فَلوغن

الفصل الثامن :: المبايعة !

رحت طلعت ورة ابو إحسان و اخذت جهاز مروة من ايده و طلعت ل برة و هو بقى يدك و الرقم غريب ما امسجل و رديت .. و اسمع صوت واحد صوته صوت شاب .. :: الووو
هو :: منو انتي وين مروة؟
اني :: اني ريم منو انت ؟
هو :: رييييم؟؟!!!!
اني :: اي شبيك تفاجإت .. منو انت حتة اكوللهه ؟
هو :: ااااا..مممم... كوليلهه النقيب صلاح .. اني النقيب صلاح و خل تتصل بيةة ب اسرع وقت .
.
اني انصدمت وقتهه و صوت الخط ينقفل ب اذاني و وخرت الجهاز و ما نزلت من حلكي غير كلمة :: نقيب صلاااح؟!  ...
.
صلاح✒. خلينة نرجع بلزمن ليورة ليوم استشهاد مهند ...
.
رفعت :: سيدي تعرضنا للخيانة و وكعنا بلكمين و احنة هسة عدهم كارهابيين و راح يعدمونه اول ما ياخذون اسم الشخص الرابع سيدي بس اصبر .. عدنا عناصر بكل مكان ...!
اني مااحس على روحي الا صرت اعيط و اغلط عليهم بعلو صوتي و وصلت لمرحلة هستيرية كلش و اني أصرخ و رفعت يحاول يلزمني و يسكتني بس مجان اكو فايدة و هو يصيح :: صلااااح لاااا. 
و ما نحس الا طبو علينة الدواعش و همة يضربونة بلأخامس( مؤخرة السلاح ) على ضهورنا وين اليوجعك اليوجعك دك كتل و جان يوكع رفعت و شمرت روحي فوكاه و ظلو يضربون و يشتمون بيةة لحد ما صرت انزف جان يطلعون كلهم و احنة بقينا امددين مانكدر نتحرك ابد و ورة كم ساعة دخلو علينة مرة لخ و شفتهم يحطون جيس ( قماش ) برأس رفعت و ياخذوه من يمي و اني احاول امنعهم بس طبعا ما كدرت امنع شي و همة يغلطون و يسبون ب اهلنا و ياخذون رفعت من يمي سحل و يطلعون .. جانت ايام مُرة كلش و مجانت عدهم ذرة رحمة ابد و هناك جنة راجعين لسالفة كلش قديمة ما جنة محسبيلهه حساب طبعا شغلة همة يريدوهه من عدنا بوكتهه لهذا جنة عايشين و ما كتلونه ..
نسيت اكوللكم انو الوعد الي قطعه صهيب الوالي بموتنه انلغه فجأة و بدون أي محاولة لان جان يريد يضعف واحد من عدنا بلثاني حتة عسى و لعل واحد من عدنا يعترف لهذا جانت ذيج الايام مابيهه غير التعذيب و بس و اكو شي ثاني و هو الناس ( الدواعش ) الي جانت تحقق ويانة هي ناس متمرسة و ذكية يعني جانت تجي من بغداد لو من دمشق بس حتة تحقق ويانة و بس ..!
الغرفة الضلمة الي ما جان بيهه شي ابد بس آثار دمنه اني و رفعت ..
ما تغيرت ابد و جان احسن شي ممكن يصير ويانة بليوم هو انو نخلص من التعذيب و ننسحب الهه لان هناك على الاقل ننترك وحدنا و نصير نلحك ناخذ نَفَس على الاقل ... و بواحد من ذيج الايام ايام الجحيم ب اعتبارهم يومية يحققون ويانة و يعذبونة
و بغرفة التحقيق...!
.
يحطون رفعت على كرسي و همة رابطي و شادين عيونه و حلكه و رفعت يتلفت و لا يكدر يحجي ولا يشوف شي بس عسى و لعل يعرف نفسه وين ..!
