فَلوغن

الجزء ٢ / الفصل الخامس عشر :: ازمير ..

اسطنبول ...
.
تنزل طيارة الخطوط الجوية التركية بمطار اسطنبول بذاك اليوم الشتوي و ينزل منهه صاحب زوج سرى .. صاحب ابن خال ريم ..
تعرفون قصته من الجزء الأول هو الي تربى و كمل دراسته الثانوية بنص اهله و تزوج سرى أخت ريم الجبيرة لحد ما سافرو ل المانيا و كملو مشوارهم هناك بعد ما صاروا أطباء ثنينهم ..
.
صاحب يتلاكه وي واحد جان ينتظره بلمطار و همة يسلمون على بعض :: انت صمد؟
:: اي انت صاحب اكيد؟ سولفتلي ست سهلة عنك هواي ..
صاحب :: اي خوية بشرني وصلت لشي ؟
صمد :: اي وصلت بس اتفضل وياي للسيارة و احجيلك بلطريق ..
يمشون صاحب و صمد للسيارة حتة يروحون للفندق بس دقيقة ... نقطة نظام .. خل نرتب الاحداث شوية حتة متتخربط عدكم ..
.
اذا رجعنا للبارت الي قبل الماضي و اجينا لهاي اللحظة ف لازم نفهم انو بهاي اللحظة الي صاحب نزل بيهه بلمطار .. ريم بعدهه ب بيت ابو شادي بعدهه ما رايحة لإزمير لان احنا عرفناكم على سهلة و حجينا عن سرى و شلون سولفت لصاحب كلشي و صاحب سافر لإسطنبول و وراهه بيومين ريم ورة ما كملت الاقامة مالتهه يلله طلعت لإزمير .. المهم
خلينة هنا ما يصير نروح بعيد هسة ..
.
سيارة صمد ماشية و دتروح للفندق و هناك جان يدور حوار من اهم الحوارات بهاي الرواية و صمد هو موظف بلسفارة العراقية الي بتركيا و يصير صديق سهلة ..
.
صاحب :: احجي خوية طمنني .
صمد :: ابو بنين اني الاخبار الي وصلتني من سهلة انو البنية اسمهه ريم و دزتلي صورتهه هم بس الصورة قديمة يعني لو سهلة جانت هنا جان ساعدتنا حتة نلكاهه بصورة أسرع..
صاحب :: يعنييي؟
صمد :: فعلا دخلت بنية اسمهه ريم لتركيا بهذا التاريخ الدزيتو اليةة من مطار اسطنبول بس للأسف أكثر من وحدة يعني كسر بجمع الي دخلت ب اسم ريم هنة ١٧ وحدة و كلهن اعمارهن متقاربة ..
صاحب :: زين الاسم الثلاثي؟ طابقتو عليه؟
صمد :: ريم حسين ارشد بعد ما طابقنا الاسماء وي هذا الإسم طلعن النة ٣ بنات دخلن اسطنبول بهذا التاريخ و ب اعتبار سهلة نزلت اسطنبول ب١٢ بليل ف هيج راح يتقلصن ال٣ و يصيرن ٢ لان الثالثة نزلت الصبح لإسطنبول و ٢ جانن بنفس الطيارة و هنة شايلات نفس الإسم ..
صاحب :: هسة شلون نكدر نوصل الهه يعني لازم نضيق حلقة البحث أكثر.
صمد :: هي يا مواليد البنية ..   
صاحب :: ٢٠٠٠/٢/٢ .
صمد :: حلو يعني هسة عمرهه ١٧ بس دقيقة اسوي اتصال ..
صاحب :: تفضل ..
صمد يتصل على احد من اصدقاءه بلمطار و من يرد صديقه صمد يكله ..
::  Nasılsın Muhammed?Sana bahsettiğimiz kızın ve çocuklarının adının yazılı olduğu bir mesaj gönderdim.Onu aynı tarihte havalimanı kayıtlarından taksiye bindin mi binmedin mi arayabilirsin ve o neredeydi? Git?
Ve mümkünse pasaportunun bir kopyasını vermeni isterdim
.
:: شلونك محمد دزيتلك رسالة بيهه اسم البنية الي حجينا عنهه و مواليدهه تكدر تبحثلي عنهه بسجلات المطار و بهذا التاريخ نفسه الي نزلت بي .. اذا اخذت تكسي لولا و وين راحت .. و ياريت اذا تكدر تدزلي صورة لجواز سفرهه اذا امكن ..
