فَلوغن

الجزء ٣ / الفصل ٢١

مهند :: صلاح ابني لتعوفه وحده ابني محتاجك صلاح لتعوف سيوفي وحده .
صلاح :: اني ما عفته صدكني ماعفته لتسوي بيةة هيج مهند اني ماعفته كلشي صار غصبا عليةة .. ما عفته .. ما عفف..تةةةة .
.
صلاح يشوف حلم و هو نايم و يردد بينه و بين نفسه هاي الجملة و هو يتخبط بنومه
فواز يطب ركض للغرفة و هو يكعد صلاح :: صلاااح صلاااح اكععد يمعود صلاح خويةة.
.
صلاح يفز من النوم و هو يفتح عيونه يلكه فواز كدامه و يبقى صافن .. يدير وجهه يخلي ايده و يفرك راسه و يكول لفواز :: ساعة بيش؟
فواز :: خوية شفت حلم موزين ؟
صلاح :: لا اني الموزين مو الحلم .
فواز :: ساعة ب٣ خوية ارجع نام هسة و الصبح خير ان شاء الله.
.
يرجع صلاح لفراشه و هو صافن و يفكر ..
.
و صار الصبح ..
.
صلاح كاعد و يجي فؤاد يخلي الريوك كدامه و صلاح كلعادة .. نفسيته زفت و مايشتهي .
فؤاد :: تريك خوية والله ميصير تبقى هيج بعدين شنو هاي اللحية يا خوية هي فترة و تعدي صدكني بس لازم احنة نتحملهه بكل مساوئهه .
صلاح يخزر بعيون فؤاد و هو الف حسبة بباله و يكله :: جيبلي التليفون فؤاد .
.
فؤاد يجيب الجهاز ..
.
صلاح :: اكتب ..
فؤاد :: شنو ؟
صلاح :: نشوان آل معيوف .
فؤاد :: خوية شتريد تسوي ؟
صلاح و هو يخلي ايده على راسه و يحكه يباوع لفؤاد صفح :: انت راح تكتب و تتصل و فواز مراح يعرف بشي ابد . تمام؟
فؤاد :: خوية لتسويلنا مشاكل يمعود مابينة حيل .
صلاح يصير عصبي :: فؤؤؤؤاد دااكلك اتتتتصل يلله فضني .
فؤاد :: حاضر حاضر بس اخيك بسرعة مو تطول .
.
فؤاد يطلع حساب نشوان و يدخل عليه و يتصل و هو ينطي الجهاز لصلاح .. يخلي ايده على جتفه ..:: صلاح ؟
صلاح يباوع لفؤاد ..
فؤاد :: اذا طلعت اي معلومة عنك انو انت عايش ما تعرف الموقف الي راح ننحط بي .
صلاح يباوع لعيون فؤاد :: من تصير بموقفي عود نشوفك شتكول بوقتهه .. و يوخر ايد فؤاد من على جتفه ..
ينفتح الخط و يسمع صوت :: الوو منو ؟
صلاح :: افتح كامرة و تعرف منو .
نشوان يفتح الكامرة و يتفاجئ من الي كدامه
:: الله أكبر هاي انت؟ صلاااح؟ اوكف دقيييقة .
نشوان يعوف الجهاز و يركض .. انوب يرجع يأخذ الجهاز يباوع لصلاح و هو مصدوم :: خووووية صلاااح ولك انت مووو متت؟ شنو هاي يا الله
.
نشوان مصدوم و صلاح يرد عليه .. :: على اساس بس هاي شغلة سالفتهه طويلة خوية انت بس طمنني عنكم بعد اخوك بس كلي شلونكم سيوفي شلونه ؟ وينه يمك هسة ؟
نشوان صافن و يباوع لصلاح و يرد بصوت ناصي :: اي .. اي .. يمي بس مروتك خوية فهمني شديصير اني رحت لبغداد و كالولي صلاح استشهد و جان يوم فاتحتك بوكتهه و تعرفت على اخوك و حجيت ويا كعدنا و سولفنا يعني بس هسة .. ماادري .. انصدمت .. خوية انت وين فهمني ..
صلاح يحرك الكامرة و يخليهه على رجله و على الكرسي و نشوان ينتبه و يرجع يكول :: لا حول ولا قوة الا بالله.. لك هااااي شنوووو منو سوة هيج بيك خوية احجيلي مو كطعته لكلبي.
.
صلاح :: نشوان باوع .. محد يدري بيةة عايش و هلشي فترة و ينتهي و ارجع لاهلي بسلامة كل الي اريده منك هنة شغلتين و وراهه راح اسد الخط و كانما ما خابرتك و من ارجع للعراق نكعد و نحجي بكلشي .
نشوان :: يعني انت خارج العراق؟
صلاح :: وقت ماعندي حباب افهمني.
نشوان :: حاضر خوية كول اسمعك ..
صلاح :: اول شغلة اريد اشوف سيف جيبليا حباب .
نشوان :: حاضر ..
.