و يدخل عليه واحد لابس لبس محترم و شكله محترم و سلاحه بخصره و عمره بلاربعينات و حتة لحيته ماكو يعني مو مثلهم بلعادة همة يربون لحاياهم...
و يحط كرسي بلعكس كبال رفعت و يكعد و بدون ما يحجي اي حرف يمد ايده و يوخر الجيس و يفتح حلك رفعت و هو يباوع بعيونه كلش زين و يبقى يباوع بدون ولا حرف ...
رفعت يشوفه ما حجه و هو هم يبقى ساكت و بدون حتى ما يلتفت يباوع بوجه هلشخص .. و هو يرجف بسبب الوجع و بوكتهه جان خده مجروح من الطول للطول بس نظراته نظرات اسد ههههه رفعت هو أكثر شخص عرفته بحياتي يكدر يتحكم بنفسه و ب اعصابه احسه هيج هو الي يتحكم بلمحيط الي يحيط بي مو المحيط الي يفرض عليه ضروف تصير اتمشيي على مزاجها..
رفعت يعرف غاية هلشخص و يبقى يباوع بعينه بدون أي حركة لحد ما يلاحظ تعابير وجه هذا الشخص تتغير و بلش يضوج كلش .
و جان رفعت فجأة صار يبتسم و هو مخلي عينه بعيون هلشخص اما ذاك ف رأسا كام على حيله بسرعة و ضرب رفعت راشدي بكل قوته و هو يصيح عليه :: اننننننت مننووووووووو..؟ حيواااااان!!
رفعت اكل الراشدي الي انرسم رسم على خده منا و صار يضحك بهستيريا منا بعلو حسه ..
و هذاك الشخص اتنرفز كلش و لزم رفعت من بلوزه و صار يضرب بي راشديات و هو يكول :: راااااح .. تعترف .. وين .. ودييييتو.. الفلاش ..
و فجأة يلزم رفعت من ركبته و يخلي عينه بعيون رفعت و يبتسم و يكول :: اذا متعترف تدري شيصير؟؟ راح اكلك شيصير ..
:: راااح اجيييب زوجتك و ******* كدام عيونك ههههه و اريد اشوف شلووون ما تحجي يا قذر ..
رفعت عيونه تجدح نار و هو يباوع بعيون هلشخص ورة ما جاب طاري زوجته بلموزين و كووووة يلزم اعصابه بلكووووة و فجأة رفعت صار يبتسم رفعت يبتسم بوجه هذا الحيوان و يكله :: هه اريد جكارة.. ممكن؟
الشخص يوخر عن رفعت و يظل يتمشى رايح جاي و يحجي وية روحه مثل المخبل و هو يباوع على الكاع و يمشي :: ترييييد جكااارة؟ ( و يأشر عليه ) انت ؟.. تريييد .. جكااارة ؟؟ .. يوكف و يباوع لرفعت و يكمل كلامه ..:: انطيك جكارة و تحجي كلشي؟
رفعت و هو مايل راسه و مبتسم :: تنطيني جكارة و تفك ايدي حتة أدخن براحتي و ورة ما اكملهه راح احجي كلشي .
الشخص :: ههههه لا بدون ما افكك راح انطيك .
رفعت بكل هدوء :: لو جان كدامي واحد من ذولة الأغبياء الي برة جان كلت هذا يخاف يفتح ايدي اما انت؟؟ مااعتقد .
الشخص يقتنع :: اي انت اول تالي رجلك مشدودة متكدر تسوي شي ..
يتحرك ب اتجاه رفعت و يخلي الجكارة بحلكه و يورثهه اله و انوب يندار ورة ضهره و يطلع السجينة و يكطع الحبل و يبقى ورة ضهره ..
رفعت يدخن جكارته على راحته و هو يتلفت و يباوع و كانما ب بيته كاعد لحد ما يخلص الجكارة ..
الشخص :: يلله احجي الي عندك .