..
محمد يأخذ وقته .. و صمد يغلق الخط و ينتظر منه رسالة .. و يوصلون للفندق الي لازم صاحب يبقى بي ..
صمد ينزل ويا صاحب للفندق و همة يتمشون و ياخذون الحجز و يصعدون للغرفة ..
و بنفس اللحظة موظف المطار كمل شغله و طلع لموقف التكسيات الي برة المطار و سأل السواق بعد ما شوفهم صورة ريم الي بلجواز و اخذ المعلومة الي يريدهه و بذيج اللحظة سوا اتصاله بصمد و كله :: انو السايق اخذهه للجانب الآسيوي من اسطنبول و جان وياهه ولد شاب لمنطقة ( دوزجة ) و هناك صعدو بسيارة لخ و دزله صورة الهه سحبهه من الجواز و دزهه ..
صمد يغلق الخط و همة توهم وصلو للغرفة مال صاحب ..
صاحب :: ها بشر خوية ..
صمد :: اجه الخبر لازم اروح ..
صاحب :: اوكف جاي وياك ..
صاحب يطبب غراضه للغرفة و يطلع ويا صمد رأسا و همة يمشون نازلين للسيارة ..
صاحب يأخذ الخط الجديد مالته الدولي من صمد و يدز خبر لسرى.. و صمد يشرحله كلشي و ينطلقون بلسيارة حتة يدورون على ريم ..
..
صمد يبلغ الجوندرما التركية ( الشرطة ) انو ريم مقيمة بتركيا و مفقودة من اهلهه من سنين و هسة ديدورون اهلهه عليهه و هناك الشرطة التركية تتدخل و توزع الخبر بكل اسطنبول و يدورون على ريم بكل الاماكن.. و صاحب و صمد يوصلون لمنطقة دوزجة و هناك يلتقون ب بنية سورية عايشة هناك اسمهه فرح و يبلشون يدورون داخل المنطقة و همة بيدهم صورة ريم .. بكل مكان يمشون و يسألون رغم انو المنطقة زغيرة جانت بس هي منطقة سهلية مابيهه هواي سكان بس هلشي مجان يكفيهم انو يلكوهه خلال يوم ..
السبب الي ما ساعد الشرطة التركية حتة تلكاهه بذاك الوقت هو انو ريم جانت بعدهه ما مكملة الاقامة ف ما تعتبر مقيمة بعدهه لهذا ما كدروا يلكوهه ..
بعد تعب نهار و نص النهار و بثاني يوم ورة الضهر .. صاحب يوصل للفندق و هو ميت تعب و هلكان يفتح باب الغرفة و يدخل و تتصل بي سرى ..
:: شلونج حبيبتي .
سرى :: صاحب حباب الكيهه والله صارلي يومين بس ابجي و مانايمة ليهسة حباب الكيلياهه فدوة .
صاحب :: ولج لتخافين هي لا مخطوفة ولا شي لتخافين ان شاء الله نلكاهه ان شاء الله ف لا يظل بالج بس كوليلي بنين شلونهه؟
سرى :: شلونهه زينة الحمدلله بس خطية تشوفني ابجي تكلي ماما شبيج و مااعرف ش اجاوبهه..
صاحب :: سراوي حبيبي لتبجين ان شاء الله الكاهه و ماارجع بدونهه بس كون ماتغير مكانهه و احنة دندور عليهه بمكان انتي بس ادعي و ربج يفرجهه..
سرى :: يا رب انت تسمعني و تعرف بحالي اني خسرت امي و ابوية و مااريد اضيع اختي هم يا ربي ترجعلياهه سالمة و كلشي مااريد من الدنيا ..
.
بعد يوم من البحث المكثف الشرطة تتصل بصمد و صاحب و يروحون للمركز و همة متلهفين و متأملين اخبار جديدة و هناك المفتش يبلغهم انو همة لكو العنوان الي كاعدة بي و يبعد عن مدينة دوزجة مسافة زغيرة بقرية ( ياقا كوي ) لان بهليوم نفسه هي كملت الاقامة مالتهه و لهلسبب كدرو يلكون عنوانهه..
و هناك الشرطة كدرت تتحرك و وياهه صمد و صاحب و راحو بوجههم لهاي القرية ..
.
