فَلوغن

الجزء ٣ / فصل ٢٤

سرى :: و انتي تحبي هلكد ؟
ريم :: اي كلش لان هو الإنسان الوحيد الي جان يحميني بذاك الوكت و ما كدرت اتخيل نفسي من دونه ابد و هسة الدنيا صارت ظلمة بعيني مااعرف شنو اسوي اني ضايعة احس نفسي ضعت كلش .
.
ريم تبجي و سرى تهون عليهه و تخليهه بحضنهه..
.
ريم ما طلعت من بيت اختهه ابد ايام و هي متقبل تطلع حابسة روحهه و تفكر بصلاح الي ما كدرت تشوفه مرة ثانية و توكفه كدام اختهه و تكوللهه هذا الإنسان الي حماني و وكف وياي و صارلي سند .
.
منصور رجع لبرلين بعد ما أيس و ما لكه ريم بلكَم و ما كدر يبلغ عنهه الشرطة لان يخافون لا يسببولهه اذية اذا جانت هاربة داخل المانيا .. صلاح كالهه بلسانه لمروة ( اني عندي احساس انو هي ب امان و ادعي من الله انو يحميهه وين ما جانت ..)
عبرت ايام و همة بلمستشفى و يوم منصور يبات وية صلاح و يوم مروة و هكذا .. و صلاح بقى متعلق ب آخر امل اله بلحياة ( ريم ) عسى و لعل يلكاهه.. جان سبب منطقي يخلي انسان عايش و هو معتبر نفسه مات من زمان ..
.
الحُب .. يخلق المعجزات.. الحُب مو معجزة .
.
العبارة الي جان يرددهه منصور ب اذانه دائما بس حتة يرفع معنوياته ولو شوية ..
.
جان احسن شي يصير ويا صلاح بذيج الايام هو انو ينزل بكرسيه المتحرك و يطلع بحديقة المستشفى حتة بس يكتب يكتب كلشي هو ما يكدر يحجي للناس .. و بعدهه يرجع لغرفته و يتمدد على جربايته و هو فاقد الاحساس بنص جسمه ..
لحد ما اجاه دكتور صاحب بذاك اليوم ..
:: شلونك اليوم صلاح ؟
صلاح :: اذا تبشرني انو التحاليل طلعت نتائجهه راح اكون زين .. دكتور .
صاحب و هو يباوع على النتائج مال تحاليل ..
:: اي طلعت النتائج و ان شاء الله راح نحددلك موعد العملية حسب جاهزيتك.
صلاح :: ايييي دكتور و اخيرا امروتك طلعو هاي الرصاصة بسرعة اريد ارجع مثل قبل تعبت من هلوضعية.
صاحب :: هههه اوكف يمعود شبيك مستعجل بعد ورة العملية لازم نشوف قدرة جسمك على الشفاء و امكانيته حتة يستعيد صحته مثل قبل .. عمليتك خطرة صلاح و اذا علعلاج ف وراك علاج فيزيائي يطول شهور حتة ترجع توكف على حيلك مثل قبل ..
صلاح :: دكتور اني قوي والله قوي مروة شبيج متحجين شي وياااا !؟
مروة :: صلاح اسمع كلام الدكتور هاي صحتك مو لعبة الجسم يستعيد صحته بلتدريج مو رأسا ترة .. اي دكتور كمل .
.
صاحب :: صلاح الرصاصة متحركة من مكانهه عدة سانتيمات و فايته بشكل اعمق بين الكلى و الفقرات العجزية الي اعتقد تتعالج بمرور الوقت .. بس العملية تبقى خطرة لان في حال فشلت العملية ف راح تتأذة الفقرات الاخيرة عندك و راح تبقى مقعد طول حياتك و ماكو أمل ترجع تمشي مثل اول ..