رفعت :: اني مااحجي شي لشخص مااشوفه كدامي .
و يشمر الكطف و هو كله ثقة بنفسه..
الشخص يفتر و يجي كبال رفعت و هو كلش ضايج و يكله :: يلله احجي دااشوف تاليهه وياك ؟
رفعت يتلفت يمنى يسرى ( استهزاء ) و يأشرله يكله تعال اشاورك ..
الشخص يدنك يم اذان رفعت و رفعت يشاوره و يكله :: الفلاش اذا تريده ؟ تلكاه يم امك!!
الشخص توه دينفعل و رفعت يضربه كَلَه على راسه و يشمر نفسه فوكاه و يظل يضرب بي و يغلط و هو يضرب و يضرب :: اذاااا تجيييب.. طاري.. اهلي ..مرة لخ .. ***** ****ك و يستمر بلضرب و ذاك يصيح من يمه و فجأة يدخلون الدواعش ركض و ينزلون على رفعت ضرب ورة ما يوخروه لحد ما يغمى عليه بمكانه بسبب الضرب ..
ينقلون رفعت لغرفته سحل و هناك بعد ما يحاول صلاح يصحي رفعت شكد ما يكدر بلاخير يصحى رفعت و هو يلكه صلاح فوك راسه و بين ما يشيل نفسه و ينتجي على الحايط يكول لصلاح :: مثل ما جنة نتوقع .
و هو بلكوة مستجمع طاقته ..
و صلاح يجاوب :: كول احجي ؟!
رفعت :: يعرفون بشغلة الفلاش .
صلاح :: يعني الخاين واحد من ثنين .
رفعت :: لو سيادة العميد محمد لو الرئيس نفسه.
صلاح يوخر عن رفعت و يجر حسرة :: هففف لا اني عرفته بعد .
رفعت :: سيدي ماكو اي كامرة هنا بس البناء كله بي تقريبا ١٠ يحرسوه.
صلاح :: و غرف التحقيق؟
رفعت :: ماعليهه حراسة و الشخص الي حقق وياي جاي من بغداد .
صلاح :: تعرفه؟
رفعت :: تذكرته اول ما صار كبالي .
صلاح :: اي كمل .
رفعت :: من يجي هذا الشخص ال١٠ دواعش يصيرون ٢٠ داعشي .
صلاح :: يعني ورة ما يحققون وياية راح يروح و يبقون ١٠ دواعش هنا .
رفعت :: اي سيدي .
صلاح يصفنلهه شوية و يكول :: ان شاء الله الفلاشه تكون بمكان آمن هي و مروة .
رفعت :: سيدي شراح نسوي ؟
صلاح :: مروة ما اظنهه تجي بعد و احنة راح نروحلهه يعني راح نطلع منا .. و هليومين !
رفعت :: سيدي و صهيب؟
صلاح :: هذا هم يجي وكته لا يظل ببالك . 
الكاتب *حيدر ((يمر هذاك النهار مرور الكرام بس صلاح جان متأكد انو هذا هو الهدوء الي يسبق العاصفة لحد ما بليل يسحبون صلاح و رفعت سوية من الحبس و يحطوهم بلسيارة و ياخذوهم للرمادي .. خطة الهروب بقت مثل ما هي ولو همة مجانو يعرفون شنو الي جان منتظرهم ابد بلرمادي ..
*؛؛اللحظات هاي من الرواية جنت امر بحالة نفسية كلش تعبانة اصلا .. و بنفس الوقت جنت اعرف نفسي بهذا البارت اني راح تدمر نفسيتي بسبب الأحداث الي راح تصير بس ما بيدي شي غير انو اكمل كتابة للنهاية! ...
حيدر✒ ..
دنيا ليل ..