السيارات تتحرك و صاحب ايده على كلبه و هو بس يريد يوصل و خلص الطريق كله و هو يدعي و ملهوف بس حتة يوصل للقرية و التوتر جان فول عنده و لحد ما وصلو و جانت دنيا مغرب بوقتهه الشرطة انطت العنوان لصاحب و كلهم وصلو للمكان و صاحب نزل يركض .. يركض و كانما مضيع شي هنا و كانما مضيع بنته ..
.
صاحب يركض و صمد و الشرطة وراه لحد ميوصل للباب ..
.
صاحب و هو صوته تعبان :: خوية كلتلي عراقي مو ؟
صمد :: اي عراقي ..
صاحب يدك الباب .. يظل يدك الباب ..
لحد ما تنفتح و يطلع منهه رجال جبير يباوع ب استغراب ..
:: Buyrun .
( تفضلو )
صاحب :: انت ابو شادي؟
ابو شادي ب ابتسامة عريضة :: اهااا عراقيين على راسي اي اني تفضلو ..
صاحب يلزم صورة ريم :: تكدر تساعدني و تكلي اذا تعرف هلبنية لولا؟
ابو شادي يتمعن بلصورة و يجاوبهم :: مو لازم اعرف انتو منو بلاول ؟ و الشرطة شعدهه هنا؟
صاحب :: ارجوك ساعدني و لتخاف هاي الشرطة بس دلتني على بيتك و كلي تعرف هلبنية الي بلصورة لولااااا؟
ابو شادي :: لا مااعرفهه..
يدير وجهه ديطب.. و صاحب يلزمه من جتفه ..
:: انت مبين عليك رجال محترم بس اني لازم اوصل الهه هاي تصير بنت عمتي و اهلهه صار سنين يدورون عليهه اوكف ثواني .
.
صاحب يطلع صورة لهوية مرته و يخليهه كبال وجه ابو شادي و يكله :: ركز بلصورتين زين و ركز بلاسم هم .. انت اكيد تعرفهه و تعرف اسمهه هم اني اصير زوج اختهه دااكلك ساعدني ..
.
ابو شادي يجر حسرة :: هفففف ابني انتو وين جنتو كول هيج من البداية .. ابني البنية هاي اجتي من العراق حتة تنهزم لأوروبا و اليوم اني كملت اقامتهه و قبل ساعة طلعت بحافلة رايحة لإزمير وياهه شباب و بنات سوريين.
.
صاحب دمعته بعينه :: امروتك لا تكولهه انت متإكد؟
.
ابو شادي :: اي بوية متأكد و بلدليل جان وياهه شاب مصري اجه من العراق اسمه .... اسمه منصور .
.
صاحب يشبع قهر و يضرب على راسه و يعيط :: اوووووووف .
يباوع لصمد :: هسة ش اسوي اني شنو اكول لاختهه؟
صمد ياخذله صفنة :: ياخوية الطريق منا لإزمير يأخذ ٦ ساعات يعني همة و الوحدة بليل يوصلون و هنا بهلحالة احنة منكدر نسوي شي لان لا عدنا امكانية نسبقهم ولا عدنا امكانية نلكاهم الا نلجأ للشرطة و هذا احتمال ضعيف لان ممكن تغير وجهتهه و مانلكاهه و مانلحك يعني .
.
صاحب يصيح بعصبيةة و هو اعصابه صارت نار :: الله يلعن الشيطااااان..
.
ابو شادي :: اوكف اوليدي اني يمكن اكدر اساعدكم .
صاحب :: اي يا الله . كول عمي .
.
ابو شادي يطب جوة و يصيح بنته سما و يسألهه اذا عدهه رقم ريم أو شي يتواصلن بي سوة .
و يطلعلهم..
.
ابو شادي :: ابني هاي عندي بنتي دائما تاخذ حسابات الناس العراقيين الي يجون لتركيا حتة كلشي يصير خاف يحتاجونة بشي أو لا و انت تدري هذا باب رزقنا ..
.
صاحب ترد الروح بي :: ايييي عمي !
ابو شادي :: ابني هذا حساب البنية الي تدورون عليهه مال فيس بوك.. بعد انتو و حظكم حاولو تتواصلون وياهه و الله يعينكم و يساعدكم.
.
صاحب يطير من الفرح و يحضن ابو شادي من الفرحة .. و صمد يصور الحساب بجهازه ..
.
صمد يستعين بمساعدة الشرطة المحلية و يتواصلون وية شرطة ازمير حتة تساعدهم لان ب حالة انو الحافلة وكفت بلكراج هناك .. ف راح يلكوهه بسهولة..
.
