فَلوغن

الجزء ٣ / الفصل ٢٣

منطقة على حدود سوريا
.
:: سيدي هاي الاحداثيات الي اجتي عن موقع الارهابي المدعو امجد الشامي ..
.
العقيد محسن :: اتصل بفواز و الشباب و انطيهم كامل الاحداثيات خل يتحركون بسرعة ..
.
:: حاضر سيدي و احنة ؟
محسن :: وياهم احنة بس خل يسبقونة و يأمنون الطريق ..
.
بعد ساعة ..
.
صوت الرمي و المواجهات القوية بين الجيش العراقي و تنظيم داعش الارهابي جان شرس إلى درجة انو تحس اكو كدامك جيش من داعش مو مجموعة من الارهابيين و تدور المعركة القوية على الحدود العراقية السورية بين الجيش و التنظيم .
.
فواز يرفع جهازه و هو بنص الرمي :: سيديي شوكت توصل الطيارة؟ محتاجين دعم؟
:: فواز اصبرو تحملو دقايق و يوصلكم الدعم .
.
فواز محتمي التراب و هو و جماعته يواجهون داعش .
فؤاد :: شراح نسوي؟ مجاي نشوف منهم شي و احنة مكشوفين؟
فواز يجاوبه بعد ما يفكر :: احنة لازم نتقدم أكثر لان هيج راح تصير عدنا خسائر أكثر لازم نتقدم و نحاصرهم جوة .
فؤاد :: شنتقدم ماكو ساتر ماااكو
فواز :: جم سيارة عدنا؟
فؤاد :: ٢ .
فواز :: انطيهم امر خل يتقدمون وحدة ورة اللخ ب اتجاه الوكر و خلي مسافة بيناتهن ١٠٠م تحسبا لأي انفجار و هنة الساتر .
فؤاد :: حاضر .
.
فواز :: باوع .. خلي الشباب يحتمون وراهن و اني راح اطلع وره اول وحدة .
فؤاد :: حاضر .
.
فؤاد يأشر للشباب و يكوللهم تحركو و يرفع الجهاز :: سلام تقدمو ب اتجاه الوكر يلله على كيف خلي السيارات تصير ساتر .
.
سلام :: حاضر .
.
تتحرك اول سيارة مدرعة و فواز يحتمي بيهه و تتحرك ثاني سيارة و فؤاد و الشباب وراهه و يبقون البقية بمواقعهم..
و تستمر المواجهة بين الجيش و التنظيم..
.
الاجواء متربة كلش و الدنيا غروب و جان لازم تخلص هاي المواجهة بلوقت المناسب قبل ما ينهزمون الدواعش ..
الدواعش يطلعون رهينة براسه كيس قماش و يخلوه بلمقدمة حتة يخلصون من القصف و هناك فواز يباوع و يتفاجئ بلمنظر الي كدامه .
.
فؤاد يصيح لفواز :: شنووو هاااااي!
.
فواز :: الجلاااااب عدهم مدنيين.
.
فواز يرفع جهازه :: سيدي هذولة عدهم رهينة شخص مدني شنو نسوي ؟
.
محسن :: فواز راح الغي امر القصف و انتو لازم تحلوهه بدون مساعدة الطيارة و حاولو تتفادون اي مدني تشوفوه كدامكم.
.
فواز :: حاضر سيدي ..
.
ينزل الجهاز . و يكمل كلامه :: خرب****** يا جلااااب .
.
فواز الي شايل سلاحه و مستتر ورة المدرعة يباوع و هو محبط و يدير وجهه وراه على جماعته و مايعرف شنو يسوي ..
.
فجأة يقرر يجازف و هو ينطي الأمر للمدرعة الثانية تتحرك و تغير مكانهه..
.
فؤاد يصيح :: ليييش نتحرك فواااز!
.
فواز :: اشغلهم من الجهة الثانية بسرررعة ما بقى وقت .
.
فؤاد :: حاااضر .
.