توصل سيارات الدواعش لناحية داخل مركز الانبار و همة ينزلون منهه و يهوسون و رافعين اسلحتهم ليفوك.. لحد ما يلمون كل الناس الي بلشوارع و الناس تباوع عليهم و همة صاروا ينزلون رفعت و صلاح من البدي مال سيارة و همة امربطين بلسلاسل و مخلين اكياس على روسهم و يجرون بيهم لنص الساحة نفسهه الي مات بيهه مهند ..
رفعت و صلاح يتعرضون للضرب و الاهانات دائما و همة كابتين غضبهم بكلبهم و لحد الان ما فقدوا لا عقلهم ولا املهم..
و همة يركعوهم غصب بنص الساحة لحد ما ينزل الوالي من سيارته و هو يصير يتمشى ب اتجاههم و ابتسامته الجايفه على وجهه الحقير هذاك ..
و يكول للناس و هو يأشر على رفعت و صلاح و بعلو صوته..
(( هذولة الحيواناااات الي دخلو للدولة الاسلاميةةةة... ( و هو يجر الحجاية بحلكه هيج ) دخلووو و جان بظنهم انو همة يكدرون يثنونه عن قضيتنةةةة و يسوون الييي يريييدونه ابدولتنه دولة الخلاااافة ..
..يكمل كلامه و يكول للناس..:: ما نجحووا( يحط عينه عليهم ) :: ما نجحوا بهلشي بس احنة راح نقوم ب القصاص العادل عليهم .. ( و يرفع ايده للرسول )
الرسول يقرأ المكتوب الي بيده و يكول :: بسم الله الرحمن الرحيم..
اورد اليكم الآتي من خليفة الدولة الإسلامية في العراق و الشام ( ابو بكر البغدادي ) ... الخ .
يكمل الرسول القراية و يكمل الوالي كلامه و هو يوصل يم رفعت و يلزمه من شعره:: هاذي المرة الخليفة يحتاجكم و رحمكم ولو جان بيدي الأمر جان قطعت روسكم و نسلكم و علكتهه على مشارف الموصل ..
.
مختصر الكلام .. الامر الي اجه من الخليفة جان كالآتي(( انو هذولة الثنين بلذات لازم يبايعون الوالي على الخلافة و ينظمون للتنظيم.. و الا راح يموتون فورا .. ))
الكلام الي سمعوا رفعت و صلاح صدمهم بنفس اللحظة بس صلاح حس بلنكرة ( عرف بلحيلة مالتهم )
و بذيج اللحظات صارو الدواعش موجهين كل اسلحتهم على صلاح و رفعت و بعض منهم اجوي سحبو صلاح ورة ما فكو ايده و حلكه و همة يسحبوا و كامشي و يجرون بي .. صلاح يكول لرفعت :: دييير بالك تبايع.. .. يكمل كلامه و يصيح لرفعت :: رفععععت لا تبااااايع راح يخلوك تقتل اخوانك الي على الحدود .. رررررفعععععت لااااا تباااايع لاااا تنسه انننت لييش جييت لهناااا .
و يضربون صلاح و يظلون يضربون بي حتة يسكت و هو يصيح لرفعت انو ما يبايعهم و رفعت يحاااول يصيح و يريد يتحرك و عيونه جانت على صلاح بس جانو لازمي ما يخلو يتحرك .. لحد ما امرهم الوالي انو يعوفون صلاح .. يلله بطلو ضرب بي .. و كمل و امرهم انو يوكفون رفعت و يفكون حلكه هم ..
و جابو رفعت و وكفوا كبال الوالي و جانو ناصبين كامرة بُعد مسافة عنهم و دتصور كلشي ..
رفعت كبال الوالي و هو يباوع لصلاح و السلاح موجه على راسه بعد ما رجعو سدوا حلكه و صلاح يأشر لرفعت براسه بمعنى (( لااا.. ديير بالك!))
اثار الضرب على وجه صلاح خلت وجهه ما ينعرف ابد بوكتهه ..
الوالي يمد ايده و يفك حلك رفعت و يرد ينزل ايده للنص و يمدهه كدام رفعت و يكله :: يلله بايع حتة تعيشون ..
