليه ياخد نفسه

باسم : عندك حق يا صافي دي كسرت ضلوعي يا ساتر عربية نقل داست عليا

جنة : أنا غلطانة يا معفن إنى قربت منك وبعدين ده مش حضن أنا بس بشوف إذا كنت غيرت الكالونيا اللي كنت بتحط منها قبل ما تسافر أم اتنين ونص والسفر نضفك ولا لسه معفن زي ما كنت ؟

باسم : أنا بستخدم كالونيا برده الله يرحم لما كنتي فاكرة الperfume بتاعي عصير تفاح وعمالة تقولي عايزة عصير تفاح ببخاخة زي اللي عند باسم

جنة : اسم الله عليك شكلك نسيت إنك لحد الإعدادي كنت فاكر إن الانيميا آيس كريم ولما طلع عندي انيميا بقيت تقول عايز آيس كريم بالأنيميا زي اللي عند جنة فلا تعايرني ولا أعايرك ده الهم طايلني و طايلك

عبدالرحمن : عمركوا ما هتعقلوا أبدا طيب دي مجنونة وعرفنا أنت أمريكا مغيرتكش خالص ده أنت حتى أخدت الدكتوراة يعني اعقل بقى يا ابني

جنة : ده منظر ياخد الدكتوراة ده أكيد اتحايل على الدكتور وقاله أمانة عليك اديني شهادة أروح بها بلدي زكا عن صحتك يا شيخ منظري بقى وحش قدام أهلي فصعب على الدكتور فتصدق عليه والله يجزي المتصدقين

باسم : أنا أرقى من إني أرد عليكي خليكي شطة نار مني

جاءت جنة لترد ولكن أوقفتها الأم قائلة : بااااس انتي ايه بالعه راديو افصلي شوية خلاص طيرتي البرج اللي فاضل في عقلي

أروى وقد خرجت من الغرفة : ايه ته ايه ته يا ماما انتي عندك أبراج في عقلك ؟ طب ما تأجريهم و تحلي أزمة السكن

الأم : بس يا حيوانة بقى ده منظر دكتورة

ليلى : والله قلت كده دي آخرها تمسح المستشفى
بودي قولي دي تمرجية صح وأنت بتجبر بخاطرها و تقول دكتورة علشان خاطر صافي صح

الأم : عوض عليا يا رب عوض الصابرين ثلاث بلاوي في البيت امتى تغور كل واحدة في داهية على بيت جوزها وأخلص منها

جنة : يااااه على حنيتك يا نبع الحنان مرهم لبوس ملين

الأم : كلمة كمان و اتبرى منك يلا غيري علشان تطفحي