بس اذا نجحت العملية و هاي نسبتهه ٥٠% بذاك الوقت بعد جلسات العلاج الفيزيائي الي تكلفك ٤ شهور ممكن ترجع توكف على رجلك مرة لخ صلاح اريدك تفكر كلش زين بلموضوع و تقرر على هلاساس ..
.
صلاح :: زين دكتور ! انت شتنصحني يعني ؟
صاحب :: لحسن حظك انو الرصاصة ما نفجرت و ما تعرضت انت لأي تسمم و هي مستقرة بهذا المكان و مستحيل تتحرك أكثر من هيج اما اني اذا عليةة و بيدي القرار ف ماانصحك بلعملية..
.
صلاح :: ليش دكتور؟
.
صاحب :: اني من احسن الجراحين بهذا المجال مانختلف بهاي الشغلة ابد بس كل عملية بيهه نسبة خطورة مهما كانت سهلة و تصير مضاعفات داخل غرفة العمليات غصبا عليةة و على كل طبيب هاي شغلة مو بيدنا .. و الرصاصة الي بجسمك خبيثة صلاح يعني ممكن يصير عندك فشل كلوي أثناء العملية و تفشل عمليتك و ممكن نلكة شي بلفقرات العجزية ما كدرنا نشوفه بلاشعة يعني المضاعفات موجودة دائما لهذا اني ماافضل اجازف بنسبة نجاح قدرهه ٥٠% و انت تكدر تعيش حاليا و تنتظر ظروف احسن من هيج حتة تسوي العملية هاي .
.
صلاح :: ظروف شنو دكتور ! و الرصاصة متتحرك كلتلي ؟
.
صاحب :: انت نفسيا ما مستعد للعملية انت محتاج تكون جاهز نفسيا و حسب الاتصال الي اجاني من بغداد اني عرفت قصتك بس ماتوقعت حالتك بهذا السوء !
.
صلاح :: دكتور يا سوء شنو اول مرة يجيكم مصاب حرب و بجسمه رصاصة داعشية؟
.
صاحب :: لا مو اول مرة بس الي قبلك جانو متمسكين بلحياة أكثر اما انت دتمثل عليةة حاليا .
صلاح :: لا دكتور مداامثل الله يخليك طلعهه من جسمي .
صاحب يخلي طبلة صلاح علطاولة و هو يكمل كلامه :: انت مو الرصاصة اذتك.. صاحب الرصاصة مأذيك و ماراضي على نفسك يا صلاح و حاليا انت بدون استعداد نفسي اني مااكدر اسويلك عملية بحالتك هاي باوع بلمراية لنفسك و راح تفهم كلامي .
.
صاحب يندار و يطلع من الغرفة و صلاح يضرب فخذه ب ايده و هو صاير نار من العصبيةة :: يا اللللللله ساعدني .
.
صاحب يجي اتصال ورة ما يطلع من غرفة صلاح .. :: الو ؟
:: شلونك دكتور .. اني ابو جاسم اني العميد محمد .
صاحب :: أهلا أهلا ابو جاسم ههه اصلا عرفتك من صوتك .. الحمدلله بخير انت شلونك ؟
محمد :: اسأل عنك بس حبيت اتطمن على حالة صلاح و كلت اخابرك .
صاحب :: عيني انت صلاح بعده ما مستعد للعملية الي لازم يسويهه بس اني عندي كم استفسار يعني ب اعتباري طبيبه لصلاح .
.
محمد :: اي تفضل دكتور .
.
صاحب :: اريد اعرف شوكت صلاح يكدر يشوف اهله ؟
.
محمد :: و انت شنو راح تستفاد من اهله .. المصاب يمك و انت الطبيب مالته .
.
صاحب :: المصاب محتاج حافز و اني مااكدر اعالج شخص متخلي عن نفسه مقدما
.
محمد :: مابقى الا شي قليل بس هاي الفترة لازم تخلص بدون ما يرجع للعراق و هاي مسؤوليتك دكتور ..
.
صاحب :: بس فهمني شنو العائق الي يخلي صلاح ما يتصل ب اهله هسة ..
