فَلوغن

الفصل الرابع :: الدولة..

الواقع ..
الكاتب*حيدر(( صلاح يفز من النوم و يباوع على ريم كاعدة علحاسبة و هي تبجي و دمعتهه بعينهه و هو ضاج كلش لمن شافهه هيج .. ينتجي على المخدة و يهز راسه :: انتي شجااااي تسوين !
ريم تكوم من مكانهه و تروح لصلاح و بدون متحجي شي خلاهه بحضنه :: بلله باوعيلي .
ريم تباوع بعيونه و هو يلعب بشعرهه:: اعوفهه والله مااكتبهه تولي .
ريم :: لا حباب فدوة هاي لازم تكمل اريدهه محتاجتهه .
صلاح :: لعد يلله كومي اخذيني دااكعد يمج و كملي منين ما وكفتي ..
ريم تمسح دموعهه و تكله :: يعني ما جوعان؟
صلاح :: ههههه جوعان بس نكمل البارت يلله نتعشا كومي ..
ريم تاخذ صلاح يمهه و تكعد على الكرسي و تكتب...))
الفصل الرابع :: الدولة ..
.
ختلت ورة وحدة من الطاولات و اني صامة ايدي على رجلي و ابجي من الخوف و اسمع ناس برة تصيح (( دولة الخلافة في العراااق و الشاااام باقية )) و هو يلقي الشهادة مثل المجانين جانو كلش مرعبين .. و ماجنت اعرف شنو اسوي الدنيا صارت سودة بعيني و اني افز من صوت كل طلقة و كل عيطة برة و ارجف و اردد بيني و بين نفسي وي البجي و اني اتلفت يمنى يسرى :: بابا وينك!! بابا الحكني فدوةةةةة..
بوكتهه حسيت انو العراق سقط من سقطت الانبار و الموت صار بكل مكان ..
فجأة تنفتح الباب و يطبون ٥ أشخاص مسلحين و ملابسهم غريبة عبالك صدك بزمن الخلافة بس هذا بلحقيقة جان زمن الخرافة ..
همة يصيحون بلهجة غريبة :: فلشو كلشي تشوفو كبالكم و اقتلو كلمن يعترض طريقكم .
.
ملابس المدرسة انترست دموع و اني ارجف من الخوف اباوع عليهم لحد ما احد منهم شافني و هو يتحرك ب اتجاهي و يكول للبقية:: هههه باعو شنو لكيت!
يوصل يمي و اني اباوعله و اريد بس احمي نفسي :: عمو حباب عمو عوفني😭 .
و اني ابجي و هو يلزمني من شعري و يرفعني و يشمرني كدامهم و اوكع علكاع و ظليت ابجي من الوجع و الخوف و اسمعه يكول :: هاي احلى جارية للخليفة ههههه اليوم عشانة دسم.
اني هنا تأكدت انو بعد ماكو رجعة ليورة ولا خطوة و هنا وكع العراق بلمحضور و عيوني جانت تذب دموعهه قطرات دم على كاع ذاك المطعم ..
اخذونة سحل للشارع و دفرات و يضربون بينة لمن طلعت من المطعم و شفت الوضعية شبه منتهية زلم ميته بنص الشارع و النسوان و البنات ينجرن من شعرهن بلشوارع و بلقوة اني مسحت دموعي و عرفت انو هذا الكابوس هو الحقيقة هسة .. ما رجعت لماما ولا بابا الي صحتله هواي حتة يجيني مااعرف شنو صار وياهم بس اعرف شنو صار وياية كلش زين و مستحيل انساه و هناك و بنص الشارع و الفوضى تطبك سيارة بيضه بضهرهه كومة مسلحين و ينزل منهه شخص ملتحي و يباوع بنظرات شر و عدوانية بس هذا الشخص شكله جان مألوف اليةة و اني واكعة بلكاع و ابجي اول ما درت وجهي عليه ركزت كلش زين و عرفته و مسحت دموعي بيدي :: عمو امجد!!؟
.
الواقع ...
صلاح :: شو كافي حبيبتي انتي تعبانة لا تكملين .