جان يريد من رفعت انو يبوس ايده حتة يكون تحت امره..
رفعت الي يباوع و دمعته بعينه و هو يصد على صلاح و انوب يصد على ايد الوالي و بدون ما يتردد يكول :: ليش تظنون انو اكو مبايعة بلغصب؟ اتركو صلاح و اني اسوي الي تريدوه.
.
صلاح يحاول يصيح و هو حلكه مسدود و الوالي يكول .:: ههه ايدي اذا رجعت من مكانهه مراح يحصل خير ابد و انت ماعندك فرصة حتة تساومني يااا ولد .
رفعت يضرب ايد الوالي ب ايده و يبتسم و يكله :: أعلى ما بخيلك اركبه.. و يصد على صلاح و يلكه الدواعش نازلين بي ضرب وين اليوجعك دك كتل كتل كتل و اول ما حاول رفعت يركضله لزمو و ضربو و كعدو بمكانه و هو جان يصيح عليهم ..
الناس ظلت تباوع بدون ما احد يكدر يقترب من جيش من الدواعش كدامهم و همة كلهم لازمهم الخوف و الوالي يؤمر المجندين مالته و يخليهم يبطلون ضرب ب صلاح و رفعت و هناك و هو يتمشى ب اتجاه رفعت .. رفعت الي توه ديحاول يكوم على حيله صهيب الوالي يخلي حذاءه على صدر رفعت و يدوس فوكاه و يكله:: هههه لك حيواااان انتو شنو ما تخافون؟
رفعت و هو يكح من الوجع و يستجمع انفاسه و وجهه مليان جروح :: اح..نة.. احنةة زلم العراق اح..نة ماا..كو اح..د كدر يخووف..نه لييه..سة افتهمتت؟ لولااا يا كلب!
الوالي يصير عصبي كلش و يوخر رجله و يدفر رفعت على راسه بكل قوته و اول ما حاولو الدواعش يضربون رفعت الوالي منعهم و هو يكول :: اتركوو هذا النجس مااريده يموت قبل ما يشوف شراح يصير!!هسة .
و هو يتحرك ب اتجاه صلاح و يوخر اللثام عن وجهه و يمد ايده و يفك حلك صلاح الي لكاه مليان دم و يتفاجئ ب ضحكة صلاح الهستيرية .. صلاح صار يضحك بكل قوته و هناك الوالي عصب أكثر و هو يلزم صلاح من حنجه و يباوع بعينه و يكله :: انطيني سبب واحد يخليني مااقتلكم هسة و هنا و كدام عيون هاذولة المبيوووعين( الناس )
صلاح يوخر راسه عن ايد الوالي و يباوع بعيونه مرة لخ و هو الدم تارس حلكه و يكله و بكل ثقة و هو يبز الدم من حلكه :: مو معقولة يكون السبب انو احنة مشترين الموت و الشهادة اصلا ؟
الوالي بكل عصبية :: لعد راح اخليييييكم تتوسلون حتة اقتللللكم . يوخر بسرعةة من يم صلاح و يؤمر المجندين و يكوللهم:: نزعوووو ملابسه كللللهن!! و يدير وجهه و يروح يم رفعت .
الدواعش لزمو صلاح و ربطوا على العمود علواكف و صارو يشكوون ملابسه لحد ما بقى بس بللباس الداخلي و بدون ملابس ورجعوا شدو حلكه هم.