نشوان يكوم لأم مهند يأخذ سيف من يمهه و يكعده بحضنه و يكله :: باوع راح اشوفك واحد يحبك هواي و هو طلب انو يشوفك لان مشتاقلك تمام؟
سيف يحرك راسه يعني ( تمام )
صلاح يباوع بلكامرة و يشوف سيف و ما يتحمل و تنزل دموعه و هو يحجي ويا بصوت مهضوم و يكله :: شلونك حبيبييي ؟
سيف يبتسم بوجه صلاح و يستحي يرد . و نشوان يشاوره .. :: كله زين عمو انت شلونك ؟
سيف الي جان آية من الجمال بشعره الاندومي و خدوده الي امتفحه و جان طالع على امه بس ماخذ عيون ابوه يباوع لصلاح و هو مستحي و يكله :: اني زيين عمووو انتَ شووونك .
صلاح يمسح دموعه و كوة يحجي :: اني هسة صرت زين يا روح عمك ولك وين راح هنودي عنك و ماشافك من كبرت ااااخ يا بعد ضهري .
.
سيف يباوع لوجه نشوان و قبل ما يبجي لان شاف صلاح يبجي .. نشوان يشاوره و يدزه لأمه و يبقى هو يحجي وية صلاح :: خوية الله يرحمه ابن عمتي بس كلي شتؤمرني بعد يا حيلي يا خوية فرقتنا الدنيا .
.
صلاح :: هففف .. محتاجين فلوس؟ شي ؟ انت شلونك شدتسوي ..؟
.
نشوان :: اريدك سالم خووي.. اني جبت مرتي و اهلي و كعدت قريب على عمتي هنا مو سيف أمانة بركبتنة و انت وصيتني عليه بعد وين اروح ؟ و دااشتغل و الحمدلله .
.
صلاح يوعد نشوان انو راح يدزله حوالة ( فلوس ) كل شهر للعراق علمود يصرفهه على سيف و ينهي المكالمة بعد ما يحذره انو هذا الاتصال لا دار ولا صار و يبقى سر بيناتهم ..
.
صلاح يدفع كرسيه ليبرة و فؤاد يطلع وراه ..
.
صلاح :: الطيارة مالتي بيش الساعة ؟
فؤاد :: بعد ٥ ساعات .. و سيادة العميد انطه امر لمروة انو تبقى ترافقك هنا بس ماادري شو ماجتي ليهسة .
.
صلاح يرفع راسه و يباوع لفؤاد الي واكف وراه :: حقكم تعبتو مني ..
يرجع ينزل راسه و يكمل كلامه .. :: اني تعبت و تعبتكم هاي الفترة كلهه.
فؤاد :: لا خوية شنو القصة بس انت تعرف احنة ملتزمين ب امر من بغداد و لا تنسه انت اعصابك تعبت لان كلشي صار فجأة و صار هلقدر هذا و ان شاء الله تصير احسن و تكوم على رجلك يكلك الطبيب الي ب المانيا عراقي و يفتهم و راح يبقى وياك لحد ما تصير احسن ..
.
صلاح :: و اهلي ؟
فؤاد :: كمل علاجك و اتحسن و احنة راح نرجعك لاهلك مثل ما جبناك بس تدري .. منتظرين معلومات من سوريا حتة على اساسهه نطمئن على رجعتك لاهلك بالسلامة و للابد .
.
صلاح :: ان شاء الله.. طيارتكم شوكت ؟
.
فؤاد :: فواز ديكمل الاجراءات يعني وراك بساعة ان شاء الله راجعين احنة لبغداد .
.
صلاح :: دزوني وحدي لبرلين مروة دتنتظرني هناك اصلا هي راح تستلمني من المطار ..
.
فؤاد :: اهاا.. ان شاء الله خوية .
.
.
تل احميس .. حدود سوريا ..
.
حسين خاتل ورة الحايط و صوت الدواعش برة بعد ما لمحو و ركضو وراه و همة يدورون عليه بكل مكان و يصيحون ..
حسين ورة الحايط متخفي و هو يلهث و تعبان من الركض .. و يسمع احد ديمشي قريب عليه ..
حسين يختل بطارف الحايط و ماعنده خيار غير انو يدافع عن نفسه ..
و اول ما يطلع كدامه الداعشي و يشوفه كدامه ..
حسين رأسا يلزم سبطانة السلاح و يرفعهه و يدفر الداعشي تحت الحزام و الداعشي يعيط بمكانه ..
حسين يأخذ السلاح رأسا و يرمي على الداعشي و يقتله ..
حسين يلمح الدواعش وراه.. و هو بيده السلاح يركض و يكمز من الشباك و همة يلحكوه..
.
حسين يركض بين البنايات الطينية الزغيرة و يتختل و يفكر بشغلة وحدة و بس ..
.
يفكر ب بناته يفكر ب بناته و بس و هو يعرف هذا هو السبب الي خلاه يبقى عايش ليهسة..
.
يختل وره بناية و ضهره للحايط و سلاحه بيده .. و كلبه يدك بسرعة و يريد يطلع من مكانه .. حسين يمسح العرك من كصته و يحس على الدواعش قريبين عليه ..