.
محمد :: خلصنا من خطوة و هو شخص جان يدور على صلاح و صلاح يدور عليه و بقت الخطوة الأكبر و هاي محتاجة وقت اكثر يا دكتور ..
.
صاحب :: افهم من كلامك .. رجعة صلاح للعراق راح تخلي يواجه الموت .
.
محمد :: اي ف الأفضل انو يكون بعيد هسة و لتشيل هم اهله و ارجوك ريح كلبي و كلي يا سيادة العميد لا تشيل هم صلاح ..
.
صاحب :: حاضر ..
.
محمد :: اكو بنية يحبهه صلاح و اذا لكيتوهه راح تكون حافز اله حتة يرجع يوكف على رجله و هاي تكدر تستفسر عنهه منه ..
.
ينتهي الاتصال الي دار بين محمد و صاحب بذاك الوكت و صاحب يرجع لغرفته و هو حاير شنو يسوي علمود يعالج صلاح مرة ثانية ..
.
.
احد شوارع بغداد ..
.
أم صلاح جانت تمشي وحدهه جاية من السوك و هي كلش تعبانة من شكلهه صدك شكل وحدة فاكدة .. تمشي و تريد توصل للبيت و هي بيدهه علاليك المسواك و فجأة تنمد ايد احد من ورة و تاخذ العلاليك من ايدهه :: عنج أم صلاح ..
.
ام صلاح تتفاجئ تدير وجهه تلكة شخص ضخم مبين من شكله محترم و مهيوب و لابس قاط مدني و ماعنده لحية و شعره ابيض متروس شيب و هي بنظرات انكسار و صوت ضعيف تجاوبه و تكله :: انت تعرف ابني صلوحي؟
هو بدوره يدير وجهه للسايق مالته و يكله :: انتظرني شوية و ارجعلك ..
.
يندار على أم صلاح و يتمشى وياهه و هو يباوع ليكدام و يكوللهه :: اني جنت حاضر بلفاتحة بس مااعتقد تتذكريني انتي اي اني اعرفه .
.
ام صلاح تمشي و تدنك راسهه :: هاي مو فاتحته لصلاح ..
توكف و تدير وجهه عليه و تكمل كلامهه و هي رافعة اصبعهه للسما .
:: الله كتبلي اموت قبل ابني و هو يدفنني بيده و هاي مو فاتحته لتكول هيج لان اني ابني مامات.
.
الشخص :: اني فرحان كلش لان انتي تفكرين هيج و اتمنى انو الله يطول بعمرج و ابنج يكون عايش مثل احساسج الطيب هذا ..
.
ام صلاح تكعد بمكانهه على كرسي جان موجود بلحديقة الي فاتو من يمهه و هي تحط ايدهه على راسهه و تكول :: شنو تريدون من ابني فهمني .
.
الشخص :: اني الشخص المسؤول عن ابنج اني العميد محمد اكيد سمعتي عني .
.
ام صلاح تباوع بعيونه و هو يكمل كلامه ..
.
محمد :: ام صلاح مااعرف شلون اوصللج الموضوع هذا بس اتمنى ما تخليني أندم بعدين .
.
ام صلاح تريد جواب يريح كلبهه و هي تكله :: اي اي وداعة صلوحي ما تندم بس احجيلي .
.
محمد يجر حسرة و يكول :: اوعديني انو بعد ما اكول الي اكوله .. تنسين انو شفتيني و سمعتيني و كانما ماالتقيت بيج ابد .
.
ام صلاح تفرفح روحهه و هي تكله :: والله مااحجي ماشفتك اني ولا اعرفك اغديلك فدوة احجيلي ابني وين ؟
.
محمد :: ابنج عايش أم صلاح و هو هسة ب مهمة خارج العراق و يتأخر يلله يرجع و لتتأملين رجعته هسة و ميكدر يتواصل وياكم حاليا و اتمنى منج انو تكونين كد الوعد الانطيتينيا و هذا كله بس حتة نحمي صلاح لا اكثر .