تتحرك المدرعة الثانية و تغير مكانهه و هناك تصير المواجهة من محورين ضد الدواعش الي يوكع منهم عدد كلش جبير و هناك فواز يقرر يتدخل و يدخل بشكل اعمق ب اتجاه وكر الدواعش حتة ينقذ المدني الي بقى وحده مربوط بنص المواجهة..
.
الدواعش الي نحصروا و مايكدرون ينهزمون ابد و الجيش فجر سياراتهم ماجان عدهم حل غير انو يواجهون الجيش حتة يخلصون روحهم.
.
فواز ينتبه كدامه و يشوف داعشي شايل آر بي جي ( صاروخ ) قصير المدى و ديرفعه..
.
فواز رأسا يدك على ضهر المدرعة بيده حتة السايق يوكفهه و يندار بسرعة و يصيح على فؤاد حتة يتركون المدرعة الي كبالهم.. و بذيج اللحظة يكون تأخر الوقت و الداعشي طلق الصاروخ ب اتجاه المدرعة الثانية و يفجرهه.
فواز عيونه بكصته من الصدمة ينزل على اركبه و هو يباوع المدرعة الثانية صارت نار مشتعلة و ماكو رد من جماعته ابد .. يباوع على الدخان الي كباله و يرد يدير وجهه على جماعته..
.
فواز يكوم ركض و يفتح باب المدرعة و يكول لصديقه سجاد :: انزل بسرعة..
.
بعد ما نزل سجاد ..
يصيرون ثنينهم ورة المدرعة ..
.
فواز :: اريدك تفتح عليهم نار جهنم افتهمت؟؟ احميني بس حتة اعبر لهناك و ارجع و خلي عينك مفتوحة لأي محاولة اطلاق منهم تمام؟
.
سجاد :: اي اي تمام . روح  
.
فواز يركض من مكانه و يتراجع ليورة و انوب يتجه ب اتجاه المدرعة المحتركة.. يركض بكل سرعته و النار مفتوحة ب اتجاهه بس ماتلوحه لان كدامه تلال من التراب و هو يركض لحد ما يوصل و يلكه جماعته تاركين المدرعة قبل ما تنفجر و ماخذين ساتر و مستمرين بلمواجهة و عدهم ٢ مصابين .
.
فواز ياخذ ساتر بعد مسافة و يكمل المواجهة و هو يصيح :: شباااااب خما احححد وكع؟
.
سلام :: فؤؤااااد فؤااااد و علي .
.
فواز :: يا رب سترك ..
و يركض من مكانه بسرعة لحد ما يوصل يمهم و يلكاهم ساحبين فؤاد و علي يمهم ورة الساتر و مستمرين بلمواجهة.
.
فواز ينزل على فؤاد الي متمدد بلكاع و جتفه متروس دم و كاعد واحد يلف ب ايده كلهه ..
فواز :: ولك سلامتك خووية شني القصة .
.
فؤاد و هو منتهي من الوجع :: هاي.. سه..سهلة هاي لا تشيل هم خوية .
.
فواز يبتسم كدام صاحبه و هو شابع قهر :: بلريش يخوي بلريش لا تتحرك من مكانك احنة مانقصر .
.
فؤاد :: لا يخوي جيب سلاحي .
.
فؤاد :: عوف سلاحك هسة حير ب جتفك.
.
و يرفع من معنوياته و يأمن عليه و يرجع ركض لمكانه .
.
فواز اول ما رجع من تركيا التحق للواجب رأسا و بذاك الوقت جان واجبه على حدود سوريا بس هو جان عنده كل المعلومات عن امجد و جان يعرف نفسه وين راح يلكاه.. و اول ما سمع بلدواعش بهذا المكان خاتلين كلش فرح انو هو راح ينفذ وعده لصلاح و يرجع حقه اله .. و التحق رغم انو هو جان ديمر بظروف كلش سيئة بحياته.. التحق و مافكر وراه ابد .. فكر بلشي الموجود كدامه و بس ..
.
بعد ساعة من المواجهة كدر فواز و جماعته يقتحمون الوكر مال داعش ..
.