يتحركون من مكانهم و همة رايحين للفندق حتة صاحب يأخذ غراضه و بنفس اللحظة يتصل بسرى و يبشرهه و يكوللهه انو هو مسافر لإزمير و دزلهه حساب ريم مال فيس بوك..
.
ريم و منصور جانو بطريقهم لإزمير .. و ريم بوقتهه قررت تشغل جهازهه و ما تشوف الا و جهازهه يدك .. تباوع !! حساب اختهه سرى ديتصل عليهه ..! .. طبعا مو الحساب القديم الي راسلته هي .. هذا حساب جديد و هي ماتعرفه..
المهم ..
بعدين نعرف شصار وياهن ..
.
.
بغداد ..
.
صلاح جان ينتظر مروة بلبيت ..
.
و مروة تعبر جسر الجادرية بسيارتهه و هي وياهه ابن خالتهه عبد الله و سيارتهم تمشي و جانت دنيا ليل اصلا و فجأة مروة تغير طريقهه..
عبد الله :: ولج ليش منا مو كلتي رايحين للبياع؟
مروة تباوع بلمراية :: بس اصبر عبدالله ..
دقيقة و مروة داست بانزين و زادت سرعة و غيرت نمرة ..
عبد الله يباوع وراهم و يصد يباوعلهه :: يصير تكوليلي شديصير هنا؟
مروة عيونهه بلمراية :: اكو احد لاحكنا هاي السورنتو البيضة لاحكتنا .. العصر هم جانت وراي تمشي ..
عبد الله :: لا بربج هسة شنسوي ؟
مروة :: معليك خليهه وراي و معليك ..
و هناك تتغير عملية المراقبة و تصير عملية مطاردة ..
بعد ما صاحب السورنتو اكتشف انو مروة لاحظته..
.
مروة تمشي بسرعتهه و السورنتو لاحكتهه و مروة تطلع من شارع و هذا يطلع وراهه.. تطب بشارع و الأخير يطب وراهه و ماعافهه ابد و هي مطولة خلك ويا كلش .. و تذبه خامس بنص سيارات بغداد و هو هم يبقى وراهه ما يعوفهه لحد ما اتتوهه بتقاطع المطار بسبب الازدحام و دنيا ليل و تفتر و ترجع للبياع..
مروة :: عبود شوفه موجود؟
عبدالله يباوع بضهرهم و يظل صافن يدور بين السيارات الي بضهرهم ما يلكاه..
عبد الله :: لا اختفى الضاهر تيهنه ما يحصلنا بعد ههه كفو والله طلعتي مو سهلة..
.
مروة تباوع لعبود :: مو سهلة شنو ولك هههه ليش ترة اني دائما مو سهلة ..
عبد الله :: اسفين عمي هههه .
.
بعد ربع ساعة مروة و عبد الله ب بيت صلاح و همة ملتهين بلحجي و بلتخطيط بيناتهم..
بس بذيج اللحظة جان اكو شخص قريب من الفرع مال صلاح و ديحجي بلتليفون..
.
:: اي سيدي مثل ما جنت متوقع ههه راحت لصلاح .
.
:: اي سيدي اني مراقبهه هي عبالهه خلصت مني بس بعدت نفسي شوية حتة ما تبطل مشوارهه و ترجع لبيتهه ردت اعرف وين رايحة و طلع مثل ما كلت انت ..
.
:: لا سيدي محد يم بيتهم الوضع امان و اني بعدني بسيارتي بلسورنتو ما بدلتهه..
:: حاضر سيدي.. حاضر سيدي ..
.
يتبع ....
.
.
.
تابعو حساب الكاتبة زهراء الطائي ..
عدهه رواية كلش حلوة نزلت البارحة اول بارت اسمهه ( بركان شاهين ) الرواية تجنن و بعدهه ببدايتهه اتمنى من تتعذبون بسبب تأخيري بتنزيل البارتات ههه تروحون تعوضون يمهه لان متتأخر ابد .
https://www.wattpad.com/user/zezazozo?utm_source=android&utm_medium=link&utm_content=share_profile&wp_page=user_details&wp_uname=Haiderpoet97&wp_originator=jqPBbaeXD8lzeZxSsa1FPKn0zSJnHCFZh%2FC8T2l0Ogps9GMyjBUb100E3OrT%2BGwDani2YB9sUHhnp9X0UQ15qxOrl7Wr8aGKSYHPFadT%2ByYnPPfs5sZi79i7vWOM%2FAoZ