رفعت و هو يحاول يكوم من الكاع و هو يباوع لصديقه و رفيق دربه و دموعه بعينه و منتهي كلش بسبب الضرب .. و اخيرا يكدر يحاول يكوم و ما كدر يحجي اي شي لحد ما صهيب الوالي يسحب الحَربة الي مخليهه بساق رجله و ينزل على رفعت الي جان جاثي على اركبه و ايده بسرعة و يلزمه من ركبته و رفعت عيونه على صلاح ما شالهه ابد و صهيب الوالي يخلي حلكه يم إذان رفعت و يكول بصوت ناصي:: اني اعرفكم انتو أهل بغداد عنيدين كلش اني هم مناك اصلا.. بس شوف ولك ههه صديقك ترة ما يعرف مصلحته زين اسمعني و مراح تخسر ابد .. رفعت يدير وجهه على صهيب و تتغير ملامحه و نار الغضب بعيونه و بدون ميحجي شي .. صهيب يكمل كلامه :: احنة النه مهلة ٣ اشهر و ندخل بغدادكم و ناخذهه و انت الك مهلة ٣ ثواني حتة تكوم و تبوس ايدي و تصير ويانة هاا!!! .. شكلت؟
صهيب الواثق من نفسه كلش و عايش اللحظة حجاهه بكل سعة صدره و رفعت يخزر و يباوع بعيونه و رد و جاوبه بدون اي تردد :: اشهدُ .. ان لا اله الا الله و أشهد أن محمد رسول الله .. اعتقد هسة اخذت جوابي!
.
صهيب يكوم على حيله و هو صاير نار من العصبية و يشمر الحَربة لإيد المجند و يصيح و يعله حسه بلمكان و اليشوفه عباله مخبل و يظل يتحرك و يعيط و يصيح للداعشي و يؤمره انو يحط الحربة على ركبة صلاح الي بقى يحاول بس يريد يحجي و يعيط و حلكه مسدود و ما هامه انو هو عاري كدام هواي من الناس اصلا ما شال عينه عن رفعت و الداعشي حط الحربة على ركبته و الدواعش لزمو رفعت بيدهم حتة ميتحرك و صهيب يصيح بوجه رفعت :: اذاااا ماااااا.. تباااايع .. ب ارادتك راح تباااايع غصب عنك افتهمتتتت؟
و الداعشي يغرز الحربة بكل قوته ب جتف صلاح و هو حلكه مسدود بلشريط الكل سمع صوت عياطه بسبب الوجع ...!
.
الموت جان بعيد عنهم مقدار شعرة .. غيرتهم و شجاعتهم و عزة نفسهم جان الهه كلام ثاني هذولة الثنين الي همة من طوائف مختلفة عن بعض وكفوا بوجه كلشي بذاك الوقت .. ممكن البعض يحس و يفكر و يكول انو العملية الي طلعوا علمودهه فشلت مثل ما كال العميد محمد .. بس برأي صلاح انو العملية ما زالت مستمرة ما دام هو و اصدقاءه بعدهم بلانبار ..
ممكن تحسون انو الحياة جانت واكفة بس هذا الحجي ينطبق عند الدواعش اي نكول واكفة بس ما ينطبق على مجموعة شباب جانو يتحركون بغيرتهم قبل كلشي ..
الحالة الي وصلو الهه بعد مرور هذيج الفترة كلهه من الزمن تخلي اي شخص بمكانهم يسلم الحمل و يِسلم من العقاب بدافع الخوف الا هُمه ..
جان عدهم هدف و اختاروا الموت على عدم تحقيق هذا الهدف ..
الكاتب*( اما هدف صهيب الوالي بوكتهه الي عرف عنهم كلشي حتة عناوين اهلهم جان يعرفهه .. هو يريد يأخذ الفلاش الي محد يعرف وينه و يريد يضمهم للتنظيم حتة يخليهم يقاتلون ضد الجيش العراقي و الحشد حتة يشوه سمعتهم و يضرب عصفورين بحجر واحد بس هلشي جان يعرفه صلاح و متوقعه كلش زين .. هسة واحدكم يسأل و يكول انو من ضمن خطة صلاح انو ينضمون للتنظيم حتة يكملون العملية زين هسة ليش ما ينضمون و الفرصة صارت بيدهم.. اجاوبكم و اكوللكم انو بوقتهه هلشي جان في حالة انو محد يعرف بلعملية و الأضرار راح تكون اقل .. بس ورة ما انكشف المستور و انفضحوا هنا انضمامهم راح يخرب عليهم أكثر ما ينفعهم لهذا جانوا رافضين بما معنى انو الظروف تغيرت )... المهم ✒
.