جان اكو بناء جبير و يمه خندق و الدواعش جانو محتمين بي .. فواز و جماعته كتلو كل الدواعش و بذيج اللحظة وصلو للمكان هذا .
.
فواز :: شباب انتبهو.. اكو رهينة عدهم مدام دخلوهه جوة ف اكيد لو كمين لو احد منهم باقي عايش ليهسة .
.
يدخلون الشباب بحذرهم و همة اسلحتهم بيدهم.. للبناء و يدخلون لكل الغرف و يلكوهه فارغة و يظلون يفتشون..
.
فواز يصعد فوك و هو يمشي بخطوات بطيئة و بدون صوت و بكل حذر لحد ما يدخل غرفة!!
.
شخص لازم الرهينة و مخلي سلاح براسه و يصيح على فواز :: اي حركة منك راح افرغ المسدس براسه افتهمت؟ ذبببب سلاحك نزل سلاااحك بسرعة .
.
الرهينة :: امجد سلم نفسك و اترك هذا الطريق سوي شي زين بحياتك مرة وحدة ارجوك !
.
امجد يرد ب اذان الرهينة بكل عصبية :: اننننت بلذااااات تسكت خلاص لا تحجي ابداً .
.
فواز موجه سلاحه ب اتجاه امجد :: نزل سلاحك .
.
امجد :: انت نزل سلاحك و اطلع كدامي حتة ما اقتله كدامك .
.
فواز :: انت امجد الشامي يعني انت الي سولفولي عنك اصلا ماكو شي جديد اني توقعتك جبان و نذل لهلدرجة .
.
الرهينة :: اممجد نزززل سلاحك و سلم نفسك ماعندي مانع اموت اني خسرت كل عائلتي بسببك بس لتموت بدون ما تاخذ جزاءك ارجوك سوي هاي الشغلة علمودي و سلم نفسك .
.
امجد يأشر بعينه على الرهينة كدام فواز و هو يضحك ب استهزاء و يكول :: هذا اخوية هههه يريدني ارجع عن طريقي بس احب اكلك انت مراح تحصل على الي تريده و اني راح ابقى عايش ما محتاج شفقة منك افتهمت؟
.
فواز :: نزل سلاحك و سلمني اخوك و اوعدك ما يصيرلك شي ابد بس سلم نفسك بدون ما تنجلب .
.
يدخلون اصدقاء فواز للغرفة و فواز رأسا يأشر بيده و يوكفهم.
.
امجد بكل عصبية :: نزلوووو سلااااحكم وتحركو كدامي لحد المخرج و اسلمكم الرهينة جوة و تتركوني اروح بسرررعة لا اقتله فووورا .
.
فواز يؤمر جماعته :: شباب نزلو سلاحكم.
.
سلام :: فواااز!؟
.
فواز بكل عصبية :: دااكلللكم نزززززلو سلاااحكم يلله .
.
الشباب ينزلون سلاحهم بلكاع .
.
امجد :: انت هم نزله و تحرك كدامي بسرعة .
.
فواز يرفع تك ايد و ينزل سلاحه على كيف ..
.
و هو دينزل سلاحه يتفاجئ ..
.
حسين يدفع امجد بكل قوته و امجد يطلق النار رأسا لان جانت ايده على الزناد ..
.
حسين يوكع بمكانه و امجد ينشمر ابعد ..
.
فواز رأسا يكمز على امجد و يتعاركون بيناتهم واحد يضرب بلثاني .
.
سلام يركض على حسين ابو سرى و يلكاه متصوب ب ابطنه و سلام يطبطب على وجهه و يصيح :: ابقى ابقى ابقى وياي لا تغمض ابقى صااااحي..
.
ابو سرى يفقد وعيه و سلام يصيح بعلو حسه :: الرجال راح يرووووح من ادينااا صيحووولي فؤااد بسرررررعة .
.
فواز يضرب امجد و امجد يضرب فواز و كل واحد ما ينطي كمشة على روحه بس فرق العمر لان امجد اكبر من فواز بهواي .. فواز يذب روحه على امجد و يظل يضرب بي بوكسات و هو يصيح بوجهه :: لك جبااااااااان .