ريم و هي تبجي :: صلاح هذا دمر حياتنه 💔 .
صلاح :: عيونج بعيوني بلله .
ريم :: ها ؟
صلاح :: الماضي صار بلماضي باعي هسة احنة وين و ذاك النكس وين ..
صلاح يخلي ايده على خدودهه و يمسح الدموع .. و يكول :: حبيبي اتركي خل اكمل اني كتابة .
ريم :: تمام .. اوك كمل ..
صلاح يكمل كتابة ...
.
امجد هو اخو حسين ( ابو ريم ) من غير أب يعني اخوه الجبير و ابوه هو من أهل الغربية اصلا بس صاحب سوابق جان و اصلا خلص حياته سجون و طيحان حظ و طبعا من مات ابو امجد.. أم امجد تزوجهه ابو حسين حتة يستر عليهه و طبعا اخذهه من باب انو هي تصير بنت صديق ابوه و بوقتهه اهله ضغطو عليه حتة ياخذهه لان هي امانة ابوهه يم ابوه و بذاك الوقت اجه حسين للدنيا و سموه سرمد بوقتهه
اما امجد ف جان محكوم بلسجن ١٠ سنوات بسبب السوابق العنده و من طلع من السجن اخوه حسين استقبله بس ضمن شروط واحد منهن انو امجد يجي للبيت على كد الزيارة و بس و بوقتهه امجد رفض و كال هذا بيتي مثل ما هو بيتك و اني جاي لأمي ما جاي عليك و امجد جان يكره اخوته كلش بسبب الغيرة و التهمة الي جانت على امجد جانت بصمة عار مو بس تهمة لهذا ابو ريم جان يخاف على عائلته و بناته بلمستقبل لهذا طلب الي طلبه ...
امجد طلع من العائلة و اختفى و محد عرف عنه اي اخبار و بعدين يلله سمعو انو هو بسوريا و ديشتغل ... لهذا امه جانت متطمنة من هلناحية انو ابنهه بعده عايش و بس و هذا كل الي جان مهم ...
.
ريم ..✒
.
ركضت على عمي و اني متأملة انو هو راح يعرفني و يحميني و وصلت يم رجله و وكعت و اني ابجي و استنجد بي و بوكتهه جانو الدواعش يطبون للبيوت و يجرون النسوان و الزلم كلهم برة للشارع يجروهم بلقوة و بلضرب و الاهانات و الفوضى صارت بكل مكان و كلهه صارت بورة ضهري من صار عمي كبال عيوني و اني ابجي يم رجله و ما اشوفه الا حط ايده على حنجي و هو الابتسامة بلشت تصير على وجهه و يرفعني لحد ما وكفت و هو نار الحقد بعيونه و كانما مو انسان كدامي كانما ركبتي صارت بين ادين حيوان شرس ضاري... و هو يكول ::ههههه انتيييي!! انتي كلش حلوة ..
و اني هنا اختنكت كلش و حسيت انو هاهي خسرت اني خسرت كلشي و اني ابجي و ركبتي بين ايدين الوالي حسب ما يسمونه! ..
امجد يدفعني و اوكع علكاع و بكل دم بارد يكول :: هاي اليةة صارت اخذوهه ..
و يشيلوني من الكاع و اني اعيط اريد بس واحد شريف يخلصني و همة مابيهم شريف ! ... بعد ما صار الرعب بكل مكان و عجزو البعض عن المقاومة و الخوف خيَم عليهم بوكتهه محد كدر يرفع رأسه ابد الا شخص واحد و بس! ...