.
حسين الي جان عمره نهاية الاربعينات جان بي الحيل حتة يجابه الخوف وحده و يدافع عن نفسه رغم انو هو تعبان و مريض بسبب التعذيب..
من حلاة روحه يطلع نفسه من ورة البناية و يصيرون الدواعش كباله و هو يصير يرمي عليهم    
و جانو دواعش ثنين .. و يرمي بوجههم و يكتلهم ثنينهم و يدير وجهه و يكمل الهروب و يسمع صوت البقية وراه بين البنايات.. جانت دنيا ليل .. و حسين عايش اكبر صدمة بحياته من شاف اخوه وياهم بس من سمع اخوه يؤمرهم انو يقتلوه بعد ما شافه طبعا .. اضطر حسين ينهزم و يدافع عن نفسه ..
حسين يركض .. يركض .. يركض .. و يوصل لفرع نهايته مسدودة و ينصدم من الي كدامه و بعد مايدير وجهه يشوف الدواعش حاصروه و موجهين اسلحتهم عليه و هو موجه سلاحه عليهم و ما يعرف شنو يسوي و رجليناته بلكوة شايلته..
.
و جان يوصل امجد الشامي و هو يدخل بنصهم و عيونه على الدواعش و يرزل بيهم و يصيح ..
:: هوووو واااااحد ما كدرتوو تقتلووووو؟ هااا؟
و يباوع لوجه حسين و يبتسم :: ههه القتل بعروقنا اني انتبهت اكو ٣ جثث لمقاتلينا انت تركتهم بلخلف ..
حسين بكل عصبية و يعض سنونه و يجاوبه :: بشنو بعت وطنك؟ يا نذل انت من يا ملةةة؟
امجد يفتر بمكانه و يدير وجهه على حسين :: وطنك؟ هههههههههه وطنك مبيوع من زمان يا ابو سرى انت عن اي وطن جاي تحجي؟
.
حسين يدير وجهه و يتفل بلكاع كدام امجد و امجد عيونه تصير شرار و هو يباوع لحسين الي يجاوبه :: الوطن ربى جلاب هواي و هسة همة عايشين احسن منك داخل العراق اما انت ف ما متربي من الاساس و تفلت بنص الماعون الي اكلت منه يا نذل بس كلي شنطوك نطوك فلووس؟ ولك تبيع اهلك و ناااسك علمود فلوووس؟ جم نفس بريئة كتلت ليهسة علمود الفلووس؟ هاااا،؟
.
امجد يرفع ايده و يبلش يحسب ب استهزاء :: قتلت امي و اهلي كلهم و قتلت زوجة اخوية أم سرى و قتلت سرى و زوجهه و ريم و حبيب كلبهه صلاح و قتلت نص الناس الي بلموصل ..
ينزل ايده و يصيح بوجه حسين الي صار مصدوم بمكانه و يكمل امجد كلامه و يكله :: و مااااااكو جلللللب واااااحد طللللع و طااالب بدددمهم ولا سووووولي شي ..
امجد يفتح ذرعانه بلهوا و يفتر ب استهزااء و يكول :: و هاااي اني كدامك بعدني عااايش .. الوطن الي ما يعرف يأخذ حق اولاده شلون اضمن حقي يمه ..
.
حسين يعيط بمكااانه و يبجي ولك :: نذذذذذذذذذل حيوااااااان .
يشمر سلاحه و يركض يشمر نفسه على امجد و امجد يأشر للدواعش حتة ما يرمون ولا رصاصة .
حسين يوكع امجد و يصير فوكاه و يلزمه من ركبته و يصير يضرب بي بوكسات و هو يبجي :: نذذذذل نذذذذل نذذذذل شلووووون كلببببك يخلييييك تقتل النااااس الابريااااااء نذذذذل نذذذذل ..
حسين يضرب و امجد يستقبل حسين يضرب و امجد يستقبل لحد ما حسين ياكل ضربه على ركبته بلسلاح و يدوخ و يوكع بمكانه و يفقد وعيه.. يكوم امجد و هو يمسح الدم من وجهه و يباوع لحسين اخوه ب نظرة اشمئزاز و يتفل على وجهه.. و يؤمر الدواعش و يكوللهم :: شيلوو.
.
و يتحرك امجد و يركب سيارته و الدواعش ياخذون حسين سحل للسيارة و ينطلقون بي للوكر مالتهم ...
.
.
كرواتيا ..
.
ريم ✒ .
.
كدرنا نخلص كرواتيا بعد كم يوم من دخولنا الهه و لان ما كدرنا نبقى نتحرك بلسيارة .. اضطرينا نتحرك على راحتنا و نعبر بعض المدن مشي و نرجع نركب السيارة حتة نعبر المدن الباقية لحد ما وصلنا بعد كم يوم بليل للحدود الي تفصلنا عن سلوفينيا بمدينة ( روبا ) و الي جانت مدينة سهلية و جبلية و كلهه غابات
.