.
امجد يتعب كلش و هو وجهه مليان دم و فواز يكوم على حيله و يكله :: جان خليتك تفطس بس مكانك بلمحاكم العراقية يا نذل .
.
فواز يمسح ايده الي نجرحت و يطلع مسدسه من خصره و هو يكول لجماعته :: شيلوه من كدامي لا ابتلي بي .
.
امجد توه ديكوم و سلاحه مشمور كدامه .. رأسا يدفع واحد من الشباب و ياخذ السلاح ..
.
فواز رأسا يوجه سلاحه على امجد .
.
امجد اول ما رفع ايده .
.
فواز ضغط الزناد و ضرب امجد طلقتين بجسمه.
.
وكع امجد بصف اخوه و هو ينزف من كل مكانه و يلفض انفاسه الاخيرة .
.
فواز يصيح بوجه امجد :: اذا تعيييش نذذذذل ف راح تموووت نذل ماكو حل ثاااني يا جلب.
.
امجد ينزف من حلكه و هو وكع بلكاع و منتجي ضهره علحايط .
و فواز ينزل يمه و هو لازمه من حنجه و يصيح بوجهه :: و نقيب صلاح يسلم عليك .
.
امجد يفقد حياته و يموت و يفطس بمكانه كبال الكل و لهنا تنتهي قصة داعش و قصة امجد الشامي الي سوة كلشي حتة ينتقم من اخوه و حتة ينفذ امر الوالي الي جان أعلى منه بقتل صلاح .. يموت امجد هناك و تنتهي قصته في حين الشباب ياخذون ابو سرى و يرجعون يدخلون الحدود العراقية و يتوجهون لبغداد بعد ما يخلون ابو سرى بوحدة من مستشفيات دهوك ..
.
.
برلين ..
.
مستشفى مارتن لوثر ..
.
مروة تدخل غرفة صلاح و هي بيدهه الموبايل ..
.
مروة :: صلاح هاي الرسالة الك .
.
صلاح يأخذ الجهاز منهه و يباوع لكاهه رسالة من فواز .. مكتوب بيهه .
.
( خوية البارحة حقك رجعلك و النذل اخذ جزاءه .. و اكو شخص لكيناه محتجز عدهم اسمه حسين ابو سرى من أهل الانبار اعتقد انت تعرفه.. اذا تعرفه  ردلي خبر ب اقرب وقت .. )
.
بيت سرى و صاحب ..
.
يدخل صاحب للغرفة و يلكه سرى مكابلة ريم و كاعدة و ريم نايمة على الجرباية .. و مشدود الهه مغذي .
.
صاحب يخلي ايده على راس سرى :: شلون صارت؟
.
سرى دمسح دموعهه :: مااعرف يعني هي سمعت خبر موزين بس حتة مالحكت افتهم منهه شي رأسا ظلت تعيط و فقدت وعيهه من الصدمة بس قست ضغطهه لكيته نازل رفعتلهه مغذي و نطيتهه مهدئ و نايمة هسة ..
.
سرى تباوع لصاحب و هي دمعتهه بعينهه :: بس لو اعرف شنو صار وياهه و شنو شسمعت الصبح من خبر حتة يصير بيهه هيج ها؟
صاحب :: ان شاء الله بمرور الوقت راح تتعالج و تتحسن نفسيتهه و انتي هم لاتضغطين عليهه هي راح تحجيلج كلشي بس ترتاح ..
.
صاحب ديطلع من الغرفة :: سرى؟
سرى :: ها حبيبي .
صاحب :: باجر لازم اروح من وكت للمستشفى ما كلتلج اجاني مريض من العراق .. توصية خاصة و قبل شوية دكتور ( كامفر ) دزلي صورة للطبلة مالته و اطلعت عليهه .
سرى :: بلله اشوف؟
سرى تباوع للجهاز الي بي الحالة و تحجي .. :: هممم صلاح متعب حازم .. اصابة بلعمود الفقري ...يتبع