مرت الايام و الليالي و احنة محبوسات ببيوتنة الي همة استوطنوهه و بوكتهه جان امجد الشامي هو الوالي على مركز الانبار بس بوكتهه جان مسافر لهذا جان بمكانه واحد اسمه صهيب الوالي أو مثل ما يسموه (الأمير!!) محد كدر يتقرب يمي بسبب توصية امجد الشامي بوقتهه و جان الكل منتظره يرجع .. و كل واحد بيهم عنده قيادة على بعض أو إمارة على بعض منهم و هذا القيادي جان يأخذ بيت وحده و يأخذ جواري بكد ما يريد و هذا جان حالنه الي تتحمل راح تُغتصب و ينهبوهه و التريدهم ف راح يشتروهه و يبيعوهه و الما تريد فهاي راح يكتلوهه و ما يدفنوهه ما كدرت التقي ب اهلي ولا حتة بلصدفة و ماادري اذا جانو عايشين أو لا مع العلم جانن يجن بنات هواي و يترددن على هذا البيت و من يطلعن لو يطلعن ميتات لو منهوبات لو مهزومات لو ينقلوهن لغير بيوت اما شنو صار ب بيتنه و بولايتنه كلشي ما جنت اعرف و جسمي تعود على الكتل يومية و اني اخدم ب بيت تابع لواحد من القادة الي تحت إمرة صهيب الوالي .. كلبي مات و صرت أكره كل الزلم ولو هذولة مجان الهم صلة بلرجولة اصلا .. و طبعا الليلة الما يستفادون بيهه من بنية ف يكعدون يضربون بيهه للصبح ..
اما اني ف مالكيت احد يحميني و عجزت عن حماية نفسي بس محد جان يكدر يوصل يمي و ياخذ الي يريده .. بذيج الايام صارت حكومة للي يسمون أنفسهم الدولة الإسلامية! و صار عدهم قضاء و احكام و قوانين ( دستور ) جابوهه وياهم من الاماكن الي اجوي منهه و جان سلاحهم القتل و دستورهم هو عدم الرحمة و دولتهم سوت شعب لنفسهه من خلال المبايعة القسرية و بوكتهه الناس من الخوف بايعتهم و رضو ب حكمهم بس مع ذلك هم جان اكو موت ...!
جان اكو موت لان جانت اكو ناس ما ترضى بلباطل قبل نهاية اول سنة للدواعش بلانبار و لان زادت قوتهم قوة اكبر .. اجتمعوا شيوخ العشاير بمكان حتة يتوحدون بس مااجتمعوا حتة يتوحدون ضد الإرهاب اجتمعوا حتة يتوحدون سوية وي الارهاب بسبب عجزهم و خوفهم على عوائلهم و ماتبقى هاي الناس الي ما ترضى بلباطل.. حجر عثرة بلنص .. و بوكتهه جان الكل يخاف الا بيت آل معيوف بيت ابو نشوان بيت الشيخ الي همة اباً عن جد من أهل الانبار و بوكتهه دخل عليهم الشيخ ابو نشوان و وكف بنصهم و رفع ايده و كال كلمته الي بقت تنذكر دائما و بكل ميدان .. :: دحجولي كلش زين و حطو كلامي حلق ب اذنكم و اذا ما رهملكم الحلق حطوه سلسلة على اركابكم حتة يصير مثل السيف اليكطع الروس من مكانهه اني لا خطيت ولا بطيت و انطيت .. انطيت رضوان و هو ب عز شبابه و ما نزلِت عليه ولا دمعة .. و اذا هاي الكاع الدايسين عليهه هسة ترييييد ددددم؟ ف نشوان بعده عايش و اذا رادت ددددم بعد ف اني موجود بس مستحيل اخلي احد يدوسني و يخلي شرفي جسر و يعبر عليه و انتو ساكتين عن الي ديصير هنا ..
واحد من الحضور :: انت مأمن على مالك و حلالك و نسوانك و ما تشوف الي نشوفه يا شيييخ !
الشيخ جوابه على طارف لسانه و بعصبية :: اموالي و عيالي راحو فدوة لتراب الوطن و أم نشوان ماتت ورة ابنهه و ابنياتي هزمتهن وية زلمهن و مااعرف وين صفى بيهم الدهر و انت تكلي مأمن؟ ليش هو اليعيش بنصكم على شنو يكدر يأمن؟ هاااا؟ ما تحجيييي؟
محد جان يكدر يسكت كلمة الحق و يردهه لمكانهه و الحاضرين مجانو يكدرون يثنون الشيخ عن قراره ..