.
ام صلاح تصب دموعهه و تبجي :: والله كلبي حاس من البداية ابني ما مات والله حسيت .
.
محمد :: اني بس ردت اريح كلبج و اتمنى ماتسأليني أكثر عن الموضوع و ارجوج يعني...
.
تقاطعه أم صلاح و هي تمسح دموعهه و تكله :: هاهي خوية مثل ماتريد اني لا شفتك ولا سمعتك و ابني استشهد من زمان .
.
محمد :: شتحتاجون هذا رقمي احفظي يمج اي شي تحتاجوه اني بلخدمة و ان شاء الله مانقصر وياكم ..
.
ينتهي ذاك الحوار و يتحرك العميد محمد من مكانه و هو مسلم سلامة صلاح و هذا السر بكلب أُم جان مفجوع على ابنهه.. و هناك يرتاح ضمير محمد و يرتاح هو هم و يرجع لبيته و هو متطمن انو اكو احد راح يبقى ينتظر صلاح مهما تأخر و مهما صار وياه ..
.
بعد أيام..
.
حديقة مارتن لوثر .. برلين .
.
صلاح كاعد على كرسيه و هو يتأمل المكان الي حوله و يطلع جهازه من جيبه و يبلش يكتب كلعادة ..
.
صلاح ✒
.
ريم .. مرن شهرين و اني ب المانيا عايش على هذا الكرسي انتظر نفسي اكوم على حيلي .. انتظر نفسي ارجع مثل اول أو حتة لو الكة طرف خيط زغير يأخذني الج حتة اتمسك بهاي الحياة اكثر.. تدرين ؟
مرات اتمنى ارجع لأيامنا القديمة و نرجع نعيش جوة قصف الجيش و رحمة الدواعش بنص الموصل .. ولا عيشتي هاي .. بس لان انتي مو يمي هسة .. اتمنى الزمن يرجع بيةة مرة لخ و اخذج و انهزم و محد يندل مكاني ابد و نعيش بعيد عن كلشي ..
.
صلاح يغمض عيونه فجأة و هو يتذكر ايامهم سوية بلموصل ..
.
الحياة تنطي فرصة مرة ثانية ؟
.
اي الحياة تنطي فرصة مرة ثانية لشخص عاندهه و صبر و تحمل كلشي لخاطر يوصل للي يريده .
.
سرى .:: ريمو .. ريموووو .. ولج ريم مو دااحجي وياج؟
.
ريم :: ها .. ها ..وياج .
.
سرى :: وين صافنة ؟
.
ريم :: هيج تذكرت شغلة قديمة .
.
سرى :: الله يرحمه كافي حبيبتي تأذين بروحج شنو ماعندج نيةة تطلعين من البيت مو كافي يعني حتة أذية النفس حرام يا عمري مو طك كلبي عليج .
.
ريم :: اكلج سهلة كملت الاقامة مالتي؟ مو ؟
.
سرى :: اي بس تطلع تكدرين تتحركين هنا براحتج بس هلشي ما يمنعنه نطلع ناكل برة ترة .
.
ريم :: لا حبابة مااريد اطلع .
.
سرى :: لا حبابة ولا شي كومي ماما مو حتة نفسيتج تدمرت دباعي لوجهج كومي مااريد اعتراض راح نمر لصاحب ناخذه من المستشفى و نروح يلله شوي و ارجعلج الكاج متحضرة .
.
سرى تطلع من الغرفة و ريم تبقى صافنة و بالهه بغير مكان ..
.
أما صاحب ف جان كاعد وية منصور بذيج اللحظة و منصور يحجيله عن كلشي صار ويا صلاح من طقطق للسلام عليكم .. و يحجيله عن حبيبة صلاح الي ديدورون عليهه و ما لكوهه ليهسة ..
.
صاحب :: اي و هي شنو اسمهه البنية .
