ربع دستة مجانين ( جاري التعديل )

part1

الرواية كوميدية بطابع ديني بس مش معنى كده إن اللي فيها هيبقوا ملائكة و محدش فيهم هيغلط لأ هيغلطوا و يغتابوا ، ممكن يبقى فيه نميمة أو تنمر و ده علشان هما مش ملائكة مش معنى إن إنسان حفظ كتاب ربنا و حاول يبقى كويس و يلتزم على أد ما يقدر إنه خلاص بقى ملاك مش بيغلط و لو غلط نعلق له المشنقة كلنا بنغلط و عن أنس بن مالك رضي الله عنه قال: قال رسول الله صلى الله عليه وسلم : «كلُّ بني آدم خَطَّاءٌ، وخيرُ الخَطَّائِينَ التوابون».  و أنا هدفي الأول من الرواية إننا ناخد الجانب الكويس من الشخصيات اللي يناسب ديننا يعني أنا أكيد مش هحط في روايتي ملائكة مش بيغلطوا

أتمنى لكم الإستفادة

و اللي هيحب الرواية و يعجبه أسلوبي يبقى يتكرم و يتابع صفحتي علشان يقرأ باقي الروايات طلب مش أمر

_________________________

في أحد أحياء القاهرة المتوسطة في صباح يوم الجمعة طرقت الأم باب غرفة بناتها الثلاث ولكن لا رد ففتحت الباب ودخلت ولكن صدمت من المنظر

كانت إحدى البنات تنام بوضع مقلوب على السرير والأخرى رأسها على الأرض وقدمها على السرير والثالثة تنام على الأريكة رافعة قدماها على الأريكة ورأسها على الأرض يغطيها شعرها

ناهيك عن منظر الغرفة التي كانت تشبه مقلب القمامة والملابس تغطي أرضية الغرفة بشكل فوضوي والأوراق متناثرة على الأريكة والسرير

فصرخت الأم قائلة : قومي منك لها منا لو مخلفة أرنب كان نفعني عنكم

ولكن لا حياة لمن تنادي فاضطرت الأم لاستخدام سلاح الأمهات المصريات ألا وهو أبو ورده وتبدأ المعركة

أروى : اااه حرام عليكي يا ماما هو كل يوم كده

ليلى : يسعد صباحك يا ست الكل صباحك فل يا أبو ورده أيها المنبه العزيز

أما جنة عندما سمعت صراخ أروى وليلى قفزت من على الأريكة و ركضت باتجاه الباب ولكن تلاحظ والدتها وتلقي عليها إحدى الفرد ولكن لم تصيبها فقد خرجت من الغرفة ولكن تعود وتفتح الباب وهي تضحك قائلة :
مجاش فيا
وقبل أن تكمل كانت الأخرى في وجهها فتشعر بالألم قائلة : ااه دي جت

ثم تركض هاربة من باقي المعركة اليومية المعتادة

وبعد الانتهاء من الاصطباحة اليومية تخرج الأم إلى الصالة وتجلس على الأريكة وهي تلتقط أنفاسها

وتأتي ليلى وتقول : ولما انتي كده يا حاجة ايه لزمة الاصطباحة دي

أروى : اه يا ماما حرام عليكي ده أنا جسمي باظ

الأم : منا لو كنت مخلفة بنات زي الناس مكنش ده حصل

لتخرج جنة من المطبخ و هي تأكل جزرة قائلة : كل ده يا بيبي ومش عاجبك ده انتي معاكي ربع دستة بنات