انتهى ذاك النقاش الساخن و طلع بوكتهه الشيخ وحده بدون ما يطلع احد ويا و بوكتهه جانت الشيوخ تحاول بكل جهدهه انو تثني عن قراره حتة يبايع الأمير أو الوالي بس هو جان رافض رغم كلامهم الي جان يتكرر على الكل بوقتهه و جانو بلنَص يكولون :: بايع حتة نأمن على اولادنه! ..
.
دولتهم كبرت و صارت نفوذهم تزحف شوية شوية على الموصل و هناك ازداد الهم هم عندي و اني خايفة من الي منتظرني و خايفة على بيت جدي هم مع العلم اني ما جنت اعرف اي شي عنهم بذيج الشهور الي كل الاكدر اكوله عنهه هي شهور الموت و بليلة من الليالي بعد ما كملت شغلي نزلت لغرفتي الي جانت مخزن مال مؤونة حتة انام و بوقتهه دخل احد للبيت و سمعته يحجي وية الوالي :: مولاي هذا ضرف بي صور و معلومات البنات الي راح يطلعن لسوريا باجر .
الوالي يأخذ الورقة و عيونه بعيون الرسول الي اجاه و كال :: انت من يا ولاية ؟
الشخص :: مولاي اني من ولاية الموصل ..
الوالي :: ههههه عفية انت خوش تحجي زين البنات مو لازم صاحبهن يجي يختار اليريدهه بنفسه؟
الشخص :: مولاي هاي القائمة هي بيهه كامل المعلومات و اختارو الجواري الي راح ندزهن قبل يومين اصلا .
الوالي :: جيد .. تكدر تروح ..
الشخص :: من بعد اذنك مولاي ..
و هو طالع و اني نزلت جوة للمخزن ركض و صعدت على الصناديك و خليت عيوني علشباك و اباوع خاف اكو احد ويا و فجأة شفته وكف بصف الحايط مال بيت و بده يحجي وي روحه بكل حُركة دم و عصبية:: ربييي صبرني على بلواي و فرج هم العراقيين و خلصنا من ذولة الانجاس الهي ..
و جانت اول مرة اشوف هيج شخص اول مرة من شهور اشوف عراقي شريف كدام عيوني و اني صح مااعرفه رغم هو نفس لبسهم و نفس شكلهم بس حسيته انسان زين و احساسي ما يخيب و اني ما حسيت على روحي الا و اني اصيحله بلختلة :: يا ولد!! ياااا ولد !
و هو دار وجهه و بلش يدور علصوت و يتلفت لحد ما شاف الشباك و اجه يتحرك على كيف و انطه ضهره للشباك حتة ما يلفت نظر و اني نزلت راسي شوية و كلتله :: اني سمعتك و انت تدعي و استغربت انت منو ؟
الشاب يتلفت و يحجي كانما يحجي
وي روحه :: اعتبري نفسج ماسمعتي شي و مبينة من صوتج انتي بنية زغيرة اتمنى تديرين بالج على نفسج و ماتدخلين نفسج بهيج سوالف لان محد يرحم هنا ..
اني :: زين انت مبين مو منا ليش لهجتك بغدادية..
الشاب :: لا تسأليني سؤال مراح اجاوب عليه.
اني :: اوك تمام بس صارلي هواي ما مرتاحة لشخص هلكد .. زين يصير اعرف اسمك ؟
الشاب :: شتسوين ب اسمي هههه تريدين تِشكيني للخليفة؟
اني :: اني مااشكي غير بس ل ربي و اذا متريد لتحجي اسفة يلله رايحة اني .
الشاب :: اوكفي تمام راح احجي .. بس اتمنى محد يعرفه لان راح اكون صادق وياج ..
اني :: تمام .. يلله دااسمعك كول ..
الشاب :: اني اسمي....!
اني:: كول اسمك الحقيقي لا تتردد و لتخاف امان يمي .
الشاب :: اني اسمي مهند .. مهند العاني! ... يتبع

.
.
البارت الجاي راح نعرف شسوة الشيخ ابو نشوان .. و راح نعرف شسوة مهند حتة يوصل لهنا ..
و اكو ملاحظة مهمة و هي انو كل الأسماء الي كدامكم هي أسماء( مستعارة ) ما عدا ابطال الرواية ...