.
منصور :: اسمها ريم .. مممم .. ريم حسين ايوه ريم حسين على مااظن .. اصلِ احنا كنا سوا لما اطلعنا من العراق و لما اوصلنا اليونان بس انا سِبتها لوحديها و رحت على مصر و ياريتني ماسبتهاش ابداً .
.
صاحب :: غير صدفة هاي .
.
منصور :: اييه هي الصدفة دي ؟
.
صاحب :: نفس اسم بنت عمتي و أخت زوجتي بنفس الوقت ..
.
منصور :: هيَ بنت عمِتك دي .. عمرها كام دلوقتي ؟.
.
صاحب :: ١٨ سنة ليش؟
.
منصور :: مش معقول تكون هي نفسها .. هي فين دلوقتي ؟
.
صاحب :: بس اوكف وحدة وحدة بنتنا هم اجتي من اليونان قبل فترة وي اللاجئين .. بلله انت عندك صورة الهه ؟ شي ؟ يعني اني عندي معارف بلسفارة يكدرون يساعدونة حتة نلكاهه خاف يطلع مجرد تشابه اسماء ..
.
صاحب يفرك براسه و هو متوتر كلش و يكمل كلامه :: يا اخي معقولة هي نفسهه؟
.
منصور :: دقيقة ..
.
منصور ديكلب بجهازه حتة يطلع صورة ريم و يكمل كلامه :: انا مش لاقيهه..!
.
صاحب يطلع جهازه بسرعة و يدور بي و هو متوتر كلش لان صار متأكد انو هي نفسهه ريم لان تذكر اسم حبيبهه الي استشهد :: اي احتمال هي .. الا اذا هي و اني ماوصلولي الأخبار كاملة من بغداد محد كلي انو صلاح يعتبر شهيد ببغداد .
.
صاحب يكلب بجهازه .
.
منصور صافن عليه :: انت بتتكلم جد ؟ يا دكتور كلمني و قولي هو الي حصل معاها؟
.
صاحب :: حبيبهه اسمه صلاح و استشهد قبل فترة .. اي اي اي بنفس الليلة الي اجه صلاح لبرلين هي سمعت بخبر استشهاد حبيبهه .
.
صاحب يطلع الصورة مال جوازهه و يخلي الشاشة كبال منصور و يكله و هو عيونه بكصته صايرة :: هاي مو ؟
.
منصور يتفاجئ و هو يطير من الفرح :: اه اه واللهي هي دي هي ريم هههههههههه اه واللهي هي ريم الي بندَوَر عليهه من فترة ههههههه .
.
منصور يصيح بعلو حسه :: يا صاحبيييي لقينا ريم ياصااااحبي ههههههههههههه.. يتبع
.
.
.
.
.
.
.
.
.
.
.
خبر صادم وصلني عن ابطال رواية فلوغن ( الهاربة )
و هذا الخبر غير نهاية الرواية إلى نهاية أخرى..
غير النهاية الي جانت مقررة تنكتب الهه ..
.
ما بقى شي على نهايتهه و البارتات الجاية راح تكون ب لسان حال ريم ..
.
🙂💔
.
.
.
https://www.wattpad.com/user/671m_m?utm_source=android&utm_medium=link&utm_content=share_profile&wp_page=user_details&wp_uname=Haiderpoet97&wp_originator=iWAlYERsgZFipgcOVcbAAzEQu2H1To%2F2FhekmZes2xi%2FNAxZU2OjCpvqmWxcPeKDzWjzwvWw1Yc%2BZ8Z48Pvv0V05pxLKNSMjycgB84OckgCx7xx3klr00ac75AFe0wwt
.
مصمم اغلفة و هو الي صمم غلاف الرواية الأخير.. شغله رهيب للي يحب يصمم من يمه .. و الي يريد يكدر يراسلني ادزله حسابه مال انستا و يشوف تصاميمه هم .. عنده تصاميم ناشرهن بحسابه..