و كدام كل الناس الي متكدر حتة تفتح حلكهه كدام هول و إرهاب الدواعش الهم بذاك الوقت من الليل .. جانو صلاح و رفعت يتعرضون للتعذيب بنص الشارع و كدام الكامرة الي صورت كلشي ..
و لا رفعت قبل يبايع ولا صلاح سلم روحه و طبعا كدر يبقى متحمل كل التعذيب إلى أن اجتي اللحظة ..
:: ااااااااااااااااااااااااخ يا الللللللللللله .
صرخة صلاح و الحَربة مغروزة بجتفه الي ما ظل احد ما سمعهه..
صلاح ينزف و يفقد وعيه و شكله صار يرثى اله و هو بين الوعي و اللا وعي مربوط و مجروح و اللاصق يوكع من حلكه ..
صهيب الوالي و بكل عصبية بوجه رفعت الي صار حتة ميكدر يرفع وجهه و هو يبجي اي يبجي لا اراديا و ما تحمل عياط صديقه و صهيب يكمل كلامه و يكول :: شوف وللللك جلب كدامك واحد من ٢ .. لو تبايع لو تنزل مثل الجلب على رجلي و تبوووسهه ههههه و اذا ما سويت وحدة منهن .. صديقك راح يموت كدام عيونك و هسة .
رفعت يباوع لصهيب و هو حاقد عليه حقد بكد امة محمد و هو بس يريد يكمشه بيده و بدون ما يحجي شي.
صهيب يرفع ايده و يؤمرهم انو يقتلون صلاح فورا ..
رفعت يبقى يصيح:: لاااا عوفووووو كاااافي .
و هو ديحاول يتحرك و همة لازمي ..
الداعشي يخلي الحربة على ركبة صلاح الي صار بين الوعي و اللاوعي بسبب النزيف و الوجع .
و هو ديريد يكص نحره و اول ما يجرحه بركبته..
رفعت يصيح بعلو حسه :: مواااافق موافق موافق هاهي .
صهيب يوكف الداعشي . و يباوع على رفعت .
رفعت يكله و هو بس يريد ينقذ صديقه :: اوووك..ي اني راح اسوي التري.دوو بس عوف ص..ص..صلاح فدوة .
صهيب :: هههههههههه .
صهيب يضحك بعلو حسه و يكله :: يلله وليدي يلله .
رفعت و دموعه بعينه يحس ب ايد دفعته من وره ب اتجاه الوالي و هو مدنك راسه يتقدم شوي شوي ..
صهيب :: إنزل مثل الجلب ( و يصيح ) انننننزل حيوااان.
رفعت ينزل على اركبه و ميكدر يحجي شي و صار شكله مثل الجلب مثل ما رادو الدواعش و هو ينذل علمود ينقذ حياة صديقه كدام الناس كلهه ..
صهيب يصيح للناس و هو مبتسم و فرحان :: شوووفوهه لدولة العرااااق شلون تفقد هيبتهه كدامنا هههههههههه.
صهيب يباوع للكامرة و هو ماد ايده كدام رفعت حتة يبوسهه و يريد الكامرة تاخذه حتة توثق هلشي .
رفعت يباوع للكامرة رفعت يدري ب هيبة العراق على المحك و هناك يتذكر كلشي يتذكر نفسه و طبعا صهيب كباله ينتظر المبايعة ..
الدواعش تارسين المكان و اسلحتهم اموجهة على رفعت ..
جان ناسي انو الوقت جان ليل بوكتهه بما معنى انو هو فقد عقله لهاي الدرجة ..
النقيب رفعت يمر شريط حياته كدام عيونه و هو بين الخوف و بينه شعرة و بين الشهادة و النصر و بينه شعرة .. و على اساسهن راح يأخذ قراره .
هو ما يريد يستسلم بس المشكلة حياة صديقه بلنص ..
و هو يفكر و يستعيد ذاكرته و قوة شخصيته بلحظة و يصير يحجي وية نفسه و هو كاعد اكعود و عيونه علكاع و فارش ايده المليانة دم كدام عيونه و الوالي منتظره يبايعه.. رفعت يفصل عن العالم كله :: انيي.. شدااسوي اني..مو هيج ..جنت احجي على هاي الناس الي سلمت نفسهه بسبب الخوف زين اني شدااسوي هسة .
امي؟ امي راح تشوفني! هااا!!؟
العراق راح يضيع! شلووون!؟؟ العالم يشوفنه هيج؟! شلووون! ؟
.
رفعت المصدوم يصد عينه و يباوع لصلاح و يتذكر انو صلاح اؤمره انو ما يبايع مهما صار ..
رفعت يكوم يوكف على رجله ب كومة وحدة و هو عيونه الي مليانة دموع و أمل عيونه و نظراته الحادة تصير بعيون الوالي ..
الدواعش اسلحتهم موجهة كلهه على رفعت .
صهيب (يتفاجأ) :: شدتسوي انت؟! 
رفعت يحط عيونه بعين الوالي و بنبرة حااادة يكول :: العراق ما يضيع ! يا نكس.
رفعت الي عيونه مليانة دموع يكمز على حضن صهيب و هو يعيط بعلو حسه ( لبيييك يا عراق!)
و يسحب سلاح ( مسدس ) صهيب و يوكعون سوية بلكاع و الدواعش يترددون ب إطلاق النار .
رفعت يضغط الزناد بلحظتهه و هو يعيط على صهيب بلحظة مقاومته و رفعت جان فوكاه.
امة محمد كلهه سمعت صوت الاطلاق بلحظتهه و الكامرة الي جانت تصور كلشي وثقت كلشي.
ضوضاء المكان و ركضة الدواعش و الناس الي شافت كلشي بعيونهه و صلاح الي ما رجع لوعيه كل هاي الامور جانت سكينة و مي دافي ينزل على كلب رفعت الي مجان يشوف اي واحد من الدواعش كدام عيونه رغم وجودهم (مصدومين) و جسمه مليان دم و هو يكوم من فوك صهيب الي مات و فطس بمكانه و رفعت يشمر السلاح و يدير وجهه و هو يبجي و يصيح بعلو حسه :: عااااش العراااق.
و توه ديتحرك ب اتجاه صلاح و ما يحس الا الاسلحة صارت تنفجر بوجهه و كل الدواعش صارو يرمون على رفعت من كل مكان و جسمه يتشضه بلرصاص و هو من حلاة روحه بعده واكف على رجله مثل الصنم في حين الناس صارت تتراكض و تنهزم ورة البنايات و داخل الفروع و فجأة ينكطع صوت الاسلحة و رفعت ب ابتسامته الحلوة يوكع و هو عيونه على صلاح ..
يوكع رفعت بدون ما يكدر يحجي شي يوكع بمكانه و يستشهد بذيج الساحة و بنفس المكان الي مات بي مهند ... يتبع.

.
.
.
.
.
.
.
الاحداث بدأت تتعقد و الرواية بعدهه ب بدايتهه اتمنى يرجع الدعم مثل قبل . و اني مستمر احسن من قبل و باجر لو عكبة ينزل بارت ٩ .. و نعرف شسوة صلاح و شلون بقى عايش و شنو صار ويا و شلون انهزم من التنظيم ..
اذا ما منتبهين ف الهدف الأول من عملية الكمين تنفذ و هو مات صهيب الوالي رغم انو الثمن جان باهض كلش .
.
قراءة ممتعة .